الخميس، 18 ديسمبر، 2008

أنت المسئول

أوجه رسالتى إلى جميع الآباء:-
ـــــــــــــــــــــــــــــــــــــــــــــ
*قبل ماتفكر فى الإنجاب إسأل نفسك عايز أولاد ليه وإيه خططك فى أسلوب تربيتهم.
*قبل ماتلوم على تصرفات أولادك إسأل نفسك مين اللى رباهم.
*قبل ماتسأل هما ليه مابيصلوش إسأل نفسك أنت ليه مانفذتش وصية النبى عليه الصلاة والسلام حينما قال"علموا أولادكم الصلاة لسبع واضربوهم عليها لعشر".
*قبل ماتستغرب ليه بيشربوا سجاير إسأل نفسك مين أول حد شافوه بيشرب قدامهم سجاير.
*لاتلومهم على برود عواطفهم تجاهك ففاقد الشئ لايعطيه لو كنت زرعت جواهم حب وحنان واهتمام ورعاية لحصدت ذلك عند الكبر.
وهذه عدة نصائح قد تساعدك قبل فوات الآوان:-
ـــــــــــــــــــــــــــــــــــــــــــــــــــــــــــــــ
*اترك لهم ذكريات جميلة.من اهتمام اكتر وتخصيص وقت لهم وخروج فى أماكن جديدة وما إلى ذلك من وسائل يحبها أبنائك.
*حاول تنفيذ هذه النصيحة"لاعبوهم لسبع وأدبوهم لسبع وصاحبوهم لسبع ثم اتركوهم".
*انصحهم بأسلوب جميل وهادئ.وتذكر هذه الآية الكريمة"لو كنت فظاً غليظ القلب لانفضوا من حولك".
*اجعلهم يشعرون بوجودك وبأنهم مهما أخطأوا فستظل مكانتهم لديك ولن تتغير ولكنك فقط تخشى عليهم.
*تعرف على أصدقائهم وكن لهم كأخ كبير.
*إذا أردت توجيههم لاتتكلم بل افعلها أمامهم.خد بالك الطفل عقله كالكمبيوتر ويتذكر كل شئ من أسلوبك عند الغضب ويحاول تقليدك وأسلوبك مع الآخرين بصفة عامة وفى كل المواقف تأكد أنه نسخة مصغرة منك.
*اعطهم من وقتك أكثر ماتعطيهم من مالك فالمال ليس كل شئ وقد يفسدهم.
*ساوى بين أبنائك فى العطية وفى المعاملة.
*لاتقوم بتدليلهم طول الوقت فلكل مقام مقال.
*لاتتعامل معاهم بأسلوب واحد يعنى بلاش التدليل الزائد أو الترهيب طول الوقت فخير الأمور الوسط.
*اتفق مع والدتهم على الأسلوب الأمثل للتربية وعدم تذبذب أرآئكم أمامهم.
*لاتتشاجرا أمامهم.اجعلهم يشعرون بأن بيتهم دائما رمزاً للحب والإستقرار.
*اسمع أبنائك أكثر مما تتكلم معهم. فهم يريدون من يسمعهم ويتفهم احتياجاتهم حسب كل مرحلة عمرية يمرون بها.
*كن حازم فى قراراتك مهما كان الموقف طالما كان قرار صائب.
* اجعل أبنائك سبباً فى دخولك الجنة.
* ضع قوانين ثابتة ولا تسمح بكسرها مهما كان السبب. فالتعليم فى الصغر كالنقش على الحجر.
وأخيراً الطفل صفحة بيضاء فاكتب فوقها ماشئت فلن تقرأ إلا ماكتبت.




هناك 68 تعليقًا:

ahmed_k يقول...

فعلا الأطفال كصفحة بيضاء لا يقرأ فيها
إلا ما قد كتبه أبواه فيها
فمن شب على شيئ شاب عليه

بارك الله فيكي على النصائح الغاليه
المهمه جدا للوصول للأسلوب الأمثل في التربيه
دمتي بكل خير وود

ABOALI يقول...

انظر الى القسمات
الى الملامح والبصمات
بل تأمل فى النظرات
وتعبير الوجدانات
تفحص الصوره
ولماذا تنظر اليها مكسوره
فهناك ها هى
امامك بلا رتوش
شاهد واحكم
حكم الشيوخ والحكماء
تجد طفل قد شاخ
واصبح فى عمر الشيوخ
ليست شيخوخة الفهم والعبرات
بل شيخوخة تسارع الازمات
لماذا يا طفلى
اصبحت هكذا
فى بسمتك شيخ كبير
على جبهتك فروق السنين
وعند كلامك تسمع اصوات
طفل حزين
لا يا طفلى
لن تكون هكذا ابدا
ساحمل عنك
هموم السنين
عش وليدا
كم انت
دعنى انظر فى وجهك
لارى نور الحنين
واستمتع بك طوال السنين
لا يا طفلى
عش ابيا عزيزا
عليك ضحكات الحياه
مع بسمة وفرح وتعبيرات
البلابل ورائحة الرياحين
لن اتركك هكذا
ستعود برئيا
كما ولدت
وستحلم حلم جميل
ولن تنظر ابدا من بعيد
ستقترب وتدنو منك كل احلام السينين
وستكون انت انت
حامل المسك
ولن تكون حامل الكير
ساختار لك الان
شريكة الايام
واربيك على دين حكم الزمان
لازهو بك طفلى
وتعود اليا ضاحكا
مهما كان عمر السنين


اشكرك
وكلنا مسئولون

سلوى يقول...

الطفل صفحه بيضاء .. أكتب فيها ما شئت

ما أجمل تلك العباره

الطفل عندما يتأسس صح .. تتركيه بعد ذلك يواجه الدنيا دون خوف

ربنا يوفقك :))

و القادم....أجمل يقول...

