من كتاباتي (127)

 1- لما بحضر دورات تدريبية عن علم النفس والارتقاء بالذات وما إلى ذلك.. بفتكر د. إبراهيم الفقي

وباخد أتتيود: "وأنتم رايحين إحنا كنا راجعين".

يمكن علشان كده ما بحسش إني بتعلم حاجة جديدة، وإن معظم الكلام إذا ما كانش كله أنا عرفاه سواء من دراستي أو من متابعتي لبرامج إبراهيم الفقي زمان.

2-اللي بيحبك بجد لا هيمشي، ولا هيسيبك تمشي.

3-  الرز وقت الزراعة محتاج ميه كتير تغمره، ما ينفعش معاه سياسة الري بالتنقيط، أنت كده مش بس بتهدر طاقتك على الفاضي، أنت كمان بتخلي الزرعة تموت بالبطيء.

أي فلاح شاطر بيتعامل مع كل زرعة حسب احتياجاتها وطبيعتها، علشان كده بيجني الثمرة وهو مطمن إنه عمل اللي عليه.

وأنا هنا مش بتكلم عن الرز.

4- بعد افتتاح المتحف المصري الكبير، مصر دلوقتي بتفتخر ببرنامج #دولة_التلاوة.

وفي ظل حالة الانسجام والفخر تظهر شرذمة جاهلة تعلق بالسلب على مقدمة البرنامج، وأحدهم قال إنها مثيرة للفتنة وهتثير شهوة الموجودين في البرنامج!

وهنا لقتني بفكر إن لما حد بيكون عنده امتحان، وخاصة لو شفوي بيبقى كل تركيزه في المادة العلمية وبس، ومهما اتعرض لإغراءات متعمدة بالسرمحة مثلا، هو لو هدفه ينجح مش هيركز ولا هيستقبل أي مشوشات خارجية ولا حتى داخلية.

تخيل بقى لو الامتحان ده (قرآن) وهيشوفه العالم كله، يا ترى تركيز اللي فيه هيكون عامل إزاي؟!

ورحت لطبيعة الراجل اللي أصلا ما بياخدتش باله من التفاصيل، وعلى حد قول أحدهم: "لو صاحبي دخل عليا من غير رأسه مش هاخد بالي". ولما مراته تغير لون شعرها مثلا وتسأله: "مش ملاحظ فيا حاجة؟" فهو يقولها: "خسيتي؟"

أو مثلا لو بتاخد رأيه في لون أبيض وبيج وتسأله: "أنهي أحلى؟" فيرد ببلاهة:"هو فين الفرق؟".

تخيل لما حد دي طبيعته أصلا، ياخد باله من تفاصيل أنثى، ويبدأ يقيم ملابسها ويشوفها مثيرة للغرائز ولا لا!

ده معناه إنه مش بس أطلق بصره، ده فضل مركز تركيز يدخله جهنم حدف والله.

ورحت لفكرة إن فعلا محدش بيتكلم على ملابس المرأة ومظهرها غير اللي ركز في مفاتنها زي أي حد شهواني وما عندوش حياء.. وده ينطبق على الرجل والمرأة بلا استثناء.

شوفتوا بقى الكلام الكتير عن ملابس المرأة، خلوها مستباحة لإطلاق البصر عليها عادي بلا أدنى أخلاق إزاي!

5- إنك تقطع شعرة معاوية اللي بينك وبين حد ما يستاهلكش، ده نوع من أنواع التحرر.

6-  نفكر بعض يا بنات.

اللي بنخرجه من حياتنا، ما بندخلوش تاني.

7- في فرق كبير بين إنه يتلكك علشان يكلمك مثلا وبين إنه يتلكأ.

8-قبل ما تمتعض من شغلك اللي بتنزله كل يوم، تخيل نفسك من غيره.

9-  أعتقد إن الإنسان من آن لآخر محتاج يحس بحب اللي حواليه وإن وجوده في حياتهم مهم وفارق.

10-أظن إن من أولى علامات الاضطراب النفسي: عدم الاستحمام.

  

من كتاباتي (126)

 

1- الوحيد اللي يقدر يحيي شمسك من جديد، هو أنت.

