الثلاثاء، 2 يونيو 2009

جوجو و زمردة (6)

كانت "زمردة" وشقيقها "جوجو" يلعبان سوياً إلى أن آتت "ريحانة" قريبتهم لتلعب معهم. حينها توقفت "زمردة" عن اللعب. و عبرت عن رغبتها فى عدم تكملة اللعب. وفى الوقت الذى كان "جوجو" يرحب ب"ريحانة" كانت "زمردة" لا تطيق وجودها. وحينما شعرت "ريحانة " بعدم رغبة"زمردة"فى وجودها انصرفت وهى غاضبة. وهنا نظر لها "جوجو" نظرة عتاب مع غضب قائلا:
- أنتِ بتتعاملى مع "ريحانة " كده ليه؟
- إزاى يعنى.
- أنتِ ماشوفتيش نفسك. الكلمة على قد الكلمة. ده أنتِ حتى ما بتضحكيش فى وشها.
- بصراحة بقى أنا ماعدتش عايزة أتعامل معاها إلا فى أضيق الحدود.
- أنتِ ناسية أنها قريبتنا وصعب تقطعى علاقتك بيها.
- أنا مش بقطع علاقتى بيها بس أنا عايزة كل واحد يبقى فى حاله.
- ليه بس هى عملت لك إيه؟.
- كلامها بايخ وأسلوبها مابيعجبنيش وأوقات كتير بحس أنها بتستفزنى. هى ليها تفكيرها وأنا ليا تفكيرى وبعدين أنت شاهد أنا حاولت أقرب منها كتير لقيتها بجد ماتنفعش هى شخصيتها غيرى تماماً.
- بس ده برضه مش معنها إنك تعامليها بجفاء كده.
- يعنى أعاملها إزاى إذا كانت دى أصلاً مشاعرى من ناحيتها.
- بس كده أنتِ هتبقى قليلة الذوق. لازم مش كل اللى جواكِ يبقى باين أوى كده. ماتخليش حد يكرهك.
- يعنى أنافقها؟.
- دنيتنا دى عشان تعيشى فيها مش لازم تتعاملى بنقاء.
- بس أنا مش كده.
- خلاص اتغيرى.
- مش هعرف ومش عاوزة . أنا مبسوطة بنفسى كده.
- أنتِ حرة . أنا نصحتك سواء معها أو مع غيرها ماتخليش حد يكرهك.
- خلاص نصيحتك وصلت. تعالى نكمل لعب بقى
-تمت-
***************
دعوة للمناقشة:
ــــــــــــــــــــــــــ
* هل تؤيد موقف "جوجو" أم "زمردة" ولماذا؟.
* هل تشعر بصدق مشاعر من يتعاملون معك؟.
* أذكر آخر موقف تعرضت فيه لمعاملة شخص بعكس ما كنت تشعر به؟.


هناك 52 تعليقًا:

وردة يقول...

والله مش عارفة احب الناس تتعامل معايا بنقاء
ولو انا زعلانة من حد مش بعرف اكلمه خالص
واللي جوايا بيبان علي وشي بطريقة فظيعة
يعني اول ما ادخل من باب المكتب الصبح زمايلي في الشغل يعرفو اذا كنت مبسوطة زعلانة عندي مشكلة
ونفس الحال في البيت بل بالعكس بقي بيعرفو كل حاجة حتي من غير كلام
ساعات بتكون ديه طبيعة ومش تقدري تغيريه
بصراحة هي حلوة ساعات ووحشة اووي ساعات
لان مش بتعرفي يكون ليكي سر زي باقي البني ادمييين
موضوعك حلو ماشاء الله
بس لو نقر نوصل لحل وسط بين جوجو وزمرة حيكون افضل
يعني زمردة تكون ذووق مع لناس من غير ما تكون بوشيييين
هههههههه
سلام

Heba Sayed يقول...

السلام عليكم ورحمة الله

ازيك ياعسل؟؟ كييف احوالك؟؟

بغيب كتير انا معلش يابنتى

ندخل فى الموضوع بقى

اولا: انا لا اؤيد زمردة فى تعاملها

اه تعامل فى اضيق الحدود لكن مشعرش غيرى بأنى كرهاه

فالحب من صنع الله والكره من صنع الانسان

وريحانة قريبتهم فمش ينفع التعامل كده حتى لا يحدث قطع صلة رحم فيما بعد

ثانيا : بالنسبة لصدق ما نشعر بيه

من الاخرين

فبصراحة الكل قائم على نوايا والنوايا لا يراها الا الله عز وجل

ولكن المؤمن الله سبحانه وتعالى بينورله بصيرته

فبيحس بتعامل الاخرين له وبيعرف يميز ا1ا كان صادق ولا لا

ثالثا: انا فعلا اعترضنى موقف لكن مش من جانبى

خسارة ناس اقاربى واصدقاء

لكن ذلك بتعاملهم فبحاول ابعد شوية واكلمهم تانى

ارضاءا لله وافعل كل شىء حسن كأنك تموت غدا

استعدادا للرحيل من كوكب الى كوكب

او بالاصح من عالم لعالم اخر

وربنا يهدى الجميع

وجزاكم الله خيرا على مقالك ياعسل

مفيد جداااااااا

وحي القلم يقول...

السلام عليكم
أول تعليق ولا مش اول تعليق ما انتم عاملين اشراف والواحد مش عارف

المهم حلو البوست
بس أنا ضد زمردة لسببين
الاول انها بنت والتاني عشان رافضة الاخر
والحمد لله أشعر بصدق من اتعامل معه
وحصل مواقف كتير زي كده

تقبلي مروري

حمـــــــــــــــــــــة يقول...

السلام عليكم ورحمة الله و بركاته
يعني "المواقف" تبدأ مبكرا منذ الصغر
............
الحقيقة مادام وصل الأمر الى هذا الحد فأكيد البنت رأت منها ما يغيضها و لا ينفع التغاضي عنه...أرى موقفها سليما
و لا ينفع معها اللين حتى تتغير
..................
ما نراه من الآخرين من مشاعر ووووو
أولا يجب على المرء أن يكون متفاءلا و ينظر من خلال الجوانب الطيبة في البشر
غير ذلك النتائج عكسية منذ البداية
إذن فلنجعل الأمل قائما
........................
آخر موقف عكس ما توقعت :
أثناء العمل يحتاج المرء لمساعدة من زملائه يعني يتصل بهم عبر الهاتف على عجل
لعدم إضاعة الوقت ......
يأتيك الرد بعد فترة إنتظار إجبارية
بصوت جاف :
آسف فلان أو فلانة غير موجود و لا نعرف أين هو
من بعد تكتشف الحقيقة بتواجده و تعمده
عدم الرد.............
في النهاية تتساءل عن السبب
ماذا فعلت له حتى يكافئني بذلك
لا شيء و لا شيءا
سوى لم تقدم له خدمة (...؟) يتعذر عليك
و نسي انه يعطل مصالح ناس كثيرا أو حياة بشر بين أيديه يمكن إنقاذها و ما إليه
آلمني كثيرا و لم أسكت بل واجهته فتعذر بعديد الأعذار الواهية...لم تقنعني في النهاية...قلت له ربي يهديك
أترك لك حريةالتعليق

Ramy Wasel يقول...

