ذاكرت كويس

فى ظل ظهور النتائج المختلفة للمراحل الدراسية. تذكرت آخر يوم لى فى إمتحانات البكالوريوس.

ما أجمل الإنطلاق والحرية بعد القيود. وما أجمل الراحة بعد عناء وتعب.
وجدت نفسى أقول هذه الكلمات بعد أيام قليلة من إنتهائى من إمتحان آخر مادة فى السنة النهائية لى فى الجامعة.
" يااااه أخيراً خلصت".
وكأنى كنت ضامنة نجاحى. ولِمَ لا. فقد كنت تلميذة مجتهدة منذ الصغر. فقد كنت أستيقظ باكراً وكُلى هِمة ونشاط لألحق بطابور المدرسة دون حتى الإعتماد على من يوقظنى. وكان لى نشاط دائم فى المدرسة ومن بعدها فى الجامعة. وكنت بحب الدراسة جداً جداً لدرجة أن فى الأجازة الصيفية كنت بعِد الأيام اللى هنروح فيها للمدرسة. حتى لما مجموعى فى الثانوية العامة ماجابش الكلية اللى كنت عايزاها ودخلت كلية تانية برضه حبيت دراستى فيها. وعمرى ما فوت محاضرة. وكنت بجد دؤوبة وأحب الوصول دائماً إلى القمة.
وها أنا الآن فى آخر يوم لى فى الجامعة كطالبة.
وداعاً للسهر والمذاكرة ولقلق الإمتحانات وانتظار النتيجة.
وجدت نفسى و أنا فى هذه الحالة من النشوة والسعادة التى لم أشعر بها من قبل أتسائل إذا كان هذا هو شعورى لإنتهائى من آداء واجبى كطالبة فماذا سيكون شعورى حين وفاتى وانتهاء حياتى كمُسلمة؟؟!.
هل سأكون متأكدة من نجاحى فى إختبار حياتى؟
وهل سأستحق الجنة كمكافأة لى لاجتهادى فى حياتى كمُسلمة؟؟.
أم ماذا؟؟؟.
سؤال يطرح نفسه على الجميع.

اللهم أنك أعطيتنا الإسلام دون أن نطلبه فلا تحرمنا من الجنة ونحن نطلبها.




م ملحوظة:

إذا أردت رؤية الصور المرفقة بالموضوع وهى متحركة أضغط على الصورة.
===

على الهامش

ـــــــــــــــــــــ

أدعوكم لزيارة هذا الموضوع مسابقــــــــــــــــــــــــــة اعجبتنـــــــــــــــــــى

