السلم الشيطانى

قال تعالى " ولا تتبعوا خطوات الشيطان".
للشيطان طرق ملتوية كثيرة.. يكفى أنه يرانا من حيث لا نراه.. ويعرف مواطن ضعف الجميع وينتهز أى فرصة لتزيين المعصية لأن المعصية غير مستحبة لأى إنسان مهما كانت ديانته ويرفضها أى عاقل ولذلك يقوم الشيطان بتزيينها وتجميلها ويتعامل مع الإنسان بسياسة البال الطويل ويكفى قسمه وتحديه للمولى عز وجل حينما قال" وعزتك وجلالك لأغوينهم مادامت أرواحهم فى أجسادهم" وهذا يعنى أنه من الغباء أن نتهاون به فهذه وظيفته إلى يوم الدين.. ولذلك أردت أن أذكر نفسى وإياكم لبعض طرقه فى التعامل معنا بعرض بعضاً من الأمثلة.
* من ترتدى طرحة طويلة مثلاً.. يزين لها بأنها لاتظهر جمال وشياكة ماترتدى ولماذا اشتريتى هذا الفستان الغالى طالما سيختبئ وراء طرحة لامانع من تقصيرها قليلاً.. أو ما سيضير إذا ارتديتى الإسبانش فهذا على الموضه أكثر والدين يسر والمهم أنك تغطين شعر رأسك.. ما المانع أن تخلعى الحجاب يوم زفافك أو فى المناسبات عموماً فهذه مجرد ليلة ولن تضر فى شئ فالله غفور رحيم.

* مدمن المخدرات.. كانت البداية مجرد سيجارة وعزومة كمان.. إثبت للجميع بأنك رجل وتستطيع السيطرة على نفسك فى أى وقت تريد..تعانى من مشاكل عاطفية الحل بسيط المخدرات هى الحل.. جربها وأنت تشوف بنفسك.

* الاختلاط بداية للزنا.. سواء اختلاط أقارب الزوج وزمايله بالزوجة أو غيرها من الأمثلة المعروفة للجميع.. والبداية أنتم زى الأخوات أو أهلى عارفين أو أنا واثقة من نفسى أو أنت مابتعملش حاجة غلط ما الكل متصاحب إشمعنى أنت يعنى .. ماتبقاش معقد..والزنا أنواع فالعين زانية وزناها النظر والأذن زانية وزناها السمع واللسان زانى وزناه الكلام والفرج يصدق هذا أو يكذبه.

* التحدث فى الهاتف لتضييع الوقت..الثرثرة والغيبة والنميمة.. التوقيع بين الناس..
* إدمان المواقع الإباحية أو القنوات البورنو تبدأ بنظرة فضولية أو إشمئزاز..
* إضاعة الوقت بالساعات فى ألعاب الكمبيوتر.. تبدأ بالتجربة والمنافسة والرغبة فى الفوز.. ومش مهم إن الصلاة ماتتصلاش فى وقتها والمذاكرة مش هتطير وطلبات أمك مابتنتهيش وأبوك دقة قديمة وأنت يعنى بتضر مين ما أنت قاعد فى حالك من وقت مابتصحى لحد مابتنام ماببتحركش من مكانك.
* عدم الإستذكار.. يبدأ بإجراء مكالمة هاتفية لأخذ المنهج مثلاً وطبعا الكلام يحلو والمكالمة ماتخلصش غير لما تكون عايز تنام.. أو ترد على تليفون المنزل أو تستقبل اتصال على موبايلك أو رسالة.. مشاهدة حلقة من مسلسلك المفضل على اعتبار أنها حلقة مهمة ومش هتتعاد تانى..
* عقوق الوالدين.. يبدأ بعلو الصوت.. أو نظرات حتقار.. وأنهم مش فاهمينك وبيفكروا بطريقة قديمة...
وغيرها من الأمثلة التى عبرت عنها الصور التالية:

