من كتاباتي (139)

 

1- لما قررت أعيش.. العالم ما استقبلنيش.

2- من بين كل اللي خذلوني، كنت أنت أقربهم.

كنت أحن القساة.

3- تستحقين كل جميل، فلا تقبلي بالقليل.

4- زعلني براحتك، بس ما تزعلش لما أزعلك.

5- لما ممثل يشبه الستات اللي في حياته بالسيارات لا لوم عليه، اللوم الحق على اللي صدر ده من خلال الدروس الدينية والمنشورات اللي بتقلل من قيمة المرأة وبتصورها مجرد شيء يستخدم.

ده فكر ذكور كتير على فكرة، فياريت كانت حملات الهجوم دي اتعملت على اللي بيتكلموا باسم الدين

6- لما ممثل يشبه الستات اللي في حياته بالسيارات لا لوم عليه، اللوم الحق على اللي صدر ده من خلال الدروس الدينية والمنشورات اللي بتقلل من قيمة المرأة وبتصورها مجرد شيء يستخدم.

ده فكر ذكور كتير على فكرة، فياريت كانت حملات الهجوم دي اتعملت على اللي بيتكلموا باسم الدين 

من كتاباتي (138)

 

1- أظن إن مهنة الطب هي المهنة الوحيده اللي غير مقبول فيها جملة "ماكنش قصدي" لأن الغلطة فيها بفورة.

2- اللي بيقتل أخته أو بنته خوفا من العار، أحب أفكره بكلام ربنا:

(من قتل نفسًا بغير نفسٍ أو فسادٍ في الأرض فكأنما قتل الناس جميعًا ومن أحياها فكأنما أحيا الناس جميعًا)

وإن في قانون الآخرة أنت قاتل وهتدخل النار، وهي شهيدة وهتدخل الجنة.

وابقى خلي الدنيا والخوف من كلام الناس ينفعوك.

3- الحمد لله على كل علاقة مؤذية انتهت.

4- حتى لو عندك مشكلة صحية، لو ليك نصيب ربنا هيبعتلك حد يحبك بجد وهيبقى عايز يقضي بقية عمره معاك.

5-لا جدوى من إحياء الموتى.

6- الامتنان ده حاجة حلوة قوي

تخيل مجرد كلمة تخلي اللي قصادك يحس بقيمة نفسه، وأن اللي عمله معاك اتقدر حتى لو كان واخد منك حقه المادي زي ما طلب.

المعاملات الإنسانية الراقية دي رزق ونعمة كبيرة.

 

من كتاباتي (137)

 

1- الخبرة هي اللي بتميز الأستاذ عن التلميذ، وده في كل المجالات.

2- نعمة النوم العميق وتصحى مزاجك كويس، نعمة ما يحسش بيها غير اللي نومه مضطرب.

3- لما تشوف حد فاقد الوعي، اعرف أنك بقيت أمين عليه؛ مش أمين على جسمه وبس، أمين على كل متعلقاته الشخصية لغاية ما يفوق وتسلمها له.

وده طبعا بينك وبين ربنا لأن فاقد الوعي مش عارف أصلا مين اللي حواليه، فلو خنت الأمانة دي حسابك مع اللي خلقك.

4- لو كنت عديت سن الخمسين حاول تدور على فكرة مشروع تعمله، علشان لما تطلع معاش تستغل طاقتك ووقت فراغك فيه.

5-الراجل لما بيحب بيعرض خدماته، وبيقدمها كمان من غير حتى ما تطلبيها.

أما لو هو اللي بيطلب منك خدمات، يبقى عارف أنك أنت اللي بتحبيه.

فلو كنتي في علاقة انتبهي للتفصيلة دي.

6- لو عايز تحافظ على ولادك من الفراغ من صغرهم، اخلق لهم هدف يسعوا له.

ما تفرحوش بقعدة العيال جنبكم، ولا بحبسة البنات علشان خايفين عليهم، خروجهم للمجتمع واحتكاكهم بيه من صغرهم هينحت شخصيتهم، مش هيخليها ضعيفة وهشة.

خليهم يفرغوا طاقتهم في الرياضة أو في أي نشاط يحبوه، ولما يكبروا افتح لهم مشروع أو خليهم ينزلوا يشتغلوا.

اخلق لهم حياة يعيشوها بدل ما يبقى عندهم فراغ ينقموا بيه عليك وطاقة يفرغوها في حاجات تأذيهم.

على الهامش: دي حاجة من ضمن حاجات كتير أنت مسؤول عنها بحكم إنجابك ليهم

7- مشكلة المجتمع مع المرأة أنها تكون راضية؛

يعني لو في علاقة بالتراضي يرجموها، حتى لو نايمة على كتف جوزها في مواصلة عامة.

