تحميل رواية رقصة الخذلان

اضغط للتحميل

قدمت رواية  رقصة الخذلان لغة راقية، شاعرية، متناسقة...

تشعر حين القراءة أنك تستمع إلى مقطوعة موسيقية متوازنة، وحين التعمق في المعاني كأنك ترى لوحة فنية متكاملة الأركان.

كنت أغزل باللغة ثوبا يليق بالقراء العاشقين للغة العربية، فخرجت رقصتي رشيقة، متألقة، ولحنها انسيابي بديع.

أدعوكم لقراءتها والاستمتاع بعزف الكلمات.

من كتاباتي 99

 

1- إذا كان عيادة المريض ثوابها عظيم فأعتقد إن تمريضه ثوابه أعظم.

الزيارة بترفع من روحه المعنوية لما يحس باهتمام ناس بتحبه لمجرد إنهم أخدوا من وقتهم شوية علشان يخففوا عنه.

لكن هو محتاج أكتر للتمريض، حد يناوله الدوا او ختى يفكره بيه وخصوصا لو ادوية كتير ومواعيد مختلفة وهو وارد ما يبقاش مركز إيه بيتاخد إمتى او هو خده اصلا ولا لسه...

أو ينسى ياخده أساسا أو يكسل ويزهق

ده غير إنه محتاج حد يهتم بأكله لإنه أكيد يا إما مالوش نفس أو معندوش طاقة يعمل لنفسه أو معندوش حاجة أصلا ياكلها...

لازم وجود شخص مساعد ومحب يراعي حالته النفسية قبل الصحية ويستوعب تمرده وضعفه وعناده وضجره وعلشان كده أظن إن ثوابه أكبر من الزيارة.

2-أختار دوما أن أكون لطيفة إذا كانت الكفة الأخرى انتصاري لنفسي.

فالأولى ستكسبني الود، والثانية سترضي غروري.

لكن تلك الأولى هي من ستجعل الغير بتذكرني بالخير.

هكذا علمتني أمي.

3-الناس اللي معاها حالات وبتقدر تعمل حملات تبرع.. إيه رأيكم في حملة أطباق.

أكيد كلنا عندنا أطباق كتير ما بنستخدمهاش، وبالمقابل فيه ناس تانية معندهاش أطباق أصلا وممكن يستخدموا أي حاجة ياكلوا فيها حتى لو كيس بلاستيك أو غطا علبة.

اللي تعجبه الفكرة ياريت لو يقدر يطبقها أو على الأقل ينشرها.. واللي يعرف حالات محتاجة في المنصورة يعرفني.

من كتاباتي (98)

 1- لسه فيه ناس بتشوف البنت اللي بتلبس بنطلون جينز قليلة الأدب، والست الكبيرة لو لبسته دي تبقى شمال

وأنا شايفة لو كل واحد خلاه في حاله وبطل يحكم ع الناس الدنيا هتبقى ألطف.

2- ويبقى شاب طول بعرض في ثانوي مثلا او حتى في إعدادي ويتعامل كطفل همجي معندوش إحساس بالمسافات ولا إدراك بالمساحات الشخصية.

دورك كأم معلش إنك تعلميه إنه مثلا لو خبط في حد يعتذر، وإن الكرسي اللي قاعد عليه مش لعبة، وإن ما ينفعش يسند على الكرسي اللي قصاده، أو يقعد في أي مكان زي ما يكون قاعد على الكنبة مثلا، وطبعا يوطي صوت الموبايل وما يفرضش ذوق اللي بيسمعه ع الناس اللي حظهم وقعهم في طريقه... هو مش في الكون لوحده ده غير إنه بيكبر ما شاء الله وينطبق عليه اللي ينطبق على أي رجل عاقل، ناضج، راشد حتى لو كان بالنسبة لك لسه بينام جنبك أو بتفصصيله السمك.

3-اكتشفت إن فيه ناس عندها صعوبة في التعبير عن مشاعرها وبالمقابل ما بتهتمش تعرف مشاعر اللي بتتعامل معاه.

4-تجاهل مشاعرك علشان المركب تمشي أو الموقف يعدي مش علاج، ده كبت هيتراكم جواك ولو خرج هينفجر فيك قبل أي حد تاني.

اتكلم وعبر عن غضبك ولو اللي قدامك ما قدرش ده ما تديلوش فرصة تانية، ما تستهلكش طاقتك مع حد مش شايف إنه اتسبب في أي مشاعر سلبية ليك.

ومفيش حاجة اسمها عادي، ماحصلش حاجة.

لا حصل، حصل إنك زعلت وغضبت ومشاعرك لم تقدر وده طبيعي أثر عليك بشكل أو بآخر.

فلو اللي اتسببلك في ده ما قدرش مشاعرك بالاعتذار على الأقل، أنت قدر مشاعرك واسقطه من حساباتك.

5-أنا ممتنة لكل موقف اتعاملت فيه مع حد خلاني اعرف حقيقة شخصيته بعيدا عن الهالة المحيطة به.

6- في بداية الإعجاب أو في بداية مشروع ارتباط، من الذكاء إنك ما تقولهاش "بحبك" لكن تخليها تحسها.

7- التغيير سنة كونية.

طبيعي الإنسان كل شوية يتغير، لما بيتطلع على ثقافات جديدة وبيقرأ اكتر ويتعرف على ناس أكتر، رؤيته بتتطور وبيعرف إن الدنيا لسه فيها أكتر مهما توقع إن خبرته جامدة ومعدية.

