مصدر أكل العيش

 يا ترى بتفاصل الناس في أكل عيشهم علشان مش معاك، ولا مستخسر أجرهم؟

مع إن ما بين البايع والشاري يفتح الله زي ما بيقولوا..

أنت بتتفق مع صاحب الحرفة وبتعرف أجره، لو ناسبك تمام، ما ناسبكش شوف غيره.. لكن ليه تفرهده وكأنك بتذله علشان تديله أجره.. ويبقى هاين عليك تعامله كعبد علشان تحس إنك دفعت الفلوس في المكان الصح.

( اعط للأجير حقه، قبل أن يجف عرقه) حديث نبوي.

مش لازم تنشف ريقه وتماطله بعد ما حاجتك خلصت وتحسسه إنه بيتقل عليك أو بيشحت منك.

وفكرة إنك تحكي له قصة حياتك وتشرح له ظروفك اللي يا عالم هتكون صح ولا لا، كل ده ما يخصوش لسبب بسيط، لأن ده أكل عيشه، مصدر رزقه، لا رفاهية ولا تطوع.

الفلوس اللي مستكترها عليه دي، هي مصاريف الفواتير والحياة عموما واللي ما ينفعش فيها فصال.

فزي ما الدنيا غالية عليك فهي برضه غالية عليه.

فما تصتنصحش مع الغلبان اللي زيك.. دي مش شطارة أبدا،

ولما تلاقي حد ذوق في التعامل، خليك أنت أكثر ذوقا، ما تكونش أكثر استغلالا.

كل واحد هو بس اللي يقدر يحدد سعر الخدمة اللي بيقدمها، مش أنت.

ولو شايف إن الشغل ما يستاهلش ده.. اعمله أنت.

ربوا عيالكم

 ربوا عيالكم على غض البصر:

_عرفوهم إن مثلا الأكل عورة، فما ينفعش تبص على حد وهو بياكل، أو تبص هو بياكل إيه حتى لو كنتم في مطعم واحد وده أكل الترابيزة اللي جنبك!

علموهم إن ده عيب وحرام.

_عرفوهم إن جسم الإنسان عورة سواء رجل او امرأة أو طفل وحتى لو كنت طبيب، ما تبصش على حاجة لمجرد إنها باينة سواء بإرادة صاحبها أو لا.

وبالنسبة للطبيب مسموح لك على قد المنطقة المصابة، وتكون مركز في شغلك مش في حاجة تانية.

وبالنسبة للتمريض فأنتم شايلين أمانة كبيرة يا ريت تكونوا قدها.

_عرفوهم إن بيوت الناس عورة، حتى لو الباب مفتوح أو الشباك مفتوح.. ولو بتزورهم فعينك ما تترفعش في كل حاجة، ولو المطبخ باين ما ترشقش عينك فيه وتشوف جواه إيه...

ولو دخلت مطبخ حد من قرايبك أو من أصحابك، ما تشيلش الغطا من على حلة أو طبق متغطي أو تفتح التلاجة...

_عرفوهم إن حياة الناس عورة، حتى لو هما قاصدين يظهروها، وإنه عيب تسألوا حد على حاجة هو مش قايلها لأنها ما تخصكوش في حاجة.

_عرفوهم إن فيه حاجة اسمها استئذان، وإياك تدخل مكان من غير ما تخبط وصاحبه يسمح لك تدخل، حتى لو الباب مفتوح أو متوارب.

_عرفوهم لو هتقفوا في البلكونة أو في الشارع إن الناس مش فرجة؛ فمثلا لو لقيت حد بيدور في الزبالة على حاجة، بدل ما ترشق عينك فيه، ادع إنك ما تتحطش في نفس ظروفه، أو انزل ساعده باللي تقدر عليه.

أو لو لقيت واحدة طرحتها ولا هدومها الهوا بيطيرها وهي وقفت تضبط حالها، ودي وشك الناحية التانية.

_علموهم ما يبصوش على نعمة عند حد، عودوهم يدعوا للناس بالبركة.

وما تاخدوش الناس بالظاهر ركزوا مع نفسكم وبس.

_علموهم يكفوا أذاهم عن الغير، ولو حتى بنظرة عين ممكن تجيب صاحبها الأرض من غير ما ياخد باله.

