الأحد، 19 أكتوبر 2008

حنان أُم

عارفة إنك بتحبي بنتك جداً، وعارفة كمان انها بالنسبة لك أغلى من نور عينك، ولذلك أردت أن ألفت انتباهك لبعض التوجيهات التي تساعدك على تربيتها وتنشأتها تنشأة سليمة،والبعد عن الحنان الزائد الذى قد يؤذي أكثر مايفيد.
*اجعلى علاقتك بابنتك علاقة خاصة جداً.. علميها كل شيء بأسلوب بسيط، واجعلى من نفسك مرجع لها تعرف منه كل المعلومات التي يثيرها فضولها؛ بدل ماتدور على حد تاني وتتعلم حاجات غلط.
*كوّنى ذكريات جميلة معاها علشان بعد كده تفتكر إنك كنتي معها في جميع مراحل حياتها مادياً ومعنوياً.
*علميها كيفية الوضوء والصلاة منذ الصغر.
*علميها كيفية الإغتسال بمفردها ودون الحاجة لكِ أيضاً منذ الصغر.
*علميها عدم الإستكانة والإستسلام والخضوع لمجرد إنها أنثى.
*علميها كيف تصبح طباخة ماهرة.
*اعتمدي عليها في بعض الأشياء التي تلائم سِنها حتى تشعر بالمسئولية منذ الصغر.
*علميها كيف تغسل ملابسها وتنظف مكانها وتعتمد على نفسها في كل شيء.
*هيئيها لكي تصبح زوجة شاطرة، وأم ناجحة ،وابنة بارة، وأخت صديقة ،وصديقة وفية.
عزيزتى الأم:لاتعاملي ابنتك كما تتعاملين مع الطيور التى تربيها في المنزل ويكون كل هدفك إنها تأكل كويس وبس!!.
أعطيها حرية في إختيار ماتريده من طعام.
*انصحيها دائما باتباع تعاليم الإسلام منذ الصغر،ولا تقولي كعادة الكثير من الأمهات"بنتي لسه صغيرة على الحجاب,إيه يعنى لما تكلم زميل لها في التليفون لمدة ساعات أو يتبادلون الزيارات بحِجة المذاكرة أو التعارف على الأهل! وتعمل كده قدامي بدل ماتعمل من ورايا...".
الغلط غلط سواء عَلمتي أَم لم تعلمي؛ فمعرفتك للشيء الغلط لن تبيحه بأي حال من الأحوال.
لأنك لو ماعلمتيهاش كل الحاجات دي وهى صغيرة ماتلوميهاش لما تكبر.
*كونى لها صديقة قبل أن تكوني لها أًم ،ولا تجعلي من نفسك مجرد دادة تؤدي طلباتها.
*أعطيها جميع خبراتك السيئة في إطار جميل وليس معقد حتى تأخذ الحذر.
*مش لازم اللي أنتي بتكرهيه هى تكرهه والعكس ومش لازم تقلدك في كل حاجة.
هي لها شخصيتها المستقلة فاحترمي ده.
*لاتعتمدي على إنها مُتعلمة أكثر منك وتبخلي عليها بمعلوماتك على إعتبار أنها عارفة كل حاجة لأن فيه حاجات كتير المدارس مابتعلمهاش.
وبلاش التفرقة العنصرية بينها وبين أخوها.. اللي يغلط يتعاقب مع معرفة خطأه حتى يتجنبه. واعرفي أن المبادئ مابتتجزأش الغلط غلط سواء من ولد أو بنت.
*ادعي لها دائما بالخير وبما تتمناه فتخيري الدعاء الذى يسعد قلبها.
وأخيراُ هي تحتاج أن ترى حبك لها بأفعال تفيدها، فاجعليها سبباً في دخولك الجنة.


يسعدنى إضافة هذا التعقيب من الأستاذTamer Alhosiny
ــــــــــــــــــــــــــــــــــــــــــــــــــــ
ياريت كل بنت أو صديقة أوقارئة تبقي كدة علشان نرجع بجد أفضل أُمة أخرجت للناس وننبه الرجال أن يلتفت لتدين المرأة لأنها مفتاح سعادته طول حياته وسر نجاح أولاده.

هناك 62 تعليقًا:

SHAPE YOUR LIFE (ABOALI) يقول...

هى تحتاج ان ترى حبك بأفعال


هذه هى فعلا الخلاصة الفعل اهم من الكلمات


جميل البوست
الاجمل الاستفاده منه


لى بوست قديم بعنوان فى الشر يكمن الخير
فيه نموذج لام

اتمنى ان تقرئيه
تقريبا هو فى شهر مايو

تقبلى خالص تقديرى

حـــــدوتـــــة يقول...

السلام عليكم

بارك الله فيكى ورزقكى بالزرية الصالحة
نصائح غالية فى زمن رخص فى كل شىء

سلالالالالالالالالالالالالالالالالالالالالالالالالالام

Ahmed Kamal يقول...

جميلة قوي ، عايز أسميها حكمة أم ، مش بس حنان أم :)

مصطفى محمود يقول...

حقيقة نصائح غالية جدا
أغلب الاسر تفتقد لمفهوم الاسرة ويعتقدون أن كل دورهم هو توفير النقود و تعليم الاولاد في المدارس وتزويجهم

ويا دار ما دخلك شر ...

هدانا الله والمسلمين ,,,

تحيتي

romansy يقول...

فعلا الحنلن الزائد قد يفسد الاولاد
ولكن يكون الحنان بوسطيه
ويكون موزع بين الاب ولام
وليس الام فقط
لتربيه جيل خالى من العقد والمشاكل

اوعى تفكر يقول...

