الخميس، 17 ديسمبر 2020

السبت، 5 ديسمبر 2020

نظف مكانك







بيلفت نظري دايما سواق الميكروباص اللي بيخاف على عربيته ويحرص على نضافتها وممكن يرفض يركب حد لو لقاه معاه شنطة مش نضيفة مثلا.
وبحب جدا منظر اللي بينضف عربيته الصبح قبل ما يركبها ويخليها بتبرق.
وبيعجبني جدا لما اركب تاكسي والاقي العريية نضيفة من جوه وريحتها حلوة.
وبروح لفكرة يا ترى بيعملوا كدة في المكان اللي عايشين فيه، يصحى يرتب أوضته وينضفها ويروقها كدة.. ومكانه المفضل في الشقة بيخلي ريحته حلوة زي عربيته!
يستثنى الناس اللي معندهاش مشكلة تسيب عربيتها من بره متربة ومن جوة مزبلة.

*النظافة حلوة وبتدي طاقة إيجابية وده مالوش علاقة بسن أو نوع.

الثلاثاء، 17 نوفمبر 2020

منى ياسين (موناليزا) ع اليوتيوب

 رابط قناتي ع اليوتيوب

اشتركوا وفعلوا الجرس وعلقوا على كل الفيديوهات وعرفوني رأيكم

ولو حبيتوها شيروها

اضغط هنا

الخميس، 5 نوفمبر 2020

التحرش انعدام أخلاق



فيه فئة ماسكين في نغمة إن التحرش بسبب التبرج وهنا يحضرني سؤال مهم: هو التبرج يعني إيه؟
مين ممكن يحكم على واحدة إنها متبرجة! ويتحمل وزر ده.. من وجهة نظر أنصار النقاب مثلا فما دون ذلك متبرجة!
ومن وجهة نظر أنصار الخمار، صاحبة الطرحة القصيرة متبرجة!
ومن وجهة نظر أنصار الحجاب، اللي كاشفة شعرها متبرجة.
ومن وجهة نظر أنصار الملابس المغلقة، اللي سايبة شعرها ولبسها مفتوح متبرجة!
ومن وجهة نظر فئات كتير اللي بتحط ميك اب متبرجة حتى لو محجبة!
واللي ملابسها من وجهة نظرهم ضيقة متبرجة!
واللي بتلبس بنطلون في العموم متبرجة!
بالنسبة لرأي النساء بحس إنه نفسنة منهم، (اللي هو اشمعنى ابقى أنا لابسة طويل ومغلق وهما لا.. اه يستاهلوا!)
أنتي مش في مأمن على فكرة، لسه بس ما وقعتيش تحت إيد أي حيوان مش اكتر!
ثم ادعيلهم بالهداية بدل ما تشجعي على التحرش بيهم.. عيب.

ما تصلوا ع النبي كدة.. شوف نفسك الأول يا ترى بتصلي الخمس فروض؟ بتصليهم في المسجد؟ بتصليهم أول الوقت؟ بتجمعهم آخر اليوم؟ مقطع ومش منتظم؟ ما بتركعهاش أصلا!

ده اللي المفروض يشغلك نفسك وأهل بيتك وتقييم طاعتك من آن لآخر.. لا تبص ع الناس ولا تتبع عورات حد.
ربنا اللي هيحاسبك وهيحاسبهم
بس هيحاسبك أكتر لو أذيتهم..

الكلام عن مبررات التحرش إدت للمجرم الحق في التطاول لإن المجتمع حاميه.. زي ما اتفقنا كل واحد وله وجهة نظر مختلفة..فيه واحد بتثيره العبايا السودا، وفيه واحد بيثيره الملابس المغلقة لوجود فضول يعرف إيه اللي جوه!
وغيرها كتير.
فبطلوا أذى سواء بالفعل (التحرش) أو بالقول (الدفاع عنه).

بالنسبة لملابس الرجال اللي محدش بيتكلم عنها أنا ممكن آدلي بوجهة نظري فيهم.. يعني مش مقبول بالنسبة لي خروج الرجال بشورت طويل مثلا ولكن ده ما يدنيش الحق أأذيه لا بالفعل ولا بالقول ولا حتى بالنظرة.
حريتك تتوقف على عدم التعدي على حقوق الغير.


أقول قولي هذا وأستغفر الله لي ولكم

الأربعاء، 21 أكتوبر 2020

تحميل عشق وخيانة



والآن تستطيعون قراءة مجموعتي القصصية الأولى عشق وخيانة


التحميل هنا 


قراءة ممتعة

الأربعاء، 14 أكتوبر 2020

تحميل كتاب خبايا نسائية




لمتابعي مدونتي القدامى، اللي كانوا السبب إن سلسلة خبايا نسائية تتحط في كتاب،

ولكل القراء الغاليين...

 أقدمه إليكم الآن في نسخته المطبوعة.


 التحميل هنا


في انتظار آرائكم واقتباساتكم على صفحة الكتاب على الجوودريدز أو على موقع الفيس بوك مع تاج باسمي وهاشتاج اسم الكتاب

قراءة ممتعة


الاثنين، 5 أكتوبر 2020

المرأة مُدانة والرجل مُهان



لو المرأة مُطلقة يتحكم عليها إنها سيئة السُمعة ومعيوبة ودرجة تانية وأكيد يعني مش عايزة تعيش.
لو المرأة زوجة ثانية يتحكم عليها إنها خرابة بيوت وأكيد يعني خطافة رجالة.
لو المرأة مُغتصبة آو متحرش بها يتحكم عليها إنها شمال وأكيد يعني هي اللي عايزة كدة.

احنا في مجتمع يدين المرأة دوما ويتعامل مع الرجل على إنه فاقد الآهلية.
ليتهم يعلمون أن إدانة المرأة إهانة للرجل.