الكلام للولاد والبنات

علموا بناتكم يبطلوا مقارنة بين شعر صاحبتها، ولون قريبتها، وغنى جارتها وما إلى ذلك

أعتقد الجيل اللي هيتربى كده، مش هيبرر التحرش بملابس المرأة، لأنه هيبقى عارف قيمة غض البصر وعقوبة انتهاك محارم الله.. وإن مفيش مبرر لانعدام التربية.

فلو كنت بتعمل الحاجات اللي في البوست وشايفها عادي، حاول ما تجاهرش بده، لأنها وحشة جدا في حق اللي كانوا مسؤولين عن تربيتك.

من كتاباتي 112

 

1- مين قال السكوت علامة الرضا!

السكوت عندي عمر ما كان ده معناه.

بسكت رفضا واعتراضا وامتعاضا وزهقا ومللا...

لما الكلام يبقى زي عدمه...

أنا لو راضية، هقول وهعلن وهيبان عليا في كل حاجة.

لو سكت دي علامة غير مبشرة بالمرة.

فيا اللي فرحان بالسكات

عمر السكات ما كان رضا

ده بس صوت حزين

مش راضي يطلع

2-"علشان لما أموت تبقوا تقولوا ما كانش بيستخسر فينا حاجة"

الجملة دي بنات كتير بيقولوها بعد ما أبوهم بيموت..

إنك تفكر إيه اللي هيتقال عنك بعد موتك، إيه اللي ولادك هيحكوه للناس سواء في صالحك أو لا، محتاج وقفة مع النفس.

في الآخر ما بيفضلش من الإنسان غير سيرته ومعاملته مع اللي حواليه.

3-أول مرة اسمع خطيب جمعة بيوجه الكلام للرجال،

وبينصحهم يكونوا لطفاء مع أهل بيتهم.

يكون باش الوجه، دائم الابتسامة، يدخل عليهم السرور، يتفقد حالهم، وما إلى ذلك من صفات طيبة اقتداء بصفات النبي صلى الله عليه وسلم.

تخيلوا معايا كده لو دي صفات رجل البيت، البيت ده هيكون عامل إزاي؟ واللي عايشين فيه حاسين إيه؟

4-الأصل في الإنجاب، إعمار الكون واستمرار دورة البشر، ويمكن علشان كده ربنا خلق غريزة الأمومة، علشان الأم تقدر تتحمل كل التعب اللي بتشوفه قبل وأثناء وبعد الولادة.

لكن بالمقابل ولإن الإنسان يطبعه أناني، بيتصور إن العيال اللي خلفهم دول بتوعه، وموجودين علشانه؛ يخدموه بقى، يحسنوا صورته قدام الناس، يثبت بيهم للمجتمع أنه تمام وما إلى ذلك.

وناسي خالص إنه مجرد وسيط بين اللي خلفه وبين العالم، يعني أنت اللي في خدمة عيالك مش العكس.

أنت المسؤول عنهم مش العكس.

أنت اللي بليتهم بالدنيا وشقاها وده يخليك تعاملهم بلين العمر كله.

يمكن بر الوالدين ربنا أمر بيه علشان لما العيال تكبر وتفهم هتعرف إن ما كانش ليهم رأي في الحياة ووارد يكرهوا حياتهم؛ فييجي الدين يفرملهم إن بر الوالدين ثوابه عظيم.

طيب وبر الأبناء؟؟

الطبيعي الغريزة هي اللي هتحركهم أنهم يحبوا عيالهم ويبروهم.

لكن سواء كانت غريزتك شغالة أو معطوبة فأنت هتتسأل عنهم، عن اللي قدمته ليهم، عن اللي قدمته للمجتمع من خلالهم.

وعلى غرار إحدى المذيعات، لو مش قد الشيلة ما تشيلش.

والناس اللي لسه ما خلفتش يا ريت تسأل نفسها: عاوزة تخلف ليه؟

إيه اللي عايزة تقدمه المجتمع وإيه اللي عايزة تورثه لعيالها؟ 

من كتاباتي 111

 بلاش تعودوا عيالكم على كلمات مثل: يا بختك، يا ابن المحظوظة، اشمعنى أنت، أنا عاوزة زيك...

على سبيل إنك تفخم الحاجة اللي معاه؛ لو أبوه جاب له كيس شيبسي ولا شوكولاتة وأنتي كأم ما جابلكيش مثلا.

لأن ده مع الوقت هيربي فيه أنه عادي يبص على اللي في إيد غيره ويتمناه، وعادي يقولها في وش أي حد، وهيترسخ جواه إن الحسد عادي.

بقول لطفل ما ينفعش تقول كلمات مشابهة، لأن ده حسد والحسد حرام.