لكن لو بتستنجد علشان وقع الاعتداء عليها، يبقى سيبك منها.

لو سايقة عربية أو أسكوتر أو حتى عجلة تبقى منحلة، لكن لو بتتخطف في عربية يبقى مالناش دعوة.

لو بتتخانق مع حد اتحرش بيها يبقى عايزة تعمل شو، ولو سكتت مقهورة يبقى هي اللي عايزة كده.

لو اتجوزت غصب عنها واتطلقت تبقى فاجرة، ولو زوجها قتلها يبقى هي اللي وصلته لكده.

وأمثلة من دي كتير.

8- على فكرة، الكلمات المحبطة واليائسة اللي بتنشروها على سبيل الاستظراف، غيركم بيعتبرها رسالة ليه.

فحاولوا تنشروا الأشياء الإيجابية المبهجة، من باب حتى حسن الظن بالله.

9- تفتكر لما تزرع جرح في قلب أحدهم ويفضل بسببه ينزف سنين وسنين، ربنا هيعديهالك؟!

10-  كام أب ضاجع بنته أو صاحبة بنته،

وسابوا ضحايا مش عارفين يعيشوا حياتهم طبيعي؟

كتير قوي بس مش كل البنات بتتكلم.

11- على فكرة "الاكتئاب" مرض وبيتاخد له علاج عادي.

لا سبة ولا وصمة عار ولا مادة للسخرية.

12- محتاجين نفكر بعض بوجود ربنا في حياتنا علشان لو الدنيا لهتنا نعرف إننا من غيره ولا حاجة.

13- الأحلام بتتحقق فآمنوا بأحلامكم.

14- المرضى النفسيين دول غلابة فعلا؛ تخيل حد يعيش

وما يبقاش عارف شكل الحياة الطبيعية إزاي.

15- امتن لكل يوم صحيت فيه معافى جسديا ونفسيا، غيرك ده بالنسبة لهم حلم بعيد.

16- لقمة هنية، ضحكة صافية، صحبة طيبة، صحة وعافية..

دي نعم محتاجة شكر مستمر وامتنان دائم.

ربنا يرزقنا بيها كلها ويديمها.

17- عزيزي الرجل اللي بيعترض على ملابس أي واحدة يشوفها: أنت ممكن تغض بصرك عادي، لكن مش من حقك تفرض وصايتك على حد.

غض البصر ده أمر ربنا ليك، أمر صريح لا يحتمل أي تأويلات وعدم تنفيذك للأمر ده مالوش أي مبررات.

ما تبقاش زي إبليس اللي ربنا أمره بالسجود وتكبر وجادل، المفروض تتعلم الدرس بقى، ماعدتش صغير لتصرفات اللي مايعرفوش حاجة عن دينهم.

﴿قُلْ لِلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ ذَلِكَ أَزْكَى لَهُمْ إِنَّ اللَّهَ خَبِيرٌ بِمَا يَصْنَعُونَ﴾.

من كتاباتي 136

1- وهو الإنسان هيعوز إيه أكتر من إن محدش يرشق عينه في حياته.

2-الإنسان من آن لآخر محتاج حد يدلعه، علشان ما يكمكمش.

3-  أرجو انتشار ثقافة إن الصراخ يعني طلب استغاثة، والزعيق يعني مشاجرة تتطلب فضها.

لكن الصراخ عمال على بطال تحت بند اللعب والهزار ده سفه.

وأخص بالذكر جارتي اللي طول الوقت وخصوصا بالليل تفضل تصرخ كأن فيه مصيبة، والناس تتجمع وبتاع وتطلع عادي بتتخانق مع اللي معاها في البيت!

أو عيال الشارع اللي صوتهم يعلى فجأة فتتوقع خناقة مثلا، وتلاقيهم بيلعبوا بحماس مبالغ شوية!

عافانا الله وإياكم من كل سوء.

4-لازم يكون فيه بينكم اهتمامات مشتركة علشان تلاقوا بعد كده حاجة تجمعكم بنفس الشغف القديم.

5- قالت بثقة:

"كنت بحب حبك ليا، فيوم ما اتغيرت عليا مبقاش عندي سبب واحد يخليني أبقى عليك".

6-  عمر ما حد هيقدر يساعدك لو أنت مش شايف إنك محتاج مساعدة.

7- قبل ما تطلع ع المعاش حاول تشوف لك مشروع أو حاجة تشغل بيها نفسك بعد كده. 

8- لما توسع على أهل بيتك ربنا هيوسعها عليك.

9-ما تخنقوش عيالكم علشان لما تموتوا يبقوا يترحموا عليكم.

