رغبة مكبوتة

إن رغبات الإنسان تتحكم فيه بشكل أو بآخر..
وسأعرض أمثلة خاصة برغبات الزوجين على اعتبار إنها علاقة شاملة بين الرجل والمرأة.
مثال لرغبات المرأة التى يعقبها رفض من الزوج دون سبب واضح سوى "ماليش مزاج":
* عاوزة أزور أهلى.. بقى لى أسبوع ماشوفتهومش.
* عاوزة رصيد لموبايلى.. احتاجت أتصل بيك أبقى أعمل إيه.
* عاوزة أخرج.. أنا بقى لى شهرين ماشوفتش الشارع.
* عاوزة تكييف لغرفة النوم.. هموت من الحر.
* عاوزة غويشة جديدة.. ألبسها فى فرح ابنك.
* عاوزة فستان جديد أروح بيه فرح أخويا.
* عاوزة أتفرج على التليفزيون.. مش جايلى نوم.
* عاوزة آكل آيس كريم.. بقى لى كتير مااكلتش حاجة حلوة ساقعة.
* عاوزة أنام.. مش وقت طلباتك دى خالص.
* عاوزة أتكلم معاك.. لغاية إمتى هتتجاهل وجودى.



أمثلة لرغبات الزوج:
* عاوز شوربة كل يوم على الغدا.. مبعرفش آكل من غيرها.
* حطى ماكياج وبرفان.. عايز أحس أن معايا فى البيت أنثى مش واحد صاحبى.
* عاوز أدخل على الإنترنت.. أنا ليا حياة كاملة هناك.
* عاوز ألعب كمبيوتر.. أنا حر فى وقتى.
*عاوز أشرب سجاير.. اللى مش عاجبه يبعد عن المكان اللى أنا فيه.
*عاوز أفتح الثلاجة ألاقى فيها ميه.. من حقى أشرب ميه ساقعة.
* عاوز البيت يبقى نضيف.. من حقى أرتاح فى بيتى.
*عاوز الشباك يفضل مفتوح.. من حق الشمس تدخل بيتى.
*عاوز المروحة تتقفل وأنا نايم.. مش عايز أصحى ألاقى نفسى جايلى برد.
* عاوزك تزورى ماما وتساعديها فى شغل البيت.. علشان تعرف أنى راجل وليا كلمة عليكِ.
* عاوز أعزم صحابى على الغدا.. وأخرج معاهم وأغير جو.

طبيعى يكون فيه تنازل بين الطرفين على احتياجاتهم ورغباتهم ولكن إذا زاد الشئ عن حده انقلب إلى ضده.. والأمثلة المعروضة قد تظهر بسيطة ولا تستدعى أن نذكرها ولكن أى شئ كبير تكون بدايته صغيرة فالرغبات الصغيرة حينما تتزايد ويتم كبتها سيكون التصرف المصاحب أعنف مما يتخيله الطرف الآخر فالكبت يولد الانفجار وما أبغض قيد الحرية الإجبارى من أجل شريك حياة أنانى لا يهتم بمشاعر ورغبات الطرف الآخر.

فالزوج مثلاً ما المانع إذا مازارت الزوجة أهلها أو لبيت لها طلباتها طالما قدراتك المادية تسمح وما المانع إذا ما قمت معها بالخروج والنزهة قليلاً من آن لآخر لتجددوا حياتكما معاً فهذا سيجدد طاقتها على العطاء داخل المنزل وستراها بشوشة.

والزوجة مثلاً ما المانع إذا ما فعلتى مايريده الزوج أو إذا تركتيه قليلاً ليفعل مايشاء ويخرج مع من يحب ويمارس هواياته فهذا سيخرج ما بداخله من طاقة سلبية وسيعود إليكِ بطاقة إيجابية أنتِ فى أمس الحاجة لها.

وأخيراً : اتركوا الحبل قليلاً حتى لا ينقطع.