الخميس، 25 مايو، 2017

من كتاباتي (59)





1- وعادي لما تعمله بلوك وتبقى منتظراه يوصل لها ويراضيها.

2- أسوأ علاج في الدنيا: التأقلم


3- أنا مابحبش أتعامل مع الناس اللي لما تعرفهم حاجة عادية من وجهة نظرك

 و حتى حلوة حصلتلك أو حصلت لغيرك

تلاقي أول كلمة بتتقال" يا بختك، يا بخته، يا بختها"

حاجة بايخة أوي لما تحس إن اللي قدامك قرار وعينه وحشة 

حتى لو بيستظرف وبيقولها على سبيل الهزار

والناس اللي يسألوك "مالك" بفضول بس علشان يطمنوا إن حالك أسوأ منهم

والناس اللي ترد على أي استفسار ليك بسؤالك عن سبب الاستفسار أصلا

 ويدخلوك في حوارات بعيدة عن اللي أنت تقصده.


4- "آسفة.. لا أصافح الرجال"
ياريت لما تسمع الجملة دي ماتاخدتش الموضوع على كرامتك
هي ماتقصدتش إهانة ولا تكبر
احترم رغبتها وخد الأمر بصدر رحب
ونصيحة: ماتمدش إيدك بالمصافحة لأنثى

5-
أعتقد إن فيه ناس ممكن تاخد حسنات وهي مش عارفة

لمجرد إنها اتكلمت مع حد محبط وبعدها هو حس إنه بقى أحسن

أو لإنها جاوبت سؤال بالنسبة للسائل كان حاجة كبيرة ومهمة

أو لإنها أغاثت ملهوف استنجد بيها

*ماتستقلوش بأي حاجة حلوة تقدروا تعملوها لحد حتى لو بمجرد بسمة تقابلوه بيها.

6ماتعملش الغلط قدام حد

علشان ماتاخدتش ذنب حد يقلدك

كفاية عليك تشيل ذنبك لوحدك


7- لما بتأذي حد وخصوصا لو طفل صغير

 فأنت بتصنع من غير ماتقصد مجرم هيحاول ياخد حقه مش منك وبس

 ده من أي حد يقابله علشان ينتقم منك فيه.



8- عمرك ماهتحس إنك مسجون غير لما تحاول تفتح الباب وتلاقيه مقفول عليك من بره.


9- عودوا ولادكم "المصافحة" سلام الرجالة..

 بلاش البوس حتى لو بين العيال وبعضها.



10- ضربات الدنيا المتوالية لي كعذاب كفار قريش للمسلمين

 وأنا مازلت مُتمسكة بقولي: أحد أحد.



11- لازم يكون في حياتكم ثقافة الويك إند.. اليوم اللي تغيروا فيه روتين الإسبوع 

وتكسروا حدة الملل وتجددوا طاقتكم وتشحنوها وتجددوا علاقتكم ببعض.



12- من الجميل أن يكون في حياتك إنسان يحرص على التواصل بينكما يوميا كطقس 

روتيني، فهذا حماية لكلاكما إذا ما أصاب الآخر مكروه،

 فسيضمن أن هناك من سيعرف هذا قبل مرور 24 ساعة.



13- نصيحة : اتعلمي تحطي ميك أب لنفسك

مش منطقي ابدا تروحي لحد يحطهولك وتدفعي مبلغ محترم حتى لو كان يوم فرحك

ده تبذير يصل لحد السفه

علبة ميك أب ماركة نضيفة وعيشي

الكوافير أو الميك أب أرتيست مش هيعمل حاجة مختلفة 

بل بالعكس الفرشاة اللي بيحطلك منها بيستخدمها لغيرك 

والعلبة انتي مش بتاخدي منها حاجة

 يعني المبلغ المدفوع ده أجرة إيده مش أكتر.

على صعيد آخر هي شغلانة تكسب دهب .





14- الهدية حب.. مش دين.