يا سلام بوست رائع بس مش عارف ليه
حاسس انى ما أستفدتش منه حاجه

عصفور المدينة يقول...

جزاك الله خيرا نصيحة مركزة وعملية

EMMY BABY يقول...

والله جبتى المفيد

ياريت فعلا كل ام تفتكر نفسها لما كانت فى نفس مرحلة بنتها علشان تعرف تتعامل معاها صح

وولكل مرحلة مشاعرها

بجد جميل البوست وبسيط

تحياتى

ايمى

Mafrousa يقول...

الله عليكي الله
البوست جميل..اوي الله يفتح عليكي
التربيه بقت صعبة فة زمن اصعب
(الحمد لله مش عندي اولاد)
:-)

mohamed ghalia يقول...

نصائح رائعة ومفيدة جدااااااااا
أعتقد أنى سأستفيد منها فى المستقبل عندما ـزوج وأنجب
جعله الله فى ميزان حسناتك
تحياتى
دمتى بود

KHALED يقول...

سنحاسب على تقصيرنا لأولادنا و سيتهموننا بالتقصير يوم القيامة إذا لم ندلهم لطريق الله فما نزرعة فيهم هوا ما سيبقى لهم فلنتخير أى بذور نزرعها ....
بوست جديد هادف ..
دمتى مبدعة
تقبلى تحياتى

amr يقول...

السلام عليكم ورحمه الله وبركاته

موناليزا

دائما مواضيعك مميزه

وأذكر بقول سيدنا علي رضي الله عنه "لاعبه سبعًا وأدبه سبعًا وصاحبه سبعًا ثم اترك له الحبل على غاربه"

وهذا اسلوب ناجح فى التربيه

جزاك الله خيراااااااا على النصائح

نسأل الله ان تكون بميزان حسناتك

خالص تحياتى

la3lahakhier يقول...

كعادتك موناليزا دائمة الاشراق
اسعد الله قلبك يارب
وحشتينى سامحينى للانشغال

موناليزا يقول...

ابو على
ـــــــــــ
اهلا بيك يافندم
اشكرك لمشاركتك وارجو ان تعم الاستفادة الجميع
وسأقرأه حالا يافندم
دمت طيبا ولمدونتى زائرا

***********************************

حدوتة
ــــــــــ
وعليكم السلام ورحمة الله وبركاته
اهلا بيك يافندم
ربنا يكرمك ويتقبل دعائك ولك بالمثل ان شاء الله
اشكرك جدا لرايك ولمشاركتك
دمت طيبا ولمدونتى زائرا

********************************

احمد كمال
ــــــــــــ
اهلا بيك استاذ احمد
ربنا يكرمك واشكرك جدا لرايك ولمشاركتك
وسميها كما تحب اخى الكريم
دمت طيبا ولمدونتى زائرا

***********************************

تيفا
ـــــــــ
اهلا بيك يافندم
ربنا يكرمك واشكرك جدا لرايك ولمشاركتك
وهذا من وجهة نظرى لان غالبية الاسر لايدركون حجم المسئولية التى تقع عليهم حين دخول طفل جديد الاسرة
مع ان المفروض يكونوا دارسين طرق التربية ولكن لا احد يهتم
هدانا الله واياكم لما فيه الخير دائما
دمت طيبا ولمدونتى زائرا

**********************************

رومانسى
ــــــــــــ
اهلا بيك يافندم
واشكرك جدا لمشاركتك وكما قلت اخى الكريم الحنان الزائد يفسد
دمت طيبا ولمدونتى زائرا

********************************

اوعى تفكر
ـــــــــــــــ
اهلا بيك يافندم
عاجبنى صراحتك واسمحلى اجاوبك
يمكن لانك مش مسئول عن اطفال
او لانك لسه مابقتش اب
بس نصيحة هينفعك الكلام ده بعدين باذن الله
دمت طيبا ولمدونتى زائرا

*********************************

عصفور المدينة
ـــــــــــــــ
اهلا بيك يافندم
ربنا يكرمك وجزاكم مثله
فماتوفيقى الا بالله
دمت طيبا ولمدونتى زائرا

*********************************

ايمى بيبى
ــــــــــــ
اختى الحبيبة:مبسوطة بتعليقك واتمنى ان يصل لكل الامهات
نورتينى حبيبتى ودمتى بخير

**********************************

واحدة مفروسة
ـــــــــــــــ
اختى الحبيبة:معاكى حق وعشان كده على الاباء ان ياخدوا بالهم ان الانجاب مش حاجة سهلة دى مسئولية كبيرة جدااا
بس ذاكرى النصايح كويس عشان ان شاء الله لما ربنا يرزقك تكونى على اتم استعداد
رزقكى الله بالذرية الصالحة الطيبة
نورتينى حبيبتى ودمتى بخير

*******************************

محمد غالية
ــــــــــــــ
اهلا بيك استاذ محمد
اشكرك جدا لرايك ولمشاركتك
وان شاء الله ربنا يرزقك الزوجة الصالحة والذرية الطيبة وتربيهم بطريقة صحيحة وتتباهى بيهم
دمت طيبا ولمدونتى زائرا

*********************************

خالد
ـــــــــ
اهلا بيك استاذ خالد
"فلنتخير اى بذور نزرعها" جملة قمة فى الروعة وذكرتنى بأحد التابعين حينما سأل: ولدى مازال جنينا كيف أبره؟
فقيل له: لقد تأخرت فى السؤال.
قال:كيف وهو مازال جنينا
قيل:كنت تحسن اختيار أمه
اشكرك جدا لرايك ولمشاركتك القيمة
دمت طيبا ولمدونتى زائرا