السلام عليكم
الموضوع دا بجد مهم جدااا
في وقتنا الحالي
الأب بيعتبر بنك
يسافر في الخارج
و بالنسبة لأولادة مصدر للأموال
كتير أوي بنشوف الأمثلة دي
------
بجد تربية الأبناء معادلة صعبة
أتمنى من كل الآباء و الأمهات
أن ينجحوا في تطبيقها

و ربنا يرزق الجميع الذرية الصالحة
آآآآآآآمين

جزاك ِ الله خير الجزاء
على موضوعاتك القيمة

تقديري و حبي
:)

همس الاحباب يقول...

بارك الله فيكى
وجزاكى خيرا
الموضوع جد خطير
ونصائحك غالية جدا ونحتاجها صغارا كنا وكبار
فتحياتى وتقديرى لكمات حضرتك

princess يقول...

صحيح الطفل وهو صغير بيبقى زى العجينة بالظبط سهل تشكليها والشكل بيبقى فيه بيكمل طول حياته
وعلى حسب ما بيتغرس فيه
الثمار بتطرح
بوست مفيد
جزاكى الله خيرا

موناليزا يقول...

احمد-ك
ـــــــــ
اهلا بيك استاذ احمد
فعلا صعب ان تتغير الطباع عند الكبر
ربنا يكرمك واشكرك جدا لمشاركتك
دمت طيبا ولمدونتى زائرا

**********************************

ابو على
ـــــــــ
اهلا بيك يافندم
ما اجمله من تعليق يحمل نموذج هائل فى التعامل مع أبنائنا
رزقك الله بالذرية الطيبة وأعانك على تربيتهم وتنشأتهم كما تريد لينفعوك فى الدنيا والاخرة
دمت طيبا ولمدونتى زائرا

**********************************

سلوى
ــــــــ
اختى الحبيبة:رزقنا الله واياكى الذرية الطيبة وكنا لهم قدوة طيبة يحتذون بها
نورتينى حبيبتى ودمتى بخير

**********************************

والقادم اجمل
ــــــــــ
وعليكم السلام ورحمة الله وبركاته
اختى الحبيبة:فعلا دلؤتى ده بيحصل كتير جدا حتى الاجازات الاب مش بيرضى ينزل يقضيها مع ولاده وبالمقابل الاولاد اتعودوا على بعد الاب والنتيجة فساد وبلطجة على خلق الله
ويارب يرزقنا جميعا بالذرية الطيبة ويقدرنا على تربيتهم
ربنا يكرمك ياجميلة واشكرك جدا لمشاركتك
نورتينى حبيبتى ودمتى بخير

**********************************

همس الاحباب
ـــــــــــ
اهلا بيك استاذ خالد
ربنا يكرمك واشكرك جدا لمشاركتك
ويارب تشوف همس من احسن الناس وتتباهى بيها دايما
دمت طيبا ولمدونتى زائرا

*********************************

برينسيس
ـــــــــ
اختى الحبيبة:صدقتى ياجميلة وجبتى الخلاصة
ربنا يكرمك واشكرك جدا لمشاركتك
نورتينى حبيبتى ودمتى بخير

أحمد سعيد بسيوني يقول...

بوست جميل

فعلا
التعليم والتربية في الصغر كالنقش على الحجر

دمتم

fashkool يقول...

الحمد لله .. اول مره اقدر افرق بين روفى ..وبين جنه .. وبين موناليزا .. الاول انا كنت فاكرهم واحد .. وبعدين لقيت التعليقات عندى بتيجى روفى بس .. والمدونه بتاعتكم دى كانت عامله لى كلوا فى دماغى .. انا اروح لروفى وجنه وموناليزا وما الاقيش غير روفى .. لكن المره دى عرفت السر .. الموضوع بتاع الاطفال جميل .. بس شوفى يا موناليزا ما عادش الاب والام هما اللى بيربوا .. البيت بيربى .. آى نعم .. المدرسه بتربى .. آى نعم .. الشارع بيربى .. التليفزيون بيربى .. الاصحاب بيربوا .. ماعادش الاب بيقدر يتحكم100% فى التربيه .. اشترك معاه كتير والتليفزيون والنت وبقت حاجات ربنا يعديها على خير علينا وعلى اولادنا .. انا كنت زى اللى حاطط منبر فى البيت وكل يوم اطلع على المنبر واخطب فى اولادى .. وربنا هداهم مش 100% نص نص .. ولماتكبرى وتشوفى اولادك حتعرفى ان الكلام حاجه والفعل حاجه تانيه .. تحياتى يا مونا ليزا وتقبلى مرورى لاول مره .. كانت روفى هى اللى بتاخد المرور كله .

Butterfly يقول...

سلمت يداكى بجد موضوع جميل جدا .

تحياتى .

Dr Ibrahim samaha يقول...

بوركتى وبوركت يداك

فنحن فى مجتمع يفقتد للقدوة

ويحتاج إلى تربية من الجذور

ولعل الاباء يعقلون ويفهمون ان بتربيتهم لأبنائهم تربية حسنة انما يورثونهم كنوز ويرثون ابناء صالحين يدعون لهم

تحياتى

شيماء زايد يقول...

من يغرس الحب يحصد الرحمه
صدقتي حبيبتي في كل حرف
كثيرا ما يتحدثون عن عقوق الابناء ولا يذكرون ما زرع الأباء
تحياتي

mony يقول...

ربنا يكرمك يا مون مون

لازم الاباء تعرف ان ده من حقوق الابناء عليهم
علشان لو معملش كده يكون بيعق ابنه

ربنا يرحمنا جميعا و يهدنا الي سبل الرشاد

موناليزا يقول...

