الأحد، 25 سبتمبر 2016

من كتاباتي (51)



1-إوعي تهين ابنك أو تسمح لمُدرس يمد إيه عليه؛
 لمجرد أنه ماعملش الواجب أو نقص درجات في الامتحان..
عادي يعني الدنيا ماتهددتش.
شوف أسبابه وحاول تعالجها بهدوء.
وتذكر إن تكوين ذكريات حلوة مع ابنك، وتعليمه خبرات حياتية
 أفضل مليون مرة من تعكير صفو علاقتكما بسبب نقص درجات في امتحان مادة 
لن تفيده شيئا عند الانتهاء من عامه الدراسي.

2- هو مين فهم الرجل إن الست اتخلقت بس علشان تخدمه!

3- "مكان ماحطيتيها هتلاقيها."

ده كان دايما رد أمي عليا وأنا صغيرة لما أسألها على حاجة مش عارفة مكانها
.
ومن يومها اتعودت أحط كل حاجة في مكانها

 علشان لما احتاجها أبقى عارفة ألاقيها فين من غير ما أسأل حد عليها.



4-  الحب من غير ود

محدش هيحس بيه





5- عارف يعني إيه صديق؟

يعني مهما تغيب وترجع بتبقى عارف إن مكانك موجود.

6- ماتبقاش زوج سلبي

لو أمك اشتكت لك من مراتك أو العكس

كن حمامة سلام

مش تسمع وتهز في رأسك وتأيد الكلام وخلاص.





7- الصداقة هي الأبقى.




8- الناس اللي مابيحبوش البكائين في الحب

ادعوا بس أنكم ماتتحطوش في نفس الموقف 

وتكون شخصيتكم وقتها بنفس الهشاشة.





9- السر في الروح

لا في جمال الشخص ولا في قرابة المكان.





10- الفكرة في الزواج إنك تكون مقرر تنبسط أنت وشريك حياتك

أيوة اللي هي ترجمتها يكون بينكم "مودة ورحمة".




11- عزيزي الرجل: صدقني هي مش محتاجة منك

 أكتر من الاهتمام والكلمة الحلوة.




12- هي الفكرة بس إن اللي تقبله على نفسك

إقبله على غيرك..



13- أصلها مش بيعة وشروة

ده تآلف روح وحياة مشتركة.



14- اهتمامك بعيالك ماينفعش تختزله بس في توفير الأكل والشرب.


15- الصمت بداية انتهاء أي علاقة.


16- قبل ماتوجه أي لوم على تقصير شخص ما

إسأل نفسك ياترى هو مقصر ليه؟

ولو مالقتش جواب

إسأله وحاول تعرف أسبابه يمكن تلاقي السبب إنك أنت اللي مقصر مش هو.




17- عزيزي الرجل: إذا توقفت المرأة عن ثرثرتها المعتادة معك،

اعلم إنك تحتاج لشحن رصيدك بداخلها؛


فصمتها - ذاك الذي تتمناه- نذير سوء لمكانتك لديها.




18- في دينا ازعل من أبوك وأمك زي ما أنت عايز

بس اوعى تعاملهم وحش

وهو ده الجهاد.




19- لكل مُدخن سيسألك الله عن كم الأذى الذي تلحقه بالآخرين.


20- أي حاجة طبيعي من الركنة تبوظ.


21- إهمالك ليها ممكن يخليها تعمل مصيبة في نفسها بدافع الانتقام منك.


22- يوم ما تدبل قصاد عينيك

اعرف إنك مقصر معاها.




23- يابيه يوم لما ماتلاقيش كلام تقولهولها

اتكلم معاها عنها.




24- كلما كان الارتفاع شاهقا كان السقوط مدويا.


25- ماتحرمش عيالك من حضنك

(بالمعنى الحرفي للكلمة)




26- بصي طول ما انتي بتعملي شغل البيت

عمر ماحد هيحس انك بتموتي او بتعاني من مشكلة ما.




27- سياسة الأمر الواقع في حاجة تخصك

أفضل كتير من كسر المجاديف.





28- لو حد جالك في لحظة ضعف وحكالك على موقف عايز ياخد فيه قرار

فساعده ينفذ القرار اللي يتفق مع مبادئه مش اللي يتفق مع هواك ورؤيتك أنت

لأن لما لحظة الضعف تعدي ويكتشف إنك بليته بمصيبة عمره ماهيسامحك.






29- متأجلوش فرحة حد لبكره لإن ممكن مايجيش عليه بكره


30- وحشة أوي في حقك لما تخرج معاك زعلانة وترجع برضه وهي زعلانة.



