مستنى إيه؟

إمتى ييجى اليوم اللى تقرب فيه لربك
إمتى ييجى اليوم اللى تستغفر فيه لذنبك
إمتى ييجى اليوم اللى تبدأ فيه حياتك
إمتى تندم على ذكرياتك
إمتى تقرب مسافات بعادك
هو أنت ضامن بقية حياتك
يوم ما تقول نسيت ونسيت
لأمانسيتش
مكنتش اعرف
وأديك عرفت هتعمل إيه
هصلى لربى واستغفر
يمكن يغفر
لأ مش يمكن ده أكيد يغفر
علشان أمثالى يوم مايحنوا
يلاقوا حضن كبير بيضم
يوم مادموعهم تغسلهم
يوم ماذنوبهم توجعهم
يوم ما ندمهم يعصرهم
يوم ماتقول
لبيك ربى
ساعتها هتسمع
اهلا عبدى
نفسى أقرب

وخايف أبعد

تعالى وجرب

وماتقلقش

ده ربى وربك

حليم بعباده

رؤوف بعباده

مابيخوفش

أدرى بحالك

سميع لدعائك

مابيخلفش

قرب وادعى وصلى وصوم

ده ربك هادى وقيوم

ولو خايف تقع فى يوم

ربك معاك لما تقوم

بس انت قوم

ماتستموتش

قوم بسرعة وصلى وقول

ربى إقبلنى أنا جيت على طول

ما أقدرتش أبعد وجيت مذهول

إزاى بعدت أكيد مسطول

إزاى حرمت عليا مناجاته

إزاى قدرت أنام فى بعاده

وإزاى وإزاى وإزاى

المهم إنى رجعت ليك

وبقيت ياربى ملك إيديك

وده حالى ومايخفاش عليك

فيارب إقبلنى علشان عبيدك

مالهومش غيرك

يتمنوا رضاه

ولايقدروا يعيشوا حياة

من غير هداية ورحمة ونور

ده طريقنا طويل مكسور

مليان جسور

ونفسى أعدى

وخايف أهدى

لأ متخافش

سيبها على الله ماتتردتش

قوم بسرعة ومد إيديك

قوله إغفرلى أنا راجع ليك

وبرحمة ربك بيك

هيقوللك تانى

أهلا بيك.

خُدى بالك

إلى من تقوم بهذا المشهد/ هل تستطيعين الصلاة وأنتى ترتدى هذه الملابس الضيقة؟.
هل تقبلين أن تكونى فريسة للذئاب بهذا الذى تعتقدينه ستره؟.
انتى عارفة كام شاب ممكن يتفتن بسببك ومايقدرش يغض بصره وبالتالى تبقى شاركتيه فى الإثم لإنك ساعدتيه؟.
ياترى هتبقى مبسوطة لما تتعاكسى ويتقالك أى كلمة بايخة؟.
ياترى هيبقى إيه شعورك لو حد قالك "عيب على الحجاب اللى أنتى لابساه" وهتردى عليه ولا هتسكتى لإنك معندكيش جواب؟.

هل تقبلين أن يراكى أحد من محارمك وأنتى فى هذا الوضع؟.
تفتكرى لو واحدة أنتى شوفتيها كده مع اخوكى إنطباعك عنها هيكون ايه؟.
هل فى إعتقادك إن نهاية المشهد ده هتكون سعيدة وهيكون فيه كوشة وزفة؟! يبقى بيتهيألك طبعا لأن المشهد ده آخره ورقة عرفى هتتقطع ومش هيبقى ليكى عنده حاجة غير فضيحتك.!
بتعملى فى نفسك كده ليه؟ للدرجة دى نفسك وكرامتك هاينة عليكى؟.
عايزة أقوللك اللى بيرخص نفسه مينفعش يكون غالى عند حد؟.
إزاى هو هيحترمك إذا كنتى انتى مش بتحترمى لا نفسك ولا أهلك؟.

هل تقبلين أن يراكى أحد رؤسائك أو أساتذتك وأنتى تقومى بهذا؟
هل تقبلين أن يصورك أحد بالموبايل ويبعت هذا المشهد بالبلوتوث إلى من يعرفك ومن لايعرفك؟
هل تقبلين أن يتأمل فيكى الرجال بهذه الطريقة؟
هل تقبلين أن يقال عليكى أى كلمة توجعك؟

هحكيلك على موقف مماثل"شخص يمتلك كافتريا وسعيد جدا بزواج أخوه وكل شوية يشغل شريط فيديو الفرح على شاشة العرض المهم فيه بنت فضلت ترقص فى أكتر من أغنية وطبعا الفيديو مركز عليها وكان شخص متقدم إلى هذه الفتاة التى كانت ترقص ورآها فى البيت مكسوفة ووشها فى الأرض وفى الفيديو زى ما أنتى شايفة تفتكرى أنتى لو مكانه هتعملى إيه؟ .

