الأحد، 20 يونيو، 2010

حياة فى السجن

يلفت نظرى دائماً مشاهد السجون فى المسلسلات أو فى الأفلام العربية وأجد أن هناك حياة لا تختلف كثيراً عن الواقع.. فيوجد فى السجن رئيس العصابة المسيطر على الجميع, ويوجد الغلبان اللى مالوش ضهر, ويوجد الدراع اليمين لكبير القاعدة , ويوجد الجاسوس اللى بينقل الأخبار, وغيرها من الشخصيات التى توجد فى حياتنا الواقعية.
ومايثير ضيقى أن هذا المكان الذى يسمى مجازاً بالسجن المفروض أنه يكون مكان لأخذ العقاب نتيجة فعل شنعاء وليس مكاناً ترفيهياً لقضاء نزهة واستجمام .
المساجين ينقسموا إلى فئتين:
الفئة الأولى: وهى الظالمة وتستحق من العقاب ما جنته بأيديها على نفسها ولكن هذا فى الغالب لا يحدث لأن مهما كانت فترة العقوبة - والتى لاترضى المظلوم - هتنتهى وهتخرج عادى جداً وكأنها كانت بتجدد نشاطها وبتغير جو.. وفى الغالب هتكون هذه الشخصية الظالمة ممشية أمورها وهى مسجونة لأن رجالتها بره قايمين بالواجب يعنى نشاطها الإجرامى لم يتوقف والفرق الوحيد أن مش هى اللى هتنفذ.. ده غير أن كل حاجة مسموحة من أول السجاير حتى الحشيش والمخدرات.. وطبعا ممارسة الهوايات ده شئ بديهى زى البلطجة على خلق الله فى السجن وسرقتهم كمان لو استدعى الأمر.. والمصيبة أنه ضامن أنه بياكل وبيشرب وبينام من غير ما يتعرض للأذى أو يخاف من الشرطة لأنه أصلاً مسجون!.

الفئة الثانية:
المظلومة اللى كل يوم بيعدى عليها كأنه دهر من الزمن وخاصة إذا كانت مسجونة فى مكان لا يصلح للإستخدام الآدمى وإذا كانت تتعرض للإهانة بصفة مستمرة.. فيه اللى بيصبر على هذا الإبتلاء ويبدأ يتقرب من ربنا وكأنها خلوة مع الله , وفيه اللى بيحاول يعيد حساباته ويغير فى شخصيته عن طريق تعلم فنون البلطجة.. وممكن جداً يدخل السجن مظلوم ويطلع بلطجى ولو حتى خرج مظلوم زى ما دخل أكيد هيكون مهزوز نفسياً لأن المجتمع المحترم اللى كان عايش فيه باسمه وشرفه مش هيقبل وجوده بينه تانى وهيفضل وصمة عار فى تاريخه إلى الأبد.. حتى لو ظهرت براءته فى يوم من الأيام.

ولذلك أتسائل بداخلى لماذا لا يطبق شرع الله فى جميع الجرائم.
فمن يسرق ويعترف بهذا أو يوجد شهود عليه لِمَ لا تقطع يده فى ميدان عام حتى يكون عِبرة لغيره وبالمقابل لن يعود للسرقة مرة أخرى.
فمن يسرق ويدخل السجن- ده لو دخل- بيظبط أمور أسرته جيداً ليتمتعوا بهذا المال المسروق وبيحافظوله على نصيبه على مايبقى يخرج وممكن جداً يكرر نفس الموضوع ويشجع ولاده عليه كمان وخاصة لو قاعدة السجن عجبته.
ومن قتل يُقتل دى مافيهاش فصال.. فالعين بالعين والسن بالسن والبادى أظلم.
ومن يقتل بغير عمد حكمها فى القرآن واضح يدفع دية لأهله ويصوم شهرين.
وهكذا فالغرض من العقوبة فى القرآن الكريم أن المجرم يأخذ عقابه فى الدنيا بالطريقة اللى ربنا حددها لكى يبرأ ذمته يوم القيامة من هذا الجرم ولكى يكون عبرة لغيره فلا يقوم أحد بتقليده حينما يعلم بأنه سيلاقى هذا المصير.
ومن يقذف المحصنات - اللى بقى عادى دلؤتى - إستحالة هتلاقى حد بيتكلم فى أعراض الناس ويشهر بيهم ويهدد بصور سرقها وغيرها إذا أقيم عليه الحد.. فالحد فى الإسلام فى هذه الحالة الجلد 80 جلدة ولا يُقبل منه شهادة.
والزانى والزانية
الحد فى الإسلام الجلد 100 جلدة دون أن يأخذكم بها شفقة ولا رحمة (لغير المحصن). أما المحصن فيرجم حتى الموت.
مش يكون فيه تسهيل لبيوت الدعارة.

