الملل الزوجى

وصفة سحرية وسهلة للقضاء على الملل الزوجى.

رسالة للزوج: إذا شعرت بملل فى حياتك الزوجية فاعلم بأنها حالة عامة وأكيد زوجتك أيضاً تعانى من هذا الملل ولهذا قبل أن تتهمها بأنها السبب.. عليك أن تفكر فى علاج المشكلة بدلاً من إلقاء اللوم عليها وتأكد بأن أى فعل من جانبك سيفرق معها كثيراً وبكلمة حلوة ولمسة حانية منك غير متوقعة سترى منها أشياء كثيرة تسعدك غير متوقعة .

بعض الأمثلة التى تساعدك على هذا:

* أبسط حاجة ممكن تعملها إنكم تخرجوا مع بعض فى مكان جديد أو حتى قديم.

اخرجوا فى عطلة نهاية الأسبوع من الصبح وخدوا اليوم من بابه.. اذهبوا لأى حديقة أو جنينة واسعة واركبوا مركب فى النيل والعب معاها بالكرة ولو فيه أولاد هيبقوا مبسوطين طبعاً بالتغير ده.. وهذه تعتبر من أرخص الوصفات مش هتكلفك حاجة تقريباً.

* روحوا الملاهى واضحك معاها من قلبك.

*انسى أنها زوجتك وتخيلها حبيبتك أو خطيبتك.

* جرب تترك لها جواب بخط إيدك فيه أى كلمتين قبل ما تروح الشغل حتى لو "صباح الخيريا زوجتى الحبيبة" ولما تيجى هتشوف بنفسك التغيير اللى حصل من غير ما أنت تطلبه.

* تخيل للحظة أن ممكن النهاردة حد فيكم- لاقدر الله- يموت..انتهز الفرصة وقولها على مشاعرك من ناحيتها ولو زعلان منها عرفها واسمع دفاعها عن نفسها.

* لو المشاعر بينكم حسيتها بردت وبقت جافة اطلب منها تعمل نيولوك وتخيلها واحدة بتتعرف عليها لأول مرة وعيش اللحظة واعرف أنها حلالك يعنى أى كلام أو تخيل معها فهو مباح عكس ماتكلم أى واحدة تانية غريبة عنك وتتخيلها حتى بينك وبين نفسك.

* ساعدها فى شغل البيت ولو مرة كل شهر .. ادخل معاها المطبخ وحسسها بمشاركتك.. جرب ومش هتندم هتلاقى الموضوع قلب كوميدى وخصوصاً لو كانت علاقتك بالمطبخ زى علاقتها باللغة الصينية.

* غيروا نظام الشقة.

* استعيدوا ذكرياتكما الحلوة.

طبعاً أنا بوجه كلامى للزوج لأن هو الرجل المسئول عن البيت.. لو انبسط البيت كله هيفرح.. ولو اتضايق البيت كله هيكتئب.. عكس الزوجة فهى تتأقلم على أى وضع سريعاً.

تمنياتى للجميع بحياة زوجية سعيدة خالية من الملل.

سؤال جانبى:
ــــــــــــــــــــــــ
* هل عندك إقتراح آخر؟