من كتاباتى(3)

1- لا سامحت ولا نسيت أنا بس حاولت أعيش.

--------------------------

2- يوما ما سيقف أقاربنا خارج الغرفة التى نحتضر فيها ويستعيدون ذكرياتهم معنا... لذلك علينا الاستعداد من الآن بترك ذكريات طيبة لدى كل من يتعامل معنا.

-----------------------

3- الكتابة تنظف ما بداخل الإنسان فتفريغ الشحنة مهما كان نوعها بالكتابة علاج فعال لجميع الحالات.. عليكم بها دائماً.

----------------------

4- إن الحقيقة قاسية ولكنها أرحم من الحياة فى الخداع.

---------------------

5- من الغباء أن تُكذِب المرأة إحساسها.

---------------------------

6- حتى لو مابتعرفوش تقولوا حاجة فى المناسبات الحزينة.. وجودكم ومشاركتكم ولو بكلمة بسيطة هتفرق مع المصاب جدا يكفى احساسه انه مهم عند حد.. وبعد كده عمره ماهينسى وقفتكم معاه ده غير الثواب الكبير.

--------------------------

7- بحب أوى أتفرج على حكايات الحب اللى البطل والبطلة مايعرفوش فيها أنهم بيحبوا بعض.

---------------------

8- الحق لازم يرجع لصحابه مهما اللى سرقه عاش فى كذبة إنه مِلكُه.

---------------------

9- الحنين إلى الله أسمى معانى الحب.

-------------------

10- الملابس الشيك لا تدل بالضرورة على احترام من يرتديها ولكنها تدل على أنه يمتلك أموالاً ..وليس كل صاحب مال محترم.

---------------

11- قبل ما تؤذى عدوك تذكر أنه من مخلوقات الله.

-------------------

12- الإعتياد يقتل الدهشة.

---------------

13- هى الناس اتغيرت كده ليه؟.. سؤال ساذج أوى لأن الناس ماتغيرتش أنت بس اللى ماتعاملتش معاهم قبل كده.

-----------------

14-طعنتنى بكلامك أمس وتأتى اليوم تحيينى بدعابتك.. كيف أستجيب وابتسم وسكينك مازال مغروساً قى قلبى!!.

------------

15- فيه كلمة ممكن تحيي قلوب ميتة وفيه كلمة ممكن تقتل قلوب حية.

-----------------------

16- مايبقاش ابتلاء إلا لو جاء فى حاجة غالية.

------------------

17- محدش بيختار نصيبه.

----------------

18- حذار أن تتخذ قرارات مصيرية فى لحظة ضعف أو فى لحظة غضب.

-------------------

19- هو ليه بنقابل الناس الغلط فى الوقت الصح.

------------

20- وراء كل امرأة ناجحة رجل عظيم.

--------------

21-ما أجمل أن يكون الزوج هو الصديق والحبيب.

----------------

22- ما أجمل أن تتزوج المرأة من صديقها المفضل.

--------------

23- سألتنى نفسى ليه مابتعصيش ربنا رغم ان سبل المعصية متاحة.. فقلت لها: أنى أخاف الله.

----------------

24-نجاح الممثل يدل على نجاح المؤلف والمخرج.

-----------------

25- قد تختلف المسميات ولكن يبقى المعنى واحد.

-----------------

26- الأشياء لا تكتسب معناها إلا من حاجتنا لها.

-----------------

27- حاجة مستفزة لما حد يتصل بيك مخصوص عشان يعاتبك أنت ليه مابتسألش عليه وفى نفس الوقت مش عاطيك فرصة إنك تدافع عن نفسك لأنه معندوش نيه يصدقك.. وماسألش نفسه إذا كان الطرف الآخر تعبان أو مخنوق أو مش مستحمل عتاب أو كلام من حد.. ليه مابنحطش نفسنا دايماً مكان الآخرين!!!؟.

-------------------

28- تجاهلك للشئ لا ينفى وجوده.

-----------------

29- ما أجمل أن تأتى الأشياء فى وقتها المناسب وما أصعب أن تأتى بعد فوات الآوان وما أقسى ألا تأتى أصلاً.

-------------------

30- ما أجمل وجود أصدقاء حقيقيين فى حياتك يخففوا عنك ما تحمله من أعباء.

-----------------

31- مش شطارة أن الولد يعرف يجيب رقم موبايل البنت.. الشطارة أنه يخليها ترد عليه.

