رقصة الخذلان

تم صدور روايتي الأولى وكتابي الرابع (رقصة الخذلان) 
عن دار المكتبة العربية للنشر والتوزيع
متوفرة حاليا في مكتبة بوك استور في الجيزة
(شارع برادة - من ميدان الجيزة قبل نفق الهرم مباشرة
بجوار التوحيد والنور ومدرسة التربية الحديثة للغات
ولارسال اللوكيشن على الواتس 01030365801ّّ)

وقريبا في معرض القاهرة الدولي للكتاب قاعة 1 جناح b10

تصحيح مفاهيم

- الشارع اللي بترشه علشان من وجهة نظرك يقلل التراب.. ده أذى للطريق وإماطة الأذى عن الطريق صدقة.
_ تليفون اللي جنبك اللي راشق عينك فيه وتيجي تكتب بوست ع الفيس بتباهي واستظراف.. ده تلصص وتجسس والنهي هنا واضح "لا تجسسوا".
_ أي حد بتنزل صورته وتتريق عليه أو تتكلم عنه بهدف جلب الضحك يعد من السخرية والنهي هنا واضح أيضا "لا يسخر قوم من قوم"
_أي بنت بتتكلم عنها بسوء لأي سبب على اعتبار كونك تريد نصرة الاخلاق مثلا ده اسمه قذف محصنات.
_معاكستك لواحدة لبسها ملفت بالنسبة لك كأنك بتربيها يعني ده اسمه انتهاك لمحارم الله.
- لو اتحرشت بواحدة لبسها مش عجبك أنت كدة مابتعاقبهاش زي ما أنت متخيل..أنت ارتكبت معصية.
انتهكت حرمة الله، لم تغض بصرك.
هي ربنا اللي هيحاسبها أنت بره الليلة دي خالص، أنت مش قاضي الله في الأرض ولا أنت ملاك مابتغلطش، خليك في معاصيك وذنوبك المدارية وماتزودهاش بكبيرة وتجاهر بالذنب بكل بجاحة.
إذا كان الزنا اللي بيتم برضا الطرفين كبيرة ومن المحرمات فما بالك بالتحرش اللي بيتم بدون رضا إحدى الطرفين!

التحرش مالوش مبررات غير إن فاعله محتاج يتعلم عقوبة انتهاك محارم الله.

_انك توعد وتخلف على سبيل اه عادي انا عيل وبرجع في كلامي.. كده بقيت منافق.
-فتح الإسبيكر والاسكرين شوت مش دلالة على صدق ما تقول مثلا ده اسمه خيانة أمانة المجلس
- كلامك عن فلان وعلان كنوع من التسلية وتضييع الوقت ده اسمه غيبة ونميمة واحنا منهيين عنهم
وغيرها من الأمثلة كتير.

عايزة أفكركم إن أحب الأعمال إلى الله اللي فيها إفادة للناس وسعادتهم، فقبل ما تعمل أي تصرف شوف وقعه على الطرف الاخر هل هيفيده؟ هل هيفرحه؟ وبعدها اتصرف.

من كتاباتي (88)

1- الحب هو مشاعر أم تودع ابنها أثناء ذهابه التجنيد وهي باكية رغم جمال هندامه، ونظافة مظهره.
وأن تستقبله معانقة رغم رائحة عرقه، واتساخ ملابسه، وحلقة رأسه، واسمرار بشرته، وهزلان جسده.
المُحب لا يعنيه تفاصيل الهيئة قدر ما يعنيه التواجد.

--

2- بقى ملحوظ جدا إن أي إيفينت مهما كان نوعه ترفيهي أو ثقافي.
يتم الإعلان عن ساعة معينة للبدء لكن البداية الفعلية تكون بعدها بأكتر من ساعة مثلا! على اعتبار إن أصحاب الإيفينت يستنوا حضور الناس.
لكن على صعيد آخر، كأنهم بيعاقبوا اللي التزم بالموعد المحدد بالفعل.. فيضيع من وقته أكتر من ساعة قبل البدء وبالمقابل مايكملش الإيفينت للآخر لإنه أكيد وراه التزامات تانية.
فياريت ننشر ثقافة الالتزام بالمواعيد المحددة والسماح بتأخير نص ساعة على أقصى تقدير.. واللي بيتأخر بطبعه ييجي على مهله براحته بس يكون عارف إن الحدث مش هيقف على حضوره وإن هو اللي هيفوته حاجات ماحضرهاش.

--
3- لحظة الوداع هي كآخر قطمة في ساندوتش حلو بتاكله وأنت لسه ماشبعتش.

