الجمعة، 25 نوفمبر 2016

من كتاباتي (53)







1- نقص حنان

نقص حب

نقص اهتمام

نقص فرحة

نقص أحضااان

نقص خروجات


النقوصات دي ممكن مع الوقت تموت فعلا مش هزار.




2- كونوا ذكريات كتير مع اللي بتحبوهم علشان لما تفاروقهم

- لأي سبب- يفتكروكم دايما.


3- النظافة ملهاش علاقة بالنوع

شوفت تراب في شقتك نضفه سواء كنت راجل أو ست.



4- سألني الصغير: هل أنا مُلزم بحفظ كتاب الله كاملا؟

فأجبته: احفظ منه قدر استطاعتك،

واعلم إنك مُلزم بتطبيق كل ماجاء فيه سواء حفظته أم لا.




5- ولادك هما اللي هيدفعوا تمن اختيارك لشريك حياتك.


6- الجواز مش حل

ولا حاجة تملا بيها وقت فراغك

الجواز حياة يا تختارها صح يا هتعاني منها الباقي من حياتك.




7- سحقا لكل أم تزن على رأس ولدها للزواج سريعا 

لكي ينسى أزمة ما تمر في حياته.




8- لما تتصل بحد وهو مايردش هاتله أعذار

 (نايم، بيصلي، في الحمام، تعبان، مش قادر يتكلم أو مش عايز......

لو عايزه في حاجة مهمة ابعتله رسالة بيها

لو بس عايز تطمن عليه فاتصالك وصله ومش مهم يرد

 المهم ان تواصلك معاه حصل ووصله

(ده بس في العلاقات الانسانية المتعددة

أما في علاقات الشغل فده يبقى انسان مستهتر ومش قد المسئولية)




9- علموا عيالكم: بعد مايخلصوا أكل أو شرب

يدخلوا اللي كانوا بياكلوا أو يشربوا فيه المطبخ وينضفوا مكان قعدتهم.



10- علموا ولادكم يقولوا: آسف، شكرا، لوسمحت، بعد إذنك، من فضلك...


11- عمل المرأة مابقاش اختيار

أنتي لازم تشتغلي

مفيش حاجة اسمها تقعدي في البيت

ده علشان صحتك النفسية قبل أي حاجة تانية.




12- طريقة حلوة تخلي ابنك يحفظ القرآن.

ابن أخويا حاطط الهيد فون في ودنه

- بتسمع ايه يا حبيبي؟

- بسمع أغاني

- طيب إيه رأيك لما تسمع السورة اللي عليك حفظها


ولو حفظتها هجيبلك الحصان اللي أنت عايزه.

الكلام ده كان من ساعتين


ابن اخويا حفظ السورة بترتيلها وبنفس تجويد الشيخ 


grin emoticon
اللي هو لو كان حد حاول يحفظهاله كان شله ورفع له الضغط


الحمدلله تمت المحاولة بنجاح






الاثنين، 21 نوفمبر 2016

من قراءاتي 43






1- من حق الضحية أن تدافع عن حقها في الصراخ.
لمحمود درويش


2- سنصير شعبا إن أردنا، حين نعلم أننا لسنا ملائكة، وأن الشر ليس من اختصاص الآخرين.
لمحمود درويش


3- هل كان علينا أن نسقط من علو شاهق، ونرى دمنا على أيدينا.. لندرك أننا لسنا ملائكة كما نظن؟
لمحمود درويش

4- حار الفقهاء واتفقوا على أمر واحد هو: أن الله أعلم.
لمحمود درويش


5- لمحة حب تبرر حماقة دهر.

لهدى عبدالمنعم







الاثنين، 14 نوفمبر 2016

الرجل ليس فاقد للأهلية








عن مقال كان بعنوان تقريبا "ماتكلميش راجل متجوز أو ماتكونيش خطافة رجالة" 
(مش فاكرة العنوان)
وحملة "زوجي زوجك"
اللي لفت نظري إن الكلام دايما موجه للمرأة وليس للرجل.
في مقولة"خطافة الرجالة" مُطالب من المرأة انها ماتقربش من أي زوج لربما تعجبه فيخرب بيته علشانها!! ماظنش إن فيه راجل بيكلم واحدة غصب عنه.. 

