الأحد، 28 ديسمبر 2014

من كتاباتي (31)




1- التصفيق: إحساس مبهج بالفرحة.

--------------------------------------------

2- للخيانة رائحة لا تخطئها أنف الأنثى.

-----------------------------------------

3- يعني ايه ربنا يحبك؟

يعني بعد ما تعصي يبعتلك وسيلة للتوبة والاستغفار.

-----------------------------------------------------

4- يا ترى قبل ما تنوي الإنجاب

 متأكدة أن صحتك النفسية تؤهلك لمنصب أم !

-----------------------------------

5- - بغض النظر أن الشتيمة بقت أسلوب حياة عندالغالبية

 لكنها تعبر بشكل أو بآخر

عن مدى تلقيهم للتربية والأخلاق في نشأتهم.

------------------------------------

6- هو بعد ما العمر يروح إيه اللي ممكن يعوضه !

----------------------------------------

7- الدنيا مش مستاهلة تزعل حبايبك

 أو تأجل فرحة هما مستنينها.

------------------------------------------------

8- جيل بيسلم جيل.

--------------------------------------

9- مفيش حاجة بتفضل على حالها.

------------------------------------

10- ما أجمل اللقاء وما أقسى الفراق.

------------------------------------

11- حذار عند الغضب أن تدمر من لا ذنب له.

--------------------------------------

12- 

ماهو مش معقول أعادي حد لمجرد أنه مختلف مع آرائي

أو أن كلامي ما بيعجبوش!!

حرية التعبير مكفولة للجميع

والاعتراض على أي فكرة أو رأي أو موضوع مطروح وارد

العبرة هنا في كيفية التعبير عن الاعتراض

 وعدم تجاوز الأدب في الحوار.

----------------------------------------

13- هي حاجات صغيرة،

بس بتبين أنت عندهم عامل ازاي.

------------------------------------------

14-السعادة أن تطفو روحي من أعماق نفسي 

حتى تعانق السحاب منتشية بقدرتها على التحليق

 في مرتع الكون بلا قيود أو خضوع لحدود.

----------------------------------

15- 

من أنا حتى أصف شخصاً ما مهما كان بالعهر!!

من أنا حتى أسخر من خِلقة شخص ما !

من أنا حتى أحكم على دين أحدهم!

من أنا حتى أنصب نفسي واعظ !

أنا أمة الله الفقيرة التي ترجو رحمة الخالق 

والتي تنكس رأسها خجلاً من فرط كرمه

وإسدال ستره وليس لي في الحكم على أحد.

--------------------------------------

16- من فوائد الحاجات الكتير اللي بتكون جوه النيش

أن بيكون عندك بديل لما ولادك يكسروا اللي عندك في المطبخ

ومابتبقيش مضطرة ساعتها تشتري جديد


------------------------------------------------

17- رسالة لكل أب مابيقعدش مع ولاده ويكلمهم ويسمع منهم: 

أنت فايتك كتير أوي.

----------------------------------------------

18- 

عمرك فكرت والدنيا بتشتي

 أن من رحمة ربنا أن السماء بتنزل ميه مش أي حاجة تانية..

ده غير أنها بتنزلها سواء بقطرات أو سيول

 وليس على هيئة شلالات مثلاً!

-----------------------------------------

19- 

علمك بالذنب حين اقترافه لهو كارثة.

وندمك بعده وتيسير سبل التوبة لهو رحمة.

فما بالنا برب يعصاه عباده وهم على علم بما يفعلون، ثم حينما

 يستغفرون يتقبلهم، ويعلمهم خطوات التوبة،

 بل ويفرح بعودتهم وإنابتهم ويبدل سيئاتهم حسنات.

---------------------------------------------

20- 

فكرة أن الحيوان بيحس لكن مابيعرفش يعبر

 بطريقة تخلي الإنسان يفهم مشاعره

 دي فكرة صعبة أوي.








الخميس، 25 ديسمبر 2014

من قراءاتي (21)




1- تكرار التجارب لها هدف وحيد: تلقينه ما لم يتعلمه بعد..

لباولو كويلو

---------------------

2- الأشياء المهمة ستبقى؛ أما التافه منها فسيتلاشى.

لباولو كويلو

-------------------


3- تتمسك باختيارك مع احترام اختيارات الآخرين تبقى صاحبي وحبيبي،

 وسأحترمك حتى لو ثبت أن اختيارك كان خاطئا،

 تضغط على أعصابنا باختيارك وتحاربنا وتعكنن علينا

 لن يرحمك أحد حتى لو ثبت ان اختيارك كان صحيحا.

لعمر طاهر.

------------------------


4- تمسك باختيارك لكن أجل حماسك العدواني لحد ما يبان لاختيارك أي أمارة.

لعمر طاهر

-------------------------


5- هل سمعت صوت ارتطام قلبي أمام قسوة عينيك؟

إن لم تنحنِ أنت لتجمع دقاته من جديد فلا حاجة لي به.

لآية محمد حماد.

----------------------

6- يمكن أن تحكم الناس بالقمع والخوف

 لكن الخائفين لا يمكن أن ينتصروا في حرب

لبهاء طاهر.

