الجمعة، 5 فبراير، 2010

مش مهم

* كانت تنتظره يأتى يمستلزمات المنزل الأسبوعى لتقوم بتحضير الغدا والفطار أيضاً - فهو يأتى بكمية محدودة تنفذ قبل نهاية الأسبوع - ولكنه نسى ومع ذلك يطلب منها أن تحضر له الغدا سريعاً
قالت له" مفيش عندنا أى حاجة خالص ولاحتى رغيف عيش.. أقولك فيه سمكة واحدة باقية من امبارح"
- هاتيها بسرعة مستنية إيه.. أكلها ونزل.
مش مهم.. أنا آكل أى حاجة حتى لو هصبر نفسى بشوية ميه المهم هو يأكل كويس عشان يعرف يشتغل.
--------------
*حماتها تشاجرت معها. تارة أمام زوجها وتارة أخرى أمام أهلها بدون سبب يستحق ومع ذلك فى كل مرة تذهب لتصالحها.
مش مهم ..أنا عليا الإستحمال عشان خاطر زوجى.
--------------
* ذهبت مع زوجها إلى محل ملابس (رجالى وحريمى) أختارت له كذا طقم شيك وغالى وأشتراهم بالفعل وهى أختارت لنفسها أرخص بيجامة معروضة.
مش مهم أنا.. المهم هو يبقى شيك أمام الناس وأنا يعنى بخرج بروح فين وبعدين مش عايزة أتقل عليه بمصاريف ملهاش لازمة.
---------------
*تأخر فى عمله فتتصل به لتسـأله عن موعد حضورة فهى جوعى ولا تريد أن تأكل وحدها يخبرها بوصوله فى خلال دقائق وتكرر هذا الأمركثيراً وفى كل مرة" إنتظرينى أنا جاى على طول".
إلى أن آتى أخيراً بعد منتصف الليل ومعدتها الفارغة تطلب إغاثة فورية. حضرت الطعام سريعاً وقبل ما تجلس " مش هتعلقى هدومى الأول؟!".
فقامت ورتبت أغراضة الملقاة على الأرض بلا إكتراث وغسلت الشراب ذو الرائحة النفاذة وحينما همت بالجلوس كان هو أنتهى من تناول طعامه وتركها ليدخل ينام.
مش مهم ..يمكن تعبان.
-----------------
* زوجها يفضل أمه عليها فى كل شئ ويأتى بطلبات الأم رغم وجود الأب على قيد الحياة حتى فى الخروج يخرج معها ويترك زوجته.ولو خرجت معاهم يظل متجهم وقبل الركوب يقول لأمه تركب جواره لأن زوجته ستركب فى الخلف.
مش مهم.. ماهو ابنها برضه.
--------------------
* أجبرها أن تذهب معه وهى مريضة لمكان لا تريده.
مش مهم أنا .. المهم يكون هو راضى ومبسوط.
---------------
*تعامل أهله بكل حب وكأنهم من دمها وبالمقابل هو لا يطيق أهلها.
مش مهم.. أهلى مقدور عليهم.
---------------
* كسر مرايتها دون قصد ويستخدم موبايلها دون إستئذان فيمسح رسايل ويفتح على من يرن لها من صديقاتها وقطع سلسلتها بهزار وسكب العصير على السجاد ويأكل على السرير ويوقع بقايا الطعام على الأرض ويلومها إذا لم تنظف السجاد أول بأول وكأنه طفل صغير المفروض أنها تنظف مكانه أينما ذهب.
مش مهم فداك يا حبيبى.
------------------
*كانت تحلم بفستان زفافها وحين طلبته من العريس " وإيه لازمة المصاريف" لتتفاجأ بحماتها تفرجها على أحدث موبايل نزل السوق اشتراه لها عريسها قبل الفرح بأسبوع.
مش مهم ..ماهى برضه عايزة تفرح.
-----------------------
* يسخر من كل شئ هى تحبه حتى النادى الكروى الفائز إلى مُعدى البرامج الممتازة.لينتهى به الحال إلى مشاهدة فيلم كارتون.
مش مهم.. المهم هو يضحك.
------------------
* تتذكر عيد ميلاده وتجهز له قبلها بأسبوع وحينما يأتى عيد ميلادها يرى الجميع يتصلون بها فتقول بداخلها" كان نفسى أنت تكون اول حد يقولهالى".
فيقول لها" كل سنة وأنتِ طيبة بس أنا معنديش نية أجيبلك هدية".
مش مهم.. أنا مابحبش أحتفل بيه أصلاً.
----------------------
*زوجة ابنها تسخر منها وهى لا ترد.
مش مهم.. المهم ابنى يكون مبسوط.. طبعاً مش هقوله لأنى مش عايزة أعكنن عليه.
----------------------
*يعمل طول اليوم ولا تراه إلا ليلاً عندما يأتى مرهقاً ليكون طلبه الوحيد أن يأكل وينام ولكن بعد الشهر الأول من الزواج الأمر تطور فقد أصبح يأتى ببقية عمله إلى المنزل لتساعده فيه.
مش مهم.. المهم هو ينجح فى شغله حتى لو على حساب راحتى ووقته معايا.
-----------------------
* عاملة له توكيل عام ليتصرف فى أموالها كما يريد ومع ذلك لا يعطى لها أى شئ ويحاسبها على كل ماتصرف
مش مهم.. المهم الأولاد يكونوا مبسوطين.
------------------------
* تشاجرت مع حماتها فى أول الزواج نتيجة خروجها مع زوجها دون أن تأخذ الإذن منها فقرر بداخله أن يحرمها من الخروج إلى الأبد.
مش مهم.. أنا أصلاً مابحبش الخروج.
------------------
*تشعر بإعياء فتتصل بزوجها على إستحياء لتطلب منه أن يحضر شئ للأكل لأنها لا تستطيع تحضير أى شئ وحين يأتى تشعر بالنجدة فهى تريد أن تشرب ولا تستطيع ولكنه لايأتى ليراها وبعد فترة يدخل ينام جوارها دون حتى أن يطمئن عليها وفى الصباح ترى بقايا الطعام الذى أحضره بالأمس.
مش مهم ..يمكن فكرنى نايمة.
---------------------
*إثر مشاجرة تمت بينها وبين زوجها دخلها الغرفة وأغلق عليها الباب من الخارج بالمفتاح وحينما عاتبته تانى يوم " أنتِ بتحلمى ولا إيه أنا معملتش كده".
مش مهم مكن بيمشى وهو نايم.
---------------------
* أيقظها من نومها بطريقة توحى بأن هناك كارثة ليقول لها غاضباً" أنتِ لسه نايمة أهو بتاع الزباله جه ومشى مكنتيش عارفة تطلعيها بره".
مش مهم.. يمكن إيده واجعاه ولاحاجة ومش عارف يشيله.
-----------------
* ترك موبايله فى المنزل وذهب ليحضر شيئاً سريعاً من البقالة المجاورة ولكنه تأخر لمدة ساعات فلم تجد مفر من الذهاب إلى غرفة والديه الذى تقنط فى نفس الشقة لتخبرهما بغياب ابنهما لتتفاجئ به عندهما وحينما رآها نهرها قائلاً:" أنا مش عيل صغير وجاية تدورى عليه".
مش مهم.. هو برضه معاه حق.
---------------------
* بعد مرور فترة من شجار زوجها معها بدون سبب واضح بالنسبة لها أحضرت له كوب عصير وذهبت إليه لتصالحه وتربت على كتفه فأخذه منها بجفاء وأزال يدها من على كتفه بغلظة وكمل بقية الشجار.
مش مهم.. يمكن متضايق من حاجة أسيبه لما يبقى يهدى.
==============
سؤال يفرض نفسه لمن يحمل شعار"أنا مش مهم".. أمال إيه اللى مهم؟؟؟.
لو أنت ماحافظتش على كرامتك متصور مين اللى هيحافظ لك عليها!!.
-إذا أرهقت نفسك بدنياً وجسدياً كيف ستكمل حياتك بعد ذلك.
فإذا وقعت لن يحملك أحد لأنك ببساطة لم تعود أحد على ذلك وإذا فعلوا فسيكون على مضض لأنهم تعودوا أن يأخذوا فقط فأنت لم تعطى لأحد فرصة أن يعطيك.
-الكل هينظر ليك على أن مفيش حاجة بتزعلك من حد و هذا يعطيهم الحق فى إيذائك كما يشائون فأنت صاحب شخصية سلبية لا تعبر عن إستيائها.
-حِب نفسك شوية واعرف إنك إنسان لك كل الحقوق التى تعطيها لغيرك.
-لا تكن شمعة تحترق من أجل الآخرين بل كن مصباح يضئ لك ولللآخرين.
-وأخيراً من السهل أن تضحى ولكن من الصعب أن تجد من يستحق التضحية.