مع زمرده

لان الانسان لا يستطيع ان يتعامل مع كل البشر بأسلوب واحد

وهناك بعض الاشخاص لا نتقبل التعامل معهم
احيانا بسبب واحيانا بدون سبب
ويقال ان التعامل بين الناس كيميا

هناك عناصر ترقض بعضها

هل تشعر بصدق مشاعر من يتعامل معك

من كتر ما تعاملت مع اشكال مختلفه من الناس

تعلمت كيف اكتش صدق مشاعر من امامى

اما المواقف التى تعرضت فيه للتعامل مغ شخص بعكس ما يشعر به

هذا كثير جدا
وتكاد تكون يوميه

لان الناس تكذب فى مشاعرها معظم الوقت
ولو تعاملت معهم بصدق مشاعرهم
لان اجد احد اتعامل معه

من الاخر

تعودت ان اتعامل مع الناس كما هم

طوبه فضه وطوبه دهب يقول...

بصى هى الامور ما ينفعش ننظر لها من منظور النفاق يعنى مش معنى ان اى حد مش عارفه اتعامل معاه اقطع علاقتى بيه او كلامى معاه يبقى نفاق بالعكس ممكن الكلام والتعامل يكون على قد الموقف اللى محطوطه فيه مش عشان نفاق ولا محتاجه حاجه منه لا بس عشان دا دين واخوه فى الدين ودى صله ارحام سواء برضانا او عدمه لازم نؤديها ونهحافظ عليها هذا رئى

القدر و انا يقول...

موناليزا
السلام عليكم اختى الحبيبة
الحقيقة انا من نوع زمردة
انا عارفة انه مش صح ولا سليم فى هذا الزمن .. لكن ماقدرش افضل مع صاحبة مش مرتاحة لها
ولا اتكلم ابدا الا اذا شعرت بالراحة النفسية مع الشخص الاخر
ولهذا يجدنى البعض غير اجتماعية وربما لا اكون دبلوماسية بالدرجة الكافية
ولكنها طبيعتى ولا احب تغييرها
لا اقول الا ما اشعر به ولا اعمل الا ما ارتاح له ولا اصاحب الا ما اثق واحب
أكره النفاق والمنافقين اصحاب المصالح الذين اراهم يتلونون بسرعة رهيبة
اما المواقف فحدث ولا حرج ..
تحياتى لك

د. ياسر عمر عبد الفتاح يقول...

هل تؤيد موقف "جوجو" أم "زمردة" ولماذا؟.

يعني
هيه المفروض تتعامل معاها بحدود
وتبقي العلاقة بسيطة
لكن ده مش داعي أبداً إنها تخسرها نهائياً
محتاجو شوية ذكاء إجتماعي

* هل تشعر بصدق مشاعر من يتعاملون معك؟.

أكيد

* أذكر آخر موقف تعرضت فيه لمعاملة شخص بعكس ماتشعر به؟.

لا مش فاكر


جزاكِ الله خيراً
وحمد الله علي السلامة

كفايـة طيبـة يقول...

يعنى أنافقها؟.
- دنيتنا دى عشان تعيشى فيها مش لازم تتعاملى بنقاء.
- بس أنا مش كده.
---------------------------

مش فاهمة

طيب ماهو ده النقاء اللى عندها
ان اللى جواها ظاهر عليها
هو النقاء انها تنافق ؟؟
اوك ابقي ذوق حتى لو متضايقة منها
بس الموضوع ملوش علاقة بالنقاء
عالعموم موضوع التعامل مع القرايب ده هيفضل طول عمره موضوع معقد

موناليزا يقول...

وردة
ـــــــ
أختى الحبيبة:فيها ايه لو الناس كلها تبقى واضحة ونقية كده!
نورتينى وردتى الجميلة ومشكوورة جدا على مشاركتك


*********************************



هبة السيد
ــــــــــــ
وعليكم السلام ورحمة الله وبركاته
اختى الحبيبة:انا الحمدلله بخير ازيك انتِ ياقمر
المهم انك اخيرا جيتى:)
اولا: هى صعبة شوية وخصوصا لما يكون حد صادق اوى فى تعاملاته بس فكرة حلوة
ثانيا: ربنا ينور بصيرتنا جميعا
ثالثا:ربنا يثبتك على دينه ويهديكِ دايما لطاعته
نورتينى هبة الجميلة وسعيدة بمشاركتك



******************************


مصعب صلاح
ــــــــــ
وعليكم السلام ورحمة الله وبركاته
اهلا بيك استاذ مصعب
مش مهم رقم التعليق يافندم فلكل تعليق مذاق مختلف مهما كان ترتيبه
اشكرك جدا لرايك
بس مش فاهمة ايه دخل انها بنت فى رفضك لتصرفها يعنى لو كان جوجو اللى عمل كده مع ابن خالته مثلا كان بقى عادى؟
اشكرك جدا لمشاركتك ولمرورك



*******************************


هاما
ـــــ
وعليكم السلام ورحمة الله وبركاته
اهلا بيك يافندم
عاجبنى احساسك بالبوست وموقفك الاخير
مشكووور جدا على مشاركتك
دمت طيبا ولمدونتى زائرا



*******************************


رامى واصل
ــــــــــ
اهلا بيك استاذ رامى
جميلة هى نظرتك للامور
اشكرك جدا لمشاركتك
دمت طيبا ولمدونتى زائرا



******************************


طوبة ذهب وطوبة فضة
ـــــــــــــــــــ
اختى الحبيبة:وجهة نظر تحترم
نورتينى حبيبتى واشكرك جدا لمشاركتك


********************************



القدر وانا
ـــــــــــــ
وعليكم السلام ورحمة الله وبركاته
اختى الحبيبة: تلاقيكِ بتتعبى جدا فى حياتك معلش دى الضريبة:)
نورتينى حبيبتى ومشكورة جدا لمشاركتك



*********************************


د. ياسر عبدالفتاح
ــــــــــــــــ
اهلا بيك يادكتور
عاجبنى مصطلح "ذكاء اجتماعى"
ربنا يكرمك والله يسلمك
نورتنى واشكرك جدا لمشاركتك


*****************************


كفاية طيبة
ــــــــــــ
أختى الحبيبة:اهلا اهلا بصاحبة الطلة البهية:)

لأ النقاء أنها تبقى تلقائية وواضحة اوى يعنى زى مابنقول اللى فى قلبها على لسانها وجوجو شايف ان ده ماينفعش
مبسوطة بجد بتواجدك:)
نورتينى حبيبتى واشكرك لمشاركتك

mahasen saber يقول...