لفت نظري الكلام عن جريمة التحرش وربطها بملابس المرأة وكأن المنقبة مثلا لا يتم الاعتداء عليها إلى الطفلة الرضيعة!
وتحوير الكلام لإدانة المرأة!
هذا فعل إجرامي لا يستطيع فاعله الإقدام عليه في دول الخليج مثلا أو في دول الغرب لمعرفته المسبقة بما سيُعاقب به!
أما هنا نتطرق لأمور عدة ليس منها الأمر الرئيسي وهو الجريمة التي حدثت والتي يستحق صاحبها النبذ والعقاب.
ثم
ماذا لو أحد الأطراف غير مسلم ومن ثم لا يؤمن بآيات القرآن برمتها!
تحدث بالمنطق الإنساني ذاك الموجه لعموم البشر وليس لفئة بعينها.


وإذا أردت أن تتحدث باسم الإسلام فاعلم أن المتحرش في الغالب لا يؤدي فريضة الصلاة (الركن الثاني من أركان الإسلام) فلو كان يؤديها لحافظ على وضوءه ولتذكر أنه في مقابلة قريبة لأدائها يقف فيها بين يدي الخالق فكان ليعظم محارمه ولا يجرؤ على انتهاكها.
ومع هذا إن لم يكن من المُصلين من غير المقبول أن يتعرض للاعتداء لعدم أداءه الفريضة، فحسابه عند الله.

الخلاصة: مش أنت كمتحرش اللي هتعاقب البنت على لبسها ولا أنت كمدافع اللي تحكم عليها.

وردا على التعليقات الخاصة بملابس المرأة وأنها أحد الأسباب ورغم اعتراضي التام عن خلط الأمور جال في ذهني سؤال منطقي: هل مقبول تحرش المرأة بالرجل؟
هل وقتها سنبرر جرمها بما يرتديه الرجل؟
تحرش المواصلات مثلا لا يهتم الجاني بما ترتديه الضحية ولا حتى بعمرها هي تاء مربوطة وفقط!
وماذا عن تحرش المراهقين (عيال ابتدائي وإعدادي وثانوي) هتجيبلهم مبررات ولا البديهي إنهم محتاجين تربية.
بتبرروا إيه؟ ولصالح مين؟

نصرة المظلوم تقتضي مساعدته وليس تبرير ما حدث له.


السبت، 5 سبتمبر 2020

قولها كلام حلو




محتاجة حد في حياتي يقولي لما اصحى "صباح الخير يا منى" وبعد ما نتغدا سوا يقولي "تسلم إيدك يا منى" ولو الأكل مش أنا اللي طبخاه بس بناكل سوا يقولي "أنا مبسوط إننا بناكل مع بعض يا منى"
أنا لو هتجوز واحد مش هيحقق لي احتياجاتي البسيطة دي يبقى بناقص.

وده بمناسبة إني قرأت مشكلة على جروب بنات من زوجة بتشكي إهمال زوجها لاحتياجاتها النفسية وبتؤكد إنه مش حارم البيت من حاجة حتى الشيبسي بيجيبهولها لكنه ما بيهتمش بيها كأنثى جبلت بالفطرة على الرغبة في الإطراء والمدح والاستماع للكلام الحلو.
حتى حقها الشرعي بيؤديه كواجب وباستعجال وده لو هي اللي طلبته كمان!
فيه رجالة فعلا بتتعامل مع المسؤولين عنهم زي معاملتهم مع الدواجن.. يجيب الأكل وكده يبقى متوقع إنه في التمام مش مقصر.. وخد بالك إني اختارت الدواجن لإنها ملهاش طلبات يا دوب تاكل وتشرب وخلصنا.. عكس الحيوانات الأليفة مثلا زي القطط والكلاب دول طبعا محتاجين معاملة خاصة وبيفرضوا وجودهم ورغباتهم في الزواج والخروج وممكن يجيلهم اكتئاب يكرهك في نفسك وتحس بالذنب كمان.
فازاي تتعامل مع الأنثى في حياتك زي ما بتتعامل مع فرخة مربيها مثلا!!
اتكلم معاها، دلعها، ما تخليهاش تحس انها محرومة وأنت معاها ومحسوب عليها وجودك.

المؤسف إن ده بالنسبة للمجتمع ما يعتبرش مشكلة أساسا ويتم تصنيفها إنه دلع ماسخ وتحمد ربنا إنه بيصرف عليها!

وهنا أحب أقول: إنك مش واخدها جعانة وأنت اتكرمت عليها بجلب الطعام مثلا! ماهي كانت بتاكل وتشرب في بيت أبوها عادي إيه بقى اللي ضيفته ليها بجوازك منها؟
وإن لو الزواج ما حققش الونس وأشبع الاحتياج النفسي فقلته أحسن.
ده غير إن اللي هي بتطلبه ده حقها اللي مفيش غيرك يقدر يحققهولها

"كفى بالمرء إثما أن يضيع من يعول"
"كلكم راع وكلكم مسؤول عن رعيته"

الأربعاء، 5 أغسطس 2020

أدوار الفرد





كل واحد وله دور في حياة التاني وماينفعش نبدل الأدوار.
الأم لما بتموت مفيش حد ممكن يقوم بدورها حتى لو بذلت (الأخرى) قصارى جهدها للتعويض.
عمر طاهر شبه المعنى ده بالألوان.. لو مثلا اللون الأزرق اختفى مفيش لون تاني ممكن يقوم بدوره.
مش إنساني تحط بنتك مكان أمها اللي سابتلك البيت وتلومها لو ما أدتش مهام مش بتاعتها.
مش منطقي تعاملي ابنك الصغير كراجل كبير مكان أبوه وتحرميه من طفولته وتحطيه في مواقف مش بتاعته.
مش عقلاني تتجوز علشان تلاقي بديل لأمك تداديك.
حط الناس في مكانهم الطبيعي علشان ما تتصدمش لما تلاقي اللي قصادك بيتعامل أقل مما أنت متوقع.. دي غلطتك مش غلطته.