------------------

32- ما أصعب أن تكتم تأوهاتك من الألم حتى لا يسمعها الآخرون و يتهمونك بالضعف.

-----------

33- بلاش تحسبها اوى كده بالقلم والمسطرة لان الدنيا ما بتمشيش على مزاجنا.

---------------

34- مفيش حاجة بتحصل لوحدها.

--------------

35- كل يوم بتصحى فيه من نومك بيتكتبلك فرصة جديدة للتوبة والإستغفار.

-----------------------

36- الحب هو : أن أسعد لسعادته رغم بُعده عنى لأنه لو كان سعيد معايا ماكنش ابتعد.

-------------------------

37- يوجد فرق كبير بين من يحاول أن يسعِد من حوله ومن ينتظر أن يُسعده من حوله.

-----------------------

38- كم أمقت الذين يستغلون وقت ضعفك النفسى واحتياجك للتحدث حتى يسألوك عن أدق التفاصيل وأنت تسترسل فى الحكى وكأنك تفضى مابداخلك لترتاح ولكن ما إن تفوق من تلك الحالة لا تملك سوى أن تسخط عليهم لعدم احترامهم لضعفك ولعبثهم فى مالا يخصهم.

---------------------------

39-ارضى عن حياتك تكن من السعداء.

------------------------------

40- ما أسهل قول النصائح و لكن ما أصعب تنفيذها.

---------------------------------

41- كلنا لا نعرف أى صورة لنا ستضع فى نعينا ..أنا عن نفسى مش عايزة حد يحط صورتى.

------------------------------

42-صعب أنى أراهن على مبادئى وأعطى لعقلى أجازة حتى لو كان غيرى هياخد الفرصة وهينجح.

------------------------------

43-توجد كلمات سمعناها فى حياتنا تعلق فى أذهاننا دون إرادتنا ولذلك انتقى كلماتك لعلها تظل عالقة فى ذهن شخص ما وتؤثر فى حياته.

---------------------------------

44- صمتى عن الردود الفظة مش قلة حيلة ولا ضعف منى لكن لأنى بترفع عن المهاترات.

---------------------------------

45- أفضل وأرقى وظيفة تحصل عليها المرأة من وجهة نظرى هى : أم.

-------------------------------

46- لايدعو أحدكم على نفسه ولايتمنى أن يلحق به بلاء تحسباً فى أخذ ثواب المصاب لأن الإنسان ضعيف وممكن جداً مايقدرش يستحمل الابتلاء اللى هينزل به.. الثواب طبعاً مضمون لكن اللى مش مضمون قدرتك على التحمل.. وممكن بضجرك وسخطك كل الثواب اللى اخدته يروح.. وتذكر دائماً أن اللى على البر شاطر.

------------------------------

47- علمتنى الحياة ان الكلمة الطيبة أرخص هدية ممكن تقدمها لحد.

----------------------------------

48-مش كل خبر تقرأوه تنشروه ..اتأكدوا منه الأول حتى لاتصيبوا قوماً بجهالة فتصبحوا على مافعلتم نادمين.

------------------------------

49- مش فاهمة إيه علاقة غلق الأضواء وإضائة الشموع بالرومانسية!!! إيه الممتع فى جو الظلام والإيحاء بأن الكهرباء قطعت؟؟.

---------------------------

50- أريد أن يكون لى صديق كـ د. رفعت إسماعيل.. وحبيب كـ أدهم صبرى.

-----------------------------

51- ليه قانون بلدنا بيحرم المخدرات ويدين بائعها ومتعاطيها ولا يفعل ذلك مع الخمور؟؟؟؟؟.

------------------------------

52-إذا قررت أن تكتب كلمات على ورقة وتعطيها لشخص ما تأكد بأنه سيعيها وسيحافظ عليها ولن يطلع أحداً عليها.

---------------------------

53-شعور صعب: لما تكون عايز تقول رأيك فى موضوع لكن الكلام مايحضرش فى ذهنك بالطريقة التى تريدها فبالتالى لايصل رأيك بوضوح للطرف الآخر.

--------------------------------

54- ساعات كتير الواحد مابيقاش محتاج حاجة غير حد يطبطب عليه.

------------

55- علمتنى الحياة أن الانتماء يجب أن يكون لقيمة وليس لشخص.