يلفت نظرى حين خروجى فى الصباح الباكر ومرورى فى الطريق على قهوة شعبية وجود رجال و شباب فى أتم الصحة يجلسون هناك وأتسائل بتعجب واستنكار هل هذا الرجل الكبير فى السن خرج من بيته الساعة الثامنة صباحاً ليحجز مكان فى القهوة أم أن هناك أسباباً أخرى!!
هل استيقظ من نومه خصيصاً لهذه المهمة ؟ هل هذه رسالته فى الحياة؟
ووقتها أقاوم فضولى لكى لا أذهب لسؤالهم : أنتوا بتعملوا إيه ع الصبح كده فى المكان ده؟؟
نصيحة: لو مش لاقى حاجة تعملها تطوع فى أى عمل خيرى وأنت هتحس بقيمة الحياة.. غيرك أكيد محتاج خبرتك فى الحياة.. غيرك محتاج وقتك ومجهودك.
- اتعلم حاجة جديدة مهما كان عمرك.
- اقعد مع أهل بيتك واسمعهم أو اتكلم معاهم وكون معاهم ذكريات.
- اتعلم تجويد علشان تقرأ صح فى كتاب الله.
.jpg)
ـــــــــــــــــــــــ
بماذ تنصح هذه الفئة؟
-------------------------
على الهامش:
ــــــــــــــــــــــ
يتوافر كتاب "خبايا نسائية" فى مركز The Workshops
6شارع 4 المعادي / القاهرة
ولمزيد من المتابعة ادخل على صفحة الكتاب
على الفيس بوك من هنا
هناك 12 تعليقًا:
معاكي حق والله
المشهد ده اساسي في مصر وللاسف غير مقتصر علي سن معين
ياااااااااااااااارب يقفلوا كل القهاوي اللي فى البلد ههههههههه
تحيـــــــــاتي
كانت هنا ورحلت
Asmaa Fathy
كنت سمعت شيخ محرم القهاوى على اساس ان القعدة دى بتخليه بيبص للى رايح واللى جاى فبياذى الناس عندنا فى بلدنا قهوة عملوا السواقين وكل واحد يستنى دوره عليها بس بعد كده بقت زى اللى بتحكى عنها
انصحهم بايه؟
ولا حاجة لانى هسمع ردود تحرق الدم انا ممكن انفجر فى وش الحكومات اللى عملت فينا كده
نصيحة في محلها ...
القضية يا اختي .. النصائح الحلوة كثير جدا اكثر مما نتصور ... لكن القضية الازلية هي توجيه الناس التوجيه الصح ... مش اننا ننصحهم وبس ان احنا نوفرلهم ازاي يطبقوا هذه النصائح ... يعني حضرتك بطريقة او باخري تقدري تعرفي ان مفيش مسجد بيكون مفتوح إلا أوقات الصلاة وبس يعني انا لو رايح مشوار ولسة قدامي وقت مش هلاقي غير القهوة او تسكح في الشوارع لحد ما الوقت يعدي ... تقدري تعرفي ان الاندية الثقافية والدينية مش موجودة ولو موجودة مهياش متاحة في كل وقت ... قعدة البيت مش حلوة لكل الناس ... ومش كل الناس تقدر تعمل ده من غير تشجيع وتحفيز ...
اسف علي الازعاج
فعلا والله عندك حق انا بيستفزنى جدا الموضوع ده
بغض النظر عن ان بابا الله يرحمه عمره ماقعد على قهوه وكبرت على انى احترم الرجل اللى مش بيقعد على قهوه بسببه انما فعلا حاجه مستفزه لما تلاقى رجل فى ميعاد الشغل وقاعد على القهوه !!!!
تحياتى
شكرا لقويم الإحساس و جميل التوجّه !
