تاج

جائنى هذا التاج من أختى الحبيبة عاشقة الفردوس وأعتذر للتأخير فقد خصصت هذا اليوم تحديدا للاجابة
نبدأ ببسم الله الرحمن الرحيم .

*لو سألك غير مسلم عن نبى الاسلام بماذا ستجيبه؟

أنه محمد بن عبد الله .فهوعبد الله ورسوله وصفوته من خلقه وحبيبه.أدى الأمانة وبلغ الرسالة ونصح الأمة وكشف الله به الغمة .أنه خير خلق الله ورجل بما تحمله الكلمة من معان وانسان نادرا مايجود الزمان بمثله.ويكفى أنه شفيعنا يوم القيامة وقال تعالى"ولا تجادلوا اهل الكتاب إلابالتى هى أحسن".

*لو أتيحت لك الفرصة لرؤية النبى صلى الله عليه وسلم فى أى مكان تريد أن تقابله؟

فوق جبل أحد.

*مالذى ستخبره به؟

هحكيله على كل ماواجهته فى حياتى من صعاب وهقوله أنا بحبك أوى ونفسى أتجوز واحد ذيك.

*وماذا ستطلب منه؟

هطلب منه يسامحنى على تقصيرى ويعذرنى لأنى مش عارفة أنصره لوحدى وهطلب منه كمان يقوللى بشارة تطمنى.

*أذكر مقولة قالها النبى صلى الله عليه وسلم لصحابى تمنيت أن يقولها لك؟

"أما استحى من رجل تستحى منه الملائكة" قالها للسيدة عائشة حينما سألته عن سيدنا عثمان بن عفان.

*أذكر أحب حديث لرسول الله صلى الله عليه وسلم إلى قلبك؟

كتير جدا ولكن يحضرنى الآن"رأى الرسول صلى الله عليه وسلم أم تحتضن ولدها. فقال الرسول صلى الله عليه وسلم :أتظنون هذه الأم تلقى ولدها فى النار؟ قالوا: بلى يارسول الله. قال: الله أرحم بكم من هذه الأم بولدها.

*كيف تعرفت على سيرة الرسول صلى الله عليه وسلم؟

من أهلى وقراءاتى المتعددة وأيضا عمرو خالد كان له دور كبير فى إحياء هذه المعلومات بداخلى فجزاه الله عنى خير الجزاء.

*أذكر صفة تدل على عظيم خلقه صلى الله عليه وسلم واستدل عليها بموقف ما؟

صفة واحدة بس!!!

لك ما طلبت

صفة :الحلم

الموقف:كان رسول الله صلى الله عليه وسلم يجلس مع أصحابه عند السيدة عائشة فكان هذا يومها فآتت إحدى أمهات المؤمنين له بقصعة وفيها طعام فوضعها أمامه هو وأصحابه ولما رأت السيدة عائشة هذا الموقف تضايقت ودكت القصعة بقدمها وكسرت قصعة الطعام فوقع ما بها على الأرض أمام النبى والصحابة فما كان من النبى صلى الله عليه وسلم إلا أن ابتسم وقال للصحابه: أمكم غارت ودخل إلى السيدة عائشة وقال لها: إحضرى قصعة أخرى من عندك مقابل ماكسرتى لتعطيعها لصاحبتها.

*هل هناك تأثير لرسول الله صلى الله عليه وسلم على شخصيتك وحياتك؟

نعم بالطبع فمن يعرفه لازم يتأثر به فقد تربيت ونشأت على حديثين هما :

"أدِ الأمانة لمن أئتمنك ولا تخن من خانك"

"آيات المنافق ثلاث :إذا حدث كذب وإذا وعد أخلف وإذا أؤتمن خان" صدق رسول الله صلى الله عليه وسلم.

فبفضل الله أتعامل دائما بهذين الحديثين فى حياتى والحمد لله بأن شخصيتى فيها هذه الصفات الظاهرة.

