محتاجة حد في حياتي يقولي لما اصحى "صباح الخير يا منى" وبعد ما نتغدا سوا يقولي "تسلم إيدك يا منى" ولو الأكل مش أنا اللي طبخاه بس بناكل سوا يقولي "أنا مبسوط إننا بناكل مع بعض يا منى"
أنا لو هتجوز واحد مش هيحقق لي احتياجاتي البسيطة دي يبقى بناقص.
وده بمناسبة إني قرأت مشكلة على جروب بنات من زوجة بتشكي إهمال زوجها لاحتياجاتها النفسية وبتؤكد إنه مش حارم البيت من حاجة حتى الشيبسي بيجيبهولها لكنه ما بيهتمش بيها كأنثى جبلت بالفطرة على الرغبة في الإطراء والمدح والاستماع للكلام الحلو.
حتى حقها الشرعي بيؤديه كواجب وباستعجال وده لو هي اللي طلبته كمان!
فيه رجالة فعلا بتتعامل مع المسؤولين عنهم زي معاملتهم مع الدواجن.. يجيب الأكل وكده يبقى متوقع إنه في التمام مش مقصر.. وخد بالك إني اختارت الدواجن لإنها ملهاش طلبات يا دوب تاكل وتشرب وخلصنا.. عكس الحيوانات الأليفة مثلا زي القطط والكلاب دول طبعا محتاجين معاملة خاصة وبيفرضوا وجودهم ورغباتهم في الزواج والخروج وممكن يجيلهم اكتئاب يكرهك في نفسك وتحس بالذنب كمان.
فازاي تتعامل مع الأنثى في حياتك زي ما بتتعامل مع فرخة مربيها مثلا!!
اتكلم معاها، دلعها، ما تخليهاش تحس انها محرومة وأنت معاها ومحسوب عليها وجودك.
المؤسف إن ده بالنسبة للمجتمع ما يعتبرش مشكلة أساسا ويتم تصنيفها إنه دلع ماسخ وتحمد ربنا إنه بيصرف عليها!
وهنا أحب أقول: إنك مش واخدها جعانة وأنت اتكرمت عليها بجلب الطعام مثلا! ماهي كانت بتاكل وتشرب في بيت أبوها عادي إيه بقى اللي ضيفته ليها بجوازك منها؟
وإن لو الزواج ما حققش الونس وأشبع الاحتياج النفسي فقلته أحسن.
ده غير إن اللي هي بتطلبه ده حقها اللي مفيش غيرك يقدر يحققهولها
"كفى بالمرء إثما أن يضيع من يعول"
"كلكم راع وكلكم مسؤول عن رعيته"