((هؤلاء يعيشون بيننا )) مقطع يثير فيك أكثر من سؤال ؟ هل أنت حقّا تمارس إنسانيتك كما يجب ؟ هل أنت تبيت راضي الضمير ؟ هل أنت على استقامة كاملة في دينك ؟؟؟لا تتردّدوا ،، شاهدوا ما يؤلمنا لكن يصحّينا !!!/
http://zaman-jamil.blogspot.com/
السلام عليكم ورحمة الله وبركاته :)
أولاً : مبارك عليكم الكتاب موناليزا وبالتوفيق ومن نجاح لنجاح دائم :)
ثانياً عن الموضوع بقى .. الظاهرة دي قديمة جداً من واحنا صغيرين وفيه ناس بالشكل ده .. فيه ناس بتبقى قاعدة من غير شغل .. وناس بتبقى قاعدة بتقول منتظرين باب رزق يجيلنا .. معرفش إزاي هييجي وهما قاعدين على القهوة .. النصيحة الشفوية في الحالات اللي زي دي نتيجتها بتكون ضعيفة جداً لكن قد تأتي ثمار النصيحة بشكل عملي .. يعني مثلاً تاخد واحد من اللي قاعدين على القهوة دول تطلب مساعدته - وإن كنت قادر على دفع راتب له (بيومية) - تاخده في عمل خيري وتدفع له هو أجر على اليوم او العمل اللي هيساعدك فيه .. مجرد إنه بيشتغل في أي عمل حتى لو هو عمل تطوعي بالنسبة لك وهو أخد عليه أجر منك .. هيكون تكوّن عنده شعور نفسي معيّن إنه هيكره العودة للجلوس على القهوة لما يلاقي عنده القدرة على السعي والعمل وإن فيه ناس محتاجاه وشايفين إن له فايدة .. بعض الناس اللي على القهوة بيكون شايف نفسه بلا قيمة وبلا فائدة فبيستسهل الجلوس على القهوة بدلاً من إذلال نفسه- من وجهة نظرة - بدون فايدة .. لكن إذا أشعرته بالقيمة دي هيتكسف من إنه يرجع للإنسان اللي كان عليه قبل كده
دائماً موضوعاتك هادفة رب يجزيكي الخير :)
انصحهم بإيه!!!!
اممممممممم سؤال صعب.. انصحهم بغض البصر وتجنب الذنوب اعتقد ان الحاجتين دول هيخلوهم ميقعدوش عالقهوة تاني
اسمحيلي أشارك بتوضيح (مش تبرير) علشان نعرف الناس دي بتعمل إيه ؟؟ مع إن الرد ده عايز له بوست لوحده بس هاحاول أختصر .
- قعدة القهوة .. زي ما فيه ناس متعودة تبدأ يومها بأنها تشرب نيسكافيه أو شاي بلبن أو تاخد معلقة عسل ع الريق ... الخ .. فيه ناس تانية متعودة برضه تاخد الاصطباحة بتاعتها ع القهوة كل يوم الصبح .. سواء بيشربوا شاي أو شاي بحليب أو قهوة أو معسل وغيرها من المشاريب ، اليوم بالنسبة لهم ما بيبدأش إلا بعد ما يصطبحوا ع القهوة .. فيه منهم اللي بيفطر ع القهوة وبعدين يحبس بكوباية الشاي .. وفيه اللي بيشرب فنجان القهوة مع السيجارة وهو بيقرا الجرنان .. وفيه اللي بيتفرج ع الرايح والجاي لحد أما يفوق .. .. فيه صنايعي بيقابل الصبيان بتوعه ع القهوة وبعد ما يجمعهم يروحوا الشغل سوا .. وفيه أصحاب عربيات وتاكسيات وتكاتك بيقعدوا ع القهوة يتابعوا عربياتهم وأشغالهم .. وفيه صنايعية ما تعرفيش تجيبيهم إلا من ع القهوة .. الموضوع بالنسبة لهم "طقس يومي" ما ينفعش يعملوه في بيوتهم وما يحسوش بيه إلا ع القهوة وأي حد عارفهم بيحذر أنه يكلم حد فيهم لسه ما اصطبحش ، لأنه ما بيبقاش شايف قدامه .. كمان ممكن تلاقي ناس وراها مصالح وأشغال في مكان قريب وجت بدري أو هاتقابل ناس ويروحوا مشوار سوا أو أو أو ..
- الموضوع قد يكون مستهجن ومثار انتقاد ، خاصة مع تدني المستوى الأخلاقي بصورة ملفتة ونظرة البعض المشمئزة من رواد المقاهي من ناحية أخرى .. لكن "زباين" القهوة بتوع الصبح بالذات بيبدأوا يومهم ع القهوة ودي ساعة رزق واستفتاح فتلاقي الواحد منهم في حالة ومع نفسه وفي منتهى الأدب ، يعني تلاقيه ما يشتمش ولا يسب الدين إلا بعد ما يصطبح .. زي ما تقولي كده دي بداية اليوم بالنسبة لهم .. يعني لو الاصطباحة تمام تلاقي مزاجه ميت فل وأربعتاشر طول اليوم لو العكس تلاقيه مجرم !