قالي: وإيه اللي حرمه؟

قلت: لأنه أذى، كلماتك له مؤذية وهتخليه يدافع عن نفسه ويظهر استحقاقه للي معاه علشان تخف عنه شوية، ومع الوقت مش هيحب يشاركك حاجة، أو يحب وجودك من أصله

اتمنى للناس الخير في العموم.

وربنا هو اللي بيرزق.

وارد تكون عندك حاجات مش عنده، ووارد يجيلك أحسن من اللي تمنيته عنده، ووقتها مش هتحب حد يبص في حاجتك.

ادعوا للناس بالبركة؛ أنتم مش عارفين كواليس حياتهم.

وربوا عيالكم على كده.

--

شوفت فيديو عن أم مصورة ابنها في أماكن كتير وتوقيتات مختلفة وهو بيقول "أنا زهقان".

تعليقي الداخلي "خليه يشتغل في البيت، يرتب ألعابه، ينضف معاك حاجة، يناولك خضار، يرتب ما يمكن ترتيبه حسب سنه وهكذا

اعمليله مسابقة زي مثلا يسمع سورة صغيرة ويحفظها ويسمعهالك ولو ده حصل تكافئيه.

يتفرج على قصص القرآن ع اليوتيوب مثلا، وبعدها يحكيهالك.

خليه يشاركك في حياتك؛ يعني لو بتتفرجي على حاجة خليه يتفرج معاك، هاتيله كتب تلوين وألوان، مكعبات، اسأليه عايز يعمل إيه أو حابب يعمل إيه؟

الرفاهية المبالغ فيها بتضر الطفل أكتر ما بتنفعه.

إديله فرصة يحتاج حاجة، فيخترع حاجة بديلة تأدي الغرض بالنسبة له.

خليه يشغل دماغه ويستخدم ذكاءه

وما تكبريش دماغك معاه.

--

أوقات، ممكن يكون رزقك في ابتلاء قادر تتحمله.

--

( قَالَتْ إِحْدَاهُمَا يَا أَبَتِ اسْتَأْجِرْهُ...

عن الأب اللماح، فهم أن بنته معجبة بيه وجوزههولها.

ده فيه أباء عيالهم يطلبوا منهم الحاجة واضحة ويطنشوا أو يقولوا ما فهمتش، او يستخسروا، أو يعملوا إن الكلام مش ليهم.

يعني أنت كأب مثلا: لما ابنك يشكيلك من الغلاء ومصاريف دراسة ولاده بديهي تفهم من ده إيه؟

إنه محتاج فلوس ومستنيها تيجي منك.

وأنتي كأم لما بنتك تيجي تزورك وتقولك نفسي آكل كذا.. تفهمي من ده إيه؟

إن معندهاش وعايزاكي تعزميها أو تديها من خيرات الله...

وأنت كأب لما حد من عيالك يقولك إن اللي كان متعود يشتريه غلي أو محتاج ملابس أو كتب أو أي فلوس معاه

تفهم من ده أنه عايزك تزود مصروفه بدل ما يبص لأصحابه ويتحسر...

ومواقف غيرها كتير.. مش لازم الأب يتطلب منه بصورة واضحة، أنت خليك حسيس..

وخصوصا لو ماديا تقدر.

بخاطب الفئة اللي قادرة ماديا علشان محدش يقول العيال المفروض تحس بأهلها، أو تحديدا بخاطب الآباء اللي جوزوا عيالهم ومصاريفهم بقت مقتصرة عليهم وبس.

خدمة تصحيح لغوي

أقدم خدمة تدقيق لغوي سواء للكتب الأدبية أو الأكاديمية وبسعر مناسب جدا

التواصل بواسطة بروفايلي على الفيس بوك

هنا

الزمن والنفقة والصبر

 

محدش بيعاند الزمن.

استوعب إن العمر عدى، وإن شكل الجسم بياخد دورته الطبيعية خلاص نحو الفناء؛ فأي محاولة منك للرجوع هتخليك مسخ.

كل شيبة شعر وكل تجعيدة وكل علامة، بتدل إنك عشت سنين كتير، حتى لو ما كنتش عشتها زي ما أنت عايز.

ما تبصش لملامحك دلوقتي على قد ما تبص لروحك.

خلي روحك فتية، خفيفة، مرحة، مُحبة ومهما كانت ملامحك هتلاقي الكون بيوسع لك مكان.