***********************************

عمرو
ــــــــــ
وعليكم السلام ورحمة الله وبركاته
اهلا بيك استاذ عمرو
ربنا يكرمك على هذا الاطراء فهذا من فضل ربى
واشكرك لذكر هذه المقولة الغالية فهى تغنينا عن الكثير من النصائح
اشكرك جدا لمشاركتك
دمت طيبا ولمدونتى زائرا

*********************************

لعلها خير
ـــــــــــــ
اختى الحبيبة:يااهلا يا اهلا ايه النور ده
حمدالله على السلامة ياقمر
كنت مفتقداكى جداااااااااا
مسامحاكى حبيبتى وعذراكى كمان
كان الله فى العون ورزقكى بكل الخير اينما تكونى
وحشتينى حبيبتى ويارب تكونى بخير

رندا يقول...

الله عليكى انت هتكونى اجمل ام
يارب يكون ابنائنا سبب فى دخولنا الجنة
نصائح غالية من اجمل قلب
ربنا يقدرنا على فعل كل هذا
بوست هادف يامونية قلبى

تسلمى يارب

رندا

Abo 7anf يقول...

السلام عليكم
اكيد نصايح جميله جدا
بس هما الاولاد ملهمش حظ والله غلابه
كلماتك جميله جدا

الســـاحر يقول...

الله فعلا جميل اوى موجموعه النصائح الغاليه دى للامهات
بجد هى دى المواضيع الايجابيه
ومش ده بس تقريبا مدونتك كلها مواضيعها ايجابيه
وفى النهايه سلامى وربنا يوفقك

Tamer Alhosiny يقول...

عزيزتي موناليزا

انا سعيد جدا اني بقراء موضوعات عن التربية في مونات البنات
لاني كنت خلاص تقريبا نسيت ان البنات من اهم ادوارهم التربية
وان نشات جيل جديد هو دورهم الرئيسي
نشاته وتربيته وجعله اقرب الي الله

علشان كدة دور الام دور هام جدا جدا
في حياة اي مجتمع
بس للاسف الست نسيت دورها وبكدة بقي المجتمع كله تفكك زي ما احنا شايفين

تحياتي ليكي واتمني
ان انك تعدلي في البوست وتكتبي كملحوظة لكل بنت وصديقة وقارئة
انها تبقي كدة علشان نرجع بجد افضل امة انزلت للناس
وتنبهي الرجال انه يلتفت لتدين المراه لانه مفتاح سعادته طول حياته
وسر نجاح اولاده

تحياتي
تامر الحسيني
انسان عاشق حر

الازهرى يقول...

العزيزة موناليزا

نصيحة جميلة للغاية ولو اخذ بها بالتاكيد ستكون مفيدة

ولى تعقيب بسيط على تعليقك انت وايمى
المهم تفتكر نفسها وهى فى سن بنتها باخلاقياتها وليس بعقليتها
لئلا يكون ذلك مجرد استنساخ للعقول غير مقنن


تحياتى لك ولها

GiGi world يقول...

فعلا من رضا ربنا على الانسان ان يعلمه الحكمه من صغره ربنا يعزك ويكرمك
وبالنسبه للنصايح فعلا مفيش كلام بعد اللى قلتيه

☼♫♪ عمــاد الدين يــوسف ☼♫♪ يقول...

بجد فكرة البوست هايله

ومناسبه جدا لبنات كتير اليومين دول بيعانو من بعد امهاتهم عنهم

تحياتي

elsha3er يقول...

السلام عليكم

البوست جميل جدا جزاكى الله خيرا

احمد الشاعر

المستنصر بالله يقول...

فعلا معلومات قيمه جداوياريت فعلا كل ام تاخد بالنصايح دى بس ياريت تكون الام قدوة صالحه فعلا مش تكون قدوة سيئه لبنتها

تحياتى

كـــيــــــــارا يقول...

اللللللللللللللله بجد نصائح مهمه جدا ويارب اقدر اعملها مع اللي ربنا هيرزقني بيها باذن الله

بجد انا فرحانه بالبوست ده جدا لانه اولا منك
ولانك متخصصه في المجال ده

تحياتي

(صندوق الدنيا) يقول...

كلام جميل ربنا يعزك ويكرمك

موناليزا يقول...

رندا
ـــــــــــ
اختى الحبيبة:اذيك ياجميلة يارب تكونى بخير
ربنا يسمع منك واكون فعلا(لما ربنا يرزقنى)أم قد المسئولية
وان شاء الله يكون ولادنا سبب فى دخولنا الجنة
اشكرك ياحبيبتى لرايك ولمشاركتك
نورتينى ياجميلة ودمتى بخير

**********************************

ابو حنف
ـــــــــــ
وعليكم السلام ورحمة الله وبركاته
اهلا بيك يافندم
لأ ازاى طبعا ليهم كل الحظ يكفى وجودهم فى بيت مع اب وام بغض النظر عن تصرفات كل منهم لان هناك ملايين من الابناء مشردين تماما وبلا مسكن يأويهم
تعرف.. متهيألى لو الاب قام بدوره ناحية ولاده والام كمان والاولاد قاموا برضه بدورهم ناحية ابائهم محدش هيحس بظلم او بقلة حظ
اشكرك جدا لرايك ولمشاركتك
دمت طيبا ولمدونتى زائرا

**********************************

الساحر
ــــــــــــ
اهلا بيك يافندم
ربنا يكرمك فماتوفيقى الا بالله
اشكرك جدا لرايك ولمشاركتك
دمت طيبا ولمدونتى زائرا

