برنامج المرأة مشكلة المجتمع

 تابعوني على قناتي ع اليوتيوب للاستماع لبرنامجي الإذاعي

المرأة مشكلة المجتمع

الحلقة الأولى مفردات المرأة

الحلقة الثانية البنت زي الولد

الحلقة الثالثة نعمة الطلاق

الحلقة الرابعة جريمة ختان الإناث

https://www.youtube.com/hashtag/المرأة_مشكلة_المجتمع

وده لينك القناة لمتابعة جميع الفيديوهات

قناتي ع اليوتيوب

رجل البيت

- لو جربت يعني إيه تقف قدام البوتجاز المشتعل في عز الحر، أوتتلسع، أو يتنتر عليك زيت... ما كنتش هتستخسر فيها الكلمة الطيبة 
وفي نفسك ثواب الصدقة.

النفس تتوق لمن يقدرها والروح تتوق لمن يدللها، حاجات صغيرة ممكن ترسم شكل العلاقة.

كلمة "تسلم إيدك"ممكن تهون عليها تعبها.

- ربنا مش هيحاسبها على أكلها اللي مش عاجبك، لكنه هيحاسبك على تعليقاتك البايخة اللي كسرت بيها خاطرها.

ولنا في رسول الله إسوة حسنة، الأكل اللي ما كنش بيعجبه ما كنش بياكله.. فلم ينهر صبيه قط وهو الموكل بخدمته! فما بالك بمن تستقطع من وقتها وجهدها دون مقابل، إن لم تجدها تستحق الكلمة الطيبة فأنت في أمس الحاجة لثواب هذه الصدقة.
"الكلمة الطيبة صدقة"

- لو موبايلك فصل شحن طبيعي ما تنتظرش منه يشتغل، ومطلوب منك تشحنه وتستنى لما يستعيد طاقته تاني. ولو ده ما حصلش مش هينطق. ولو ما شحنتوش كامل هيفصل بعد وقت قصير.

دي بديهيات التعامل معاه.

المرأة اللي معاك، لما طاقتها تخلص من مصلحتك تشحنها بدعمك، بلطفك، بكلامك الطيب، برحمتك بيها.. خروجة، هدية، شوية 

تقدير وامتنان هيمدوها بطاقة تخليها ترجع تكمل مشوارها معاك وهي مبسوطة. لا منهكة ولا متذمرة ولا بتفكر تسيبهالك مخضرة

- بشوف أي حد يقدر يطبخ أصناف منوعة في وقت قياسي بمثابة الساحر.

تخيل يبقى قدامك مثلا كيس رز، إزازة زيت، كيلو بطاطس، فرخة، كيس ملح، ٤بصلات، ٤طماطميات وتخرج بعد ساعة مثلا ومعاك صينية بطاطس بالفراخ، حلة رز، طبق سلطة، بطاطس محمرة.

أو مثلا تخرج بحلة بطاطس، وحلة شوربة فراخ، وحلة رز.

يعني فيه ٣عيون بوتجاز كانوا شغالين وأنت متابع الكيميا بتاعتهم، إمتى تعلي النار، وإمتى تهدي، وإمتى تخلي النار متوسطة.

تخيل بقى ييجي حد ما بيعرفش يسلق بيضتين يعلق على الساحر ده بأي تعليقات سخيفة!

ومن هنا أحب أقول يا تشكر نعمة وجود حد بيعمل حاجة أنت ما بتعرفش تعملها، يا تتعلم وتعمل لروحك.

قبل ما ادخل المطبخ ومامتي موجودة، كان ممكن اتأمر وابقى مستغربة لو في يوم نست تعمل سلطة مثلا، أو لو لقتها متذمرة إن الجو في المطبخ نار وما بتصدق تخلص الغدا علشان تخرج منه.

دلوقتي بقيت أبص لفعل أي حد مهما كان يبان بسيط إنه يستحق التقدير وخصوصا لو كان بيعمل علشاني حاجة أنا معرفش أعملها لنفسي.

كان مثلا بيفرق معاها أوي لما أقولها على أي حاجة عملاها "تسلم إيدك يا ماما"

صدق الله حين قال "وقولوا للناس حسنا"

وده ينطبق على كل الناس بما فيهم الباعة، والأوفيس بوي، والويتر وأي حد بيقدم لك خدمة.

شبعوا عيالكم

شبعوا عيالكم حب وحنان واهتمام ورعاية علشان ما يرمرموش.

ما تخلوهمش جعانين مش أكل وبس لكن مشاعر ودعم محتاجينها بحكم تكوينهم الإنساني.

