عايز تخلف ليه؟

عايز تخلف ليه  

اشتراككم في قناتي يبهجني وتفاعلكم بالتعليق يفيد جميع المشاهدين فلا تبخلوا علينا بهما

الاحتفالات حلال

الاحتفالات حلال 

لو لسه حد بيمر هنا فأكيد يسعدني اشتراككم في القناة والتفاعل برأيكم مع الفحوى

معلومات عن المناطق الجبلية

 

من كتاباتي (109)

 

1- التعارف بين الناس من علامات الصحة النفسية.

ابنك اللي بيحتك بالجيران وبالأصحاب وبالمعارف غير ابنك المنطوي على نفسه.. والكلام ده ليك برضه.

معرفة الناس عزوة.

2-وجود ناس صح في حياتك مش هيخليك تحتاج لطبيب نفسي.

3- فيه ناس كتير للأسف ما بتستوعبش فكرة إن حد يكون عنده مشكلة نفسية ومأثرة جسديا عليه.

قليل لو لقيت أهل مثلا متضامنين مع حد من عيالهم لو قالهم إن عنده اكتئاب مثلا.. وقتها هيكون ردهم صلي بس واقرأ قرآن وأنت تبقى كويس!

بيكفروه من غير ما ياخدوا بالهم، وناسيين إن لو الآلام النفسية مش مرض ما كنتش كلية الطب خلت فيها قسم مخصوص.

أي تحول مهما كان في حياة الإنسان محتاج إعادة تأهيل نفسي من متخصص يساعده على تقبل وضعه الجديد، ومحتاج دعم الأهل واهتمام الاصدقاء ومحبة القريبين منه، ده اللي ممكن يخليه يعدي بنجاح، غير كده فللأسف هيفضل في دوامة وقت طويل، وخلالها حاجات كتير جواه هتتغير، وتصرفاته المنافية لطبيعته هو بس اللي ممكن يلاحظها أو المحتكين بيه بصفة مباشرة، ويا عالم هيرجع لحالته الطبيعية ولا لا.

فكونوا رفقاء ورحماء فيما بينكم وبلاش استهتار بوجع حد مهما كان بالنسبة لك عادي.. ما دام لم تختبر يبقى تسكت.

4-علامة الحب: العطاء، البذل بدون تفكير.

استحالة تلاقي حبيب بخيل أو حتى بيفكر في اللي بيقدمه، ده بيقدم اللي يقدر عليه وبيبقى شايفه مش كفاية.

مش هيستناك تطلب، ولا تفكره باحتياجك، ولا تعيد عليه الحاجات اللي بتحبها.. هو بيعرف أصلا إيه يسعدك من غير ما تقول ويعمله من غير ما تطلب.

ولو طلبت حاجة بتبقى على قلبه زي العسل، اللي هو ده يوم المنى لما يتعشم فيا ويحس براحة تخليه يطلب مني حاجة.

مش هيعرضك لموقف مخزي، مش هيخليك تعمل حاجة ضد شخصيتك، هيخاف عليك، هيخاف يوجعك أو يتسببلك في أي أذى أو ضيق، استحالة تهون عليه...

أعتقد ده اختبار فعال لو عايز تعرف إذا كان حد بيحبك بجد ولا لا.

اسأل نفسك: ممكن علشانك يعمل إيه؟

أمارات حبه ليك إيه؟

6- الناس بتحب التقليد، غصب عنها لما بتشوف حاجة بتتكرر يا إما بتحاول تقلدها أو تنقدها المهم إن تكرار الشيء بيؤثر فعلا على الناس.

لو تابعت مثلا ناس بتتكلم عن فعل الخير والإطعام والتبرع بالدم وما إلى ذلك مع الوقت هتحب تعمل زيهم.

ولو تابعت منشورات بتتكلم عن الأكل والشوكولاتة حتى لو أنت مش أكيل هتحب تجرب.

ولو شوفت كتير بينزلوا صورهم أو يتكلموا عن حياتهم مع الوقت وارد تعمل زيهم وهكذا

الفكرة هنا ياريت نشوف احنا نحب إيه اللي يتنشر ونتكلم عنه، لو مش حابب الهمجية وقت الأكل تتنشر مثلا يبقى تتكلم عن آداب الطعام.

