من كتاباتي 113

 

1- أقترح على أصحاب القطط وضع طوق حول رقبتها باسمها ورقم موبايل صاحبها؛ أرى قطط منزلية كثيرة في الشارع لعل أصحابها يبحثون عنها.

2- كل بذور اليوسفي اللي بترموها دي، كان ممكن تكون شجر يوسفي يملأ العالم سعادة وبهجة.

3- "ولما حضرتك راجل عجوز حاطط صورة بروفايلك وأنت شاب ليه؟ إيه المنظر دلوقتي وأنا داخلة أدور عليك وأسأل على مكتبك وأنت وقفت تستقبلني وأنا متنحة قصادك، وما بين إني بشبه عليك وما بين هو شكله متغير كده ليه!"

الموقف ده حصلي من كام سنة وأنا بقدم في جهة ما، وده كان حواري الداخلي وقتها.

*دعوة لتحديث صورة البروفايل من آن لآخر، لأننا مش تماثيل وطبيعي شكلنا بيتغير.

4- يا ريت بعد استخدام الملاعق البلاستيكية تكسروها قبل ما ترموها.

5- عزيزي المدرس:

هل تعلم إنك من أكثر الشخصيات المؤثرة في تكوين شخصية التلميذ.

هل تعلم حجم المسؤولية الملقاة على عاتقك؛ فأنت تمتهن مهنة الأنبياء.

لذا حاول أن تكون أفضل نسخة منك معهم، ونحي شخصيتك السيئة جانبا، فهم غير مسؤولين عن عقد النقص والتنمر وأي مشكلة أخرى تواجهها في حياتك.

 ع الهامش: أنا عارفة إن العيال عموما محتاجين مرارة فأنا كنت مكانك قبل كده، وعارفة إن ممكن تكون في المهنة دي على سبيل الحوجة للراتب مش أكتر، وأنك مش مؤمن بأي رسالة سامية فيها ولا حاجة.. بس معلش بما أنك اتحطيت في المكان ده، لازم علشانك تكون قده، لأنه يا إما هتلم بسببه حسنات وصدقات جارية، يا إما هتلم بسببه سيئات تفضل معاك حتى لو سيبت الشغلانة.

مصدر أكل العيش

 يا ترى بتفاصل الناس في أكل عيشهم علشان مش معاك، ولا مستخسر أجرهم؟

مع إن ما بين البايع والشاري يفتح الله زي ما بيقولوا..

أنت بتتفق مع صاحب الحرفة وبتعرف أجره، لو ناسبك تمام، ما ناسبكش شوف غيره.. لكن ليه تفرهده وكأنك بتذله علشان تديله أجره.. ويبقى هاين عليك تعامله كعبد علشان تحس إنك دفعت الفلوس في المكان الصح.

( اعط للأجير حقه، قبل أن يجف عرقه) حديث نبوي.

مش لازم تنشف ريقه وتماطله بعد ما حاجتك خلصت وتحسسه إنه بيتقل عليك أو بيشحت منك.

وفكرة إنك تحكي له قصة حياتك وتشرح له ظروفك اللي يا عالم هتكون صح ولا لا، كل ده ما يخصوش لسبب بسيط، لأن ده أكل عيشه، مصدر رزقه، لا رفاهية ولا تطوع.

الفلوس اللي مستكترها عليه دي، هي مصاريف الفواتير والحياة عموما واللي ما ينفعش فيها فصال.

فزي ما الدنيا غالية عليك فهي برضه غالية عليه.

فما تصتنصحش مع الغلبان اللي زيك.. دي مش شطارة أبدا،

ولما تلاقي حد ذوق في التعامل، خليك أنت أكثر ذوقا، ما تكونش أكثر استغلالا.

كل واحد هو بس اللي يقدر يحدد سعر الخدمة اللي بيقدمها، مش أنت.

ولو شايف إن الشغل ما يستاهلش ده.. اعمله أنت.

ربوا عيالكم

 ربوا عيالكم على غض البصر:

_عرفوهم إن مثلا الأكل عورة، فما ينفعش تبص على حد وهو بياكل، أو تبص هو بياكل إيه حتى لو كنتم في مطعم واحد وده أكل الترابيزة اللي جنبك!

علموهم إن ده عيب وحرام.

_عرفوهم إن جسم الإنسان عورة سواء رجل او امرأة أو طفل وحتى لو كنت طبيب، ما تبصش على حاجة لمجرد إنها باينة سواء بإرادة صاحبها أو لا.

وبالنسبة للطبيب مسموح لك على قد المنطقة المصابة، وتكون مركز في شغلك مش في حاجة تانية.

وبالنسبة للتمريض فأنتم شايلين أمانة كبيرة يا ريت تكونوا قدها.

_عرفوهم إن بيوت الناس عورة، حتى لو الباب مفتوح أو الشباك مفتوح.. ولو بتزورهم فعينك ما تترفعش في كل حاجة، ولو المطبخ باين ما ترشقش عينك فيه وتشوف جواه إيه...

ولو دخلت مطبخ حد من قرايبك أو من أصحابك، ما تشيلش الغطا من على حلة أو طبق متغطي أو تفتح التلاجة...

