جلست مع شقيقتها لتشكو لها حالها قائلة:- شوفتى بنتى وعمايلها .ردت عليها شقيقتها قائلة: خير..عملت إيه دى نسمة؟.
- ثالث عريس يجيلها وترفضه.. هى ناسية أنها مُطلقة وفرصتها فى الزواج تانى أصبحت محدودة.
- ليه بتقولى كده.. دلؤتى نصيبها يجيلها بإذن الله.
- ونِعم بالله بس لغاية إمتى هتفضل ترفض؟؟؟؟.
- أكيد عندها أسباب أنتِ عارفة بنتك دماغ ومش سهلة.
-أحكيلك.. أول عريس رفضته عشان أكبر منها ب25 سنة ده غير أنها رفضت تكون زوجة ثانية.
- ياخبر زوجة تانية!!!.
- مالها يا اختى الزوجة الثانية ..عيبها إيه!!! هى مش هتتزوج راجل وهيكون ليها شقة مستقلة تبقى هى مالها!!
وبعدين زوجته الأولى كانت معاه فى الغربة ولما تعبت هناك نزلها هى والعيال وهو بقى مش عايز يكون هناك لوحده.. هى بقى اللى طالع عليها أنه مش أصيل لأنه هيترك زوجته المريضة بالعيال وهيسافر.. وأنه ماكنش واخدها مريضة عشان يرجعها كده وكمان يتزوج عليها وأنه لو عنده أصل يسيب الغربة وييجى يشتغل هنا بدل ما يسيب زوجته فى ظروفها دى تاخد بالها من ولاده لوحدها وهو يروح يعيش حياته ده غير أن شغله هنا محفوظ وأنه مش معقول بعد العمر اللى قضاه فى الغربة لسه ماآمنش مستقبل عياله ولا هو طمع وأنانية وخلاص. وقالت أنها مش ممكن تكون السبب فى تعاسة واحدة تانية.. فالعريس لما عرف سبب رفضها قالها روحى لزوجتى الأولى واسأليها وهى نفسها موافقة.
- وكان ردها إيه؟؟
- قالت أنها مش وقحة عشان تعمل كده ورفضته.
- طيب ماهى كده ليها وجهة نظر برضه وبصراحة عندها حق.
- عندها حق إزاى إذا كان العريس اللى رفضته تزوج بنت أصغر منها وماسبقش ليها الزواج كمان.
- مش كل البنات يقبلوا باللى قبلته العروس الجديد وبنتك عملت عين العقل.. طيب والعريس التانى؟.
-رفضته عشان قال إيه لسه ماطلقش زوجته وأنه لسه فيه بينهم محاكم وقضايا ورفضته أكتر لما عرفت أنه سبب طلاقه من زوجته لأن بعد سنتين زواج أكتشف عدم قدرتها على الإنجاب.. وقعدت تدينى فى خطب ومواعظ وبأن المفروض كان وقف جنبها فى محنتها وأنه مهما يكون مشتاق للإنجاب مش هيكون كاشتياقها لإن غريزة الأمومة عند المرأة أكنر وده الحلم اللى أى بنت بتحلمه من وهى لسه صغيرة أنها تكون أم.. ده غير أن بدل ما الناس يدوروا له على عروسه وهو لسه ماطلقش زوجته المفروض كانوا يصلحوا بينهم.
- طيب وهى مالها بالقصص دى؟.
- بتقول مش معقول ارتبط بواحد لمجرد أنه عايز يخلف وكأنه ضامن نفسه أو ضامن العروسة الجديدة.. يروح يشوف له واحدة غيرى تقبل تتجوز واحد لسه زوجته على ذمته.
- برضه عندها حق ماهى اللى هتتجوز ولازم تكون مقتنعة.
- قال مقتنعة قال.. أهو بعدها مفيش بأسبوع كان متزوج واحدة لسه متخرجة من الجامعة وعمرها ماارتبطت ولا حتى بخطوبة وقعد فى شقته القديمة وعلى عفش زوجته الأولى كمان والعروسة الجديدة ماجبتش أى حاجة.
- طيب والعريس الثالث؟.
- اسكتى يا أختى على اللى عملته فى الوسيط اللى كانت جايباه.
- عملت إيه؟.