احمد سعيد بسيونى
ــــــــــــــــــ
اهلا بيك استاذ احمد
اشكرك جدا لرايك ولمشاركتك
دمت طيبا ولمدونتى زائرا

**********************************

فشكول
ــــــــ
اهلا بيك يافندم
الحمدلله ان وضحت الرؤية لشخصكم:)واهلا وسهلا بمرورك الكريم
متفقة معاك طبعا بس للاب بالذات دور خطير فى التوجيه هو اللى يقدر يخليهم مايعملوش حاجة غلط مهما كانت الاغراءات
:)وان شاء الله لما ربنا يرزقنى بالذرية الطيبة هستعين بالله فى تربيتهم
:) انا عارفة طبعا ان الواقع مختلف بس انا بحكم دراستى وعملى مع الاطفال أقدر أقول بكل ثقة ان اى حاجة هعلمها لهم منذ الصغر بيفضلوا فاكرينها
اسعدنى مرورك واتمنى التكرار
دمت طيبا ولمدونتى زائرا

*******************************

بيتر فلاى
ــــــــ
اختى الحبيبة:اشكرك جدا يافراشة
والحمدلله الذى هدانى الى هذا
نورتينى حبيبتى ودمتى بخير

***********************************

د/ابراهيم سماحة
ـــــــــــــ
اهلا بيك يادكتور
اشكرك جدا ربنا يكرمك
صدقت اخى الكريم
رزقنا الله بالذرية الطيبة وكنا لهم نعم القدوة
دمت طيبا ولمدونتى زائرا

**********************************

شيماء زايد
ــــــــــــ
اختى الحبيبة:صح جدا يوجد عقوق للابناء يتجاهلها الجميع
عافانا الله واياكى منها
ورزقنا الذرية الطيبة واعاننا على تربيتهم
نورتينى حبيبتى ودمتى بخير

**********************************

مونى
ـــــ
اختى الحبيبة:ياريتهم يعرفوا ده بجد قبل حتى مايخلفوا
نورتينى حبيبتى واشكرك جدا لمشاركتك

مسدس صغير يقول...

والله نصائح فى غاية الاهمية ولازم كل اب وكل ام تتبع النصائح دى لانتاج اطفال يخدمو الدين ويخدمو نفسهم بالدين.. اشكرك يا موناليزا على البوست الاكثر من رائع وجزاكم الله خيرا..

مولان يقول...

معاكي حق فعلا

الاطفال سهل اوي تشكليهم ولازم نكون حزرين معاهم جداااااااا

mohamed ghalia يقول...

يا ليت الأباء يتعلمون
ويحسنون تربية أبنائهم
مواضيعك رائعة كالعادة
دمتى بكل الود

HERO يقول...

والله عندك حق ونصايح غالية فعلا وكل واحد وواحدة فعلا لازم يفكروا كويس قبل الانجاب ويعرفوا انهم هيتسألوا عنهم يوم القيامة

واللي بنشوفه اليومين دول من ضياع الشباب بسبب الاباء اللي تقريبا انعدموا

تحياتي

موناليزا يقول...

مسدس صغير
ــــــــــ
اهلا بيك يافندم
ربنا يكرمك واشكرك جدا لمشاركتك
اللهم قد بلغت اللهم فاشهد
دمت طيبا ولمدونتى زائرا

******************************

مولان
ــــــ
اختى الحبيبة:صدقتى ياجميلة
نورتينى حبيبتى واشكرك جدا لمشاركتك

********************************

محمد غالية
ــــــــــــ
اهلا بيك استاذ محمد
اشكرك جدا لرايك فى مواضيعى فماتوفيقى الا بالله
وفعلا ليتهم يعرفون حجم المسئولية التى يحملونها فوق عاتقهم دون ان يشعروا
دمت طيبا ولمدونتى زائرا

*******************************

هيرو
ـــــ
اهلا بيك يادكتور
ياسلام لو بس يفكروا مكنش فى حاجة حصلت دلؤتى بيقولوا اشمعنى فلان عنده اولاد وانا لا!
وكأنه تحدى وليس انتاج فرد جديد للمجتمع
عافانا الله واياكم من ان نكون من هؤلاء
دمت طيبا ولمدونتى زائرا

mohra يقول...

انا بكتب تعليق على البوست اللى فات
بالامانه اشكرك
بوست قوى جدا ...فعلا كتر القسيه بيقسى
بس المهم قدر الله و ما شاء فعل
ربنا يعوضك كل خير و باللى يستاهلك فعلا
ربنا يسعدك يا موناليزا

حاسوباتيه يقول...

عندك حق والله في كل كلمه ياريت نربي اولادنا صح واهم حاجه الدين بجد ده الحاجه الوحيده الي تحمي وتربي صح

آخر العنقود يقول...

الله لله عليكى

يابنتى بجد مواضيعك جميلة وهادفة
ربنا يجعلها فى ميزان حسناتك يارب

طبعا يعنى انا متفقة تمااااااما معاكى
احم احم
:)
طبعا ياقمر متفقة معاكى تشهد علينا كليتنا
:)
ربنا يكرمك ياحبيبتى يارب
ومش تنسينى من دعواتك
وابقى طمنسينى عليكى

حاجات جوايا يقول...

وأخيراً الطفل صفحة بيضاء فاكتب فوقها ماشئت فلن تقرأ إلا ماكتبت

صدقتى أختى الغالية
أدعوا الله أن يوفقنا فى تربية ابننا

دمتى فى حفظ الله حبيبتى

كفايـة طيبـة يقول...

بتبقي مأساة لما الاب والام قدوة سيئة لاولادهم ....
انا بشوف الموضوع ده كل يوم ادام عينيا
وبتألم بجد ان لسة اولاد صغيرين ممكن يتشكلوا بطريقة حلوة اوى وممكن نطلعهم ناس كويسة ومفيدة اوى والاقي ابوهم او امهم بيعلموهم حاجات غلط
بجد شيء محزن

:)

جنّي يقول...

وصايا جميلة ليتها توجه لكلا الوالدين الاب والام فكلاهما مشارك في المسؤلية ..

ومن زرع في ابنائه الخير سيحصد منهم الخير ومن زرع فيهم الشر لن يحصد الا شرا ..

تحيتي

Gannah يقول...

