خبايا نسائية (9)

- فلانة إتطلقت وماخدتش غير هدومها بس.
- خليها تحمد ربنا غيرها اتطلقت وماخدتش ولا حتى هدومها.

--------------------------------

- شايفة بيحبنى إزاى لدرجة تخليه عايزنى أرد عليه بسرعة بالموافقة علشان ييجى يتقدم لى مع أهله.
- وليه ماتقوليش أنه بيعمل كده علشان مايديكيش فرصة تفكرى.
- هو أنا محتاجة أفكر مع كل لهفته عليا!!.
- لو مافكرتيش دلؤتى فى مشروع عمرك اللى هو زواجك هتفكرى إمتى ؟؟.. وبعدين عريس الغفلة ده أنا عارفاه كويس ده شخص مزواج وكل مرة اتزوج فيها كانت بنفس الطريقة يبنج الضحية اللى هى العروسة المنتظرة بكلامه المعسول وبلهفته عليها وبرائحة عطره الفواحة واتصالاته ورسايله المستمرة إلى أن يتم الزواج وبعدها البنج بيروح والضحية تفوق وتكتشف إنها عاشت أكبر خدعة فى حياتها وده سر زواجه السريع لإنه عارف إن لو أى واحدة فكرت بجد إستحالة ترضى بيه كزوج.

-------------------------

أجمل ذكرياتى معاك وأحنا بنلعب ريست.

------------------------

أنسى إيه!!.
أنسى غدرك وجرحك وإهانتك؟؟.
وليه!!
علشان أرجع لك تانى!!.
طيب ما بناقص.. أصل من الغباء أن أعطى الأمان لمن خان الثقة ونكث العهد ولو مرة واحدة.

--------------------------

- هى ما خانتوش.
- لأ خانته.. مش قالت أسرار شغله لأعدائه تبقى خانت ثقته فيها.. مش قالت لراجل غيره "بحبك" يبقى خانته بقلبها.. مش اتمنت غيره وهو معاها يبقى خانته بخيالها.
مش شرط تكون الخيانة جسدية.. فللخيانة أنواع كثيرة.

------------------------

- اعملى حسابك بعد ما هنطلق هتاخدى حاجتك وأنا هاخد حاجتى.
- واضح إنك ناسى إنك مالكش حاجة هنا أصلاً علشان تاخدها إلا هدومك.
- والعفش اللى أنا جايبه!!.
-ده يبقى مهرى اللى أنت أرتضيته على نفسك ولا كنت عايز تتزوجنى ببلاش وكمان دلؤتى عايز تطلقنى من غير ماتعطينى أى حقوق.
- اعتبريها زى مايعجبك الحاجة دى أنا ناوى أتزوج عليها ومش هجيب عفش جديد.
- ده إيه الجبروت اللى أنت فيه ده.. وبتقولى الكلام ده فى وشى عادى كده!! (تغلبها دموعها وتنهار فى البكاء).
- أنتى بتعيطى ليه دلؤتى؟؟ إحنا بنتفق وبنتناقش عادى.
- بعيط على نفسى وعلى خيبتى فيك.

------------------------------

- أنا قررت أسافر.
-ياااه هو أنت لسه هتسافر!! ما أنت بقى لك كتير بعيد عنى ومابشوفكش ولا بتكلم معاك ولا كأننا عايشين مع بعض.. عايز تسافر سافر ..مش همنعك زى كل مرة على الأقل هيبقى فيه سبب لبُعدك عنى.

-----------------------------

سامعة همهماتك البايخة من أول لحظة بتدخل فيها أوضتنا..
سامعة تأففك من كل حاجة..سامعة كل حاجة بتقولها وأنت رايح تنام.
وسايباك تفضى شحنتك السلبية على كل حاجة مابتقدرش تقولها قدامى وبستمتع بكونى عاملة نفسى نايمة.
مع علمى إنك تقصد إنى أسمع وإلا ماكنتش تكلم نفسك بصوت عالى..لكن مش هتخانق معاك ولا هعلق على أى حاجة أنت بتقولها طالما لم تواجهنى .