10- أنا شايفة إن الراجل قبل ما يفكر في الزواج لازم يكون مفطوم الأول.

مفطوم بقى عن ماما، ودلع ماما، وأكل ماما، وحياة ماما...

ويعرف إن اللي هيتجوزها مش هتكون أمه، ولا هتعامله معاملة أمه.

فينشف كده ويسترجل قبل ما يدخل بيوت الناس.

علشان ما يبقاش نوغا بشنب.

11- أجيد محو أثر الأشياء كأنها لم تكن.

12- الوعي إنك تبقي عارفة إن أي حد خذوقك عمره ما كان هيعرف يعمل ده إلا علشان أنتِ ساعدتيه.

إديتيله الأمان، كسرتِ قوانينك علشانه، سمحتيله يتعدى الحدود، ما نهرتيهوش أول ما فكر يتعامل بعشم واستحقاق غير مبرر...

وده يخليك تمتني للدرس المستفاد، وتعرفي تتعاملي إزاي بعد كده.

13-  بحب أشوف فرحة العيون لما بتتقابل بعد طول غياب.

14- عارفين شعور المرأة اللي مفيش في حياتها غير بيتها وزوجها وعيالها، لو قعدت ساعتين في ندوة أدبية مثلا؟

أهو دي شعوري لما بقعد مع ستات مفيش في حياتها غير بيتها وزوجها وعيالها.

15- هو مين المسؤول عن اختيار أسماء المدن الجديدة؟! وليه الاستسهال في أنه يحط اسم مدينة موجودة فعلا ويلحقها بكلمة "الجديدة" وتلاقيهم بعيد عن بعض أساسا..

طيب ما تختار اسم جديد عادي.

وده بمناسبة إني اتعرفت على بنات قريب من محافظة مختلفة، ولما عرفوا إني من المنصورة، قالوا أنهم زاروها قبل كده وبحرها جميل!

أنا: بحر مين اللي جميل معلش؟!

ـ بحر المنصورة.

ـ لا والله إحنا عندنا نيل مش بحر.

وفضلنا في الحوار ده لغاية لما افتكرت "المنصورة الجديدة"، ودي مدينة جديدة قرب جمصة وطبيعي يكون فيها بحر.

أتخيل لو حد قرر يزورني وراح هناك بقى!

ده غير إني عرفت برضه إن فيه مدينة اسمها "أسيوط الجديدة" ودي برضه مالهاش علاقة بأسيوط اللي في الصعيد، مش على نفس الخط يعني.

فابتكروا في اختيار أسماء تليق على المدن الجديدة ومالوش لازمة التكرار.

الريتريت النسائي الأول في نويبع

وسط كل الضجيج.. في صوت صغير جوّاكِ بيقول: "أنا تعبت".

مش من الشغل بس.
من التظاهر إنك بخير.
من الابتسامة اللي بتلبسيها قبل ما تطلعي من البيت.
من الوحدة اللي بتحسيها حتى وانتِ محاطة بناس.

جمعتُ عددا صغيرا من النساء اللي يفهمن هذا الشعور، في مكان بعيد عن كل شيء، على البحر.

أيام للكتابة. للصمت. للكلام الحقيقي.
بلا أقنعة. بلا أدوار. بلا "أنا بخير"

ريتريت "مساحة لنفسي"
العدد محدود، والتفاصيل لمن تريد فعلاً.

لو حاجة جوّاكِ تحركت، ابعتي رسالة  

على صفحة الكاتبة منى ياسين

من كتاباتي (135)

1- بشوف إن المحروم هو اللي ربنا حرمه من استخدامه في مساعدة الناس أو أنه يكون سبب في رزقهم أو في سعادتهم أو في قضاء حوائجهم باي طريقة.

والمرحوم هو اللي ربنا اختصه بممارسة الرحمة على عباده.

فاللهم اجعلنا من المرحومين ولا تجعلنا من المحرومين.

2-قالت بقهر: "أنت ماتعرفش يعني إيه تشكي من اللي المفروض تشكيله من اللي مضايقك". 

الناس الإيجابية والناس السلبية… مين تحب تقعد معاه؟

 

في الحلقة دي بنتكلم عن فرق القعدة مع الناس الإيجابية اللي بتدي طاقة حلوة وبتخلي الوقت يعدي بخفة، وبين الناس السلبية اللي كلامها كله شكاوى وتعب. تعالوا نشوف إنت بترتاح مع مين… وليه؟

أثرٌ لا ينقطع: استثمارك الذكي لما بعد الرحيل

 ماذا سنترك خلفنا عندما ترحل أجسادنا عن هذا العالم؟ في هذه الحلقة، نُبحر في أعماق وصية نبوية عظيمة تلخص مفهوم "الخلود المعنوي".

