الجمعة، 29 يونيو 2012

من كتاباتى (7)

1- طهرنى يارب من خطايا علشان أجيلك نضيفة.



--------------------------

2- أكيد الرمان فى الجنة طعمه أحلى كتيير.

----------------------

3- إزاى أطلب السند والناس شايفينى وتد.

--------------------

4- لو النهاية ماكنتش كده كنت افتكرتكم ملايكة
لكن أنتم بشر وده كان شئ متوقع.


-----------------------

5- بالنسبة للناس اللى بتاكل بصل على الصبح مايصحش كده على فكرة.


------------------------------

6- البدى عليكِ حلو.. آه. ومبين إن جسمك حلو.. آه.

والشباب هتاكلك بعينيها ..آه.

لكنه مايرضي ربنا.. ولكِ طبعاً حرية الاختيار.

-------------------------

7- أحلى حاجة فى صحباتى أنهم بيستحملونى.

--------------------------

8- يا بنتى اسمه بدى يعنى طبيعى يكون ضيق ومبين تفاصيل جسمك.

--------------------------------

9- - البدى ضيق عليها أوى على فكرة
- تانى!!..أنتِ مالك.. مالكيش دعوة.
- إيه يعنى ماشية عريانة.. هو جسمك اللى باين ولا جسمها.
ماتشغليش بالك هى مبسوطة كده.. خليكِ فى حالك.


-----------------------

10 - ما أجمل استنشاق هواء الحرية.

---------------

11
- ليه أضيع وقتى فى قراءة قصة ملهاش ملامح!.
---------------------


12- لما تكون الكلمة على قد السؤال يبقى ده معناه إيه؟.

-------------------------

13- أبوخ حاجة فى قراءة الروايات العالمية أسماء الأبطال


------------------------

14- شكراً لورقاتى البيضاء فبها أؤرخ أحداث حياتى حتى لا أنسى


---------------------------

15- أكتر ناس وجعونى من أحبتهم حد البكاء


-
----------------------

16- صوتك هيفرق.

-----------------

17- فيها إيه لو يكون فى الحمام مروحة!.

------------------------

18
- الخيال: نعمة.

--------------------

19- سبحان الله مغير الأحوال
قادر يبدل الدنيا من حال إلى حال
رغم إن الناس كان ممكن تشوف ده شئ محال.

---------------------

20- النور : حياة.

------------------

21- كلمة آسف بنصرفها منين؟.

--------------------

22- ربنا ينور علينا
ومايحرمناش من نور عينينا.


-------------------

23- ما زالت فى طور النقاهة

فارفقوا بها قليلاً

ولا يغرنكم ابتسامتها

فبها تحمى نفسها من نظرات الشفقة
فهى تشعر كما تشعرون وأكثر
وتألم كما تألمون وأكثر


فرفقاً بها إذا أردتم استعادتها

---------------------------

24- الأطفال: اختبار حقيقى للصبر ولكظم الغيظ ولقوة الإيمان.

------------------------

25
- ربنا كبير وكريم
ربنا اسمه العظيم
ربنا رحيم وقريب
ربنا اسمه المجيب
ربنا غفور وشكور
ربنا اسمه الصبور
ربنا حليم وجبار
ربنا اسمه القهار
هو الله لا إله إلا هو له الملك وله الحمد يحى ويميت وهو على كل شئ قدير.

---------------

26- علمنى ربى بأن فى حياتى نعم كتيرة لكى أشعر بوجودها

عليها أن تختفى

أولاً..فكلما دعوت بأن يرزقنى الله فرحة قريبة ذهبت إحدى النعم

التى كنت أعد

وجودها شئ بديهى وحينما أشعر حقاً بأنها كانت نعمة غالية وكان

على أن أفرح


بوجودها يظهرها ربى فى حياتى مجدداً ومن ثم أشعر بالفرحة

التى طلبتها قبل

أن تختفى.


-----------------------

27
-
" أستطيع ترويض قلمى وأعرف متى أطلق له اللجام".