كلام مش منطقي وشايفاه فيه إهانة للرجل قبل مايكون إهانة للمرأة.
أعتقد أن "الرجل" ناضج،عاقل، يعلم جيدا مسؤولياته ومُدرك لما يقدم عليه.
لو سمعنا من البنت مقولة "هو اللي ضحك عليا وخلاني أحبه وأصدقه" هنقبلها عادي لكن مش هنقبل إطلاقا لو سمعنا من رجل "هي اللي ضحكت عليا وخطفتني من بيتي وعيالي" وحشة أوي أوي لو رجل قالها ..ده كده مابقاش راجل بقى .. دي يادوب تتقال من مراهق لسه في اعدادي وخايف لابوه يحرمه من المصروف ويبيته في الشارع.
اللي بيكلم واحدة غير مراته ومعشمها بجواز أو حب أو اي كلام في السكة دي بيكون خاين.
الست لو وافقت هنا بتتعامل من منطق عريس وجايلي أجيب آخره واشوفه بجد ولا لأ (ماخانتش حد ولا خطفته ولاهو فارق معاها من أصله)
مصطلح "خطافة الرجالة" شايفة إنه إسقاط من امرأة لا تستطيع مواجهة زوجها بخيانته فتبررها بدهاء أخرى استطاعت خطفه والاستحواذ عليه (أنتي مصدقة نفسك؟)
أما عن "زوجي زوجك" انتي ليه بتتعاملي مع الزوج كأنه من أدوات المطبخ مثلا ومعندكيش مشكلة تديه لجارتك تستخدمه شوية وترجعهولك تاني؟
أنتي شايفة زوجك كده فعلا!!
مالوش رأي ولا كرامة ولا حرية حتى في اختياره لزوجة تانية.
أنتي قبلاه يتجوز عليكي لو انتي اللي اقترحتي واختارتي.. لكن هتهدي الدنيا لو هو اللي حبها واختارها وصارحك بكده.
اعقلوا الكلام قبل ماتقولوه
الزواج مش لعبة ولا تجربة ده مودة ورحمة
وقبلهم حسن اختيار واقتناع تام مع التوافق الشخصي وتآلف الروح.







الاثنين، 7 نوفمبر 2016

قل ماشاء الله












بطلوا نبر على حياة الناس
"كل ده نوم"
-نومه الكتير مش بياخد من راحتك أنتي مش عارفة هو تعبان قد إيه والنوم بالنسبة له رحمة..
 ولا هو بينام على دماغك مثلا حظه بس اللي خلاكي تعرفي ده مش أكتر.
"هتاكلي كل ده"
- هي مابتاكلش من زادك أنتي وعيالك ولا بتصرفي عليها من جيبك ولا تعرفي إنها بتهرب بالأكل من حاجات كتير نفسية هي بس اللي حساها.
"بتخرجي كل يوم"
- هي مابتاخدتش تمن مواصلاتها منك ولا بتستلف منك هدومك وشنطك مثلا 
أنتي ماتعرفيش مشاويرها اليومية للمحامي ومحكمة الاسرة والسجل المدني بالنسبة لها مؤلمة قد إيه ولا تعرفي خروجها للأطباء وعمل التحاليل والأشعة بيوجوعوها قد إيه.. هي مش لازم تقول إنها بتخرج للأماكن دي علشان تتعاطفي معاها بدل الحسد والغيظ اللي جواكي ده.

وغيرها كتير من الأقوال التي تنم عن حسد ظاهر وحقد معلن
عود لسانك يقول"ماشاء الله" على أي حاجة 
صفي نفسك من جوه محدش بياخد أكتر من نصيبه

الثلاثاء، 1 نوفمبر 2016

منوعات إسلامية (53)







حكم ومواعظ
ــــــــــــــــــــــــــ
عن بلال بن سعد قال: أخ لك كلما لقيك ذكرك بحظك من الله، خير لك من أخ كلما لقيك وضع في كفك دينار"
 (سير أعلام النبلاء)
- قال عبدالملك بن مروان لبنيه:" كلكم يترشح لهذا الأمر (أي: تولي الخلافة) ،
 ولا يصلح له منكم إلا من كان له سيف مسلول، ومال مبذول، وعدل تطمئن إليه القلوب" (العقد الفريد لابن عبد ربه)

- عن ابن مسعود رضي الله عنه قال: كل الحلال يطوي عليها المؤمن إلا الخيانة والكذب.
 (ذم الكذب لابن أبي الدنيا)

- عن الحسن قال: والله لأن أقضي لامرئ مسلم حاجة أحب إلي من أن أصلي ألف ركعة."
 أي أن قضاء حوائج الناس أفضل من صلاة التطوع
(اصطناع المعروف لابن أبي الدنيا)