من كتاباتي (77)

1- لو اتحطيت في موقف خلاك جدع إجباري ماتتكلمش عنه بعد كده..
 كلامك ومنك باللي عملته هيخليه مالوش قيمة 
بل ممكن يندم الطرف الآخر إنه لجأ لك.. 
نصيحة: سيبه يشوفك جدع للنهاية.

2- ألتقط الصور بعين المُحب، لذا؛ عدستي دوما الأفضل.

3- وكأن وظيفتهم في الحياة: كسر المقاديف

4- هو مش شخصية مبهرة ولا حاجة
أنتي بس علشان اللي اتعاملتي معاهم عالم زبالة ومالهمش كلمة
فلما هو عمل العادي توقعتي انه عمل جميلة
لكن الواقع إن الصدفة هي اللي خلته يتصرف عادي
 ومايكونش حيوان زي الباقيين بس
فماتديلوش أكبر من حجمه.

بلاش الملامة

لما تشوف حد إيمانه قل، وعبادته فترت، وطاعته وهنت، والتزامه مابقاش موجود.. ماتلوموش ولا تنفر منه.. ادعي بس وقتها إنك ماتتحطش في نفس الظروف اللي خلته كده.
إحنا بشر مش ملايكة.
وربنا بيحب العاصي والغافل لما يرجعوا أكتر من العابد المرائي.
ماتلومش الجعان مثلا لو أكل حاجة حرام أو مش بتاعته.. لإنك ماكنتش مكانه وماجربتش حرمانه على مدار سنين بعد ماكان غني مثلا وافتقر..
ماتفكرش إن ده كان سهل عليه وإنه ماكرهش نفسه وقتها..
 يمكن وقتها كان بينتقم من القدر اللي مانصفوش.. ويمكن مايكونش شبع ولا حس بأي متعة .. يمكن يكون فعله كصفعة للحياة تنبهها أنه إنسان وصبره خلص.

اللي ضعف محتاج حد يقويه مش يساعد الشيطان إنه يشمت فيه
وأكيد تقويته مش بطريق مباشر ونصايح ومواعظ هو أكيد حافظها.
لو في إيدي أساعده بأكل ..مش أقوله بطل تاكل حرام،
أو أرجعه يدوق طعم الحلال.
ولو مفيش في ايدي حاجة اعملهاله ادعيله بالهداية وادعي لنفسي بالثبات

محدش معصوم وكلنا خطائين.

من كتاباتي (76)

1- أنا مايهمنيش مشاعرك ليا على قد مايهمني معاملتك ليا.

2- مش كل العلاقات زوج وزوجة.

3- حتى لو هي اللي طلبت تنهي العلاقة مهما كان نوعها.
موافقتك ببساطة كده بتوجعها.

4- مش معنى إنك بتحب حاجة إنها ملكك

أو إن ده يديك الحق تفكر تستخدمها تحت وطأة مشاعرك تجاهها
استخدامك ليها لو حصل هتكون لص ومشاعرك مش هتشفع لك بالمرة
الحب فعل روحي
الامتلاك فعل جسدي
لو حبيت حاجة وعايز تستخدمها امتلكها الأول.

5- مش معنى إنهم عايشين تحت سقف واحد، إنهم قريبين من بعض!

6- اشحنوا رصيدكم دايما في قلوب عيالكم

ماتعتمدوش على بر الوالدين وانه فرض عليهم
ازرعوا جواهم حب وحنان ورعاية واهتمام علشان تحصدوا ده بعدين لما تكبروا

7- سجدة الفرحة؛ حضن

8- فقط، إن أراد أن يقول للشيء كن؛ فيكون.

فاللهم إئذن بكن، ليكون.

القطط اتغيرت

القطط اتغيرت
ماعادتش تهشها تتهش
لأ ده بقى فيه نوع من فرض السيطرة وإثبات الوجود
بقت تفضل مكانها لو حد قرب منها عادي بكل ثقة
ولو حد حدفها بطوب ممكن تهبش فيه
ولو حد اتغابى عليها مابتسكتش

النهاردة فتحت شباك اوضتي على صوت ولد بيزعق ببص لقيته قاعد ع الأرض ممدد وفيه قطة ماسكة بنطلونه بإيدها وأسنانها (واخدة وضعية النوم) والولد مش عارف يفلتها
فين وفين لما حد جه أنقذه منها
بحكي لابن اخويا ع الموقف واستغرابي ازاي القطة تعمل كده .
 قالي أكيد عمل فيها حاجة وحكى لي على كذا موقف يبين أنه فعلا القطط اتغيرت..