********************************

تامر الحسينى
ــــــــــــــ
اهلا بيك استاذ تامر
بداية:أفضل كلمة "أختى"عن "عزيزتى"
وانا ايضا سعيدة بتعليقك وهذا معناه انك كنت ظالم البنات لان مش كلهم كده
ومعك كل الحق فى اهمية دور الام فبها ينشأ الفرد سوى أو غير سوى
اما عن ماطلبته من اضافة فاسمحلى لقد أخذت ماطلبته ووضعته فى الموضوع باسمك لانك صاحب هذه الكلمات فلنعطى لكل ذى حقه
اشكرك جدا لرايك ولمشاركتك
دمت طيبا ولمدونتى زائرا

***********************************

الازهرى
ــــــــــــــ
اهلا بيك يافندم
اشكرك جدا لرايك ولمشاركتك
واحترم مداخلتك جدا معى ومع ايمى ولكننا نقصد ان تتفهم احتياجاتها النفسية فى كل مرحلة عمرية تمر بها ولم نقصد عقلها او اخلاقياتها فى هذا السن لان طبيعى اى ام كانت طفلة فى يوم من الايام ومش معقول تعامل بناتها بعقلية واخلاق طفلة!
دمت طيبا ولمدونتى زائرا

********************************

جيجى
ــــــــــــ
اختى الحبيبة:ربنا يكرمك ويسعدك على تعليقك الجميل
والحمدلله الذى هدانا لهذا وماكنا لنهتدى لولا ان هدانا الله
نورتينى جيجى الجميلة ودمتى بخير

***********************************

عماد الدين يوسف
ـــــــــــــــــــ
أهلا بيك استاذ عماد
اشكرك جدا لرايك
وياريت هذه النصائح تلاقى القبول من جانب الامهات
دمت طيبا ولمدونتى زائرا

*********************************

الشاعر
ــــــــــــ
وعليكم السلام ورحمة الله وبركاته
اهلا بيك استاذ احمد
ربنا يكرمك واشكرك جدا لرايك
دمت طيبا ولمدونتى زائرا

********************************

المستنصر بالله
ـــــــــــــــــ
اهلا بيك يافندم
والله جبت الخلاصة اخى الكريم فالتربية بالقدوة من انجح الوسائل فى التربية
اشكرك جدا لرايك ولمشاركتك
دمت طيبا ولمدونتى زائرا

********************************

كيارا
ــــــــــــ
اختى الحبيبة:وانا فرحانة اكتر بتعليقك
وان شاء الله هتبقى اجمل أُم لما ربنا يرزقك بالزوج الصالح والذرية الطيبة
نورتينى حبيبتى ودمتى بخير

********************************

ام البنين
ـــــــــــــــ
اختى الحبيبة:اشكرك جدا لرايك
وتقبل الله دعائك ولكى بالمثل ان شاء الله
نورتينى حبيبتى ودمتى بخير

Mony يقول...

الام مدرسة ان اعددتها اعددت شعبا طيب الاعراق


و اعداد الام المستقبلية مسؤلية الام الحالية


جزاك الله خيرا علي المزضوع الرائع

rovy يقول...

اختى الحبيبه

نصائح جميله قوى لكل ام .. اتمنى ان يعيننا الرحمن جميعا حتى نوازن فى تربيتنا بين ما نربى بناتنا عليه و ما يروه فى المجتمع من تناقضات و سلبيات و ايضا ما يرونه فى الفضائيات ..
المهمه الان اصبحت شاقه جدا الا على من استطاعت بذر بذرة الخير فى بناتها من الصغر .. و من كان الرحمن عونها و وكيلها و وليها سبحانه ..
ربنا يحفظ كل بناتنا و يعينا على تربيتهم بما ينفع و يبنى و يجعلنا نتقدم بهم و بامتنا .. امين

جزاكى الرحمن كل الخير على نصيحتك الغاليه و جعل هذا البوست فى ميزان حسناتك ..
دمت بكل خير و سعاده اختى الغاليه

ودى و تحياتى

جنّي يقول...

ما شاء الله

ما اجملها من نصائح ..

ليتنا نعلم ان تربية البنت ليس كما يقولون جهالة لتقوية نصف المجتمع ..

البنت والتي ستكون اما يوما ما ستبني كل المجتمع وليس نصفه فقط ..

وكيفما غرسنا فيها من قيم واخلاق سنحصد نفس لقيم والاخلاق ..

mohra يقول...

ربنا يرزقنى و يرزقك ببنات نعلمهم و نربيهم كده ان شاء الله
تحياتى

Maha Shahen يقول...

بجد تامر عنده حق

كتبتنى موضوع جميل ومهم
والأهم منه اننا مش لازم ننسى
ان الأم مدرسه اذا اعددتها اعددت شعب طيب الاعراق

اللي هنغرسه فى ولادنا من اخلاق وقيم هيكون حافز ليهم يعطوه لأبنائهم وابناء ابنائهم ونفضل علي هذا المنوال إلى ان يتوفى الله الارض ومن عليها

ربنا يبارك فيكى يا عزيزتى

*الطالبة عفو الله *زوزو يقول...

بارك الله فيك اختي فعلا موضوع قيم
اختي الام كوني قدورة حسنة لابنتك في كل شيء
اصبحنا نرى علاقة الام ببنتها بدات تفقد معناها و جمالها
فلنعيد النظر فيعلاقتنا ببناتنا و لنستفيد فعلا من النصائح الغالية التي تقدمت بها اختنا امة الله
جزاك الله خيرا اختي
دمتي في حفظ الله

موناليزا يقول...