أختى الحبيبة:بالله عليكى كونى أمينة على نفسك.
الاسلام أكرمك ليه بتهينى نفسك؟.
شوفى إيه اللى ينفع تصلى بيه واخرجى بيه.
شوفى إيه اللى ينفع تعمليه قدام أهلك واعمليه.
أنتى عارفة يعنى إيه محجبة؟ يعنى بقيتى رمز للإسلام بما ترتدينه وبالمقابل بما تفعلينه فبالله عليكى ماتشوهيش الاسلام بأفعالك.

..... من طرف واحد

-ما أصعب أن تجد كل من حولك يشاركونك فرحتك وأقربهم إلى قلبك متجاهل.

-ما أصعب أن تنتظر منه كلمة لتجد نفسك تسمعها من غيره.

-ما أصعب أن تجرى بشوق عليه لتجده يصدك بكل قسوة.

-ما أصعب أن يغيب عنك دون سبب رغم علمه بمدى قلقك عليه.

-ما أصعب أن يغلق كل الابواب فى وجهك.

-ما أصعب أن تكون متعته فى تعذيبك.

-ما أصعب أن تسلمه الخنجر ليطعنك به.

-ما أصعب أن تتوقع نصر أكتوبر لتجد نكسة 67.

-ما أصعب أن تتصل فلا تجد مجيب.

-ما أصعب أن تفصح عما بداخلك ولا تجده مستمع.

-ما اصعب أن تتحدى العالم بوجوده فى حياتك وتخسر التحدى.

-ما أصعب أن تضحى من أجل من لايستحق.

-ما أصعب شعورك بأنه لايبادلك ماتشعربه نحوه.

-ما أصعب مواجهتك له باحساسك فى كذبه عليك ولا تجده ينكر أو حتى مدافعا عن نفسه.

- ما أصعب أن يكذب عليك من تصدقه طول الوقت.

نصيحة:*من يسلمك قلبه أمانة لايستحق أن تعبث به.

*لاتجرح قلبا يحبك مهما اختلفت معه.

*لاتجعل حب الآخرين لك غلطة يندمون عليها.

*لاتساعد فى بناء قصرفى قلب من يحبك
طالماإنك لاتريد العيش فيه.

فضيحة فى رداء إنقاذ

سأروى لكم مأساة لتشاركونى هذه المصيبة ولألتمس منكم الدعاء.

"خرجت فتاة بناء على طلب أمها لتقضى لها بعض إحتياجات المنزل ولكن الفتاة تغيبت على غير عاداتها فاتصلت بها الأم على موبايلها ولكن ابنتها لم تجيب قلقت الأم على ابنتها وخاصة أن ابنتها لم تذهب إلى جارتها كما هو الإتفاق خرجت الأم تبحث عنها ومعها الأهل والجيران والمفاجأة يجدونها ملقاة فى شارع مظلم وهى عارية تماما ومخنوقة بالشراب التى كانت ترتديه اتصلوا بالإسعاف سريعا وهى الآن بين الحياة والموت".

المفروض إن الحادثة كده انتهت لكن لأ شوفوا بقية المصيبة.

"أثناء ذهابها فى سيارة الإسعاف يزال الغطاء من عليها لتظل فرجة أمام الناس يا حسرتــــــــاااه يامصيبتـــــاااه

مش مكفينهم اللى هى فيه لأ والمصيبة التالية أنهم قالوا إنهم عملوا كده وبيوصفوا فيها كمان وكل الناس عرفت انها دخلت المستشفى عارية ومن ضمن بقية المصايب الطبيب المعالج معجب بيها أيضا وبيوصف فيها آآآه ياحسرتــــــاااه

وبعد سماعى لهذه الحادثة التى يندى لها الجبين أريد أن أوجه عدة تساؤلات إلى كل من:

*الجانى القائم بهذة الفعلة الشنيعة.

كيف جرؤت على إنتهاك حرمة الله بهذه الطريقة؟ لماذا فعلت مافعلت؟ ما إستفادتك من تجريدها من ملابسها؟ هل سرقة ملابسها والموبايل التى تحمله هيغنيك وهيحقق لك الثراء؟

ياترى أنت مدرك حجم الكبائر اللى قمت بيها؟ وياترى مفكر إن ربنا هيسيبك؟

عايزة أقوللك إن ربك كبير أوى يمهل ولايهمل ومسير اللى انت عملته هيتردلك وجزائك هتاخده فى الدنيا قبل الاخرة

فانتظر انتقام الله

*من وجدها واتصل بالاسعاف

أشكرك على محاولة إنقاذها ولكن لى عتاب لماذا لم تسترها بأى شئ محكم حتى لايزال تحت أى ظرف سواء بقصد أو من غير قصد؟ لماذا لم تعتبرها أحد محارمك وحاولت صيانتها حتى ممن تعتقد أنهم سينقذون حياتها؟

لو كنت قبل اتصالك بالإسعاف اتصلت بأهلها كانوا صانوها وعرفوا ازاى يحافظوا عليها ولكنى التمس لك العذر فيمكن المفاجأة ورهبة الموقف ورغبتك بإنقاذ حياتها كان مايشغل بالك ولكنك ساعدتهم دون قصد فربنا يسامحك وياريت أنت كمان متوصفش فيها وانسى اللى شوفته منها عشان ربنا يحافظلك على محارمك ويتقبل هذا العمل الذى قمت به