_عرفوهم إن حياة الناس عورة، حتى لو هما قاصدين يظهروها، وإنه عيب تسألوا حد على حاجة هو مش قايلها لأنها ما تخصكوش في حاجة.

_عرفوهم إن فيه حاجة اسمها استئذان، وإياك تدخل مكان من غير ما تخبط وصاحبه يسمح لك تدخل، حتى لو الباب مفتوح أو متوارب.

_عرفوهم لو هتقفوا في البلكونة أو في الشارع إن الناس مش فرجة؛ فمثلا لو لقيت حد بيدور في الزبالة على حاجة، بدل ما ترشق عينك فيه، ادع إنك ما تتحطش في نفس ظروفه، أو انزل ساعده باللي تقدر عليه.

أو لو لقيت واحدة طرحتها ولا هدومها الهوا بيطيرها وهي وقفت تضبط حالها، ودي وشك الناحية التانية.

_علموهم ما يبصوش على نعمة عند حد، عودوهم يدعوا للناس بالبركة.

وما تاخدوش الناس بالظاهر ركزوا مع نفسكم وبس.

_علموهم يكفوا أذاهم عن الغير، ولو حتى بنظرة عين ممكن تجيب صاحبها الأرض من غير ما ياخد باله.

الكلام للولاد والبنات

علموا بناتكم يبطلوا مقارنة بين شعر صاحبتها، ولون قريبتها، وغنى جارتها وما إلى ذلك

أعتقد الجيل اللي هيتربى كده، مش هيبرر التحرش بملابس المرأة، لأنه هيبقى عارف قيمة غض البصر وعقوبة انتهاك محارم الله.. وإن مفيش مبرر لانعدام التربية.

فلو كنت بتعمل الحاجات اللي في البوست وشايفها عادي، حاول ما تجاهرش بده، لأنها وحشة جدا في حق اللي كانوا مسؤولين عن تربيتك.

من كتاباتي 112

 

1- مين قال السكوت علامة الرضا!

السكوت عندي عمر ما كان ده معناه.

بسكت رفضا واعتراضا وامتعاضا وزهقا ومللا...

لما الكلام يبقى زي عدمه...

أنا لو راضية، هقول وهعلن وهيبان عليا في كل حاجة.

لو سكت دي علامة غير مبشرة بالمرة.

فيا اللي فرحان بالسكات

عمر السكات ما كان رضا

ده بس صوت حزين

مش راضي يطلع

2-"علشان لما أموت تبقوا تقولوا ما كانش بيستخسر فينا حاجة"

الجملة دي بنات كتير بيقولوها بعد ما أبوهم بيموت..

إنك تفكر إيه اللي هيتقال عنك بعد موتك، إيه اللي ولادك هيحكوه للناس سواء في صالحك أو لا، محتاج وقفة مع النفس.

في الآخر ما بيفضلش من الإنسان غير سيرته ومعاملته مع اللي حواليه.

3-أول مرة اسمع خطيب جمعة بيوجه الكلام للرجال،

وبينصحهم يكونوا لطفاء مع أهل بيتهم.

يكون باش الوجه، دائم الابتسامة، يدخل عليهم السرور، يتفقد حالهم، وما إلى ذلك من صفات طيبة اقتداء بصفات النبي صلى الله عليه وسلم.

تخيلوا معايا كده لو دي صفات رجل البيت، البيت ده هيكون عامل إزاي؟ واللي عايشين فيه حاسين إيه؟

4-الأصل في الإنجاب، إعمار الكون واستمرار دورة البشر، ويمكن علشان كده ربنا خلق غريزة الأمومة، علشان الأم تقدر تتحمل كل التعب اللي بتشوفه قبل وأثناء وبعد الولادة.

لكن بالمقابل ولإن الإنسان يطبعه أناني، بيتصور إن العيال اللي خلفهم دول بتوعه، وموجودين علشانه؛ يخدموه بقى، يحسنوا صورته قدام الناس، يثبت بيهم للمجتمع أنه تمام وما إلى ذلك.

وناسي خالص إنه مجرد وسيط بين اللي خلفه وبين العالم، يعني أنت اللي في خدمة عيالك مش العكس.

أنت المسؤول عنهم مش العكس.

أنت اللي بليتهم بالدنيا وشقاها وده يخليك تعاملهم بلين العمر كله.

يمكن بر الوالدين ربنا أمر بيه علشان لما العيال تكبر وتفهم هتعرف إن ما كانش ليهم رأي في الحياة ووارد يكرهوا حياتهم؛ فييجي الدين يفرملهم إن بر الوالدين ثوابه عظيم.

طيب وبر الأبناء؟؟

الطبيعي الغريزة هي اللي هتحركهم أنهم يحبوا عيالهم ويبروهم.

لكن سواء كانت غريزتك شغالة أو معطوبة فأنت هتتسأل عنهم، عن اللي قدمته ليهم، عن اللي قدمته للمجتمع من خلالهم.

وعلى غرار إحدى المذيعات، لو مش قد الشيلة ما تشيلش.

والناس اللي لسه ما خلفتش يا ريت تسأل نفسها: عاوزة تخلف ليه؟

إيه اللي عايزة تقدمه المجتمع وإيه اللي عايزة تورثه لعيالها؟