الخميس، 11 يونيو 2009

أنا بشكر الظروف

الله يكون فى عونك ياللى جواك إحساس.. ياللى بتخاف على الناس.. ياللى بتحس بغيرك لو حتى ماحسش غيرك.. ياللى بتبكى مجروح على كل شئ بيروح.. ياللى دموع قلبك مابتوصلش لعيونك
تقدر تغدر تخون.. يبقى لك ألف لون.. ممكن قلبك يطاوعك.. قلبك على الحب عاش تقدر لكن بلاش إوعى تغير فى طبعك.
(كلمات أغنية لإيهاب توفيق)
حينما سمعت هذه الكلمات منذ سنوات عديدة شعرت أنه يهديها لى والآن أجد نفسى أرددها لا إرادياً لإنى أكتشفت حقيقة مشاعر شخصية قريبة جداً منى.
كانت بالنسبة لى أختى التى لم أرزق بها من والدىَّ. ولكنى لم أكن لها كذلك. كنت بؤثرها على نفسى فى كل شئ. وواضح إنها لم تكن تحبنى أنا بقدر ماكانت تحب حبى لها واهتمامى بها.
لكِ الشكر يا محنتى فقد عرفتينى حقيقة مشاعر جميع من حولى.
* المِحن وقت إختبار الحبيب والشدائد محل إخلاص الأصدقاء.
* لا تصاحب الصديق الذى يتخلى عنك وقت الضيق.
ولا أجد خير من هذه النصيحة الغالية لأختم بها"أحبب حبيبك هوناً ما عسى أن يصبح بغيضك يوماً ما.. وأبغض بغيضك هوناً ما عسى أن يصبح حبيبك يوماً ما".





سؤال جانبى:
* إذا عاد لك صديقك مجدداً كيف ستتعامل معه؟(هل تتقبل وجوده بشكل طبيعى, هل ستعاتبه , هل سترفض وجوده , لديك أجابة أخرى).


هناك 65 تعليقًا:

ذكرى رحيل قلم يقول...

السلام عليكم
حبيبة قلبي اوعي موقف صغير يضبع عشرة سنين اوعند اوشيطان يخدع قلبك
يمكن تكون صحبتك وقت احتياجك لها كانت مشغولة او متضيقة او اي عذر يمكن تيجي وتعتذر
المهم مشعايزكي تتسرعي وتحكمي عليها بسرعة
والله اعلم بالاسباب
ده لو الموضوع بسرعة اما لو كنتي متأكدة من شعورها نحيتك يبقي تجنبيها وكفاية سلام عليكم لا اكتر ولا اقل
وحشتيني

ذكرى رحيل قلم يقول...

بصراحة يا اختي انا قطعت ناس كتير بسبب مواقف تافهة الان لكن وقتها مكنتشي تافهة يعني حسب نضج العقل
بعتبار عتاب اللي يستندل معاية مقاطعته وحرمانه مني
بس تعالي اتفرجي عليا وانا نفسي اعرف فين اراضيهم عشان اسلم بس
يعني السنين كافية كي ننسي
وديه نعمة من نعم الله اننا بننسي

z!zOoOo يقول...

السلام عليكم

ازيك يارب تكوني بخير

وانا كمان بشكر كل ظروف زي كده

عشان بتعرفني الناس علي حقيقتها

ومش بزعل عشان ربنا بيفوقني في الوقت المناسب

ماتزعليش يا موناليزا فيب حاجه بتقول الضربه الي ما تكسرنيش تقويني


انا ليا صديق وحاله مشابهه بس ده انا الي قاطعته وعارف انه في يوم هيرجعلي ويهدور عليا

لكن لو رجعلي هشوطه برضه لأني مش علي مزاجه ساعه يصاحبني وسنه مايفتكرنيش

ولو حاله مختلفه لو لقيت نفسي قادر اسامح

يبقي هسامح :)

أبعد الله عنكي كل الكروب وأنا لي جميع الدروب

وفقكي الله وإيانا لما يحبه ويرضاه

وزي ما إنتي بتشكري الظروف

( هي برضه بتشكر فيكي ) :)

تحياتي

همس الاحباب يقول...

لكِ الشكر يا محنتى فقد عرفتينى حقيقة مشاعر جميع من حولى.
* المِحن وقت إختبار الحبيب والشدائد محل إخلاص الأصدقاء.
* لا تصاحب الصديق الذى يتخلى عنك وقت الضيق.
رائع جدا ما خطت يداكى بجد
اللهم اكفنى شر اصدقائى
اما اعدائى فانا كفيل بهم

رينا يوفقك دائما الى ما يحبه ويرضاه ويرزقك الخل الوفى الصدوق
تحياتى

سلوى يقول...

"أحبب حبيبك هوناً ما عسى أن يصبح بغيضك يوماً ما.. وأبغض بغيضك يوماً ما عسى أن يصبح حبيبك يوماً ما".

إجابه سؤالك صعبه موناليزا

في حاجات ممكن الإنسان يغفرها
وفي حاجات لأ

ماتحمليش نفسك فوق طاقتها
أولا وأخيرا انت بتعاملي ربنا

ربنا يحفظك

موناليزا يقول...

ذكرى رحيل قلم
ــــــــــــــــ
وعليكم السلام ورحمة الله وبركاته
اختى الحبيبة:اهلا اهلا وحشتينى ياجميلة
هو بصى لا موقف صغير ولا موقف كبير هى حاجات كتير مع بعض
مشكلتى انى بعطى للقدامى فرص كتير اوى عشان يوم ما بقرر ابعد مابقاش ندمانة
انا معاكِ ان الزمن بينسى بس بيكون خلاص فيه شرخ جواكِ منهم
نورتينى حبيبتى وسعيدة بتواجدك








*********************************





زيزو
ــــــــ
وعليكم السلام ورحمة الله وبركاته
اهلا بيك يافندم
انا الحمدلله بخير اشكر جداً لسؤالك
انا مش زعلانة على قد ما انا مصدومة
ربنا يكرمك ويتقبل دعائك
:) اسعدتنى بتعليقك واشكرك جدا لمشاركتك






********************************






همس الاحباب
ـــــــــــ
اهلا بيك استاذ خالد
اشكرك جدا لرايك فماتوفيقى الا بالله
ربنا يكرمك ويتقبل دعائك ويرزقك دائما بكل الخير
اشكرك جدا لتعليقك





*******************************



سلوى
ـــــــ
اختى الحبيبة:سعيدة جدا بتواجدك
وسعيدة اكتر لانك حاسة بما أشعر
نورتينى سلوى الجميلة ودمتِ بخير

حواء يقول...