اللهم صلى على محمد فى الأولين اللهم صلى عليه فى الآخرين اللهم صلى على محمد فى الملأ الأعلى إلى يوم الدين اللهم صلى عليه فى كل وقت وحين اللهم صلى على محمد الهادى لأنوارك الجامع لأسرارك الدال عليك الموصل إليك صلاة تنجينا بها من جميع الأهوال والآفات وتحفظنا بها فى اليقظة والمنام وترزقنا يامولانا فى جواره حسن الختام وترفعنا معه ياربنا فى أعلى المقام وصلى اللهم على محمد وعلى آله وصحبه وسلم.

ماتزعليش

- ماتزعليش ربنا معاكي ومنساكيش، مأخر الفرج لحكمه عنده وده يخليكي ما تقلقيش.
- أنا تعبانة.
- والله حاسة بيكي.. بس إعتبرى نفسك فى امتحان ده إبتلاء أو يمكن تكفير ذنوب بس تأكدي أن الفرج هييجى.
- إمتى بقى؟.
- ماتستعجليش محدش عارف الخير فين ولا بكرة هيكون فيه إيه بس أنتى قولي يارب.
- هو أنا بعمل حاجة غير أنى بقول يارب.
- يبقى خلاص قلقانة ليه ياحبيبتي.. ده كلما ضاقت حلقاتها فرجت وكنت أظنها لاتفرج
 تأكدي أن ربنا مش هيخذلك وهتلاقى التلاتة جايين ورا بعض.
- تلاتة ايه؟.
- الفرج والنصر والعوض.
- أديني مستنية.
- إيه مش مصدقاني؟ يابنتي ربنا اللي بيقول وآدي الدليل:
الفرج "إن مع العسر يسرا".
النصر "ألا إن نصر الله قريب".
العوض " وبشر الصابرين".
- لمعلوماتك أنا واثقة في ربنا جدا، بس ده مايمنعش أني إنسانة وبتألم ونفسي أصرخ بصوت عالي، بس والله مؤمنة بربنا وعندي يقين كبير ،بس أنا تعبانة بجد وخايفة على نفسي وعلى جسمي لاميقدروش يستحملوا أكتر من كده وده اللي واجعني.
- أنا هقوللك آية قرآنية جميلة أوي وهي اللي هترد على كلامك، وبإذن الله تلاقى فيها اللي يصبرك ويقويكي
بسم الله الرحمن الرحيم "واصبر وما صبرك الا بالله ولا تحزن عليهم ولا تك في ضيق مما يمكرون * إن الله مع الذين اتقوا والذين هم محسنون" صدق الله العظيم"سورة النحل"
يااااااااااااااااااارب
أغثني يامغيث
أغثني يامغيث
أغثني يامغيث

مستنى إيه؟

إمتى ييجى اليوم اللى تقرب فيه لربك
إمتى ييجى اليوم اللى تستغفر فيه لذنبك
إمتى ييجى اليوم اللى تبدأ فيه حياتك
إمتى تندم على ذكرياتك
إمتى تقرب مسافات بعادك
هو أنت ضامن بقية حياتك
يوم ما تقول نسيت ونسيت
لأمانسيتش
مكنتش اعرف
وأديك عرفت هتعمل إيه
هصلى لربى واستغفر
يمكن يغفر
لأ مش يمكن ده أكيد يغفر
علشان أمثالى يوم مايحنوا
يلاقوا حضن كبير بيضم
يوم مادموعهم تغسلهم
يوم ماذنوبهم توجعهم
يوم ما ندمهم يعصرهم
يوم ماتقول
لبيك ربى
ساعتها هتسمع
اهلا عبدى
نفسى أقرب

