وأنا شايفة لو كل واحد خلاه في حاله وبطل يحكم ع الناس الدنيا هتبقى ألطف.
2- ويبقى شاب طول بعرض في ثانوي مثلا او حتى في إعدادي ويتعامل كطفل همجي معندوش إحساس بالمسافات ولا إدراك بالمساحات الشخصية.
دورك كأم معلش إنك تعلميه إنه مثلا لو خبط في حد يعتذر، وإن الكرسي اللي قاعد عليه مش لعبة، وإن ما ينفعش يسند على الكرسي اللي قصاده، أو يقعد في أي مكان زي ما يكون قاعد على الكنبة مثلا، وطبعا يوطي صوت الموبايل وما يفرضش ذوق اللي بيسمعه ع الناس اللي حظهم وقعهم في طريقه... هو مش في الكون لوحده ده غير إنه بيكبر ما شاء الله وينطبق عليه اللي ينطبق على أي رجل عاقل، ناضج، راشد حتى لو كان بالنسبة لك لسه بينام جنبك أو بتفصصيله السمك.
3-اكتشفت إن فيه ناس عندها صعوبة في التعبير عن مشاعرها وبالمقابل ما بتهتمش تعرف مشاعر اللي بتتعامل معاه.
4-تجاهل مشاعرك علشان المركب تمشي أو الموقف يعدي مش علاج، ده كبت هيتراكم جواك ولو خرج هينفجر فيك قبل أي حد تاني.
اتكلم وعبر عن غضبك ولو اللي قدامك ما قدرش ده ما تديلوش فرصة تانية، ما تستهلكش طاقتك مع حد مش شايف إنه اتسبب في أي مشاعر سلبية ليك.
ومفيش حاجة اسمها عادي، ماحصلش حاجة.
لا حصل، حصل إنك زعلت وغضبت ومشاعرك لم تقدر وده طبيعي أثر عليك بشكل أو بآخر.
فلو اللي اتسببلك في ده ما قدرش مشاعرك بالاعتذار على الأقل، أنت قدر مشاعرك واسقطه من حساباتك.
5-أنا ممتنة لكل موقف اتعاملت فيه مع حد خلاني اعرف حقيقة شخصيته بعيدا عن الهالة المحيطة به.
6- في بداية الإعجاب أو في بداية مشروع ارتباط، من الذكاء إنك ما تقولهاش "بحبك" لكن تخليها تحسها.
7- التغيير سنة كونية.
طبيعي الإنسان كل شوية يتغير، لما بيتطلع على ثقافات جديدة وبيقرأ اكتر ويتعرف على ناس أكتر، رؤيته بتتطور وبيعرف إن الدنيا لسه فيها أكتر مهما توقع إن خبرته جامدة ومعدية.
عاداته كمان وارد تتغير، أسلوب حياته، طريقة معيشته...
الحاجات اللي بيحبها وارد جدا تتبدل بحاجات تانية والأولويات كمان تتغير.
لما تبعد عن حد فترة ما تتوقعش إنك لما ترجع هتلاقيه نفس الشخص، إلا لو كنت سايبه متحنط؛ لإن حتى الإنسان الميت جثته بتتغير.
8- من خبراتي الحياتية:
_إن مفيش ثوابت ولا ينفع أعمم على أي حاجة مهما كانت.
_ إن صيغة المبالغة والتفضيل ممكن تتقبل لو سبقتها بكلمة "بالنسبة لي"
يعني مثلا لما تقول: بالنسبة لي "فلان" أحسن كاتب في مصر.
أيوة عادي كل واحد وله رؤية تحترم حتى لو هي أي كلام بالنسبة لغيره.
لكن مش هقبل إطلاقا إنك تقول: فلان ده أحسن كاتب في مصر؛ لأن وقتها هعرف إنك ما قرأتش لحد تاني.
_ برضه فكرة إنك تفخم فلان أو تبجل علان.
مثلا لما تقول على شاعر "عمنا فلان، مولانا علان..."
ممكن أقبلها لو قلت "عمي فلان، مولاي علان" لكن صيغة الجمع دي جايبها منين؟ وقتها بلاقيني بقول "عمك لوحدك 
"
" ويا ريت لو هتبجل حد ابقى احكي مواقف عملها معاك تستحق علشان نبجله معاك.
_ ماتديش لحد جواك صفة من غير ما يحصل موقف يثبت صدقها.
يا ما ناس ممكن تعرفها سنين ويحصل موقف واحد بس بعد العمر ده كله، وقتها تعرف بيه قيمتك عندهم وقيمتهم عندك، فما تستعجلش قبل ما تحط حد في مكانة معينة.
دول اللي جم في بالي دلوقتي 
وماجوش بالساهل علشان تبقوا عارفين