موقف وجربته كتيررررر
واتحرجت كتيررررررر وبرده محرمتش
لكن اخر مره ديه هي القشه اللي قسمت ظهر البعير


ربنا يكون في العون


أما بخصوص سؤالك


إذا عاد لك صديقك مجدداً كيف ستتعامل معه؟

انا من الناس اللي مش بيغفروا بسرعه
ولكن بحتاج وقت ووقت كبير وخصوصا مع صحباتي
لان بيبقي الجرح جي علي غير ماانتي متوقعه
لكن بتبقي العلاقه سطحيه جدا
تحياتي

د. ياسر عمر عبد الفتاح يقول...

جزي الله المصائب كل خير .. عرفتني عدوي من صديقي

كلام حضرتك فعلاً مظبوط جداً

Mona Shereif يقول...

"أحبب حبيبك هوناً ما عسى أن يصبح بغيضك يوماً ما.. وأبغض بغيضك يوماً ما عسى أن يصبح حبيبك يوماً ما".


حلوة اوى يا مونى
تعرفى انى قرأتها من فترة قريبة جدا وفعلا بدأت افكر بشكل مختلف وبحاول وربنا يقدرنى

اما السؤال
لو رجعت هسامح بإذن الله ولو فيه عتاب يبقى بالراحه لان العتاب هدية الاحباب
مهو انا لو مكنتش بحبها مش هعاتبها ولا هيهمنى من اصله وجودها من عدم وجودها

وبرضه اكتشفت حاجه
انى لازم اعذر واقدم حسن النية حتى يثبت العكس

وحشانى اوى يا مونى
ربنا يجزيكى خير على مواضيعك يارب

GiGi world يقول...

يابنتى كل الناس دلوقتى اتوقعى منها الشر
الاصل بقى الشر جيناتنا اتغيرت
والمهم وا تدايقى ولكن تحمدى ربنا كتييييير انها ظهرت على حقيقتك
بالنسبه للسؤال
على حسب قربها منى
وان كات قريبه جدا فانا بهملها تماما خلاص مااعرفش اسامح حد عرفنى اكتر من نفسي لكن ممكن تبقى معرفه على الطاير خااااااااااااااااااااااااااااااالص علشان مايبقاش خصام
العتاب على حسب
اذا كنت لسه فى قلبي ليها شويه خير هعاتبها
اذا كان الموضوع اكبر من كده يبقى مفيش اي داعى بالنسبه ليا لعتابها لانى خلاص انتهت بالنسبه لي
وبعدين اقول ايه كل ده علشان بتحايل عليكى نتصاحب اكتر وانتى مش عايزه
انازعلانه نفسي بجد نبقى اصحاب جامد جدا
ياريت اخد الشرف ده يامونى
بحبك فى الله

Arsenal Way يقول...

بصراحه الموقف محصليش بس لو مكانك هأرفضه
ربنا يعنيك
سلام عليكم

احساس طفلة محبة للرومانسية بس واقعية يقول...

ايوة طبعانشكر الظروف
اكيد فيها خير لينا عشان كدا ربنا عرفهالنا وفى الوقت المناسب

بالنسبة لسؤالك انا مش بقدر اتعامل مع اى صديقة سببت لى الم او حزن او انهار منها شئ كانت تتصنعة

اقدر اسامح ولا ابالى بس مقدرش اتعامل معاها بطبيعتى دائما ما تكون العلاقة سطحية ان كان سيتوجب على لقائها اكتفى بالسلام

ربنا يوفقك
تقبلى مرورى

شموع يقول...

بالفعل المحن والشدائد هى التى تظهر معدن الناس من حولى وفى بعض الأحيان نكتشف أن أناس من حولنا لا يستحقون حبنا لهم وفى أحيان أخرى نجد أناس كانوا بعيدون عنا ووقت الشدة نجدهم حولنا
تقبلى مرورى
وأشكر لكِ دوام التواصل

وحي القلم يقول...

السلام عليكم

كويس جدا انك تكتبي عن أختك


ربنا يديم حبكم لبعض

ومهما ضاقت فأكيد انتم لسه اخوات

تقبلي مروري

مجلة الأم الصغيرة يقول...

على حسب مدى حبي ليه و الحاجة اللي فرقت بينا سواء ينفع تتغفر أو لأ
بس في أغلب الأحوال مش حرجع معاه زي الأول .. ححس إنه حد غريب و حتعامل معاه زي أي حد

المعتصم يقول...

بسم الله الرحمن الرحيم
السلام عليكم ورحمة الله وبركاته
اختى الكريمه موناليزا
تحياتى
مش عارف اقولك ايه
بصراحه الموقف ده من اوحش المواقف اللى الانسان ممكن يتعرضلها
والمشكله فعلا انهم بعد كده بيرجعوا تانى وطمعانين فى رجوع العلاقه زى الاول
وزى مايكون مافيش حاجه حصلت
بس الرجوع ماينفعش
ممكن يحصل مجرد صلح انما العلاقه ترجع زى الاول مستحيل جدا
..........
درس العربى(بقت عاده بقى)النهاردة للدكتور ياسر
كاتب فى تعليقه
جزى الله المصائب كل خير
وده غلط
والتصحيح بتاعها
جزى الله الشدائد كل خير ..عرفت بها عدوى من صديقى
.........
هههههههههههههههه
ربنا يخرجك من صدمتك على خير
واعرفى ان ده اكيد فيه خير ليكِ
تقبلى مرورى وتحياتى
ودمتِ بكل خير وود
والسلام عليكم ورحمة الله وبركاته

Hossam يقول...

صديقتى موناليزا
الموضوع بجد جميل
رايى ان الصديق الذى يتخلى عنك يوم الضيق يجب الابتعاد عنه لس نهائيا ولكن جزئيا بمعنى عدم الاعتماد علية او معاشرتة مثلما حدث فى الماضى.فقط علاقة سطحية.اتمنى ان محنك كلها تكون هينة ويسيرة
تحياتى صديقتى

صمت الحنين يقول...

السلام عليكم ورحمة الله وبركاته

احساس صعب لما اخلص لحد واحبه اكتر من نفسى واكتشف ان مشاعره ناحيتى غير ماانا متوقعه
وفى مواقف كتيييره بتيبن مشاعر الانسان ده
وسؤالك لو الصديقه دى رجعت تانى بالنسبالى هرجع لها عادى وهاعملها بما يرضى الله بس اكيد هحس انه بقى فيه حاجز ولو صغير بينى وبينها بس المعامله هتبقى كويسه

د/عرفه يقول...