- فكرتيني بموقف .. أيام ما كنت باشطب الشقة قبل ما اتجوز جبت اتنين صنايعية المفروض إنهم أساتذة في شغل المصيص (الكرانيش) واتفقنا إن الشغلانة هتاخد منهم تلات أيام .. فات أول يوم والتاني والبهوات بييجوا العصر يا دوب يفطروا (لأنهم بيبقوا لسه صاحيين) ويشربوا الشاي ويروحوا !! .. تالت يوم رحت لابس لهم وش الكلب وقلبت عليهم !! فـ البواب قال لي أنهم بيبقوا عاوزين يصطبحوا (وهنا الاصطباحة معناها أنهم يشربوا حشيش) علشان يعرفوا يشتغلوا بس مكسوفين مني !! قلت له خلليهم يا عم يصطبحوا بس يخلصوا .. وفعلاً .. اصطبحوا من هنا وبقوا يجروا زي الخيل في الشقة !! وفي يوم ونص كانوا مخلصين الشغلانة !!
- بالنسبة للنصيحة : انصحكم انتم -- لمصلحتكم -- ما تقربوش نهائياً من أي صنايعي لسه ما اصطبحش !!
أسماء فتحى
ـــــــــــــ
أهلا بيكِ يا أسماء
مش لدرجة يقفلوها برضه ماهى أكيد تعتبر مكان ترفيهى للكثيرين :)
نورتينى
-------------------------
ريماس
ــــــــــ
أهلا بيكِ ريماس
حتى القهاوى خلوها حرام!
طيب ماهو ممكن يقعد فى الشارع أو يقف فى بلكونة بيته ويبص للى رايح والجاى عادى
طيب انصحيهم هنا وأنا أضمن لك محدش يحرق دمك :)
نورتينى
------------------------
أبو مران
ـــــــــــ
أهلا بيك أستاذ أحمد
متفقة معاك جداً على فكرة
ولذلك إذا كان كلامى للى بيقعدوا على القهوة عموما فهو للى بيقعدوا عليها من الساعة 7 الصبح
بجد بيعملوا ايه؟
هو فين الإزعاج !
يسعدنا دوام التواصل
---------------------------
فافى
ــــــــ
أهلا بيكِ يا فافى
وخصوصاً من الصبح بدرى!!
ده لو وراك شغل مش هتصحى بدرى كده :)
نورتينى
-----------------------
منجى باكير
ــــــــــــ
أهلا بيك أستاذ منجى
شكراً لتعليقك
عن مقطع الفيديو فعذراً لم يعمل عندى
يسعدنا دوام التواصل
------------------------
سكايار
ـــــــــ
وعليكم السلام ورحمة الله وبركاته
أهلا بيك أستاذ خالد
أولا:الله يبارك فيك :) أشكرك جدا
ثانيا: تعليقك عجبنى جداً
فيه أفكار لحلول وكمان تفسير منطقى لتفكير الأشخاص
ربنا يكرمك بجد
وأشكرك جداً لرأيك ولتعليقك
يسعدنا دوام التواصل
----------------------
اى73
ـــــــــ
أهلا أهلا يا مِس :)
لأ خالص هيقعدوا عادى
ماهم ممكن يلعبوا طاولة أو دومينو ومايلفتش نظرهم الشارع أصلاً :)
نورتينى
باشا
ــــــــ
أهلا بيك يافندم
حقيقى مشكور جدا لتعليقك ولهذا التوضيح
أول مرة آخد بالى من كده فعلاً
حلوة نصيحتك لينا ومحل تقدير فعلا :)
أنا عن نفسى هاخد بيها
أشكرك جداً لتعليقاتك الذى تضيف للموضوع الكثير
فى انتظاركم دائما
للأسف الوقت الذى أعلى الله تعالى شأنه فى كتابهحين أقسم بالعصر الليل و النهار وغيرها ، استهان به كثير من المسلمين ،يقول ابن القيم :كل نفس من أنفاس العمر جوهرة نفيسة لاحظ لها يمكن أن يشترى بها كنز من كنوز الجنة ، وقال تضييع الوقت أشد من الموت لأن الذى يموت يخسر دنياه فقط أما الذى يضيع وقته فيخسر دنياه و آخرته...اللهم ارزقنا الإخلاص و الصدق فى القول و العمل
مصطفى الشريف
ــــــــــــــــ
أهلا بيك أستاذ مصطفى
وأيضا قول النبى صلى الله عليه وسلم "نعمتان مغبون فيهما كثير من الناس الصحة والفراغ"
أشكرك لتعليقك
ويسعدنا دوام التواصل
إرسال تعليق