مونى
ـــــــــ
اختى الحبيبة:صدقتى ياجميلة فمسئولية الام اعداد أجيال وأجيال
نرجو من الله ان يوفق كل أم لهذه المسئولية
نورتينى حبيبتى واشكرك جدا لرايك ولمشاركتك
ودمتى بخير

********************************

روفى
ــــــــــ
اختى الحبيبة:اشكرك جدا لرايك ولمشاركتك
وربنا يفرحك ببناتك ويقدرك على تربيتهم وتنشأتهم تنشأة اسلامية صحيحة
ويجعلهم سببا لدخولك الجنة
نورتينى حبيبتى ودمتى بخير وسعادة

*******************************

جنى
ــــــــ
اهلا بيك استاذ سعيد
ربنا يكرمك وصدقت اخى الكريم فالام هى الاساس فى تربية رجال الغد
اشكرك جدا لرايك ولمشاركتك
دمت طيبا ولمدونتى زائرا

********************************

مهرة
ـــــــــ
اختى الحبيبة:اهلا اهلا اذيك ياجميلة ويارب تكونى بخير
ربنا يسمع منك يارب ويرزقنا بازواج صالحين وذرية طيبة اللهم امين
نورتينى حبيبتى ودمتى بخير

**********************************

نور شاهين
ــــــــــــــــ
اختى الحبيبة:الحمدلله الذى هدانى لهذا فماتوفيقى الا بالله
واشكرك جدا لرايك ولمشاركتك
نورتينى حبيبتى ودمتى بخير

********************************

الطالبة عفو الله
ـــــــــــــــــــ
اختى الحبيبة:اهلا اهلا بالقمر
ربنا يكرمك ففعلا التربية بالقدوة من انجح الوسائل فى التربية
ربنا ينفع بيكى ويعزك
نورتينى حبيبتى ودمتى بخير

Jana يقول...

جزاكِ الله خيرا وفيرا

هو ده الحنان الايجابى
عشان ناس كتير فاكرة ان الحنان دلع ومفسدة

ربنا يعزك موناليزا

حياتنا الزوجية...(عضو رابطة هويتي إسلامية) يقول...

زيارتي الثانية

الموضوع رائع بجد وله من الاهمية والمكانه في حياتنا ما يجعله هو شغلي الشاغل بأذن الله في الفترة القادمة

الكلمات معبرة انبه ان موضوع الشخصية المستقلة دي موضوع مهم مهم مهم مهم جدا لان هناك مسلمين كثير ( من يخصوني ) متغافين عن هذه النقطة وان المرأة في العموم لها شخصيتها في الاسلام وقد جعل لها الاسلام ملكياتها الخاصة ايضا الموضوع كبير اتمني لك النجاح

اسف لم اعرف ان اسمك موناليزا لاني عاتبت نفسي كثير من اجل هذا الموضوع لكني مصمم ان الصور تقلل من اهمية البوست لأن لها عامل ايضا في اضافة اهداف المدونة.

اسلوبك جميل وفقك الله الي ما يحب ويرضي


حياتنا

بنت مصريه يقول...

بوست رائع
بس مين يسمع
للاسف معظم الشباب والبنات دلوقتى
بقوا لامؤاخذه
ههههههههههههههههه

دنيتى الجميله يقول...

موناليزا
السلام عليكم ورحمه الله وبركاته
انا عندى بنت عندها 6سنين
وبحتار كتير فى الاسلوب الصحيح
لتربيتها التربيه السليمه
بس ساعات بحس انها عنيده معايا
وساعات تانيه بحس انها بتسمع الكلام
عجبتنى جدا كلامك "كونى لها صديقة قبل أن تكونى لها أًم "
وياريت تنصحينى اعمل ايه لعند الاولاد
وجزاكى الله خيرا

سمكه واحده يقول...

بجد موضوع جميل وفعلا اهم حاجه تربيه البنت من الاساس تكون صح وسليمه لانها هتصبح ام مسوله بأديها ممكن ينصلح حال المجتمع او لا
فأهم حاجه تكون موجوده معرفه تعاليم الدين صح والتدين بكده هيرتقي المجتمع
نصائح غاليه ياريت كل الامهات تلتزم بجد علشان نبقي نحو مستقبل افضل لكي ولاسرتك مش فاكره كنت بسمع الاعلان ده فين
تحياتي
سمكه

عاشــــــ النقاب ـقــــة"نونو" يقول...

الله يا امة الله
جميلةاوي
نصايح غالية
بارك الله فيكم

الربان يقول...

تحياتي اختي الفاضلة

جمعتي كل خصال الخير النبيلة في موضوع التدوينه....و في رأيي انك لم تتركي
شيء...و لو كل ام فعلت مثل هذه التوجيهات الجميلة...لكان شكل مجتمعنا
غير....

البنت الصغيرة هي ام المستقبل...و الامهات هن بناة الشعوب و حضارات الامم
لانها المعلمة الاولي ...و ربما الاخيرة ايضا
لان الكثيرين منا يستأنس برأي الام حتي
بعد ان يشق طريقة و يستقل بحياته.

بارك الله لك و فيك ...و جزاك الله خيرا
علي هذه النصائح الغالية و المفيدة.


تحياتي و تقديري

عـــفـــراء يقول...

السلام عليكم
حبيبتى ازيك عاملة اية
يارب تكونى بخير
دخلت اسلم عليك واشكرك على سؤالك
وكالعادة نصائحك المتميزة
فجزاكى الله كل الخير عنا بها
واعانك على تقديم الكثير والافضل دائما
خالص تقديرى....

موناليزا يقول...