لا تلومينى

- إذا وجدتينى منضبطة دائماً فى مواعيدى. ومن ثم لا أنتظرك أكثر من خمس دقائق إذا ماكنا سنذهب سوياً إلى ندوة علمية مثلاً. وأحبذ أن نلتقى هناك.
- إذا وجدتينى أتعامل بجدية شديدة حينما نكون فى مكان عِلم وأرفض الحوارات الجانبية. ومن ثم لا أجلس جوارك فى الغالب.
- إذا أمتنعت عن تبديل ملابسى أمام أحد. حتى لو كانت طفلة صغيرة.
- إذا وجدتينى أرفض أن يرانى أحد وأنا طريحة الفراش وأجاهد جسدى حتى أصبح ظاهرياً فى أحسن حال.
- إذا أرهقتك معى فى البحث عن طبيبة متخصصة فى مجال معين فى الوقت الذى يوجد فيه أطباء كثيرين متخصصين فى نفس المجال. وحينما نجدها أدخل لها بمفردى وأجعلك تنتظرين خارجاً.
- إذا وجدتينى أحاول جاهدة أن أعطى لنفسى الدواء وأنا فى قمة مرضى وأحياناً كثيرة لا أستطيع ومع ذلك لا أطلب المساعدة من أحد.
- إذا وجدتينى أغض بصرى عن أشياء كثيرة تعتقدين أنها أشياء عادية.
- إذا وجدتى فى حياتى مُسلَمات لا يجوز بأى حال من الأحوال التنازل على أى منها.
- إذا وجدتينى لا أستطيع أن أنطق كلمة بذيئة جاءت أثناء قراءتى الجهرية لشئ ما. وحينما تقرأينها تضحكين على صمتى وقتها.
- إذا وجدتينى أمتنع أن أكتب تعليق على أى موضوع يحتوى على أى لفظ خارج.
- إذا وجدتينى أرفض الدخول على مدونات معينة مهما كان إثارة الموضوع المطروح.
- إذا وجدتى وجهى يحمر سريعاً ولأقل الأسباب.
- إذا وجدتينى لا أستطيع الدخول على أحد إلا بعد الإستئذان مهما كانت درجة الصِلة. طالما الباب مغلق أو حتى متوارب.
- إذا وجدتينى أرفض مصافحة رجل تعدى السبعين من العمر لمجرد أنه يوجد بيننا طرف قرابة. أعذرينى فهو بالنسبة لى رجل غريب مهما كان عمره.
- إذا وجدتينى أتصل تليفونياً قبل أن أزورك بيوم على الأقل. رغم تأكيدك الدائم بأنك تتمنين أن أفاجئك بقدومى.
- أذا وجدتينى لا أسأل عن خصوصياتك كما تفعلين معى.
- إذا وجدتينى أرفض أن أتناول طعام أو شراب وأنا ماشية فى الشارع.
- إذا وجدتينى أغلق دائماً النافذة التى تطل على الجيران طالما نافذتهم مفتوحة حتى لو كانت المنفذ الوحيد فى الغرفة لدخول الشمس والهواء.
- إذا سألتينى عن لون السجاد عند صديقتنا العروس وكانت إجابتى "ماخدتش بالى" .
- إذا رفضت أن نهزر أمام أحد.
- إذا أظهرت تذمرى حينما نتقابل فى الشارع ويكون السلام بالقبلات والأحضان وتجدينى أكتفى بالمصافحة. قائلة كلمتى المشهورة " إحنا فى الشارع!!".
- إذا وجدتينى لا أتدخل فيما لا يعنينى مهما كان الموضوع يثير الفضول. طالما صاحب الموضوع لم يشركنى فيه.
- إذا وجدتينى لا أتدخل فى موضوع مشترك مع صديقاتك طالما لم تشركونى فيه.
- إذا منعت دموعى من النزول أمامك وأنتِ تعلمين بأن قلبى قبل عينى يبكى.
- إذا وجدتينى لا أحكى عن أحوالى إلا فى مواقف قليلة جداً. وإذا سألتينى عن سر نظرتى الحزينة أجيب بإبتسامة صامتة. المفروض أن تفهمين منها كل شئ.
- على صمتى فى أغلب الأوقات وخاصة فى الفترة الأخيرة. فأنتِ تعلمين جيداً مما أعانى.
- إذا وجدتينى أرفض أن أسلف ملابسى لأحد. وأقولها هكذا بلا تجمل.
- إذا وجدتي عندى إنتماء للأشياء بطريقة مبالغ فيها.
- إذا وجدتينى أغير القناة التليفزيونية سريعاً إذا ما كان فيها مشهد خارج. وإذا كان الريموت معكِ أعطى للتليفزيون ضهرى.
- إذا حاولت جاهدة ألا أعطى لكٍِ رأيي فى شئ بصراحة وبطريقة مباشرة حتى لا أجرحك.
- إذا رفضت أن يدور بيننا حوار بصوت مرتفع طالما راكبين تاكسى مثلاً. والكلام فى المواصلات بصفة عامة يكون للضرورة وبصوت منخفض لا يسمعه سوانا.
* أعذرونى جميعاً ولا تلومونى فهذه طباعى وأجدها لا تخالف دينى.