بعدين يا مونا فى اسئلتك الكتير دى

طب ينفع اسأل بيرو وهو يجاوب


طبعا بأيد موقف جوجو مع ان زمرده معزوره برضه

والمواقف كتتتتتتتتتتتتتتتير متعدبش يا مونا
هو تعاملنا مع البشر بيخلص

mahasen saber يقول...

انا بحييكى على البوستات دى يا مونا

والله افتقدها جدا يا حبيبتى

ربنا يباركلك وينورلك طريقك

محمد يقول...

زمردة

زمردة

زمردة


مولاي ......... هههههههه


لا فعلا زمردة واضحة صريحة وعليها تقنين حالة ريحانة أم عيون نعسانة


وهي بس اللي تعرف هل لازم تبقي عليها ولا تبقي العلاقة جود مورنينج يا جاري انت في حالاتك وانا في حالاتي

بس اجمالا رأي الحاج جوجوجو مش صائب وان كان سيوضح شيئا فعليه استعارة كلمة ذكاء اجتماعي من الصيدلاني الموهوب د ياسر


خالص تحياتي واصدق امنياتي

ببداية طيبة ونهاية طيبة

مجرد مدونة يقول...

مع الاسف أنا زي الآنسة زمردة بالظبط بالذات لما اتصدم في حد .. لكن ده طبعا مش صح .. ربنا يهديني ..

من المواقف الأخيرة اللي حصلت لي واحد كنت بحب فيه طيبته جدا .. اتصدمت بس مش هقدر أقول الموقف بس عادة المواقف دي سببها معايا غالبا الكبر والعياذ بالله بس مش دايما بردو

بن آدم يقول...

السلام عليكم
بالرغم من انى مقتنع أن عم جوجو اسم غريب على ولد بس ماشى 
الأول نشوف رأى الشخصيات عشان لما نبقى مع حد يبقى الكلام واضح
الست زمردة
شايفة ان ريحانه رخمة وشخصيتها مختلفة عنها عشان كده مش عايزا تبقى صاحبتها وشايفه انه لو صاحبتها وهيه مسترخماها تبقى كده منافقه وشايفه انه مش من السهل انها تغير من نفسها
عم جو
موصفش خالص ريحانه بس شايف أنه على الرغم من الإحساس الداخلى تجاه حد معين الا إنه لازم يعامله كويس والا يبقى قليل الزوق
الست ريحانه
مهيش طرف بس على الماشى هي ممكن تكون فعلا رخمه زى ما زمردة شايفة – أو تكون غلبانه وبنت حلال بس زمردة هى اللى مسترخماها

أنا شايف موقف جو أفضل للأسباب دى
1 – أنا متأكد ان الناس ممكن تتغير والتغير لازم ييجى عن طريق الملازمة والمصاحبة – ولو افترضنا ان كل واحد عمل معايا موقف مش حلو خاصمته – يبقى عمرى ما هصاحب حد – على فكره ليا واحد زميلى بقى كده خلال أقل من خمس سنين خاصم تماما أكتر من 7 أشخاص كل واحد عشان موقف واحد أو اتنين بالكتير بمبدأ أعرف عدوك وعلم عليه.
يبقى أول حاجة زمردة غلطت فيها أنها عايزه تقاطع ريحانه عشان شايفاها رخمه
2 – من أسباب أنها عايزه تقاطعها ان شخصيتها مختلفه – سبحان الله مهوه لازم كل زاحد يبقى ليه شخصيته المستقله ونفضل أصحاب وحبايب – تخيلوا لو إن الناس اللى على الأرض كلها ليها نفس شخصية زمردة هيبقى اييه الوضع ساعتها.
3 – زمرده فرحانه بنفسها زى ما هيه ومش عايزه تتغير – بالطبع مفيش بنى آدم كامل والفرد شوية شوية بيطور نفسه لو هوه عايز يتغير – أما زمردة هتفضل حبسى نفسها فى شخصية الطفلة العنادية
4 – زمردة على حسب كلامها لجو حاولت تغير فى ريحانه شوية وبعد كده زهقت ودى حاجة وحشة جدا – لأن اللى عايز يغير الناس للأفضل لازم يعرف أن الموضوع مش سهل ومش قريب وبياخد سنين وكله بثوابه.
5– مش عارف - بس مفيش حاجة تقول ان ريحانه فعلا رخمه ما ممكن تكون زمردة بس اللى شايفاها كده
6 – موقف جو حلو بس مفهمتش كلته "لازم تتعاملى بنقاء"
لو يقصد سلامة صدر يبقى كلام جميل وموافق عليه لكن لو يقصد اننا نبقى حلوين وطيبين على طول الخط ده اللى مش حلو
أخيرا لازم نتعامل مع الأفراد على حسب الموقف الحالى يعنى ممكن يكون واحد يهودى ظالم وبن ستين فى سبعين – ب فى موقف معين مظلوم – يبقى يتعامل ساعتها انه مظلوم وبردوا يتعامل فى المواقف التانيه انه ظالم

 السؤال التانى - آه الحمد لله كل اللى بتعامل معاهم ولاد حلال خالص – ماعدا واحد كان موظف تحت والدى فى الشغل لما كنت بروح كان بيرحب بيا زيااااااادة عن اللازم جداااااااااااااا لدرجة واضحة حتى أصحاب والدى اللى عارف أنهم بيحبونى جدا مكنوش بيعملوا كده وكنت بدايق جدا منه ومبحبووش

mohra يقول...

انا مع جوجو
يعنى مفيش مبرر ابدا ان انا اجرح الاخرين و اسمى ده نقاء
انا شفت ناس بتقول "انا بحب الصراحه " و تجرح غيرها ...الحقيقه دى مش صراحه , دى وقاحه

salma mohamed يقول...