مفيش حد بيفضل على حاله.

مش معنى إن كائن أليف بطبعه أنه في كل مرة يسمح لك تهينه تحت أي بند أو إنه يخاف ويبعد.

وخصوصا إن بعده بيزود جرأتك عليه لكن رده عليك بيخليك تعرف حجم نفسك وماتقللش من قدره قصادك.

ماتجوش ع الطيب علشان قلبته مش حلوة واتق شر الحليم إذا غضب.

من كتاباتي (75)

1- إذا كانت هي بعدت لأسباب كتير
فأنت ماكنش عندك سبب واحد يخليك تقرب.. غير إنك كذاب وحيوان.

2- الحب علاج يعجل بالشفاء.

3- مش من مصلحتك في علاقتك بيها تنام وأنت عارف إنها زعلانة منك، ويعدي يوم من غير ما تفكر تراضيها.. وارد جدا على ماتفكر تصالحها تكون هي قفلت طريق وصولك ليها.

تكبير الدماغ مالوش عندها غير إنك مستهتر بيها.

4- الناس كانت بتستغرب اللي بتخلع الحجاب أو النقاب وتعلن عن ده ع الفيس تحت بند إيه الانجاز في كده أو واحنا مالنا ما انتي حرة

أحب أقول إن البوستات دي بالنسبة لي بصفة شخصية بتكون مفيدة لعدم إبداء الدهشة فور رؤية الشخصية بعد التغيير
اللي هو آه ما أنا عارفة فمش هستغرب هيئتها الجديدة ولا هقولها أي تعليق من أي نوع حتى لو بدون قصد.

5- أعتقد إن السجن الانفرادي يعتبر عقاب قاس لانك فيه مابتلاقيش حد ياخد ويدي معاك.. حياتك رتيبة صامتة.

المساواة بين أبنائك

مما لاشك فيه أن الشعور بالظلم أو الاضطهاد أو النبذ أو الحرمان من أقسي المشاعر التي قد تمر في حياة الفرد
مابالك لو جاء هذا الشعور من الأم أو الأم تجاه أحد أبنائها
- ساوي بين عيالك في العطية.
- اجبر خاطرهم وراضيهم.
وماتقولش أصله كبير والتاني صغير
أو هي بنت وأخوها ولد
أو أصلها شبه أمي وأختها شبه حماتي
وأي مبررات أخرى تبدو لسامعها سفيهة
- ماتخليش ابنك يحتاج حاجة مادية طالما تقدر تساعده ومن غير ماتستناه يطلب منك.

من كتاباتي (74)

1- أقسى أنواع الوجع اللي مالوش علاج
اللي هو أنت مش مستني دواء يعالجه.. 
أنت مستني جسمك يتأقلم عليه أو يخف لوحده

2- ماتتجوزوش عيال

ملهاش علاقة لا بسن ولا بتعليم
اتجوزوا شخصيات ناضجة.

قذارة المتحرش

مش منطقي حد يكون بياكل سواء في الشارع أو في المواصلات مثلا، وحد يخطف منه حتة.. ولما صاحب الأكل يهزأة أو حتى يمد إيده عليه يكون دفاعه "أصل الأكل استفزني" أو لو عايز يكسب تعاطف المارة يقول "أنا معقول أبص للأكل ده؟ مش شايفين شكله عامل إزاي" ومش إنساني بالمرة إنك كمتفرج تقف مع الحرامي وتقول لصاحب الحق "محصلش حاجة أو ماتكبرش الموضوع"!
 ياريت تتخيل للحظة إن الأكل بتاعك فيه حد قذر مد إيده عليه، وشوف رد فعلك وقتها .. لو مش هتقف مع صاحب الحق يبقى تخرس.
أما عن السارق فهو لا يستحق سوى أن يكون عبرة.
هكذا هو الوصف الأمثل للمتحرش.

من كتاباتي (73)

1-هي معندهاش دليل مادي لكن إحساسها كفاية.

2- اليوم اللي بيعدي بدون ما تأذي نفسك ولا تأذي غيرك

- سواء بقصد أو بدون قصد- ده يعتبر إنجاز.