------------------------------


28- يعنى إيه القط والفار يبقوا اصحاب!!!.
خلاص الروس اتساوت ولا إيه!!
لأ بجد كله إلا كده..هزلت خلاص.

--------------------------


29 - ليس ذنبى إن لم تستهوينى كتابات أحدهم.

--------------------------


30- بحبك أوى يارب.
يسرت لى سبل طاعتك فلك الحمد.
ورزقتنى حبك فلك الحمد.
وجعلتنى أمتك فلك الحمد.
اللهم لك الحمد حتى ترضى.
الحمدلله إنك أنت ربى.

--------------------------

31- البداية خطوة.

---------------------


32- صمتى لا يعنى ضعفى ولكنى أترفع عن الصغائر والمهاترات.

-----------------------


33- إذا أردت مصارعتى فعليك مواجهتى.

-----------------------


34- لا تختبر صبرى وحذار من غضبى

------------------------


35- بيقولوا ما تجيبلهاش ساعة تلبسها وأعطيها من وقتك ساعة
وأنا بقول فيها إيه لو يعطينى الاتنين.. عادى يعنى هتبقى أحلى وأجمل وذكرى ألذ .

------------------------------

36- أنيس منصور خلد حياته بعد مماته فى كتبه الخاصة بذكرياته.


---------------------------


37- أنا بشتغل عند ربنا وافتخر فأنا أمة الله.

-------------------


38- قالت بتأثر: هى الشهامة راحت فين.
رد بسخرية: راحت مشوار وراجعة تانى.
قالت بحزن: قصدك راحت ومش راجعة تانى.

--------------------


39- المسلسلات اتعملت للناس اللى ملهمش حياة..فبيدوروا فيها على حياة يعيشوها
تابع مدمنين مشاهدة المسلسلات وأنت تعرف قصدى إيه.

-------------------


40- كلما وجدت غطاء بالوعة صرف صحى غير موجود وأهل الخير يحيطوها بأى شئ يدل على وجود خطر أدعو على من سرقها أن يقع فى بالوعة مماثلة.


-----------------------

41- شعور غريب لما تحب حد وترتاح له وأنت عمرك ما شوفته.


-----------------------


42- الفرحة بتحلى والهم بيعيى.

---------------------


43- فيه ناس كتير فى البُعد أحلى.

--------------------


44- حلاوة القصة فى إنهم مش هيرجعوا لبعض.. لو رجعوا لبعض هتنزل تتر النهاية لكن كده القصة مازالت مستمرة.

-----------------------


45- صديقاتى الغاليات: أنا غنية أوى بيكم.

--------------------


46- أحلى حاجة فى أيام زمان:
لما كنا كلنا نتفرج على مسلسل القناة الأولى الساعة الثامنة فبنبقى حافظين المشاهد وممكن نتكلم فيها ونستخدم إيفيهاتها ونبقى فاهمين ومستمتعين
عكس دلؤتى خمسمية مسلسل وفيلم فى اليوم الواحد واللى تتفرج عليه طبيعى غيرك يكون لسه ماشافوش ولو حبيت تقول إيفيه ممكن ما يفهموش.

فين لمتنا الحلوة :)

زمان كان الى بيحب بيعبر عن اللى حسه بجد
مش زى دلؤتى ينقل كلمات أغنية أو يقلد بطل فى فيلم أو مسلسل أو يعمل كوبى لأى جروب على الفيس هو مشترك فيه.

فين المصداقية


-----------------------


47- إذا عجز لسانى يوماً عن الدعاء فلن يعجز قلمى.
وإذا عجزت عينى عن البكاء فلن يعجز قلبى.

-------------------


48- من رحم الصبر ولدت

وفى طاعة الله نشأت

وعلى حب الله ترعرعت

وباليقين فى الله عاشت

وبرضا الله حلمت

وبالأزمات نضجت

وبالإيمان تحلت

وبالإصرار والإرادة أصبحت

(أمة الله)

موناليزا.


------------------


49-أعيد إكتشاف ذاتى.