لازم الواحد يكتسب الخبرة فى حياته

والدنيا بتعلمنا كتير


والحديث اللى ذكرتيه جميل جدا
واظن انى ذكرته فى مواضيع عندى كتير قبل كده برضه

د/على خميس يقول...

السلام عليم و رحمة الله و بركاته
ا / أمة الله
فعلا صعب جدا أن نكتشف أن أقرب الناس لنا ليس محل ثقة
و فعلا المحن هى مقياس الصداقة...
و لكن لتعاتبى هذا الشخص لعل له عذر؟؟؟
و إن لم يكن ثم عذر فلن أنصحك بأكثر مما نصحتنا به ...ابغض عدوك هونا ما ..
لا تعيده كسابق عهده أخ مقرب و فى المقابل لا تعاديه ...
علاقة اجتماعية سطحية عادية تسديه فيها حقوق الأخوة الإسلامية ..
هذا رأيى و قد أكون مخطئا ...
أسأل الله أن يرزقك الأخوة الصادقة...
بارك الله فيك
تقبلى تحياتى

salma mohamed يقول...

ياااااااه ياموناليزا
حقيقي جيتي على الجرح في توقيت
انا لسه كاتبه بوست في مدونتي التانيه فضفضة عن الموضوع ده
http://karkabty.blogspot.com/2009/06/blog-post_10.html

أخـــ مسلمة ـــت يقول...

بقدر ما تقرب المحن بين الأصدقاء الحقيقين
بقدر ما تبعد أشباه الأصدقاء
لابد منها كل فترة لتمحص كم حولنا
فالحمد لله أولا وأخيرا

ولكن
حتي وان ابتعدتِ عنها
فالعفو العفو ثم العفو
حتي يعفو الله عنكِ وتكوني بهذا ان شاء الله من أهل الجنة

دمتِ بخير
وبصحبة صالحة
:)

بن آدم يقول...

السلام عليكم ورحمة الله

ربنا يقدرلك الخير ويسرلك الحياه ويجمعلك الأصدقاء
أنا معرفش المحنه ومعرفش اييه اللى حصل ومقدرش أقدر طبعا حجم الخطأ اللى صديقتك عملته لكن أكيد كبيير بدرجة توازى إنها متعدش أختك

لكن زى ما "ذكرى رحيل قلم" قالت قيسى حجم الأخطاء ومقدرا حبك ليها .


اللى أكيد واستحاله يتغير انك مش هتلاقى ناس مبتغلطش - كل الناس بتغلط والأصل انهم يتعاتبوا لو فعلا بيحبوا بعض

فيه ناس ممكن فعلا تكون بتحب شخص معين لكن مبتعرفش تتصرف ومبتعرفش تعبر عن حبها , وفيه ناس تانية رهيييبه فى التمثيل والتدليس
انت الوحيده اللى تقدرى تعرفى حبها كان من التمثيل ولا الحقيقى لكن أقدر أقولك ان اللى بيمثل ميقدرش يمثل سنين

بالنسبة للسؤال : ان شاء الله هسامحه علطول ومش هعاتبه عشان ماأخنقهوش - يعنى لما يخاصمنى معتبوش ولما يرجعلى أخنقه - لأنه فى الأصل أخويا فى الله


على الهامش :الأغانى المقترنه بالموسيقى حرام شرعا

حارة سد يقول...

هذا سيعتمد على استحقاقه للقب الصديق
ليس كل من تعرفت عليه وسالعني وسالت عنه فهو صديق بمعناها العميق والواسع الفضفاض

لو ان صديقا حقا كما اريد ويريد..قطعا سأتقبله ثانية وأهلا به وسهلا مرة أخرى..كل شيء قابل للنقاش والتفاهم طالما هو..صديق

الحارة سد

موناليزا يقول...

حواء
ــــــــ
اختى الحبيبة:اشكرك جدا لمشاركتك واسألك الدعاء بأن أحسِن التصرف
نورتينى ام فاطمة وسعيدة بتواجدك

***********************************




د.ياسر عبدالفتاح
ـــــــــــــــــــ
اهلا بيك يادكتور
فعلا فالمحن وقت اختبار للجميع
اشكرك جدا لتعليقك



********************************



سم تايمز
ـــــــــ
اختى الحبيبة:اهلا اهلا بالقمر بعد طول غياب
فعلا لو طبقناها فى حياتنا الدنيا هتختلف
حتى فى البُغض فلا نكسر كل الجسور فقد نحتاج للعبور يوما ما
ربنا يكرمك ياحبيبتى على مشاركتك
نورتينى وسعيدة جدا بتواجدك




********************************



جيجى وورلد
ــــــــــــ
اختى الحبيبة:هو مش شر بالظبط على قد ما هو لامبالاة بمشاعر الآخرين
والحمدلله على كل شئ وانا حقيقى بشكر محنتى

اوعى تقولى كده ياجيجى بقى معقول انا مش هبقى عايزة اتعرف عليكِ اكتر
مين المفروض يزعل بقى ده انا فى انتظار رسالة بأخبارك من يوم مافتحتى المدونة وانتِ لسه ماطمنتينيش
بس عموما انا عذراكِ امتحانات بقى
بس اعملى حسابك لما تاخدى الاجازة مش هلاقيلك عذر:)
أحبك الذى أحببتنى فيه وانا كمان بحبك جداااا
نورتينى جيجى الجميلة واشكرك جدا لمشاركتك






********************************




مصطفى ابو زيد
ــــــــــــــ
اهلا بيك ياباشمهندس
ويارب ماتجربه أبداً
اشكرك جدا لمشاركتك




********************************



احساس طفلة محبة للرومانسية بس واقعية
ــــــــــــــــــــــــــــــــــ
اختى الحبيبة:صح والله الحمدلله
اشكرك جدا لمشاركتك
نورتينى حبيبتى وسعيدة بمرورك





*********************************



شموع
ــــــ
اهلا بيك يافندم
صح جدا فالمحن وقت اختبار للجميع
اشكرك جدا لتعليقك



********************************



مصعب صلاح
ـــــــــ
وعليكم السلام ورحمة الله وبركاته
اهلا بيك استاذ مصعب
الجرح لما بييجى من حد قريب منك بيكون اصعب مما يمكن ان تكتبه مجرد كلمات
بس انا حالياً مقدرش اقول هل هى لسه بالنسبة لى بمثابة الاخت أم خلاص أصبحت شخص عادى حقاً لا أعلم
اشكرك لتعليقك



********************************



قطرات من شواطئ الحياة
ــــــــــــــــــــــ
اختى الحبيبة:ياترى فعلاً هتقدر تعامليه زى أى حد!!
نورتينى حبيبتى واشكرك لمشاركتك




***********************************

موناليزا يقول...

