الاثنين، 25 ديسمبر 2017

من كتاباتي (65)









1- مش معنى إنك بتحب حاجة إنك هتلاقي نفسك فيها
 أنا بحب الشتا لكن بلاقي نفسي في الصيف.

------------------

2- فرق كبير بين الحب وبين التعود.

---------------

3- مش معنى إنك حكيت لحد عن حياتك وسمحت له يسألك وأنت وافقت تجاوب
إن هو كمان حابب يحكي ويجاوب عن أسئلتك الخاصة بحياته!
مش معنى إنك وافقت تقرأ لحد حاجة هو بعتهالك
إن هو كمان مستعد يقرألك
مش معنى إنك عاوز تدردش مع حد في لحظة ما
إن هو كمان يكون عنده نفس الرغبة
 احنا مش زي بعض.


-----------------

4- كتر الكذب في التفاهات
 بيقلل ثقة الناس فيك

---------

5- تجاهل المشكلة مابيحلهاش.

-------------

6- مش معقول تسمع منك كـ(صديق) الكلام اللي ممكن تسمعه من واحد بيعاكس!

----

7- ما تدخلش روحك في علاقة أنت مش قدها.

-----

8- من أنواع العقاب: إنك تركب مواصلة فيها أطفال.



الأحد، 17 ديسمبر 2017

من قراءاتي (55)




1- الوحدة والشعور بالرفض من أقسى درجات الفقر.
لـ الأم تيريزا

2- إذا كان الكرم عطاء اليد، فالامتنان عطاء الروح. 
ولا يعبر عن امتنانه إلا من كان متصالحا مع نفسه. 
فالامتنان مثل الغفران كلاهما من صفات النبلاء.

لـ ياسر حارب

3- الأشياء الخالدة ليست تلك التي تبقى أبدا، ولكنها التي لاتنسى أبدا.

لـ ياسر حارب

4- إن اليوم الذي نتوقف فيه عن الخروج من المنزل نتوقف فيه عن الحياة.


 لـ ياسر حارب.





الأحد، 10 ديسمبر 2017

الدنيا مش أنت بس







ابن اخويا: يعني إيه مليونير؟
أنا: يعني حد معاه أكتر من مليون جنيه
- هو فيه حد أصلا ممكن يبقى معاه مليون جنيه
- آه فيه عادي وفيه كمان بيقى معاه أكتر من مليار جنيه
- لا طبعا مفيش الكلام ده
----
- في قانون التعايش بين الكائنات فيه نوع من الطيور طعامه يوجد بين أسنان التمساح.. وقتها التمساح بيفتح فكه والطائر بياكل بقايا الفتات بين أسنانه.. بالنسبة للتمساح الطائر ده بيساعده على تنظيف أسنانه وبالنسبة للطائر التمساح بيساعده ياكل
- لأ طبعا .. التمساح هياكله
- يا حبيبي لا مش هياكله.
- لأ هياكله

 وحوارات تانية كتير بتحصل بيني وبينه وأنا بحاول أبسط له أي معلومة لكن هو مابيستوعبش غير اللي شافه وبس
فكرني وقتها بتعليقات ناس لما بكتب عن حاجة بالنسبة لمحيطهم ماحصلتش ومن وجهة نظرهم مستحيل تحصل.. برضه بيتحفونيبتعليقات على شاكلة "مفيش الكلام ده"
ومن موقعي هذا أحب أقول.. كله بيحصل.. مفيش ثوابت..
خبراتك مهما كانت بالنسبة لك كتيرة فهي برضه قليلة 
 فلما تسمع موقف جديد على سمعك وماتبقاش عارف تصدقة على اعتبار إن محدش بيعمل كده أو محدش ممكن يقبل كده
ضيفه لخبراتك في هدوء بدون اعتراض
لأن الدنيا مش أنت وبس
اللي شخصيته قوية مثلا مابيبقاش مستوعب ان فيه حد شخصيته ضعيفة أو مهزوزة 
واللي ماشافتش حب في حياتها مابتبقاش مصدقة ان فيه حب أصلا
المفاجأة إن فيه شخصيات ضعيفة وممكن تقبل اللي انت ماتقبلوش عادي
وفيه حب بجد حتى لو ماكنش مر في حياتك ولا في حياة حد تعرفه
 وقيس على ده بقى أي تصرف أو فعل مهما كان من وجهة نظرك غير قابل للحدوث فهو وارد جدا يحصل عادي.

