لأن الضيف ده غالي أوي وميعاده مظبوط وبنستناه من السنة للسنة. يبقى لازم نستعد عشان نكرمه.
طبعا هو مش إكرام الضيف واجب؟.
يبقى لازم نستقبله إستقبال يليق بمكانته لدينا.
طبعا كل واحد وله طريقته ف إكرام ضيفه. بس فيه حاجات أكيد كلنا متفقين عليها واللى مش واخد باله أدينا بنفكره.
عموما أنا هتكلم عن طريقتى في إكرام هذا الضيف الغالي واللي ناوية إن شاء الله أعمله.
1-الصلاة:عايزين نصلي أول الوقت للنساء وجماعة في المسجد للرجال في كل الفروض.(لا يقبل أعذار)
وماننساش النوافل وهم:2 قبل الفجر ,4 قبل الظهر,2بعد الظهر,2 بعد المغرب, 2 بعد العشاء.
حاجة مهمة جدا برضه مش عايزين ننساها وهى أننا نختم الصلاة بعد كل فرض.
وكيفيتها:سبحان الله 33 ,الحمدلله 33,الله أكبر33 ,لا إله إلا الله وحده لاشريك له له الملك وله الحمد يحيى ويميت وهو على كل شئ قدير.
في حاجة كمان:قراءة الكرسى بعد كل فريضة.
وأيضا هذا الدعاء:اللهم أعني على ذكرك وشكرك وحسن عبادتك( ثلاث مرات).
وماتنسوش"من آتى بالسُنة كثواب فريضة ومن آتى بفريضة كثواب سبعين فريضة".
2-القرآن:بما إن رمضان هو شهر القرآن يبقى أي وقت عندنا فاضي نقرأ فيه قرآن ولو معندناش نفضى نفسنا المهم نحاول أن نختمه مش أقل من تلات مرات.
يعني التليفزيون مش هيطير والمسلسلات بتتذاع على مدار العام أكثر من مرة والوقت اللي هنضيعه امام التلفاز إحنا أحق به فى قراءة القرآن.
3-الصدقة:ماتتردتش لحظة في مساعدة محتاج والجودة بالموجود زي مابيقولوا.يعنى ماتردش سائل أبدا وماتقولش يمكن يكون نصاب.. ياسيدي أنت بتتعامل مع ربنا وكل واحد ونيته وأنت مش عارف ظروفه إيه
وعايزينها كمان تكون صدقة مدارية يعني محدش يعرف عنها حاجة يعني ايدك الشمال ماتعرفش إيدك اليمين أعطت إيه.
4- صلة الأرحام:ودي ليها طرق كتير يعني لو بتشتغل وحبيت تعمل وأنت مروح زيارة على السريع كده يبقى خير.
بالتليفون في أول رمضان تهنئ الكل بحلول رمضان يبقى جميل.
ولو مشغول أوي أوي يعني ممكن نقضيها رسايل مع أني مش بحبذ الفكرة دي لأن الإتصال تأثيره بيكون أقوى حتى لو دقيقة واحدة .
احنا عارفين ان رمضان فرصة والحسنة فيها مضاعفة يعني مفيش كسل.
5- الدعوة إلى الله:لو عرفت حاجة حلوة وعايز تقولها عن الاسلام ماتتردتش.
لو شفت حد واقع في مشكلة وتقدر تنصحه ماتتردتش.
عايزين طول الوقت نتكلم عن ربنا .
وفيه فكرة كمان إننا ممكن نبعت رسايل سواء على الإيميل او الموبايل نذكر بها انفسنا والآخرين بذكر الله
يعنى مثلا:"قل لاحول ولا قوة إلا بالله فإنها كنز من كنوز الجنة"
"كلمتان حبيبتان إلى الرحمن ثقيلتان فى الميزان خفيفتان على اللسان "سبحان الله وبحمده سبحان الله العظيم".
"استغفر الله كثيرا"
قل الحمدلله ..... وما إلى ذلك من رسايل قصيرة ولكنها تحمل من الخير الكثير.
7- الصحبة الصالحة:رجاء خاص نبتعد عن أصدقاء السوء أو أي مخلوق هيتسبب في ضياع وقتنا بلا فائدة.
ناخد أجازة ياجماعة ده شهر واحد لو اشتغلنا فيه كويس جميع ذنوبنا بإذن الله هتتغفر.