--
4-اجعل النبي (صلى الله عليه وسلم) قدوة ليك في كل حاجة منها مثلا رأيه في الطعام.
الأكل اللي كان بيعجبه كان بيثني عليه وياكله.. والأكل اللي مايعجبوش ماكنش بياكله.. لا كان بيعيب عليه ولا على أداءه ولا يبدي ملاحظات سخيفة ولا نقد فارغ..
أنت بقى الأكل اللي مابيعجبكش بتاكله ليه؟
علشان يسد جوعك مثلا؟ تمام، يبقى تحمد ربنا عليه علشان غيرك مش لاقيه.
--
5- - ماتتعاملش مع ابنك كعيل وتنتظر الناس تعامله كراجل!
- مسميات الدلع دي بينكم وبين بعض وفي أوقات خاصة كمان مش عمال على بطال يعني، والمفروض إنها توقف عند سن معين! مايبقاش راجل ملو هدومه ولسه معروف باسم ميشو أو كوكو مثلا!
- لما تكوني أم العريس حاولي تبيني للعروسة إنها هتاخد راجل هيعرف ازاي يحميها ويحافظ عليها مش تحسسيها إنه عيل بريالة محتاج اللي تاخد بالها منه وتقوم بدورك كأم معاه!.
ما تبدلوش الأدوار.. الراجل في أي علاقة هو المسؤول الأساسي، والبديهي هو اللي يحتوي المرأة وياخد باله منها.
- ابنك طالما صحيح بدنيا يبقى ماينفعش تعامليه كصاحب إعاقة ( عطشان يقوم يشرب، جعان يقوم ياكل، رجع من بره يغسل شرابه وهكذا)
- ماتربيهوش إن المرأة اتخلقت بس علشان تخدمه هي إنسانة زيها زيه، لا أقل منه، ولا موجودة علشان ترفه عنه!
- عوديه مايفضلش قاعد لو دخلت امرأة مهما كان عمرها.. يقوم ويعزم عليها تقعد مكانه، ولو شافها شايلة حاجة يعرض مساعدته، وبديهي لو محطوطة في أي موقف يستدعي مساعدة هو يتطوع بده من غير ما هي تطلب.
- قبل فرحه بقى، تزودي جرعة النصايح والوصايا اللي المفروض بتعلميهاله على مدار عمره. بس تركزي أكتر يومها في إن بنات الناس مش لعبة ..و لا أنت عيل شبطان في لعبة ولا هي عروسة خشب.
- إديلة أسهل وصفة للتعامل مع المرأة "اللي هتزرعه جواها هتحصده، وارويها بحنانك واستمتع بجني ثمار حبها ليك".

--

6- ياريت وأنت بترش الشارع (اللي يعتبر أذى للطريق) تبقى تسيب مكان نضيف للناس تمشي فيه.

--
7- الأرض البور لا لوم عليها فهذه طبيعتها (معندهاش حاجة تديهالك مهما إديتلها) بالطبع هو شعور مُحبط أن لا تجني ثمار زرعك، ولكن الأكثر إحباطا أن تزرع في أرض خبيثة، ثمارها علقم لا يتناسب بالمرة مع ما زرعته بها.

--

8- العلاقات الصامتة تنذر بالخطر.
اتكلموا، وفضفضوا وعاتبوا.. بدل ماتشيلوا من بعض شيلوا الحمولة مع بعض.

--
9- الوجوه لما تكبر بيبان فيها تجاعيد كتير، الشعر الأبيض وقتها بيكون له ميزة مهمة، إنه بيخفف وقع صدمة تغيير الملامح ويخليها مقبولة.التجاعيد مع الشعر الأسود مخيفة، وكأن صاحبها مسخ.

--
10- ارويها بحنانك؛ لتجني مودتها.

--
11- نعمة ربنا اللي مش عجباك فيه غيرك مش طايلها.

--
12- ماتدعوش على بعض ولا حتى بهزار (يخرب بيتك، يخرب عقلك، الله يحرقك.......) وطبيعي ماتدعيش على نفسك.
اعقل الكلام قبل ماتقوله.

--
13- أوقات كتير يقف الرجل حائرا، عاجزا مش فاهم (هي) متغيرة منه ليه، واخدة جنب ومابتكلموش، مبينة إنها زعلانة منه لسبب هو لايدري عنه شيئا قاسما بأغلظ الأيمان بأنه لم يفعل شيئا.
وهذا مربط الفرس عزيزي الرجل، أنك لم تفعل ما كان يجب عليك فعله.

--
14- عن السلام النفسي اللي الأم بتتمتع بيه وهي في مكان عام وأطفالها حواليها عاملين ضوضاء للحضور وهي بتعتبرها موسيقى تصويرية معتادة ليومها.

غض البصر

عاوزين ننشر ثقافة  غض البصر
- غض البصر عن عورات الناس وعن حياتهم الشخصية وعن مظهرهم اللي مش عاجبك.
- غض البصر عن جيرانك لو بان لك منهم شباك مفتوح.
- غض البصر عن موقف محرج حصل لحد قصادك.
- غض البصر عن محارم الناس.
خليك في نفسك، اشغل روحك بمحارمك وأهل بيتك وربي عيالك على كدة.
عيب تبص على حاجة مش بتاعتك وحرام تتبع عورات غيرك.