الأحد، 26 أكتوبر 2008

الموبايل .. للجميع

مما لاشك فيه أن ظاهرة الموبايل إنتشرت إنتشار غير عادى. وعلى كل المستويات والفئات العمرية.
لم يعُد غريب أن يحمله طفل فى مدرسة أو عامل بسيط.الكل أصبح سواء.. يحملون الموبايل.
وأصبح الشخص يتعرف من خلال نوع المحمول الذى يحمله!!يعنى لو حد معندوش موبايل هيعرفوا شخصيته إزاى!
ما يلفت إنتباهى فى إنتشار هذه الظاهرة السلبيات الكثيرة التى تصدر مِِن مَن يحملوه.
ولذلك أردت أن ألفت الإنتباه لبعض هذه الأشياء التى تصدر من البعض مِنَّا سواء بقصد أو بدون قصد.
*ضياع الأموال:
ــــــــــــــــــــــــ
وذلك من خلال:- إرسال رسائل كثيرة بلامعنى أو بدافع الدعابة.
-عمل مايسمى بالكول تون وهى النغمة التى يستمع اليها من يتصل بك .شوف الدقيقة بكام وأنت بتستخدم كام دقيقة فى المرة الواحدة وبتغير الكول تون كل قد إيه.يعنى كمان بتدفع فلوس فى حاجة أنت مش بتسمعها. وكمان بتجبر الأخرين على الإستماع لشئ قد لايفضلوه.
-عمل مكالمات للتحدث فيما لايفيد كالنميمة أو لمجرد تضييع الوقت.
-إضطرار بعض الفئات إلى السَلف لكى يشحن موبايله فقط ليصبح معه رصيد.
-شراء كفرات وإكسسوارات كثيرة جداً للموبايل الواحد.
-حمل أكثر من خط داخل الموبايل الواحد أو حمل موبايلين معاً. وطبعاً لكل خط مصاريفه.
نعانى من إرتفاع الأسعار الدائم فلماذ لانرشد إستهلاكنا!؟.
*معصية الله:
ــــــــــــــــــ
وذلك من خلال:-إضاعة الوقت.

كم يضيع الوقت من خلال ألعاب الموبايل والإستماع إلى النغمات وتبادلها مع الأخرين بصفة مستمرة .
-إستخدامه بشكل خاطئ.
كأن نستخدمه فى المعاكسات وإصطياد الفتيات.
النغمات المزعجة دون أى مراعاة للمكان أو للأشخاص.على فكرة إختيارك للنغمة يحدد نوع شخصيتك وانطباع الأخرين عنك.
إستخدام الكاميرات فى تصوير الفتيات سواء بعلمهم أو لأ. ومايترتب عليه من مفسدة.
إستخدام البلوتوث فى نقل مايخدش الحياء أو يثير الفتن.إلخ




وأخيراً أدعو إلى عدم إستخدام الموبايل فيما يغضب الله.
ولنجعل من هواتفنا أدلةً لنا لا علينا يوم القيامة.
وياريت كل واحد يقولى نغمة موبايله إيه؟.


