1- أحب أنوه إنك في المواصلات، لما بتتفرج على حاجة في موبايلك، بتظهر للي وراك في انعكاس زجاج الشباك.
شات بقى، صور، وما إلى ذلك.
ولما بتتكلم بقى، حوارك ما بيكونش فيه أي خصوصية، ده غير إزعاجك للركاب وأنت بتعلي صوتك أكتر من الطبيعي.
ولما تحب تسمع حاجة أو تلعب مثلا، يا ريت تحط سماعات في ودنك، منعا لإزعاج غيرك، أنت مش في بيتكم يعني.
2-بعيدًا عن مشاعر الانكسار المصاحبة للخذلان، علينا بعد الإفاقة أن نمتن لما حدث؛ فبه قد صرتَ على بينة من أمرك. هذا الخذلان كشف لك حقيقة كل شيء، ومنها: قدرك عند الآخر، وهذا وحده يكفي.
لطالما كانت المودة المصطنعة أداةً جيدةً للاستنزاف، وأنت تمنح وتعطي بمحبة، وتختلق أعذارًا لم تُقَل، بل ولم يهتم أحد بسردها من الأساس.
كنتَ، على سبيل المثال، لا تُفعِّل معهم قوانينك الخاصة في التعامل، بل كنتَ عفويًا وتلقائيًا كمن يتعامل مع نفسه. كنتَ تظن بهم الخير، وتحزن إن أصابهم كدر، وتبتهج إن بلغهم يسر.
فعلهم الدنيء هذا فكَّ الوثاق بينكما؛ فابتهج يا رجل، فقد صرتَ حُرًا من علاقة مؤذية كانت تستهلكك ولا تبالي.
لا تنظر إلى الخلف، لا تبكِ عليهم، ولا تسأل عن شيء؛ فالأوغاد لا يشعرون إلا بأنفسهم.
أنت الآن حُر.
3-الحمد لله على نعمة الأدوية اللي بتجيب مفعول.
4- أنت متخيل جرمك لما تقترض علشان أهوائك الشخصية، واللي ضمنك هو اللي يسدد ده يا إما يتسجن!
5- الحمد لله على نعمة مياه الحنفية اللي ينفع تشرب منها.
6- تخيل معاناة أول واحدة قررت تتعلم، أو تعمل شيء غير دارج وقتها علشان تفتح الباب لغيرها بعد كده..
مفيش حاجة وصلت للمرأة بالساهل مهما كانت بديهية على مر الزمان والمكان.
7- متى ترعرع في وادينا الطيب هؤلاء المتحرشون؟!
مين اللي حول فكر الذكور للتمعن في أجساد النساء واستباحة النظر والتطاول بالقول أو بالفعل!
زمان كان العادي إن ملابس النساء قصيرة ومفتوحة ومع ده، وزي ما بيظهر في الأفلام وقتها، كان في احترام وغص بصر، وعيب تبحلق كده.. دلوقتي بقى فيه بجاحة ومن عيال يا دوب خط شاربهم لسه بينمو!
8-الحياة بالحب أكيد ألطف..
فحبوا بعض محدش واخد منها حاجة.
9- أنا من جيل وعيه اتكون على إيد نبيل فاروق، ود. أحمد خالد توفيق، وأنيس منصور، ود. مصطفى محمود، وإبراهيم الفقي
وروايات مصرية للجيب بكل إصداراتها، وبمسلسلات عائلية متعوب عليها من أول التترات، وببرامج هادفة من أول عالم الحيوان لبرنامج كلام من دهب...
فتلاقي الجيل ده معلوماته متقاربة، وقيمه متشابهة، ووعيه سابق سنه.
ولما حد مننا قرر يكون كاتب فده نتاج مخزون ثقافي عنده، قرر يخرج من ذهنه بعد ضربه في خلاط عقله مع شوية خبرات ورؤى وثقافات أخرى.
ويا ترى لو قرر يكتب حاجة في يوم هتكون خليط مكوناته إيه؟
وأرجو تكون الإجابة حاجة غير التيك توك.
10- مين اللي قال إن اللي يلاقي حاحة تبقى حلال عليه؟
دي أمانة ولازم ترجعها لصاحبها، فالأحسن لو مش قدها تسيبها مكانها وصاحبها هيرجع يدور عليها.. وفكرة إنها معاك علشان لو حد سألك، يعني بالعقل كده أي حد هيسألك أنت تحديدا ليه؟
إلا بقى لو كنت هتسعى فعلا تدور على صاحبها، زي إنك مثلا تقول للمحلات المجاورة وتسيب رقمك، تكتب في جروب المنطقة وما إلى ذلك.
أنت مش قد حُرمة حاجة الناس مهما كانت.
11- وأنت صاحي متكدر علشان رايح الشغل، افتكر إن فيه غيرك نفسهم في شغل ومش لاقيين، فاحمد ربنا على نعمته.
12- إنك تراضي حد ده مالوش علاقة إذا كنت السبب في حزنه أو لا، له علاقة هو فارق عندك ولا لا.