ملحوظة هامة:
ــــــــــــــــــــ
يوجد شياطين فى الإنس لاتقل خطورتهم عن شياطين الجن.. والزن على الودان أمر من السحر.. والتنازل يبدأ بخطوة.. والتعود يجعل فعل الشئ عادى.. والوحش مابيحبش يكون هو بس اللى وحش ..ده بيحب الكل يبقى زيه عشان بينه وبين نفسه يقول مش أنا لوحدى.. وهتلاحظوا دى مثلاً فى رغبة المدخن وإلحاحه فى أن يشرب زميله غير المدخن سيجارة أو أنه يصاحب بنات أو يسهر معاه لوش الفجر قائلاً بنبرة الصديق الصدوق جرب ومش هتندم هى دى حياة اللى أنت عايشها إيه الإلتزام والجو اللى يخنق ده.. أنا بستغرب أنت مستحمل نفسك إزاى.
وبرضه النساء ليهم دور كبير لو شافت فتاه صغيرة السن لا تصافح الرجال تقولها بس ده زى أخوكى أو ده زى عمك أو ده أنتوا متربيين مع بعض..
أو لو شافتها مابترفعش حواجبها أو مابتحطش ميك آب تقولها ليه مش عاملة زى اللى فى سنك وبدرى عليكى وإن الله جميل يحب الجمال وأنا لا أكذب ولكنى أتجمل.
أو مابتروحيش أفراح مختلطة ليه..أو مابتسمعيش أغانى ليه.
.أو ليه على طول بتسمعى قرآن هو أنتى فى ميتم إيه الفال اللى أنتى مشغالاه فى البيت على طول ده.
أو ليه خانقة نفسك بالحجاب لما بتزورى حد أو حد يزورك ده الجو حر نار.. فكى عن نفسك شوية وبعدين ده أنتى فى بيتك.
وغيرها كتييييييييير
اللى يحب يضيف أمثلة فكلنا آذان صاغية.

اللهم إنك سلطت علينا عدواً عليماً بعيوبنا يرانا هو وقبيله من حيث لا نراهم.. الله آيسه منا كما آيسته من رحمتك وباعد بينه وبيننا كما باعدت بين المشرق والمغرب وقنطه منا كما قنطه من عفوك.. إنك ولى ذلك والقادر عليه.
أقول قولى هذا واستغفر الله لى ولكم.

مصر محتاجالك.

أمك ولا خطيبتك يا طه؟
طه: خطيبتى طبعاً.
تقولها لبلبة لمحمد هنيدى فى فيلم لا أتذكر اسمه .
مش عارفة ليه المشهد ده بيفكرنى بوضع مصر حالياً.
مصر ولا مصالحكم الشخصية يا شعب؟
الشعب:مصالحنا الشخصية طبعاً.

زمان فى الأفلام والمسلسلات العربى لما كانت المخابرات المصرية تحب تجند حد حتى لو مالوش علاقة بأى حاجة كانت تقوله كلمة السر اللى هى : مصر محتاجالك.. ياااه تلاقى البطل فى ساعتها ومن غير تفكير لبى النداء فورياً حتى لو مالوش لا فى الطور ولا فى الطحين ولا عارف أصلاً هما عايزينه يعمل إيه.. وياسلام بقى لما الوضع يتأزم جداً والبطل يبقى خلاص بيفكر أنه يرجع فى كلامه تلاقى اللى مجنده يقوله كلمة السر التانية اللى هى :عشان مصر.. وبرضه تلاقيه فى ثانية الحماس دب جواه وبقى مستعد يضحى بروحه فداء لهذا الوطن.
زمان برضه غنوا وقالوا" مصر هى أمى.. نيلها هو دمى".

دلؤتى بقى الوضع اتغير تماماً وبقينا مقضينها أغانى وبس تتقال فى الماتشات لكن الفعل إيه!!! لا يسر عدو ولا حبيب.