سؤال جانبى:
ـــــــــــــــــــــ
* مين أكتر حد بييجى على نفسه عشانك؟.
* مين أكتر حد بتيجى على نفسك عشانه؟.
=========
على الهامش:
ــــــــــــــــــــــــ
إستمعوا للحلقة الأولى من برنامج (حماتى فى بيتى) على مطلقات راديو.
إضغطوا على الصورة فى البانر الجانبى ودوسوا على زر التشغيلplay وانتظروا شوية للتحميل
وابعتولى رأيكم هنا بدون مجاملة.
وللإشتراك فى جروب البرنامج على الفيس بوك إضغط هنا.

هناك 54 تعليقًا:

ستيته حسب الله الحمش يقول...

لأ
لألألألألألألألألألألألألألألأ
مش مجاوبة على الأسئلة
لما أشرب كركاديه وأنزل ضغطي بعد كل المواقف اللي حكيتيها
واعمل زي اسماعيل ياسين وأقول خلييييييييييك بارد
ساعتها ها أجتهد اسامحك :)
وأحل الأسئلة


لييييييييييييييييييييه

وكمان مقرف وبريحه وشرابه فيه إيسانس

خلاص يا ستيتة
خلاص هي مش ها تعمل فيكي كده تاني
عااااااااااااااااااااااااااا

د. ياسر عمر عبد الفتاح يقول...

كلام مظبوط بجد
الواحد ممكن يتحمل فترة علشان بيحب حد أوي
بعدها هيستحمل علشان ده الواجب
وبعدها بشوية هيستحمل علشان ميعملش مشاكل

بعد شوية مش هيقدر يستحمل خالص ,, لكن وقتها هيكون كل اللي حواليه اتعودوا على كده خلاص
ومبقاش ينفع يحصل تغيير
وكمان مقدار الحب والإحترام الموجود هيقل جدا

القدر و انا يقول...

اختى الحبيبة
دعوة جميلة جدا نعرف منها ايه اللى لينا وايه اللى علينا
كتير بيدوا وبس وتنتهى حياتهم كده
وكتير بياخدوا وبس
ويصبح ما ياخذونه حق مكتسب غير مسموح بالتنازل عنه
انا عن نفسى ليا شقيقة صغرى تستحق فعلا ان اقدم لها ولاولادها حياتى وكلانا يتبارى بالعطاء
وقد جربت هذا مع اخرين وكانت النتيجة اخذ متواصل بلا ادنى مقابل
فتوقفت تماما بعد ضياع سنين من التضحية الغبية
تحياتى اختى الحبيبة

كفايـة طيبـة يقول...

:( :(

عاشقة الفردوس يقول...

تصدقي اتحرق دمي من الست دي

كله مش مهم !!!