31- عارف يعني إيه تخرجها؟

يعني تسيبلها ذكرى حلوة تاخدها معاها وهي مروحة.







الأربعاء، 21 سبتمبر 2016

من قراءاتي (41)










1- أنهم يذكرون الله ولا يتذكرونه. لو أنهم يفعلون لمنعهم ذلك من الكثير مما يفعلونه.
لحسن كمال

---------

2- عندما لانريد لن تبكينا خيبات الأمل
لسونيا بوماد

------------

3- قد يدعي المرء أنه يسعى وراء الحكمة، أو المال، أو السلطة، ولكن الحقيقة،
 أنه مهما حقق من آمال، فلن يكتمل شعوره بالرضا عن الذات؛
 إلا إذا وجد رفيق روحه.
لباولو كويلو

---------

4- ماتحقق اليوم، كان مجرد خيال وأمنية في الماضي.
لباولو كويلو.

-----------

5- لا يمكنني أن أواجه كلبا، إلا إذا صرت كلبا مثله.
لباولو كويلو

--------------

6- لاتيأس من الاستقامة إن وقع منك ذنب فقد يكون هو آخر ذنب كتب عليك.
لبهاء طاهر

------------

7- قبل أن تشجع على البدايات كان يجب أن تفهم أنك لا تستطيع رسم النهايات.
لبهاء طاهر

---------

8- إن الخطيئة لا تقع إلا في الخفاء.
لإحسان عبدالقدوس

-----------

9- قد تبيض ثياب الحداد وتهترئ، لكن سواد القلب يبقى.


لفيكتور هوجو






الجمعة، 16 سبتمبر 2016

الإحساس باليتم






ماتستغربش لو حست إنها يتيمة رغم إنك عايش معاها في بيت واحد

لو احتاجت تحس بالأمان وأنت معاها تبقى يتيمة

لو كانت محرومة من الحب والحنان والرعاية والاهتمام تبقى يتيمة

لو حست ببخلك معاها وأنت المقتدر ماديا تبقى يتيمة

لو كرهت وجودك معاها في مكان واحد تبقى يتيمة

لو اتمنت موتك حتى لا تُعاقب بالعقوق تبقى يتيمة

اليتم مش مجرد موت أب أو أم


اليتم إحساس بشاعته أفظع لو كانوا عايشين فعلا








الأحد، 11 سبتمبر 2016

ماتطولش الخصام





علمونا زمان "لايهجر المرء أخاه فوق ثلاث ليال

 يعرض هذا ويعرض هذا وخيرهما الذي يبدأ بالسلام"

أعتقد لو كنا طبقنا اللي اتعلمناه

 ماكنش هيكون فيه هجر وقطيعة وفراق وجفاء وبرود في أي علاقة

وخصوصا إن كلما طالت فترة البُعد زاد الجفاء

 وإذا ما عاد الوصال لن يكون بنفس قوة ماكان.










الثلاثاء، 6 سبتمبر 2016

آداب الطريق



يعني ايه الشارع ملكية عامة؟

- يعني ماينفعش تحط حجر قدام المحل بتاعكم علشان محدش يركن قدامك.

- حد ممكن يتكعبل ويقع على وشه يتبهدل-

- ماينفعش ترش ميه برضه علشان قال ايه يجيلك طراوة.

- حد ممكن يتزحلق وضهرة يتكسر-

- ماينفعش ترمي زبالتك من البلكونة ولا من شباك عربيتك

 حتى لو أصلا الشارع مزبلة .

-خليك أنت نضيف-

- ماينفعش تشغل الطريق إلا لو لسبب قهري.











الخميس، 1 سبتمبر 2016

منوعات إسلامية (51)








من صحيح الأحاديث القصار:
ــــــــــــــــــــــــــــــــــــــــــــــــــ
- "لايدخل الجنة عاق، ولا مؤمن بسحر، ولا مدمن خمر، ولا مُكذب بقدر" 
(حديث حسن)

-"لكل شيء حقيقة، وما بلغ عبد حقيقة الإيمان حتى يعلم أن ما أصابه لم يكن ليخطئه، وما أخطأه لم يكن ليصيبه"
 (حديث حسن صحيح)

-" طوبى لمن هُدي إلى الإسلام، وكان عشه كفافا وقنع" 
(حديث حسن صحيح)

-"إن لكل أمة فتنة وفتنة أمتي المال" 
(حديث صحيح)

-"لاتسبوا الأموات فتؤذوا الأحياء"
 (حديث صحيح)