​سنتناول بالتفصيل الركائز الثلاث التي تضمن لك تدفق الحسنات حتى وأنت تحت التراب: ​الصدقة الجارية: كيف تبني مشروعاً بسيطاً في الدنيا يظل ظله ممتداً في الآخرة؟ ​العلم الذي يُنتفع به: هل يقتصر على الكتب فقط؟ أم أن تعليم خُلقٍ أو حرفة يدخل في هذا الباب؟ ​الولد الصالح: سر التربية التي تجعل ابنك أو ابنتك امتداداً لعملك الصالح ودعاءً لا ينقطع. ​انضموا إلينا لنتعلم كيف نحوّل حياتنا المؤقتة إلى أثر دائم لا يعرف النهاية.

من كتاباتي (134)

 

1- تنهدت وقالت: "لما ببعد عنه ملامحي بترتاح، ووشي بيفك التكشيرة، وبصير أحلى وبحس إني حرة".

2- "واتقوا يوما ترجعون فيه إلى الله"

لقتني برددها وأنا في العيادة، بعد ما شوفت قصادي حالة لأب عجوز، لسانه تقيل وحركته كمان، جاي مع بنته الشابة، اللي لفت نظري إنها ما قعدتش جنبه ولا كانت مهتمة بأي حاجة بيقولها، كأنها بتأدي واجب ثقيل على قلبها ومفيش غيرها تعمله.. وفي الصف المقابل أب كبير في السن، واضح إنه سليم جسديا، بنته الشابة برضه معاه، بس واضح من سكوتهم إن مفيش أي علاقة بينهم غير واجب البنت بتعمله.

تأملت الحالتين وقلت: واتقوا يوما تشيخون فيه وما تلاقوش غير بناتكم اللي قسيتوا عليهم، وتبقى هي اللي توصلكم وتقف معاكم في مرضكم.

3-ده بعض الكلمات قبور فعلا.

مجرد كلمة ممكن تقفلك اليوم، ممكن تخلي الدنيا سوداء، ممكن في ساعتها تفقد طاقتك وكأن حد شد الفيشة...

فصدق رسول الله حين قال: "إنَّ الرجلَ لَيتكلَّمُ بالكلمةِ لا يرى بها بأسًا يهوي بها سبعين خريفًا في جهنم"

وكأن الكلمة مش شرط تكون كلمة كفر او خروج من الدين، ده وارد جدا تكون كلمة كسرت بيها خاطر حد، أو علقتله تعليق سخيف، أو حتى هزرت معاه بغباء...

فخدوا بالكم من كلامكم، وما تحدفوش طوب بلسانكم.

وافتكروا دايما إن "الكلمة الطيبة صدقة".

وأخص بالذكر الناس اللي مفكرة إن الكلام ده أكيد مش عليها، زي مثلا الأم اللي بتسمم بدن عيالها وهي بتقارن بينهم وبين ولاد أختها مثلا، أو واخدة ملامح بنتها مادة للسخرية في التجمعات، أو الصديقة اللي بتعلق على أكل صاحبتها وإنها ما بتقولش "لا" على اللي بيعزم عليها بحاجة، أو الأب اللي بيعد على عياله اللقمة وبيحاسبهم على غلو الفواتير، أو الابن اللي بيعلي صوته على أبوه ومفكر إنه كده بقى جامد جدا واهو كله بهزار...

حطوا نفسكم دايما مكان غيركم، واللي ما تقبلوش على نفسك ما تقبلوش على غيرك.

4- قالت بأسى: "كان بيتفنن يشيل ابتسامتي من على وشي".

5- قبل ما تفكر في الإنجاب، اعرف إنه جنة أو نار.

يا إما معاملتك لولادك هتدخلك الجنة أو مش هتشم ريحتها.

وفكرة العبودية والملكية والعنجهية الفارغة معاهم، أنت هتدقع تمنها، ما هو مفيش حاجة بتروح عند ربنا.

والموضوع ده ممتد طول العمر مش بس وهما صغيرين.

واعرف إن فيه فرق كبير قوي بين برهم ليك وهما بيحبوك وبين برهم ليك وهما مش طايقينك.

6- ولأني بحافظ على حقوق الناس حتى لو في كوباية ميه، ما بسامحش اللي ياخد حقي ولو حتى في إزازة ميه.

7-  عادي تختلف مع غيرك، الفكرة أنك تعبر عن ده بأدب.

البذاءة تعكس سوء نشأتك وما ظنش ده في صالحك.

8-علشان رحيلك يكون خسارة لازم وجودك يكون مكسب.