ليه ؟


سبحان الله
فين المودة والرحمة ؟؟
سبحان ربي العظيم , كلما زادت في انتقاص قدرها والتنازل عن كرامتها ومبادئها كلما زادت إهانة الناس لها .



* مين أكتر حد بييجى على نفسه عشانك؟

أمـــــي

* مين أكتر حد بتيجى على نفسك عشانه؟

أمــــــــي

موناليزا يقول...

ستيتة حسب الله الحمش
ــــــــــــــــــ
أختى الحبيبة:اهلا اهلا بنبض الحكمة
:) سلامة ضغطك ياقلبى
ههههههههه عسل يا سوتيتة وربنا
مقدرش اوعدك ده انا عندى حكايات تانية كتيييير:)
تسلميلى يارب
نورتينى ياجميلة واسعدنى تواجدك



*********************************


د.ياسر عبد الفتاح
ـــــــــــــــــــ
أهلا بيك يادكتور
تعليق معبر جداً عما أردت قوله
أشكرك جدا لمشاركتك
يسعدنا دوام التواصل



********************************


القدر وانا
ــــــــــــ
أختى الحبيبة:اهلا اهلا بالقمر
ده حقيقى
ربنا يخليكم لبعض ويديم الحب بينكم
وللاسف تبقى التجربة القاسية خير معلم
نورتينى ياجميلة واسعدنى تواجدك



*********************************


كفاية طيبة
_____________
أختى الحبيبة:اهلا اهلا بالقمر
:) عندك حق
مش هقدر الومك
نورتينى ياجميلة ووحشتينى




**********************************


عاشقة الفردوس
ـــــــــــــ
أختى الحبيبة:اهلا اهلا بالغالية
:) ومين سمعك
أشكرك جدا لمشاركتك ولتعليقك
نورتينى ياجميلة واسعدنى تواجدك

مصعب صلاح يقول...

السلام عليكم
احيانا كتير بيجي الانسان عل حقه وبيفرط ف حاجات كتير ودي ليها عواقب وخيمة .
أنا جت عل نفسي ف حق واحد صاحبي ، بس اتردت ليا وهو كمان جه على نفسه عشاني

Single Mummy يقول...

عزيزتى موناليزا:

على فكرة العطاء والتفانى دة داء أعيى من حاول مداواتة أسألى وجاوبى زى ما انتى عايزة بس مش هتفرق صدقينى لانة فعلا داءبلا دواء
مع محبتى الدائمة

TIMMY !! يقول...

أنا بكره الجواز جدا ,
هو فعلا من أفشل العلاقات الحالية في مجتمعنا " المصون " ,
فيها إيه لو الواد عاش في بيت أهله و البنت في أهلها بدل ما يتجوزوا و يتخانقوا و يجيبوا عيال يشحططوهم معاهم في الدنيا ؟؟

سبايدرمان spiderman يقول...

يااااااه
ربنا يوعدني بواحده محترمه كده و طيبه يارب
و الله و الله و الله مش هعمل معاها كده خالص ^_^
بس اقصد ان يارب يوعدني بواحده دماغها كبيره و تكون عاقله ^_^

سبايدرمان spiderman يقول...

مش عارف اشغل الراديو صحيح :(
مش لاقي كلمه play في الصفحه :(

مشخبطاتي يقول...

فعلاً الحياة تكاتف ويجب أن يفكر كل طرف في الآخر..أما صاحبة هذه المواقف فربنا يعينها..وهي من وضعت نفسها في خانة (مش مهم) ..!

تدوينة جميلة..!

أما أكتر واحد بييجي على نفسه علشاني هي الغالية والدتي.. :)

والسؤال التاني أخليه في سري أحسن..!

معلش ماليش في موضوع المطلقات..

بالتوفيق.

موناليزا يقول...

مصعب صلاح
ــــــــــ
وعليكم السلام ورحمة الله وبركاته
أهلا بيك أستاذ مصعب بعد طول غياب
ده حقيقى
طب الحمدلله انه طلع بنى آدم كويس وعنده عرفان بالجميل ربنا يخليكم لبعض
أشكرك جدا لمشاركتك
يسعدنا دوام التواصل



*********************************


سنجل مامى
ـــــــــ
أختى الحبيبة:اهلا بيكِ فى زيارتك الاولى
مع احترامى لرأيك أعتقد أن الموضوع يحتاج توعية وتوجيه بالحقوق والواجبات لكل فرد
واى داء فى الدنيا لازم يكون له دواء:)
نورتِ مدونتى وارجو دوام التواصل



*********************************


تيمى
ـــــــ
أهلا بيك يافندم
:) مش كل الزيجات بتكون فاشلة
الطلاق ده المفروض انه شواذ للقاعدة مش أكتر
يسعدنا دوام التواصل


*********************************


سبايدر مان
ـــــــــــ
أهلا بيك يادكتور
:) ان شاء الله ربنا يرزقك بالزوجة الصالحة بس حافظ عليها
===
اول ما هتدخل الموقع هتلاقى برنامج زى winamp بس على صغير وتحت منه هتلاقى زرار play, stop
بس استنى شوية لان الصفحة بتاخد وقت على ماتحمل
النهاردة هتلاقى3 برامج يعنى لو مالقتش برنامجى اول ما تفتح إسمع البرنامج اللى بيتقال وهتلاقينى جاية وراه:)
فى انتظار رأيك

يسعدنا دوام التواصل




********************************



مشخبطاتى
ـــــــــ
أهلا بيك يافندم
عندك حق فمن يهن يسهل الهوان عليه
:) ربنا يخليهالك
زى ما تحب خليه فى سرك
أشكرك جدا لمشاركتك
:) ولا انا برضه
على فكرة البرنامج عن الحموات والازاعة مش بتخص المطلقات وبس لأ ده المجتمع كله بجميع مشاكله
جرب كده واسمع بنفسك

(المهاجر الى الله) يقول...