الأحد، 19 أكتوبر 2008

حنان أُم

عارفة إنك بتحبي بنتك جداً، وعارفة كمان انها بالنسبة لك أغلى من نور عينك، ولذلك أردت أن ألفت انتباهك لبعض التوجيهات التي تساعدك على تربيتها وتنشأتها تنشأة سليمة،والبعد عن الحنان الزائد الذى قد يؤذي أكثر مايفيد.
*اجعلى علاقتك بابنتك علاقة خاصة جداً.. علميها كل شيء بأسلوب بسيط، واجعلى من نفسك مرجع لها تعرف منه كل المعلومات التي يثيرها فضولها؛ بدل ماتدور على حد تاني وتتعلم حاجات غلط.
*كوّنى ذكريات جميلة معاها علشان بعد كده تفتكر إنك كنتي معها في جميع مراحل حياتها مادياً ومعنوياً.
*علميها كيفية الوضوء والصلاة منذ الصغر.
*علميها كيفية الإغتسال بمفردها ودون الحاجة لكِ أيضاً منذ الصغر.
*علميها عدم الإستكانة والإستسلام والخضوع لمجرد إنها أنثى.
*علميها كيف تصبح طباخة ماهرة.
*اعتمدي عليها في بعض الأشياء التي تلائم سِنها حتى تشعر بالمسئولية منذ الصغر.
*علميها كيف تغسل ملابسها وتنظف مكانها وتعتمد على نفسها في كل شيء.
*هيئيها لكي تصبح زوجة شاطرة، وأم ناجحة ،وابنة بارة، وأخت صديقة ،وصديقة وفية.
عزيزتى الأم:لاتعاملي ابنتك كما تتعاملين مع الطيور التى تربيها في المنزل ويكون كل هدفك إنها تأكل كويس وبس!!.
أعطيها حرية في إختيار ماتريده من طعام.
*انصحيها دائما باتباع تعاليم الإسلام منذ الصغر،ولا تقولي كعادة الكثير من الأمهات"بنتي لسه صغيرة على الحجاب,إيه يعنى لما تكلم زميل لها في التليفون لمدة ساعات أو يتبادلون الزيارات بحِجة المذاكرة أو التعارف على الأهل! وتعمل كده قدامي بدل ماتعمل من ورايا...".
الغلط غلط سواء عَلمتي أَم لم تعلمي؛ فمعرفتك للشيء الغلط لن تبيحه بأي حال من الأحوال.
لأنك لو ماعلمتيهاش كل الحاجات دي وهى صغيرة ماتلوميهاش لما تكبر.
*كونى لها صديقة قبل أن تكوني لها أًم ،ولا تجعلي من نفسك مجرد دادة تؤدي طلباتها.
*أعطيها جميع خبراتك السيئة في إطار جميل وليس معقد حتى تأخذ الحذر.
*مش لازم اللي أنتي بتكرهيه هى تكرهه والعكس ومش لازم تقلدك في كل حاجة.
هي لها شخصيتها المستقلة فاحترمي ده.
*لاتعتمدي على إنها مُتعلمة أكثر منك وتبخلي عليها بمعلوماتك على إعتبار أنها عارفة كل حاجة لأن فيه حاجات كتير المدارس مابتعلمهاش.
وبلاش التفرقة العنصرية بينها وبين أخوها.. اللي يغلط يتعاقب مع معرفة خطأه حتى يتجنبه. واعرفي أن المبادئ مابتتجزأش الغلط غلط سواء من ولد أو بنت.
*ادعي لها دائما بالخير وبما تتمناه فتخيري الدعاء الذى يسعد قلبها.
وأخيراُ هي تحتاج أن ترى حبك لها بأفعال تفيدها، فاجعليها سبباً في دخولك الجنة.


يسعدنى إضافة هذا التعقيب من الأستاذTamer Alhosiny
ــــــــــــــــــــــــــــــــــــــــــــــــــــ
ياريت كل بنت أو صديقة أوقارئة تبقي كدة علشان نرجع بجد أفضل أُمة أخرجت للناس وننبه الرجال أن يلتفت لتدين المرأة لأنها مفتاح سعادته طول حياته وسر نجاح أولاده.

الأربعاء، 15 أكتوبر 2008

عِتاب

وبتقول بتخاف عليا
وإني عندك بالدنيا ديا
وبتسألنى عن سبب جرحي 
وأنت مش حاسس بيا
طب بتسأل ليه
رد جميل
ولاموقف واتحطيت فيه
ويا يعدي يامش هيعدي
لأ هيعدي
لأنك عارف غلاوتك عندي
مشكلتي معاك ياعنيا
إني مش حاسة بأهمية
بس أدينى أمارة
أنا راضية بأي إشارة
تبرر لى بيها عمايلك
وتخلينى أصالحك
وماتقوليش بعدين
هو أنا بفرض نفسي عليك
ولا أنت عاجبك كلامي
ولهفتي وشوقي وغرامي
طب قولي أعمل لك إيه
أمشي وأسيبك
ولا أستنى
يلا رد عليا وأقول
إمشي براحتك ولا استني
لو حابه وجودك إستني
بس أنا ماشي ومش جاي تاني
أنا ياحبيبي خلاص مليت
في بعادك وبقول حنيت
وأفضل أصالح روحي عليك
لحد ماتصفى وبرجع ليك
وإذا كنت بتقدر تبعد
فأنا تلميذتك
وأنت اللي ابتديت
قبل ما أمشي ليا سؤال
حبتنى بجد ولا نسيت
بقلم: أمة الله/موناليزا
********************
# هناك أشخاص لايستحقون العتاب فلا تضيع وقتك وتهدر كرامتك معهم.