جانا
ـــــــــ
اختى الحبيبة:ربنا يكرمك يارب وجزاكم مثله
حنان الوالدين طبعا مطلوب ولكنه يجب ان يتم بطريقة معقولة وغير مبالغ فيها حتى لايفسد الابناء
وفقكى الله فى تربية ابنائك وجعلهم قرة اعين لكى وسببا لدخولك الجنة
نورتينى حبيبتى ودمتى بخير

**********************************

حياتنا الزوجية
ـــــــــــــــــــ
اهلا بيك يافندم فى زيارتك الثانية وعقبال الزيارة رقم1100.
اشكرك جدا لرايك ولاتفاقك معى فى اهمية هذا الموضوع.
صدقت اخى الكريم فالاسلام قد كرم المرأة فى جميع مراحل حياتها ولكن هناك من لايدركون ذلك.
تقبلت أسفك يافندم ولكنى مازلت أجهل هل اسم "موناليزا"تعنى إسائة ما او صفة قبيحة مثلا؟
وأحترم وجهة نظرك الخاصة بموضوع الصور فالاختلاف فى الرأى لايفسد للود قضية
ربنا يكرمك واشكرك على دعائك لى ولك بالمثل ان شاء الله
دمت طيبا ولمدونتى زائرا

**********************************

بنت مصرية
ـــــــــــــ
اختى الحبيبة:الغالبية وليس الجميع وده يمكن لعدم ادراكهم مسئولية الام بالذات تجاه ابنائها وخاصة البنات وماسيترتب على اسلوب تربيتها لهم
ربنا يرزقنا بالذرية الطيبة وان شاء الله نوفق فى تربيتهم
نورتينى حبيبتى ودمتى بخير

**********************************

دنيتى الجميلة
ـــــــــــــــ
وعليكم السلام ورحمة الله وبركاته
اختى الحبيبة:ربنا يخليهالك ويباركلك فيها ويقدر على تربيتها
اما عن العند فهقولك الحل فى كلمتين"ماتعمليش عقلك بعقلها"
وحاولى تمسكى اعصابك لو عملت حاجة تضايقك قدر المستطاع
اعرفى انك انتى الكبيرة ولازم انتى اللى تتحكمى فى الموقف وده معناه انك ماترضخيش لعنادها وتخليها تمشى كلامها..
ولو تحبى نتواصل ولمزيد من التفاصيل ياريت تبعتيلى ايميلك
وانا تحت امرك
نورتينى حبيبتى ودمتى بخير

**********************************

سمكة واحدة
ــــــــــــــ
اختى الحبيبة:اشكرك جدا لرايك ولمشاركتك
وانا كمان سمعتها فى اعلان قبل كده بس برضه مش فاكراه ههههه
نورتينى حبيبتى ودمتى بخير

********************************

عاشقة النقاب
ـــــــــــــــــــ
اختى الحبيبة:ربنا يكرمك فماتوفيقى الا بالله
ربنا يباركلك فى ابنائك ويقدرك ويعينك على تربيتهم وتنشأتهم تنشأة سليمة
نورتينى حبيبتى ودمتى بخير

*********************************

الربان
ـــــــــــ
اهلا بيك اخى الكريم
صدقت والله فللأم تأثير كبير حتى بعد ما الابناء بتكبر وتصبح آباء ولكن يبقى رأى الام دائما فى الاعتبار
فليتقوا الله فى ابنائهم وفيما يزرعون فيهم
ربنا يكرمك على مشاركتك وتعليقك القيم
دمت طيبا ولمدونتى زائرا

**********************************

عفراء
ـــــــــــ
وعليكم السلام ورحمة الله وبركاته
اختى الحبيبة:يا اهلا يااهلا ايه الغيبة دى كلها يارب تكونى بخير
انا الحمدلله ياحبيبتى بخير وفى فضل ونعمة من الله
لا شكرعلى واجب ياجميلة فهذا حقك علىَّ
نورتينى حبيبتى واشكرك جدا لمشاركتك
وربنا يتقبل دعائك ولكى بالمثل ان شاء الله
ما تتأخريش علينا تانى لانك بتوحشيييينى

مصعب رجب يقول...

مقال رائع
تحياتي أختي الكريمة
وبالفعل
ياليت كل أم تقرأ هذا المقال .

mahasen saber يقول...

بر ابنك وهو صغير يبرك وهو كبير
.......
وصداقة الابناء للاباء والعكس هيا اليى بتبنى شخصيتهم مستقبلا
ربنا يباركلك فى حياتك وذريتك

Tamer Alhosiny يقول...

اختي موناليزا

لقد دخلت المدونة لقف علي اخر تعليقات المدونين علي موضوعك الهام خاصة المدونات منهم
ليس لاني اسيء الظن بهم بالعكس الحمد لله البنت المصرية واعية ومتدينة ولكن لانه في الحزحام نجد قلة منهم للاسف هي الظاهرة بقوة مهتمة بالتفاهات من الامور وتنسي ان تثقف نفسها وتعد نفسها لدورها الاهم والاعظم
ربما لن تصدقيني اني اتمني ان اكون ام
لتمني ان اضم طفلي الصغير واعلمه واربيه واعلمه كيف يصلي وكيف يقراء القران وكيف ان الدين ليس فقط عبادة بل معاملة

ولكني فوجئت بانكي اضفتي للموضوع الفقرة التي طلبت منك اضافتها
وهذا كرم ذائد وان كنت شعرت بالخجل حين وجدت اسمي فوقه
فهو فضلا لصاحبه الذي صنع البوست وفكر في صالح الناس جميعا

اشكرك يا اختي
تامر الحسيني
انسان عاشق حر

موناليزا يقول...