سؤال جانبى:
ــــــــــــــــــــــــ
* إيه أكتر حاجة الناس اللى تعرفك بتستغربها فيك؟

رد الفعل

هى: إمتى ممكن نسيب بعض؟.
هو: لما تجيبيلى عيل بنفسجى.
هى: إشمعنى يعنى؟.
هو : ساعتها هعرف إنك خُنتينى.
هى: وههون عليك تسيبنى؟.
هو: ياحبيبتى ده أقل واجب.
هى: أمال لو شُفتنى مع واحد هتعمل إيه؟.
هو: هخلص عليه.
هى: كنت عارفة أنى مش ههون عليك.
هو: لأ ياحبيبتى أنتِ وراه على طول بس أنا هبدأ بيه.
هى: وده ليه بقى؟.
هو: عشان مايلحقش يهرب لكن أنتِ هتروحى منى فين هجيبك هجيبك.
هى: طب خلاص غير الموضوع.
هو: يكون أحسن برضه.
..........................
نصيحة للزوجات:
ـــــــــــــــــــــــــــــــــــــ
*لا تتجسسى على زوجك وتحاولى أن تفتشى فى أغراضه الشخصية سواء موبايل أو أى من أغراضه المشكوك فى أمرها. لأنك بالطريقة دى هتتعبى نفسك جداً . لو مالقيتيش حاجة مش هترتاحى وهتحسى أنه عارف يضحك عليكِ ولو كان فعلا شكك فى محله يبقى هتخربى حياتك. فليه ده كله سيبيها لله ولو خانك فهو خان ربنا وفعل حاجة محرمة وربنا هو اللى هيحاسبه .
*أعطيه فرصة أنه يدافع عن نفسه. سيبيه يخبى عليكِ واستمتعى بمحاولته لإرضائك وإخفاء هذا الأمر عنك. لأنك لو واجهتيه ووجدك قاسية عليه هيتمادى فيما يفعله وأعلى ما فى خيلك أركبيه.
*بدل ماتسخرى مجهوداتك للإيقاع به سخريها لجعله ينسى كل المغريات الخارجية والالتفات لكِ فقط.
*ادعي له بالهداية.
* كونى واثقة فى نفسك أكثر من ثقتك فيه.
*شوفى إيه عيوبك بالنسبة له وحاولى تصلحيها.
* جددى فى حياتك ككل سواء فى مظهرك , أو فى طريقة ملابسك , أو فى شكل البيت(غيرى ترتيب الغرف) أو فى تعاملك معاه ومع أهله, فاجئيه بأى حركة رومانسية...
* الموقف أكبر من أى عناد لأن بيتك وحياتك ممكن تخسريهم.
* لاتتمادى فى غضبك وتجعليه يؤثر على تصرفاتك حتى لا تندمى فيما بعد.
وأخيراً* لو هو خانك أنتِ ماتخونيهوش. مش عشان أنتِ ملاك ولكن عشان أنتِ مُسلمة.
.........................
سؤال جانبى:
ـــــــــــــــــــــــــــ
- ماذا تفعل لو أكتشفت خيانة شريك حياتك؟(هتسيبه بهدوء, هتنفصل عنه بفضيحة , هتسامحه, عندك إقتراح آخر).

******
على الهامش
ــــــــــــــــــــ
أدعوكم لزيارة هذه المدونة مش هنسكت. وشكر وتقدير لكل القائمين عليها.

جوجو و زمردة (7)