الأحد، 5 يوليو 2020

الظن الخاطئ





إزاي تقدر تتهم حد بالباطل بدون أدلة!
إذا كان فعل الزنا محتاج أربعة شهود قبل ما تقدر تعلنها بقلب جامد، حتى لو شوفته بعينيك، لازم يكون فيه تلاتة كمان غيرك وإلا تبقى أنت بترتكب كبيرة قذف المحصنات.
وقيس على ده أي تهمة أو صفة بتنسبها لحد لمجرد إن مثلا فلان قالك أو سمعت بالصدفة أو حتى شوفت موقف عابر بدون ما تلم تفاصيله.
شوف كام حد ممكن تكون ظلمته من انطباع سيء عنه مالوش أساس من الصحة غير بس اقتناعك بيه أو إنه وافق هواك؟
شوف اتكلمت بالسوء عن كام حد لأسباب خاصة بيك وقلبت الناس عليه؟
ربنا ممكن يسامح في حقه لكنه ما بيسامحش في حقوق العباد وخصوصا لو حد مايعرفش إنك بتأذيه بظنك وغيبتك ليه أو حتى يعرف لكنه ما يملكش غير إنه يفوض أمره لله.
"إن بعض الظن إثم" حاول تحطها قصادك دائما واتحرى الدقة قبل ما تصدر أي حكم أو تهمة على أي حد مهما كان.

الجمعة، 5 يونيو 2020

الحضن الحضن





الحضن بالنسبة لي له فلسفة خاصة، أنت مش بتحضن أي حد ولا أي حاجة.. ده فعل حميمي للقريبين.
عكس القبلات مثلا ممكن تحصل مع أي حد وحتى لو سلام عابر ولكن بحكم الموقف مثلا، (دخلت عزا والناس بتسلم وتبوس فأنت تلقائي بتعمل زيهم)، أو كإعلان عن رغبة جنسية مثلا على سبيل التمهيد (سواء علاقة شرعية أو مع شخص عابر).
الحضن مش كده.. الحضن له خصوصية ومش بيتم مع أي حد ولا طول الوقت ومابيتمش بالتقليد والعادة (لو داخل مكان مع ناس ولقيتهم بيسلموا ويحضنوا مش هتقلدهم لو مفيش يينك وبينهم مساحة نفسية تخليك تعمل ده)
الحضن فعل معنوي أكتر من كونه مادي
بيبان وقت الفرحة، وقت الحزن، وقت الضعف، وقت النجاح...
ممكن تحضن مخدتك مثلا كنوع من تعويض احتواء مفقود لكنك مش هتبوسها مثلا!
الحضن فعل محبة صادقة مع الكل وحسب طبيعة الموقف.


*كلموني عن أحضان في حياتكم لسه فاكرين تأثيرها جواكم؟

الأربعاء، 20 مايو 2020

عن الكورونا








بسبب خفاش أكله أحدهم اجتاح العالم وباء، لا يدري أحد متى ستتم النجاة، كنت أتأمل دوما في النعم المحيطة بي وبمن حولي وأستشعرها بامتنان، وكنت أشعر بالغيظ ممن يسخطون من الأنعم المحيطة بهم ولو على سبيل الأدعية الساخرة مثال "يا رب الشغل يموت" وهؤلاء حين تم فرض حظر تجوال وأجازة من العمل وفي بعض الأحيان وصل الأمر لتسريح العمالة، أراهم الآن يتحسرون على أيام العمل، ويفتقدون كل شيء من الاستيقاظ باكرا، لزحمة المواصلات، لتناول الطعام مع الزملاء، للعودة منهكي القوة، للنوم باسترخاء للاستعداد ليوم جديد.
أو الدعاء المقيت "يا رب نيزك" وهؤلاء لن يتحملوا إصابتهم بدور برد!
! يثير تعجبي وجود أناس يتعاملون مع أيديهم كونها دوما نظيفة طالما لم يلمسون بها ترابا أو طينا.. غير ذلك فلا داع من وجهة نظرهم إذا لغسلها.
كبار السن يتعاملون على كونهم كبارا ولا يخضعون لهذه الإرشادات الطفولية!
صغار السن يتعاملون باستهتار يعبر عن مرحلتهم العمرية المتمردة.
وجال في ذهني أن من المؤسف أن تأخذ احتياطاتك الوقائية كأفضل ما يكون ولكنك وحدك من تفعل، كمن يستولى على المطهرات ليستخدمها وحده غير عابئا بأن العدوى قد تنتقل إليه ممن لم تتاح لهم الفرصة لاستخدام التعقيم والوقاية المطلوبة نظرا لأنانيته في التعامل.
ووقفت على حقيقة دوما أشير إليها، أنك لا تحيا في هذا الكون بمفردك.
بت أتأمل كل شيء من تصرفات من حولي، ووجدت أناسا أصبح شاغلهم الأساسي النظافة الشخصية وغسل الأيدي على غير المعتاد وهذا من وجهة نظري يعد إنجازا لفيروس كورونا، وأناسا أخرون لا يبالون بهذا الأمر برمته بل ويسخرون ممن يتتبع إجراءات الوقاية العالمية!
أظننا لن نجد بعد ذلك من يبصق في عرض الطريق بكل أريحية على سبيل المثال أو يمارس العادات المصاحبة للأنفلونزا من كحة وعطس ناثرا رذاذه بفخر!
وسيصبح وجود محارم ورقية شيئا أساسيا كالموبايل مثلا
ومنهم من يصر على خلط الدين بالوقاية
_ فيه ناس ما بتغسلش إيدها غير وقت الوضوء متعللة أن هذا يتم خمس مرات في اليوم.. هو الطبيعي غسل الإيدين قبل الأكل وبعده زي ما علمونا زمان وإنك تغسل إيدك ورجلك لما ترجع من بره (مثلا) والعادات دي خارج نطاق الوضوء.
حاليا في ظل انتشار فيروس، الوقاية منه هي النظافة؛ فغسيل الإيدين بالصابون لا يقل عن 20 ثانية مثلا أمر ضروري وليس رفاهية.
حضرتك في الوضوء ما بتاخدتش دقيقة في غسل الثمانية أعضاء ولا يتم غسلهم بالصابون.
إذن لا يجوز خلط الأمور ببعضها الأمور اعتقادا منك إنك بهذا تنصر الدين!
_النقاب والكمامة على سبيل المثال أيضا:
الكمامة مطلوب تتغير لا أن ترتديها أكثر من ست ساعات متواصلة مثلا، ولا يجوز لمسها  سوى من رباطها الخارجي فقط.
القفازات أيضا مطلوب تغييرها بعد كل استخدام مباشر لها وليس على مدار اليوم! وحين خلعه يتم من المستحب أن يتم تقطيعه حتى لا يتم استخدامه مجددا وإلقائه في كيس مغلق أولا قبل أن يوضع في سلة المهملات!
ومن يقولون أن الرجال اتنقبت حين ارتدوا الكمامة! حضرتك الأطباء وعمال النظافة مثلا يلبسوها كوقاية لهم وقت العمل وهذا ليس له علاقة بديانتهم!
ومنهم من يصر أن يكسر التعليمات وينزل عله يشاهد هذا الفيروس اللعين!
ولكن في النهاية سنجتاز الأمر وسيصبح العالم أكثر نظافة أو هكذا أرجو.