لو مش حابب انتشار القذارة في الطرقات والشوارع يبقى نتكلم عن نماذج توضح إماطة الأذى.

بدل ما نتكلم عن الوحش بغرض إن الناس ماتقلدوش، خلونا نتكلم عن الحلو والحاجات المفيدة علشان أولا ناخد ثواب وثانيا لنشر الفضائل قدر المستطاع.

7- الفن الحقيقي إن الشيء مهما كان كنهه يكون مضبوط ع الشعرة.

خلط المقادير بنسب صحيحة هي اللي بتنتج حاجة حلوة.

الشاي باللبن مثلا، مش أي حد يعمله، ده لازم يكون عارف هو بيحب إيه أكتر وهيحط إيه الأول ونوع الشاي المستخدم إيه وما إلى ذلك.

في الكتابة كمان، لازم القارئ يحس إنه بيقرأ حاجة مظبوطة، حتى لو فيه عيب ما، فيه حاجة تانية هتشيله.

اللغة الجميلة مثلا ممكن تخليك تتقبل الإسهاب في حالة لو النص يسمح.

الدخول في الحبكة وأنك تسحل القارئ في الأحداث من أول صفحة ممكن ما يخليكش تدقق في بساطة اللغة مثلا.

في الأعمال المرئية ممكن غرابة الفكرة مثلا وانجذابك ليها يخليك تعدي استحالة حدوثها.

المقادير مهمة في كل حاجة، حتى في علاقتنا ببعض.

لازم حاجة تشيل حاجة

لو أنت كراجل مثلا معندكش وقت للمرأة اللي في حياتك، إديها فلوس، اشتريلها هدايا، هات لها كل طلباتها...

لو ما بتعرفش تقول كلام حلو، اعمل لها حاجة بتحبها ولو حتى تكويلها فستان قبل الخروج أو تعملها كوباية شاي...

لو مش شاطر في شغلك مثلا خلي لسانك حلو، ما تخليهاش تبقى من كله يعني.

لو طبختي صنف وطلع مش حلو مثلا، اعملي جنبه حاجة تشيله، أسهل حاجة مثلا حمري بطاطس معاه..

وهكذا بقى في اي علاقة أو فعل بتعملوه

ظبطوا المقادير دايما؛ خلوا فيه سبب لاستمرار تقبل الناس ليكم، خلوا حاجة تشيل حاجة.

8-  أنا بكون ممتنة فعلا للي بيشاركنا خبراته الحياتية مهما كانت تبان بسيطة، زي البنت اللي شاركتنا إنها ما بترميش العلب البلاستيك وبتحط فيها ميه لكلاب وقطط الشارع..

الفكرة هنا كمان إن كان نفسي جدا أسقيهم وماكنتش عارفة اعملها إزاي أو احطها لهم في إيه.

ومن هنا وحيث إني جربت حاجة حالا ولقيت نتيجتها حلوة، الصابون قبل ما بيخلص بيكون حجمه صغير جدا، وقتها افتح غطا السيفون وحطه جواه، وكل ما تشد السيفون ريحة الصابون هتفوح.

9- اقترح أن يتم دراسة الإسعافات الأولية للطلبة.. أهي حاجة تنفعهم وتساعدهم ينقذوا بيها غيرهم لو استدعى الأمر.

الصيانة والأعمال المنزلية برضه مهمة، حاجة هتفيده كبير أو صغير. 

من كتاباتي (108)

 

1-لو سنين عمرك التي عدت عليك لم تجعلك ناضجا بما يكفي لتكون نظرتك للأمور أوسع، ولتقبلك الثقافات الأخرى، والطباع المختلفة عنك، لو ما زال عقلك متحجرا صلبا يظن أنه وحده صاحب الرأي الصواب دوما، لو ما زلت بنفس عقليتك من عشر سنين مضت، لو ما زلت تتصرف بنفس الطريقة مهما تسببت في خسارتك، لو لم تتعلم من كل الخبرات الحياتية التي ألقاها القدر في طريقك... فقد مر عمرك هباء.

2-أحاول الخروج من شرنقتي، ترى هل سيسعني العالم!