موناليزا
اتمنى ان تكونى بخير
انا قريت البوست السابق ولم اجد ما اقوله
شعرت بالفرح والحزن فى نفس الوقت
المهم هو ان تبدأى من جديد
ولاشك ان التجربة علمتك الكثير
فالحمد لله على كل حال
اما عن هذا البوست
فاتمنى ان يقرأه كل اب وكل ام
جعلك الله دائما ممكن يدعون الى الخير
تحياتى

الازهرى يقول...

موناليزا
اختى فى الله

صدقت فى كلماتك وللاسف تعود الكثيرين على الشكوى بدون ان يحاولوا تغيير اى شىء
وبدون ان يتوقفوا مع انفسهم ولو للحظة لمناقش انفسهم فى الاسباب التى ادت لذلك

تحياتى دوما

Abo 7anf يقول...

السلام عليكم
كالعاده مواضعيك متميزه
للاسف كتير من الاباء مبيخدوش بالهم من تصرفتهم بداعى ان الاطفال لسه صغيرين ومبيفهموش حاجه
مع ان فى الفتره دى الطفل بيحاول يقلد وادله قد ميقدر
فبالتالى بتبقى افكار فى عقل الطفل من تدخين لغيره

نهر الحب يقول...

الاطفال انعكاس طبيعى لما يروه فينا
وما يقرأوه بين سطور حياتنا
جزاكى الله خيرا على النصائح

SemSem يقول...

اول زيارة ومش الاخيرة باذن الله
الموضوع دا مهم جدااااا
على الاقل لاخراج جيل جديد قد يفيد امته
ولو كل اب اهتم بابنائه وعلمهم كل حاجه اعتقد ان دا مفيد للجميع

تحياتى
ادعوكم لزيارة حواديت

آخر العنقود يقول...

ماشاء الله عليكى يامنمن

انا المفروض انى علقت مرة بس مش عارفة هوه فين
:)

متفقة تماما مع كلامك فالاطفال يتشربون كل ما يفعل من سلوكيات امامهم
فتربيتهم تقوم على التقليد اكثر من التلقين

تشهد علينا الكلية ياقمراية
:))))

ربنا يبارك فيكى ويجعله في ميزان حسناتك

rovy يقول...

السلام عليكم
اختى الحبيبه يارب تكونى بخير حال
تسلم ايديك على البوست يا غاليه
اتمنى ان يقرأه حقا كل اب و ام و جزاكى الرحمن كل الخير على نصائحك الغاليه ..

دمتى بود و فى رعاية الرحمن

تقديرى و تحياتى

موناليزا يقول...

مهرة
ـــــــ
اختى الحبيبة:اهلا بيكى وبتعليقك رغم انى كنت افضل ان يكون هذا التعليق عند بوست "بامانة اشكرك" حتى استمتع بقرائته كلما قرأت التعليقات الخاصة به:)

بشكرك جدا لرايك ولمشاركتك وربنا يسعدك ويرزقك بالزوج الصالح اللى يتقى ربنا فيكى
نورتينى حبيبتى ودمتى بخير

**********************************

حاسوباتية
ـــــــــــ
اختى الحبيبة:ربنا يبارك فيكى فعلا لو عودناهم على احكام الاسلام منذ الصغر هيبقوا احسن الناس
رزقنا الله واياكى بالذرية الطيبة
نورتينى حبيبتى ودمتى بخير

********************************

اخر العنقود
ــــــــــــــ
اختى الحبيبة:ربنا يكرمك ويبارك فيكى فماتوفيقى الا بالله:)
طبعا ياجميلة فهى من اجمل التخصصات:)
رزقنا الله واياكى بالذرية الطيبة واعزك وكتب لكى السعادة اينما تكونى
اللهم استخدمنا ولاتستبدلنا
نورتينى حبيبتى ودمتى بخير

**********************************

حاجات جوايا
ـــــــــــ
اختى الحبيبة:ربنا يوفقك ويعينك ياسالى على تربية ابنك وتنشأته تنشأة اسلامية سليمة وتشوفيه يارب احسن الناس
نورتينى حبيبتى ودمتى بخير

*********************************

كفاية طيبة
ــــــــــ
اختى الحبيبة:معاكى حق والله وساعتها بسأل نفسى ياترى هما جابوا اولاد ليه؟؟؟
رزقنا الله واياكى بالذرية الطيبة وكنا لهم نعم القدوة
نورتينى حبيبتى ودمتى بخير

********************************

جنى
ـــــــ
اهلا بيك استاذ سعيد
طبعا اخى الكريم المسئولية مشتركة ولكن هناك اشياء معينة تصدر من الاب وحده كالتدخين والاهتمام بالعمل على حساب البيت وترك المسئولية كاملة للام وما الى ذلك ولذلك وجب التنبيه
اعانك الله على تربية ابنائك وتنشأتهم بطريقة اسلامية صحيحة
دمت طيبا ولمدونتى زائرا

********************************

جنة
ــــــ
اختى الحبيبة:اهلا اهلا حمدالله على السلامة وحشتينى ياجميلة
انا الحمدلله بخير
وبشكرك جدا لمشاركتك على موضوعى السابق ودومتى لى اختا حنونا

ربنا يكرمك ويبارك فيكى ويرزقنى واياكى ذرية طيبة ونكن لهم نعم القدوة
نورتينى حبيبتى ودمتى فى رعاية الله

----------------------------------

الازهرى
ــــــــ
اهلا بيك يافندم
الله عليك جبت الخلاصة بجد
"ان الله لا يغير مابقوم حتى يغيروا ما بأنفسهم"
عايزين ولادهم يتغيروا لوحدهم من غير اى مساعدة منهم طب ازاااى؟؟
ربنا يكرمك ويرضى عنك
دمت طيبا ولمدونتى زائرا