9-"قال يا بشرى هذا غلام"

لما تأملت في المشهد، حسيت إني سمعت نبرة صوته الفرحانة، ولقيت إن شعور الاستبشار ده حلو قوي، تخيل لما تستبشر بأي حاجة تحصلك.

يا بشرى الدنيا بتمطر

يا بشرى الجو حلو

...

ربنا يبشرنا بالخير ويرزقنا باللي يبشرونا بالحلو واللي يبقى كلامهم وأفعالهم كله بشارة

10- تعاطفكم مع الكلاب الضالة بشوفه انعدام للإنسانية

وتعليقاتكم في أي منشور صاحبه بيستغيث فيه بيثير اشمئزازي.

مش ده اللي هتاخده عليه نيشان ولا هيتكتب في صحيفتكم أنكم رحماء.

الرحمة للإنسان أولا.

11- ما بيفضلش من الإنسان غير كلماته وأثره الطيب. 

يا ترى مين هو الجار؟

 الحقوق والواجبات ليست مجرد كلمات، بل هي أسلوب حياة. في هذه الحلقة نناقش الجانب العملي من "حق الجار":

​إفشاء السلام وحفظ الغيبة. ​مراعاة الخصوصية والهدوء. ​التكافل الاجتماعي في الأزمات. استمتعوا بالمشاهدة ولا تنسوا مشاركة الحلقة مع جيرانكم لتعم المودة!

دليل الغباء العاطفي

 هل سئمت من التلميحات؟ هل تريد طريقة مضمونة (وغبية نوعاً ما) لجعل الطرف الآخر يرحل؟ في هذه الحلقة، نقلب الآية. سنتحدث عن تصرفات 'الغباء العاطفي' التي تقتل الحب وتُجبر شريكك على حزم حقائبه. سنستعرض أمثلة واقعية، بأسلوب ساخر وتحليلي في آن واحد، لنفهم معاً ما الذي يهدم العلاقات حقاً.

تنويه: لا نتحمل مسؤولية الوحدة بعد المشاهدة!

من كتاباتي (133)

 

1- لما بحب أختبر غلاوتي عند حد بطلب منه حاجة وأنا عارفة أنها في متناول يده وبشوف فعله بقى.

2- لما بتفرج على أفلام آكلي لحوم بشر بيبقى لسان حالي طول المشاهد دي: "هي الحيوانات قصرت معاكم في إيه؟!".

3- لما تيجي تتعامل مع حد اختار اللي عنده خبرة كويسة ومعروف أنه محترف في شغله أو على الأقل بيسعى يكون أفضل.

4- معلومة للكُتاب: تكلفة شحن الكتب على دار النشر.

5- فيه كورسات دلوقتي لتعليم فن التعامل مع الناس وكيفية الإدارة وما إلى ذلك.. لو كنت تفتقر للملكات دي حاول تدرس ده قبل ما تفكر تفتح مشروع تجاري.

6- الحموم يزيل الهموم.

7- بطل تشكي للناس ظروفك، لأنه شيء

ما يخصهمش، وخصوصا لو اللي بينكم مجرد شغل.

8- أظن إن أعظم نعمة في الحياة إنك تقدر تتنفس..

إنك تعرف تاخد نفس طبيعي.

فالحمد لله مع كل سحبة نفس.

9-بعد كل جرائم القتل والاغتصاب والتحرش، والسب والقذف...

هو إيه اللي لعب في عداد العقول، وخلاها تلجأ للجرائم بنفس راضية كده؟

إيه اللي بيتفرجوا عليه وبيدخلوه دماغهم طول الوقت علشان تبقى دي النتيجة؟

كلهم بيئات منحطة مافيهاش لا دين ولا تربية ولا أخلاق؟!

معقول كل المحيط بهم دفعهم لكده عادي؟

ولا هما مرضى نفسيين وعندهم مشاكل محتاجة تتعالج؟

مين سمم عقولهم واداهم استحقاق لأفعالهم الشائنة من غير ذرة تفكير في أي عواقب؟!

ظاهرة كارثية فعلا وأرجو تخلص قريب على خير.

 

مناقشة "انقشاع الغمامة" لمنى ياسين

 في هذا اللقاء، ناقشني الكاتب المبدع عمرو مجدي في حوار شيق وممتع حول مجموعتي القصصية الأحدث

"انقشاع الغمامة".

​تطرقنا خلال الحلقة إلى: ​فلسفة المجموعة والرسائل المختبئة خلف العناوين. ​تجربة الكتابة بين الواقع والخيال. ​إجابات عن أسئلة القراء التي وردت خلال البث المباشر. ​ساعة من البوح الأدبي نتمنى أن تقضوها معنا، وننتظر آراءكم في التعليقات حول القصص والشخصيات. ​لطلب نسخة من الكتاب (داخل أو خارج مصر): تواصلوا معنا عبر الواتساب: 01026326295 📱 ​لا تنسوا الاشتراك في القناة وتفعيل الجرس لمتابعة اللقاءات الأدبية القادمة.