من كتاباتي (107)

 

1- يا ترى بتعمل إيه للي حواليك علشان يفتكروك لما تموت بالخير؟

2- "علشان مؤرف" هكذا صحت بها فور رؤيته يبصق على الرصيف الذي كنت سأصعد عليه، تجنبا للسيارات السريعة، الذي منعني فعله هذا عن أن أفعل.

ما أساءني أن فعله تم بأريحية، كأن هذا حق طبيعي يفعله في أي مكان شاء، ناسيا أن هذا أذى للطريق.

*دعوة لمحاربة هذا الفعل القبيح، المؤذي.

3-تربية الحيوانات زي تربية الأطفال؛ مسؤولية مش ونس وبس.

4-حبانا الله بنعمة القدرة على التحدث للتواصل مع الآخرين، فحين تصدر الصمت دوما لا تنتظر من الآخرين فهم ما تريده أو حتى ما تشعر به.

5- المدرس الناجح هو اللي ما يخليش الطالب ذهنه يفلت منه.

-

من كتاباتي (106)

 

مما علمتني الحياة:

_خروج إنسان من حياتك مش نهاية الدنيا، بالعكس ده يمكن لو كان فضل كان وجوده هيتعبك.

_ الدنيا لما بتاخد مني حاجة فضلت تزينهالي لغاية ما افرح بيها بحس إنها رسالة إن ما تديليهاش الأمان أبدا.

_لبس البيت مريح.. ليه كنت حارمة نفسي منه طول السنين اللي فاتت.

_اللي تشتريه استخدمه مهما كان، ما تعينش حاجة.

_أنت لا تملك سوى ما تستخدمه وليس ما تحتفظ به.. الكنز دوما للورثة تذكر هذا.

_ما تكبتش مشاعرك مهما كانت، ما تتوقعش حد هيفهم صمتك.

_ما تسيبش حقك لأن محدش هيجيبهولك.

_اعمل اللي يبسطك ويريحك طالما مافيهوش أذى ليك أو لغيرك.

_اشتري دايما اللي على مقاسك حتى لو عجبك حاجة أو سعرها لقطة بس مش على مقاسك اوعى تشتريها.

_لو كنت عامل دايت وقررت تلبخ.. البخ باللي تستمتع وأنت بتاكله.

_ ماتستناش حد يبسطك، أنت ابسط نفسك.

_ما تأجلش حاجة، يوم ما تقرر.. نفذ.

_الدنيا مش مستاهلة، كلنا هنموت ومش هيفضل غير الذكرى.

_استمتع باللي أنت فيه مهما كان، هي مجرد مرحلة وهتخلص.

_احترم سنك ورسايل جسمك ليك.

_كل اللي هتعمله في حياتك هيترد لك بشكل أو بآخر.

_لو قدرت تصنع يوم حد بأي طريقة اعمل ده بدون تفكير.

_ربنا اسمه الحق، فقبل ما تستهون بحق حد افتكر ده.

_رتب أولوياتك دايما.

_اتعلم حاجة جديدة تفيدك.

_عامل الناس زي ما تحبهم يعاملوك.

_ المواقف غربال فعال.

_الناس مش زي بعض، كل شخصية وليها عقد خاصة بيها.

_ما تستغلش ضعف حد او احتياجه.. خليك إنسان.

_اعمل خير كتير علشان تحافظ على إنسانيتك.

قول للحلو إنه حلو

 

إزاي تتحكم في شهوتك

 

من كتاباتي (105)

 

1- أنا ماليش في الترندات، لكن ليا في إغاثة الملهوف.

2- وهو الإرتباط إيه؟

(أيا كان نوعه؛ ارتباط بأهل، صديق، حبيب، زوج...

إن لما احتاجه في أي وقت ألاقيه.

3-الاستغناء: تحرر.

4-مش مهم هو بالنسبة لك إيه..المهم أنتي بالنسبة له إيه.

من خلال رؤيته ليك هيعاملك، مش من خلال رؤيتك ليه. 

5-احمد ربنا كل يوم تصحى فيه وتلاقي أعضاءك وحواسك لسه شغالة.

6- لما زعلي يهون عليك، أنت نفسك هتهون عليا.