المعتصم
ـــــــــــ
وعليكم السلام ورحمة الله وبركاته
اهلا بيك يافندم
تعرف المشكلة الاكبر ايه! انهم مايبقوش عارفين انهم جرحوك او عارفين وبيستعبطوا وانت بالمقابل مابتبقاش قادر حتى تعاتبهم لانهم من وجهة نظرهم ماعملوش حاجة وهما فعلا ماعملوش حاجة خاااالص وفى نفس الوقت لو اتعاملت معاهم بجفاء ممكن تطلع انت فى الاخر اللى وحش

:) يافندم والله بننتظر تصحيحكم لما نكتب
(مش عارفة انت شفت ردى على تعليقك فى موضوعى السابق ولا ايه؟)
بس ايه الفرق بين المصائب والشدائد هو مش المعنى واحد برضه ولا دى لزوم اننا نقول المقولة مظبوط ولا ايه؟:)

الحمدلله على كل شئ
وربنا يكرمك يارب وايوة كده الله يخليك ادعيلى
اشكرك جدا لتعليقك وسعيدة بتواجدك



*********************************




حسام
ـــــــ
اهلا بيك استاذ حسام بعدطول غياب
(رجاء خاص لا تقول لى صديقتى أفضل "أختى")
اشكرك جدا لرايك ولمشاركتك
ربنا يكرمك على تواجدك ودعائك



**********************************



صمت الحنين
ــــــــــــ
وعليكم السلام ورحمة الله وبركاته
اختى الحبيبة:ربنا مايكتبها على حد
اشكرك جدا لمشاركتك
نورتينى حبيبتى بعد طول غياب وسعيدة بتواجدك




*******************************


د/عرفة
ــــــــ
اهلا بيك يادكتور
فعلا فالحياة خير معلم والمحن خير دليل
اشكرك جدا لتعليقك



********************************


د/ على خميس
ـــــــــــــــ
اهلا بيك يادكتور
للاسف مش قادرة حتى أعاتبها
ربنا يكرمك واشكرك جدا لمشاركتك ولتعليقك




********************************


سلمى محمد
ــــــــــ
اختى الحبيبة:اهلا اهلا بالقمر
سبحان الله:) هروح اشوفه حاضر
نورتينى سلمى الجميلة وسعيدة بتواجدك



*****************************




أخت مسلمة
ــــــــــــ
اختى الحبيبة:ونِعم القول الحمدلله
نسأل الله أن نكون من أهل العفو
أسألك الدعاء
نورتينى حبيبتى وسعيدة بمشاركتك



*******************************


بن ادم
ــــــــ
وعليكم السلام ورحمة الله وبركاته
اهلا بيك يافندم
ربنا يكرمك يارب ويتقبل دعائك
اشكرك جدا على دعائك الجميل ده ربنا يسعدك
هو فيه حاجة توجع اكتر من انك ماتلاقيش أخوك واقف جنبك
هى ماعملتش حاجة فعلا بس اللامبالاة وعدم وقوفها جوارى فى مواقف عديدة وده مخلينى مش عارفة حتى اعاتبها أصلى هقولها ايه فيه حاجات مابتتقالش لو اللى قدامك معملهاش من نفسه يبقى عمره ماكان حاسس بيها وده فى حد ذاته يوجع اكتر
ولذلك الموضوع مافيهوش خصام ولا حاجة بس انا مقفولة منها ومش عارفة ارجع معاها زى الاول ولا عارفة حتى اعاتبها

عاجبنى اجابتك على السؤال

على الهامش: جعلتنى ابتسم حقاً لانى مش واضعة مادة صوتية فى المدونة فظللت أفكر يا ترى تقصد ايه وبعدين تنبهت لكلمات الاغنية اللى كاتباها فى الموضوع:)
بص يا اخى الفاضل الحمدلله انا عارفة ده بس انا قبل مااعرف كنت بسمع اغانى عادى وده خلانى حافظة مجموعة كلمات لا بأس بها
ومع ذلك اشكرك جدا لتذكيرى بهذا
واشكرك ايضا لمشاركتك ولتواجدك



******************************



حارة سد
ـــــــ
اهلا بيك يافندم
فعلا مش صديق على قد ما كانت أخت احنا مع بعض من واحنا صغيرين بحكم صلة الدم بيننا يعنى اخوات واصدقاء كمان ولذلك الجرح اعمق بكثير
وهل ستستطيع ان تنسى بسهولة؟
اشكرك جدا لتعليقك ولمشاركتك

Unknown يقول...

إذا ما كان صديق عزيز
فأعتقد ان قلبى سيظل
يذكر فعلته بى وما فعل
قد انسى لبعض الوقت
ولكن ستظل هناك
(نقطة الم صغيرة)
فى قلبى من ناحيته
تنكأ فرحتى كلما تذكرته!

Sweet Violet يقول...

للأسف احنا فى زمن قل فيه الاصدقاء بسبب عدم فهم كلمه صديق

و بما ان سؤالك ده فعلا موقف اتعرضت ليه .. كان رد فعل العتاب بس الرجوع زى الاول اخد فترة

ماء تشرين يقول...

امه الله

انا عن نفسي ممكن ارجع معاها بس مش زاى زمان عشان انا لما بحس بقسوة بينكسر جوايا الاهتمام والحب وحجات كتير اوى مش ينفع ترجع صحيح بحاول بس الجوايا بيكون صعب اوى

واوعى تزعلى ان كنتى مهتميه بحد ومقدرش لا انت كده بتقدري نفسك
مش الاشخاص المعاكى انت كده ودى طبعتك اوعى تغيريها عشان حد


تقبل مرورى

Maha Shahen يقول...

شوفى اولا متزعليش كتير قوى بنصادف ناس كدا بس مش تزعلى لأنهم هما كدا دا طبيعى ربنا يصبرك
لكن اهم شىء مش تتغيرى انتى عن كدا مهما قابلتى من الناس دى
ولو رجعت تانى وصادفتيها مش هتقدرى تتغيرى لو باقى ليها لسه غلاوه ودا غصب عنك هيفضل الحال علي ما هو عليه بس المعامله هتختلف ودا اكيد وبالتدريج قلبك هيتغير رحمه من ربنا
اما لو رجعت محتاجه ليكى سعديها واعتبريها شخص غريب ما احنا لو قدرنا نساعد الغرب مش هنتأخر بس مش تنتظرى منها مقابل لأنه واضح ان معندهاش شىء تدهوله ولا حتى التقدير

romansy يقول...

انا برضه بحب الاغنيه دى
بس اكيد المعامله مش هتبقى زى زمان هيكون فيه حاجز اكيد مهما كان
بس انا عارف القلوب الطيبه عمرها ما بتعرف تزعل

Butterfly يقول...