-هى طبعاً بتسأل الوسيط عن ظروفه وكعادتها بدأت" هو طلق زوجته ليه؟ وخصوصاً أن عنده بنت صغيرة؟"
قالت لها" أنه ماحصلش تفاهم بينهم وبصراحة أبوه كان هو السبب الله يرحمه بقى كان على طول بيدخل فى حياتهم"
قالت لها"طيب وبما أن سبب المشاكل انتهى ليه مايرجعش طليقته وبنته تتربى فى وسطهم".
الست بصراحة استغربت وقالت لها" أنتِ بتقولى إيه؟؟؟!!!".
"بقول أن أم بنته أولى بيه على الأقل ترجع شقتها وترجع فرشها المتكوم فى بيت أبوها والبنت تتربى بين أب وأم ويفرحها ويفرح أهلها.. ده غير أنهم عارفين بعض وواخدين على بعض وأكيد هيحاولوا يحافظوا على البيت".
الست ردت عليها بغيظ وقالت لها"وأنتِ مالك".
بنتى بقى أديتهوملها" مالى إزاى؟؟ أنا حقيقى مستغربة من الناس ..ليه مابيحاولوش يصلحوا بين الزوج وطليقته وخصوصاً لو كان السبب تافه وممكن يعدى بشوية تنازلات بسيطة هو الزواج بالساهل كده عشان الزوج يبدله كل شوية هى أكله لو ماعجبتوش يشوف غيرها وبعدين هو مفكر الجديدة هتكون مختلفة عن الأولى؟؟ وياترى بقى بيصرف على بنته ولا بيسيب غيره يصرف عليها؟ وازاى أصلاً يقبل أن بنته تبقى بعيده عنه ولو كان قريب منها يعنى فرصة رؤية طليقته محتملة وفى الآخر القديمة تحلى.. قوليله يرجع لطليقته بدل ماتدوريله على عروسة".
شوفتى بقى ليا حق أتفرس ولا لأ.
- ليه تتفرسى.. بنتك بتفكر صح.
- يا اختى ماعدتش فيه حاجة مضمونة تلاقى اللى بيصلى ومتربى فى المسجد بيسرق زوجته ويفضحها ويرميها.. واللى مابيركعهاش متقى الله فى زوجته.. ولو فضلت تحسبها بالمسطرة كده مش هنخلص.. أنتِ ناسية أنها وافقت على الزواج قبل كده من واحد كان بالنسبة لها على الفرازة وشوفى عمل فيها إيه وطلقها بعد كام شهر زواج وبالمقابل كل اللى رفضتهم زمان حاطين زوجاتهم جوه عينيهم.
- اه والله عندك حق دى حتى الزوجة التانية دلؤتى بتاخد حقها تالت ومتلت.
- طيب قوليها حاجة .. عقليها نفسى اطمن عليها فى بيت عدلها قبل ما يحصلى حاجة.
- خلاص يا أختى لما يكون فيه عريس جديد كلمينى بس وأنا هتكلم معها.
وتركتها وانصرفت على أمل أن تتزوج ابنتها قريباً.
سؤال جانبىـــــــــــــــــــــــ
* متى تقبلين أن تكونى زوجة ثانية؟ (لغير المتزوجات)
* هل توافقين على زواج زوجك من أخرى ؟ ولماذا؟ (للزوجات).
* متى تلجأ للزواج مرة أخرى؟ (للرجال).
* متى تنصح المرأة أن تكون زوجة تانية؟ (للجميع).