2- أظن إن أول علامة على حبك لحد، أنك تفضل شغوف وأنت بتسمعه.

إحنا ممكن نتكلم مع أي حد بدافع شهوة الحكي جوه كل واحد فينا، وعلى حسب حالتنا النفسية وظروف المكان والزمان وما إلى ذلك.. لكن مش أي حد هنحب نديله وداننا بمحبة حقيقة. لا على سبيل الفضول ولا الواجب.

أنك تفضل شغوف وأنت بتسمعه، حتى لو بيحكيلك ذكرياته اللي أنت تقريبا حفظتها.

ولذلك من جوانا عارفين إننا لما نحب نفضفض بنروح للي بيحبنا مش للي إحنا بنحبه.

3- قبل ما تفتح وجع حد، اتأكد إنك هتعرف تقفله.

وده ينطبق على قعدات البنات وفضولهم وأسئلتهم الشخصية للي قدامهم من غير وجه حق وكده.

4- في حاجات كده ما تتقدرش ولا بكنوز الدنيا.

منها مثلا: حد يخاف عليك، حد يحميك، حد ينبهك لحاجة تخصك أو مثلا يلاقي حاجة لايقة عليك ويقول دي علشانك.

5-لما كنت في إسكندرية، ركبت الباص أبو دورين، السواق وقتها كان مشغل أغاني مبهجة.

كان فيه من الركاب أسرة غير مصرية، قام الراجل اللي معاهم يتحرك على النغمات، واحنا حواليه بنصقف، لغاية ما انتبه إن فيه موبايلات متسلطة عليه!

هنا، وقف حركة وقال بغضب: "لا تصوير، لا تصوير" وراح لكل اللي ماسكين الموبيلات، وطلب منهم يحذفوا اللي صوروه.

وحقيقي يعني بقت آفة، تصوير الناس من غير إذنهم وكأن ده العادي!

عيب يا جماعة عيب.

اللي ما تقبلوش على نفسك ما تقبلوش على غيرك.

سيبوا الناس تتنفس.

6- قبل ما تقل بأصلك مع حد، افتكر إن مصر أوضة وصالة.

7-  افردوا وشكم وأنتم رايحين الشغل، غيركم بيدور ولسه مش لاقي.

من كتاباتي (125)

 

1- الوعي الجمعي تأثيره أكبر بكتير من الوعي الفردي.

أي نشاط جماعي تأثيره أكتر بكتير من النشاط الفردي.

*الصحبة حلوة.

*الصحبة عزوة.

--

2-إيه الحكمة لما حد يكون ماشي ويتزحلق، إيه الرسالة اللي الكون عايز يوصلها في اللحظة دي؟

إيه الحكمة إن طرحتي تطير من شوية هوا وشعري يبان أو فستاني يطير أو أي جزء من جسمي ينكشف قدرا؟

إيه الحكمة إن الكيس اللي شايلة فيه حاجات كتير يتقطع، وكل اللي فيه يتفرط على الأرض في الشارع أو على سلم المترو في عز الزحمة مثلا؟

إيه الحكمة إني أحتاج حاجة ومش معايا تمنها؟

أسئلة كتيرة ومشروعة بنسألها جوانا أو برانا في أحلك الأوقات، لكن لو بصيت عليها من زاوية تانية هتلاقيك كنت مجرد مرسال مش طالب في اختبار.

فكر كده إن كل موقف وما على شبيهه، كان اختبار للي مر وقتها قصادك وما عملش اللي المفروض يعمله.

وقوعك على الأرض كان اختبار لمد يد العون بالمعنى الحرفي للكلمة.

الطرحة اللي طارت كانت اختبار فوري لغض البصر.

الكيس اللي اتقطع كان اختبار فوري لإغاثة الملهوف.

الضائقة المادية كانت اختبار للصدقة أوالإحسان أوالقرض الحسن.

طلبك من حد أي حاجة وهو يقدر يعملها وما عملهاش، كانت اختبار لعلمه، لماله، لأخلاقه، لإنسانيته، لعلاقته بك.