بصراحه انا مش بايدها,
لان لو كده هنخسر ناس كتيير اوي,
لان مع احتكاكنا بالناس في كل مكان وكل يوم بيكون في ناس مش بنحبها ولا بنرتاحلها,
بس المسلم خلوق واخلاقه تحتم عليه الا يعامل الناس الا بمنتهى الذوق,
ممكن نجعل فيه حدود بس مش لازم نكون جافين,
اما بحس بصدق تعامل الناس فبصراحة غالبا بس احيانا لا,
والموقف لسه النهارده,
قابلت واحده من الاقارب مش بحبها,
والحمد لله تعاملي معاها فوق الممتاز,
لدرجة ان مره من زمان زميلة ليا كانت عارفه اني مش بحب واحده معينه وبعدين قابلناها سوا ولما مشينا وسبناها زميلتي قالت مش ممكن انتي ازاي تقدري تعامليها كده وانتي مش بتحبيها,
وقالت ده نفاق,
بس بصراحة انا بشوف ده حسن خلق,
لكن اللي بحبهم فعلا يقدروا يعرفوا كده بسهولة.

موناليزا يقول...

محاسن صابر
ــــــــــ
اختى الحبيبة:مشكورة جدا على مشاركتك وبجد عايزة اعرف رأى بيرو:)
ايوا كده ارجعى نورينى تانى :)
ماتحرمش منك ياسونا ياجميلة وفى انتظارك دايما


********************************



هذه حياتى
ـــــــــــ
وعليكم السلام ورحمة الله وبركاته
اهلا بيك يافندم
ربنا يكرمك واشكرك جدا لمشاركتك ولتعليقك
دمت طيبا ولمدونتى زائرا




*******************************



مجرد مدونة
ـــــــــــ
اهلا بيك يافندم
فعلا اللى زى زمردة بيعانوا فى حياتهم
اشكرك جدا لمشاركتك
دمت طيبا ولمدونتى زائرا



********************************




بن آدم
ــــــــ
وعليكم السلام ورحمة الله وبركاته
اهلا بيك يافندم
تعرف لما بلاقى بنت ودلعها جوجو ببقى برضه مستغرباه:)
مشكوور جدا على مشاركتك وتحليلك القيم الذى توج الموضوع
دمت طيبا ولمدونتى زائرا




********************************



مهرة
ــــــــ
اختى الحبيبة:رأيك يحترم جدا
اشكرك جدا عليه
نورتينى ياجميلة وسعيدة بتواجدك



***************************



سلمى محمد
ــــــــ
اختى الحبيبة:تفكيرك ورأيك يحترم
نورتينى سلمى الجميلة وتسعدنى زيارتك دائما

ستيتة يقول...

زمردة صح جدا لأنها صادقة مع نفسها ولما تكبر شوية ها تكتسب شوية دبلوماسية وسياسة اجتماعية

وهو صح لأنه مطلبش منها تبقى عكس شخصيتها ولكن طلب الحدود الدنيا لصلة الرحم والذوق

حقيقتا مش بدور في كل الي بتعامل معاهم عن صدق المشاعر او كذبها

قليل جدا من الناس اللي يهموني لدرجة فرحتي بصدق حبهم او التوقف امام مشاعر سلبية منهم وتحليل اسبابها

يا عزيزتي انا بشتغل من عشرين سنه
افتكر لك ايه والا ايه من بلاوي المشاعر اللي شفتها

ربنا يسخر لينا الخلائق في الخير
واللهم من اراد بنا شرا او كيدا فردد كيده في نحره واخرجنا سالمين "ده دعائي من زمان في دنيا الوحوش كترت قوي فيها"

مودتي

بنت أبيها يقول...

متفقة مع دمج الاسلوبين

لكن مع تحسين الاسلوب

بمعنى انها فعلا تكون ذوق بالدرجة المعقولة

لكن مش معاناه انها تحسسها انها بتحبها برضوا

وانما في المعقول

Butterfly يقول...

كفايه أقول ان أنا زمرده :)

akeed يقول...

تحياتى على القصة الهادفة

و الحقيقة ان مجتمعنا اليوم يتصف بإظهار عكس الباطن والابتسامة فى وجه الشخص و القلب يملؤه الحقدة الا من رحم ربى و تلك هى الحقيقة المرة وهى النفاق


اللهم عافنا من النفاق

شمس النهار يقول...

اصلا مابعرفش اتعامل مع حد مش حاسه بصدق مشاعره تجاهي

ومازلتُ أتعلم يقول...

* هل تؤيد موقف "جوجو" أم "زمردة" ولماذا؟.
------------------------
جوجو...المعاملة الحلوة مش نفاق
ديه صدقة..بجد لما تعامل حد حلو وهوه مايستتهلش او مش كويس معاك...
بتخليك تحس إن قلبك أبيض ونقى.




* هل تشعر بصدق مشاعر من يتعاملون معك؟.
----------------------
بيبان.... كله بيبان

ديه فراسة



* أذكر آخر موقف تعرضت فيه لمعاملة شخص بعكس ما كنت تشعر به؟.
---------------------
بصراحة اغلب الناس حوليا حفظتها
وبقيت بتوقع كل حاجة

بس اكيد فيه مواقف كده برده
مش حاضرة فى ذهنى دلوقت

تحياتى موناليزاااااا

Maryama Qandil يقول...

الله...بوست عسول ما شاء الله
المهم...:)
---------------
* هل تؤيد موقف "جوجو" أم "زمردة" ولماذا؟.

-طبعا اؤيد موقف جوجو...:)
اكيد مش لازم نتعامل مع الناس بالصفاء والنقاء الزائد عن حده
وكتير من الاحيان بنبقى مجبرين على التعامل مع اشخاص مش هنحبهم ولازم تكون علاقتنا معاهم مستمرة لمصالح معينة وكلا الطرفين على علم بذلك
عشان مش يبقى نفاق...:)

-بالاضافة الى الحكم على الناس من مواقف كتيرة مش موقف بحد ذاته هو الي هيحدد نوعيات الناس ومحاولة التوصل لنقاط مشتركة بينا عشان نعرف نتعامل بع بعض

-بالنسبة للتغيير...احيانا الواحد بيبقى مسستم نفسه على اسلوب معين في التعامل وده غلط لازم الواحد يكون فليكسبل مع كل حاجة محيطة بيه

-----------------------------

* هل تشعر بصدق مشاعر من يتعاملون معك؟.