عاداته كمان وارد تتغير، أسلوب حياته، طريقة معيشته...

الحاجات اللي بيحبها وارد جدا تتبدل بحاجات تانية والأولويات كمان تتغير.

لما تبعد عن حد فترة ما تتوقعش إنك لما ترجع هتلاقيه نفس الشخص، إلا لو كنت سايبه متحنط؛ لإن حتى الإنسان الميت جثته بتتغير.

8- من خبراتي الحياتية:

_إن مفيش ثوابت ولا ينفع أعمم على أي حاجة مهما كانت.

_ إن صيغة المبالغة والتفضيل ممكن تتقبل لو سبقتها بكلمة "بالنسبة لي"

يعني مثلا لما تقول: بالنسبة لي "فلان" أحسن كاتب في مصر.

أيوة عادي كل واحد وله رؤية تحترم حتى لو هي أي كلام بالنسبة لغيره.

لكن مش هقبل إطلاقا إنك تقول: فلان ده أحسن كاتب في مصر؛ لأن وقتها هعرف إنك ما قرأتش لحد تاني.

_ برضه فكرة إنك تفخم فلان أو تبجل علان.

مثلا لما تقول على شاعر "عمنا فلان، مولانا علان..."

ممكن أقبلها لو قلت "عمي فلان، مولاي علان" لكن صيغة الجمع دي جايبها منين؟ وقتها بلاقيني بقول "عمك لوحدك "

ويا ريت لو هتبجل حد ابقى احكي مواقف عملها معاك تستحق علشان نبجله معاك.

_ ماتديش لحد جواك صفة من غير ما يحصل موقف يثبت صدقها.

يا ما ناس ممكن تعرفها سنين ويحصل موقف واحد بس بعد العمر ده كله، وقتها تعرف بيه قيمتك عندهم وقيمتهم عندك، فما تستعجلش قبل ما تحط حد في مكانة معينة.

دول اللي جم في بالي دلوقتي

وماجوش بالساهل علشان تبقوا عارفين  

من كتاباتي (97)

 

1-أنا بكون ممتنة جدا لما بشتري حاجة من محل أدوات طبية أو من صيدلية والبائع يعرف إن الحاجة دي ليا فيقولي "ألف سلامة عليكي"

اللفتات الصغيرة دي بتأسرني فعلا، وما أعظم الإسلام حين جعل الكلمة الطيبة صدقة، ترى هل يعلم قائلها حجم ثوابه!

2-مش معنى إنك حابب تتكلم إن الآخر هيكون حابب يسمع.

وبناء عليه بديهي إنك تستأذنه الأول إذا كان حابب أو فاضي أو مهيأ لده أو لا.

ومش معنى إنك حبيت تسمعه في وقت هو كان حابب يتكلم فيه إنها بقت جميلة لازم يردهالك...

نراعي ظروف بعض يا جماعة احنا مش تحت أمر بعض.

ونراعي كمان نوع العلاقة نفسها، فما تديش لنفسك حق من افتراضات في خيالك.

3-بيلفت نظري (كلام الناس) كقانون لازم الكل يحترمه مع إن الأولى تجاهله.. كلام الناس هيفيد بإيه لما تداين علشان جواز بنتك مثلا وتدخل السجن!!

أو وجود مظاهر كدابة وسفيهة برضه علشان الناس!

لدرجة إن ممكن تتجوز بس علشان تخلص من كلام الناس!

أو تخلف بسرعة علشان ترضيهم!

أو تخاوي بنتك بأخ علشان محدش يقول حاجة!

أو تودي العيال مدارس غالية أو تصيف في مكان أغلى من إمكانياتك برضه علشان تعرف تتمنظر قدام الناس!

وغيرها كتير

مع إن لو كل واحد خلاه في حاله وبص في ورقته بس مش هيحصل حاجة، بالعكس الدنيا هتبقى ألطف والعالم وارد يكون أكثر احتمالا.

4-البديهي؛ كلما زاد عدد الأفراد، توزعت المهام عليهم.. ليس من الإنصاف أن يتولى فرد بعينه خدمة جميع الأفراد دون سبب غير أن هذه عادات متوارثة.

5-بستغرب من أكل الحقوق بأريحية، لازم تطلب حقك وتدور عليه ووارد جدا يتم مماطلة وتفاوض وتأجيل وتاخد أقل من المفروض لجهل منك أو زهق أو قلة حيلة...

مع إن لو يعرف كان سارع برد الحقوق، على اعتبار إنها في الدنيا بعملة البلد اللي أنت فيها لكن في الآخرة العملة هتكون مختلفة.

الحقوق مش بس في العقود الموثقة، دي كمان في الوعود، والكلمة اللي اتقالت في لحظة صفا وبناء عليها حصل اتفاق ما، وفي تشجيع منك لحد زي مثلا (أب وعد ابنه بدراجة لو نجح، الولد ذاكر باستماتة وبعد النجاح مجابهالوش) ده بس مثال بسيط للاستهانة بالوعد والكلمة.

لأن ببساطة الكلمة عقد حتى لو مفيش قانون يدعمها لكن الله شاهد.

6-لما تقرر تدخل حياة أنثى، عليك تقديم ما يجعلها ترحب بوجودك.

اشحن رصيدك جواها قبل ما تقرر تغامر بأي فعل أحمق يخليها تنهي وجودك قبل ما يبدأ.

الأفعال دوما خير برهان على صدق ما تدعي.