ابو اسامة
ــــــــــــ
اهلا بيك يافندم
اشكرك جدا لرايك ولمشاركتك
دمت طيبا ولمدونتى زائرا

*********************************

محاسن صابر
ـــــــــــــــ
اختى الحبيبة:ربنا يكرمك ويتقبل دعائك ولكى بالمثل ان شاء الله
وفعلا صداقة الوالدين لابنائهم تنعكس على شخصيتهم فيما بعد
رزقكى الله بكل الخير
نورتيمى حبيبتى واشكرك لمشاركتك

*********************************

تامر الحسينى
ـــــــــــــــــ
اهلا بيك استاذ تامر
اشكرك لعودتك مرة اخرى
وان شاء الله ربنا يرزقك بالذرية الطيبة وتبقى أب صالح تنشأهم فى جو اسلامى تربوى فللأب دوره الهام ايضا ولا يقل اهمية عن دور الام وسأتحدث عنه فى بوست خاص قريبا باذن الله

اما عن الاضافةالخاصة بك فهذا حقك اخى الكريم فانت صاحب هذه الكلمات وكان واجب علىَّ ان اشير الى ذلك
دمت طيبا ولمدونتى زائرا

PrInCeSS BeRy يقول...

ازيك يا حببيتى وحشانى كتير

مش عارفة اقلك غير ربنا يبارك فيكى اجمل نصائح وعبارات ممكن تتعامل بها الام مع طفلتها وتوصلها للطريق الصح ربنا يسعدك يارب

funckydoctor يقول...

قوليلهم لحسن غلبنا من الفساد ده
يا رب ارحمنا
ربنا يكرمك على البوست ده

مؤمنه يقول...

السلام عليكم ورحمة الله وبركاته
دائما مواضيعك فى الصميم يا حبيبتى
فعلا الحنان الزائد قد يفسد لذلك لا بد من الصداقه بين الام واطفالها حتى تكسبهم التربيه السليمه سلوكا وفعلا
والاهم ان تكون قدوه حسنه هذه تربيه فى حد ذاتها
لذلك قبل ان نفكر فى ان ننجب اولادا علينا ان نبدا بتربية انفسنا اولا

دومتى بكل خير
واعاننا الله على ذلك
وجعلكى اما تخرج اجيالا من العظماء
فى فروع الحياه
انا حساكى كده

تقبلى تحياتى

والسلام عليكم ورحمة الله وبركاته

رفقة عمر يقول...

موناليزا دائما مواضيعك جميله ورقيقه جدا اعتقد ان غياب دور الام زى ما ذكرتيه فى البوست هو اللى جعل فيه بنات كما نراهم الان لا يعد لهم حياء ولا التزام باى قواعد اداب عارفه انا باتفرج على بنات ثانوى وباكون مستغربه جدا من تصرفاتهم اعتقد لو ليهم ام كما وصفتيها كنا شوفنا بنات عكسوا دول تماما
ربنا ينفع بعملك هذا وكلنا نعتبر منه ونتعلم منه اكيد معظم الل هايدخل ويقرا فى يوم من الايام ستكون ام ونصايحك بجد مفيده جدا للجميع
جزاك الله كل خير

مجداوية يقول...

السلام عليكم
لقيتك سهرانة زيى فقلت آجى اشوف آخر ما كتبت وكالعادة نخرج من هنا ومعنا الكثير من الفائدة فربنا يبارك لك ويجزيك كل الخير

رائعة كل النصائح ولى تجربة شخصية مع نسمة تدوينتك جعلتنى أفكر فى كتابتها فقد تفيد الأخريات وهى متعلقة بمحادثتها مع الأولاد والحدود اللى المفروض تكون لأن زى ما قلتى الصح صح والغلط غلط

ملحوظة أخيرة
فى الفقرة الأخيرة المضافة للأخ الكريم تامر الحسينى
لنعود خير أمة أخرجت للناس وليس أنزلت
وان شاء سنكون دائما خير أمة أخرجت للناس لأننا نعبد الله الحق ولأن رسولنا خير الأنام وخاتم الأنبياء صلى الله عليه وسلم وسنظل ندعو الى الخير ونأمر بالمعروف وننهى عن المنكر كما علمنا نبينا

منى يقول...

ماشاء الله
انتى كده حطيتى خطه كامله للتربيه
واعتقد ان تربيه الولاد مش هتختلف كتير برضه
وكده نطمن انك هتبقى ام رائعه ان شاء الله
ربنا يبارك فيكى

همس الاحباب يقول...

تسلم ايديكى
جبتى الخلاصة من الاخر
ليتنا نسمع ونتعظ
ونتعلم الدرس
الدنيا اتبقى جميلة فى عيونا
وانعمل لاخرتنا
نعم الفعل اهم من الكلمات
تحياتى

موناليزا يقول...