وقيس على ده بقى، في كل موقف تتحط فيه ما يكونش ليه جواك إجابة.. حتى اللي شمتوا فيك وعايروك ده كان اختبار ليهم، ربنا حب يظهر لك الحقيقة بطريقة عملية.

* أوقات المحنة اللي بتتعرض لها بتكون اختبار للي شافوك، مش اختبار ليك أنت. 

من كتاباتي (124)

 

1- لو مش متبادل، فالحب مش حقيقي.

2- عداوة صريحة أفضل من صداقة مزيفة.

3- قبل ما تناموا، امتنوا للحاجات الحلوة اللي حصلت في يومكم.

فكروا نفسكم بنعم ربنا اللي محاوطاكم، واحمدوه من قلوبكم.

من كتاباتي 123

 

1- البؤس بيجيب بؤس.

سمعوا نفسكم كلام كويس، سواء من الناس اللي بتتابعوهم، أو من كلامكم لنفسكم.

غيروا برمجة عقلكم إن الخير موجود، وإن الحياة تتعاش عادي، وإنكم متمرمغين في نعيم الله.

ده هيفرق معاكم بعد كده على المستوى البعيد.

2- ماذا لو كانت تلك الفتاة مكرمة من قبل أبيها؟

كيف ستكون شخصيتها؟

ومن يستطيع أن يغرر بها أو يجني عليها؟!

3-لما تلاقي حد بيحاول معاك بكلامه الإيجابي، بلاش تحبطه بكلامك السلبي.

كلنا ماشيين في الدنيا بحسن الظن بالله، يعني لا هو أجمد منك، ولا حياته أحسن من حياتك. 

من كتاباتي (122)

 

1- يا بخت اللي لقى اللي يسكن ليه.

مش مجرد زواج وخلاص؛ السكن اللي خلى نفسه تستكين.

مين بيفكر في الزواج كده؟!

إنه يكون سكن للنفس والروح قبل ما يكون للجسد.

أظن إن هو ده هدف الزواج الحقيقي.

لما الإنسان بيستكين بيقدر ينتج، بيقدر يكون إنسان، مش مجرد همجي بيجري ورا غريزته وشهواته.

لو النفوس استكانت بالزواج الصح، الدنيا كلها هتبقى ألطف وأهدى.

وكأن ده معنى الآية القرآنية:

“وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً"

2-عايز تعرف أي فعل قصادك حلال ولا حرام؟ شوف هو مؤذِ ولا لا!

أي فعل مؤذِ فهو حرام.

من أول تعليق سخيف بتقوله بهزار مثلا لغاية قتل النفس. 

من كتاباتي 121

1-  أعتقد إن من أقوى الكائنات في الدنيا، هي الأم اللي بتربي عيالها لوحدها؛ الست دي معرضة لانهيار عصبي في أي لحظة، دي مسؤولة عن أطفال.

عارف يعني إيه؟

يعني مسؤولة عن أمانهم وعن حمايتهم وعن رعايتهم وعن تربيتهم... وفوق كل ده لوحدها. لوحدها يعني ما حدش بيشبع احتياجاتها الفطرية ولو حتى بالدعم والتقدير.

يعني وارد ما يكونش عندها اللي تتسند عليه، ووارد تبقى مضغوطة نفسيا ومستنزفة بدنيا، ووارد تبقى محتاجة تختلي بنفسها شوية وما تقدرش...

دايما بشوف المرأة في العموم من أقوى الكائنات، لكن الأم العزباء تفوقها.

2-احتياجات الإنسان مش رفاهية، دي ضرورة واجبة على كل مسؤول.

لما حد يقول إنه في اللحظة الحالية محتاج حاجة، حتى لو مجرد كلمة طيبة أو دعم بأي شكل، يبقى بقت فرض واجب على اللي سمعه.

ما تستقلوش بأي حاجة، كون إن إنسان عبر عن ده بكلام صريح يعني احتياجه وصل مداه، وحقه على البشرية إنها تلبيله مطلبه.

3-الدعم النفسي، والاستقلال المادي، وتحقيق الذات:

أسلحة قوية لمواجهة الحياة.