يعنى الموضوع يستاهل أى تضحية وأى مجهود.
8-الدعاء:عندنا امتيازات كتيرة فدعوة الصائم لاترد -ده على مدار اليوم-وللصائم عند فطره دعوة لاترد-وده ساعة الفطار-.
عايزين نخصص دعوات معينة ونركز عليها طول الشهر وبإذن الله قبل رمضان الجاي هتكون اتحققت
وهيكون التقسيم كالآتى:دعوتين أو أكثر لِما أحتاجه في دنيتي و دعاء شامل لأحبائي كلاً باسمه وبالشيء اللي نفسه فيه .
-ماتنسوس أن الدعاء بظهر الغيب مجاب ويؤمن عليه الملائكة ودي فرصة اللي عايزني أدعيله بحاجة محددة يبعتهالي وإن شاء الله يكون له نصيب من دعائي وبإذن الله ربنا يتقبل-.
وأخيراً دعاء للإسلام والمسلمين فى كل مكان.
وطبعا في أدعية أساسية بالجنة والعتق من النار وللوالدين.
9 -قيام الليل:ممكن يكون ساعة قبل الفجر وتقسمها ربع ساعة سحور وربع ساعة قيام ليل وربع ساعة قراءة قرآن والربع الساعة الباقيه دعاء إلى أن يؤذن لصلاة الفجر.
ولا ننسى الإعتكاف في العشر الآواخر:نتحرى جميعا ليلة القدر لعلنا نكون من عتقائها ولا ننسى الدعاء الدائم.
10- ذكر الله:اجعل لسانك رطبا بذكر الله يعنى لو واقفة في المطبخ أو كنت في المواصلات أو نازل على السلم أو بتدور العربية أو مستنى برنامج ديني في التليفزيون...
فيه حاجات عايزين نبعد عنها تماما وهى:
1- الخوض فى الباطل.
2-الخوض فى أعراض النساء.
3-الجدل.
4- البذائة (استخدام الألفاظ البذيئة).
5- السخرية والإستهزاء.
6-إفشاء الأسرار.
7-الوعد الكاذب.
8-النميمة(نقل الكلام).
9الغيبة(ذكر أخاك بما يكره).
10- .الكذب.
ربنا يعيننا على مجاهدة أنفسنا وأهوائنا .
**********************
على الهامش:
ــــــــــــــــــــــــــــــ
* هبدأ أجازتى التدوينية إن شاء الله طوال شهر رمضان ونلتقي على العيد بإذن الله.
*هتوحشوووونى جداً جداً وياريت تفضلوا فاكرينى وخصوصاً ساعة الفطار عايزة دعاء جماعى بأن ينصرنى الله على من ظلمونى ويرضى عنى .
*يسعدنى إستقبال أى تعليق على أى موضوع من موضوعاتى السابقة وبإذن الله سأقوم بالنشر و الرد حين عودتى.
وإلى أن نلتقى لكم منى أرق التهانى بحلول شهر رمضان أعاده الله علينا بالخير واليمن والبركات وأطيب الأمنيات بأن يكون شعارنا"لن يسبقنى إلى الله أحد".
أترككم فى أمان الله.
وكل عام وأنتم جميعا بخير.
زى اليومين دول من كام سنة كنا بنجهز لفرح أخويا الكبير.وكنت وقتها مبسوطة جداَ وكأنه فرحى أنا.
مش عارفة هل ده لأن اللى هيتجوز بمثابة توأم روحى وصديق حياتى ورفيق طفولتى وليس أخى فقط.أم لأنى فى الوقت ده كنت متصالحة أوى مع نفسى. مش قادرة أحدد بس اللى واثقة فيه كويس أوى انى كنت مبسوطة جدااااا.
وكل حاجة حصلت وقتها كنت حباها جدا.يعنى مثلا شقته كانت بتتبنى من أول وجديد ولكم أن تتخيلوا الإستيقاظ باكرا على صوت العمال .-رغم انى مش بحب الإستيقاظ بالطريقة دى خالص-.
فاكرة يوم ماغرفتى إدهنت واضطريت آخد مخدتى ومرتبتى والكوفرتة و أنام فى الصالون لأن الدهان كان لسه مانشفش وقد إيه كان يوم جميل وكأنها مغامرة.-رغم أنى مش بحب أنام غير فى سريرى-
وفاكرة يوم ماكتبت أسماء المدعوين على كروت الفرح يومها فضلت صاحية للفجر.-رغم أنى كان لازم أنام بدرى لأن كان ورايا الصبح حاجات كتير-.