والله برده الكلام حساه ليا أوى
مع انى مسمعتش الأغنيه دى
وأنا فعلا بمر بالموقف ده
وبالنسبه للسؤال فأنا هجاوبك بالواقع اللى انا عايشه فيه وبعمله وبصراحه
لما جت الظروف ورجعت اتقابلت مع واحده صاحبتى بعد مابعدنا - وعلى فكره من غير سبب - حاولت أتكلم معاها عادى زى أى واحده معرفتش وقررت انى مكلمهاش ومتعاملش معاها خالص ومبقتش حتى قادره أقعد انا وهيا فى مكان واحد حتى فى المحاضرات والسكاشن
وبالرغم من كل ده ف أنا جوايا نفسى علاقتنا ترجع تانى بس بتصرف عكس كده تماما !!!

ومازلتُ أتعلم يقول...

"أحبب حبيبك هوناً ما عسى أن يصبح بغيضك يوماً ما.. وأبغض بغيضك يوماً ما عسى أن يصبح حبيبك يوماً ما".

مظبوط كلامك
بجد رائعة كل الكلمات اللى فى البوست
جزاكى الله كل خير

حمـــــــــــــــــــــة يقول...

السلام عليكم ورحمة الله و بركاته
الحياة كالعملة لها وجهان
واحد مظلم و آخر أبيض ناصع
كل واحد يستعمل الوجه الذي يراه و ليس بالضرورة الصحيح
هنا الشيطان الله يلعنه يزين و يقنع في كثيرا من الحالات حتى يوقع .......
العباد لا يتساون في المفاهيم الى آخر الدنيا...رغم ذلك الجميع يصر على صحة رؤاه ما عدى قلة نادرة تعترف بالخطأ رغم ما أحدثه من جروحا و احيانا لا يصلح ما إنكسر
هنا من الواجب حسب رأيي دائما التفاءل و النظر بإيجابية ما لم نتأكد
كما يوكل الله في جميع أعمالها و الدعاء خير سبيل للنجاح
والله أعلم

شمس النهار يقول...

البوست ده جه علي وجيعت اغلب الناس
بالنسبه ليه اعتبر ان الثقه هي قوام اي علاقه في الدنيا حتي السوبر ماركت لازم اكون واثقه فيه عشان اتعامل معه

الصديق اللي يخون الصداقه يعني يخون الثقه يبقا خلاص فقد اهم الاركان في العلاقه
مش هعرف اتعامل معه تاني
اي حاجه هتتعمل اوتتقال مش هعرف اصدقها
مش بعرف اتعامل مع حد ماعنديش ثقه فيه

البوست جميل جدا

ربنا يرحمنا من اصحاب القلوب الجامده الخاينه

ميرا ( وومن ) يقول...

موناليزا

انا حاسة بيكي قوي صعب اننا نحب ونوفي ونؤثر حد علينا ووقت الشدة منلاقيهوش

بس فعلاً وقت الأزمة الحقيقة هو اللي بيعرفنا أحبابنا الحقيقين

بالنسبة لسؤالك بالنسبة ليا مش هاقدر ارجعها في حياتي زي الأول في شرخ هايفضل موجود دايماً

اللي مش بيقدرني مش بقدرة

موناليزا يقول...

نوراهاتى
ــــــــــــ
اختى الحبيبة:اشكرك جدا لمشاركتك
نورتينى حبيبتى وسعيدة بتواجدك



*********************************




سويت فيوليت
ـــــــــــــ
اختى الحبيبة: طب وياترى الاخوة برضه محتاجة حد يفهم معناها!
نورتينى حبيبتى واشكرك جدا لمشاركتك




********************************



ماءتشرين
ــــــــــ
اختى الحبيبة:من حقى ازعل لما الاقيها بتتخلى عنى فى اكتر وقت محتاجالها فيه
بس هحاول جاهدة انفذ نصيحتك دعواتك:)
نورتينى حبيبتى واشكرك جدا لمشاركتك




********************************


نور شاهين
ـــــــــــ
اختى الحبيبة:اهلا اهلا بالقمر بعد طول غياب
بحاول جاهدة والله مازعلش بس غصب عنى
عندك حق فى كل كلامك
نورتينى ياجميلة وسعيدة جدا بتعليقك





**********************************


رومانسى
ــــــــــ
اهلا بيك يافندم
عندك حق وعشان كده بيعرفوا يستغلوها كويس
اشكرك جدا لتعليقك





**********************************



بيترفلاى
ـــــــــــ
اختى الحبيبة:اجعلى عزائك فى معاملتك الجافة لها بأنك بشر
نورتينى ياجميلة واشكرك جدا لمشاركتك




********************************




ومازلت أتعلم
ــــــــــــــ
اختى الحبيبة:ربنا يكرمك يارب فماتوفيقى الا بالله
بس النصيحة اللى فى الاخر مش كلامى انا دى مقولة مشهورة ومش عارفة بالظبط هل هى حديث نبوى ولا مقولة لأحد الصحابة
نورتينى حبيبتى وسعيدة بتواجدك




********************************




هاما
ــــــ
وعليكم السلام ورحمة الله وبركاته
اهلا بيك يافندم
نظرة فلسفية ذات معى مميز
اشكرك جدا لتعليقك





*******************************




شمس النهار
ـــــــــــــ
اختى الحبيبة:هى ماوصلتش لخيانة الثقة بس بقى فيه شرخ جواكِ لانك احتاجتى لحد قريب منك ومالقيتيهوش جنبك
نورتينى شموسة الجميلة وسعيدة بتواجدك




********************************




وومن
ــــــــ
اختى الحبيبة: آه وياله من ألم
نورتينى غاليتى واشكرك جدا لمشاركتك

mohra يقول...

ذكرتنى الكلمات فى الصوره برباعيه صلاح جاهين
حاسب من الاحزان و حاسب لها
حاسب على رقابيك من حبلها
راح تنتهى ..اكيد راح تنتهى
مش انتهت احزان من قبلها


اما عن سؤالك فاظن انى ساقبل بالعوده الا ان كان الخطأ مكررا او غير مقبول

لاسع افندى يقول...

لو عاد صديقى سوف اسامحه اكراما للعشره القديمه لكنى سأكون حذرا ولن استطيع ان ارجعه لمكانته الاولى

تحياتى

MaNoOoSh يقول...

فعلا المحن هي اللي بتعرفنا معدن اللي قدامنا وأصلة طيب وللا لأ

ولو عاد لي من كان صديق وقد تخلي عني في محنة بدم بارد.. سأكون معه كالمياة الفاترة.. لا هي باردة فيصبح عدو.. ولا هي حارة فتصبح كرامتي معدومة.