الأحد، 21 مايو، 2017

من قراءاتي (49)









1- بعض الأشياء يسهل الشروع فيها، لكنها لا تتخذ معناها كاملا إلا حينما ننهيها.
لغيوم ميسو

----

2- لا أدري إن كنت امرأة أحبها أم مغامرة أحب أن يخوضها بما فيها من غرابة واختلاف.
لـ مايا الحاج

----------


3- لن أكون مع رجل لم يناضل من أجل أن يتزوجني.
لـ مايا الحاج

-------

3- الإنسان لا يعيش معنى الفرح إلا حينما يتفادى حزنا كاد أن يقع.
لـ مايا الحاج

------------


4- لماذا يموت الطيبون صغار جدا  في حين يتدبر الأوغاد أمرهم للعيش طويلا جدا؟
لـ إيفان كليما

-----------


5- حين يتعود المرء على الكذب يصعب عليه قول الصدق. ومن يهجر مرة يسهل عليه الهجر المرة التالية.إنه لمحض غرور أن يتخيل المرء أن بمقدوره تغيير شريك حياته وطرد كل الشياطين من روحه.
لـ إيفا كليما

------------

6- يفوت الأوان فقط وأنتِ ميتة.
لـ إيفا كليما

------------


7- حين يذهب الحب، يذهب الرضا أيضا، وكذلك التفاهم.
لـ إيفا كليما

---------------


8- أن الخيول تموت حزنا حين يهرب من حناجرها الصهيل.
لـفاروق جويدة


الاثنين، 15 مايو، 2017

مقتطفات


مش شرط تكون طبائعكم واحدة

 لكن شرط تكون اهتماماتكم متشابهة.
----------------------


-وسؤاله عنك ده


مجرد ملل حاسس بيه وحاجة عايز يضيع بيها وقته مش أكتر.


--------------

مفيش حد بيحب حد ويسيبه يضيع من إيديه.

---------------------------


-الفكرة مش هو أونلاين أو لأ

 الفكرة هو عايز يكلمك ولا لأ

------------------

-مين اللي ممكن؟

مفيش حد ممكن

 أنتي اللي لازم

-----------------

- فرق كبير بين كونها مُكتئبة وكونها حزينة.

---------------


- مفيش ضمان غير دينه وأخلاقه

لا قايمة ولا مؤخر ولا مهر ولا شبكة

 كله فاكس.

---------------------

-  الزواج شركة بين اتنين

يديروها بمعرفتهم وحسب مايتوافق معهم

 دون الاستعانة بصديق

-----------------------


- يابني انت اتجوزت

يعني اتفطمت عن بيت أهلك

إلا في زيارات ودية لطيفة

مشاكلك، حياتك، مصايبك، طلباتك، خروجاتك، مشترياتك

هما مالهمش فيها

دي شيلتك أنت


 شيلها لوحدك


-----------------------


-أي علاقة تدخلي فيها

لو حسيتي انك مش مرتاحة

 ماتكمليش

------------------------

- ماتفكرش حد بيك

 اللي ناسيك ناسيك بمزاجه

---------------------

- هي عايزة حب وبعدين ييجي الجنس

 وهو عايز جنس ومش مهم يكون فيه حب

----------------

- علشان اللي قدامك يحبك

 لازم تلمس حاجة جواه

-------------------


- مش عيب تقول لمراتك "لا" على حاجة هي عايزاها طالما مش معاك تمنها

لكن العيب انك تستلف من الناس علشان ترضيها

 ونصيحة: اللي ماتقدرش ظروف زوجها مهما عملت لها عمرها ماهترضى

 وهتفضل دايما باصة لغيرها.

----------------------------------


- أنتي ليه متوقعة أنه خسرك؟

 أنتي بالنسبة له ولاحاجة ولا عمرك كنتي فارقة.

-------------

- هو مابيعرفش يقول بحبك

 بس بيعرف يعمل حاجات تخليها تحس بكده.

--------------------------

- قبل الزواج

ياريت تقرأوا عن حقوقكم وواجباتكم

وقبل ماتفكروا في الانجاب

 ياريت تقرأوا عن كيفية التربية والتعليم لتنشأة طفل سوي.

----------------------------

- لما تحب تتجوز

خليك في بنت الأصول اللي عينيها مليانة


 وأنتي كمان اختاري ابن الناس الطيبين اللي له كبير.



















الاثنين، 1 مايو، 2017

منوعات إسلامية (59)







الثلاثاء، 25 أبريل، 2017

من كتاباتي (58)







1- فرق كبير بين الصبر
و

العجز، الكسل

في "الصبر" أنت بتاخد بالأسباب وبتعمل اللي عليك وبتصبر حتى تأتي النتيجة

وترزع حصاد ما فعلت

أما في العجز والكسل؛ فأنت تتواكل على أمل أن يأتي كل شيء وحده أمامك

على طبق من فضة دون بذل أي مجهود

اللهم إنا نعوذ بك من العجز والكسل.