الثلاثاء، 26 يونيو 2012

نقى نفسك


أدوات النظافة تشغل حيزاً هاماً فى حياة ربة المنزل.. فبهذه الأدوات تتمكن من القضاء على الأتربة والحشرات والجراثيم بالإضافة لجوالمنزل النظيف الذى يعود على الجميع بالراحة النفسية..
فما أجمل استنشاق رائحة النظافة.

ولذلك دعونا نتخيل النفس البشرية وكأنها شيئاً مادياً يصلح للتنظيف ولتكن غرفة مثلاً أو حتى قميص.
القميص جديد ومع أول لبسة تشعر بالسعادة والثقة الداخلية
وتتمنى أن يراك الجميع ترتديه فهو نظيف ورائحته طيبة وبعد الخروجة وجدته يحتاج إلى الغسيل حتى يعود كسابق عهده فتراب الجو ورائحة العرق كفيلة بأن تجعله فى حاجة ماسة إلى التنظيف السريع.. ولو اهتميت بنظافته أولاً بأول ستجده دائماً جديد لكن إذا كسلت فى يوم عن غسيله وقلت إنك مستعجل أو المرة الجاية أبقى أغسله أو مش مهم دى بقعة صغيرة ومش باينة أو هو أنا يعنى رايح فين أو أى عُذر آخر وظللت تؤجل فى نظافته مرات عديدة متتالية ماذا سيكون منظره!!.. مهما كان ستجد نفسك تلقائياً أخذت عليه هكذا ولم يعد يؤثر فيك إذا ماتم غسيله أو لأ وخصوصاً لو غالبية اللى بتقعد معاهم قميصهم برضه درجة نظافته لا تذكر ولن تشعر بالخجل قط إلا إذا وجدت نفسك الوحيد فى مجموعة صاحب القميص المتسخ وستشعر بالخزى وقتها وخاصة أن الماء والصابون إلى الآن ما زالوا بسعر زهيد ويقدر على ثمنهم الجميع.

هذا حال النفس مع المعصية
فى الأول بتبقى بتعملها وأنت خايف أو على سبيل التجربة اللى مش هتتكرر تانى.
وبعد كده أصلى عايز أشوف حاجة.
ثم تتوالى المعاصى ونفسك تألفها ويصير كل شئ عادى.

ولذلك نقى نفسك دائماً بالاستغفار حتى لا تجد فيها شوائب
المعصية.




السبت، 23 يونيو 2012

جوجو و زمردة (24)


كانا "جوجو" و شقيقته "زمردة" فى مدينة الملاهى يركبان العربيات اللى بتخبط بس كل واحد راكب عربية لوحده..
يقوم "جوجو" بالقيادة سريعاً ويخبط فى العربيات وهو مستمتع.
أما "زمردة" فكانت تلزم أقصى اليمين وتبتعد جاهدة عن العربيات.
وبعد ما انتهوا من اللعب ونزلوا من العربيات.. ظل جوجو يضحك ويسخر على أسلوب "زمردة" فى السواقة.
قائلاً: ياخبر ده أنتى لو سوقتى عربية بجد هتبقى ضحكة.
: ليه بقى وفيها إيه لما امشى براحتى.
:براحتك إيه يا بنتى مش فيه ناس هيبقوا ماشيين وراكى وعايزينك تتحركى علشان هما كمان يمشوا.
: وأنا مالى بيهم دى سواقتى وأنا بحب أمشى على مهلى.
: خلاص أحسن لك ماتسوقيش.
:مش أحسن ما امشى بسرعة زيك وأخبط الناس.
:دى بس علشان لعبة لكن فى الحقيقة اللى هيشوف سرعتى هيبعد عنى علشان ماخبطوش.
: أنت مفكرها لعبة كمبيوتر.. دى أرواح ناس.
: وأنتى مفكره نفسك فى فيلم كارتون مافيهوش غيرك علشان تمشى بطئ.
: أنا مبسوطة كده وبعدين كده عمر ما الرادار هيمسكنى.
: رادار إيه بس ده هيدوكى فلوس علشان تتحركى.. ده غير الناس بقى هيسمعوكى أحلى كلام على غرار بدل مش قد السواقة بتسوقى ليه.. يا شيخة اتحركى فرستينا.
:أنت بتتريق عليا يا جوجو طيب والله ماهركبك معايا فى عربيتى.
ضحك جوجو كثيراً من رد فعل زمردة قائلا بدعابة: لا والله ابقى ركبينى علشان ماعيطش.
: مش هركبك وهخليك تعيط براحتك.
جاءت الأم فى الوقت المناسب قائلة لهم: يلا نروح بقى احنا كده اتأخرنا.
-تمت-.