لو لسه بتعتبر مصر أمك..حد يعمل فى أمه كده؟؟.
حد يلوى دراع أمه فى الوقت اللى هى عايزة تتسند على ولادها فيه؟. بالمظاهرات الفئوية والفتن الطائفية.. ده وقته يعنى أنا راضية ذمتكم ده وقته؟؟؟.
حد يعرى أمه قدام العالم كله بدل ما يغطيها ويسترها ويدارى عيوبها؟ بانتشار البلطجة والسرقة والاحتكار وغيرها من الحوادث المؤسفة.
حد يسرق أمه ويسيبها تجوع وتشحت من باقى الدول وهى خيرها يقضيها ويفيض .. بانتشارالطمع والنهب والسلب وكأنه مال سايب مالوش أصحاب؟.
حد يسيب اللى سرق أمه وقتل أخواته وشرد أهله وأصاب أطفاله بعاهات مستديمة وأمراض خطيرة فى سجن ملوكى ويأجل إعدامه لحين ميسرة؟.
حد يشوف أمه خارجة من عملية ولادة متعسرة وبتعانى من حُمى النفاس وبدل ما يمرضها عشان تخف وتقوم يضربها على دماغها ويهريها طلبات؟؟.

قولولى بجد والله أنتوا عايزين إيه؟؟؟.
عايزين مصر تموت؟؟.
ده المعنى الوحيد لأفعالكم الغير مدروسة والتى تنم عن فوضى أخلاقية وأسلوب همجى وعدم تحمل المسئولية..مصر لسه عايشة بتتخانقوا على الورث ليه؟؟.

على فين يا مصر ولادك هيودوكى
على جنة ربنا فى الأرض ولا هيرموكى
ربنا كبير قادر ينصرك رغم اللى بيكرهوكى
وقادر كمان يذلهم ويهينهم زى ما هما هانوكى

نــــــــداء:
ـــــــــــــــــــ
با أبناء مصر هلموا لنجدة مصر ليس بالمظاهرات والاحتجاجات على الأوضاع الراهنة وليس بالاعتصامات على قلة ذات اليد فهذا ليس وقت عتاب أو تصفية حساب..هذا وقت العمل.. اعملوا على نهضة بلدكم ..اعملوا على عزتها ورفع شأنها..اعملوا على أن تكون كما تتمنوا لها.. وهذا لن يحدث بتقصيص ريشها كما تفعلون الآن..ساعدوها لتقوم وتقف على ساقيها من جديد..كونوا درعاً تواجه به أعدائها بدلاً من كونكم خنجراً يتغرس فى قلبها.

حفظكِ الله يا مصر من كل سوء وجعل كيد أعدائك فى نحورهم حتى لو كانوا يحملون اسمك فى خانة الجنسية فى رقمهم القومى.. فكل من يريد بكِ السوء فهو عدو لا يستحق الحياة على أرضك أو التمتع بخيراتك أو التستر بسمائك.

انتحار

سُئل أبى بكر الصديق عن كراهيته للخمر من قبل أن يعتنق الإسلام فقال كنت أرى الرجل بعد شربها يكون مغيب العقل و يضع التراب على رأسه فأبيت أن أكون هكذا مغيب العقل.

سبحان الله.. يعنى أى إنسان عاقل مهما كان دينه بيختار أنه يكون إنسان مُكرم لا يقوم بأفعال أصحاب العقول المريضة.

ولهذا أسأل كل من يشرب الخمور أو يتناول المخدرات بأنواعها بما فيها الحشيش.. لماذا تفعل فى نفسك هذا!؟؟.
هل تجد الأموال فى الشارع مثلاً أو تحت وسادة نومك يومياً حتى تقوم بحرقها بهذا الشكل!!.
مذا سيكون رأيك فى شخص معاه عشرة ورقات بفئة المائة جنيه وعاملهم شراشيب رمضان.. هتقول عليه إيه؟.
عادى بقى ماهو كل واحد ومزاجه ويمكن دماغه مابتتظبطش غير لما يقطع الفلوس بيديه.
أهو سيادتك مافرقتش عنه كتير .. كل واحد فيكم ضيع الفلوس بطريقته.
أنت بالنسبة له حشاش وخمورجى وهو بالنسبة لك أهبل ..والحقيقة أنكم أنتم الاتنين ماعندكوش عقل.
ولا تقول أنها تأتى لك عن طريق الهدايا وأنك لا تدفع فيها فلوس لأن رد العطا غالى وشوف أنت بقى هترد الهدية دى إزاى.
مش بذمتك الفلوس دى أنت أولى بيها تصرفها على نفسك فى حاجة مفيدة.. أو حتى لو معاك فلوس غيرها كتير محيراك ..أعطيهم لحد مش لاقى ياكل أو لا يجد ثمن دواءه.
لما ربنا يسألك على الفلوس دى هتقول إيه؟
كنت بعصيك بيها يارب.. هتقوله كده عادى يعنى!!!.