المقربون...نعم واكيد
باقي الناس...اعاملهم كاني اعامل ربي
واكيد هثق فيهم لان الواحد بينتقي الي بيتعامل معهم

-----------------------------

* أذكر آخر موقف تعرضت فيه لمعاملة شخص بعكس ما كنت تشعر به؟.

مممممم...:)
احيانا الواحد بيتعامل مع اشخاص ومش بيبقى على راحة تامة بالتعامل معهم لمجرد وجود اختلافات في الحدود والمبادئ
لكن في الاول والاخر هم كويسين واحنا نحسبنا على ذلك كويسين برده
واكيد هنلاقي اتفاق عشان اعرف اتعامل معهم ولكن الى حين اكتشاف هذه الاراضي المشتركة نحاول ان نعاملهم بالمعاملة الحسنة
:)

موناليزا يقول...

ستيتة حسب الله الحمش
ــــــــــــــــــــ
اختى الحبيبة:مشكوورة جدا على مشاركتك وتعليقك
وعاجبنى جدا دعائك
اللهم اجعل كيد اعدائنا فى نحورهم اللهم امين
نورتينى ياجميلة وبحبك جدا



*********************************



بنت أبيها
ــــــــــــ
اختى الحبيبة:متفقة معاكِ فخير الامور الوسط
نورتينى ياجميلة واشكرك جدا على مشاركتك



********************************




بيترفلاى
ــــــــــ
اختى الحبيبة:أسعدتينى بجد بتعليقك:)
نورتينى ياجميلة واشكرك جدا لمشاركتك





********************************




أكيد
ـــــــ
اهلا بيك يافندم
اشكرك جدا لرايك ولمشاركتك
دمت طيبا ولمدونتى زائرا




********************************





شمس النهار
ـــــــــــــ
اختى الحبيبة: ربنا يعينك ويقويكِ لان الموضوع بيبقى صعب جدا
نورتينى شموسة الجميلة واشكرك جدا لمشاركتك




********************************




ومازلت أتعلم
ــــــــــــــــ
اختى الحبيبة:عاجبنى تعليقك جدا واشكرك جدا لمشاركتك
نورتينى حبيبتى وسعيدة بتواجدك



********************************



روما قنديل
ــــــــــــ
اختى الحبيبة:اهلا بيكِ فى زيارتك الاولى
اشكرك جدا لرايك
وماشاء الله عليكِ عاجبنى تعليقك واسلوبك فى التفكير
نورتى مدونتى وسعيدة بتواجدك

maha zein يقول...

ل تؤيد موقف "جوجو" أم "زمردة" ولماذا؟.
* هل تشعر بصدق مشاعر من يتعاملون معك؟.
* أذكر آخر موقف تعرضت فيه لمعاملة شخص بعكس ما كنت تشعر به؟.

بأيد موقف جوجو
اصلي بيني وبينك مينفعش نعامل الناس وحش حتي لو هما بيكرهونا
لازن نتعامل بردو بطيبة
وده مش نافق

دي معاملة بالحسني ومعاملة طيبة

بشعر جدا جدا بصدق مشاعر الناس اللى بتتعامل معايا
وبعرف ان كان حد بيكرهني ولا لا


بخصوص اخر موقف مكنتش منتظرة فيه الرد ده

كان قريب اوي من احدي المدونات
اللى كنت رنيلتهم الفجر عشان يصحوا وانا مش من عادتي اصحيها او ارنلها
لكني قابلتها تاني يوم علي النت
بعدين قالتلي انتي رنيتي ليه خير
قلتلها كنت بحاول اذكرك بصلاة الفجر
انا عارفة ان الوقت ردي اوي وانا كنت محجرة اوي بس قلت نشارك بعض الثواب
قالتلي لا انتي مش محتاجة تعملي كده
قلتلها حاضر
قالتلي ابني كده كده بيصحي بدري وانا بلحق الفجر قبل الشروق

قلتلها حاضر

هي متقصدش اي شر ولا اي حاجة
بس الطريقة كانت اجريسف اوي
او خخلتني اتكسف اوي
خاصة اني مش واخدة عليها

بس يعني
بس ه ي حد كويس بردو بس الاسلوب كسفني بس

MaNoOoSh يقول...

انا بئيد موقف زمردة.. علشان مينفعش ابقى في حد مضايقنى او مزعلنى وانا زعلانة واضحك في وشة.. بس زمردة المفروض تبين للى قدامها وتكلمه مش تسيبه كدة وخلاص.. علشان فعلا محدش يكرهها ويبقى ليها عداوات بدون لزمة.

ذكرى رحيل قلم يقول...

السلام عليكم

بصي يامني ليزا
انا انا رأيي من زمرودة بس انا عمري لوضيف جاني اعامله وحش وديما زوجي يقولي كده الضيف ياخد وجبه علي اكمل وجه بس المعاملات الشخصية هاتبقي محدودة
الحمد لله الناس اللي انا عايشة معهم همزوجي وابني اما الاخرون اذا فعلتي ما ينفعهم ويسعدهم انت كويسة ام العكس فعليكي اللعنة ههههههههههه من الجميع
يكفي مشاعر الزوج والابن الحمد لله
لا الحمد لله انا بحس بالانسان اذا كان فيه توافق بيننا ام لا وبالتالي المعاملة علي قدر الاحساس
تحياتي

الازهرى يقول...

احب دائما ان اعامل الناس باخلاقى انا واسلوبى انا فى الحياة
ومهما كان الاختلاف بيننا فليس هذا مبررا لكى نقاطع بعضنا البعض والا عاش الناس كل فى جزيرة منفصلة


للاسف انا فى امتحانات ولا اذكر موقفا فى الوقت الحالى

تحياتى دوما

ELMASRYA - MRS WRITER يقول...