-----------------------------

-أنتِ اختارتى غلط.
- بس أنا ماختارتوش.. أنا زى اللى اتقدم لها عصير شكله حلو فشربته من غير ما اعرف أنه مُسمم.

-------------------------

بتغيرى عليه منى ليه.. مش ذنبى إنى حلوة فى عينيه.

أعلنت خطوبتك عليها مع إن نظرة إعجابك بيا فى عينيك ماليها.

---------------------------------

زى ما أنت زهقت من طلباتى منك.
أنا كمان زهقت من احتياجى ليك.

--------------------------

يتصل بها.. تسمع نغمته المخصوصة.. فيدق قلبها فرحاً.. وترى اسم دلعها له يضئ الشاشة.. فتبتسم..
وترد بلهفة :أيوة يا قلبى.

تتصل به.. يسمع صوت نغمة الرنين العادية .. فيرى الاسم.. فيجدها.. فيتأفف..
ويرد بعد طول تفكير: أيوة يا حَجة.

-------------------------

أعمل إيه!!.. بحاول ألاقى أى حاجة حلوة فيه علشان أقنع نفسى بيه مالقتش إلا شكله وده هو مالوش دخل فيه.

------------------------

حياتى مليئة بأشياء كثيرة فلا تتوقع أن تكون الوحيد المستولى عليها ولا تتوقع أن أكون مُتاحة ليك طول الوقت.

-------------------

مش هتوه عن إحساسى بيك.. فيه حاجة متغيرة فيك.. أكيد فيه واحدة تانية فى حياتك.. لكن مين دى اللى قدرت تغيرك عليا رغم حبك الكبير ليا.. إزاى سمحت لها تقرب منك.. طيب هتفضل كده لغاية إمتى.. خايفة أسألك مالك ويكون إحساسى صح وتقولهالى ..يا ويلها منى لو عرفتها ..لكن هى ذنبها إيه ما أنت أكيد اللى عشمتها..
ربنا يهديك.


--------------------------

عايز تسمع صوتى دلؤتى علشان يحييك.
طيب ما أنت بُعدك عنى زمان موتنى.

-------------

واحشنى خروجنا مع بعض بالعربية.. ولما تسبق عربية أسقف لك بفرحة وأقولك "ممتاز يا......".. ولما تشغل أغنية وألاقيك مندمج معاها أقوم مغيراها بالريموت وساعتها أنت تبص لى وتضحك لإنك عارف إنى عملت كده علشان تبقى معايا أنا مش مع الأغنية.. ولما تاخد نزلة كوبرى بسرعة تبص لى وتضحك لإنك عارف إن الحركة دى بتضحكنى.. ولما تكون عايز تشرب سجارة تركن فى جنب وتنزل تشربها بره حتى لو ماشيين على طريق سريع لإنك عارف إنى مابحبش ريحتها..ولما بصورك وأنت سايق فى جميع حالاتك..ولما تضايق منى وتقولى لو ماسكتيش هنزلك.. ولما تحب تتحدانى تقولى "هخليكى تسوقى مكانى" وأنت عارف إنى مبعرفش أسوق على الطريق السريع ولو عدت جنبنا عربية نقل كبير أبقى هموت من الخوف.
وبغض النظر عن مواقف العربية معانا فى أغلب الخروجات بس بجد واحشنى الخروج معاك.

----------------

أنا عارفة إن مالكش علاقة بشغلى لكنى بجد عايزاك معايا فى كل خطوة.. عايزاك تشوفنى وأنا ناجحة وأنا مبسوطة.. عاوزة أتباهى بيك قدام كل الموجودين حتى لو كان فى اجتماع مجلس الإدارة.