مش معنى إنك اتجوزتي عن حب ان كل الجوازات عن حب بتنجح
ومش معنى إنك متجوزة راجل حنين وكريم إن كل الأزواج شبهه
وقيسي على ده بقى
مش معنى انك عرفتي حد زبالة وخاين ان كلهم كده

حياتك مش مقياس 
الدنيا مش أنتي بس
 الدنيا فيها أكتر.. فتقبلي أي حاجة بتسمعيها من غير الجملة المستفزة 

"ده مش ممكن يحصل"





الجمعة، 1 ديسمبر 2017

السبت، 25 نوفمبر 2017

من كتاباتي (64)








1- من كتر ماشاف وساخات كتير ماتوقعهاش نضيفة.

2- استغلوا وقتكم في التعليم

 حتى لو في تعلم طبخة جديدة

3- كون إن كلامكم يكون ع الأحداث العامة بس
 ده بيدل أن العلاقة بينكم خاوية.

4- صبغة العجوز السودا بتحوله مسخ.

5- صعب تعيش مع حد ميعرفش حاجة عن جبر الخاطر.

6- هي أهل للأمانة وأهل للثقة 
 لكن لا تختبر هذا إذا تعارض الأمر
 مع حيائها أوسلامها النفسي أومساحتها الشخصية.



7- لو عايز تعرف خروجتك كانت حلوة ولا لأ
 اتفرج على نفسك بعد ماتروح بيتك بشوية كده وشوف تأثيرها عليك.


8- كون أن يكون في حياتك حد
 بيخاف على زعلك وبيراعي إنه مايكونش سبب في استيائك وغضبك
 ده في حد ذاته رزق.



9- فكك من حوارات جاهد وعافر
 هي مسألة حظ أو واسطة مش أكتر.


10- هي البداية بتكون اسبانش
 وبعد كده بيسهل عليكي تخلعيه.


11- إذا كانت الصحة تاج فالعقل هو الماسة اللي بتزينها
 فحافظوا عليه على قد ماتقدروا.


الثلاثاء، 21 نوفمبر 2017

من قراءاتي 54







1- العاهرة الواحدة يأتيها عدد كبير من الزناة، 
فلو أن عدد العاهرات في العالم هو كذا فعدد الزناة هو على الأقل عشرة أضعاف هذا العدد؛
 فالرجال هم الأكثر عهرا.
لـ أحمد خالد مصطفى


2- يصبح المزعج مألوفا عندما تعتاده أنت ولا يتوقف عنه الآخرون
لنجوى شنوان

3- أستطيع أن أتحمل يأسي الخاص، أما رجاء شخص آخر فلا
لـ وليم والس

4- بين جميع المشاعر الوضيعة الخوف هو الأبغض

لـ شكسبير




الجمعة، 10 نوفمبر 2017

لعنة المزاح








من أسوأ الشخصيات اللي ممكن تتعامل معاهم، اللي بيأذوك بأي شكل تحت بند
 "كنا بنهزر"

لا تكذب وإن كنت مازحا
لا تدعو على أحد وإن كنت مازحا
لا تسب وتلعن وإن كنت مازحا
لا تروع الآمنين وإن كنت مازحا
لا تسخر من أحد وإن كنت مازحا
 لا تجعل المزاح ذريعة لفعل مالايليق بالإنسان الخلوق



الأربعاء، 1 نوفمبر 2017

الأربعاء، 25 أكتوبر 2017

من كتاباتي (63)








1- ماتندمش على حاجة حلوة عملتها لحد وهو ماقدرهاش

أنت عملتها لله مش ليه

2- أن تجد من يعتني بك حتى وإن كان مقابل أجر لهو شيء رائع.


3- همت أن تكتب"إنني وحيدة"

ثم فور النشر وجدتها "إن معي ربي"

4- البكاء بلا دموع من أقسى أنواع البكاء.

5- زوجة الخائن امرأة مثيرة للشفقة.

6- وبتداري الوجع جواها بضحك مبالغ فيه.

7- الدنيا أوسع بكتير من نظرتك الضيقة.

8- كل واحد بيحاول يقرب من ربنا بطريقته.

9- قبل ما تعاتب حد بسؤال: مابتسألش عليا ليه؟
ما تسأل أنت عليه وقله بدالها وحشتني

10- سيأتي من ينتزع هذا الحزن من قلبك.