الثلاثاء، 5 مايو 2020

لا للتحرش، نعم لغض البصر





حين دبرت امرأت العزيز سبل الغواية وقالت صراحة "هيت لك" كان الرد الصارم "معاذ الله".
وسبعة أقسم الله أن يظلهم في ظله يوم لا ظل فيه إلا ظله منهم "رجل دعته امرأة فقال إني أخاف الله"
ده رد للي بيدافعوا عن المتحرشين، اللي محدش فيهم فكر في عقوبة معصيته وغضب ربنا من فعله وهو بينتهك محارم الله.
الأمثلة المذكورة لو تلاحظ إن المرأة مش بس موافقة، دي هي كمان اللي بتزين له الأمر وبتدعيه.
البغي اللي دي أصلا شغلتها لو رفضت يبقى ماينفعش تقرب منها.. رضاها هو اللي يحدد اللي أنت بتعمله مقبول ليها أو لأ.
وده رد على اللي شايفين إن لبسها السبب أو إن هي اللي عايزة كدة.. أيوة لو وافقت مش هيكون فيه مشكلة بالنسبة لها.
فعل الزنا مُحرم في العموم مع إنه يشترط رضا الطرفين.. تخيل لو تم بدون رضا أحد الطرفين عقوبته هتكون إيه!
شوفت تعليقات مستفزة واتعمل هاشتاج منها "لو لم أكن متحرش لوددت أن أكون متحرش" اللي هو أنت فاهم أنت بتقول إيه؟
مدرك حجم المعصية اللي أنت كمان بتجاهر بيها عادي.. وكونك وارد تكون قدوة سيئة لحد يقلدك وينفذ اللي أنت فشلت فيه!
*إذا دعتك قدرتك على من لا يقدرعليك فتذكر قدرة الله عليك.





الاثنين، 20 أبريل 2020

من كتاباتي 92





1- عين المُحب لا ترى إلا الجميل.

2- طبيعي لما يتكتب لك دوا تستمر عليه فترة طويلة إنك تمتعض وممكن تشعر بالسخط كمان.. لكن لو بصيت للجانب الإيجابي هتلاقي إن حالك بدوا يجيب معاك نتيجة ويخليك تتعايش مع مرضك أفضل بكتير من إن حالتك تكون ملهاش علاج.
أوقات كمان ممكن تستغلى العلاج وتقول مش كان بتمنه كنت جبت مش عارف إيه! ده عادي برضه بس لو بدلت تفكيرك وقتها ودعيت إنه يكون بالشفا ويجيب نتيجة مُرضية هتحس بالرضا.
*حاولوا تبدلوا طريقة تفكيركم، وشوفوا المنح من المحن.

3- موت الأب يعد كارثة للزوجة وللأبناء، ولكن ما يقلل من وطأتها أن يكون الأب تهيأ لهذا اليوم وضبط أمور أبنائه المادية، أخبرهم عن ما يملكونه وكيفية التصرف، أطلعهم إذا كان دائنا أم مدينا، جعل لهم مبلغ خاص للتصرف حالما تنتهي إجراءات الوراثة.
هو هنا منع عنهم الشعور بالذل والحوجة وطلب السؤال.
أتخيل إن لم يفعل فسيضيف على شعورهم الحزين بفقده حزنهم على حالهم وكسرة نفسهم بعده.
*ماتعملوش في عيالكم كده.. محدش ضامن عمره، خليهم يترحموا عليكم.

4- جميل لما تتعامل مع حد حاطط الآخرين في اعتباره، مش عايش كأنه لوحده ومش مهم الناس حواليه.
- لما تركب مواصلة مثلا وتقعد جنب الشباك وتفتحه، جميل لما تلاقي طفل أو حد وراك بيكح مثلا فتقفله أو تستأذنه إذا كان هوا الشباك مضايقه.
- إنك ماتدخنش جنب حد غير لما تستأذنه الأول إذ ربما يكون التدخين بيتعبه.. وأكيد ماتدخنش قصاد أطفال مش مدركين خطورة ده عليهم.
- لما تشوف حد متعود يعمل حاجة وماعملهاش تسأله باهتمام عن السبب إذ ربما يكون تعبان ومحتاج مساعدة.
-إنك تناديه بأحب الأسماء ليه وتفسح له في المجالس وتلقي عليه التحية
- مايستناش حد يطلب منه مساعدة، هو بيقدمها لو يقدر.
- قبل ما يرش الشارع قصاد بيته أو محله يحط في اعتباره الناس اللي هتمشي واللي وارد تتزحلق أو هدومها تتوسخ بسببه فيمتنع.
- لمايستخدم مكان عام، يعمل حسابه إن فيه حد هييجي وراه هيستخدم نفس الشيء فطبيعي يسيبه زي ما لقاه صالح للاستخدام الآدمي.
- قبل ما يرمي حاجة ع الأرض، يفكر في مين اللي هيوطي يشيلها علشان المكان يرجع نضيف.
ومن ده كتيييير