شوفت بطلة مسلسل راحة تولد وكان كل اللي فارق معاها وجود مامتها وكأن رؤيتها هتخفف ألمها وهتسهل الولادة.

بنت تانية كانت في مسابقة وكان أبوها لسه ماوصلش وهي متوترة وقلقانة لكن أول ما لمحته ابتسمت واستعادت ثقتها بنفسها وفازت.

دنيا سمير غانم كانت قلقانة وهي راحة تقدم برنامج فكلمت أبوها وهو كل اللي قالهولها "اهدي كده وما تقلقيش" فخلاص كده هدت وقدمت البرنامج عادي! مجرد كلمة عادية ممكن تتقالها من أي حد عادي لكن هي عايزة تسمعها من مصدر الأمان والدعم ليها مش من أي حد تاني.

ما تقولش علشان خلاص عيالي كبروا إنهم مش محتاجين دعمك وحبك ليهم، ماتفكرش إن علشان ابنك بقى أب أو مسؤول كبير وبنتك بقى ليها حياة مستقلة إنهم خلاص ماعدوش محتاجين حضنك!!

دورك معاهم ما بينتهيش غير لما تموت مش لما هما يكبروا.

--

أنبهر تماما من تولي الوالدين أو أحدهما رعاية أبناءه النفسية وحملها على عاتقه كمهمة حياتية، في الوقت الذي قد يوجد من لا يكترث لهذا الامر برمته.

الأبناء في العموم ومهما بلغت أعمارهم بحاجة لدعم والديهم ماديا ومعنويا.

أن تختار بإرادتك الإنجاب؛ فذلك شجاعة لخوض معركة يوميا مع ذاتك، حتى لا تغلبك نفسك التي تريد قسطا من الراحة ووقتا للاسترخاء دون طلبات، أو رغبة في الهدوء الجميل في الوقت الذي يأتي إليك طفلك ليثرثر في لا شيء أو يتلو عليك أحداث يومه، أو يعتبرك نابغة ويسألك في اشياء لم تخطر في بالك مطلقا!

ذلك الاختيار الحر بالإنجاب يحتم عليك مثلا أن تنمي معلوماتك وتكظم غيظك وتهدئ أعصابك لاستقبال حماقاتهم الصغيرة بصدر رحب.

تحية من القلب وتقدير لمن يقوم بدوره الذي اختاره بملء إرادته.

علم ابنك يكون قوي

شوفت فيديو أول كام دقيقة منه بيتكلم عن التربية السليمة، وإنك لو عندك طفلين وحطيت واحد في بيئة مغلقة لأنك خايف عليه ومنعت عنه الأذى طول الوقت هيطلع مش عارف يواجه الدنيا وهيلومك إنك ما سيبتوش يتعلم ويخوض تجاربه الحياتيه.

ولو حطيت الطفل التاني في بيئة عادية تخليه يقع ويقوم ويضرب وينضرب، آه هيتأذى لكنه هيكون أقوى وأقدر على مواجهة الحياة.

لهنا والكلام منطقي ومعقول وشخصيا بدعمه بحكم كوني تربوية..لغاية ما نقل على موضوع بيقول فيه:

لو حد شتمك المفروض ما تزعلش لإن ده معناه إن هو اللي قليل الأدب مش أنت!

وما تزعلش لو قدمت لحد حاجة وماقالكش شكرا.. وإن اللي بيحتاج يسمع كلام حلو ده عنده نقص ومحتاج حد يملاه.

واستشهد إن ثوابك هنا هيكون كامل غير منقوص!

ومن موقعي هذا أحب أرد:

كلامك ده تقوله للمهزأ اللي يقبل الإهانة عادي أو للضعيف اللي مايعرفش ياخد حقه.. حلو برضه كلمتين يهونوا عليه قلة حيلته.

لكن أنا لو هعلم ابني، هعلمه ما يسمحش لحد يهينه، وقليل الأدب يتربى، أو معاك تحديدا يحترم نفسه.

ومش يسمع شتيمته ويسكت ويجيلي مقهور علشان معرفش يرد!

وإن كلمة شكرا أقل حاجة ممكن تتقدم للي عملنا خدمة واللي مابيقولهاش قليل الذوق.. وإن اللي بيقدر خدمتك ليه هيخليك تخدمه بعنيك بعد كدة.

وان اللي بيحتاج دعم وكلام طيب يسمعه ده بيفكرنا ناخد ثواب لأن الكلمة الطيبة صدقة.

* كان ممكن أشير الفيديو للتوضيح لكني ما بشيرش غير اللي يستحق.