هناك 23 تعليقًا:
السلام عليكم الا ول مهو الاهل لو بيعملوا بحديث الرسول الكريم ( اذا جاءكم من ترضون دينه وخلقه فزوجوه ) وحطي تحت خلقه دي خطوط كتيره يعني مش لازم يكون بدقن وجلابيه قصيره ومش لازم يكون ظاهره مؤدب وشيك الخلق حاجه بااعرف من تاريخ البني ادم وعيلته وكيف يعيشون ****وبالنسبه لسؤالك متي تلجا للزوجه التانيه ؟ الاجابه حينما لاتقوم الزوجه الاولي بواجباتها علي اكمل وجه ويكون لدينا اطفال من باب الحفاظ عليهم احتفظ بالاولي واتزوج الثانيه ****وانصح المراه ان تكون زوجه تانيه حينما تجد رجلا علي خلق وتعلم من تاريخه كما قلت سابقا انه لن يضيعها
الزواج مرة تانية إن كان فيه زواج مرة أولى أًصلاً:)
وان كان فيه مرة أولى لو حدث وأن توفيت الزوجة الاولى
الزواج مرة ثانية للمرأة إذا كان هناك الشخص المناسب
* متى تلجأ للزواج مرة أخرى؟
في حالة واحدة فقط، هي وفاة الزوجة لا قدر الله.. وهذا مجرد احتمال، أما لو حدث اضطرارا فسيكون لها بيت مستقل ولن تعيش مع بناتي في بيت واحد؛ لأني لا أستطيع أن أسبب لهم الألم النفسي برؤية امرأة أخرى في موضع أمهم.. فالأطفال لا يفهمون ولن يقدروا احتياجات الكبار.
* متى تنصح المرأة أن تكون زوجة تانية؟
عندما تكون متأكدة من أن الزوجة الأولى تقبل هذا بلا جرح أو ألم نفسي أو قهر... وأشك لأقصى حد في وجود هذه الحالة... ربما توجد لكني لم أرها بعد!!!!
تحياتي أختي موناليزا على قالب الطرح الجذاب.
السلام عليكم
الزواج بالنسبه للرجل مسؤولية كبيرة معنوية ومادية وعلى كل المستويات سواء في الأولى أو الثانية.
لذلك فلا أظن أن هناك رجل عاقل وسوي يدخل نفسه في دوامة الزواج الثاني إلا إذا كانت لديه حاجة ملحه لهذا الزواج
وبما أن الله تعالى أحله وبنص صريح في القرآن إذاً فهناك حكمة في تشريعه .
بالنسبة لسؤالك ( متى تلجأ للزواج مرة أخرى؟)
لا أظن إني ممكن ألجأ إلفيه
(متى تنصح المرأة أن تكون زوجة تانية؟)
حينما تجده مناسباً لها وأن تكون هي في حاجه إلى الزواج
السلام عليكم و رحمة الله و بركاته
أختى الكريمة ..
الحياة تتطلب بعض المرونة طالما فى حدود ما أحل الله .. فمن الكبر و العند أن تبقى شروط الفتاة للزواج عند العشرين من عمرها هى هى شروطها عند الخامسة و الثلاثين ( بدون أن تتنازل عن شرط الدين الحقيقى الشامل الجوهر و المظهر..)
إجابة السؤال
×إذا كنت افتقد فى زواجى ما لا استطيع الإستغناء عنه
×إذا كانت لها ظروف خاصة و كان الرجل مناسبا
بارك الله فيك
تحياتى
جزاك الله خيرا اختي علي هذا الموضوع القيم
هذه الفتاه وما فعلته هو الصواب فهي تأبي ان تكون لكونها منفصله ان ترضي باي وضع في زواج جديد فالمطلقة هي اكثر سيدة يحق لها ان تضع شروط اكثر ممن لم يسبق لهن الزواج لانها هي من مرت بتجربه اضافت الي عقلها خبره تجعلها تضع حدود وتقييم لمن يصلح زوج فهي اكثر من تكره ان يبني بيت ويهدم مره اخرى وتكون هي صاحبته فعليها ان تتحرر اما مبدأ الزوجة الثانيه فانا شخصيا ارفض ان اكون هذه الزوجه لاني اذا كنت زوجه اولي لن اتحملها فما لا ارضاه علي نفسي لا ارضاه علي غيري
اما بالنسبه للزوج متي يفكر بالزواج مره اخري يفكر به عندما يكون رجلا حقيقيا ولا ينقصه من الرجولة شئ فليبحث في نفسه اولا هل هو اكمل نقصانه قبل ان يفتش في نقصان زوجته وبعد ان يلتمس لها الاعذار.
