السبت، 25 فبراير، 2017

من كتاباتي (56)






1هو اللي بيشير فيديو فضايح بيستفيد إيه؟

استروا الناس علشان ربنا يستركم

أنتم مش ملائكة ولا معصومين

---------------



2- لما تجيب لحد هدية.. هاتله الحاجة اللي هو بيحبها وهيكون مبسوط فعلا بيها

 مش الهدية اللي أنت بتحبها

وده ينطبق على الصور اللي بتبعتهاله برضه

وارد جدا يكون ذوقه مختلف عنك

الهدية مش ليك .. تذكر هذا جيدا.


--------------------------



3- الشباب المتسربعين ع الجواز وبعدين يكتشفوا

 ان الزوجة مش مناسباه وهو محبهاش

اختاروا صح واقتنعوا بيها الاول قبل ماتبهدلوا بنات الناس معاكم.


-----------------



4- ماتتحديش أهلك علشان حد

معندوش استعداد يتحدى ظروفه علشانك.

---------------



5- بعض الصور خادعة 

ليست كما ترونها

------------------



6- ماتقولش عليها نكدية لكن إسأل نفسك "أنت عملت إيه علشان تراضيها؟"

-------------


7- متخيل يعني إيه بسبب تصرف أحمق منك تتسبب في دمار حياة إنسان 

معملش فيك حاجة غير إن حظه خلاه يقع في طريقك!

-------------------

8- أختي المحجبة: دخلي شعرك جوه الطرحة.

-------------------


9- قبل أن تتباهى إنك "أوبن مايند" تذكر أن لك دين يحكمك إطاره.

-------------------

10- أرى أن الاسكرين شوت خيانة للأمانة

وخاصة إذا كان الطرف الآخر لم يعد على قيد الحياة

حذار من أن تكون صاحب صفة "إذا أؤتمن خان".


-----------------


11- أي كائن حي هتجيبه بإرادتك يشاركك بيتك

اعرف ان له متطلبات واحتياجات وحياة مختلفة عنك

لو هتستحمل الشراكة دي بكل مافيها

توكل على الله

--------------------

12- علمتني الحياة

إنك تفرح حد بحاجة بسيطة دي بالدنيا واللي فيها

يكفي إن أحب الأعمال إلى الله سرور تدخله على قلب مؤمن


لما حد يطلب منك حاجة هتقدر تعملها وهتبسطه في نفس الوقت

 ومافيهاش أدى لحد ماتترددتش في تنفيذها.



---------------



13- حضن الحبيب لا يُطلب، ولكنه يوهب.

----------------


14- علموا عيالكم يغسلوا قدمهم بعد كل خروجة 

ويحطوا الشرابات في الحوض 

ويفتحوا عليها الحنفية ويغسلوها يعني مايجراش حاجة.


----------------

15- اللي بيتغزل في عيون المنتقبة

أنت فاهم أنت بتعمل إيه؟

الثلاثاء، 21 فبراير، 2017

من قراءاتي (46)







1-إن المرأة إما أن تدخل الدير وتعيش الحرمان الكامل، أو تتزوج رجلا يتحمل مسولية إشباعها، أما أن تتزوج رجلا يفتح شهيتها ثم يعذبها بالحرمان فهذا حرام.

لإحسان عبدالقدوس



----------------


2- الطفل المؤدب هو الطفل الذي يمتلك تاريخا منزليا يقوى به أينما حل.
لعمر طاهر

-------------


3- أن تخسر وأنت على الطريق أفضل من أن تخسر الطريق نفسه.
لعمر طاهر

-------------


4- الرصاص يمحى والحبر لايزول
لمعجب الشمري

-----------

5- لم يذهب لينم، ذهب كي يستر عورة البكاء في عينيه.
لمعجب الشمري

-----------

6- إنه لمن المميت أن يهبك الحياة أكثر الأشخاص انتظارا للموت
لمعجب الشمري

-----------

7- لاتريد ما ستفعله من أجلها، تريد أن تراك تفعل.
لمعجب الشمري

------------

8- النساء كالأزهار لاتهوى النحل.
لمحمد طارق

----------

9- حينما يتفوه أحد الزوجين بما يجرح الآخر يستمر الجرح ملتهبا طول الحياة
لأثير عبدالله

-----------

10- حينما تحتضن الوحدة امرأة متزوجة، هذا يعني أن علاقة الزواج انتهت.
لأثير عبدالله

------------

11- لو بصقت كل امرأة على زيجة لا تحترم فيها لما تمكن أشباه الرجال من عدم احترامهن.