ما توقعاتك من مدقق كتابك؟

 

ما توقعاتك من مدقّق كتابك؟

هل تنتظر منه فقط تصحيح الأخطاء الإملائية والنحوية؟
أم تتوقع أكثر من ذلك؟
المدقّق اللغوي ليس مجرد مصحّح للأخطاء، بل شريك حقيقي في رحلة الكتابة.
فهو يعتني بنصك، ويمنحه ما يستحقه من دقة ووضوح وانسيابية، مع مراجعة علامات الترقيم، وسلامة التراكيب، واتساق الأسلوب، ليخرج العمل في أفضل صورة ممكنة.
لأن النص المتميز لا يكتمل إلا بمراجعة تليق به، أحرص على تقديم تدقيق لغوي شامل يعتني بكل تفاصيله، ويمنحه الصياغة التي يستحقها.
إذا كنت تبحث عن مراجعة دقيقة لنصك، يسعدني أن أكون شريكة رحلتك نحو إصدار أكثر احترافية وتميزًا.

للتواصل على صفحتي على الفيسبوك:

منى ياسين

الحزن يسرق العمر

 ما تخليش الحزن ينهل سنين عمرك، العمر اللي بيروح مش هيرجع تاني.

حلقة جديدة شوفوها يمكن تلهمكم بحاجات حلوة

حلقة من سياحة داخلية (معهد أسيوط الديني… مهد العلم القديم في قلب الصعيد)

 في قلب أسيوط، يقف المعهد الديني كواحد من أعرق المؤسسات التعليمية في الصعيد… مكان خرج أجيال من العلماء والطلاب، وحافظ على الهوية الأزهرية القديمة بكل وقارها.

ممراته الهادية، تصميمه التراثي، وساحة المعهد اللي شهدت خطوات آلاف الدارسين عبر السنين… كل تفصيلة فيه تحكي عن تاريخ طويل من العلم والانضباط والروح الدينية المستنيرة. رحلة قصيرة في محيط معهد ليه مكانته… تشوف فيها أصالة التعليم الأزهري وجو مدرسة لها هيبتها منذ عشرات السنين. يلا نلف مصر

برنامج سياحة داخلية مع منى ياسين

حلقة من سياحة داخلية ( فن التل… حكايات على قماش التل داخل متحف سعد زغلول)

 جوه قلب أسيوط القديمة..

في متحف الفنان سعد زغلول، دخلت عالم فن التل. صورت اللوحات، وغصت معاكم في جمال الفن ده، والأهم… عملت لقاء خاص مع الفنان نفسه— وساب يحكيلنا عن بدايته، شغفه، وإزاي قدر يحفظ تراث الصعيد في أعمال فنية متفردة. حلقة مختلفة… عن فن نادر، ومكان بيجمع بين التاريخ والموهبة والهوية. يلا نلف مصر

سياحة داخلية مع منى ياسين

حلقة من سياحة داخلية ( قصر الكسان باشا… هيبة من الخارج وسرّ ينتظر الاكتشاف)

 في قلب أسيوط… يقف قصر الكسان باشا شامخًا، بواجهته الفخمة وزخارفه اللي بتحكي عن زمن كان الجمال فيه لغة معمار.

قدرت أقرّب منه، أمشي حوالين أسواره، وأشوف التفاصيل اللي فضل الزمن سايبها على الواجهة: شبابيك عالية، أبواب ضخمة، ونقوش تشهد على تاريخ أسرة كان لها وزن وهيبة. القصر من برّه بس كفاية يخليك تتخيل اللي وراه… فخامته، غرفه، والحكايات اللي اتحبست جواه من العصر الخديوي. رحلة قصيرة حوالين مكان كبير… يلا نلف مصر

برنامج سياحة داخلية مع منى ياسين

من كتاباتي 132

 

1- لما حد يزعل منك وأنت تتكبر تصالحه بالطريقة اللي ترضيه وتنكر الموقف برمته أو تقلب التربيزة وهو يعديهالك ويصالح نفسه عليك، أنت كده قطعت خيط الأمان اللي كان بيربطه بيك، بقى عارف إن زعله مش فارق ومشاعره معاك مش متقدرة وإنه عادي عليك يهون، ومع الوقت رصيدك جواه هيقل لغاية ما يخلص، ووقتها هيمشي بعد ما خلص جواه كل الفرص اللي اداهالك.

فقبل ما تستغرب أنه مشي، استغرب إنه استحمل يكمل معاك بعد أول خذلان منك ليه.