اشتغل على روحك، وحاول تسيب أثر طيب.

--

النفقة على أهل بيتك من أعظم أنواع الصدقات، حسنات متطايرة كده بتجيلك من مفيش.

تخيل لو جبت لابنك لعبة أو لبنتك فسحة

أو كل يوم جبتلهم كيس حلويات يفرحوا بيه

أهي الحاجات دي هتبقى في ميزان حسناتك

النبي قال" خيركم خيركم لأهله وأنا خيركم لأهله"

تخيل بقى وجوب إطعامهم وكسوتهم وعلاجهم وتعليمهم ومصاريفهم كافة.. عدم إنفاقك هيكون جزاءه إيه؟

النبي قال "كفى بالمرء إثما أن يضيع من يعول"

يعني لو مفيش في حياتك معصية غير أنك ما بتصرفش على عيالك فكفاية عليك عقابها.

---

﴿٦٦﴾ قَالَ إِنَّكَ لَن تَسْتَطِيعَ مَعِيَ صَبْرًا ﴿٦٧﴾ وَكَيْفَ تَصْبِرُ عَلَىٰ مَا لَمْ تُحِطْ بِهِ خُبْرًا ﴿٦٨﴾

#سورة_الكهف

أرأيت يا الله! هذه طبيعة النفس البشرية.

أجاهد الصبر سنوات وسنوات _دون أن أحاط خبرا أو تظهر لي حكمتك_ حتى انقشعت الغمة. لم تنقشع فجأة؛ بل أزيحت على مهل مقيت ومهين، وبالتوالي على الجانب الآخر، كنت استقبل حينها ابتلاء جديد.

هل هذا حصاد الصبر؟ أن أختبره مجددا!

كنت دعوتك سابقا أن تبتليني لأصبر فأنال بشارة الصابرين والأن أدعوك "إن لم يكن بك علي غضب فلا أبالي غير أن عافيتك هي أوسع لي، أعوذ بنور صفاتك الذي أشرقت له الظلمات وصلح عليه أمر الدنيا أن يحل علي غضبك أو أن ينزل بي سخطك.. لك العتبى حتى ترضى".

مواقف إنسانية

 

أجمل ما في النساء أنها بتعرف تعبر عن مشاعرها بدون تفكير.

لما بتعامل مع النساء في الإطعام مثلا، فكرة إن حد بيقدم لهم حاجة مهما كانت، ده بيكون سبب كافي إنك تشوف في عينيهم نظرة امتنان أو فرحة.

الرجال في الغالب بيبقوا مستغربين ويسألوني ده إيه وليه!

وفيه بحس إنهم بياخدوا مني علشان ما يكسفونيش! 

الستات اللي على فرشة في الشارع بشوفهم مش وش بهدلة وإن لولا الحوجة ما كانوش قعدوا القعدة دي فما تنسوهمش لا من إطعامكم ولا من صدقتكم.

محنة المرض علمتني ما سألش عن تفاصيل صاحب الحالة مش عايز يحكيها، هو لو حابب يقول هيقول.

اتعلمت أنه ما ينفعش أستهين بأي ألم طالما ماجربتوش ولا أنا مكان صاحب العلة.

اتعلمت إن كلمة سلامتك مع الدعاء بالشفاء ليها أثر طيب على نفس مستقبلها.

اتعلمت أراعي مشاعره وتقلبات مزاجه، ويا إما أتحمل ده لو أنا في محيطه، أو أخليني في مساحة آمنة ليا وليه.

عافانا الله وإياكم من كل سوء.

لما تركب مواصلة بلاش تقرأ قرآن بصوت عالي وتعيش الدور أنك كده بتاخد ثواب اللي بيسمعك وخصوصا لو صوتك نشاذ وبتقرأ غلط.

عبادتك لنفسك ما تصدعش الناس.

بلاش تعمل الصيام حجة للنرفزة على مخاليق ربنا وجر الشكل وتعطيل حركة الأمور عامة

عبادتك لنفسك ما تقرفش الناس.

الله الغني عن عبادتكم يا جماعة لو هتدوا لنفسكم استحقاقية لأذى اللي حواليكم مهما كان الموقف تحت بند "إيييه بلاش اعبد ربنا".

من كتاباتي 110

1-  خلونا نتفق إن عبادتك تخصك لوحدك، اللي يخص الناس المعاملة.

2-لما تتعرضوا لموقف مؤذي، اكتبوا عنه واظهروا اعتراضكم وقتيا لو ينفع في المكان.