***********************************

ابو حنف
ــــــــــ
وعليكم السلام ورحمة الله وبركاته
اهلا بيك يافندم
اشكرك جدا لرايك فماتوفيقى الا بالله
فعلا والله رغم ان فى ظل هذا الزمن ماعدتش فيه اطفال:)يعنى الطفل عنده سنتين وبيقلد باباه فى شرب السجاير مثلا وقيس على ده بقى حاجات تانية كتير
ولذلك وجب التنبيه لعلنا ننقذ مايمكن انقاذه
دمت طيبا ولمدونتى زائرا

*********************************

نهر الحب
ــــــــــ
اختى الحبيبة:صدقتى جدا جدا جدا
لانك ممكن تتعرفى على بيئة الطفل قبل حتى ماتشوفى اهله من خلال تعاملاته وكلامه
نورتينى حبيبتى ودمتى بخير

**********************************

سمسم
ـــــــ
اهلا بيك يافندم فى زيارتك الاولى وفى انتظارك دائما
صح جدا فالامل فى الجيل القادم
اشكرك جدا لمشاركتك ولبينا الدعوة وقمنا بالزيارة
دمت طيبا ولمدونتى زائرا

**********************************

اخر العنقود
ــــــــــــ
اختى الحبيبة:اعذرينى انى اتاخرت فى نشر تعليقك السابق بس النت كان مفصول
بس هو دلؤتى منور التعليقات:)
مبسوطة جدا بتعليقك التانى
ربنا يعزك ويبارك فيكى
نورتينى حبيبتى ودمتى بخير

*********************************

روفى
ـــــ
وعليكم السلام ورحمة الله وبركاته
اختى الحبيبة:سبحان الله القلوب عند بعضها كنت لسه جاية اسأل عليكى:)
انا الحمدلله ياغاليتى فى فضل ونعمة من الله سلامى للقمرات
اشكرك جدا لمشاركتك وياريت فعلا الاباء ينتبهوا لمسئوليتهم
ربنا يباركلك فى بناتك ويحفظهوملك وتشوفيهم احسن الناس يارب
نورتينى حبيبتى ودمتى فى رعاية الله
بحبك جدااااااا

blue-wave يقول...

ربنا يكرمك يارب

حياتنا الزوجية...(عضو رابطة هويتي إسلامية) يقول...

السلام عليكم ورحمة الله وبركاته

جزاك الله خيرا وهذا ما عهدناه منك باذن الله تعالي

بارك الله لكي في نصحك لنا ولجميع الاباء

الرسالة واضحة وهادفة ومصوبة نحو الهدف تماما وأضم صوتي الي صوتك وأقول لو أن كل شخص حدد هدفه مما يفعل لسهل الامر علي نفسه وعلي ما توليس مسؤليته وكان أمانة في عنقه

برنامج قوي لإعداد قادة المستقبل "هو هدف هذه الامة وهدف كل شريف يريد الخير لهذه الامة "

أبو فاطمة أعذريني علي عدم تعليقاتي علي الرسائل السابقة ولكن والله خارجه عن إرادتي

موناليزا يقول...

بلو واف
ـــــــــــ
اهلا بيك يادكتور
اشكرك جدا لدعائك لى ربنا يتقبل ولك يالمثل
ربنا يعزك ويرضى عنك
دمت طيبا ولمدونتى زائرا

********************************

حياتنا الزوجية
ـــــــــــــــ
السلام عليكم ورحمة الله وبركاته
اهلا بيك استاذ محمد
اشكرك جدا لرايك ولمشاركتك
ربنا يكرمك فماتوفيقى الا بالله
عذرك معاك اخى الكريم ربنا ييسرلك امورك
دمت طيبا ولمدونتى زائرا

Khaled يقول...

انا موافق تماما على كل الكلام دة

ربنا يجاذيكى الخير على النصايح الجميلة دى ....
ربنا يكرمك و يعوضك خير و يرزقك من حيث لا تحتسبى

طوبة ذهب وطوبة فضة يقول...

بجدالموضوع جميل اوى جزاكى الله خير وتسلم ايدك ويارب ديما ممتعانا بموضوعاتك الرائعه

أم يــــــــوســـــــف يقول...

معاكي حق يا موناليزا في اللي قلتيه

لان فعلا اللي بيغيب عن نظر الاباء

بر الاباء للابناء.....برهم ليهم
تبدأ بأختيار اسماء حسنه ليهم ..و تربيتهم صح علي الدين و علي مكارم الاخلاق ..و تعليمهم الصلاه و زرع فيهم كل شئ حسن

زي بالظبط الزرع لو الواحد اهتم بيه علي اعلي مستوي

اكيد هايحصد زرع علي اعلي مستوي
و العكس صحيح

ربنا يكرمك حبيبتي

بنت أبيها يقول...

معظم الاباء والامهات في تربيتهم لابنائهم يسيرون بمنهج البركاوي

مفيش حد بيكون راسم لاولاده طريق واساليب تربية واهداف من تربيتهم

وبعدين نتسال مال هذه الامة يتدهور حالها من جيل لاخر

موناليزا يقول...

خالد
ـــــــ
اهلا بيك استاذ خالد
اشكرك جدا لمشاركتك ولدعائك لى ربنايسعدك ويباركلك فى حياتك ويحفظلك ولادك من كل شر
دمت طيبا ولمدونتى زائئرا

**********************************

طوبة ذهب وطوبة فضة
ــــــــــــــــــــ
اختى الحبيبة:اشكرك جدا فماتوفيقى الا بالله
ربنا يكرمك ويهيئلك كل خير
نورتينى حبيبتى ودمتى بخير

********************************

ام يوسف
ـــــــــ
اختى الحبيبة:اشكرك جدا لمشاركتك ورزقكى الله بر ابنائك وتنشأتهم على منهج الله
نورتينى حبيبتى ودمتى بخير

**********************************

بنت ابيها
ـــــــــــ
اختى الحبيبة:فعلا والله تحسى دلؤتى ان الانجاب والسعى اليه بقى موضة واشمعنى فلان عنده اولاد وانا لأ بغض النظر على القدرة على تربيتهم ومدى الاستعداد المعنوى والمادى الذى سياعد فى تنشأتهم
عافانا الله واياكى من هذا ورزقنا ذرية طيبة كنا لهم نعم القدوة
نورتينى حبيبتى ودمتى بخير

أليس في بلاد العجائب يقول...