ولا اظن ان العتاب يجدي مع من تخلي عني.. الا ان كان يمر بظروف منعته من وجوده جنبي

rovy يقول...

السلام عليكم
اختى الغاليه موناليزا
البوست ده حسيته قوى و كأنى انا اللى كتبت كل حرف فيه .. بس مع الاسف انا مقدرتش اشكر الظروف زيك انا زعلت من الظروف دى لأنى كنت رافضه اصدقها و اكثر من مره تعود لى تلك الصديقه او تعيدها الظروف و اصدق كل ما تقوله من حجج لانى كنت احبها و اريد ان اصدقها .. العشرة الطويله اللى كانت بينا كانت صعبانه عليا و علشان كده اتصدمت اخيرا و تلك المره اشعر ان الجرح اكبر من اى دواء .. او ان ما قد كسر بيننا لا يمكن ان يصلح او يعود كما كان ابدا ..
علشان كده انا زعلانه من نفسى لانى ما شكرتش الظروف من بدرى و اتعلمت ..
انتى عندك حق جداا حبيبتى .. لازم نشكر الظروف بدرى علشان الجرح ما يبقاش صعب جداا كده ..
تسلمى حبيبتى على كل كلمة كتبتيها و على كل نصيحة قولتيها .. ربنا يبارك فيكى و يكرمك .. و ما يحرمنيش من وجودك الجميل فى حياتى ..
بجد انتى وحشانى و عاوزه اكلمك قريب ان شاء الله ..
خالص مودتى و ارق تحياتى

kmt يقول...

السلم عليكم ورحمة الله وبركاته

قد اتقبل وجوده كوجود اي شيء
فقط شيء
ولكن صديق فهذا محال

فمن يتركني وقت المحن لا يستحق مني شرف ان يكون صديق

تحياتي
الى اللقاء

ريمان يقول...

بالنسبه لى انا هتقبل وجوده


لانى مش بعرف اعمل زى الناس التانين انى اتقبل وجود حد فى حياتى اساء ليا قبل كده وابقى شايله منه فى قلبى واعمل نفسى قدامه انى عادى خالص وانى ناسيه


لا مقدرش حتى امشى جمب واحده انا شايله فى قلبى منها


المهم معلش متزعليش هى دى الحياه وياما بنتعلم منها

بقالك زمان مش زورتينى فى مدونتى


منتظراكى

شيماء زايد يقول...

المسامح كريم

دي حقيقه

اوقات بنضيع عمرنا ولا صداقه مش بتاعتنا ونتعب اوي اننا ادينا مشاعر بدون مقابل

بكن بعد كده بنقابل صديق تاني يدينا كل حاجه
ونقف نتعجب ونسأل ليه
بيتكون الاجابه اللي مش فاهمينها
ان رصيدك من العطاء مش لازم يتردلك من نفس الشخص

ربنا يعوضك كل خير حبيبتي
ادي وحبي ومتنتظريش مقابل
لان ربنا كريم حيديكي من ناحيه تانيه

مجرد مدونة يقول...

بغض النظر عن الاستشهاد بكلمات أغنية !
لو عاد لي صديق أساء لي من زمان أعتقد اني هكون نسيت

Kiara يقول...

الله يكون في عونك ياللي

جواك احساس بتخاف علي الناس

اغنية ايهاب في البوم حبيب القلب سنه 2000 تقريبا

من الاغاني اللي دايما جوايا ودايام حساها

كتير بنقابل ناس بتحب حبنا موش بتحبنا احنا

إذا عاد لك صديقك مجدداً كيف ستتعامل معه؟

سبنا بعض ليه اللي اتكسر بينا ممكن يتصلح ولا لا

بس عامة موش بقبل رجوع حد في حياتي الا وانا قادره علي السماح لاني موش بحب امثل دور موش دوري

اللي جوايا بطلعه مهما كان

kimo يقول...

السلام عليكم ورحمه الله وبركاته
علمنا رسولنا الكريم
ان نعطي لاخواتنا 70 عذر

كام عذر عطيتيه!!!!
وليست الحياه تستحق ان نخسر
انسان قضينا معاه دقيقه في الخير
فأن لم يكنمن الامر بد
(فأتباع بالمعروف)

النسر المهاجر يقول...

اكتشاف الصديق على حقيقتخ تكون مسألة صعبة على ك انسان خاصة لو كان يعده أخ او أخت له ولكن إذا أراد العوده فقد يكون إنصلح حاله وأعتقد أنك تعطيها فرصة تانية وإذا فشلت مرةاخرى فإتركيها

طوبه فضه وطوبه دهب يقول...

برلفو عليكى انك بتشكرى الظروف ولازم فعلا نكون مطمئنين من جوانا ان ربنا بيعمل الخير ديما لينا والحمد لله دائما على كل حال تسلم ايدك

منى يقول...

لما الظروف بتكشف حد كنت فاكره صديق مش ببدا بقطع علاقتى بيه لكن بخليه فى خانه تانيه غير الصداقه زى المعارف مثلا
لكن ده طبعا مش بالساهل ده بجرح عميق لا يلتئم
إوعى تغير فى طبعك.
ان كان فيه اللى خان فلنحمد الله اننا لا نقف فى خانه الخيانه عافانا الله منها ومن اهلها
حاسه بيكى اوى ربنا يكون فى عونك ويعوضك كل الخير يا حبيبتى
تحياتى

بـِصَمتـِـ أميرة ــــى يقول...

اذا رجعتلى صحبتى يا موناليزا
انا شخصيا هاخدها فى حضنى
ياستى عفا الله عما سلف
المهم انها رجعت
ورجع معاها احاسيس ماكانتش هتنفع الا معاها هى ومنها هى
مممممممموه
تقبلى مرورى :)

أميرة
(ملكة بحجابى)

Unknown يقول...

السلام عليكم ورحمة الله وبركاتة
هونى على نفسك حبيبتى
ويا رب تكونى بخير
وتكون كل امورك تمااااااااام
اما بالنسبة لموضوع الاصدقاء
لو هى عشرة عمر وفيها امل وكان التقصير حدث غصب عنها لوجود ظروف لديها فاعاتبها
اما لو مش صحبتى اوى او كنت انجرحت منها اوى فممكن اتركها
ولكن ان قابلتنى فى يوم ما
فسأسلم عليها
بس بردوا هونى على نفسك شوية وطمنينى عليك حبيبتى
دمت فى حفظ الله ورعايتة

مسدس صغير يقول...

