1- الجنس من غير زواج مابيكونش اسمه (حب)
بيكون (خطيئة) وفي الدين اسمه (زنا).
2- مقابلة في الواقع أبرك من 100 اتصال.
3- عاوزين ننشر ثقافة احترام المساحة الشخصية للفرد.
يعني ماينفعش مثلا تقعد ورا حد وتحط رجلك ع الكرسي بتاعه أو تسند دراعك قصادك وكأنك هتنام.أو لوقاعد جنبه تبقى عينيك على اللي بيعمله في موبايله مثلا.. أو لو قاعد قدامه تصور نفسك سيلفي وهو يطلع في الصورة.
ماينفعش تصور حد وهو مش واخد باله سواء تقصد أو لأ.
لو معاك أطفال تبقى واخد بالك إنهم مايتعدوش على المساحة الشخصية لحد.. ماتستناش حد يقولك أو يظهر تضرره.
اللي تقبله على نفسك اقبله على غيرك، ولو كنت بحبوح ومعندكش مشكلة في اقتحام مساحتك فاستمتع بده لوحدك.
4- لما بشوف تصميمات لفساتين صيفي موديلاتها قصيرة وبدون أكمام، كنت بستغرب إن
دي تصميمات تتعمل في مجتمعنا الشرقي؛ لأن لو حتى واحدة مش محجبة مش هتقدر
تلبسه براحتها.. والمحجبة هتتحايل بليجن وبوليرو أو بودي.
لكن لما أشوف جواكت وبلوزات صوف من غير أكمام.. ببقى فعلا عاوزة اعرف تفكير المصمم!يعني علي اعتبار إن في الشتا الجو برد ومفيش مجال غير إن تصميمه يتلبس تحته قطعة تانية، وده أنا بشوفه عناء.. رحلة البحث عن قطعة ضرورية لملائمة القطعة الأصلية!
ليه يعني؟ ها!
مش كفاية رحلة البحث عن مستلزمات الطقم على بعضه تيجي تزود ده علشان بس ماحبتش تحط كوم للجاكت أو البلوزة!
بالنسبة لي بعتبر نفسي ماشوفتش التصميمات دي لكن يفضل جوايا علامة تعجب.
5- لما تكون على منصة وخاصة لو كنت مقدم أو اللي هتدير الحوار.. البديهي تعرف الناس بنفسك وبعد كدة تعرف ضيفك للجمهور.
ولو كنت صاحب الكلمة أو المحاضرة ده أدعى تعرف الناس صفة وصولك لهذه المكانة.. إنك تتكلم والجهور يسمع.وارد جدا حد من الحضور يكون بيتعرف عليك لأول مرة وماتكونش بالنسبة له علم.
6- تدخينك وسط جموع، يعتبر تعدي على حقوق الغير في تنفس هواء نظيف.
وشخصيا مابسامحش في التعدي على حقي.
7- حاول تبذل مجهود في تربية أبنائك.
هما مش هيعرفوا يعملوا ده لوحدهم.. مابيتولدوش متربيين يعني، دي خبرات تعليمية هيكتسبوها منك.التحدث بأسلوب مهذب، احترام الكبير، العطف على الصغير، الرفق بالحيوان، إماطة الأذى وغيرها من السلوكيات.