غاليتي المميزة أمة الله موناليزا الجميلة

كالعادة موضوع رائع وفي الصميم ويبعث على الحيرة

أنا مع جوجو لكن

وآه من لكن

فكرت في كلام زمردة وطبقته عليا لقيت إني مش بقدر أنافق وأتعامل مع حد أنا موقنه من جوايا إنه بيكرهني أو بيحقد عليا أو بيحسدني

راجعت تصرفات الناس من حولي ووصلت للآتي:
ـــــــــ

إذا كان الشخص من أهلي هتكلم معاه بصراحة علشان أعرف حقيقة حكمي من عدمها

وطبعا هتعامل معاه لأن دي صلة رحم

أما إن كان شخص غريب هخضعه للمراقبة في تصرفاته تجاهي ولو زاد الأمر عن الحد المقبول لازم أبعد لكن قبل ما أبعد هتكلم برضه لإبراء ذمتي تجاهه

علشان لو جواه حس بغلطته وحب يغير أسلوبه فالتسامح موجود عندي وبكثرة شديدة

الموقف اللي حصل معايا :
ــــــــــــــــــــــــ
واحد متزوجة من أحد أقاربي وترملت إحتويتها ووقفت بجانبها في ظروف نفسية صعبة

فوجئت بها في جلسه عائلية تهاجمني بشكل كله حقد وكره وحسد دفين

نظرت لها نظرة أعتقد أنها تحدثت بشكل أفصح من الكلام فغيرت جملها بسرعة فائقة ونطقت بالحق

واضح أنها تجيد تغيير جلدها كالحرباء

هذه الشخصية مازالت تحت التجربة ومازلت أعاملها بمودة حتى إشعار آخر فإما الإستمرار لها في حياتي وإما البتر

دمتي سالمة ودام عقلك ومواضيعك المميزة

أحبك في الله

موناليزا يقول...

مها زين
ـــــــــــ
اختى الحبيبة:هو فعلا لازم نعامل الناس بالحسنى بس هل أنتِ ممكن تتحكمى فى ده مع حد مابتحبيهوش؟ ده قصدى
بالنسبة للموقف اللى حصل هى اكيد عذرها معاها
أولا: لان ممكن زوجها يكون بيضايق ان حد بيرن على زوجته فى وقت متأخر كده
ثانيا: يمكن ابنها الصغير قلق على صوت الموبايل
ثالثا: هى بس اكيد كانت عايزة تعرفك ظروفها باسلوب غير مباشر
هذا والله اعلم بس دى كلها احتمالات واردة

بصى يامها نصيحة بجد ماترنيش على حد لصلاة الفجر بالذات غير لما تبقى متفقة معاه وعارفة انه حابب الفكرة وماتنسيش ان اللى عايز يقوم يصلى مش بيحتاج حد يصحيه لان هو هيكون مظبط المنبه بتاعه يعنى الرنات دى مجرد تشجيع مننا لبعض اننا بنصلى فى وقت واحد وبناخد الثواب مع بعض مش اكتر لكن انسى ان فيه حد يكون نايم وهو مش فى دماغه ان يقوم يصلى ومجرد رنة هتصحيه
نورتينى مها الجميلة وسعيدة بمشاركتك




********************************


منوش
ــــــ
اختى الحبيبة:هى مش زعلانة منها هى مابتحبش اسلوبها وطريقتها فى التعامل تقدرى تقولى كده دى طباع فى شخصية ريحانة ماينفعش تتغير
نورتينى منوش الجميلة وسعيدة بمشاركتك



**********************************


ذكرى رحيل قلم
ــــــــــــــ
وعليكم السلام ورحمة الله وبركاته
اختى الحبيبة:ربنا يباركلك فى زوجك وابنك
نورتينى ياجميلة وسعيدة بمشاركتك




********************************



الازهرى
ـــــــــ
اهلا بيك يافندم
ربنا يوفقك وينجحك اللهم امين
نورتنى ومشكوور جدا على مشاركتك


*****************************


المصرية مسز رايتر
ـــــــــــــــــ
اختى الحبيبة: اهلا اهلا بصاحبة الرأى المميز بالنسبة لى
نورتينى ياجميلة واشكرك جدا لمشاركتك

بـِصَمتـِـ أميرة ــــى يقول...

أنا جيييييت

ازيك يا حبيبتى يا ممتعانا انتى
بصى بئه
انا لا أؤيد زمرد نهائى

الواحد مش لزم يتعامل كدة
ممكن نتعامل بنقاء من غير مانرفض الاخر بتصريح مباشر او حتى غير مباشر
يعنى ممكن اخلينى فى حالى نوع من التعبير عن انى زعلانه من زميلى او زميلتى فى الشركة انما ما ابديش كراهية نهائى بل بالعكس
لو اتطلب منى مساعدة بقدمها كمان من باب اخلاقيات انا اتعلمتها وبفصل بينها وبين زعلى من الشخص ده
مش مثاليات على فكرة
بس هى طريقة تربيه واسلوب فكر
(ثقافة الذكاء التى لا تشترط التسامح )


:)
دومتى مبدعه
أميرة
(ملكة بحجابى )

kimo يقول...

احب حبيبك هونأ ما
عسي ان يكون بغيضك يوما ما

وابغض بغيضدك هونا ما عسي
ان يكون حبيبك يوم ما **********
*************

قلم رائع

الفقيرة إلى الله أم البنات يقول...

أنا احترت
لان اوقات فى ناس يجب انك تعمليهم زى زمرده معملت
واوقات لازم تتصرفى معاهم زى ما جوجو بيقول
يعنى الموضوع بيحتاج منا كياسه مش أى حد نتصرف معاه تصرف مرسوم
بس ده بينفع فى السن الكبير فيه بس بتعرفى تحددى تعملى ايه ومع مين

وبخصوص اتعرضت لموقف اظهرت عكس مشاعرى
طبعا لما يكونوا ناس ميهمونيش بس يهموا حد غالى على فبضطر اعاملهم لاجل عيونه ..لكن لو على لتجنبتهم بأدب وابتعدت تمام

أحيانا الظروف تحم علينا تصرفات نرفضها...
ربنا يكرمك يارب

أم أحمد المصرية يقول...

وحشنا جوجو و زمردة :))
انا بصراحة اؤيد جوجو فالبشر ليسوا اما اصدقاء احهم او ناس اكرههم فيوجد ينهم درجات كثيرة جدا يمكن تصنيف المعارف فيهم

اما السؤال الثاني فبجد بحس ان ناس كتير بتتعامل من وراء قلبها خصوصا في العمل اللي تكلم زميلة عادي و بعدين تتكلم عنها وحش منوراها اكيد بتعمل معايا انا كمان كده لا يمكن اثق فيها و ناس كتير كده للاسف

 اما السؤال التالت :))))
فأجابته اخر مرة كنت في الشغل فأنا ابتسم في وجه الجميع و يعلم الله اني احاول الا اغتاب احد و لكني كثيرا ما اشعر ان الغيرة المهنية تولد جو من عدم الحب
يعني لو حاسة ان اللي امامي مش بتحبني و غيرانه مني و شاكة انها بتتكلم علي احبها ازاي الحل اني احتفظ بالحد الادني من العلاقة الطيبة و اترك الله يأخذ لي حقي

فتحت موضوع شائك يا موناليزة

Wish I were a Butterfly ... يقول...