السلام عليكم ورحمة الله وبركاته :
اهلا بك اختى الفاضلة موناليز : انا قرات بدايات الموضوع سريعا لسة مكملتوش هاروح اصلى الجمعة ولما اجى اول حاجة هاعملها انى اكمل قراية الموضوع ده وابقى اعلق ان لقيت ان التعليق هايبقى له اهمية .

شمس النهار يقول...

العذاء للأستاذ المعتصم
وان لله وان اليه راجعون


ليه كل اللي في البوست ده

يانهار ابيض

ده مش تسامح ولا حب خالص
ولازواج

دي مش بتحاول تصلح ولاتعمل حاجة دي سلبية
مش طيبة

البوست جاب لي تتنيحة علي الصبح

::))

سلامي

*الطالبة عفو الله *زوزو يقول...

هو الواحد ممكن يتنازل احيانا بس مش لدرجة دي
دي زودتها اوي مسبتها مكان لكرامتها و شخصيتها لالالالالالا
في الحياة الزوجية لازم التنازل بس انا ضد انه يكون ديما من طرح المراة
تتنازل مرة و تجبره انه يتنازل المرة التانية و هكذا

اكثر شخص بيجي على نفسه عشاني هي مامتي ربنا يباركلي فيها

و اكثر حد باجي على نفسي عشانه هي برضو مامتي و احتمال جوزي مستقبلا

تحياتي حبيبتي

حروح اسمعك يا ستي و اجي اعلق

بستناك مساءا في اللقاء

*الطالبة عفو الله *زوزو يقول...

يا خراااااااااااشي ع الصوت الرقيق الجميل

ما شاء الله عليك بجد صوتك تحفة

كلام جميل اوي

و نصائح هايلة

و يا ريت بقى كل الحماوات يسمعوكي و يعملوا بنصايحك


وفعلا لو اتقينا ربنا حنتفادى كل المشاكل لي ممكن تحصل

و لو علمنا يقينا ان كما تدين تدان
حنتعامل كويسة مع مرات الابن عشان عارفة انه بكرة و لا بعده بنتي حيكون ليها حمى و احب انها تعاملها كويس و زي بنتها


ملاحظة : ليه مكنش تعريف ليك قبل ما تبدا في الموضوع او حتى في النهاية ؟

و تحياتي لك حبيبتي

موناليزا يقول...

المهاجر إلى الله
ــــــــــــــــ
وعليكم السلام ورحمة الله وبركاته
أهلا بيك أستاذ طارق
طبعا تعليقكم لدينا له أهمية ولذلك نحن فى انتظاركم


********************************


شمس النهار
ـــــــــــ
أختى الحبيبة:اهلا اهلا بالقمر
فيه ناس كتير فاهمة الطيبة غلط
سلامتك من التتنيحة ياحبيبتى شوية كده وهتروح:)
نورتينى شموسة الجميلة واسعدنى تواجدك


**********************************



الطالبة عفو الله
ـــــــــــــــــ
أختى الحبيبة:اهلا اهلا بالقمر
فعلا هى زودتها خااالص:)
ربنا يخليكم لبعض
أشكرك جدا لمشاركتك وهنزل ماسنجر جديد يمكن يفتح بقى وبإذن الله آجى

====
:) أخجلتم تواضعنا
ربنا يعزك ويسعدك يارب فما توفيقى الا بالله
أشكرك جدا لرأيك
وبالنسبة للملاحظة فهى فى محلها فعلاًً وبإذن الله فى الحلقات الجاية كل حاجة تكون مظبوطة
نورتينى يازوزو ياجميلة وأسعدتينى حقا بتواجد وبتعليقك وبسماعك لبرنامجى
فى انتظارك دائما

hamma يقول...

أولا : إن لله و إن إليه راجعون
تعازينا الحارة للأستاذ
ثانيا :
جمعتي كل ما ينغص حياة الملايين من البشر
و في كلمة بسيطة أقول فاقد الشيء لا يعطيه سواء تعلق بذكر أو أنثى على حد سواء
البعد عن الدين
قلق المعرفة و الإنغلاق حول الذات
كلها أسباب لتردي العلاقة الأسرية و خاصة بين الأزواج
دام إبداعك و يا ليت توفر حد أدنى من الصراحة لدى الكثير حتى يستطيع مراجعة نفسه و إصلاح ما يمكن
أقول يا ليت و ما بالتمني تدرك......
أصبحت مباراة كرة فيها غالب و خاسر لا أكثر

norahaty يقول...

صح يامونى
لو أنتِ ما
عملتيش قيمة
لنفسك ماحدش حيعمل!
أما عن الاسئلة الجانبية
فالاجابة فى السؤالين هى:أختى
نجى على نفسنا كتير لنرضى بعضنا

قلـــ "بــلال" ــب فارس يقول...

ده كله عليها انا حاسس ان هى هتقع من الحمل
لا بس مش للدرجة دى
وان كانت
يلااااااااااااا
الاسئله
او سوال الاول اكتر واحد بيجى على نفسه علشانى
امى الله يخليها لى وبابا كمان بس امى اكتر
----------
السؤال الثانى اكتر واحد انا باجى على نفسى علشانه . مش مهم
بس كتير
كل اصحابى والله بس ياريت يقدروا
وسلامى
----------
وياريت تشاركى فى الصالون الفكرى على مدونتى الالكترونية والتفاصيل ادخلى على مدونتى

أليس في بلاد العجائب يقول...

ايه لازمته الوجع دا اللي بتدوسي عليه :(

اه مش مهم
كان مش مهم
ولسه مش مهم
وهيفضل مش مهم

بس اللي بيوجع دايما
لما تسمعي حد بيأكدلك

اه انتي مش مهم!!
بتوجع دي اوي



اظنك تعرفي اجابتي عن السؤالين :)


****

عالفيس بوك ..دا انا :)

ازيك كده :)

SHAPE YOUR LIFE (ABOALI) يقول...