---------------

2- الملابس من أرقى الاختراعات التى وصلت للبشرية.

------------

3-لم تُخلق المرأة لخدمة الرجل.

-----------

4- ومين قالك انها بتكون مبسوطة لما بتطلب منها تعملك حاجة!

ومين أوهمك إن خدمتها ليك ده مبعث سعادتها سواء طلبت منها أو ماطلبتش!!

---------------

5- مايغركيش طوله وعرضه وضخامة جسده بالنسبة لك

ده عيل من جواه ومايسدش في خناقة.

-----------------


6- استمتعي بكل حاجة عندك مهما كانت

لو شعرك على طول رابطاه وانتي في البيت

فكيه واستمتعي بطوله وبوجوده أصلا

عندك دهب مابتلبسيهوش غير في المناسبات

طلعيه والبسيه في البيت واستمتعي بشكله

 لو مكنتيش عايزة تخرجي بيه وخايفة عليه

عندك عطور غالية عايناهم لوقت عوزة

طلعيهم واستمتعي

وهكذا بقى

عـ يـ شـي

------------------


7-ماتدوريش هو بيعمل ايه من وراكي

ركزي بس هو بيعمل ايه معاكي

-------------

8- الحب: استئناس للروح وتهذيب للنفس.

-------------

9- أنت فقدت دادة وعلشان كده بتحاول تدور لها على بديل

لكن اللي بيفقد أم بيكون عارف ان مفيش مخلوق في الدنيا ممكن يعوضه عنها.

------------

10- لما تكوني أم بتعطي اهتمام بدون ان تنتظري مقابل

لما تكوني زوجة بتعطي اهتمام وبتنتظري اهتمام في المقابل

لما تكوني ابنة مابتعطيش اهتمام لكنك بتنتظري اهتمام

--------------------


11- حنيتها عليه مش حب

دي شفقة ورغبة في الثواب مش أكتر

------------------


12- فرق كبير أوي انك تبر أبوك علشان بتحبه

وبين أنه علشان بس واجب عليك

-------------


13- ما أنت لو ماوقفتش معاها في أزمتها

وكنت ليها سند

هي هتقوم لوحدها بس ساعتها مش هتكون محتاجالك ولا هتبقى فارق معاها

----------------


14- ولما كنتي وحيدة

هما كانوا مع غيرك مبسوطين

مسير الدايرة تلف

ويبقوا لوجودك محتاجين






الجمعة، 21 أبريل، 2017

من قراءاتي (48)







1- قلب المرأة هو متاهة الأفكار الدقيقة التى تتحدى العقل الفظ للذكر المتربص. إذا أردت فعلا أن تحظى بامرأة، يجب أولا التفكير مثلها وأول ماينبغي فعله هو غزو روحها.
كارلوس لويس زافون


2- النجاح ليس دائما دلالة على التألق، إنما هو غالبا المكسب الجانبي لألم كامن.

بوريس سيرولنيك




الجمعة، 14 أبريل، 2017

الراجية عفو الله






نعيش جميعا في كنف لله
تحت رعايته وحفظه ورحمته وستره علينا
فماذا إذا أزاح فضله هذا عنا!
هل سيتحمل أحد أن يقترب منا لو كانت لذنوبنا رائحة مثلا؟
لا تتغر بفضل الله الذي ترتع فيه بلا اكتراث.
عدم تعرضك لابتلاءات كارثية في حياتك لا يعطيك الحق في أن تحلل وقع الابتلاءات على المُصابين بها 
وماذا إذا كان هذا أفضل لهم في الدنيا أم لأ.
أنت لو مكانهم وارد جدا ماتتحملش ربع اللي شايلينه بكل نفس راضية.
مش علشان واحدة غير محجبة مثلا أو ممثلة أو حتى رقاصة اتعرضت لابتلاء يكون من حقك تحكم عليها بإن أحسن وخليها تتعظ!!
ولو كانت محجبة مثلا يبقى ندعيلها ونواسيها!!
مايمكن كل اللي باينين ليك يستاهلوا المصايب يكونوا عند ربنا أحسن مننا..