-------------------------


7- الحكاية لا تكتمل بروايتها وإنما يكملها من يسمعها.

لبهاء طاهر.

----------------------


8- إن الهزيمة لا تنزع البطولة عن الثوار.

لبهاء طاهر- واحة الغروب

-------------------

9- المرأة تحتاج إلى من يملأ خواءها،

لا إلى من ينزع منها ما تبقى من حياة.

لواسيني الأعرج.

----------------------


10- عند الشدائد؛ التراخي هو الخطيئة الكبرى.

لدان براون.

--------------------------


11- طوبى لكل عاشق يحظى بياء الملكية من معشوقته عند النداء.

لأشرف الناصر.






الأحد، 21 ديسمبر 2014

ملاحظات متنوعة






(1)

سيدة مسنة تقطن في دار المسنين تعيش من معاش أبيها!!

ماذا لو كان أبوها تاجر مثلا أو أرزقي.

يا ترى كانت هتصرف منين!!

وياترى الناس المسئولة عن بيت وأطفال وهم يعانون من البطالة

 أو من وظيفة ليست ثابتة لو ماتوا أسرتهم هتعيش إزاي وهتصرف منين!!

عرفتوا بقى الناس بتتقاتل على شغل الحكومة ليه؟

لأنه مضمون ليهم ولعيالهم

-------------------------------------

(2)
لما بقرأ عن الدين في الروايات العالمية بحس إن الدين واحد فعلا


فالغالبية على اختلاف ديانتهم يؤمنون بأن الله موجود، وبأن الانتحار حرام،

وبأن ليس من اللائق مثلا أن أعطي لأحد شيئ باليد اليسرى،

ولا يجوز خنث الوعد، 

وأن الكل يعبد الله بطريقته ويراعي ما حرمه ليتجنبه،

وأن الأخلاقيات واحدة،

وغيرها من الأشياء... 

دي رسالة لأي حد شايف المسيحي واليهودي شياطين علينا إحراقهم!

ليتنا نتعامل معهم من منظور "لكم دينكم ولي دين" 

دون إساءة أو نظرة متعالية.

فلا أحد يملك صك دخول الجنة مهما كانت أعماله.

فلن يدخلها أحد إلا برحمة الله ولا حتى رسول الله.

نسأل الله أن لا نكون فتنة وأن يجنبنا منكرات الأعمال والأقوال.

--------------------------------------

(3)

عن أفلام الثمانينات( نجلاء فتحي، حسين فهمي، سهير رمزي ، ناهد شريف......)

اللي بيلفت نظري أن القبلات والأحضان كانت بالنسبة لهم دليل على علاقة الحب

وكأن لو ده ماحصلش المُشاهد مش هيصدق

 ده غير طبعا الميكروجيب والمايوهات البكيني والسهر في الديسكوهات

وحاجات تانية كتير لو حد فكر بس يعملها اليومين دول في فيلم هيقيموا عليه الحد

والغريب أن عمر ما حد اتهمهم بالفسق والفجور

 زي ما بيهاجموا أفلام خالد يوسف مثلا دلوقتي

السؤال هنا

ليه بنقيس الأمور بمعيارين

ماهو أصل الحرام والعيب واضح في كل زمان

وكأن اليومين دول فقط اكتشفنا أن فيه دين اسمه إسلام 

وأن الحاجات دي ما تنفعش فيه!

ومع ذلك مازالوا هم "زمن الفن الجميل" !!

-------------------------------------------


اللي بيلفت نظري في أفلام زمان (الأبيض والأسود)

ماتلاقيش أسرة مصرية مهما كان مستواها المادي قليل 

إلا ويكون عندها شغالة أو أكتر

وكأن لقب (ست البيت) كان بجد على اعتبار أنها فعلا السيدة وعندها خدم.

----------------------------------------


عن  أفلام ومسلسلات اليومين دول" احنا شعب غلبان".

---------------------------------------------

زمان لما كنا بنتفرج على حاجة في التليفزيون

والممثل يقول ترجمة كلمة انجليزي مثلا غلط كنا بنضحك

لأننا كنا عارفين معناها الحقيقي

لكن دلوقتي يوم ما الكلمة الغلط تتقال قدام جيل لسه بيقول يا هادي

هيتعلم منها وهيفكر أنها صح

وربنا الإعلام رسالة 

ليه مايفكروش مثلا يكون المعروض عموما هادف ويعلم جميع الأفراد

زي مثلا الإسعافات الأولية تكون داخل مشهد في فيلم

تخزين الخضار يكون مشهد في مسلسل

صنع التورتة يكون مشهد في فيلم 

كيفية تجفيف الشعر بعد الاستحمام يكون مشهد في كليب

كيفية السيطرة على حريق مفاجئ يكون مشهد في إعلان

وهكذا

---------------------------

ليه مايبقاش في مادة عن الاسعافات الأولية في المراحل الدراسية

بدل الهبل اللي بيدرسوه وبعدها التلميذ مابيبقاش فاكر حاجة منها.

-----------------------------------------------

(4)

ظاهرة النقاب بعد أداء الحج!