3- وتعلمت على يديه فن الاستغناء.

4- ماتستهونوش بالفروق في المستوى بينكم وبين أي حد بتتعاملوا معاه.

إنها الفتنة

حينما تتأخر إجابة الدعوات
حينما لا ينصر المظلوم
حينما يطغى الظالم ويستمر دون توقف
فلتعلم إنها فتنة عظيمة ادعوا الله حينها أن تخرج منها بإيمانك على خير
اللهم إذا أردت بقوم فتنة فاقبضني إليك غير مفتون

الحضن المفقود في ساقية الصاوي

أدعوكم جميعا لحضور جلسة توقيع مجموعتي القصصية (الحضن المفقود)
وذلك بمشيئة الله يوم الجمعة 17 أغسطس في تمام الساعة الخامسة عصرا
في ساقية الصاوي .. جناح دار المكتبة العربية أمام المسرح

أعتقد هتكون فرصة جميلة إني أشوفكم فياريت اللي ظروفه تسمح مايتأخرش.
في انتظاركم جميعا بإذن الله

من كتاباتي (72)

1- كل حاجة متأخرة بتبقى ماسخة
الصلح لو اتأخر، صاحبك اللي استنيته كتير وفي الاخر جالك تاني يوم، 
أي حد بيهنيك على حاجة بعدها بكام سنة أو يواسيك بعدها بكام شهر، 
وغيره وغيره

2- فيه اتفاق ضمني بين النساء إن الزوج خط أحمر
 ماينفعش تقربي منه وده لأن الرجل بطبعه عينه زايغة..
 ولذلك بيتم معاداة الزوجة الثانية مثلا لأنها انتهكت العرف الغير معلن بين النساء.

3- كلامها معاك حب

مهما كان بالنسبة لك تافه وثرثرة فارغة.

لا تتلصص

انتشر مؤخرا ظاهرة التصوير بعد ما بقت الموبيلات متاحة للجميع لكن المؤسف هو التعدي على حقوق الغير بتصويرهم دون درايتهم ونشر هذه الصور مع تعليقات تكاد تكون سخيفة

في بلد أكثر تحضرا ورقيا
محدش يقدر يهدد حد بصور أو رسايل لأن ده هيعتبر انتهاك للخصوصية تستوجب العقاب

عيب نبص ع الجيران من ورا الشيش مثلا

عيب نشوف حد بيلتفت يمين وشمال قبل ما ياكل من الزبالة مثلا وبدل ما تدور وشك وتمشي في طريقك تقوم مصوره ومنزل صورته.

إيه قلة الأدب والوقاحة دي!!

عيب تشوف اتنين ماسكين ايد بعض مثلا وتصورهم وتشردهم.. دي أعراض ناس!! وعليك تخاف لإنك كده كده هتسدد الفاتورة

مازلت أذكر قول فتاة "حين سيري بالدراجة ألتقط أحدهم بهاتفه صورة لي أثناء وقوفه في شرفته، هو حتما سيتشرها على حسابه في مواقع التواصل الاجتماعي قد يكتب عنها تعليقا ظنا منه أنني أفعل شيء عيب ولكن مالايعلمه هو أن تصويره لي هو مايعد عيبا"

وأخيرا أذكركم ونفسي بحديث المصطفى صلى الله عليه وسلم  " من اطلع في بيت قوم بغير إذنهم ففقئوا عينه فلا دية ولا قصاصاً"

من كتاباتي (71)

1- كل ماقلتلها "بحبك" بسرعة
كل ماخسرتها بنفس السرعة
الاستعباط حلو وبيحافظ على العلاقة أكتر

2- إنك تشتري حاجة مظبوطة 
ده يعتبر رزق

3- اللي عايز يشوف حد هيصنع الفرصة لرؤيته 

مش هيستنى القدر يلعب لعبته

من كتاباتي (70)

1- المواقف هي اللي بتغربلهم.

2- المزيفون يرحلون، وحدهم الأصليون يبقون.

3- الأعمى ليس من فقد حاسة البصر
الأعمى الحقيقي من فقد إحساسه بمن حوله.

4- الاستقرار الممل أفضل كثيرا من الأحداث السيئة.