لأثير عبدالله





الثلاثاء، 14 فبراير، 2017

تصدقوا






عاوزين نتعود إن لما ربنا يكرمنا ونشتري حاجة جديدة
نطلع قصادها حاجة لله
منها تفضي مكان منعا لتراكم الكراكيب والأشياء عديمة النفع غير المستعملة
ومنها تفرح حد بحاجة هو أكيد محتاج لها
ومنها تاخد ثواب الصدقة.







الأحد، 12 فبراير، 2017

التاسع




النهاردة بالصدفة افتكرت أنه في مثل هذا اليوم من تسع سنوات أنشأت مدونتي الغالية (أمة الله)
لقتني بقارن بين النهاردة وكتابتي التدوينة دلوقتي كده ارتجاليا 
وبين السنين اللي فاتت لما كنت بحضر التدوينة دي قبلها بكام شهر واختار في الصور ووضع الفقرات وكأنه عيد ميلاد بنتي بجد اللي بجهزه وأنا فرحانة بيها.
أحب أقولك:
أنتِ كنتِِ منحة ربنا ليا في عز وجعي وربنا جعلك سبب لوقوفي على رجلي من جديد.
يمكن أكون اتغيرت شوية ولما براجع تدويناتي زمان بستغربني.. بس ربنا يشهد إني عمري ماكتبت كلمة أو قلت نصيحة غير وأنا كنت بطبقها وقتها بجد مش بس مجرد كلام.
أتمنى تكوني سبب في دخولي الجنة وإنك تكوني الطبطبة اللي أسيبها للناس يفتكروني بيها
أنا لسه معاكِ حتى لو بقيت قليلة النشر 
"يا أجمل هدية بعتها القدر ليا" 


الثلاثاء، 7 فبراير، 2017

حالة نفسية








"حالة نفسية"
يبان سبب بسيط لأي مرض كبير 
على اعتبار إن الموضوع بسيط يعني مش مستاهل ويحمد ربنا إنه مش عضوي..
مع إن المرض العضوي بيكون له علاح مهما أخد من وقت
لكن النفسي ده بتاع ربنا وله حسابات تانية خالص غير علاج الأدوية
كنت زمان بستغرب لما أشوف فيلم أو مسلسل والبطل أو البطله جالهم شلل نصفي مثلا ويقولك عضويا معندهمش حاجة دي حالة نفسية

 أو العلاج انه لازم حاجة جامدة تفرحه علشان يخف أو يتعرض لموقف حلو مش متوقعه وهو يخف
كنت بستغرب إن الناس اللي حواليه ليه مايتصرفوش ويفرحوه!
واكتشفت مع الوقت إن الأمر هنا محتاج معجزة ربنا وحده بس اللي يقدر عليها مش حد من البشر.








الأربعاء، 1 فبراير، 2017

منوعات إسلامية (56)




من صحيح الأحاديث القصار:
ـــــــــــــــــــــــــــــــــــــــــــ
- "خير الصدقة ما كان عن ظهر غني وابدأ بمن تعول"  من حديث أبي هريرة

-" لاتسبوا الأموات فإنهم قد أفضوا إلى ماقدموا" من حديث عائشة

-"من قال حين يسمع النداء: اللهم رب هذه الدعوة التامة والصلاة القائمة، آت محمد الوسيلة والفضيلة وابعثه مقاما محمودا الذي وعدته، حلت له شفاعتي يوم القيامة" 
من حديث جابر

-" رحم الله رجلا سمحا إذا باع وإذا اشترى وإذا اقتضى" 
من حديث جابر بن عبدالله