ظاهرة النقاب بعد الوصول لأرذل العمر!

وسبحان الله الأخلاقيات هي هي!!!

----------------------------------


لأ حضرتِك الحجاب مش مجرد غطاء للرأس

في حاجات تانية مهمة لازم تتغطى معاه

منها مثلا الصدر.. مش لازم اللي يشوفك يعرف مقاس حضرتك كام.

---------------------------------------------



لا يصف ولا يشف

لا يصف ولا يشف

لا يصف ولا يشف

-----------------------------------

مابشوفش الاسبانش حجاب

------------------------------------

أيوة حضرتك احنا شعب بتاع مظاهر

شئت أم أبيت هذه حقيقة لا مفر منها

----------------------------------------



أفضل أن الناس تقول هي ليه مش لابسة نقاب عن هي لابسة نقاب على إيه!

--------------------------------------------
(5)


- "يا خايبة مش عارفة توقعيلك واحد".

- "أنتي اللي واطية وفرطي في نفسك".

الاتنين من لسان نفس الشخصية !!

السؤال هنا هي ليه الأنثى دايما مدانة؟

-------------------------------------

يا سلام لو الزوج يقدر تعب زوجته ومجهودها في شغل البيت

 وحاول يساعدها أو على الأقل مايزهقهاش بطلبات هو ممكن يعملها لنفسه

أو يثني على مجهودها (يثبتها بكلمتين يعني)

السؤال هنا: هيحصلك حاجة لو عملت كده؟

-----------------------------


الجدير بالذكر أن الزوج في الإسلام ملزم بتأثيث عش الزوجية ودفع مهر للزوجة.

قوم إيه بقى

احنا قلبنا الموازين وبقت العروسة ملزمة معاه

ومش كده وبس ده العريس وأهله بقوا يتشرطوا كمان على أهل العروسة

 بأنواع ماركات يمكن هما عمرهم ما استعملوها أصلا

وممكن جدا الجوازة تبوظ بسبب طقم صيني العروسة جابته 6 مش12!



---------------------------------------

(6)

- ماينفعش آخد تعليق من عند حد كوبي وباست علشان أوريه لحد تاني

حتى لو بستشهد بيه طالما التعليق كان في أكونت خاص أو جروب مغلق.

- ماينفعش أصور أستاتيوس لحد كاتبه على الأكونت بتاعه الخاص

 وألف بيه على الجروبات مثلا من غير إذنه

- ما ينفعش أصور رسايل الأنبوكس لأي سبب بدون استئذان المرسل أو الراسل

- ماينفعش أنقل أخبار حد اللي كاتبها على الأكونت الخاص بتاعه

 لناس مش عنده لمجرد أنهم سألوني.

- ماينفعش تبقى جاسوس من الآخر.. وحشة أوي في حقك

ده غير أن الأمانة هتتجسد يوم القيامة وتقف على الصراط

وهتقول أنك خنتها شوف وقتها هترد تقول إيه.

-------------------------------------


واحد واخد قصة مستهلكة على صفحات النت ومنزلها على جروب أدبي 

ولما عرفته ده قالي بكل براءة إن الاخراج النهائي أكيد مختلف ووارد تشابه الأفكار!!

والكل داخل يمجد فيه وهو يشكرهم عادي وعايش الدور !

اللي جه في بالي وقتها مصيبة أكبر من الموقف ده

وهو سرقة كتابات الأقلام الغير مشهورة بكل بجاحة ودون وجود رادع لهم

لمجرد أن ينال بعضا من الإطراء الزائف على الجروبات المنتشرة على الفيس!

----------------------------------------
(7)

وهي دار النشر إيه 

غير توزيع كويس،ومصحح لغوي شاطر،ومصمم أغلفة محترف.

غير كده فأي مطبعة ممكن جدا تأدي الغرض وبنص التكلفة كمان.

--------------------------------------

المهم أنت بتحب الكاتب ولا لأ!

لو بتحبه ولقيته عمال يحكي مثلا عن طفولته ويسهب في الوصف والسرد

هتكون مستمتع جدا ومش عايز الوقت يخلص.

لو ما بتحبوش بقى واتكلم عن مشروع تخرجه بنفس الوصف المفصل

 هتبدأ تعد الورق.

ملحوظة: بتحب الكاتب يعني بيعجبك أسلوبه ومفرداته وطريقة استخدامه للغة

الحب بيكون شفيع في كل حاجة

-------------------------------------------------


بالنسبة لموقع بيع الكتب بصيغة"pdf"

أنا شايفاه استهبال من دار النشر ليه بقى؟

لأن النشر الإليكتروني وتحويل الكتب الورقية مش هيكلف جنابك حاجة

ولا حتى تمن حبر وطباعة ورقة واحدة فتبقى عايز تاخد فلوس على إيه حضرتك؟

-------------------------------------

بالنسبة لمصممي الأغلفة اللي بيشتغلوا في دور النشر

نفسي ألاقي غلاف من تصميمكم يعبر عن مضمون الكتاب

فين الإبداع لما تجيب صورة من ع النت وتعملها غلاف لكتاب!