2- قبل ما تقل بأصلك مع حد، افتكر إن الدنيا دوارة

3- لا جدوى من إحياء الموتى.

ده بالضبط اللي هتحسه لما تدي لحد سابك فرصة جديدة.

لأنه في السابق لما ساب الخيط اللي بيربط بينكم ده لأن مشاعره ناحيتك ماتت، فأنت لما بتشوفه رجع يمسك الخيط تاني ما بتاخدتش بالك إن إيد الموتى رخوة، لا هتحافظ عليك ولا هتقدر فرصتها الجديدة.

أنا عارفة إن مشاعرك في اللحظة دي هي اللي بتتحكم في أفعالك على أمل إنه يمكن... لكن للأسف الحقيقة المُرة إن اللي تعمد في يوم يستغنى ويستقوى ويهمل ويعاملك بما لا يليق بقدرك، مفيش حاجة هتخليه يعتبر رجوعك نعمة عليه الحفاظ عليها وتقدير وجودها.

يكفيك أنه بجهله رفض عوض ربنا له اللي كان متمثل فيك.

فما تزعلش؛ وجودك خسارة فيه.

4-عمرك فكرت إن قيمتك قصاد الناس بتتقدر بمقدار الخدمة اللي بتقدمها؟

يعني كل صاحب مهنة بسببها الناس بتتصل بيه يحمد ربنا عليها لأنه من غيرها محدش هيلجأ له في حاجة، وأعتقد دي المعاناة الاولى لأصحاب المعاشات إن إحساسهم بقيمتهم بيقل، وده بيفسر إن ناس كتير ما تستحملش تقعد من غير شغل.

وكأن ده المعنى الحرفي لمقولة: "خادم القوم سيدهم".

 

حلقة من برنامج سياحة داخلية ( الدير المحرق… أقدس محطات العائلة المقدسة في قلب أسيوط)

 في حضن جبل قسقام، وبين طبيعة هادية وروحانية عالية، بيقف الدير المحرق… واحد من أهم محطات العائلة المقدسة في مصر، والمكان اللي أقامت فيه أطول مدة خلال رحلتها.

جدران الدير القديمة، الكنيسة الأثرية المبنية فوق البيت اللي مكثت فيه العائلة، والقداس اللي بيملا المكان بهدوء وطمأنينة… كل ده يخليك تحس إنك داخل تاريخ حيّ مش مجرد مبنى. الدير المحرق مكان مختلف… طاقة روحانية عالية، تاريخ قوي، وعمق مكاني يخلي الزيارة رحلة داخلية قبل ما تكون جولة سياحية. يلا نلف مصر.

برنامج سياحة داخلية مع منى ياسين

حلقة من برنامج سياحة داخلية (دير درنكة… حيث مرّت العائلة المقدسة وترك الزمن بركته)

 في حضن الجبل الغربي لأسيوط، وعلى ارتفاع ياخد النفس، يقع دير السيدة العذراء بدرنكة… واحد من أهم المزارات الروحية في مصر.

هنا بتتلاقى قداسة المكان مع جمال الطبيعة: كنيسة محفورة في الجبل، كهوف قديمة لجأت لها العائلة المقدسة في رحلتها، وإطلالة واسعة على الصعيد كله. دير درنكة مش مجرد مزار… ده رحلة سكينة، وهدوء، وعبق تاريخ عمره آلاف السنين. جاهزين نطلع الجبل ونعيش واحدة من أعمق التجارب الروحانية في أسيوط؟ يلا نلف مصر

 برنامج سياحة داخلية لمنى ياسين

الإسلام بريء

حلقة جديدة 

 الجريمة عمرها ما كانت طرف واحد،

والدين عمره ما حاسب بنص ميزان. في الحلقة دي بتكلم عن ليه بنجلد المرأة بس، وليه المجتمع بيغضّ الطرف عن الرجل، وليه بعض الأصوات بتحاول تلبس الإسلام جريمة هو بريء منها. الإسلام بريء من تبرير التحرش، وبريء من تحويل المرأة لشماعة، وبريء من ثقافة بتدين الضحية وتبرّئ الفاعل. الذنب ذنب فعل… مش ذنب لبس، ولا جنس، ولا ضعف طرف واحد.

كتاباتي (131)

 

1- "استبقوا الخيرات"

يعني بالبلدي
"خير البر عاجله"

2- عمرك فكرت إن قيمتك قصاد الناس بتتقدر بمقدار الخدمة اللي بتقدمها؟

يعني كل صاحب مهنة بسببها الناس بتتصل بيه يحمد ربنا عليها لأنه من غيرها محدش هيلجأ له في حاجة، وأعتقد دي المعاناة الاولى لأصحاب المعاشات إن إحساسهم بقيمتهم بيقل، وده بيفسر إن ناس كتير ما تستحملش تقعد من غير شغل.