كان "جوجو" يستمع إلى أناشيد الأطفال المفضلة لديه فجاءت له شقيقته"زمردة " سائلة:
- جميل الشريط اللى بتسمعه ده بس أنت لقيت الشريط ده فين؟ احنا مش دورنا عليه فى المحلات ومالقيناهوش. أشتريته منين؟.
- أنا ماشتريتوش ولا حاجة ده بتاع " ريكو" صاحبى.
- إزاى بتاع"ريكو" وهو عندنا بقى له كتير؟.
- و إيه يعنى لقيته عنده فأخذته.
- وقلت له هترجعهوله إمتى؟.
- إيه يا بنتى هو اللى دخل جيب السبع هيخرج تانى ولا إيه! وبعدين أنتِ شاغلة نفسك بالموضوع ده كده ليه؟ ما لكيش دعوة دى حاجة بينى وبين صاحبى.
- وهو يعنى عشان صاحبك تاخد حاجته كده!. تعرف أنت بتفكرنى بـ"نوجا" صاحبتى لما أخذت منى التوكة البيضا اللى بابا كان جايبهالى ولسه لغاية دلؤتى ماجبتهاش. ولما طلبتها منها على إستحياء زعلت وقالت لى أنها رجعتهالى وأن أنا اللى نسيت. رغم أن ده ماحصلش وتوكتى لسه عندها.
- وإيه وجه المقارنة؟
- إزاى بقى "ريكو" أكيد كان مفكر زيى إنك هترجعله الشريط وعشان كده أعطاهولك.
- هو يعنى إشتكالك وبعدين هو قالى أنه زهق من الشريط ده.
- ده مش سبب أنك تاخد حاجة مش بتاعتك ليك على طول.
- على فكرة قبل ما أنسى "ريرى" صاحبتك بتشكيلى منك وزعلانة أوى كمان.
- وهى زعلانة ليه؟.
- بتقول أنها كانت عايزة رقم تليفون "شوشو" صاحبتكم منك وأنتِ مارضيتيش.
- هى ليه مش قادرة تفهم أنه مش بتاعى عشان أعطيهولها. ده أمانة. "شوشو" أعطتنى رقمها وأنا أعطيتها رقمى وزى ما أنا ماحبش أنها تديه لحد من غير إذنى أكيد برضه هى ماتحبش حد ياخد رقمها من غير إذنها.
- أنتِ على طول بتكبرى المواضيع كده ليه؟ . طيب ماهى ممكن تاخده من أى واحدة تانية غيرك.
- أنا عارفة بس المهم أن مش هكون أنا اللى خنت الأمانة.
وبعد فترة صمت.
- أنت عارف إيه الفرق بين الأمانة والسلف والهدية؟.
- لأ مش عارف.
- الأمانة: يعنى حد أستئمنى على حاجة حتى لو كلمة قالهالى ومايحبش حد يعرفها غيرى ومش شرط يقولى ماتقوليش لحد لأن فيه حاجة اسمها أمانة المجلس. وزى ما أنت مستأمنى على فلوسك اللى بتحوشها معايا وأنت واثق أن فى أى وقت هتطلبها هتاخدها.
أما السلف: فده بالظبط زى الشريط اللى أنت أخذته من "ريكو" ولا زم ترجعهوله فى أقرب فرصة وبحالة جيدة كمان. وزى برضه التوكة بتاعتى اللى "نوجا" أخذتها منى وماجابتهاش لغاية دلؤتى وأنا عن نفسى مش مسمحاها إلا لو رجعتهالى تانى وتكون بنفس الحالة اللى أخذتها منى.
الهدية: مش ملزم بردها لأنها مش سلف ولا دين عليك طالما أنت ماطلبتهاش.
- يااه ده الموضوع كبير بجد.
- طبعاً وأكبر مما تتخيل. فيه حاجة أكتر من أن الأمانة ستأتى يوم القيامة معلقة على الصراط وتقول يارب أعطنى حقى. ولن ندخل الجنة إلا إذا أعطينا الأمانات إلى أصحابها.
قفل "جوجو" الكاسيت قائلا:أنا خارج.
- رايح فين؟.
- هروح لـ"ريكو" أرجعله الشريط.
ابتسمت قائلة: ماتنساش تشكره وتعتذر له أنك إتأخرت عليه.
- ابتسم لها قائلاً: أوقات بحس أنك أنتِ الكبيرة.
-تمت-.
*******************
دعوة للمناقشة:
ــــــــــــــــــــــــــــــ
* أذكر موقف مشابه تعرضت له من قبل؟.
* إذا استلف منك شخص ما شئ ما ورجعهولك بايظ هتتصرف معاه إزاى؟.
*لو حد استلف منك حاجة واتأخر عليك بتطلبها منه ولا بتخجل؟.
* لو استلفت حاجة من حد بترجعهاله بعد قد إيه؟.