الخميس، 9 أكتوبر 2008

طبيب أطفال

سأقص لكم ماحدث حينما مرض ابن أخى الصغير وذهبت به إلى الطبيب لتشاركونى رأيى وهل ما سأقصه طبيعى الحدوث أم أنى أهول الموقف.
1- قمت بالحجز وذهبنا قبل الميعاد ومع ذلك لم ندخل إلا بعدها بأكثر من ساعتين.
وسؤالى هنا بما إن مفيش إحترام للمواعيد عامل الكشف بالحجز مسبقا ليه؟؟؟ -وكأن المرض هيستأذن قبل ماييجى-.
2-العيادة ممتلئة جداً ولا يوجد بها مروحة فلكم أن تتخيلوا الحر والنفس فى المكان بالإضافة إلى أن أغلبية الأطفال من شدة آلامهم وطول إنتظارهم ناموا يعنى طبيعى جسمهم سخن أكثر.
المفاجأة بقى حين دخولى أخيراً لغرفة الطبيب أجد فيها تكييف ومروحة مُسلطين على الطبيب وهو أصلاً بيكشف على الأطفال أمامه فيوجد منضدة من الجلد يستخدمها للكشف.
يعنى البرودة مسلطة على الأطفال المرضى.-يعنى اللى بيشاور نفسه للمرض هيمرض إجبارى-.
3- يدخل مريض على مريض آخر.يعنى الممرضة قالتلى:أدخلى وأجلسى فى جانب الغرفة.
دخلت وجدت أم وابنها. أنا توقعت أنها انتهت وأنه يادوب بيكتب الروشتة. وجدته لسه بيبدأ معاها.
وما حدث معها حدث معى دخل علينا أسرة بابنها المريض!!
أين خصوصية المريض!!! حتى لوكان طفلا .
4- نيجى بقى على الحوار الظريف بينى وبين الطبيب.
- خير يادكتور
- نزلة معوية حادة
- ودى إيه سببها؟
- يعنى أنا اللى جيبتهاله!
-مش قصدى بس هو أصلاً مابياكلش!
-يعنى آجى أأكله أنا !!
- طيب ممكن تكتبله فاتح للشهية؟
-مفيش حاجة اسمها كده لما الجوع يقرصه هيبقى يأكل.
"هو ده حوار مع طبيب ولا خناقة!!!!"
ومن خلال هذا الموقف أوجه نصيحة لجميع الأطباء.
* رفقاً بالمريض وأهله وراعى ماهم فيه.
* تبسمك فى وجه أخيك صدقة.
* الكلمة الطيبة صدقة.
*عامل المرضى كما تحب أن يعاملوك حين تمرض.




السبت، 4 أكتوبر 2008

توابع رمضان

إبدأها دايما بسم الله
رزقى ورزقك على الله
انسى همومك
مين هيلومك
وماتلجأش لغير الله
خلى توكالك على الرحمن
دى الصحرا تبقى بأمره طوفان
لو جوه قلبك نار بركان
مين هينجيك غير الله
يمكن بروح مليانة إيمان
تشوف رسول الله فى منام
وتنول رضا ربك وأوام
تلاقيها فرح بإذن الله
وآه لو تبت كده لله وبكيت
وربنا خلاك زرت البيت
وجنب رسول الله صليت
تشكر مين بقى غير الله

(مقدمة برنامج الكنز المفقود)

*******************

يا من إذا دعوناه وجدناه قريب. نسألك يا الله ياملاذ كل غريب .أن ترزقنا الحياة على خطى الحبيب.

(مقدمة برنامج على خطى الحبيب)

***************************

لسانى دائما أجده يردد هذه الكلمات ولِمَ لا وقد استمعت إليها طوال شهر رمضان وهذا نبهنى إلى شئ هام جداً وهو أن كثرة استماع الشئ تجعلك لا إراديا تحفظه وتردده. يعنى لو عايزة أحفظ أغنية معينة يكفى إنى أسمعها يومين تلاتة وأنا أحفظها.وبرضه لو عايزة أحفظ سورة معينة من القرآن أسمعها كتير وأنا أحفظها على طول.

ولذلك عايزة أعرف إيه اكتر حاجة لسانك بيرددها اليومين دول؟؟