=====================
دعوة للمناقشة:
ــــــــــــــــــــــــ
ماعلاقتك بقيادة السيارات؟.
أذكر موقف طريف أثناء قيادتك؟.

الأحد، 17 يونيو 2012

التفكر فى خلق الله


قرأت فيما قرأت عن قدرة الله عز وجل فى خلق الإنسان وكيف أن حدود قدراتنا ينفعنا كثيراً فللعين مثلاً قدرة محدودة على الإبصار تجعلنا لا نرى مثلاً ما يتم داخل جسم الإنسان من عمليات مختلفة كالهضم وخلافه.
وللأذن قدرة محدودة على السمع تجعلنا لا نسمع مثلاً ما يدور خلف الجدران.
ولليد قدرة محدودة على اللمس تجعلنا مثلاً لا نكسر الأشياء بمجرد لمسها.. وغيرها الكثير فى هذا المصنع الرائع الخلق المُسمى بالجسم البشرى.
فهى قدرات محدودة ولكنها طبيعية حتى نستطيع أن نحيا حياة طبيعية.

وجدت نفسى أتفكر فى خلق الجلد البشرى ورأيت أن له صفات خارقة فحقاً من خلقه هو البديع..
فمثلاً لا تجد الأشياء تلتصق به من الميكروبات والأتربة وغيرها الكثير مما نتعرض له بصفة يومية ولكن هذا يُزال بسهولة ببعضاً من الماء والصابون.

تخيل لو كنت بتنظف حاجة أو بتدهن أو بتاكل ولا تستطيع تنظيف يدك مثلاً لأن ما بها قد علق بها ولا يمكن إزالته يعنى الماء والصابون لا يوجد لهم فائدة فى نظافتها.. تخيل منظر يدك وهى بالألوان هكذا.

ومثلاً إذا ما أصاب الجلد أى مرض من بثور شباب مثلاً أو حتى حروق بسيطة.. انظر على الجلد قبل وبعد وستجد إعجاز.
حتى لدغات الحشرات وخاصة الباعوض مع الوقت تذهب وكأنها لم تكن ويعود الجلد لطبيعته.

حقاً يارب.. بديع السماوات والأرض.. الحمدلله أنك ربى وخالقى.

سبحانك يارب ما عبدناك حق عبادتك.


سؤال جانبى:
ـــــــــــــــــــــ
ما أول شئ خطر على بالك الآن أنه إعجاز من الخالق فى جسدك؟.

الأربعاء، 13 يونيو 2012

شقاوة أطفال


من يحتك بالأطفال بصفة متكررة يرى كم نشاطهم الزائد والذى فى الغالب يكون فى غير موضعه نظراً لعدم اكتمال نضجهم العقلى ورغبتهم فى اللعب والاستكشاف والاستمتاع بتغيير وضعية الأشاء التى تعبت الأم فى ترتيبها.
بالإضافة لسؤالهم الدائم عن كل شئ ومحاولة معرفة أسباب الكبار فى رفض تصرفاتهم البريئة.
ومما لا شك فيه إن هذه التصرفات إذا زادت عن حدها سيعقبها عقاب من الكبار لهم حتى يتم تقويم سلوكياتهم الهمجية ولا يخفى عليكم كم الغضب الذى يعترينا إذا ما أساء أطفالنا الأدب بشكل متكرر وخاصة أمام الغرباء فهذا يعنى بأننا لم نحسن تربيتهم رغم محاولتنا وبذل قصارى جهدنا فى تربيتهم.