4-النجاح في النجاة ملهم، والاستسلام للانهزام محبط.

من كتاباتي 120

 

1- بتعاملي مع مدربين يوجا سواء واخدينها سبوبة أو واخدينها بجد، أكاد أجزم إن عامل السن بيفرق، والخبرة الحياتية في التعامل مع العملاء أهم بكتير من كام كورس أخدوه وطبقوه.

2- ربنا خلقنا لإعمار الأرض، وعلشان نعمر الأرض لازم نتعلم، وعلشان نتعلم لازم يكون عندنا شعف وعلشان يكون عندنا شعف محتاجين نتأمل في خلقه ومن هنا هنقدر نتعرف على مواهبها وهواياتنا اللي يحبذ لو قدرنا ندرسها صح علشان بيها نعمل حاجات تفيد المجتمع.

ده عمره ما هيتحقق لو شايف إن كل حاجة حرام أو إن الحلال الوحيد أنك تصلي في المسجد وتقرأ في المصحف طول اليوم.

مأمورين نصلي فروضنا في أول الوقت وبعد كده اليوم بتاعك تشتغل فيه على نفسك لغاية ما تبقى إنسان منتج في المجتمع مش عالة ومستني اللي يصرف عليك.

وهنا أتذكر موقف النبي صلى الله عليه وسلم لما كان بيشوف واحد طول الوقت في المسجد فسأله مين بيصرف عليك فقاله:أخويا، قاله: أخوك عند الله افضل منك.

لو خليت شغلك نفسك وتطويرها مش هيكون عندك وقت تنشغل بالناس والكلام عنهم ولبسهم وظروفهم وتتبع حياتهم لأن بالمناسبة كل ده حرام.

3- في رحلة التشافي أنت بتقرر تشيل سدادة الذاكرة، وده طبعا بيحتاج قوة وإرادة ورغبة حقيقية في مواجهة ذكرياتك السيئة اللي اتسببت بأذى نفسي ليك، سواء كنت وقتها مدرك ده أو لا.

المواقف القديمة دي كان لازم وقتها تعبر فيها عن غضبك ورفضك ليها وتخرج مخزون اللي حصل فيك وقتها، وبما إن ده ما حصلش فده اتراكم جواك، ومن حق نفسك عليه تفرغ كل الشحنات السلبية المتراكمة علشان ما تجيش تنهار في يوم على موقف يبان بسيط ولا يستدعي.

4- أتدري من المحروم؟ اللي ربنا يبعتله العوض، ويقوله مش عايز. 

من كتاباتي (119)

 

1- محدش عارف الرزق بييجي منين وإزاي، لكن أنت عليك السعي، والرزق ده بتاع ربنا.

2- أظن أن الارتباط العاطفي المتبادل بين الرجل والمرأة من أهم أسباب اتزانهما النفسي.

3- أجيد فعل الرجال ولكني أفضل أن أكون ست.

4- ما تزرعيش وردة على غطاء بلاعة.

5-يا ترى الراجل اللي هيكمل معايا رحلة حياتي، الدنيا هتكون عملت معاه إيه على ما يوصلني، ويقرر تكون رحلة حياتنا واحدة؟! 

أنا مقتنعة إن شخصياتنا بتتغير من سنة للتانية، وإن الدنيا بتصنفر شخصيتنا، وتفضل تكحت فيها علشان تنحت حاجة نضيفة، ده لو الإنسان واع ومدرك لده ومش يائس ومستسلم للي بيحصل وخلاص.

يا ترى هو بقى خاض رحلته، وقرر يكون في كل محطة أحسن نسخة منه، زي ما أنا على الأقل بحاول؟!

أرجو هذا من قلبي

أهمية العلاج النفسي

 

كل ذكرياتنا السيئة بتدخل جوه عقلنا الباطن، وبتبقى عاملة زي دمامل ساكنة. وفيه بيبقى مجرد جروح سطحية، وفيه بيبقى جروح عميقة...