الحديث في هذا الموضوع طويل ومؤلم لكن هذه الفتاه في كل رفض رايها اعجبني
بصراحه ردودها عاقله وحد مكوى بالنار ففاهم شعور الاخرى اما المطبطبتيه بتوع هنجيب لك ست ستها كدابين لان اكيد هو كمان عنده مشكله
بخصوص الاسئله
شوفى هاوفق ان زوجى يتجوز زوجه تانيه فى حاله مصائب المسلمين اللى بتحصل وان البنات فى بلاد المسلمين اللى بيتعرض للاغتصاب والاهانه يلجوا بلاد مسلمه وقتها هاوفق انه يتجوز
وغير كده اذا اتجوز هو بمزاجه خلاص هاعمل له ايه يتجوز.... هتضايق طبعا وهشعر بحزن بس مش هاعمل مشاكل لاسباب كتيره اهمها مش هحرم شرع الله واحسن من انه يفعل شئ يغضب الله
وفى النهايه اظن انه مش سهل ان يتزوج زوجى اخرى ولكن لا املك فيه شئ
واسأل الله ألا يحدث وان حدث
اسأل الله الصبر
متي الجا للزواج مره ثانيه؟
سؤال غريب بالنسبه ليه لاني مش عارف حتي اتجوز مره اولي
بس اععتقد دي حالات قليله خالص زي الخلفه او غيره ودي بتبقي مواقف فرديه وصعب اوي يتحط ليها قواعد
طبعا انا اقصد بالخلفه انها لو مش بتخلف وانا عاوز اخلف جدا (مش انا يعني انا بس اي حد يعني؟)وبرده العكس صحيح
* هل توافقين على زواج زوجك من أخرى ؟ ولماذا؟ (للزوجات).
أوافق لو زوجي كان لي كسيدنا محمد والصحابة الكرام
انما الأزواج حاليا الا من هدى ربي
مش بيراعوا زوجة واحده مابالك باتنين
====================
* متى تنصح المرأة أن تكون زوجة تانية؟ (للجميع).
احيانا بنلاقي أرملة شابه تعول أبناء أو بنات وبينبذها المجتمع خوفا منها
دي لو تزوجت رجل ملتزم يراعي الله في زوجته الاولى والثانية لم لا؟
الحالة دي حصلت أدام عيني زوجة مريضة زوجت زوجها لصديقتها الأرملة التي تعول ابنتان وتزوجت معها في البيت و انجبت ابنه صغيرة وما شاء الله البيت كله حب ووئام
العدل بين الزوجات أساس الموضوع كله
حتفضلي ورانا بالأسئلة كده دايما؟؟؟
ربي يخليكي وتسألي براحتك
ههههههههههههههه
عجبتني اوي العروسه في كل تصرفتها وردودها
والاسئله ماينفعش حد يجاوب عليها علشان بتظل الاجوبه نظريات الا ان يضع القدر اي شخص في نفس الموقف
يعني ممكن زوج يقول لك لالالالا مش هتجوز علي مراتي ابدا وتلاقي الظروف حطته انه يتجوز علي مراته وكمان يخبي عليها
والبنات تفضل تققول لك لا مااتجوزش راجل متزوج ابدا لحد ماتدخل في سن الاربعين وتلا قيها غيرت نظرتها
النفس البشريه ماتقدريش تحكميها
لكن في ثوابت نقدر نتكلم عليها
يعني في مجتمعات التعدد فيها عادي جدا وتلاقي الزوجات عايشين مع بعض والاولاد ماتعرفيش مين ابن انهي زوجه
وفي مجتمعات يعتبر الزواج التاني فيها كارثه اجتماعيه تهدد الاسرة
وكله بيتحجج بالشرع مع ان الشرع وضع ضوابط شديده للزواج الثاني
مشكله هتفضل ليوم الدين
المهم ان الرجل والمراه يتقوا الله في اختيارتهم
السلام عليكم و رحمة الله و بركاته
من ينظر الى الواقع و مآسيه يكره و ينفر الزواج من أصله
تغيرت كل المفاهيم
عوض البناء لتكوين أسرة تسودها المحبة و الوئام ..... أصبح المد و الجزر و هذا كله لغياب حد أدنى من الوعي
طغى التشبت بالقشور و أصبح المظهر و الكسب هدف في حد ذاته
أمام كل هذا لا واحدة
و لا ثانية
بل حتى نصف "لا"
بدون وجع دماغ انصرف الى حالي و إن وجدت ما أطمأن اليه و نتعاون معا على
التكوين أهلا وسهلا و إلا بلاش
آه نسيت مادام الكل يتدخل فلا حل
و ما دام الولد أو البنت لم تفرض جدارتها و تقنع فأيضا لا
و لننظر عدد الزيجات الأجنبية الناجحة
حينها سنعيد النظر حتما في كل شيءا يخص الموضوع
السلام عليكم
أنا بالنسبة لي معرفش اقسم قلبي نصين وماقدرش أتجوز إلا واحدة
السلام عليكم ورحمة الله وبركاته
عندما شرع الإسلام الزواج بثانية وثالثة وبالرابعة..وضع قواعد تشريعية وشروط
محكمة....