اذا عاد لى صديق سأقبله ولكنى سأكون حذرا منه
حقا الصديق وقت الضيق
احييكى على البوست وجزاكم الله خيرا

مجداوية يقول...

السلام عليكم
وأنت نعم الصديقة والأخت الحبيبة التي تسأل عنا اذا غبنا وتودنا وتحرص على مودتنا وتقدم النصيحة الخالصة ونحن نشكر الظروف أن جعلتنا نتعرف عليك
واشكرك بصفة خاصة لسؤالك الكريم عني أحسن الله اليك كما أحسنتِ الي ,, أما بالنسبة لسؤالك ,,فكما أن الجرح الفعلي يحتاج وقتا لكي يشفى ويندمل فالصداقة المجروحة أيضا تحتاج وقتا ليشفى جرحها ويندمل وما يساعد على سرعة الشفاء وتقليل الوقت هو الحرص الشديد على تأكيد المودة والندم على ما حدث بتقديم أحسن المعاملة والاحترام والامتنان
والوقت عليه الباقي ولكن الأمر كله لله فهوالوحيد الذي يؤلف بين قلوبنا فالدعاء إلى الله أن يعيد الود والألفة هو البلسم الشافي بإذن الله

موناليزا يقول...

مهرة
ــــــــ
اختى الحبيبة: جميلة اوى الرباعية دى:) مشكورة ياجميلة للاستشهاد بها
نورتينى حبيبتى واشكرك جدا لمشاركتك



***********************************



لاسع افندى
ـــــــــــ
اهلا بيك يافندم
تقديرى لكرم أخلاقك
اشكرك جدا لمشاركتك




*********************************



منوش
ــــــــ
اختى الحبيبة:صح فالمحن اختبار حقيقى
عاجبانى مشاركتك اوى
نورتينى ياجميلة وتسلميلى يارب





********************************



روفى
ــــــ
وعليكم السلام ورحمة الله وبركاته
اختى الحبيبة:كنت عارفة انه أكيد هيترك أثر جواكِ
حساكِ اوى لان فعلاً اكتر حاجة بتوجع انك ماتصدقيش الحقيقة الواضحة للكل وتفضلى تجيبى فى اعذار لهم وتقولى جواكِ يمكن مايقصدوش وبتبقى الصدمة لما تصدقى الواقع متأخر
تعرفى اننا يمكن نكون زى بعض لانى برضه ماشكرتش الظروف بدرى ده فين وفين:)
بس تعرفى بجد الحمدلله لان الحب فى الله ده من اعمق وانبل المشاعر ويكفى ثوابه ولكن مش الكل يستاهل انه يحصل على المنزلة العالية دى
:) ربنا يعزك يارب ويفرح قلبك ببناتك فماتوفيقى الا بالله
وانتى كمان والله وحشااانى جدا ويارب نتقابل قريب
بحبك فى الله:)



********************************


كمت
ـــــــ
وعليكم السلام ورحمة الله وبركاته
اختى الحبيبة:الله عليكِ
نورتينى حبيبتى وسعيدة بمشاركتك




*********************************


ريمان
ـــــــ
اختى الحبيبة:اهو يعنى مش انا لوحدى:)
ياااه ده انا كنت مفكرة نفسى غريبة عن البشر بجد ربنا يطمنك ياريمو
تصدقينى لو قلتلك انى ماعدتش بزعل انا بس بتعلم

عاوزة اعاتبك لانك مش بتابعى ردى على تعليقاتك عندى لانى مش عارفة اقرا المواضيع عندك كل ما ادخل الاقى الصفحة فارغة بس عزائى انى متبعاكِ من على الريدر
انا هحاول ادخل تانى وربنا يسهل
نورتينى ياجميلة وسعيدة جدا بتواجدك وبتفقدك لى




********************************




شيماء زايد
ـــــــــــــ
اختى الحبيبة:فعلا والله سبحان الله
نورتينى شيماء الجميلة وسعيدة جدا بتواجدك




*******************************


مجرد مدونة
ـــــــــــ
اهلا بيك يافندم
اخى الكريم دى مجرد كلمات معبرة عن حالة يعيشها الكثيرين ولو كنت اعرف مَن كاتبها لكنت ذكرت اسمه لان واضح ان كلمة أغنية فيها شبهة:)
اشكرك جدا لمشاركتك



*********************************


كيارا
ـــــــ
اختى الحبيبة:ده حقيقى
أحييكِ على نقائك
نورتينى ياجميلة واشكرك جدا لمشاركتك



**********************************

موناليزا يقول...

كيمو
ــــــــ
وعليكم السلام ورحمة الله وبركاته
اهلا بيك يافندم
ممكن يكون من ضمن الاعذار انك مش من ضمن اهتماماته وده فعلاً عذر قوى بالنسبة له!!
اشكرك جدا لتعليقك



*********************************



المهاجر
ــــــــــ
اهلا بيك يافندم
لن أقطع حبل الود بينى وبينها ولكنى تألمت حين علمت مقدار حبها الضئيل لى
نورت مدونتى واشكرك جدا لتعليقك


*******************************



طوبة ذهب وطوبة فضة
ـــــــــــــــــــ
اختى الحبيبة:فعلا ياجميلة الف حمد وشكر ليك يارب
نورتينى حبيبتى وسعيدة بتعليقك




**********************************



منى
ـــــــ
اختى الحبيبة:صعبة اوى انك تنزلى حد فى حياتك عن مرتبة أقل بس الحمدلله لعله خير
نورتينى منمونة الجميلة و انا بحبك جدا



******************************




ملكة بحجابى
ـــــــــــ
اختى الحبيبة:اهلا اهلا بالقمر
(جميلة صورة البروفيل على فكرة:))
والله أنتِ عسل:)
بجد بحبك جدا ياصاحبة القلب الابيض
نورتينى اميرة الجميلة ويسعدنى مرورك دائما




********************************


حتى تشرق الشمس
ـــــــــــــــ
وعليكم السلام ورحمة الله وبركاته
اختى الحبيبة:انا الحمدلله بخير وفى فضل ونعمة من الله وزى مابيقولوا ياما دقت على الراس طبول:) اصلها مش اول مرة:)
نورتينى ياجميلة وماتحرمش منك ابدا واشكرك جدا لمشاركتك




**********************************



مسدس صغير
ــــــــــ
اهلا بيك يافندم
احذر من عدوك مرة واحذر من صديقك الف مرة
تعليقك جعلنى اتذكر هذه المقولة
ربنا يكرمك واشكرك جدا لمشاركتك




