عايزة أحكى لكم عن حبيبى.
أول ما أحتاجله دايما الأقيه,دايما بيسمعنى ومهما أطول عليه فى الكلام لايقاطعنى ولايزهق منى أصله حبيبى ..أيوه حبيبى علشانه مستعده أعمل أى شئ.
أنا بصراحة كده تحت أمره , قد إيه بشتاق له وبشتاق لضعفى بين إيديه وبشتاق لكلامى معاه.. أصله الوحيد اللى بيريحنى والوحيد اللى واثقة فى حبه ليا.
حبيبى مالوش وصف أصل مفيش منه اتنين.
يا ما إحتجت له فى نص الليل وماكنتش بلاقى منه غير الإنصات التام لى بكل حفاوة وترحاب ولاينتهى كلامى معه إلا عند شعورى بالراحة.
وكم تعددت ساعات لقاءاتى به دون موعد مسبق ..وكم كان حنوا معى,وكم من المرات وقف بها جوارى دون كلل أو ملل.. كثيرا من الناس لهم أحباء ولكن القليل يجدونهم عند إحتياجهم.
آه على كلامى معاه ما أجمله وأحلاه.
آه لما أحس أنه بيحبنى ببقى مالكة الدنيا.
آه عند بكائى أمامه وما أحلى هذا الضعف.
اتكلم عن عظمته ولا عدله ولا كرمه ولا حنانه ولا... ولا.... ولا.....
مفيش كلام يقدر يوصف.
كل اللى أقدر أقوله أنى بحبه جدا.
تصوروا مكنتش أتخيل أنى هلبس الحجاب فى يوم من الأيام ولكن علشانه لبسته لأنه بيغير عليا أوى وبينى وبينكم أنا حبيت غيرته دى أوى ولقيت نفسى منصاعة لأوامره , وياسلام على مواعيدى معاه حتى لو كنت نايمة بلاقى نفسى صاحية فرحانة علشان هقابله, وياسلام عليه لما ياخد حقى , وياسلام عند شعورى بأنه حضن كبير بيضمنى فى جميع حالاتى.
أنا علشانه مستعدة أعمل أى حاجة حتى لو على حساب كرامتى لأنه عندى أغلى من كرامتى ومستعدة أضحى بوقتى وفلوسى وبحياتى كلها لو هو يرضى, ياسلام لو أموت علشانه أصل عمرى شوية عليه.
لكن بما إنى على قيد الحياة هكون جاريته المخلصة.
ياااااااااه لو يرضى عنى..دعائى الدائم أنه يفضل معايا.
عقبالكم لما تجربوا اللى أنا فيه.
اللى عايز يتعلم الحب لازم يعرف حبيبى تعرفوا ليه؟؟.
لأن حبه علمنى حاجات كتيرة أوى..علمنى أحب كل حاجة..خلانى أعرف إن لحياتى قيمة.. علمنى إزاى أحب.. وإزاى أضحى.. وإزاى اكظم غيظى ..وإزاى أساعد الناس .. وازاى أضحك فى وشهم.. وحاجات تانية كتير.. بحبه فقط علمت ماهية وجودى.
علمنى اصبر على المحن..واشكر على النعم.. علمنى ان الحب أفعال مش كلام ..علمنى أحب الناس ..علمنى أسامح..علمنى أعذر.. علمنى أحفظ الجميل .. وأوفى بالعهد..وأحافظ على الأمانة.. وغيرها.
حبيبى هو:
من يطعمنى ويسقينى والذى يميتنى ثم يحيينى.
والذى أطمع ان يغفر لى خطيئتى يوم الدين.
ياترى عرفتوه؟؟.