5- فيه جزم مابنعرفش نحكم عليها وقت الشراء.. بتكون بالنسبة لنا كويسة ومريحة واحنا بنجربها.. لكن الاختبار الحقيقي هيحصل في أول خروجة وأنتي لبساها فعلا.. ووقتها ياهتقرري تلبسيها على طول أو تتصدمي انك اشترتيها أصلا واتدبستي فيها.

6- خروج المُحجبة في الجو ده أنا بعتبره جهاد.

تأملات في الجسد

خلعت فردة حذائي ذو الكعب العالي، ووقفت لأجد الفرق كبير.. كان نصف جسدي يميل مشيرا بأن النصف الآخر أطول منه. حين تأملي للموقف سرحت في بديع خلق الله.. وكيف أن نصف الجسد الأيسر والأيمن متساويين ومتشابهين حد التطابق.. فماذا سيكون الحال لو أن ساق أطول من الأخرى، أو ذراع أقصر من الأخرى، أو قدم يختلف مقاسها عن القدم الأخرى، أو عين ترتفع قليلا عن العين الثانية، أو فتحة أنف أكبر من الفتحة الأخرى، أو نصف الشفاه العلوي مثلا أغلظ من النصف الآخر وما إلى ذلك..
ما أروع صنع الله الذي أبدع خلق الجسد البشري الظاهري بكل دقة.
ثم كون المعظم يستطيعون الوقوف والمشي واستخدام أعضائهم بكل عفوية..

حينها حمدت الله على نعمته وجال بخاطري أصحاب الإعاقات المختلفة، ووجدت أنهم بمثابة منحة لنا، لنعلم أنهم لايستحقون منا غير كل المودة والرحمة وأن نحذر من السخرية أو الشفقة أو أي نظرة جارحة أو مهينة لهم، وأن علينا أن نبذل لهم كل ما نستطيع من مساعدة.. فقد كان من الممكن أن نكون في هذا الابتلاء ولكن الله من علينا بالعافية.

من كتاباتي (69)

1- محدش ملزم يعملك حاجة
طالما مابياخدش أجر عليها
 فيوم ما حد يعملك حاجة لازم تقوله عليها شكرا.

2- هي فعلا شوية وهتهدى ومع الوقت هتنسى

 لكن اللي اتكسر جواها منك طالما ماجبرتوش هيفضل يبني حاجز بينكم وتفضلوا أغراب مهما كنتم تحت سقف بيت واحد.

3- لما تنوي تعمل حاجة

اعملها صح
ده علشانك قبل أي حد تاني
 الحاجة الصح مش هتبوظ بسرعة ولا هتحتاج كل شوية تظبيط

4-الصنايعية بيتعبوا فعلا
ياريت مانفرهدهمش
هما أوك بيأفوروا في سعر شغلهم بس كل واحد حر يقدر القيمة المادية لجهده المبذول
 أنت ارتضيت بكده قشطة راضيه بقى وأديله أجره.

5- الصلح أوقات مابيبقاش خير ليك.

6- - لما تقدم خدمة مدفوعة الأجر مع حد تأكد أن صاحب الخدمة أهلا للثقة.

7- الالتزام لايعني انعزال الحياة.

8- أولى درجات الفساد الإهمال.

9-أنت لاتملك سوى ماتستخدمه فقط.

10- لما اللي مابتعرفش تعمل حاجة معينة تتعلمها مخصوص علشانك يبقى تحطها على راسك..

11- انتقامك الوحيد إنك تنجح.

12-الدين المعاملة.. مش مهم مظهرك ودراستك ووظيفتك المهم تعاملك مع الناس.. عبادتك لنفسك ربنا اللي هيحاسبك عليها.. لكن المعاملة للناس كافة مهما كان دينه.

الصداقة

الصديق مش هو اللي ترغي معاه بالساعات ويكون معاك كل يوم
الصديق الحق هو اللي لما تحتاجه تلاقيه
هو اللي لما تقابلك أي مشكلة من أي نوع بتبقى عارف إن وجوده يا هيحلها هيساعدك على حلها ياهيخففها عليك.
هو اللي لو شافك بتعمل حاجة ضد مبادئك ينبهك ولو شافك هتأذي نفسك يمنعك.
هو اللي يحميك من ضعفك ويتعامل كأنك موجود في أي حاجة تخصك.
هو اللي من غير ماتتكلموا كتير أو حتى تتقابلوا دايما موجود علشانك في أي وقت.
هو اللي بيحبك لله من غير أي مصلحة.
هو اللي ماينفعش تزعلوا من بعض أو تتخاصموا وقت طويل.. لازم حد فيكوا هيروح للتاني وينهي الموقف.