وكأن ده المعنى الحرفي لمقولة: "خادم القوم سيدهم".

3-استعيذوا بالله من فواجع الأقدار بدل استظرافكم القميء.

مش كل حاجة قابلة للهزار والسخرية.

إنما أقداركم تؤخذ من أفواهكم.

اللهم إنا نعوذ بك من فواجع الأقدار

اللهم لا تؤاخذنا بما فعل السفهاء منا

4-عزيزتي الأنثى: يأتي الحذر ـ دومًا ـ من مأمنه.

من كتاباتي (130)

 

1- صفعته بقلمها دون أن تتسخ يدها؛

فتلك التي استهتر بقلبها، ألقنته درسًا لن ينساه.

2-أحيانا، ببقى عاوزة من اللي بيتكلموا باسم الدين وبيشجعوا التحرش والاعتداء على المرأة بناء على ملابسها، إنهم يجيبوا آية قرآنية واحدة تبيح التحرش والأذى!

3- مش آن الأوان بقى نبدل نغمة "شوف لابسة إيه"

لـ "توقف عن انتهاك محارم الله ولو حتى بالنظرة".

من كتاباتي (129)

 

1- أعتقد أن من ضحالة الفكر: الجمود في الرأي، وإطلاق الأحكام بعنجهية، وكأنها حقائق علمية.

2- من الإنسانية إني كمُحبة للحيوانات، أحترم خوف الناس منها.

أكيد كلنا فاكرين وإحنا صغيرين لما كنا بنخاف من حاجة وحد ما بيخافش منها كان إزاي بيستغل خوفنا في ترهيبنا، وكان بيستمتع بحقارة بالصريخ المصاحب لذعرنا وقتها.

ده بشوفه مع الاستهزاء من الناس اللي بتخاف من الكلاب.

3- أكيد كلنا بنتضايق لما نبعت رسالة وما يتردش عليها، أو ما تتشافش، أو يتأجل الرد لأجل غير مسمى على ما الظروف تسمح.

فلو كنت بتعمل كده متعمد، حاول ما تتباهاش بده، لأن دي قلة ذوق وعدم تقدير واحترام للي بعتلك الرسالة، واللي أكيد مش بيشحت منك.

وده بمناسبة ريل شوفته لمذيعة بتسأل ممثلة عن شكوى صحباتها أنها ما بتردش على الرسايل، فهي خدت الموضوع بضحك، وقالت إنها بترد في دماغها أو بتنسى ترد.

وده فكرني بزميل كان فين وفين على ما يشوف الرسايل أو يرد على اتصال، وبالمقابل لو بعت رسالة أو اتصل وأنا اتأخرت، يفضل مستمر في الاتصال بلا توقف لغاية ما أرد.. وكأن هو بيبقى عنده طروف تمنعه عن الرد على طول وأنا معنديش مثلا.. مع العلم إن اللي يعرفوني كويس، يعرفوا إني مش طول الوقت ببقى ماسكة الموبايل عكس ناس كتير ممكن تدخل الحمام بيه.

فياريت نعامل الناس زي ما نحب إنهم يعاملونا.

4- الطبيعي إنك لما ترجع من بره تغسل إيدك كويس بالصابون.

وقبل ما تعمل أي حاجة في المطبخ برضه تغسل إيدك كويس بالصابون.

ما تنقلش الميكروبات والفيروسات بجهالة منك لأهل بيتك.

5- "إماطة الأذى عن الطريق صدقة".

أنا ضدّ الأذى بمعناه المطلق: الكلمات المؤذية، والسلوكيات المؤذية، والناس المؤذية، والحيوانات المؤذية.

القاتل مؤذٍ ويستحق العقاب، وهذا لا علاقة له بكونه إنسانًا مكرّمًا؛ لأن تصرّفه أسقط عنه منحة التكريم.

والكلب العقور مؤذٍ ويستحق القتل، وهذا لا علاقة له بأن فصيلة الكلاب مستأنسة وغير مؤذية في العموم.

أمّا من يدافعون عن قاتل أو عن كلبٍ عقور، فهم في الحقيقة يبحثون عن بطولة زائفة عبر التطاول، وتفضيل حياة الكلاب المؤذية على حياة الإنسان. وهذا لونٌ من القصور العقلي، وأذىً مضاعف، يحتاج أصحابه قبل غيرهم إلى كفّ أذاهم عن الناس.

6- لما الواحد يكون جعان أمان

أي حاجة صغيرة تبان وليمة.