هل من عاقل فيعقل !!!

هل من مجيب لنصائحك !!

مش بيحسوا بالنعمة الا لو فقدوها ..

الله لا يري احد اي مكروه في عزيز

مش تشاؤم .. بس يا اختي العزيزة

Its too late

اجيال اتربت كده و طلعت علشان تربي عيالها كده .. الا من رحم ربي

نسأل الله العافية

------

اتمنالك صوت عالي اوي يوصل لاب وام محتاجين يسمعوا لعل وعسي يلحقوا اللي باقيلهم من النعمة اللي مقدروش يصونوها

سلمت يداكِ
جعله الله في ميزان حسناتك :)

غني يابهيه يقول...

مش محتاجه كلام

قلتى كل اللى المفروض يتقال


تحيات بهيه

موناليزا يقول...

اليس فى بلاد العجائب
ــــــــــــــــــــ
اختى الحبيبة:اذا كان الوقت اتأخر فى الاجيال الحالية فيبقى الامل فى اجيال الغد يعنى اولادى واولادك واولاد كل من يقرأ هذه الكلمات:)
مش يمكن كلماتى تقدر تغير حد فعلا!
مين عارف ..ربك كبير
نورتينى حبيبتى ودمتى بخير

-----------------------------------

غنى يابهية
ــــــــــ
اهلا بيك يافندم
اشكرك جدا لمشاركتك
ونرجو التنفيذ:)
دمت طيبا ولمدونتى زائرا

Sometimes يقول...

الطفل صفحة بيضاء فاكتب فوقها ماشئت فلن تقرأ إلا ماكتبت.

كلامك صح اوى
بس تصدقى مسئولية كبيرة بجد
وازاى تقدر توزع الحب بينهم
ربنا يقدرنا

وحشتينى اوى يا مونى
جميل بوست حلم وتحقق
ربنا يكتبهالك تانى ويكتبهالى انا كمان

موناليزا يقول...

ساعات ساعات
ـــــــــــــــ
اختى الحبيبة:وحشتينى يامنمن ويارب تكونى بخير
جعلنا الله قد هذه المسئولية
وكتب الله لنا ولكى زيارة بيت الله مرات ومرات
نورتينى حبيبتى ودمتى بخير

المستنصر بالله يقول...

دايما موضوعاتك مفيدة وتعرض المشكله ومعها الحلول
ربنا يجعلنا من الذين يستمعون القول فيتبعون احسنه
على فكرة بوستى الخاص بمشاكل الاسره لم اقصد منه ابدا الاساءة للمطلقات ولكنى كنت اريد توضيح لصورة واقع شاهدته بعينى واكيد زى ما فيه نساء مظلومات فيه رجال مظلومين
ارجو ان اكون وضحت وجهى نظرى

تحياتى لحضرتك

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمة تحياتى وتقديرى
موضوع مهم يناقش البنية التحتية للمجتمع عموما وللمجتمع الاسلامى بوجه الخصوص فأسلوب التربيه والقدوة من الوالدين هى أساس نشئة اطفالنا إما على التدين والالتزام أو على العكس
طرحك للموضوع اسلوبه جميل بارك الله فيكى وربنا يكرمنا ونقدر ننفذ اللى علينا ونجتهد ونحسن فى تربية اطفالنا
تقبلى مرورى وتحياتى
والسلام عليكم ورحمة الله وبركاته

على عبدالله يقول...

والله ربنا يبارك فيك
فعلا كلكم راع وكلكم مسئول عن رعيته
لو كل انسان ايقن الكلام ده بجد ساعتها بس هانبنى ان شاء الله اجيال من العظماء العباد الزهاد

ان شاء الله لما ربنا يكرمنى بعشرة خمستاشر .. هابذل كل طاقتى لتربيتهم على الكتاب والسنة
واخذ ف الحسبان نصايحك الغالية دى

جزاك الله كل خير

منى يقول...

نصائح غاليه
من اجل حياه واخره افضل
بارك الله فيكى ورزقك الزوج الصالح والذريه الصالحه
اعتذر عن تقصيرى وغابى عن البوست الماضى
لكن الامر لم يكن باختيارى
اتمنى ان اراكى دائما بكل الخير والقوه والسعاده
تحياتى

موناليزا يقول...

المستنصر بالله
ــــــــــــــ
اهلا بيك يافندم
ربنا يكرمك واشكرك جدا فماتوفيقى الا بالله

اما عن موضوعك الخاص بمشاكل الاسرة
اولا: اشكرك جدا لاهتمامك ولردك على تعليقى
ثانيا:بالرغم من عدم قصدك الإسائة ولكن فعلا هذه الفقرة مهينة وجارحة فقد كتبت فيها"والزوجه المطلقه او الخالعه من يستطيع ان يستامن نفسه ويتزوجها وان تزوجها وقهر كل الوساوس التى بداخله كيف يضمن انه لن يكون الزوج المخلوع القادم لاتفه الاسباب
وان كنت اعتقد هى فرصتها فى الزواج
ـــــــــــــــــــــــــــ
مره اخرى شبه مستحيله ولن يبقى لها سوى الانحراف او الزواج العرفى والعلاقات السرية ان لم تكن متدينه بالقدر الكافى"

تصحيح بسيط اخى الكريم هذا كلام جارح
واعتقادك هذا بالتعميم على المطلقات فيه اهانه للكثيرات
(سواء بقصد او بدون قصد فالإهانة مازالت موجودة)

أرشدك الله لما فيه الخير والصواب
واشكرك جدا لمشاركتك

***********************************

المعتصم
ــــــــ
وعليكم السلام ورحمة الله وبركاته
اهلا بيك يافندم
ربنا يكرمك واشكرك جدا لمشاركتك
ورزقنا الله بالذرية الطيبة وأعاننا على تحمل مسئوليتهم
دمت طيبا ولمدونتى زائرا