فلتقل خيرا أو لتصمت

 

أهمية زيارة الطبيب النفسي

 

لقاء مع ممثل شخصية الفريق صدقي صبحي في مسلسل الاختيار 3

الحبيب لا يرحل

 

صفع السيدة المسيحية إهانة لنساء مصر

 

هواني على الناس

 

من كتاباتي 104

 

1-هيفيد بإيه تديني فلوس بعد ما اكون فكيت زنقتي سواء بقى بالسلف أو ببيع حاجة عندي أو حتى بالدين الربوي!

هيفيد بإيه تجيب لي حاجة كان نفسي فيها بعد ما اكون خلاص زهدتها أو نفسي اتسدت منها!

هيفيد بإيه تجيبلي ملابس للعيد بعد ما العيد يخلص، أو تقدم لي أكل بعد ما اكون شبعت أو اكون نويت الصيام!

هيفيد بإيه ترجع لي حقي بعد مرور سنين كتير من عمري في محاكم وبهدلة وقرف!

هيفيد بإيه تديني مرتبي بعد ما خصمت منه خساير الشغل اللي أنا مش مسؤول عنها بعد ما كنت عامل حسابي أقبضه كامل واسدد طلبات اللي ورايا.

الناس اللي بتطلع الزكاة آخر يوم رمضان، مستنيين إيه ما الشهر خلاص بيخلص، وما دام كده كده ناوي تخرجها ما كان ممكن تديها من أول الشهر وتخلي الناس توسع على نفسها واللي نفسه في حاجة يجيبها واللي عليه دين يسده...

وطبعا الأقربون أولى

ما يبقاش حد من قرايبك أو أصدقائك أو معارفك في ضيقة أو حاله اتبدل مثلا وتعديه

كنت سمعت شيخ بيقول إن الموظفين يجوز عليهم الزكاة لأن مرتبهم مكفيهم بالكاد.

وبلاش تستخسر الخير في حد وخصوصا الناس المتعففة اللي عمرها ما هتطلب.

وبالنسبة للأبناء هل يجوز عليهم الزكاة أو لا.. يقال إن ابن الميسور ما ينفعش يكون فقير وإن أبوه ملزم بالنفقة عليه طالما يستطع.

وسعوا ع الناس خلي ربنا يوسع عليكم.

اللهم اعط منفقا خلفا.

2-عارفين لو توقفتوا عن نشر السيء والهابط، محدش هيسمع عنه.. لكن للأسف الشير الكتير بيشهره ويخلي اللي مايعرفوش يعرفه حتى ولو على سبيل التهكم.

3-كم أحترم الباعة الذين يقدرون الزبون الذي لا يفاصل، ومن ثم يقدمون له خصم بالسعر الحقيقي للسلعة.

من كتاباتي (103)

 

1-الناس اللي بتعمل وجبات إطعام، يا ريت تكتر الكمية، بحيث تكون الوجبة مشبعة مش مجرد عينات تحنس بيها المتلقي.

بدل ما تحط كل الأصناف مثلا في طبق واحد، وسع على نفسك وخليهم طبقين خلي ربنا يوسعها عليك.

*إطعام الطعام عبادة منسية، لعل منشوري هذا يكون سببا للتذكرة.

2-لما تكون مريض وتلاقي حد يمرضك، يناولك ميه، يحضر لك أكل، يفكرك بالدوا، يطمن عليك، يشقر عليك من آن لآخر...

اعرف رغم تعبك ده إنك في نعمة.

وتخيل لو كنت لوحدك ومش قادر تمد إيدك تجيب إزازة الميه من جنبك لأن ده بالنسبة لك مجهود فتفضل عطشان.

أو تكون محتاج تحس إنك مهم وفارق وتلاقي محدش قالك حتى أنت فين ولا نايم ده كله ليه.

أو تبقى مش فاكر أخدت الدوا أصلا ولا ده كان امبارح وأنت تعاملت كأنه النهاردة.

أو تبقى جعان ولإنك عارف إنك أنت اللي هتجهز لروحك فتفتكر كل المجهود قبل وبعد فتفضل جعان ولما الجوع يقرصك تقوم تدور على أي حاجة تصلح وخلاص.