أنت ممكن تتكلم مع أي حد وتضيع وقتك مع أي حد
 وترغي في الفاضية والمليانة برضه مع أي حد
وتفضفض مع أي حد حتى لو عابر سبيل أو رفيق رحلة
لكن يوم ماتتحط في موقف بجد سواء حلو أو وحش
 مش هتلجأ غير لصديقك اللي بجد.

من كتاباتي (68)

1-وهو الاهتمام إيه أكتر من إنك تسمعها.

--------------------

2- فيه ناس زي المحاكم يومها بسنة
عايزة أقولهم
 ماتنجزوا ياجدعان الناس بتموت.

--------------------------

3- "وعزتي وجلالي لأنصرنك ولو بعد حين"

 هكذا أقسم ربي، وهكذا أحيا على حسن ظني به.

--------------------

4- كلمة أسف مش بتصلح حاجة ولا بتشيل وجع كلمة أو موقف اتعمل بقصد أو بدون قصد.

 لكن يكفي إحساس الشخص اللي وقع عليه الضررلما يسمعها إنه يحس إن زعله فارق.

-----------------------

5- السكوت أوقات كتير بيكون علامة للصدمة وخيبة الأمل.

--------------------

6- لكل بني آدم طاقة ماتحاولوش تستهلكوها

 علشان أنتوا اللي هتدفعوا التمن ده في النهاية.

-----------------

7- هي ماعدتش طالبة لا حب ولا حنان ولا اهتمام من اللي المفروض يعملوا معاها كده

 هي بقت كل اللي عايزاه إن محدش يستنزفها.

-----------------

8- الجانب الايجابي إنك ماتكونيش أم

 إنك مش مطالبة تجاوبي على أي أسئلة وجودية وكونية إجابات منطقية ومقنعة في الوقت اللي انتي عمر الأسئلة دي ماجت في دماغك أساسا.

--------------------

9- الفكرة إن هو مش هيتغير

 أنتي اللي هتتأقلمي عليه

------------------

10- لا تشبع ساديتك بسجن الطيور فما خلقت إلا للطيران.

------------------

11- هي في حياتهم مش أكتر من استبن

 مجرد بديل لأداء دور مش بتاعها.

--------------------

12- قشرتها الصلبة أثارته لكسرها.

------------------

13- اتعلمت 

 إن المال الحلال ممكن يروح عادي

14- خليك صاحب القرار في حياتك

علشان النتيجة مهما كانت تتحملها لوحدك من غير ماتعلقها على حد
وماتدخلش في قرارات غيرك غير بالنصيحة لو طلبوها منك
غير كده فكل واحد مسؤول عن نفسه
 محدش هيعيش مكان التاني.

--------------------

15- ليه تجبرها تعاملك كمتحرش زبالة

 بعد ما كانت بتعاملك كإنسان محترم.

------------------

16- لحظة ظلم واحدة قد تؤدي لانهيار مبادئ طالما حاول الفرد التمسك بها.

---------------

17- ماتتجوزيش غير اللي تشوفي في عينيه فرحته بيكي.

----------------

18- من حقك على فكرة تطلب من خطيبتك تشوفها من غير ماكياج.

------------------

19- أنتي ليه متوقعة إنك استثناء!!

اللي شخصيته زبالة هيكون معاكي كده برضه
واللي شخصيته نضيفة برضه هيكون معاكي كده
 الطباع مابتتغيرش باختلاف قرابة الشخصيات يعني.

--------------------

20- لاشيء معي سوى حسن ظني بربي.

----------------

21- عودي بنتك تساعدك في شغل البيت

 مش منطقي تبقى عروسة في إعدادي مثلا ومش عارفة تعمل لنفسها حاجة تاكلها وكأنها لسه نونو مستنية الرضعة!!
 حطي في اعتبارك اليوم اللي ممكن تموتي فيه وتسيبيها محتاسة مش عارفة تعمل حاجة حتى لروحها.