وخايف أبعد

تعالى وجرب

وماتقلقش

ده ربى وربك

حليم بعباده

رؤوف بعباده

مابيخوفش

أدرى بحالك

سميع لدعائك

مابيخلفش

قرب وادعى وصلى وصوم

ده ربك هادى وقيوم

ولو خايف تقع فى يوم

ربك معاك لما تقوم

بس انت قوم

ماتستموتش

قوم بسرعة وصلى وقول

ربى إقبلنى أنا جيت على طول

ما أقدرتش أبعد وجيت مذهول

إزاى بعدت أكيد مسطول

إزاى حرمت عليا مناجاته

إزاى قدرت أنام فى بعاده

وإزاى وإزاى وإزاى

المهم إنى رجعت ليك

وبقيت ياربى ملك إيديك

وده حالى ومايخفاش عليك

فيارب إقبلنى علشان عبيدك

مالهومش غيرك

يتمنوا رضاه

ولايقدروا يعيشوا حياة

من غير هداية ورحمة ونور

ده طريقنا طويل مكسور

مليان جسور

ونفسى أعدى

وخايف أهدى

لأ متخافش

سيبها على الله ماتتردتش

قوم بسرعة ومد إيديك

قوله إغفرلى أنا راجع ليك

وبرحمة ربك بيك

هيقوللك تانى

أهلا بيك.

خُدى بالك

إلى من تقوم بهذا المشهد/ هل تستطيعين الصلاة وأنتى ترتدى هذه الملابس الضيقة؟.
هل تقبلين أن تكونى فريسة للذئاب بهذا الذى تعتقدينه ستره؟.
انتى عارفة كام شاب ممكن يتفتن بسببك ومايقدرش يغض بصره وبالتالى تبقى شاركتيه فى الإثم لإنك ساعدتيه؟.
ياترى هتبقى مبسوطة لما تتعاكسى ويتقالك أى كلمة بايخة؟.
ياترى هيبقى إيه شعورك لو حد قالك "عيب على الحجاب اللى أنتى لابساه" وهتردى عليه ولا هتسكتى لإنك معندكيش جواب؟.

هل تقبلين أن يراكى أحد من محارمك وأنتى فى هذا الوضع؟.
تفتكرى لو واحدة أنتى شوفتيها كده مع اخوكى إنطباعك عنها هيكون ايه؟.
هل فى إعتقادك إن نهاية المشهد ده هتكون سعيدة وهيكون فيه كوشة وزفة؟! يبقى بيتهيألك طبعا لأن المشهد ده آخره ورقة عرفى هتتقطع ومش هيبقى ليكى عنده حاجة غير فضيحتك.!
بتعملى فى نفسك كده ليه؟ للدرجة دى نفسك وكرامتك هاينة عليكى؟.
عايزة أقوللك اللى بيرخص نفسه مينفعش يكون غالى عند حد؟.
إزاى هو هيحترمك إذا كنتى انتى مش بتحترمى لا نفسك ولا أهلك؟.

هل تقبلين أن يراكى أحد رؤسائك أو أساتذتك وأنتى تقومى بهذا؟
هل تقبلين أن يصورك أحد بالموبايل ويبعت هذا المشهد بالبلوتوث إلى من يعرفك ومن لايعرفك؟
هل تقبلين أن يتأمل فيكى الرجال بهذه الطريقة؟
هل تقبلين أن يقال عليكى أى كلمة توجعك؟

هحكيلك على موقف مماثل"شخص يمتلك كافتريا وسعيد جدا بزواج أخوه وكل شوية يشغل شريط فيديو الفرح على شاشة العرض المهم فيه بنت فضلت ترقص فى أكتر من أغنية وطبعا الفيديو مركز عليها وكان شخص متقدم إلى هذه الفتاة التى كانت ترقص ورآها فى البيت مكسوفة ووشها فى الأرض وفى الفيديو زى ما أنتى شايفة تفتكرى أنتى لو مكانه هتعملى إيه؟ .

أختى الحبيبة:بالله عليكى كونى أمينة على نفسك.
الاسلام أكرمك ليه بتهينى نفسك؟.
شوفى إيه اللى ينفع تصلى بيه واخرجى بيه.
شوفى إيه اللى ينفع تعمليه قدام أهلك واعمليه.
أنتى عارفة يعنى إيه محجبة؟ يعنى بقيتى رمز للإسلام بما ترتدينه وبالمقابل بما تفعلينه فبالله عليكى ماتشوهيش الاسلام بأفعالك.