الوحدة وقت المرض مؤذية.

علشان كده كن ممتن لو حد اهتم أنه يسأل عنك ولو حتى برسالة.

من كتاباتي 102

 1-لما تكون مريض وتلاقي حد يمرضك، يناولك ميه، يحضر لك أكل، يفكرك بالدوا، يطمن عليك، يشقر عليك من آن لآخر...

اعرف رغم تعبك ده إنك في نعمة.

وتخيل لو كنت لوحدك ومش قادر تمد إيدك تجيب إزازة الميه من جنبك لأن ده بالنسبة لك مجهود فتفضل عطشان.

أو تكون محتاج تحس إنك مهم وفارق وتلاقي محدش قالك حتى أنت فين ولا نايم ده كله ليه.

أو تبقى مش فاكر أخدت الدوا أصلا ولا ده كان امبارح وأنت تعاملت كأنه النهاردة.

أو تبقى جعان ولإنك عارف إنك أنت اللي هتجهز لروحك فتفتكر كل المجهود قبل وبعد فتفضل جعان ولما الجوع يقرصك تقوم تدور على أي حاجة تصلح وخلاص.

الوحدة وقت المرض مؤذية.

علشان كده كن ممتن لو حد اهتم أنه يسأل عنك ولو حتى برسالة.

2-وفي ثانية بتهون في عينينا الحياة.

3-كل موبايل فيه خاصية إرسال رسالة، ممكن تستخدمها عادي لما تتصل بحد وما يردش عليك على اعتبار إنه مايعرفش رقمك مثلا.

دور الرسالة إنك تعرفه بنفسك وتقوله طلبك.

أو حتى لو تعرفوا بعض وعايزه ضروري ابعتله رسالة وانجز بدل الاتصالات الكتير وخاصة لو مش عارف ظروفه.

سعر الرسالة أقل من ربع جنيه، مش مبلغ يعني.

4-خليكم كده انشروا الوحش واتكلموا عنه واعملوا له قيمة وخلي اللي ما يعرفوش يعرفه.

وبالمقابل لو قابلتكم حاجة عجبتكم ما تعملوش حتى لايك.

5-في علاقتك بيها، حط رصيد كتير جواها، علشان لو حصل بينكم أي موقف تلاقي اللي يشفعلك عندها.

6-هو إيه وجهة نظر مصممي الملابس اللي بتعمل تيشرتات مثلا وعليها رسومات غبية أو كلمات إنجليزية مالهاش معنى أو معناها غبي برضه. 

من كتاباتي (101)

 

1-هو إيه تفكير الناس اللي بتجيب سلاحف من الطرق الصحراوية وتبيعها علشان تعيش في بيت حد تحت الكرسي مثلا!

أو اللي بيربوا عصافير ويحبسوها في قفص ما يكفيش حتى يلفوا فيه!

أما عن السيرك وجنينة الحيوانات وحبس الحيوانات في قفص وفي بيئة مش بتاعتهم أساسا

فده بيدل قد إيه الإنسان كائن أناني وسادي.

2- كونك بطلت تحبها ده معناه إنك ما حبتهاش أصلا.

اعمل اللي يدل على حبك ليها، لكن أنت اخترت أسهل الطرق وأرخصها؛ إنك تقولها بحبك.-3

4-استغنى عن القديم علشان يكون عندك مكان للجديد.

5-فيه فرق بين " تأخرت كثيرا" وبين "فات الميعاد".

بالنسبة لي كشخصية تحترم المواعيد، وتقدس قيمة الكلمة؛ التأخير يعد كارثة وإذا تقبلته في مرة على مضض بدافع منح الأعذار لا أفعلها مرة أخرى.

أسقطك من حساباتي بلا مبالاة، فمثلك لا يستحق أن أمنحه وقتي.. هذا للغرباء.

أما المقربين فأعذارهم مقبولة وإن لم يتفوهوا بها، يكفي وجودهم حتى وإن تأخروا، فلا شيء يكتمل سوى بحضورهم ولو دقائق قليلة.

ولكن حذار من نفاد الرصيد فبه ينفد صبري وحينها أعلق لافتة "فات الميعاد".

البيت المتهرجل يدل على وجود حياة بداخله.6-