وفاكرة يوم ما نام فى غرفتى عدد سبعة أشخاص وأنا منهم طبعا.-رغم أن كانت من ضمنهم سيدة مسنة وترفض تشغيل حتى المروحة-.
وفاكرة يوم ما روحنا نختار الفرش ويوم ماوصل الشقة. وقبل ده كله طبعا يوم مالشقة بقت جاهزة وصالحة للإستخدام الآدمى.
فاكرة كمان زيارة الأقارب والمهنئين من النساء واستقبالى لهم وكأنى العروسة.
وفاكرة يوم الفرح وقد إيه كنت واقفة مع العروسة وكأنها أختى وليست عروسة أخى.
وقد ايه كنت فرحانة بكل المدعوين وسلمت عليهم واحدة واحدة.
ياااااه بجد كانت أيام جميلة.
ربنا يجعل أيامنا كلها فرح وسعادة.
بعرض عليكم الأحداث دى لأن ده يعتبر آخر حدث حصل لى وكنت فرحانة فيه فرحة كاملة.
وعشان كده عايزة كل واحد يحكيلنا آخرحدث حصله وكنت فرحان فيه أوى وحسيت بالفرحة الكاملة.
ان شالله تكون من عشرين سنة.
المهم تفتكرها وتشاركنا معاك.
وعايزة كمان تتخيل إيه أجمل موقف لو حدث هتشعر فيه بالسعادة الكاملة.
دعوة منى لنتذكر أيامنا الحلوة فنبتسم .
آملين من المولى أن يكون القادم أجمل.
لماذا الموت يفاجئ الكثير منا على غير ميعاد.
ولماذا تهاجمنا شتى الأمراض من الأنفلونزا إلى الأمراض الخطيرة دون سابق إنذار.
ولماذا يوجد الفقر الذى يحرمنا من أشياء عدة.
ولماذا تنبعث من أجسادنا روائح كريهة فى شتى المواقف.
هتقول إزاى وانا على طول بستحمى! يعنى مثلاً
رائحة الفم عند الإستيقاظ أو لو ما أكلتش أو لو أكلت بصل أو...أو...
رائحة القدم عند خلع الحذاء وده على اعتبار إنك دائم النظافة.
رائحة العرق وخاصة فى فصل الصيف.
رائحة شعر الرأس لو لم تغسله لفترة.
رائحة عملية الإخرج وما إلى ذلك.
وهذا لو أنت سليم ومعافى وتستطيع تنظيف نفسك فما بالك بالقعيد !
أنت عارف كل الحاجات دى بتحصل ليه؟؟؟
لأننا فى الدنيا يعنى دار فانية.يعنى مجرد محطة للإنتقال للدار الباقية.
فلا تستحق كل هذا العناء من محاولات دائمة لأخذ أشياء ليست من حقنا.
أو اللجوء لوسائل غير مشروعة لخدمة مصالحنا.
فلنعمل فى الدنيا بقدر بقائنا فيها .
ولنعمل للاخرة بقدر بقائنا فيها .
ولنعمل من المعاصى بقدر مانطيق من العقوبة.
وليكن شعارنا دائما"نريد الفردوس الأعلى".
فالله تبارك وتعالى وعدنا فى الجنة بألا نجوع ولا نظمأ وألا نمرض وأن نحيا ولا نموت وألا يصيبنا فقر.
وإذا كانت رائحة ترابها مِسك فما بالك برائحة من يسكنون فيها.
إن فيها ما لاعين رأت ولا أذن سمعت ولا خطر على قلب بشر.
احجز مقعدك من الآن واستبقوا الخيرات.
معقول مشى بسرعة كدة. قد إيه كانت أيامه جميلة.
طبعا مفيش شك فى أنكم وحشتوووووونى جداً جداً. وبفضل الله قمت بالدعاء بالاسم لكل من أمنونى الدعاء ده غير دعاء جماعى للمدونين جميعا. ربنا يتقبل مننا يارب. ونكون قدرنا فعلا نعبد ربنا بالطريقة اللى يرضى بيها عننا.وتكون رقبتنا قد اعتقت من النار اللهم أمين.