وكل جرح من دول يوجد في عمق معين، وفي مكان من الجسم برضه، فعلى حسب كل مكان وعلى حسب نوع الجرح هيكون إحساسك لو قررت تفتحه علشان تطهره فتدي فرصة للجسم انه يلتئم على نظافة فيبقى مع الوقت كأنه لم يكن.

"لم يكن" بمعنى إنك لما تفتكره ما تتوجعش، وتقدر تتكلم عنه عادي من غير خنقة أو قهرة أو دموع.

مش أي حد يقدر يفتح جراح الماضي، مش أي حد يقدر على المواجهة دي.. مش أي حد يقدر على وجع فتح الخراج وهو صاحي كده من غير تخدير، ده أنت بنفسك اللي بتفتحه.

التشافي رحلة مش سهلة، لكنها هتبين قد إيه أنت شجاع، وبتحب نفسك ومش عايز تقضي بقية حياتك مسجون في جراح قديمة، وارد يكون عقلك أخفاها عنك لحمايتك من مواجهتها.

لكن دايما العلاج مهما كان مُر نتيجته أفضل بكتير من مرض متعايش معاه، لأنك بس مش قادر تاخد العلاج أو تطلب المساعدة.

ناس كتير ما تعرفش حلاوة إنك تخوض رحلتك الداخلية وتكتشف في نفسك حاجات كتيرة، وتشوف قوتك في كل اللي مريت بيه مهما كان.

أهمية وجود المعالج النفسي بعد أي صدمة مش رفاهية ده ضرورة.

لأن الناس اللي ما بتتعالجش يا بتعيش مقهورة، يا بتتحول لشخصيات مؤذية.

من كتاباتي 118

 

1- شعور حلو قوي، لما تحس إنك مصدر أمان لكائن حي؛ بيخليك تحس بقيمة وجودك في الحياة.

أظن ناس كتير بتسعى للإنجاب علشان كده.

2- الصفة اللي هتوصف بيها ابنك من صغره، هيكبر يعملها لا إرادي.

لو وصفته بالكذاب، الغبي، معندوش تركيز، أبله، طيب، أهبل، سهل يضحك عليه، ابن أمه، معندوش شخصية، ناكر المعروف، طماع، ما بيشبعش، وغيرها من الصفات الذميمة.

ولو وصفته بالشاطر، الذكي، ما يتخافش عليه، عضمه جامد، ما بيعرفش يكذب، راجل، قد المسؤولية، وغيرها من الصفات الحميدة.

راقب كده اللي حواليك، أو حتى راقب نفسك وشوف كانوا أهلك بيوصفوك بإيه وأنت صغير، وطلعت كده ولا لا.

حاولوا تكونوا حظ عيالكم الحلو، واغرزوا جواهم كل جميل.

3- أكتر شيء مؤسف في فعل الأذى، إن اللي واقع عليه الأذى، ما يبقاش عارف إنه بيتأذى.

4- عودوا لسانكم على الكلام الحلو، وبلاش استظراف.. لما تعرف إن حد تعبان، ادعيله بالشفا.

حد حصله حاجة حلوة، باركله.

حد حصله حاجة وحشة، واسيه.

حد حصله حاجة بالنسبة لك تافهة، اسكت.

حد بيتمنى حاجة، يا تدعيله تحصل يا تسكت.

مش عارف تقول حاجة، اسكت.

سكوتك مش هيوجع حد، لكن كلامك اللي زي الدبش، أو دعوتك الغبية اللي ممكن ترشق بجد هي اللي هتوجع.

وبلاش حسد.

بلاش تبص لحد على طوله وحجمه الضخم بالنسبة لك.

بلاش تبص لحد على صوره الحلوة، أو أي حاجة بينشرها أنت شايفها أملة.

ادعوا بالبركة بينكم وبين نفسكم، وبلاش نبر على حياة الناس.

ما تبقوش مؤذيين كده.

استظرافك مش هيتقال عليه خفة دم.

ولا حسدك هيتقال عليه محبة.

دي معاص أنت مستهون بيها. 

الناس هتترمي في جهنم من حصاد ألسنتهم، فخدوا بالكم.

من كتاباتي 117

 

سبحان من جعل الرحمة في قلوب عباده على كافة المستويات.