اممم... بصراحة أنا مش مع زمردة، بس كمان مش ضدها
أنا للأسف كل حاجة بتبان علي و على صوتي.. :)وحتى في خطي و رسمي لو كنت زعلانة أو فرحانة أو عادية. بيبان بطريقة فظيـــعةنفسي أعرف أغيرها بس مش بقدر
:)
لو مكان زمردة يمكن هيكون باين علي إني مش حابة أوي الشخص دة، بس مش همشي و أسيبه وهوبيتكلم، و لا هكشر لما أشوفه.. بس هحاول أخلي التعامل بسيط لكن من غير ما أخسره
الدنيا صغيـرة أوييي إننا كمان نخسر ناس فيها كان ممكن نكون معاهم عاديين. مش طالبة يعني

مش شايفاها نفاق لما أتعامل عاديمن غير عمق في العلاقة بيننا أد ما هي محاولة لأن العلاقات عمرها ما تتقطع.. خصوصا لو بنتكلم على حد من أهلنا

سيبك بأة من الموضوع..أنا شايفة إن ريحانة "أصلا" مشيت زعلانة ومش اتكلمت..عشان هي مش بتعرف تتكلم :)). مش بتقول غير كلمة "ريحانة ريحانة"لدرجة إني بقيت طول اليوم بنادي بنت أختي "مريانا"عشان هي بتحبها أوي!!! فرحت لما لقيت الشخصيات دي في البوست :). دمت بخير عزيزتي
و آسفة على الإطالة

موناليزا يقول...

ملكة بحجابى
ــــــــــــــ
اختى الحبيبة:اهلا اهلا بأميرة الجميلة
انا الحمدلله بخير وببقى مبسوطة بجد بزيارتك:)
(ثقافة الذكاء التى لا تشترط التسامح )
الله عليكِ
حلوة الجملة دى ومعبرة جدا
دام قلمك مبدع
نورتينى حبيبتى الجميلة واشكرك جدا لمشاركتك



********************************


كيمو
ــــــ
اهلا بيك يافندم
ربنا يكرمك على رايك ومشاركتك
دمت طيبا ولمدونتى زائرا




*********************************



الفقيرة الى الله ام البنات
ـــــــــــــــــــــــــــ
اختى الحبيبة:عاجبنى تعليقك الواقعى
ولاجل الورد زى مابيقولوا:)
نورتينى ياجميلة وسعيدة بمشاركتك




**********************************




أم احمد المصرية
ـــــــــــــــــ
اختى الحبيبة:مبسوطة انك فاكراهم:)
عاجبنى تعليقك جدا فهو بسيط ومباشر
مشكووورة جدا على مشاركتك
نورتينى حبيبتى وسعيدة بتواجدك




******************************



وش اى وير بيترفلاى
ــــــــــــــــــــ
اختى الحبيبة:مش هقدر اطمنك لانى كده برضه بس ده بيبقى طبع اصلا فى الشخصية بس متهيألى ممكن نتدرب:)
انا معاكِ ان الدنيا صغيرة بس لو كانت زمردة طبعها نفس طباعك مثلا وكل حاجة بتبان عليها تعمل ايه بقى:)يعنى بنت اختك اسمها مريانا:)
ياعسل ربنا يخليها ويحميها ويبارك لكم فيها
إطالة ايه بس!!!
انتِ تنورينى دايما وياستى طولى زى مايعجبك:)
نورتينى ياجميلة وسعيدة بمشاركتك

حور الجنة يقول...

مدونه رااااااااائعه ومتميزه زي صحابتها
انا بقى ياسيتي مع زمرده ومش معها
اولا معها انها تكون مش منافقه ومش معها لانها كانت مش بذوق
ممكن تعمل حدود بس بذوق
بس في ناس طبيعتها لنهل مش بتقدر تسيطر على جواها من كتر تلقائيتها لو زعلانه بيبان ولو فرحانه بيبان

وبجد مووووضوع راااائع وقمة في لروعه
واحلى ما في مدونتك انها بتدعو للمناقشه وفكره الاسئله اللي في اخر كل بوست جاااامده

معليش طولت بس بجدمبسوطه اوي اني عرفتك
سلام عليكم

Arsenal Way يقول...

الصراحه والوضوح شيء ضروري
لكن مش معنى كده نكره الناس فينا ونكون عداءات
حسن معاملة الناس والحلم وطيبا لاخلاق ومراعاة مشاعر الناس امور هامه يجب النر اليها وأخذها في الإعتبار
تحياتي

http://eng-mostafa.blogspot.com/2009/06/blog-post_3958.html

موناليزا يقول...

حور الجنة
ــــــــــ
اختى الحبيبة:اهلا بيكِ فى زيارتك الاولى
ربنا يكرمك على رأيك فى المدونة ده بس من ذوقك فما توفيقى الا بالله
اشكرك جدا على مشاركتك
نورتى مدونتى وفى انتظارك دائما




*******************************




مصطفى ابو زيد
ـــــــــــــــ
اهلا بيك ياباشمهندس
اشكرك جدا لمشاركتك ولتعليقك
دمت طيبا ولمدونتى زائرا

rovy يقول...

اختى الغاليه موناليزا
الحقيقه انا مش بأعرف اكون بوشين لو زعلانه من حد لازم بيبان عليا لكن مش معنى كده انى اتعامل مع حد وحش لان المفروض نعامل الناس معامله طيبه ..
لكن فيه ناس بنضطر نقتصر عنهم و بيكون تجنبهم هو الحل الاسلم و ده طبعا مع الاحتفاظ بالمعامله الكريمه بقدر المستطاع ..
سامحينى لأنى مش حاقدر اذكر اى موقف دلوقت انتى اكيد حاسه بيه اليومين دول انا باحاول انسى و ما افتكرش لحد اى حاجه .. بجد مش عاوزه افتكر اى موقف ضايقنى ..
ربنا يكرمك حبيبتى و يجازيكى كل الخير

خالص مودتى و تحياتى

ويكا يقول...

القلوب بين اصبعى الله يقلبها كيفما يشاء ، الا ان الابتسامه صدقه ، وحسن الاستقبال من حسن الخلق.
قد لا نحب الشخص الذى امامنا لكن هذا لا يمنع ابداً من حسن معاملته.