**********************************




مجداوية
ـــــــ
وعليكم السلام ورحمة الله وبركاته
اختى الحبيبة:اهلا اهلا بالغالية بعد طول غياب
بجد سعيدة جدا بزيارتك ولانك طمنتينى عليكِ وانا اقول النور زاد فى المدونة:)

ايه الاحراج ده بقى:) ده كتير عليا بجد وخصوصا لما اسمعة من شخصية بعتبرها أختى الكبيرة التى احب نصحها لى وتواجددها فى حياتى
ربنا يعزك يارب ويفرح قلبك
والله العظيم ماتعرفيش تعليقك ده خلانى اشكر ربنا ازاى
ياربنا لك الحمد كما ينبغى لجلال وجهك

حبيبة قلبى لا شكر على واجب ده انا حاسة انى مقصرة ده انتِ المفروض تلومينى على تأخيرى فى السؤال

الله عليكِ
لو تعلمى كيف انتظر تعليقك على كل ما اكتب
حقا دامت لى كلماتك نبراسا ينير لى بعضاً مما يغفله بصرى
نورتينى غاليتى واسعدتينى بتواجدك ومشاركتك
أحبك فى الله

غير معرف يقول...

الحبيبة موناليزا
اولا انا احبك فى الله
وكثيرا ماشعر انكى شخص قريبا جدا منى دون ان اراكى
لاننتظر من البشر التعامل بالمثل
يقول الله تعالى وكان الانسان كفورا
اذا كان يكفر بنعم الله عليه ولايشكره عليها فما بال بالعباد بين بعضهم
احتسبى الاجر فيما تعاملتى به ولك الاجر والثواب
واما عن السؤال فعن تجربة ممكن التعامل مع من تخلى وقت الشدة
ولكن لاتعود العلاقة ابدا مثل مكان
لان العلاقة من الطرف الاخر لم تكن لله
بقى حد يتخلى عن حد جميل زيك ياقمر
هى الخسرانة ولاندم
دمتى بخير

قلب ارهقته الاحلام يقول...

عودة الصديق لانملك معها الرفض

ولكن لنضع محاذير وحدود لتلك العودة

ولا نعود ابدا كما كنا :)

دمتي بألف خيررر

تحياتي ,,,

salwa يقول...

السلام عليكم اخت موناليزا
وما اصعبه من موقف ,للاسف جربته
لكن لنطلع من التجربة اقوى
و يا جبل ما يهزك ريح,وان قل عددهم
لكن لا زال يوجد مخلصين......
انا شخصيا اقول من اذى مرة ,قد يؤذي داااااائما
لكي طيب التمنيات
سلاااااااااام

موناليزا يقول...

أم مالك
ــــــــ
اختى الحبيبة:اهلا اهلا بالقمر
ربنا يعزك يارب واحبك الذى أحببتنى فيه
ربنا يديم علينا نعمة الحب فيه اللهم امين
:) كلك ذوق ياجميلة ماتحرمش منك ياحبيبتى
نورتينى واسعدتينى بتعليقك





*********************************





قلب ارهقته الاحلام
ـــــــــــــــــــ
اختى الحبيبة:صعب ان ينزل الصديق لمرتبة أقل
نورتينى حبيبتى واشكرك جدا لمشاركتك






******************************




سلوى
ـــــــ
وعليكم السلام ورحمة الله وبركاته
اختى الحبيبة:فعلا الموقف صعب
ولا يلدغ المؤمن من جحر مرتين
عافانا الله واياكِ من ان نلدغ مرتين من نفس الشخص
وربنا يتور بصيرتنا دايما
نورتينى سلوى الجميلة ودمتِ بخير

MOHAMMED ELBANNA يقول...

موناليزا
ربنا يجازيكي خير على البوست دة
وفعلاً الصداقه الحقيقيه لا تعادل كنوز العالم .
كعادتك متألقه .
تقبلي تحياتي.
محمـد البنا
طريق النجاح

أم أحمد المصرية يقول...

حبيبتي
انا حاسة جدا اللي انت كتبتيه بس الاشخاص درجات يعني ببساطة ممكن بمرور الوقت ترجعي تتعاملي معها لكن مش بنفس التقارب مش لا زم يبقي بديل الاخوة القطيعة
كل شيء بيصغر بمرور الوقت حتي الزعل
اسعد الله قلبك و منحك من حب الناس الكثير فأنت تستحقين .. دمت بألف خير

موناليزا يقول...

محمد البنا
ـــــــــــ
اهلا بيك استاذ محمد
صح جدا فالصديق الحقيقى لا يقدر بثمن
ربنا يكرمك واشكرك جدا لرايك





********************************





أم أحمد المصرية
ــــــــــــــ
اختى الحبيبة:فليتولانا الله برحمته
ربنا يكرمك يا حبيبتى واشكرك جدا لتعليقك

نسيبه يقول...

السلام عليكم ورحمة الله وبركاته
بغض النظر عن أنها كلمات أغنية التي بدأتي بها وأنا أعرف ردك أنك تقصدي المعني ولكني متحفظة عليها
أما عن الصداقه فالمحنه عرفتك معدنها لو كانت تستحق فرصة فأكيد هأسمح لها بالعودة حتي لو كانت غلطه طالما أنها معترفة بغلطتها ولكن طبعا هيكون في وقت حتي نعود مثل السابق وعلي فكرة هذا حدث معي مش بأقول لك ياأمة الله بتحطي إيدك علي الوتر الحساس كنت أقول هذا حدث معي ولكن الحمد لله عدنا لبعض ولكن أكيد ده أخذ وقت جامد جدا مش هأقول لك أد إيه بس المهم الحمد لله رجعنا لبعض
أما النوع الآخر فأكيد ربنا بيحبنا إنه عرفنا معدنها حتي لا يحدث ضرر أكبر
ربنا يرزقنا الصحبة الصالحه التي تعيننا علي طاعة الله

موناليزا يقول...

نسيبة
ـــــــــ
وعليكم السلام ورحمة الله وبركاته
اختى الحبيبة: اهلا اهلا بالغالية
:) مش اتكلمنا فى النقطة دى مع بعض
عموما نقول تانى للى ماكانوش معانا
ياجماعة معرفش اسم الشاعر اللى كتبها وماكانش ينفع اسيبها كده لاحسن تفكروا انها كلماتى وده كان هيبقى ضد امانة النشر

(استريحت على فكرة لما وضحت وجهة نظرى:))

المشكلة بجد انها مش معترفة بغلطها لان من وجهة نظرها هى ماغلطتش فى حاجة وانا طبعا من كتر زعلى منها مش قادرة حتى اعاتبها
يلا اللى فيه الخير ربنا يعمله
نورتينى حبيبتى وسعيدة جدا بتواجدك