* لما بتأمل في أكتر الحاجات اللي ربنا بيحبها واللي وردت في الأحاديث الصحيحة بلاقي إن معظمها رايح في سكة (مساعدة الناس) وكأن الرسالة الإلهية تتضمن معنى "كونوا إخوانا"..
لما بشوف اتنين بيتخانقوا سوا في الشارع بلاقيني بقولهم تلقائي "عيب، أنتو أخوات" وكأن الأخوة في معناها الخاص أن لا يعتدي أحد على الآخر ومعناها العام أن نكف الأذى عن الغير.

5- "رفقا بالقوارير" هكذا كانت وصية الرسول صلوات الله وسلامه عليه بالنساء.
ولكن فيه رجال فعلا خسارة فيهم القوارير اللي معاهم.
خسارة فيك بنتك لو مابتدلعهاش.
خسارة فيك زوجتك لو ما بتقدرهاش.
خسارة فيك أختك لو ما بتسندهاش.
خسارة فيك أمك لو ما بتبرهاش.

6- "استرجل، وماتبقاش ديوس.. نعم للحجاب"
هكذا وجدتها قبالتي مكتوبة في ورقة ملتصقة على أعمدة نور متجاورة!
في البداية قرأتها "دبوس" ومع التفكير هنيهة اكتشفت أن الكاتب يقصد "ديوث" وهنا أريد أن أكتب له نصيحة بالمثل
"استرجل، واتعلم لغتك علشان لما تحب تكتب، تكتب صح"
ونصيحة كمان
"استرجل، وغض بصرك.. ماترشقش عينك في أي أنثى وتاخد ملابسها حجة لانتهاكها، هي ليها رب يحاسبها وانت كمان هتتحاسب على نظرتك ليها، فخليك في ذنوبك وحاول تتوب عنها"


7- بديهي لما ترجع من بره، تخلع الشراب وتغسله أو تحطه في الغسيل، المهم ماتلبسوش تاني غير ورائحته نضيفة.

ومفيش حاجة اسمها دي أول لبسة أو هو نضيف.. طبيعي تكون عرقت فيه وكتمة الحذاء نفسها هتعمل ريحة مش لطيفة فحيث إنك مش في الكون لوحدك وبتمر على ناس في طريقك سواء مثلا داخل بيتهم لأي سبب أو بتصلي مع حد فياريت تراعي إماطة الأذى.

8- إحنا حلوين في عيون اللي بيحبونا.

9- الصُحبة الحلوة هي اللي بتهون مرار الأيام.

الأحد، 5 أبريل 2020

المساحة الشخصية






اتكلمت كتير عن المساحة الشخصية للفرد وعدم انتهاكها بس نسيت أتكلم عن التعدي عليها في بعض التصرفات المشهورة زي مثلا:
- الأسئلة الشخصية بدون مبرر: سنك، عنوانك، متجوز ولا لا، عدد اخواتك، أبوك بيشتغل إيه، أمك اسمها إيه وما إلى ذلك..
شخصيا الرد المناسب اللي بحاول أقاوم نفسي علشان ماردش بيه (وأنت مالك؟) أنت لا جايب لي وظيفة ولا أنت عريس محتمل.
لو شايف إن دي مادة خصبة لأي حوار (تحقيق عن الشخصية) فأنت غلطان وحاول تشوف حاجة تانية.

- اقتحام صندوق الرسايل (الإنبوكس) برسايل مزعجة (صباح الخير، سلام عليكم، علامة التحية، صور عامة، مواضيع مكتوبة ع الهوم وما إلى ذلك من رسايل لا تعني شيئا للمستقبل! (شايفة إن الرسايل وسيلة مثلى للتواصل ومش منطقي يتم إهدارها فيما لا يفيد).

-لما تكون في المواصلات تحديدا.. احرص على احترام المساحة الشخصية للي قاعد جنبك، يعني لو حسيت انك احتكيت بيه اتأسف وابعد.. ارمي نفسك بره بدل ما ترمي نفسك عليه علشان كلك تبقى ساند مثلا بضهرك.. هو مش مجبر يتحمل تقلك عليك. وبالنسبة للبنات بنعتبرها تحرش وقلة أدب لو كانت من ذكور وقلة ذوق وتناحة لو من بنات.
وهكذا.. يعني أنت مش عايش في الدنيا لوحدك.

الجمعة، 20 مارس 2020

من كتاباتي (91)








1- زي ما بنربي الطفل إنه ماينفعش يقاطع حد وهو بيتكلم. ده أدعى يحصل لما نكون كبار.
ما تثتأثرش بالحديث لنفسك، اسمع غيرك، ماتعليش صوتك، طالما محدش وجه لك كلام ماتتكلمش، قول رأيك باختصار.

2- اللي هتزرعه في قلوب اللي حواليك هتحصده.. يستثنى من هذا أصحاب القلوب المريضة الشبيهة بالأرض البور.


3- الحب فعل
اللي بيحبك هيبقى عايز يشوفك وهيسعى لده.
اللي قلقان عليك هيعرف ازاي يوصلك ويطمن عليك.
اللي وحشته هيجيلك بس علشان يحضنك.
مواقف ممكن ماتاخدتش وقت كبير لكن تأثيرها في النفس عظيم.