قد تجعلنا بعض مودتنا وتربيتنا ان ان نتواضع
وان نجعل الحياه تسير وتمضى
ان كنا نفعل ذلك تحت بند طاعة
ف سياءتى يوما شحنات الطاعة ستنضب
وان كنا نفعل ذلك تحت عنوان الاجبار
سياءتى يوم وتنهال على رؤسنا هواجس التخلص من الحياه
وان كنا نفعل ذلك تحت بند اننا الطرف الضعيف
فسياءتى يوم ويفيض الكيل ويكون التصرف انفعالى هدم المعبد على الجميع
وان كنا نفعل ذلك بدافع الحب
فسياءتى يوم ويرى احد الاطراف انه فقط الذى يحب

وان كنا نفعل ذلك مرضاه لله وننتظر ثوابه والتمتع برؤيته
سيهون علينا كل شيىء حتى الكرامة

وعلى الرغم من حلاوة ذلك الفعل مرضاة الله

الا ان الله سمى نفسه العزيز وكانت عزة المسلم والمؤمن عنوان له

الا ان الحياه الزوجية لا تحتاج الى الحياء السلبى
بل تحتاج الى تعاون بمعروف او تسريح باءحسان
والا تركنا العنان والامر لرب الارباب ليكون عنده خير الجزاء


هناك شعاع نور فى شخصية الزوج
هو احترامه لاءمه وحبه لها وعدم قدرته على فصل نوع الحب بين الابن والام والزوج والزوجة

لذا لازال هناك امل ان تملىء الزوجة الفراغ الذى يشعر به هذا الزوج
لاءن المعاملة بالطريقة المذكورة تدل على عدم وعى فى التعامل ومهارة فى احتضان ذلك الزوج
ادم طفل حواء ان عملته كاطفل سيكون لها فارس الاحلام


اشكرك على طرح طرح اطروحات

كلمات من نور يقول...

اهلا اهلا موناليزتي

كده برضه؟؟ داه أنا ضغطي واطي والدكتور عايزني اتشقلب طول اليوم راسي تحت ورجليا فوق ولما باتعصب ضغطي بيوطى أكتر.....طبعا الحالات اللي بتحكي عنها حالات مختلفة والواحد أحيانا بيضحى مرة واتنين بس مش خمسمائة والا كان زماننا ولعنا مش بس من الطرفين لا كان زماننا شمعة احترقت من أجل الآخرين.


نيجى بقى للاسئلة ..
* مين أكتر حد بييجى على نفسه عشانك؟.

*ماما واخواتي دائما وخاصة اختي الاصغر مني مباشرة ...الاتنين بجد مثال للشموع المحترقة من أجل الآخرين..ربي يخليهم ليا...

** مين أكتر حد بتيجى على نفسك عشانه؟
أكيد عائلتي سواء ماما و أخواتي أو زوجي و ابنائي و صديقاتي و أخواتي في الله ...بس الحمد لله باعتدال مش بتطرف ..........

سبايدرمان spiderman يقول...

اخيرا بعد عناء و اغاني ( مش بحب الآغاني ) و انتظار

اشتغل اخيرا

بس سمعت حد بيتكلم عن الطلاق و عن الواحده ازاي تعامل حماتها و ازاي حماتها تعاملها

صح كده ^_^ ؟؟؟

و بعد كده سكت خالص :(

انا شوفتك بتقولي ان فيه حاجات تانيه تم اضافتها :(

الراديو ده محيرني ههههههههه

ليس فقيرا من يحب يقول...

ازيك يا مونى يا حبيبه قلبى

يارب تكونى بخير يا سكر

خضتينى قوى من المواقف دى

بس مقدرش اقول غير يا بخت اللى يقدر

على نفسه وميخليهاش تقدر هيا عليه

حتى لو جه على نفسه شويه

مين اكتر حد بيجى على نفسه عشانى ماما

مين اكتر حد باجى على نفسى عشانه

اى حد ممكن اجى على نفسى علشانه


بحبك فى الله يا موناليزا

أمل حمدي يقول...

لقد تحولت مش مهم إلى سلبية مركبة

ساعات بتبقى سلبية لا ارادية

أو طبع في النفس عاشت وتربت عليه

صاحبة مش مهم قد تنقلب رأسا على عقب

ويقول المثل

اتق شر الحليم اذا غضب

الذي يضحي من أجلي أكيد من يحبونني
والعكس صحيح



خالص العزاء للأستاذ المعتصم

إنا لله وإنا إليه راجعون



تقديري

موضوع موجع قرأته بالأمس ولم أستطع الرد

إبتسامة ملاك يقول...

العذاء للأستاذ المعتصم
وان لله وان اليه راجعون
ربنا يرحم والده ويدخله فسيح جناته

×××××××××××××××××××××××××××××
* مين أكتر حد بييجى على نفسه عشانك؟.

امى حبيبتى واخويا ربنا ما يحرمنيش منهم


** مين أكتر حد بتيجى على نفسك عشانه؟

بصراحه
قلبى هو دا اللى تعبنى جامد

موضوعاتك جميله اووى وهادفه
ربنا يكرمك حبيبتى

حاول تفتكرنى يقول...

الانانية والتضحية

ومئات الدرجات بين قضبيهما

لكي نحيا حياة مقبولة ، يجب ان نتفاعل فى كل عناصرة بوسطية

فكل إفراط أو تفريط خطيئة كبرى

تحياتي

Dr Ibrahim يقول...

على الرغم من كون التضحية مهمة فى حياتنا من أجل تسيير السفينة
ولكن لهذه التضحية حدود ويجب ألا تتخطى الواجبات والحقوق..

موناليزا يقول...