**********************************

على عبدالله
ــــــــــــ
اهلا بيك استاذ على
ربنا يكرمك واشكرك جدا لمشاركتك
انا بقول عشرة كفاية:) يعنى عشان تاخد بالك منهم كويس:)
رزقنا الله واياك بالذرية الطيبة واعاننا على تحمل مسئوليتهم بالشكل الذى يرضى الله به عنا
دمت طيبا ولمدونتى زائرا

******************************

منى
ـــــ
اختى الحبيبة:اهلا بالقمر وحشتينى جدا ويارب دايما تكونى بخير
ربنا يسعدك ويتقبل دعائك ولك بالمثل ان شاء الله
نورتينى منى الجميلة ومبسوطة بتواجدك

المستنصر بالله يقول...

سيدتى الفاضله
انظرى الى بقيه كلامى
ان لم تكن متدينه بالقدر الكافى
لقد استثنيت من كل ماذكرت المراه المتدينه التى تخاف ربها وتعلم حدود الشرع والدين
بمعنى انه اذا غاب الدين ظهر كل فساد وضعفت النفوس

اننى اقول امثله ليس الا واظن ان فى هذا الزمان كثر فيه الفساد ونسمع كثير عن خيانه الزوجه لزوجها او تقتله هى وصديقها وهذا لغياب الدين والاخلاق
لكن التدين يحمى المجتمع من كل هذا الفساد
واعتذر لو كانت كلماتى تسببت فى اى اذى لاى امراه لم اقصدها فعلا

تحياتى لحضرتك

fashkool يقول...

موناليزا .. تحياتى

دينا حامد يقول...

انا بتفق مع كل حرف قولتيه
لو كل واحد فكر قبل الانجاب هيربي الطفل ده ازاي وهل هيعيشه في بيئة مناسبه ولا لا
حاجات كتير هتتغير لان للاسف الاغلبيه دلوقتي بيخلفوا اولاد ويبقى مصيرهم مجهول
ومستقبلهم تايه ده لو لسه عندهم مستقبل

تحياتي

TeVa يقول...

بس أبقى مسئول !!
ربنا يعين

شكرا على النصايح الغالية :)

موناليزا يقول...

المستنصر بالله
ـــــــــــــــ
اهلا بيك اخى الكريم يسعدنى عودتك
واسمحلى يافندم سأعطى لك مثال حتى أجعلك تستشعر ما شعرت به
تخيل لو أن لك اخت مطلقة أو ابنه أو والدتك هل ستحبها تقرأ هذه الفقرة تحديدا ومافيها من عدم الثقة فى المرأة المطلقة من قبل الرجال ونظرة المجتمع لها وبأن فرصتها فى الزواج شبه مستحيلة..وما إلى ذلك؟
تخيل لو عكسنا الوضع وكنت أنت شخصيا مطلق وقرأت مقالة يقال فيها بأن الرجل المطلق لن يجد من تستأمنه على نفسها...إلى نهاية هذه الفقرة"
ماذا كنت ستشعر وقتها
اخى الكريم ذكرك للتدين جاء فى اخر الفقرة وبكلمتين فقط بعد عدد هائل من الكلمات الجارحة (يعنى ممكن جدا محدش ياخد باله منهم وخاصة أصحاب الجراح)
فالمطلقة جرحها لايحتمل مزيد من هذا الكلام
أما عن الأمثلة التى ذكرتها فهى فعلا تحدث ولا اعترض عليها ولكنى أتعجب فقط من عدم ذكر الوجه الاخر للمظلومين فايضا الرجل يقتل زوجته ويخونها ويغدر بها وممكن يشهر بيها كمان وهى على ذمته عايز حاجة تانية اكتر من كده من أمثلة يفعلها الرجل
التدين بلاشك يمنع الفساد ولكنه الان اصبح ستارة فيؤسفنى ان لدى نماذج ذكورية من اللذين يقال عليهم المتدينين اللذين فعلوا مالم يفعله يهوديا او نصرانيا.
ومع ذلك فلم يكن مقالك يهدف الى وجود التدين على قد ماكان بيهاجم قوانين الاسرة المضادة لمصالح الزوج.رغم ان هذه القوانين فيها أشياء كثيرة ضد مصالح الزوجة ومع ذلك لم تذكرها
عموما لقد بينت وجهة نظرى وارجو أن تكون استوعبت ماشعرت به
واشكرك جدا لاهتمامك ولاعتذارك
دمت طيبا ولمدونتى زائرا

**********************************

فشكول
ـــــ
اهلا بيك يافندم
اشكرك

*********************************

دينا حامد
ـــــــــــ
اختى الحبيبة:صح جدا ياريت نفكر كويس قبل الانجاب فى كل شئ يخص الطفل
رزقنا الله واياكى بالذرية الطيبة وكنا لهم نعم القدوة
نورتينى حبيبتى ودمتى بخير

********************************

تيفا
ـــــــ
اهلا بيك يافندم
ان شاء الله ماتستعجلش كل شئ بآوان:)
ربنا يسعدك ويرزقك بكل الخير
دمت طيبا ولمدونتى زائرا

بنت مصريه يقول...

بوست هايل يا موناليزا والله بس مين اللى يسمع ويدرك
احييكى يا قمر

موناليزا يقول...

بنت مصرية
ـــــــــــــ
اختى الحبيبة:اشكرك جدا لمشاركتك
وان شاء الله نكون من المنفذين حينما نصبح أمهات:)
رزقنى الله واياكى بالزوج الصالح والذرية الطيبة
نورتينى حبيبتى ودمتى بخير

مجداوية يقول...