4- لما بنشوف حد بيرتب أوضته أو بينضف مكانه أو بينظم حاجته مابنقولش أصله (بنت) بنقول أصله (نضيف، مرتب، منظم)
النوع مالوش علاقة في كونك بتحب تعيش في مكان نضيف أو لأ
مالوش علاقة إذا كنت اتكالي أو بتعتمد على نفسك.
فمهما كان عمرك أو نوعك محدش ملزم يخدمك.
فيه مطاعم وكافيهات بتتعامل بمنطق (ساعد نفسك بنفسك) محدش هييجي يسألك عن طلبك او حتى يقدم لك المنيو.. أنت اللي هتقوم تيجيب القائمة وتختار منها وتطلب وتدفع وبعد كدة تقوم تجيب طلبك.
وأنت وقتها بتعمل ده عادي بنفس راضية لكن في بيتك بتكسل تقوم تجيب لنفسك كوباية ميه طالما ممكن تطلب من حد ويجيبهالك.
ماتبقوش مستنزفين للي معاكم كدة، طالما تقدر ومعندكش مانع جسدي فساعد نفسك بنفسك.

5-تحية وتقدير لكل طبيب يستوعب حالة مريضه النفسية، ويتحمل أسئلته وعصبيته وتمرده.
تحية لمن يتعامل مع المريض كإنسان ضعيف وليس ألة أصابها عطب.
لو الإنسان السليم محتاج للكلمة الطيبة مرة في اليوم فالمريض محتاجها 24 مرة.
"قولوا للناس حسنا"

6- مفهوم الأديب بالنسبة لي، هو من يطوع الكلمات لإيصال أفكاره.. هو صاحب كلمة؛ ولهذا لا أستوعب بالمرة أن يصف أحدهم نفسه بهذه الصفة أو جهة ما رأس مالها الأول "الكلمة" أن يتراجع في كلمته، ألا يكون بقدر ما تفوه به..
كأن يعلن عن شيء ما خاص بأخر ثم يعتذر بأن الإعلان لم يكن دقيقا.
كأن يؤجل موعد أو يلغيه دون العودة لصاحب الشأن.
كأن يتعامل كموظف ليس له في الأمر شيء ينفذ التعليمات الموجهة إليه حتى وإن كانت ستسيء لمصداقية الجهة التي يعمل بها.

فنصيحة: قبل الإعلان عن أي شيء مهما كان، أن تتأكد أولا بأنه لن يتم إلغاءه أو تأجيله أو تأخيره عن الموعد المعلن عنه.
أصحاب الكلمة من المفترض أن يحترمون الوقت ويقدرون قيمة الإنسان.

7- فن اختيار الهدايا
إنك تهادي الآخر بالحاجة اللي هو يحبها أو هيستخدمها أو يكون فيه رابط ما بينها وبينه.
وبديهي ماتتفذلكش في اختيار هدية ما على اعتبار كونها مختلفة وماجاتلوش قبل كده..
مش منطقي يكون هو في كلية طب فأنت علشان تجيب له هدية مختلفة تهاديه مثلا بمسطرة حرف T أو علشان هو أهلاوي مثلا تجيب له شعار الزمالك!
ابذلوا مجهود في اختيار الهدية ولا تنسوا الحديث النبوي "تهادوا تحابوا"




8- وأنت هتستفيد إيه لما تحرج غيرك أو تظهر حاجة هو مش عايزها تبان أو محدش واخد باله منها.
ماتحترموا حياة الناس ومساحتهم الشخصية.
أنا عارفة إنه صعب ومحتاج مقاومة وجهاد للنفس بس معلش حاول حفاظا على إنسانيتك.

9- الكلمة الطيبة بتهون كتير.. فكونوا لطفاء.
"الكلمة الطيبة صدقة"
ممكن تصحى زعلان لكن لما تلاقي أبوك بيصبح عليك.. نفسيتك تهدى.
ممكن الطبيخ يبوظ والحلة تتحرق لكن لما تلاقي جوزك مايعلقش او يقولك فداكي ومايهمكيش.. احساسك بالذنب يخف.
ممكن بضحكة ومجاملة عابرة لبائع بسيط تحلي يومه وتخلي مزاجه حلو حتى لو ماباعش حاجة.

الدنيا جاية ع الناس كلها فمانبقاش احنا كمان بنرازي في بعض.


10- عمرك فكرت في نعمة إن الأجهزة الكهربائية اللي بتستخدمها شغالة.
عمرك امتنيت للتلاجة والغسالة إنهم بيأدوا مهامهم على أكمل وجه.. وإنك مثلا مش محتاس في الأكل ولا في الهدوم ولا خاضع لمواعيد صيانة وما إلى ذلك.
حاول تتأمل في النعم الكتيرة اللي بتستخدمها وامتن لوجودها واحمد ربنا عليها.

11- ولادك اللي مش عاجبك تصرفاتهم هم نتاج معاملتك ليهم.. اللي بتزرعه جواهم هتحصده.
شوف بقى أنت بتزرع إيه؟
حب، قسوة، حنان، إهمال، تجاهل، اهتمام، رعاية وما إلى ذلك.





الخميس، 5 مارس 2020

عن الأحضان



فيه كليب بنت #عامر_منيب عملاه، دامجة فيه أغنية لأبوها وردها دلوقتي عليه فبتقوله من ضمن كلماتها " مش ناقص غير حضنك وشوية حنية"
وقتها افتكرت حضن مامتي اللي كان متسع ليا في أي وقت وبدون مقدمات.. بعدها بقيت محرومة فعلا لدرجة تخليني ممكن أتسول أحضان ولاد إخواتي مثلا حتى لو هما مش في دماغهم.
كنت في تجمع بناتي قريب واتعمل زي تدريب كده إن كل بنتين يكونوا فريق (أ.ب) و(أ) تطلب حاجة من (ب) لفت نظري إن الكل بلا استثناء طلبوا "حضن".