هتكلم عن نفسي:
ليس لي في الحكم على أحد، الله وحده من يحاسب، وارد تكون كل الناس عند ربنا أحسن مني، أنا أرجو عفو الله وغفرانه وأعترف بأني متمرمغة في نعم ربنا وفضله عليا،
 وأي ابتلاء حصل في حياتي فهو رحمة من ربنا ليا، وأي ابتلاء بشوف حد فيه بدعي ربنا يراضيه ويصبره ويعافيه مهما كان حكم الناس عليه.
الابتلاء اختبار صعب مش كل الناس تقدر عليه.
وارد إن اللي يبان قدامك ورع وتقي وملتزم أول ماتحصله مصيبة يقول كلمة سخط يلقى بيها في جهنم. 
ووارد إن اللي يبان قدامك هلاس ومابيركعهاش أول ماتحصله مصيبة يقول كلمة رضا تلقي به في الجنة.
الله يطلع على مافي صدورالناس أولا قبل أن يطلع على صورهم.
إياك تشمت في حد.
أنت مش ضامن نفسك ولا ضامن إيه ممكن يحصلك.
كلنا عايشين في كنف الله فلنتأدب.
غفر الله لي ولكم. 



السبت، 1 أبريل، 2017

منوعات إسلامية 58








السبت، 25 مارس، 2017

من كتاباتي (57)




1- طفاية السجاير دايما كانت بينها وبينه.

---------


2- لو مابتعرفش تتعامل مع المريض يبقى أنت اللي محتاج للعلاج.


----------


3- ماينكر الجميل غير قليل الأصل.


-------------

4- لما يكون في حياتك حد مش متعود يطلب حاجة


وفجأة طلب

ماتاخدش طلبه باستخفاف

لانه لما طلب كان على عينه بعد مافقد الامل ان حد يحس بيه من غير مايطلب.

-------------


5- لو عايز تعرف أصل حد اكرمه

فلو ملكته فهو من أصل كريم

ولو تمرد فهو من أصل لئيم

-------------

6- 

مفيش اسهل من الكلام

الرك ع الفعل اللي يثبت

-------------

7- كل حاجة في ثانية ممكن تروح

ومن غير مايكون فيه حتى سبب واضح بالنسبة لك.

-------------

8- عزيزتي الأنثى: لما ترتبطي بلاش تخرجوا في الأماكن

 اللي متعودة تروحيها مع صاحباتك

علشان لما تفركشوا هتكوني مش حابة تروحي الأماكن دي تاني

وصحباتك مالهمش ذنب هنا على فكرة .

-------------

9- فرحة المرأة: الاهتمام ممن تحب.

---------------

10- خليك على طبيعتك مع خطيبتك

لو أنت متعود تلبس شبشب او سليبر في الخروج ماتزورهاش بجزمة

ولو مش متعود تحط اسبراي وبرفان وتغسل أسنانك برضه روح لها كده

مالوش لازمة إطلاقا تكتشف طباعك بعد الجواز وتتصدم منها.

-------------

11- خدها في حضنك يا غبي وهي تهدى.

---------

12- امتى ترجع للماضي؟

لو الحاضر مانصفكش

------------

13- يسألونني عن سبب الفراق

لا يعلمون بأن يدك كانت رخوة، لم تتمسك بي بدرجة كافية؛

 مما جعلني أفلتها بسهولة،وجعلك هذا لا تشعر بفراقي.

------------


14- لما تقولك انها زعلانة منك اعرف وقتها انها مابتهزرش.

-------------

15- منطق الرجال في التعامل معها في شرع المرأة غباء.

----------

16- إن كنت لا تقرأ فها أنا قد اشتقت

وإن كنت تقرأ فأنا لا أتذكر من أنت

--------------

17- أول ما كنت أعلمه لتلامذتي الصغار

"الكذاب بيروح النار"

مفيش حاجة اسمها كذب حتى لو بهزار

الكذاب جبان ومخادع فلتتحلوا أحبتي بصفات المرؤة

 فنبينا(صلوات الله وسلامه عليه) يلقب بالصادق الأمين.

---------------

18- أفضل أن أكون الحبيبة التي لا تنسى

عن أن أكون الزوجة المُهمَلة، المضمون وجودها.

-------------

19- لمستك بتديني طاقة

وكلامك الحلو ليا هو رمز السعادة

اشحن قوتي دايما علشان اعرف اعيش معاك

--------------

20- 
بقوله عايزة حضن

يقولي صومي

أمال لو قلت نجيب عيال!