وتستطيع إذا لم يكن لديك أطفال أن تقول انطباعك حين تعلم بأن قريبتك ستزوك بأطفالها المعروف عنهم سوء الأدب وقلة الحياء.

وحينما رأيت مشاهد عديدة على هذا المنوال تراءى إلى ذهنى بأننا الكبار نفعل هذا أيضاً ولكن مع الله.
فكم من المرات كان علينا آداء فريضة معينة وتكاسلنا عنها أو سألنا لماذا نفعلها أو تجاهلنا النداء أو أسأنا الأدب مع خالقنا بتجاوزنا حدوده وانتهاكها بل والتجرؤ عليه أحياناً من خلال دعوى الجاهلية وكأننا نحاسبه جل علاه على خلقه لنا وعلى ما يحدث فى حياتنا.

لذلك كلما أردنا أن نعصى الله علينا أن نتذكر شقاوة الأطفال وكم يسيئون لأهلهم وكم ينفر منهم من حولهم ويتهمهم بسوء الأدب حتى لا نكون مثلهم.

ولكن الفرق بأننا نسئ لديننا قبل أن نسئ لأنفسنا.




السبت، 9 يونيو 2012

رسالة إلى الآباء

تحدثت فى الموضوع السابق عن مُدمنى المخدرات ووجهت كلامى لهم فقط.
والآن جاء دور الآباء لأوجه كلامى إليهم فى محاولة منى لنتجنب أن يوضع أحدكم فى هذا الموقف المخزى.


* صاحب ابنك واسمعه واتعرف على حياته وأصحابه وكن له صديق قبل أن تكون له أب وخاصة إذا كان عمره فوق الأربعة عشر عاما.
ولا تنسى تطبيق هذه الوصية" لاعبوهم لسبع وأدبوهم لسبع وصاحبوهم لسبع ثم اتركوهم".

* لا تعطى له نقود كثيرة دون حساب ولا تعطى له فرصة أن يأخذ منك مالاً كثيراً بأى حجة واهية واعرف أسعار المًُدرسين والمذكرات والكتب حتى لا يأخذ أكتر مما يحتاج.

*لا تترك له الحبل على الغارب بدافع إنك واثق فيه لأن مهما كان ثقتك فيه فالشيطان شاطر وابنك مش معصوم.. يعنى تبقى عارف هو رايح فين وجاى منين وقاعد مع مين وهييجى البيت إمتى وفيه ميعاد ثابت مايتأخرش عنه وغيرها من الأمور الذى تستطيع التحكم فيها حسب عمر ابنك.

*لا تهمل أى تصرف خاطئ منه دون توجيه ولا تكتفى بصمتك الغاضب وتجاهلك المتعمد له فهذا سيحدث فجوة فى العلاقة بينكما.

* املأ البيت بالدفء الأسرى حتى لايستغنى عنه ولا يبدله بأى شئ آخر.

* لا تجعل كل كلماتك معه حديث عن ذكرياتك أو نقد لتصرفاته أو توجيه مباشرمصاحبا بالصوت العالى.. فقط اسمعه وكن قدوة صالحة له.. ولا تلجأ لهذه التصرفات إلى للضرورة وحسب ما يقتضيه الموقف.

* اعطى له أسباب منطقية حين ترفض تصرفاته لأى شئ فرفضك وحده غير كاف.
مثال: ماتشربش سجاير..ليه .. من غير ليه اسمع الكلام وخلاص.
وبدلها بـ ماتشربش سجاير لأنها هتضرك جسدياً وهتخلص فلوسك والملايكة مش هتقرب منك لأنها هتنفر من ريحتك و.. و.. و...

* كن قدوة صالحة فلا تنه عن خلق وتأتى بمثله.

* ابنك يحتاج حنانك أكثر مما يحتاج فلوسك.