ما تتعاملوش إنه عادي، لأنه مش عادي، الأذى النفسي مش عادي، الضرر النفسي مش عادي.. الاستهانة بيك كإنسان مش عادي. انتهاكك وسرقتك والاستخفاف بمشاعرك وبوقتك وبفلوسك مش عادي.

اتكلموا.. يمكن حد يكون بيأذي ومش واخد باله على اعتبار إن محدش اعترض قبل كده.

اتكلموا، خليكم لسان حد عاجز معندوش المساحة أنه يعبر عن غضبه واستياءه في موقف ما.

اتكلموا

وإياكم تقللوا من مشاعر حد متأذي أو زعلان لأنكم مش مكانه ولا نفس ظروفه وشخصيته.

3-ربنا اسمه الواسع

فوسعوا على الناس خلوا ربنا يوسعها عليكم.

لما تكون بتتبرع لحد مريض مثلا هيعمل عملية، خليك كريم واعمل حساب الأدوية اللي هيحتاجها بعد كده وأجرة التمريض وتمن المتابعة مع الطبيب ده غير احتياجه للأكل أو لمصاريف تستره.

ما تدوش الحاجة على القد كده.

وبرضه لو هتتبرعوا للتعليم اعملوا حساب المواصلات والأدوات الدراسية والأكل على مدار اليوم الواحد للفرد الواحد.

ولو هتعملوا إطعام اعملوا حسابكم إن ممكن الوجبة الواحدة اللي ياخدها يقسمها مع اللي عايش معاهم فابقوا بحبوها كده.

وشنط الخير ضيفوا عليها حاجة حلوة من نفسهم حتى لو علبة بسكوت...

وهكذا بقى ما تنسوش إنكم بتتعاملوا مع الله وبتطلعوا الحاجات دي لله..

"أنفق ينفق الله عليك"

حاجتك للصدقة أكتر من حاجة المتصدق عليه، دي اللي هتشفعلك.

4الصدقة اللي بترفض تخرجها دلوقتي، بكرة لما تموت تتمنى حد يطلعها على روحك.

-

قسوة الآباء

 

﴿ ثُمَّ قَسَتْ قُلُوبُكُمْ مِنْ بَعْدِ ذَلِكَ فَهِيَ كَالْحِجَارَةِ أَوْ أَشَدُّ قَسْوَةً وَإِنَّ مِنَ الْحِجَارَةِ لَمَا يَتَفَجَّرُ مِنْهُ الْأَنْهَارُ وَإِنَّ مِنْهَا لَمَا يَشَّقَّقُ فَيَخْرُجُ مِنْهُ الْمَاءُ وَإِنَّ مِنْهَا لَمَا يَهْبِطُ مِنْ خَشْيَةِ اللَّهِ وَمَا اللَّهُ بِغَافِلٍ عَمَّا تَعْمَلُونَ ﴾.

#سورة_البقرة

لما قرأت الأية دي خطر في ذهني قسوة الأباء غير المبررة، وفعلا أشد من الحجارة بل أكثر قسوة، تلاقي الابن او البنت تحاول تقرب وتبر بقدر طاقتها وهو لا يبالي.

الابن يحاول يظهر أنه قد إيه كويس ومحبوب علشان يلاقي من أبوه بس ثناء والأب أصم بل لا يعنيه هذا.

البنت تستجدي عطفه وهو قاسي لا يلين.

التذبذب في المعاملة والتفرقة بين الأخوات، والحرمان من أبسط حقوقهم

ودروس بر الوالدين اللي أدت للي ما يستاهلوش عيالهم استحقاقية منقطعة النظير أنهم مهما يعملوا فهما في أمان وداخلين الجنة حدف وولادهم مش هيشموا ريحتها غير لو كانوا راضيين عنهم!!

ومفيش درس واحد عن بر الأبناء وحقوقهم سواء مادية أو معنوية على مدار العمر

الله بريء من ظلم العباد وحسبي الله في كل أب وأم مكرهين عيالهم في حياتهم.

كتاب إلى صديقي

 

عن متعة كتابة الرسائل التي ضممتها بحميمية في كتابي الجديد إلى صديقي

إلى صديقي، مصنف كأدب رسائل من خلال نصوص سردية.. أرجو أن ينال إعجابكم.

تجدونه الآن في منافذ توزيع الهيئة المصرية العامة للكتاب

على مستوى أنحاء الجمهورية

في انتظار أول ريفيو عنه بشغف