*رجال الاسعاف

أين ضميركم فى مافعلتم؟أين خوفكم من الله؟ أين الأمانة؟ياترى لو كانت دى واحدة من محارمكم كان ده هيكون تصرفكم

اعرفوا انه كما تدين تدان وأن ربنا مطلع عليكم وشايفكم وعلى فكرة أنتوا ماتختلفوش كتير عن اللى عمل فيها كده من البداية على الأقل ده خلاص اتعرف انه مجرم والكل فى انتظار القبض عليه ولكن أنتوا مستترين وراء قناع المهنة وربنا كبير قادر ينتقم منكم فى لحظة ويشل إيديكم اللى كشفتها ويعمى عيونكم اللى تفحصت فيها حسبى الله ونعم الوكيل فيكم وفى أمثالكم

*الطبيب

أين يمين الله الذى أقسمته قبل مزاولة المهنة؟أنت وظيفتك تعالجها ولا تقول رايك فيها؟ وياترى كان قصدك أن الناس تتعاطف معاها عشان شكلها عجبك لو كان ده قصدك فأحب اقوللك إنك غلطان لإنها محتاجة الستر مش الفضيحة وياترى لو كان شكلها معجبكش كنت برضه هتوصف فيها مهما كان قصدك أيها الطبيب فقد خنت الأمانة ولاتستحق هذا اللقب فأنت عار على جميع الأطباء الشرفاء.

لماذا لم تتخيلها أحد محارمك؟ هل كنت ساعتها برضه هتقول ماقلته ؟

أنت ساعدت على انتهاك حرمة الله بنظرك ليها وتفحصك بهذه الطريقة ثم الإفصاح عن رأيك يعنى سيادتك بتجهر بالمعصية بكل استهزاء

كلمة أخيرة يامن لاتستحق أن تكون معالج للبشرربنا كبير أوى وقادر إنك تكون مثلها فى يوم من الأيام أنت أو أى حد من محارمك وساعتها هتشعر بقيمة مافعلته ناحيتها وناحية اهلها.

*من ينقل تفاصيل الحادثة

أما تعلم إنك تنشر الفحشاء دون قصد؟ مفكرتش فى مشاعر أهلها وسيرة بنتهم على كل لسان رغم إنها مظلومة ومجنى عليها؟مفكرتش إزاى البنت دى لو ربنا أراد لها الحياة ازاى ممكن تواجه هذا الكلام؟مفكرتش إن ممكن ربنا يبعت حد يتكلم عنك وعن محارمك بالسوء؟ لماذا لاتشغل نفسك بذكر الله بدل الخوض فى أعراض الناس؟ هيفيدك بإيه إذا كنت تعرف هى من عيلة إيه أو ساكنة فين؟ يا أخى ده أنت لو سترت عرض مسلم ربنا هيبعتلك اللى يستر عرضك

لو بنتك أو أمك أو زوجتك أو أختك حصللها كده شعورك هيكون إيه لما تسمع الناس بتتكلم فى الموضوع وبالطريقة اللى شايفينها سواء بقى باللى حصلها فى الشارع أو فى سيارة الإسعاف أو آثناء إستقبالها فى المستشفى أو آثناء علاجها أو فى خيالات كل مريض لوخايف على محارمك اتقى الله واسكت.

*أهل المجنى عليها وبالذات الأب

عارفة أن مصيبتك كبيرة بس فى كلمة عايزة أقولها رغم إنك أكيد مش مستحمل أى كلام من حد.

عايزاك تراجع نفسك وشوف أنت اتكلمت فى عرض مين أو ساعدت على إنتهاك شرف مين سواء بقصد أو من غير قصد استغفر الله لذنبك يمكن تكون أذنبت زمان فى شبابك وأنت ناسى وربنا بيخلص ذنبك أنا مش عايزة اظلمك بس ده مجرد اقتراح إنك تستغفر على ذنب تعرفه او لاتعرفه.

*المجنى عليها

أما انتى يامن لاأعلم حتى اسمك يعلم الله كم توجعت وكأنك من أقرب الأقربين إلى قلبى لا أعرف كيف أعزيكى ولاعارفة هل أدعيلك بالحياة عشان ترشدى عن الجانى ولا ادعيلك بالموت راحة من ماستلاقينه من كلام الناس ولكنى سأدعو أن يتولاكى الله برحمته ويرزقك الحياة لو كانت خيرا لكى أو الموت لو كان خيرا لكى

اختى الغالية:لاتقلقى فكل من قام بهذا سيلقى جزائه فى الدنيا قبل الاخرة............

اللهم يا منتقم ياجبار يامالك الملك ياقادر على كل شئ يا من يقول للشئ كن فيكون.

اللهم إجعل ثأرنا على من ظلمنا وأرنا ثأرنا فيه.

اللهم عليك بمن ينتهكون محارمك.

اللهم عليك بمن ينتهكون محارمك.

اللهم عليك بمن ينتهكون محارمك.