بالنسبة للصحة:
إنك لا تحتمل أى ألم بسيط من أى مرض.. هو الإنسان كده ضعيف حتى لو عنده شوية برد تجده مش قادر فما بالك أنت بقى الأمراض المستعصية ..ماهو سيادتك مابتدخلش جسمك فيتامين .. لأ دى سموم هتموتك على المدى الطويل أو القصير.. كل واحد بقى وحسب طاقته ومقاومة جسمه.

لماذا تعطى لعقلك أجازة؟.
لماذا تكون أسيراً لشئ هيضرك؟
لا تقول إنك تستطيع السيطرة على نفسك لأن كان غيرك أشطر وإذا كنت تريد التأكد اذهب لأى مصحة لعلاج الإدمان وأنت تعرف حجم معاناتهم.
لماذ تستغنى بإرادتك عن العقل الذى حبانا الله به دوناً عن بقية مخلوقاته؟.
لماذا تقبل على نفسك أن تصبح أضحوكة لمن يراك أو يتعامل معك وأنت على هذا الحال؟.

حرام عليك أهلك يشوفوك كده.. أو حد بيعتبرك قدوته يشوفك كده.
إيه تسوى خوفك لأى حد يظبط معاك شئ من هذه الأشياء المخدرة.
ما المتعة فى إنك تبقى مغيب العقل ومش عارف تقول كلمتين على بعض.

حتى لو عندك مشكلة تفتكر إن ده هو الحل !!.
غيرك يتمنى الصحة.. غيرك يتمنى العقل.

لا تتغر بصحتك الآن لأن سن الشباب مفعم بالحيوية والطاقة.. انتظر قليلاً حينما يزيد عمرك وسترى نتائج مافعلته بنفسك وتذكر بأن اللى بتضيعه وأنت صغير مش ممكن تلاقيه وأنت كبير.

تخيل لو كنت تمتلك سيارة جيب أحدث موديل ويومياً تسير بها فى طرق وعرة وجميع من حولك ينصحونك بأن تسير على طرق مستوية حتى تحافظ على سلامة سيارتك وأنت لاتصغى لهم وتعتمد على متانة سيارتك.. لن تتعظ إلا حينما تخذلك سيارتك يوماً ما وتجد أنها تكسرت وإمكانياتها تدهورت ولم تعد تصلح للإستخدام.

انتهز الفرصة من الآن واترك ما أنت فيه.
خد قرار سريع لا يشاركك فيه الشيطان.
استرجل وتوقف عن تعاطى أى شئ يضرك.
وتذكر من ترك شيئاً لله عوضه الله حرمانه. حتى لو هتتعب فى الأول وده طبيعى لا تستسلم وقاوم رغبتك بعزم ما فيك.. واعتبرها حرب مع نفسك والشيطان .

سؤال جانبى:
ـــــــــــــــــــــــ
لو اكتشفت إن اخوك الصغير أو ابنك بيتعاطى أى نوع من المسكرات هتتصرف إزاى؟
*قول كلمة توجهها لهؤلاء.

رجال الأمن

"ها.. مين هناك" جملة كنا نسمعها كثيراً فى أفلام الأبيض والأسود.. وكنت أتسائل لماذا لم يعد هناك رجل شرطة فى كل شارع أو حارة لمزيداً من الأمان والحماية.. وهل حقاً لم يعد لوجوده أهميه وأن بلدنا قد خلت من اللصوص والبلطجية.