هاما
ــــــ
أهلا بيك يافندم
شكر الله سعيكم
عندك حق جدا
وهذا للأسف ان تتحول الحياة لمجرد مباراة
أشكرك جدا لرايك
يسعدنا دوام التواصل


*******************************


نوراهاتى
ـــــــــ
أختى الحبيبة:اهلا اهلا بالقمر
فعلا ده حقيقى
ربنا يخليكم لبعض ويديم بينكم كل المودة والخير
أشكرك جدا لمشاركتك
نوترينى ياجميلة واسعدنى تواجدك


**********************************


قلب بلال فارس
ــــــــــــــ
أهلا بيك أستاذ بلال
أشكرك جدا لتعليقك ولمشاركتك
ودعوة مقبولة يافندم وسنكون عندكم قريباً
يسعدنا دوام التواصل


*********************************



أليس فى بلاد العجائب
ــــــــــــــــــــ
أختى الحبيبة:اهلا اهلا بالقمر بعد طول غياب
معلش يا قلبى هى بتيجى كده:)
ياخبر معقول حد يقولها كده للشخص اللى قدامه عادى!!!!
ده حتى الكلمة الطيبة صدقة
:) عارفاها ياحبيبتى
--
بالظبط هى سيادتك وهستناكِ تنورى الجروب وتقوليلى أفكار كمان:)
أنا الحمدلله طيبون:)
سلامات:)
نورتينى ياحبيبتى واسعدنى تواجدك


********************************


أبو على
ـــــــــــ
أهلا أهلا بصاحب التعليقات المميزة
الله على جمال تعليقك
تحليل منطقى جدا لاسباب البطلة
مع احترامى لوجهة نظرك كرجل أنا شايفة كامرأة أنها كده جابت آخرها يعنى تعمله إيه تانى أكتر من كده!!!
(راجع تعليقات النساء)
أشكرك جدا لتعليقك الذى يضيف مذاق خاص للموضوع
وأشكرك جدا لرأيك فى طرح أطروحات:)
يسعدنا دوام التواصل


**********************************


كلمات من نور
ــــــــــــــ
أختى الحبيبة:اهلا اهلا بالغالية
:) سلامتك ياحبيبتى.. حقك عليا
ربنا يخليكم لبعض ويرزقكم دايما بكل الخير
أشكرك جدا لمشاركتك
نورتينى غاليتى واسعدنى تواجدك


*********************************

سبايدر مان
ــــــــــــ
أهلا اهلا يادكتور
:) ولا أنا
:) حمدالله على السلامة وهو فعلا اللى بيتكلم عن الحموات .. ها إيه رأيك؟
سكوته ده بيرجع لسرعة النت استنى عليه شوية وهو هيشتغل تانى
أنا؟! إمممم
أنا قلت فيه حاجة هتتم إضافتها؟
طب امتى وفين؟
معلش هو بس لانه لسه فى الأول
وعلى فكرة احنا محتاجين مهندسين صوت ومصممين مواقع فلو تعرف حد او تقدر تشارك معانا يبقى جميل طبعاً
أشكرك جدا لمتابعتك

ومعذرة على عدم قدرتى على ترك تعليق فى مدونتكم بس أنا متابعة جيدة لها
وفى انتظاركم دائما


**********************************


ليس فقيرا من يحب
ـــــــــــــــ
أختى الحبيبة:اهلا اهلا بالقمر
أنا الحمدلله بخير ماتحرمش من سؤالك
فعلا لان جهادالنفس يعد من اصعب انواع الجهاد
ربنا يخليهالك ياحبيبتى ويخليكِ معطائة دايما
بحبك ياقمر:)
أحبك الذى أحببتنى فيه
نورتينى ياجميلة واسعدنى تواجدك


********************************


أمل حمدى
ــــــــــ
أختى الحبيبة:اهلا اهلا بالقمر
أشكرك جدا لرايك ولمشاركتك
===
سعيكم مشكور
نورتينى ياجميلة واسعدنى تواجدك



*********************************


ابتسامة ملاك
ـــــــــــــ
أختى الحبيبة:اهلا اهلا بالقمر
سعيكم مشكور
==
ربنا يعزك واشكرك جدا لرايك ولمشاركتك
نورتينى انوسة الجميلة واسعدنى تواجدك


********************************



حاول تفتكرنى
ـــــــــــــــ
أهلا بيك يافندم
عندك حق
أشكرك جددا لتعليقك
يسعدنا دوام التواصل



*******************************


د. ابراهيم
ــــــــــــ
أهلا بيك يادكتور
متفقة معاك جدا
أشكرك جدا لتعليقك
يسعدنا دوام التواصل

سبايدرمان spiderman يقول...

هيه هيه هيه
عرفت اسمعه اهوووو
ههههههههههههههههه
طب كويس و الله الكلام
و كلام حلو و عاقل
سواء كلامك عن حقوقك او واجباتك
انا اصلا مش عارف هي الحماه بتعامل مراه ابنها ليه كده اصلا ؟
مش فكره انها اخدتها منها خالص
لالالا
اكيد بيبقي فيه سبب تاني
بس ده ميمنعش برضه ان فيه زوجات بتبهدل حمواتها برضه :(

هو لو كل واحد يعامل ربنا في الشخص التاني الحياه هتمشي

بس انا عن نفسي مش هقول لحماتي يا ماما خالص ههههههههههههه

اهو بسمع الكلام و هبعد عن الموضه ده ^_^

موناليزا يقول...

سبايدر مان
ـــــــــــ
أهلااااً يا دكتور
:) أخيراً
الحمدلله
:) كده يبقى سمعته كله
بجد مبسوطة جدا برأيك واكيد فى حلقات جاية هنتكلم عن المعاملة السيئة من الزوجة لحماتها
فى انتظارك دائما

أليس في بلاد العجائب يقول...