يا ست الحبابيب ما تكتبيه أنت له رونق ومذاق مختلف فلا بد أن تنشريه وأنت تعلمي أنني من أشد المعجبات بقلمك وفكرك فلا تقارني نفسك بأحد لأنك متميزة وواعية ومدركة لما تقولين وتعرضين وجهة نظرك بطريقتك المميزة وأيضا لا بد لنا جميعا أن ننشر الفهم الصحيح للايمان فلا تكفي تدوينة لي أو لك بل كلنا مطالبون بهذا ومن يدخلون الى مدونتك منهم كثيرون لا يأتون الى مدونتي والعكس صحيح فتوكلي على الله ولا تتراجعي أبدا عن نشر ما تكتبي لآي سبب

ربنا يبارك فيك وينفع بك دائما غاليتي

هذا بالنسبة لتعليقك عندي أما موضوع تدوينتك هذه
فهو هام جدا فالأب دائما هو القدوة وأبي رحمة الله عليه كان قدوتي فى خصال عدة وأهمها عدم السكوت عن الحق وعدم الخوف من التصريح به ,,الأم بالطبع لها دور اساسي ومنها وبها نتعلم الحياة فدورها أهم فى نظري وهى التي تشكل تفكيرنا وتصرفاتنا ونتشرب منها كل عاداتنا وسلوكنا فدور الأب هو المكمل لها وليس العكس وهذا لا يقلل أبدا من أهميته البلغة كما أشرت

في انتظار مساهمتك عندي فى التدوينة الجديدة وأتوق بالفعل لما ستكتبي
ودائما على خير غاليتي

موناليزا يقول...

مجداوية
ــــــــ
اختى الحبيبة:اشكرك جدا لردك على تعليقى ولتحفيزى على نشر ما اكتب ربنا يكرمك يارب وان شاء الله ستكونين اول من اقوم باخباره حين انشر هذا الموضوع:)

اشكرك جدا لمشاركتك ولم انكر دور الام فقد خصصت لها بوست سابقhttp://monaliza110.blogspot.com/2008/10/blog-post_19.html
أما هنا فأوجه كلامى خصيصا للاب بالذات لانه القدوة والمثل الأعلى
فاذا كانت الام مصدر للحنان فالاب هو مصدر الامان
وتعاونهما سينتج فردا صالحا للمجتمع
ربنا يبارك لك فى نسمة ويعينك على تنشأتها تنشأة سليمة
نورتينى حبيبتى ودمتى بخير

رفقة عمر يقول...

ماشاء الله عليكى موناليزا دايما مواضعيك بتعلمنا امور جميله ونتمنى اننا نعمل بيها فعلا
ياريت بجد نكون من الذين يستمعون القول فيتبعون احسنه مش نقرا وخلاص ونقول كلام جميل ولا نتصف به ونحاول نعمل به

جزاك الله خيرا كثيرا وجعل كل كلمه فى ميزان حسناتك اللهم امين

موناليزا يقول...

رفقة عمر
ــــــــــــ
اختى الحبيبة:عودا احمدا:)
ربنا يكرمك واشكرك جدا لمشاركتك
اللهم اجعلنا ممن يستمعون القول فيتبعون احسنه
رزقنى الله واياكى بالذرية الطيبة وكنا لهم نعم المثال الصالح
نورتينى حبيبتى ودمتى بخير

عاشــــــ النقاب ـقــــة"نونو" يقول...

السلام عليكم حبيبتي
وكل عام وانتم بخير
ربنا يرزقنا الطاعة في اولادنا ونعرف نربيهم كما يحب ربنا ورسوله
بارك الله فيكم
الموضوع الماضي ارسلت لك تعليق
اعتقد لم يتم ارساله
ومفاده
احمدي ربنا ان مفيش ما يربطك بهذا وما يجعلك تخري سجدا وشكرا لله على ذلك
تحياتي

موناليزا يقول...

عاشقة النقاب
ـــــــــــــ
وعليكم السلام ورحمة الله وبركاته
اختى الحبيبة: وانتى طيبة ياجميلة وبالصحة والسلامة
ربنا يباركلك فى ولادك يارب وتشوفيهم احسن الناس

وصلنى ياحبيبتى ومنور فى صفحة التعليقات
اشكرك مرة اخرى لمشاركتى فيه وفعلا الحمدلله عدد ماكان وعدد ماسيكون
ادعوكى لزيارة هذا الرابط حتى تتأكدى من حقيقة ما اشعربهhttp://monaliza110.blogspot.com/2008/02/blog-post_25.html
ربنا يكرمك يارب
ومشكووورة جدا لمشاركتك التى تعنى لى الكثير
نورتينى حبيبتى ودمتى بخير

asmaasyam يقول...

كلام جميل ومعقول ولكن ليس المسئولية على الآباء كاملة الكثير يكون الآباء على مستوى عالى من الاحترام والتفاهم وغير ذلك من الصفات القيمة الجميلة والأولاد لا يقدروا ذلك وبالعكس كذلك لا نرمى الحمل على الآباء أو الأبناء وعندك حق طبعا لازم نفكر ونخطط لأسلوب تربية معينة بسي مش يمنع إن الأبناء يتأثر من عوامل خارجية بعيدة كل البعد عن الأباء من المجتمع الذين يعيشون فيه .

موناليزا يقول...

أسما صيام
ــــــــــ
اختى الحبيبة:اهلا بيكى فى زيارتك الاولى
طبعا فى عوامل خارجية مساعدة ولكن اذا كان الاساس من البيت جيدا فلن يتأثر بما يراه ولو حدث سيرجع سريعا لان المبادئ التى تربى عليه ستفعل سحرها عليه
اشكرك جدا لمشاركتك
نورتى مدونتى وارجو دوام التواصل

فرفشة الوان يقول...

موضوع جميل جدا ان الاب اقسوة لي اطفاله

ويرب كل الاباء اقسوهة حسنة لي اولاده

موناليزا يقول...

فرفشة الوان
ــــــــــــ
اختى الحبيبة:اهلا بيكِ فى زيارتك الاولى
اشكرك جدا لرايك
نورتى مدونتى واسعدتينى بتواجدك