فيه ناس بيحبوا يتصدقوا بإطعام مثلا..

والإطعام متفرع بقى:

فيه يحب يطعم حيوانات الشارع

وفيه يحب يطعم الباعة في الشارع

وفيه يحب يطعم أسر بعينها

وفيه يحب يطعم دور الرعاية (أيتام، مسنين)

وفيه يحب يطعم أسر مرضى المستشفيات الحكومية

وفيه يحب يطعم أهل غزة

وغيرها كتير

وفيه اللي بيتصدق بوقته أو بعلمه أو بماله أو حتى بكلمة طيبة...

كل دول ما يجوش حاجة قصاد رحمة ربنا بينا، وسبحان من خلق هذا الاختلاف الجميل علشان الرحمة تعم الكل.

--

الناس اللي خاضوا رحلتهم الداخلية الكلام معاهم بيكون ملهم وممتع.

--

يمكن يكون رزقك في حيوان يحبك أكتر من مية إنسان.

--

مؤمنة إن اللحظات الحلوة ما بتتعوضتش، وعلشان كده أول ما تحسها ما تسيبهاش تعدي غير لما تشبع منها.

أي حاجة تانية وقتها ممكن تتعوض أو تتأجل أو حتى تتلغي عادي.

اللحظات الحلوة دي هي العمر الحقيقي اللي بتعيشه.

--

صديق مخلص بمثابة جيش عظيم

-

أظن إن ثواب إغاثة الملهوف يأتي من معنى "ومن أحياها".. لكن في ناس ما تستاهلش الثواب، فربنا بيعمي قلبها عن المعنى ده.

--

وهما الأصحاب إيه غير ونس في الأيام الموحشة 

من كتاباتي (116)

 

1- "بشروا ولا تنفروا"

لما تشوف حد كاتب أمنية ما، بلاش تستظرف بتعليقات سخيفة تظهر اليأس اللي بتعانيه.

لو مش هتقدر تبشره بتحقيق اللي بيتمناه، يبقى سكوتك أفضل.

"فلتقل خيرا أو لتصمت"

*اللي بين علامات التنصيص، أحاديث نبوية بصيغة الأمر.

2-أحب أقول لكل طبيب:

أنت مش أمين على أوجاع الناس وبس، أنت كمان أمين على عوراتهم.

فخد بالك من الأمانة اللي في رقبتك، لأنها أول حاجة هتتسأل عنها.

3-لما تشوف حاجة عند حد وتستغربها أو تستكترها، سمِ الله وادع بالبركة لصاحبها.

"بسم الله ما شاء الله ولا قوة إلا بالله"

تعرف ليه؟

لأن الحسد معصية، وناس بسببه ممكن تموت، تموت بجد مش مجازا

"العين حق"

ما تبصوش في رزق حد، احمدوا ربنا على اللي عندكم، مش هتاخد رزق حد مهما عملت، ومش هينوبك غير سيئات تتقل ميزانك أنت أكيد في غنى عنها.

4-كلمة "معلش" من حد بتحبه تعني الكثير.   

مهرة برية

 

هي المهرة البرية
معها ستختبر فروسيتك على حق. هل ستستطيع ترويضها أم ستعود بخفي حنين، مُصابًا جراء حماقتك!
في مزرعتك، الخيول كثيرة،كلها مستأنسة ومطيعة، تنتظرك بشغف وتحتفي بطلتك، تدلل بغنج. وأنت على دراية بكل فرسة منها على حدة.
أما هي، فحرة وتعلم أنها كذلك، لا تخضع سوى لقانون البرية منشأها.
حرون؛ لا تنتظر أحدًا، ليست ملك أحد.
هن يتنافسن لإرضائك، يتمايلن ابتهاجًا إذا ما امتطيت إحداهن وكأنك وهبتها وسام الشرف،
أما هي، لا تسري عليها قوانينك، فلها قانونها الخاص، غير خاضعة للامتطاء ومن يفعلها عَنوة تكون سقطته مروعة قد تودي بحياته.
معها، لا تدعي شيئا يتجاوز قدرتك، فستكتشف زيفك حتى وإن فررت.