ملقتكيش قبلتي الاضافة :(

حصان المرجيحة يقول...

بصي في ناس ممكن ماتقدرش الخير و النعمة اللي في ايدها
بس اكيد في ناس تانية ممكن تقدر ده
ربنا يرزقنا ما فيه الخير لنا و لاهلينا
شكرا ليكي

طهر فؤادك يقول...

السلام عليكم ورحمة الله وبركاتة

"العدل اساس الملك "

الجملة دى بتعنى كتير وبنشفها اكتر فياريت نكون عادلين فى تصرفاتنا فى كل حاجة فى بيتنا مع زوجاتنا وفى الشارع وفى كل مكان فى الدنيااااا وان شاء الله ربنا هيكرمنا بالخير بأذن الله تعالى ..

-اما عن سؤال الاخير ف أمى الى ممكن اضحى عشنها بكل حاجة فى الدنيا

موناليزا يقول...

أليس فى بلاد العجائب
ـــــــــــــــــــ
أنا آسفة بجد مكنتش اعرف أنه أنتِ
أبعتيلى تانى وأنا هضيفك على طول
ماتزعليش ياقلبى اللى مايعرفك يجهلك
هستناكِ



*********************************


حصان المرجيحة
ــــــــــــــ
أهلا بيك يافندم
ده حقيقى
ربنا يكرمك ويتقبل دعائك
أشكرك جدا لتعليقك
يسعدنا دوام التواصل



********************************



طهر فؤادك
ــــــــــ
وعليكم السلام ورحمة الله وبركاته
أهلا بيك يافندم
مين بس اللى بيطبق القاعدة دى! إنهم قلة أخى الكريم

ربنا يخليكم لبعض
أشكرك جدا لمشاركتك
يسعدنا دوام التواصل

أميرة الأحلام يقول...

كلامك جميل جداا
قد ايه ممكن نضحى ونستحمل علشان غيرنا ممكن نكون مفكرين اننا كده هنلاقي منهم التقدير
بس للاسف فيه ناس بتكون اتعودت انها تاخد وما تديش
بجد الموضوع رائع
تحياتى لك

mohra يقول...

كيف هذا يا موناليزا؟؟؟
لماذا يتحمل احد هذا...لا تقولى الحب فالحب ليس علاقه احاديه يعطى احدهم على الدوام و الاخر يأخذ....هذا تملك و انانيه
و الخطأ من الطرفين ...كثير من الحقوق تضيع لان اصحابها فرطوا فيها
ربما لو تصرفت البطله فى البدايه بطريقه اقل سلبيه ربما لما تفاقم الامر الى هذه الدرجه

واحد من البلد دى يقول...

السلام عليكم ورحمة الله وبركاته

وكالعادة أعلق بالشعر..


لما كله مش مهم
يبقى إيه يعنى المهم
مش كفاية كمان سيادته
لأ..جايب بسلامته..أم
الجوازبسبوسة..لكن
محتمل.....جواها سم


يمكن ..بل ومن اللازم أن ينكر الإنسان ذاته مع من يحب
لكن..السؤال هنا...هل يستحق ذلك الحبيب تضحيتنا من أجله..وهل إن كان الموقف معكوسا..ستكون له نفس ردة الفعل تلك.....أشك

دمتى بكل خير

على فكرة..انا بازوركم كلكم وربى يشهد ولكن لا أعلق كثيرا لضيق الوقت جدا جدا جدا جدا...وممكن أعمل مدونة تانية لكلمة جدا لوحدها من قلة الوقت....وده طبعا واضح من وقت التعليق ده...الساعة دلوقتى الثالثة صباحا,,,ويدوب لسه (رقية)نايمة..

أعذرينى وبلغى تحياتى إلى الأخت روفى و الأخت جنة أثابك الله

فى حفظ الله

موناليزا يقول...

أميرة الاحلام
ــــــــــــــ
أختى الحبيبة:اهلا اهلا بالقمر
للاسف ده حقيقى
أشكرك جدا لرايك
نورتينى ياجميلة واسعدنى تواجدك



*********************************



مهرة
ــــــــ
أختى الحبيبة:اهلا اهلا بالقمر
:) أهو اللى حصل
فعلا عندك حق
نورتينى ياجميلة واسعدنى تواجدك



*********************************



واحد من البلد دى
ــــــــــــــــــ
وعليكم السلام ورحمة الله وبركاته
أهلا بيك يافندم
ما اجمل هذه الكلمات الشعرية
عندك حق جدا

يافندم سيادتك تنورنا فى اى وقت
وكان الله فى العون ربنا يخليهالكم ويباركلكم فيها
ومن عينيا تبليغ سلامك
أشكرك جدا لتواجدك
يسعدنا دوام التواصل

ذكري رحيل قلم يقول...

السلام عليكم

مبروك يا جميلة النشاط الالكتروني الجديد ربنا يوفقك ويرزقك الخير ديما
دمتي جميلة

الوفية للأبـــد -- مها أحمد يقول...

يا لهوي دمي اتحرق و الله على الكلام ده
بس علشان الست دي
بس بجد بتحصل اوي ان الستات هم اللي بيتحملوا اكتر بجد و هم اللي بيضحوا اكتر من الرجالة و الله

و على فكرة سؤالك الاخير ده خلاني افكر شوية مع اني عارفة الاجابة و متاكدة منها بس حبيت ااكد لنفسي كمان علشان افرح

شكرا بجد على الكلام الرائع ده يا قمر

مع خالص تحياتي و تقديري

حنان سعيد يقول...