----------------

22- الاغتصاب مش شرط يكون مؤلم بدنيا أو قاسي جسديا

 الاغتصاب إن حد ياخد حاجة بدون رضا الطرف الاخر تحت وطأة التهديد أو الخوف أو الرضوخ أو الضعف أو اللاوعي... 
 الأكيد إن الطرف الأول عارف إن الطرف التاني لو في كامل وعيه وإرادته مش هيرضخ لرغبته مهما كانت.

لو مسؤولة

أنا لو مسؤولة في دولة مش هبقى مبسوطة أنها بتبني مستشفيات عالمية
لكن هبذل قصارى جهدي في مكافحة المرض ومنعه من الأساس.

أنا لو مسؤولة في دولة مش هبقى مبسوطة بعدد السجون وكل شوية ابني جديد على مساحة أوسع؛
لكن همنع الجريمة من الأساس.

لو مسؤولة في دولة مش هبقى مبسوطة ببناء مساجد فخمة حتى لو بالتبرعات؛
لكن هبقى مبسوطة لو نشرت ثقافة إن اللي عنده أرض وعايز يتبرع بيها ويلم من الناس فلوس علشان يبني مسجد، الأولى أنه يبني مصنع أو مدرسة، وبرضه هيكون جواها مكان الناس تصلي فيه ووقتها ثوابه هيكون أعظم وأكبر.

منوعات إسلامية (67)

من كتاباتي (67)

1- حتى شعرها المنكوش

لازم يكون مهندم
 مفيش حاجة عندها اعتباطا.

------------------------

2- اللي بالنسبة لك عادي

 بالنسبة لغيرك مستحيل

----------------------

3- طالما شيء مايخصكش

لما تلاقي حاجة عليها غطاء ماتشيلوش
 ماتبقاش متلصص

-----------------------

4-لما تشوف حد بيعمل معصية

ماتسألش ازاي وليه ولا تتهكم عليه
 وادعي ربنا وقتها بالعفووالثبات وادعيله بالهداية.

------------------------

5- عارف؟

أختك المصونة أوبنتك الجوهرة المكنونة
 فيه حيوان بيعتبرها مجرد تاء مربوطة ممكن تشبع غريزته.

-------------------------

6- احنا في مجتمع اللي الأرملة تخلع فيه الأسود

 تبقى شايفة لها شوفة

----------------------

7- أهم تصالح في الدنيا

 تصالحك مع كرشك

-------------------

8- كله ماشي بتيسير ربنا
 لا شطارة منك ولا فهلوة

---------------------------

9- الصديق مش هو اللي بتكلمه كل يوم ولا طول الوقت معاه.
 الصديق هو اللي لما تحتاجه في أي وقت بتبقى عارف انك هتلاقيه حتى لو بقى لكم كتير بعيد عن بعض.

----------------------------

10- مش معنى انكم بتتكلموا كل يوم بالساعات مثلا انكم اصحاب!
عادي يعني الفراغ والوحدة ممكن يخلوك تكلم أي حد
 كحال رفقاء الطريق ليس إلا.

------------------------

11- من يصف الناس بشيء فهو يصف نفسه أولا.

-----------------

12- الأصدقاء اللي بجد مابيعرفوش أخبار بعض بالصدفة عن طريق النت.

----------------------

13- تكرار الشيء يجعله معتادا مهما كان بذيء وفاحش.

-------------------------

14- الفكرة مش تقبل الآخر وبس
الفكرة هل الآخر اللي أنت هتتقبله هيتقبلك أنت كمان ويحترم اختلافك عنه!
هل مش هيمس عقيدتك ودينك ومبادئك وسلامك الداخلي
 ولا هيحاول يفرض عليك آرائه ورؤيته ويحاول مستميتا اقناعك بها.

---------------------------

15- لما تشوف حد اتوجع بسببك
أبسط حاجة تقولهاله "أنا اسف"
 مش تقضيها تنظير.

---------------------

16- لما تقرر تعمل معصية وأنت عارف إنها معصية اعملها لوحدك
بلاش تاخد حد معاك أو تشجع حد عليها
ماتبقاش زي الشيطان اللي خرج العابد من صومعته
ولا تكون سفير إبليس اللي بيزين طريق المعصية لحد مايعرفش عنها حاجة
كفاية عليك ذنوبك
 بلاش تشيل ذنوب حد معاك

-----------------------

17- خاف ستر ربنا عليك يروح.