وليس الأمر كما تظهره دائماً الأفلام والمسلسلات....
أشكرك على هذا الطرح الموضوعى
ما دام ا لامر يدخل فى نظاق الشرع فالزواج والطلاق مباح حتى وبدون اسباب
ليس الطلاق وصمة ولا المتزوج باخرى مجرم
ما بثة الاعلام فى العقول هو ما رسخ هذه المفاهيم فى الاذهان
بارك الله فيكم
كل عام انتم بخير
والله هو فيه سؤال جوهري لم يتم طرحه في الأسئلة اللي حضرتك طرحتها وهو كالاتي أو كالتالي :
لماذا لا يتزوج الشاب أو الرجل الذي لم يتزوج من قبل . بمعنى لم يسبق له الزواج .
اعتقد انه سؤال جوهري ومحوري ونقطة ارتكاز في مجتمعنا العربي الحالي . كان في عصر الرسول واللى بلاش عصر الرسول كان في الجاهلية وبعد الإسلام حتى في عصور متأخرة في القرن الثالث والرابع والخامس الهجري . كانت النساء تنكح من رجال لم يسبق لهم الزواج وهذا من شريعة الله ومن سنن النبوية الكريمة . اشمعن يعني مسكوا في جميع السنن وسابوا هذه السنة . طبعاً الجواب لأنه لا يوجد تطبيق صحيح للسنة ولا يوجد فهم صحيح أيضاً للسنة .
المهم :
تقولي متى تلجأ إلى الزوجة الثانية ،، عندما اطلق أو تموت الزوجة الأولى وتكون الأسباب شرعية . .. لأنه مفيش راجل عاقل في هذا الزمن الغابر الذي في الفتاة أو المرأة لا تعرف ما لها وما عليها ،، حتى أهلها لم يعرفوها ولم ينشئنهن التنشئة السليمة الصحيحة . إلا قله وهم أناس ابعد ما يكونوا عن الالتزام بالشريعة شكلاً ولكنهم يكونوا اقرب إلى المحافظة العربية شكلاً وموضوعاً تجدهم يحجبون نسائهم وينقبونهم ورجالهم لا يصلون مثلاً أو لا يؤدون الفرائض كاملة . لكنهم يعلمون أين الشرع ويعلمون أين الحمية ويعلمون أين الغيرة ويعلمون أين الشرف والكرامة .. وهؤلاء يطلق عليهم المحافظون ( واحياناً من المتحررين يطلق عليهم الرجعيون ) مع الأسف الشديد .
المهم :
السؤال الثاني : والله لا انصح الرجل لا المرأة ان يتزوج من امرأة ثانية حتى ولو كانت زوجته الأولى مطلعا عنيه .. فالنساء ينطبق عليهم المثل العربي القائل : " كالمستغيث من الرمضاء بالنار " ، فالشرع يأمرنا بالصبر ولعلى تلك الزوجة تدخله الجنة بصبره عليها وتحمله سوء خلقها كما قل لنا الله سبحانه وتعالى ورسوله وشريعته السمحاء .