السبت، 21 أكتوبر 2017

من قراءاتي (53)










1- ربما لا أكون الشخص الذي يحبه كل العالم، ولكني أحاول ألا أضايق الناس.
لهاروكي موراكامي
------

2- لا حياة مع الفقر، ولا ثقافة مع الكذب. ولا تحاول اقناعي إننا في دولة، نحن في معتقل كبير، تديره سلطات احتلال حقيقية.
لـ حسام حسين
----

3- إن الرجل الذي لا يشعرني بأنه لا مثيل لي ولا يمكن الاستعاضة عني. رجل لا يحبني.
لـ قسطنطين جيوريجيو
------

4- الحب له جوانب كثيرة، أهمها عندي أن أشعر بأنني اختيار، لابديل متوافر.
لـهشام الخشن


الثلاثاء، 10 أكتوبر 2017

وكلني






كلنا فاكرين مشهد الأكل في مسرحية ريا وسكينة  وعبدالعال مش مبطل أكل كتير ومش باصص لسكينة أساسا.
وهي بتقوله: وكلني
فيرد: أوكلك بإيه؟
- بإيدك
- وأنا آكل بإيه؟
- يا ساتر

شيء بايخ جدا لما تكون متعود تاكل مع حد وهو مش مهتم بيك.. إذا كنت بتاكل ولا لأ.. إذا كنت بتمارس عادتك أصلا أو غيرتها أو حتى توقفت عنها.
الأعمى مش هو اللي محروم من نعمة البصر .. الأعمى هو اللي معندوش بصيرة وإحساس باللي حواليه
عبدالعال في المشهد كان باصص للأكل وبس
مابيعملش حاجة غير أنه بيدخل الأكل في فمه وبس ومش مهتم حتى بحكاوي سكينة عن الأكل اللي حضرتهوله وتعبت وفيه وبأنها ما أكلتش حاجة من امبارح وشوية كلام بتحاول تخليه يحس بيها ويسألها حتى أنتي مابتاكليش ليه.

لما خطر في ذهني المشهد ده، جال في خاطري حديث النبي عليه الصلاة والسلام

(وَلَسْتَ بِنَافِقٍ نَفَقَةً تَبْتَغِي بِهَا وَجْهَ اللَّهِ،

 إِلَّا آجَرَكَ اللَّهُ بِهَا حَتَّى اللُّقْمَةَ تَجْعَلُهَا فِي فِي امْرَأَتِكَ)

يعني كل حاجة حلوة بتعملها للطرف الآخر

 وبيكون لها أثر طيب في نفسه بتاخد عليها أجر
طيب ليه فيه ناس بتحرم روحها من الثواب ده
بصوا حواليكم شوية 
واهتموا بأهل بيتكم هم أولى بكل شيء


الأحد، 1 أكتوبر 2017

الاثنين، 25 سبتمبر 2017

من كتاباتي (62)









1- وارد تبعت لحد سؤال عن حاجة هو المفروض بيشتغل فيها
وتلاقيه مايردش عليك
لأنه احتمال كبير يكون معندوش إجابة ولا يعرف أنت أصلا بتتكلم عن إيه..
خبرته مش بالحجم اللي تخليه يجاوبك
وطبعا ماينفعش يقولك كده لسببين
أولهم: إنك استحالة هتصدقه.
وثانيا: لإنها وحشة في حقه.
فهيفضل تقول عليه مغرور ومتكبر بدل ما تقول عليه فاشل ومالوش فيها.


============

2- فرحة بنت العشرين غير فرحة بنت التلاتين.

====

3- الوحدة أحسن من إنك تعيشي مع حد:
- يظلمك.
- يشك فيكي.
- يخليكي قاعدة على أعصابك ومش فاهمة هو متغير معاكي ليه.
- ماتبقيش حاسة معاه بالأمان.
- ماتبقيش حاسة ان فيه حاجة بتربطكم ببعض غير بس مكان السكن.


===========


4- - وبتقضي على ملل الحياة الروتينية بتاعة الجواز ازاي؟
- بالحمل والولادة طبعا.

========

5- إذا كنت أنا مانسيتش طلبك ولما قدرت اعمله عملته (مع إنك ماطلبتوش مني)
يبقى ربنا هينساك!

========

6- اللي بيبص ع الدنيا من فوق بتهون عليه حاجات كتير.