مانساش حضن إنسانة غالية عندي جدا زارتني مخصوص بس علشان تحضني.
أنا بقدر الأحضان جدا، شايفاه فعل صادق خالي من النفاق أو المجاملات الإجتماعية (عكس المصافحة وتبادل القبلات)
الحضن كفعل إنساني مش محتاج مناسبة ولا معرفة سابقة، بعتبره أرقى أنواع التواصل الإنساني، يجمع مشاعر غاية في الرقي منها الدعم، والتعاطف، والاحتواء، المحبة، الحنان.
أحد الصحابة شاف النبي عليه الصلاة والسلام يقبل حفيده فقاله "إن لي عشرةٌ من الولد ما قبّلت واحداً منهم"، فقال رسول الله -صلى الله عليه وسلم- : ( إنه من لا يَرحم، لا يُرحم).


*احضنوا عيالكم علشان يفتكروكم مهما كان عمرهم، ماتخلوهمش محرومين من حنانكم وأنتو عايشين معاهم في بيت واحد، مدوهم بالجرعات اللي محتاجينها علشان مايدوروش عليها بره.

الخميس، 20 فبراير 2020

من كتاباتي (90)





1- لا لوم على المحروم.

2- أخطاء الشغل مافيهاش أعذار.. فيها اعتذار وتصحيح.

3- في حضرة أبنائك؛ تعلم الصمت، وانصت جيدا لما يقولون.

4- المرأة اللي عايشة معاك ليست أخطبوط ب ثمانية أذرع!

عندها دراعين اتنين بس زيك بالظبط
وماتزيدتش جسديا عنك في أي شيء فما تتعاملش معاها أنها المسؤولة عن أكلك وشربك ونضافة المكان اللي بتوسخه لمجرد إن المجتمع عاطيك حق غير منطقي في استنزافها.
وأنتي.. ماتربيش ابنك إنه يكون بروطة في نفسه، علميه يعتمد على روحه، ولو فيه حد هيساعد في شغل البيت فهيكون هو بحكم قدرته الجسدية الأقوى، مش أخته مثلا الأصغر منه!
لو عطشان أو جعان علميه يجيب ميه لنفسه مايطلبهاش من حد، جعان يقوم يعمل لنفسه ساندوتش أو يتعامل يعني هو مش مشلول.. وبعد مايخلص ينضف مكانه.
لما يصحى يرتب سريره وينضف أوضته
لما ييجي من بره يخلع الشراب ويحطه في الحوض ويغسله ويغسل رجله.. عوديه يغسل أسنانه، يغسل إيديه، يغير هدومه الداخلية كل يوم، يحط مزيل عرق، لما يشوف حد محتاج مساعدة يساعده من غير مايستني الآخر يطلب، علميه مايسخرش من حد ولا يشوف نفسه إنه أحسن من حد.. علميه يبص في عين اللي بيكلمه ويفهم الكلام كويس أو يتأكد إن الآخر مهتم يسمعه (عرفيه قدر نفسه وقدر اللي حواليه)
أنتي كده هتربيه يكون إنسان غير اعتمادي؛ لكن دلعك الماسخ ليه وإنك تقومي بتلبيه طلباته أو تخلي أخته تقوم بالدور ده فأنتي بتبلي المجتمع بحمى.
وبالنسبة للأب حاول تقوم بدورك كأب، أنت خلاص اتفطمت فخليك قدوة عيالك يقلدوها مش يشوفوا أمهم بتديك نصايح عن النظافة الشخصية وعدم الاعتماد عليها.. أو حتى تنصح عيالها قدامك يمكن تفهم إنها قصداك معاهم بس احتراما لدورك ومنظرك قدامهم بتقولهالك بطريق غير مباشر.
النظافة الشخصية ونظافة المكان والاعتماد على النفس مش حكر على المرأة دي بديهيات لكل إنسان عاقل، معافى جسديا.


5-إن بعد الصبر جبر

الأربعاء، 5 فبراير 2020

من كتاباتي (89)






1- شوفت فيديو بيتكلم عن التصرفات اللي لو اتعملت في أي علاقة مهما كان نوعها (أبوة، أخوة، زواج، صداقة....) بتقضي عليها بالبطيء.. هنقلهالكم بأسلوبي
١_ النقد: لو طول الوقت بتنقد الآخر وبتعلق تعليقات سلبية على مظهره وتصرفاته وطريقة كلامه وما إلى ذلك.
٢_ التقليل: مش بتقدره، مابتقولوش كلام طيب أو تثني على أي موقف منه.. دايما بتقلل من شأنه.
(الكلمة الطيبة صدقة عليكم بها)
٣_ الدفاع: في أي حوار تاخد رد فعل عدائي أو لا مبالي (أنا مالي، أنت حر، مش قضيتي، مش موضوعي، وأنا أستحمل ده ليه وما إلى ذلك.. م الآخر يعني تشيل إيدك من أي مسؤولية
٤_ البُعد: سهل تبعد وتفضل بالأيام ماتتكلمش أو تهتم منتظر الآخر يبادر .. (فلازم يحصل تواصل من أي نوع وماتناموش زعلانين، أي موقف يخلص في وقتها أو بعدها بكام ساعة، لما تتعودوا ع البُعد ده بيقلل من حميمية العلاقة.)
**

2-الأمانة لا تتجزأ.


**
3- كونك أنثى مايديلكيش الحق إنك تدخني بدون ماتستأذني من اللي جنبك
وفي الغالب يعني المدخن المفروض يحترم إنه مش لوحده وينفث دخانه بعيد وفي مكان مفتوح.

**

5- لما تحب تعرف أصل حد؛ اكرمه.
لو ملكته يبقى من أصل طيب، ولو ماتمرش فيه يبقى من أصل وضيع.