أما عن أسباب تلك الفتاة التي ترفض الزواج من هؤلاء الرجال الثلاثة فهي أسباب وجهية ومنطقية ولكنها من وجهة نظرها التي تنظر إلى الأمور من منطلق عصري وتحاول ان توافق بينه وبين الشرع والعاطفة وراحة البال . وبهذا فهي خيالية وتطلب المستحيل وان شاء الله سوف تجلس عمرها كله تبحث عن الأضلاع الثلاث للمثلث الذهبي الوهمي الذي تبحث عنه ... وسوف ينطبق عليها قول الشاعر العربي :
صبرنا إلى أن ملَّ من صبرنا الصبر
وقلنا: غدا أو بعده ينجلي الأمر
فكان غـد عـاما، ولـو مـدّ حبله
فقد ينطوي في جوف هذا الغد الدهر
وقـلنا: عسى أن يدرك الحقَّ أهلُه
فصاحت (عسى) من (لا) و(لا) طعمها مر
ومـاذا عـلينا بعد نار مـرجل
مـن الغيظ والإهمال يغلي به الصدر
سدد بطول الصبر منا صمامه
فزادت عليه النار، فانفجر القِدْر
* متى تلجأ للزواج مرة أخرى؟ (للرجال).
بصراحة متهيأ لي ماحدش هيقدر يلجأ للخيار ده ,
ببساطة جدا لأن ما حدش عارف يتجوز الأولى علشان يتجوز الثانية !!
اولا احييكي على الموضوع بس كنت عايز الفت نظرك لحاجه الوضع اتغير عن زمان مع قوانين المراه الحديده دلوقتي الراجل لو طلق بيخسر شقى عمره العفش وكمان المؤخر وبعدها النفقه ولو مخلفه يبقى كمان شقه ونفقه للاطفال اللي مش هيعرف يربيهم لان القانون بيقول هي اللي تربيهم معناها انه هيخسر كل حاجه فلوسه وشقته وعياله وزوجته تخيلي اللي يضحي بكل ده عشان خاطر ايه اكيد لازم حاجه تستاهل وحاجه مش ليها علاج وانا عن نفسي ماشي في الزواج الثاني وخسرت حوالي 120 الف وبنت شوفتها من حوالي سنه ونصف صحيح ما اخترتش اسمها ولا فاكر شكلها بس ده مش اختياري ده اختيار امها اللي خرجت وابوها سخنها على مفيش ورفعت 5 قواضي والموضوع كان اسهل من كده بكتير في الاخير مفيش راجل بيحب يطلق والحل ده بيبقى مجبر عليه من ساوكها واعمالها اما ممكن يجمع ما بين اتنين لو في سعه في المال وقرف من الاولى والا هيجيب وجع الدماغ لنفسه ليه
عفواً
تعقيباً على تعليقي انا كنت اقصد زواج الشباب البكر من نساء سبق لهم الزواج من قبل
هو ينفع نقول رأينا فى شئ تم تشريعه فى القرأن كمان
موضوع حلو أوى
انا عن نفسى مقبلش انى أكون زوجه تانيه ولا اوافق ان زوجى يتجوز عليا ومش تعنت بس انا من النوع الغيور
اه هو حقه بس انا مش من النوع اللى ممكن تستحمل ده ..!
صباح الخير ياموناليزا..
بوست رائع كالعادة.. انا راجل بس برفض الزواج الثاني ودايما بدخل في نقاشات مع رجالة بيقولوا انه سنة و انا اقولهم ان الاصل مش التعدد بل التعدد للضرورة ومش حرام بس التعدد مالوش فضل لو مافيش داعي..لانه في الحالة د بيكون يحمل بذور الغدر وعدم الوفاء للزوجة لو بتعمل كل اللي عليها واللي يفكر في الحالة دي يتزوج تاني يبقى يااما قادر يااما.....
خالص تحياتي
موجة
احمد
نورتونى جميعا
وأسعدتونى بمشاركتم
وفى انتظاركم دائما
مواضيعك اكتر من جميلة وشيقة يا موناليزا...طبعا لكل شخص راية الخاص به لكن انا لا اتصور نفسى زوجة ثانية اى كانت الاسباب ولا استطيع تحمل ذلك عندما اجد اننى ينقصنى الكتير او لا اقوم بواجباتى ع اكمل وجه سوف اطلب من زوجى ان بتزوج بغيرى ولكن ان بتركنى اولا وذلك ليس ظلمالاننى فى نظرة لا اقوم بواجباتى ....وموضوعك سوف يترك اكثر من رايى ع خلاف تام لان كلا منا له وجهته الخاصة فى هذا الموضوع خصيصا ....وشكرا لكى موناليزا كثيرا ع موضوعك هذا
إرسال تعليق