إن وجود رجل أمن يحرس جميع المناطق مهما كان مستواها سيضفى جواً عاماً من الأمان فلا أحد سيجرؤ على سرقة شقة مثلاً حتى لو أصحابها غير موجودين فيها فهناك رجل يظل متيقظاً طوال الليل ويسير ذهاباً وإياباً حاملاً سلاحه- حتى لو كان هذا السلاح يحتوى على رصاص فشنك- فوجوده سيرهب اللصوص كرهبة الفأر من القط.

ولن يجرؤ أحد على أن يخطف حقيبة يد فتاة أو يتحرش بامرأة أو حتى يعاكسها حتى لو كانت ماشية لوحدها بالليل لأن فيه رجل أمن وظيفته التى يتقاضى عليها أجر هى حماية المواطنين.

حتى فى الأتوبيسات العامة أو فى القطارات لمَ لا يوجد رجل أمن!.

زمان كان رجل الشرطة رمزاً للحماية والأمان.
حالياً لا يوجد رجال أمن فى الشوارع عدا وجود عساكر المرور فى المدن الكبيرة ووجود لجان لتأخذ أموال الناس تارة على حزام الأمان وتارة على شنطة الإسعاف. بالإضافة لشرطة المرافق.
- هذا طبعاً كان من شهور ماضية أما الآن فقد اختفى رجل الشرطة فى ظروف غامضة وإذا ظهر فيكون ظهوره على استحياء وكأنه لم يعد يقبض مرتبه شهرياً وبصفة منتظمة حتى يقوم بدوره على أكمل وجه من حماية المواطنين وصد كل المحاولات لترويع الآمنين-.

أصبح رقم النجدة"122" لا يعنى الحماية المطلوبة.

حكت لى صديقتى عن وجود مشاجرة بين شقيقها وبين مجموعة من البلطجية بالسلاح الأبيض أمام باب منزلهم فاتصلت بالنجدة فأرسلوا لها عسكرى بعد انتهاء المعركة!.

وأخرى تعرضت هى وشقيقتها وأمها لهجوم بعد منتصف الليل من بعض اللصوص وحينما اتصلت بهم أرسلوا لها عسكرى فى اليوم التالى !!.

ولا أنسى انهيار عقار كان يسكن فيه فى الدور الأرضى كوافير للسيدات فتتصل عروس من تحت الأنقاض برقم النجدة فيكون الرد"يعنى عايزانى أعملك إيه"!!.

أدعو أن يكرس رجال الشرطة مجهودهم لمزيد من حماية المواطنين والاهتمام السريع باستغاثاتهم حتى لو كانت من وجهة نظرهم مجرد مشاجرة تافهة.. وأن يوجد رجال شرطة فى جميع أنحاء المناطق لحماية الفتيات خصوصاً من أى اعتداء قد يتعرضن له ابتداء من سرقة حقيبة اليد إلى التحرش ولحماية جميع الفئات عموماً.
عليكم بحماية الوطن فأنتم مسئولين عن حمايته وأمنه.
فما يحدث من إنفلات أمنى أنتم المسئولين عنه أمام الشعب.
و ما يحدث من سرقة وقتل واغتصاب فى رقبتكم.
وما يحدث من فتنة طائفية فى رقبتكم.
ومايحدث من هروب مساجين ومُسجلين خطر فى رقبتكم.
ومايحدث من بلطجة وترويع للآمنين فى رقبتكم.

أفيقوا من غيبوبتكم سريعاً وعودوا إلى أرض العمل.. أنا لا أرجوكم أنا فقط أذكركم بواجبكم الذى عليكم أن تأدوه على أكمل وجه فأنت مازلتم على ذمة الدولة المسئولين عن أمنها وحمايتها ومازلتم تتقاضون راتبكم بناء على هذا.

أوجه رسالة لوزير الداخلية: أطالب فيها بأن يتم عزل كل من يتخاذل عن آداء وظيفته أو حرمانه من راتبه لأنه لايستحقه.

و يحضرنى مقولة الكاتب الساخر جلال عامر:

علي الشرطة ان تودع مرحلة ضبط النفس وتبدأ في ضبط المتهمين .

سؤال جانبى:
ــــــــــــــــــــــ
لو هتوجه رسالة للشرطة دلؤتى هتقولها إيه؟.