برينسيس بيرى
ــــــــــــــ
اختى الحبيبة:اهلا اهلا بالقمر وحشتينى ياجميلة وانا الحمدلله بخير

ربنا يكرمك ويفرح قلبك كما اسعدتينى بتعليقك فماتوفيقى الا بالله
نورتينى حبيبتى ودمتى بخير

**********************************

فنكى دكتور
ـــــــــــــــ
اهلا بيك يادكتور
اشكرك جدا لرايك ولمشاركتك
وآدينى قلتلهم اهو المهم التنفيذ
دمت طيبا ولمدونتى زائرا

**********************************

مؤمنة
ــــــــــ
وعليكم السلام ورحمة الله وبركاته
اختى الحبيبة:اشكرك جدا لرايك فى مواضيعى والحمدلله فهذا من فضل ربى

انتى اثارتى نقطة مهمة وهى استشعار هذه المسئولية قبل الانجاب وفعلا ليتنا جميعا ندرك ذلك

ياحبيبتى ربنا يكرمك ويسمع منك يارب واكون فعلا ام ناجحة
ربنا يرزقنا بالذرية الطيبة التى تساعدنا على دخول الجنة
نورتينى حبيبتى ودمتى بخير

**********************************

رفقة عمر
ـــــــــــ
اختى الحبيبة:اشكرك جدا لرايك فى مواضيعى والحمدلله فماتوفيقى الا بالله
وفعلا غاليتى الظواهر السيئة انتشرت واعتقادى ان غالبية الامهات بيقلدوا مايعرض فى التلفاز وخلاص دون دراسة لابعاد تصرفاتهم مع ابنائهم
عافانا الله واياكم من ان نصبح مثل هؤلاء
اللهم اجعلنا ممن يستمعون الى القول فيتبعون احسنه

ماتحرمش منك ياقمر وياريت بجد كل الامهات تضع هذه الكلمات البسيطة فى اعتبارهم
نورتينى حبيبتى ودمتى بخير

*********************************

مجداوية
ـــــــــــ
وعليكم السلام ورحمة الله وبركاته
اختى الحبيبة:اهلا اهلا بالغالية اذيك ياام نسمة يارب تكونى بخير

ربنا يكرمك يارب فماتوفيقى الا بالله
ياريت ياحبيبتى تكتبيها فى بوست عشان بجد الكل يستفيد ده احنا نكون شاكرين ليكى جدا

ربنا يكرمك ويبارك فيكى على تنبيهى وقد قمت بالتعديل وجزاكم الله خيرا
وجعلكى الله دائما مرشدة للخير
نورتينى حبيبتى ودمتى بالف خير

*********************************

منى
ــــــــ
اختى الحبيبة:اهلا اهلا اذيك ياحبيبتى يارب تكونى بخير
ربنا يكرمك يارب ويرزقنا بازواج صالحين وبذرية طيبة ان شاء الله
نورتينى حبيبتى ودمتى بخير

**********************************

همس الاحباب
ـــــــــــــ
اهلا بيك استاذ خالد
ربنا يكرمك واشكرك جدا لرايك ولمشاركتك
دمت طيبا ولمدونتى زائرا

ايمان العرفاوي يقول...

بارك الله فيكى وبكى وعليكى
نصائح رائعه ادعو الله ان ينفعنا بها
اعتبر ان العلاقة بين الام وابنتها هى فى اساسها صداقة وان كانت غير ذلك فهى تكون بعيدة عن النجاح

الازهرى يقول...

العزيزة موناليزا

شكرا على التعقيب الجميل
ما قصدته هو ان تعمهم الاخلاق القويمة كما دعوتم انتم لذلك فهى حصنهم الحصين اما التفكير فبالتأكيد تختلف العقلية بتغير الزمن
فيجب ان يكون لهم تفكير مستقل وخاص بزمنهم
والا صرنا جميعا سخا متشابهه

تحياتى دوما

امل يقول...

السلام عليكم ورحمة الله
نفس الأفكار اللي بحلم بيها لو ربنا رزقني ببنوتة اننا نكون أصدقاء بجد وإني أعلمها كل حاجة وأحفظها القرآن وأحفظ معاها طبعا وأغرس فيها كل الحاجات الحلوة اللي بتمناها
الكاريكاتير جميل قوي ومعبر فعلا عن قضية كتير من الأمهات
جزاك الله كل خير على هذا البوست القيم

بنوته مصرية يقول...

ربنا يخليكي علي النصائح دي

بجد استفادت منها كتير

وحشتيني ياقمر
جيت اسلم عليكي بعد ما رجعت

كل التحية لكي يا قمر

موناليزا يقول...

ايمان العرفاوى
ــــــــــــــــ
اختى الحبيبة:ربنا يكرمك ويتقبل دعائك ولكى بالمثل ان شاء الله
نورتينى حبيبتى واشكرك جدا لمشاركتك

********************************

الازهرى
ـــــــــــ
اهلا بيك يافندم
اشكرك جدا لعودتك مرة اخرى ومتابعة الرد
واشكرك ايضا لتوضيح مقصدك
لك منى خالص تقديرى
دمت طيبا ولمدونتى زائرا

*********************************

امل
ـــــــــــ
وعليكم السلام ورحمة الله وبركاته
اختى الحبيبة:اهلا اهلا اذيك ياجميلة ايه الغيبة الطويلة دى وحشتينى ياامولة يارب تكونى بخير

ان شاء الله ربنا يرزقنا بالذرية الطيبة ونكون قد مسئولية تربيتهم
اشكرك جدا لرايك ولمشاركتك
نورتينى حبيبتى ودمتى بخير

********************************

بنوتة مصرية
ـــــــــــــــ
اختى الحبيبة:حمدالله على سلامتك ياجميلة
وماتحرمش منك ياقمر على مشاركتك الجميلة
نورتينى حبيبتى ودمتى بخير

son's egypt يقول...

السلام عليكم
اعداد الام من الصغر هو فعلا اعداد لشعب كامل من الاخلاق والقيم
الام مدرسةان اعدادها اعددت شعبا طيب الاعراق

موناليزا يقول...

أبناء مصر
ـــــــــــــــ
وعليكم السلام ورحمة الله وبركاته
اهلا بيك يافندم
وصدقت اخى الكريم
نورت مدونتى واشكرك لمشاركتك

الفاطِمَة يقول...

جزاك الله خير الجزاء يا مونة على البوست ده . فعلا بوست رائع :)