اما بقى هيلعبو مع بعض ولا لاء ؟ ده موضوع هيتحدد بسنهم والحلال والحرام يعنى ،ههههههههههههه.
والاهم من ده زمرده تبقاله ايه ؟!!! لو خطيبته ، يبقى يا ويله .
ولو لسه صغيرين بس راسمه عليه يبقى يا سواد ليله.
وطبعا هيبقى معاها حق.

وااعدوا بالعافيه

غير معرف يقول...

الحبيبة موناليزا
اقولك ايه فى حياتى كلها مواقف كتير
وان لم يكن اغلبها كنت زى زمردة
لكن كل مايمر بنا من تجارب نجد احيانا بعض المواقف تتطلب ان نتعامل زى جوجو
ماقالها يعنى المواقف هى اللى بتحكم
وطبعا السن وخبرة السنين بتضيف
شوية تروى فى المعاملات خصوصا فى هذا الوقت وحتى لانخسر كتير من الاهل والاصحاب
ولكن مااحذر منه ان ينقلب الموقف الى نفاق فهذا هو المنهى عنه
وربنا يسعفنى واتذكر ان كان فيه موقف لرسول الله صلى الله عليه بحاجة مشابهة
وتعامل بدبلوماسية
لو تذكرت الموقف بالضبط ستكون لى عودة للتوضيح
ودمتى بالف خير

MOHAMMED ELBANNA يقول...

موناليزا
كيف الاحوال ؟
اتمنى تكونى بخير .
آسف على تأخري في التعليق على موضوع حضرتك .
ولم أشأ ان اعلق وانا مشغول لأنى احب ان استفيض في الرد على مواضيعك المتميزة .
موضوع هام وفعلاً محير .
ولكنى لااؤيد زمردة ولا جوجو .
فالاثنان بكلامهم جانب من الخطء.
فلا يجوز ان ادعي حب انسان وانافقه .
ولا يجوز ان اصدم انسان واعاملة بالسيئه لأنني لا احبه .
ولكن المسلم كيس فطن .
فهو يوصل لمن امامه انه لا يرحب به ولكن بطريقه لائقه لا ينجرح معها شعوره ويحاول قدر الامكان ان يتجنبه دون احداث شرخ في شخصيته .
ولا ننسى انه كما قال النبي الكريم ان الارواح جنود مجندة ما تعارف منهاأئتلف وما تناكر منها اختلف .
تقبلي تحياتي
محمــد
طريق النجاح

ريمان يقول...

أذكر آخر موقف تعرضت فيه لمعاملة شخص بعكس ما كنت تشعر به؟.



اخر مره كانت يوم الاربع اللى فات ده على طول

salwa يقول...

السلام عليكم اخت موناليزا
انا اقول الله يقدرنا اننا نظهر دائما بوجه ضاحك و لو كنا عكس ما نبدو عليه,فليس الانسان دائما بمزاج هادىء
السلام

موناليزا يقول...

روفى
ــــــــ
اختى الحبيبة:اهلا اهلا بالقمر
وهنا يكمن الصراع الداخلى بين طبيعة الشخصية الواضحة وبين كيفية التعامل الطيب مع اى شخص مهما كان
اللهم صبرنا على طاعتك
حاسة بيكِ ياحبيبتى وخير مافعلتِ محاولة نسيان أى ذكرى مؤلمة
نورتينى روفى الجميلة وسعيدة جدا بمشاركتك




**********************************



ويكا
ــــــــ
اهلا بيك يافندم
صح جدا فالكلمة الطيبة صدقة
:) اطمن يافندم جوجو وزمردة شقيقان يعنى لعبهم وكلامهم مع بعض حلال مهما كان اعمارهم:)
اشكرك جدا لمشاركتك


*******************************


أم مالك
ــــــــ
اختى الحبيبة:اشكرك جدا لمشاركتك وفى انتظار موقف نبوى مشابه حتى تعم الفائدة على الجميع
نورتينى حبيبتى وسعيدة بتواجدك



*******************************


محمد البنا
ــــــــــ
اهلا بيك استاذ محمد
انا الحمدلله بخير اشكرك جدا لسؤالك
يافندم سيادتك تنورنى فى اى وقت
اشكرك جدا لرايك ولمشاركتك ولذلك تظل معادلة التعامل مع الافراد بعضهم البعض من اعقد ما يكون
دمت طيبا ولمدونتى زائرا



********************************


ريمان
ـــــ
اختى الحبيبة: طيب مش كنتِ تعرضى الموقف:)
وبعدين فين اجابة بقية الاسئلة:)
نورتينى ياريمو وفى انتظارك


*******************************


سلوى
ـــــ
وعليكم السلام ورحمة الله وبركاته
اختى الحبيبة:اشكرك جدا لمشاركتك
نورتينى سلوى الجميلة وسعيدة بتواجدك

Wish I were a Butterfly ... يقول...

:$ :$

الحقيقة إن بنت أختي اسمها مريم. بس أنا بقول لها كدة لأنها بتحب ريحانة أوي :). فقلت يبقى اسمها شبهها وخلاص

شكرا لذوقك :)

موناليزا يقول...

وش اى وير بيترفلاى
ـــــــــــــــــ
اختى الحبيبة: ياعسل :) ربنا يخليهالكم يارب ويباركلكم فيها
سعيدة جدا بعودتك وفى انتظارك دائماً

نسيبه يقول...

السلام عليكم ورحمة الله وبركاته
وبعدين معاكي تاني بتحرجيني لأن هذا الموضوع بأعاني منه جدا والناس كمان بتعاني معايا لأني لو ما بأحبش حد مش بعرف أتعامل معاه وبيبان علي جدا وهذه مشكله ولذلك فأنا مثل زمردة ولأن هذا حدث معي فعلا مع أكثر من شخص فأنا أشعر بها وعلي فكرة ليس شرط فيه السن فتجدي أطفال ومنهم من لا يحب شخص معين وفعلا فالأرواح جنود مجندة ما تعارف منها إئتلف وما تنافر منها إختلف في معني حديث الرسول صلي الله عليه وسلم
والصاحب ساحب كما قالوا وحتي لو لم تكن صديقتي ولكنها ستؤثر علي بشكل أو بآخر هذا رأيي

موناليزا يقول...

نسيبة
ــــــــ
وعليكم السلام ورحمة الله وبركاته
اختى الحبيبة:اهلا اهلا بالغالية
يعنى طلعت حالة عامة يعانى منها الكثير:)
فعلا الشخصيات حتى لو مأثرتش بطريقة واضحة يكفى عدم ارتياحك لوجودك معها فى نفس المكان
نورتينى حبيبتى وسعيدة جدا بتواجدك