تعرفي ان كلامك ده جيه في وقته
ياااااااااااه فوقتيني
انا مش هقول اني زيها اووووووي كده
بس زيها كتير للاسف
بعد فتره حسيت فعلا انه للاسف
فعلا صعب اووووووي الاحساس ده
لان للاسف ماحدش بيحس انها جت على نفسه اصلا
ولا اي حاجه
وبيبقى ده الطبيعي
لو عملت في مره غير كده لانها ماقدرتش تستحمل
بتبقى هي الغلطانه
تسلمي بجد

sun of free dom يقول...

تدوينة رائعة
بالتوفيق

موناليزا يقول...

ذكرى رحيل قلم
ـــــــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
الله يبارك فيكِ ياحبيبتى
ماتحرمش من ذوقك أبدا
نورتينى واسعدنى تواجدك



*********************************



الوفية للابد مها احمد
ــــــــــــــــــــ
أختى الحبيبة:اهلا اهلا بالقمر
أشكرك جدا لرايك ولتعليقك
نورتينى مها الجميلة وفى انتظارك دائما





********************************



حنان سعيد
ــــــــــ
أختى الحبيبة:اهلا اهلا بالقمر بعد طول غياب
مبسوطة بجد ان كلامى فرق معاكِ
ربنا يسعدك ياحبيبتى ويهيئلك كل الخير
نورتينى حنونة الجميلة واسعدنى تواجدك

موناليزا يقول...

سن اوف فري دوم
ــــــــــــ
أهلا وسهلا فى زيارتك الاولى
أشكرك جدا لرايك
نورت مدونتى وارجو دوام التواصل

salwa يقول...

السلام عليكم
نعم لكل شخصيته و لا يجب تذويبها
باي حال من الاحوال
نتخلى عن حقنا ثم نطالب به؟
دائما ادراجاتك رائعة
نسلم يدك

rovy يقول...

أيه ده ؟؟ ليه كده ؟؟
ليه تتحمل كل ده ؟ و ليه الرجل يكون أنانى و كمان قظ و أسى و لا يعرف الرحمه و .. , ...و .. و كل ده و هى تستحمل ليييييييييييه ؟
ايه فرعنك يا فرعون قال ..
أين الموده و الرحمة التى هى أصل الزواج كما ذكر الرحمن ..!!
سامحينى مش عارفه أقول أيه بجد ممكن يكون فيه أنسان به عيب او أثنين لكن كل عيوب العالم لاااااااااااا ده كثير أوى أوى .. بجد تعبت من البوست ده .

خالص عزائى للاستاذ المعتصم .. و انا لله و انا اليه راجعون ..
تحياتى

موناليزا يقول...

سلوى
ــــــــ
وعليكم السلام ورحمة الله وبركاته
أختى الحبيبة:اهلا اهلا بالقمر
عندك حق جدا
أشكرك جدا لرايك
نورتينى سلوى الجميلة وتسعدينى دائما بزيارتك



*******************************




روفى
ــــــ
أختى الحبيبة:اهلا اهلا بالغالية
:) سلامتك من اى تعب ياحبيبتى
أمال بطلة" مش مهم" تعمل ايه:)
=
سعيكم مشكور

نورتينى غاليتى واسعدنى تواجدك

ست البيت يقول...

مين اكثر حد بيشبه للي حكيتي عليه
أمي
دايما بتيجي على نفسها عشاني
ممكن تعمل اي حاجة عشان ترضيني
دي يا بنتي فنت عمرها كله عليا
ربنا يخليها ليا
دي الأم الوحيدة اللي في العالم اللي بجد
ممكن تجوع نفسها وتشبع لما تلاقينا أكلت
بجد انا عمري ما حقدر اوفيها حقها
وانا اتعلمت بجد أن أنا مهمة صحيح مش قادرة أحب نفسي
بس بطلت اجي على نفسي
لأن في ناس بطلة في تلبيسك ثوب الخطأ
وكنت في كل مرة اشوف نفسي غلطانة واقنع نفسي
لحد ما لقيت الناس بتعتبرني مش مهمة فعلا
فقررت التنازل عن كل الهبل دا
واحترم نفسي
مش عشان اخويا ولا اختي يبقى أفوت على حساب كرامتي ولا عشان زوجي
لأ كل واحد ربنا خلقه ليه حق في الدنيا
ولو عفا يبقى ربنا عفو غفور ووقتها بيبقى عفو البني آدم جميل ودين في رقبة الآخر
تصوري أنا لسه كنت بفكر نفسي بالحدوتة دي
كل حاجة اعملها على حساب نفسي وعشان غيري وغيري ميقدرش
ويمكن كمان ألاقيه بيعمل الحاجات اللي حرمت نفسي منها عشانه
سبحان الله

موناليزا يقول...

ست البيت
ــــــــــــ
أختى الحبيبة:اهلا اهلا بالقمر بعد طول غياب
ربنا يخليهالك
:) كل واحد بيقول على مامته كده يعنى انا برضه بالنسبة لى أمى أحسن أم فى العالم:)

جميل فعلا ان الواحد ياخد موقف حازم مع نفسه وكيفية معاملاتها للاخرين دون انتهاك حقوقه البديهية
أشكرك جدا لمشاركتك
نورتينى حبيبتى وأسعدنى تواجدك

نسيبه يقول...

السلام عليكم ورحمة الله وبركاته
أعرف من حكيتي عنهم معرفه شخصيه لأني كنت واحده منهم
بس تعرفي أنا وحشني آجي علي نفسي عشان حد
أكتر حد والوحيد تقريبا بييجي علي نفسه عشاني هو ماما وكان نفسي أنا كمان أكون بآجي علي نفسي عشانها بس للأسف ما عتش بآجي علي نفسي عشان حد

موناليزا يقول...

نسيبة
ـــــــ
وعليكم السلام ورحمة الله وبركاته
أهلا اهلا بالقمر
إن شاء الله ياحبيبتى هترجعى زى الاول واحسن كمان
وربنا يخليك مامتك ومايحرمكوش من بعض

نورتينى حبيبتى واسعدنى تواجدك