**
6- انتشار موجة من الأدعية كأنها من أطفال لا يدركون ما يقولون!
"يارب الشغل يموت" حضرتك ممكن ماتروحش، وبما إنك محتاج تروح علشان تقبض يبقى تحمد ربنا على وجوده لإن غيرك مش لاقيه.
"يارب اللي بيحب الصيف يحصله معرفش إيه" يعني لو الناس كرهوه درجة الحرارة هتقل؟ بتدعي على ناس محدش فيهم أذاك في حاجة لمجرد إنهم بيحبوا حاجة غير متوافقة معاك! (أنت مدرك أنت بتقول إيه؟).
"يارب الفيس يلغوه" طيب ماتلغي أنت حسابك من عليه.. ولا المفروض موقع كبير والعالم كله بيستخدمه يقف بس علشان سيادتك ليك عليه ملحوظات!
"يارب نيزك بقى" طيب ماتنتحر وتخلص! بتدعى إن الناس تموت منفجرة لدواعي استظراف من جانبك مثلا!
وأمثلة غيرها كتييير
إيه يا جماعة مش كدة.. اكبروا شوية واعقلوا الكلام اللي بتقولوه، الدعاء مافيهوش هزار.
وده ينطبق على الهزار البايخ المتمثل في "ربنا يحرقك، الله يهدك، الله يخرب بيتك، يخرب عقلك.......
بطلوا سفاهة بقى

**

7- -اللي مات الله يرحمه ويصبر حبايبه
لكن لو كان شخصية عامة أو منتجة في المجتمع أو عمل حاجة حلوة من حقه عليك وأنت بتنزل خبر موته إنك تتكلم عن أعماله، علشان اللي مايعرفوش يعرفه
وإنه مش مجرد شخص عادي ماكنش له أعمال تخلد وجوده.
- لما تيجي تنزل صورة ليك وتلاقي وجه حد ماتعرفوش ظاهر قدرا معاك في الكادر حاول تغروش على ملامحه.

-قولوا لولادكم عيب، ربوهم إن حريتهم تتوقف عند حدود حريات الآخرين وده معناه مايأذوش حد ولو بصوتهم العالي أو حركتهم الزايدة أو تصويرهم حد مايعرفوهوش وما إلى ذلك.
- خلي عند عيالك هدف وأنت كمان خلي عندك هدف عايز تحققه ليهم.
*أنت مش لوحدك في الكوكب.. للناس عليك حقوق.
***
8- الرفقة هي اللي بتأثر على حياة الإنسان
يا هتخليه حابب المكان ومش عايز الوقت يعدي
أو تخليه مش طايق المكان ولا الناس اللي فيه وحاسس انه لازم يمشي
بيلفت نظري الناس الكبار في السن مثلا: اللي بحس انه بيستمتع بحياته بيكون له وليف أو
انيس بيحلي حياته وبيخلي لوجوده طعم، فكرة انك تصحى كل يوم علشان عارف ان فيه حد مستني يشوفك او يكلمك او يقعد معاك او يشاركك في اي حاجة مهما كانت
وبالمقابل ناس تانية صغيرين في السن معندهمش الأوبشن ده فمابيفرقش معاهم حياتهم لانهم شايفين انهم اصلا مش فارقين عند حد






الأربعاء، 15 يناير 2020

رقصة الخذلان




تم صدور روايتي الأولى وكتابي الرابع (رقصة الخذلان) 
عن دار المكتبة العربية للنشر والتوزيع
متوفرة حاليا في مكتبة بوك استور في الجيزة
(شارع برادة - من ميدان الجيزة قبل نفق الهرم مباشرة
بجوار التوحيد والنور ومدرسة التربية الحديثة للغات
ولارسال اللوكيشن على الواتس 01030365801ّّ)


وقريبا في معرض القاهرة الدولي للكتاب قاعة 1 جناح b10



الأحد، 5 يناير 2020

تصحيح مفاهيم


- الشارع اللي بترشه علشان من وجهة نظرك يقلل التراب.. ده أذى للطريق وإماطة الأذى عن الطريق صدقة.
_ تليفون اللي جنبك اللي راشق عينك فيه وتيجي تكتب بوست ع الفيس بتباهي واستظراف.. ده تلصص وتجسس والنهي هنا واضح "لا تجسسوا".
_ أي حد بتنزل صورته وتتريق عليه أو تتكلم عنه بهدف جلب الضحك يعد من السخرية والنهي هنا واضح أيضا "لا يسخر قوم من قوم"
_أي بنت بتتكلم عنها بسوء لأي سبب على اعتبار كونك تريد نصرة الاخلاق مثلا ده اسمه قذف محصنات.
_معاكستك لواحدة لبسها ملفت بالنسبة لك كأنك بتربيها يعني ده اسمه انتهاك لمحارم الله.

لو اتحرشت بواحدة لبسها مش عجبك أنت كدة مابتعاقبهاش زي ما أنت متخيل..أنت ارتكبت معصية.
انتهكت حرمة الله، لم تغض بصرك.
هي ربنا اللي هيحاسبها أنت بره الليلة دي خالص، أنت مش قاضي الله في الأرض ولا أنت ملاك مابتغلطش، خليك في معاصيك وذنوبك المدارية وماتزودهاش بكبيرة وتجاهر بالذنب بكل بجاحة.
إذا كان الزنا اللي بيتم برضا الطرفين كبيرة ومن المحرمات فما بالك بالتحرش اللي بيتم بدون رضا إحدى الطرفين!
التحرش مالوش مبررات غير إن فاعله محتاج يتعلم عقوبة انتهاك محارم الله.
_انك توعد وتخلف على سبيل اه عادي انا عيل وبرجع في كلامي.. كده بقيت منافق.
-فتح الإسبيكر والاسكرين شوت مش دلالة على صدق ما تقول مثلا ده اسمه خيانة أمانة المجلس
- كلامك عن فلان وعلان كنوع من التسلية وتضييع الوقت ده اسمه غيبة ونميمة واحنا منهيين عنهم
وغيرها من الأمثلة كتير.

عايزة أفكركم إن أحب الأعمال إلى الله اللي فيها إفادة للناس وسعادتهم، فقبل ما تعمل أي تصرف شوف وقعه على الطرف الاخر هل هيفيده؟ هل هيفرحه؟ وبعدها اتصرف.