* إذا لاحظت على ابنك أى تغيرات فاهتم فوراً وحاول البحث عن الأسباب.(عينيه حمرا أو شكلها مش طبيعى أو جسمه خاسس أو مش عارف يقول كلمتين على بعض ومش عارف يركز أو أى حاجة تانية متغيره فى سلوكه اليومى... إلخ).

* إذا اكتشفت إن ابنك مُدمن مخدرات تصرف معه بحكمة فالعنف والغضب لن يحلوا شيئاً وأفق من صدمتك سريعاً حتى تحسن التصرف.

* استشر طبيب متخصص واحذر من أن تفضح ابنك وتعمل إعلان للقرايب والمعارف.. كن ستر وغطا عليه.

* وأخيراً شجعه على ممارسة أى لعبة رياضية بدل إحباطه ..فالرياضة ستفيده جسدياً ونفسياً.




سؤال جانبى:
ماذا تفعل إذا اكتشفت ان ابنك أو أخوك مُدمن مخدرات؟.

الثلاثاء، 5 يونيو 2012

رسالة إلى مُدمن مخدرات


لأنى عارفة أنى هتكلم مع واحد صاحب دماغ فحضر إلى ذهنى مشهد سعيد صالح فى مسرحية العيال كبرت وهو يخبر شقيقه أحمد زكى بأن يكلمه بطريقة هو يقدر يفهمها.. ولذلك قررت أنى هتكلم معاك بالعامية وبأسلوب بسيط تماماً يفهمه أى شخص.. وطبعاً مالوش لازم يكون فيه مقدمة وتمهيد ولذلك هدخل فى الموضوع على طول.


بص على نفسك فى المراية.. معلش تعالى على نفسك وقوم بص على نفسك فى المراية.. ها.. إيه رأيك فى شكلك؟؟.. طبعاً مش واخد بالك وبالنسبة لك عادى قمر 14.. عاجبك عينيك وهى مواربة ومش عارف تفتحها على آخرها رغم إنك جايب آخرك معاها!!.. عجبك عينيك وهى كاسات دم.. عاجبك السواد اللى تحت عينيك اللى بيبان أوى لو اتأخرت فى الجرعة!.
طيب بلاش دى.
بص على تصرفاتك مع نفسك.
بتعرف تلبس هدومك كويس ولا ممكن ماتبقاش عارف فتحة رقبة البلوزة منين وتفضل مُصمم إنك تدخل راسك من فتحة الذراع.
عجبك لما تتخبط فى الدولاب مثلاً وأنت بتلبس لأنك مش مركز!!.
عجبك شكلك وأنت واقع على الأرض بملابسك الداخلية ومنظرك لو حد من أهلك شافك وأنت كده!.
عجبك وانت مش عارف تقول كلمتين على بعض والدنيا عندك داخلة على بعضها!.
طيب بلاش نفسك خالص.
مفكرتش فى شعور أهلك لما يعرفوا خيبتهم فيك ..تصرفهم معاك وقتها هيكون إيه؟.
وبلاش تقول هيعملوا إيه يعنى أنا محدش يقدر يعملى حاجة لأن أبسط حاجة ممكن يعملوها أنهم يمنعوا عنك المصروف.
وبعدين عيب أوى تتكلم عليهم بالطريقة.. أنت نسيت هما عملوا معاك وعلشانك إيه من وأنت صغير..
نسيت فلوسهم اللى خلصوها على تعليمك وعلى منظرك ولبسك قدام الناس.
نسيت حرمانهم من أى حاجة مقابل إنك تاخد الفلوس اللى أنت عايزها علشان تشترى مُذكرة ولا تاخد درس خصوصى.
نسيت أنهم فضلوك على اخواتك من وأنت صغير وطلباتك أوامر ومُجابة لأنهم حاطين فيك أملهم.
نسيت دلعهم ليك وحبهم وخوفهم عليك.
عموماً اتقِ شر الحليم إذا غضب وبلاش تسقط من نظرهم.. وبلاش تشمت الناس فيهم.. وبلاش تفضح اخواتك بتصرفاتك.
واعرف ان غيرك يتمنوا النعم الكتير اللى ربنا اعطاها لك من عقل صحيح أنت نفسك بتدمره ومن جسد سليم أنت نفسك بتخربه.
ليه تعمل فى نفسك كده؟؟؟.
ليه تبعد عن ربنا أوى كده؟؟.
ليه تبدأ أصلاً وأنت عارف إن دى بداية هلاكك.
وعلى فكرة تعددت الطرق والنهاية واحدة.
سواء بقى كنت بتشم ولا مقضيها اقراص ولا بتلف سجاير ولا حتى بتضرب حقن.. ماتضحكش على نفسك هى نهاية واحدة مُخزية وفاضحة ومؤلمة لك أمام الجميع.