======

7- لو عايز تتأكد إن الخروج فطرة أساسية في حياة البشر
 مش مجرد رفاهية زي ما كتير معتقد
قول لطفل ماكملش سنة يلا نخرج باي
وشوف انفعالاته وتعابير وشه
ولو كان بيعيط هتلاقيه سكت وانبسط من مجرد الفكرة.

==========

8- عمرك ماكنت هتقدر تعمل فيها كده لولا ثقتها فيك
هي مش عبيطة ولا هبلة
أنت اللي خاين وغدار.

===========

9- عزيزي الزوج:مستلزمات البيت ومشتروات المطبخ لا تعتبر هدية للزوجة.







الخميس، 21 سبتمبر 2017

من قراءاتي (52)







1- أنت لا تستدعي الحرب، هي تأتيك غصبا، إنه القدر.
لأدهم العبودي

--

2- الحب يقتلنا على حين غرة، من دون أن يترك أثارا للجريمة.
لـ باولو كويلو


3- أحب الله أن يُسعد آدم فخلق له امرأة تحبه
لأشرف الخمايسي

--
4- أني لا أستطيع أن أفهم كيف تستطيع أن تحب جموعا حاولت قتلك قبل قليل؟

لريتشارد باخ






الأحد، 10 سبتمبر 2017

أنت زارع




من أول مابتبدأ يومك وأنت بتزرع من غير ماتحس
بسمتك في وجه أول حد بيقابلك.. دي زرعة بيبدأ بيها يومه
تجهمك في المواصلات، كلامك الطيب، مساعدتك للغير، تسامحك، إيثارك....
أي بوست بتكتبه يعتبر زرعة وهتأثر في اللي بيقرأه سواء بالإيجاب أو بالسلب.
كل موقف ليك مع حد وخصوصا لو قريب منك يعتبر زرعة في علاقتك بيه
أي حاجة بتعملها تعتبر زرعة بتحط بذرتها جوه أي حد بيتعامل معاك.. فاختار بذرتك وخليها طيبة.



الجمعة، 1 سبتمبر 2017

الجمعة، 25 أغسطس 2017

من كتاباتي (61)





1- أن تصاحب عفيف النفس فهذه نعمة.

2- يا من أمره بين الكاف والنون

آما آن لتقول للشيء كن فيكون.


3- هما قدام الناس بعرفوا يمثلوا كويس انهم مبسوطين وعايشين سعداء مع بعض.


4- حذار أن تتعامل معها كفاصل اعلاني للاستراحة أو للتتسلية أو للقضاء على الملل.


5- أنت الخسران ضحكتها لو مافرحتهاش.


6- ياترى أنت بتتكلم معاها حبا فيها ولا علشان مش لاقي غيرها قصادك متاحة.


7- سكوته اللي مش عاجبك ده رحمة ليكي
بدل مايقولك كلام يحرق دمك
بصي للنص المليان.


8-مش مهم تكون أول واحد في حياتها
المهم تحس معاك حاجات ماحسيتهاش قبل كده.


9- أسوأ مايفعله الزوج أن تصبح علاقته بزوجته مجرد مجاملات.


10- ماتصدقوش الصور
فهي خادعة.


11- تبكي خلف الشاشة ثم تكتب
"ابتسموا؛ فالسعادة خلقت من أجلكم"


12- حياتنا مش زي بعض
مش لازم الموقف اللي حصلك لو حصلي يكون بنفس تفاصيله
مفيش ثوابت
مش كل حد بيسيب شغله بيلاقي الاحسن 
مش كل واحدة بتنهي علاقة بترتبط أو بتاخد حد أحسن
مش كل حق بيرجع
ولا كل غايب بيعود
آه حسن الظن والعشم في الله موجود
بس الواقع اوقات كتير بيكون له رأي تاني
فماتشيلش الناس فوق طاقتها
ولا تتفائل بزيادة علشان ماتاخدتش على دماغك يا حمادة.


13- الهدية البسيطة لما تجيلك من حد دخله محدود بتبقى غالية أوي.


14- ضيفي خبرات الناس لخبراتك
مفيش حاجة اسمها"مش معقول ده يحصل، مفيش حد يعمل كده، هي المفروض كانت تتصرف كذا وغيرها من عبارات الاستنكار
الحياة مش كلها اللي انتي مريتي بيه وبس
فيه حيوات ناس تانية كتير بيشاركوكي على هذا الكوكب.


15- بكلمة منه ممكن يخليها طايرة
وبكلمة تانية بتبقى مستنية تغور.