- هو أنا بحضر اجتماع الشغل عندى لما هحضر اجتماع الشغل عندك.

--------------

بعد طلاقى كنت حاسة بالعار..كنت بخاف أخرج.. كنت بخاف أقابل حد.. ماكنتش عايزة حد يزورنى أو يتصل بيا.. وكأن أنا الجانية مش المجنى عليها.. كنت عاوزة أتزوج سريعاً من أى حد يتقدم لى لمجرد أنى أتحمى فيه وأبين للناس أنى مش وحشة.. كنت عاوزة أرتبط بحد أتسند عليه ويكون عكازى فى أزمتى.. لكن برضه مش عايزة أتزوج أى حد وخلاص ده هيبقى له مواصفات قياسية.. أبسطها أنه مايتعاملش معايا على اعتبار أنى مطلقة وماليش حق إن يكون لى طلبات.. ولكن للأسف مازالت نظرة المجتمع للمطلقة دونية.

-------------

كنت واثقة إنك هتعرف تجيبنى وتوصل لى فى سط الزحمة دى كلها.. ماكنش قدامى حل بعد مابقينا بالليل وأنا واقفة بقى لى كتير ومفيش مواصلات والناس بتزيد غير أنى أتصل بيك تلحقنى..الغريب إنك أنت اللى عرفت توصل لمكانى رغم الزحمة اللى أنا مش باينة فيها.. وأنا كنت حساك بس مش متأكدة واعتقدتك حد بيعاكس.. قلت أكيد لما توصل هتكلمنى على الموبايل بعدها عرفت إنك حاولت فعلاً تتصل لكن تليفونى كان غير متاح.. لما شوفتك حسيتك زى ما تكون أبويا وجاى ياخدنى من المدرسة.. حسيت إنى بنتك.. بحس دايماً معاك بالأمان ودى حاجة عمرى ما حسيتها غير بس معاك.

-------------------

أنا مش بطلب كتير.. أنا مش طمعانة فى أكتر من ساعة من وقتك كل يوم.. أحس فيها إنى معاك.. وإنى زوجتك بجد.. ساعة بعيدة عن مشاهدة التلفاز أوتناول الطعام أوزيارة والدتك أو ضيافتها أو النوم.. ساعة تنظر لى فيها أنا فقط دون أى مثير آخر.. ساعة تتحدث معى أو تسمعنى أو تلعب معى أو نخرج فيها سوياً أو تساعدنى فى المطبخ أو... أو... أو...
فهل هذا كثير !!.

------------------

طبيعى ماحسش بألمك وبشكوتك من عدم قدرتك على الارتباط بالبنت اللى بتحبها.. طبيعى أشوفه مجرد إحساس عابر ومع الوقت هيروح.. أصل ماحدش بيموت من الحب..ماتقولش إن قلبى قاسى ومابحسش أنت ناسى يوم طلاقى ووجعى يومها كان قد إيه ..وقتها استهترت بمشاعرى وقلت لى يا ما بيحصل والطلاق دلؤتى موضة .. أهو أنا دلؤتى بقولك أيام وهتعدى وهتبقى تفتكرها بعدين بس ما تطلبش منى أواسيك ..أنا آخر حد ممكن يقوم بالمهة دى لأن اللى اتكسر جوايا ما تصلحش وبقيت أشوف إن دى النهاية الطبيعية لأى اتنين يكونوا مع بعض.. فما تستغربنيش.

--------------------

كنت عايزة أشركك معايا فى فرحتى بصدور كتابى الأول لكنك لم تعطى لى الفرصة وأخذت تثرثر فى لاشئ وقتها أيقنت بأنك لا تستحق أن تشاركنى فرحتى.

---------------------------

المشكلة إنك عايز ترمى عليا المسئولية لترتاح منها.
وأنا عايزاك معايا.. لكن مش لأنى ضعيفة ومش هعرف أتحملها.. لأ.. لأنى مش عايزة أكون لوحدى.