اسأل أى حد قبلك مشى فى السكة دى وشوف كان آخره إيه.. فوق بقى قبل فوات الآوان.. واعرف إن لو ماساعدتش نفسك محدش هيساعدك.. لازم العلاج يكون من جواك.

واعرف أنى خايفة عليك ومابطلبش حاجة تعجزك أو أنت ماتقدرش عليها.. لأ ده انا عارفة قدرتك وأنك قدها وقدود كمان.. لو الشيطان كان ضحك عليك فاتغلب عليه وماتستسلملوش.



لو هتوجه رسالة لمُدمن مخدرات دلؤتى تقوله إيه؟؟.

الجمعة، 1 يونيو 2012

منوعات إسلامية (6)



من نور كتاب الله:
ــــــــــــــــــــــــــــ
{ قُلْ لِعِبَادِيَ الَّذِينَ آمَنُوا يُقِيمُوا الصَّلَاةَ وَيُنْفِقُوا مِمَّا رَزَقْنَاهُمْ سِرًّا وَعَلَانِيَةً مِنْ قَبْلِ أَنْ يَأْتِيَ يَوْمٌ لَا بَيْعٌ فِيهِ وَلَا خِلَالٌ } 31 إبراهيم.

من هدى رسول الله صلى الله عليه وسلم:
ـــــــــ
ــــــــــــــــ
عن ثوبان أن النبى صلى
الله عليه وسلم قال" صيام شهر رمضان بعشرة أشهر وصيام ستة أيام بعده بشهرين فذلك صيام السنة" صحيح الجامع ص385.


قطوف من الحكمة:
ــــــــــــــ
عن ميمون بن مهران قال: التودد إل
ى الناس نصف العقل وحسن المسألة نصف العلم.
عن عثمان بن حكيم الأودى قال:اصحب
من هو فوقك فى الدين ودونك فى الدنيا.

عن أيوب قال : الرجال ثلاثة: عاقل وأحمق وفاجر. فالعاقل إن كلم أجاب وإن نطق أصاب وإن سمع وعى. والأحمق إن تكلم عجل وإن تحدث وهل وإن حمل على القبيح فعل. والفاجر إن ائتمنه خانك وإن حادثته شانك وزاد فى غيه وإن استكتمته سراً لم يكتمه عليك.


من صحيح الأحاديث القصار:
ــــــــــــــــــــــــ
ــــــــــــــــ
-" أحق الشروط أن توفوا به ما استحللتم به الفروج" متفق عليه من حديث عقبة بن عامر.

-"إذا صلى أحدكم للناس فليخفف فإن منهم الضعيف والسقيم والكبير وإذا صلى أحدكم لنفسه فليطول ما شاء" متفق عليه من حديث أبى هريرة.


-"إن رسول الله صلى الله عليه وسلم شرب لبناً فمضمض وقال: إن له دسماً" متفق عليه من حديث ابن عباس

-" قالوا يارسول الله أى الإسلام أفضل ؟ قال: من سلم المسلمون من لسانه ويده" متفق عليه من حديث أبى موسى.

-" لايزال قلب الكبير شاباً فى اثنتين فى حب الدنيا
وطول الأمل" متفق عليه من حديث أبى هريرة.