قانون الأهل بقى مختلف لو عرفوا بدون تفاهم هيموتوا البنت معتقدين أنهم كده هيدفنوا عارها مايعرفوش أن من قتل نفساً بغير حق فقد قتل الناس جميعا.. أعطوها فرصة تتوب عشان تعرف تقابل ربنا ده لو بتحبوها بجد.. وبعدين يعنى 100 جلدة مش هيطفوا ناركم.
وفيه أهالى تانية يجوزوها للشخص ده وخلاص على كده.

ليه إحنا بعيد عن شرع ربنا؟
ليه بقى عادى دلؤتى نسمع ان فيه مدون أو حد على الفيس بوك تم اعتقاله لمجرد كلمة قالها وبالمقابل بقى عادى برضه لما نسمع ان فيه تحرشات بالبنات منتشرة جدا وفى عز الضهر وماحدتش بيعملهم حاجة.. أو هروب متهم فى قضية الدم الفاسد خارج البلاد أو الحكم سبع سنوات فقط لا غير على من تسبب فى إزهاق عدد لا بأس به من الأرواح أو هروب من أخذ قروض من البنوك بأسعار خيالية.. ليه بقى عادى لما نعرف أن فيه مسجون تم هتك عرضه أو لقى حتفه من التعذيب الذى تعرض له - وكأنه خان بلده - وممكن جداً يكون برئ من أى تهمة وأن فيه تشابه أسماء.. ليه ماعدتش المتهم برئ إلا أن تثبت إدانته وبقت المتهم مُدان إلا أن تثبت برائته.. وعلى ما برائته دى تبان ممكن يكون مات حزناً على إحساسه بالظلم.. وغيرها من القائمة التى مازلنا نتعجب على وجودها بيننا..




فلماذا قل الخوف من الله؟ لماذا غاب الضمير!.
لماذا يوجد ثغرات فى القانون لا يلجأ إليها إلا الظالم ليكمل ظلمه ويساعده بهذا أى محامى معندوش ضمير وهدفه الأساسى أن موكله يطلع براءة حتى لو على حساب الحق والعدل.
ولماذا يوجد محامى ممكن يبيع موكله المظلوم من أجل حفنة من المال!.
كيف تأمنون مكر الله!. لماذا كل صاحب سلطة أو من عنده واسطة يفعل ما يريد لأنه مسنود ولن يتعرض للإيذاء أو للإهانة - عكس من ليس له أحد - أو حتى يبيت ليلة واحدة فى السجن ومش بعيد كمان يلفق لأى واحد مش عاجبه قضية ويلاقى اللى يخدموه عشان خاطر يا إما فلوسه يا إما نفوذه.
لا يسعنى فى النهاية إلا أن أقول لكل مظلوم:
لابد من يوم محتوم تطرد فيه المظالم أبيض على كل مظلوم وأسود على كل ظالم.. تتبع تاريخ الظالمين مهما كانوا وأنت بنفسك هتشوف نهايتهم.
وربنا يصبرك ويثبتك على دينك.
وإلى كل ظالم:
هنيئاً لك بدعوة المظلوم ولا تحسبن الله غافلا عما يعمل الظالمون إنما يؤخركم إلى يوم تشخص فيه الأبصار وماتفكرش أن اليوم ده بعيد ..فياريت لو تراجع نفسك وترد مظالم الناس قبل ما ييجى يوم ماينفعش فيه أنك حتى تندم.



سؤال جانبى:
ــــــــــــــــــــــ
إيه أغرب حكم صدر فى قضية من وجهة نظرك؟.



هناك 26 تعليقًا:

مجداوية يقول...

السلام عليكم


المفروض أن قيد الحرية هي أكبر عقاب لواضع قانون الحبس والجرائم التي ترتكب داخل السجن قد تفوق العقوبة نفسها ومن الطبيعي عندما تضعين مجموعة من المجرمين في مكان واحد أن يؤثروا سلباً على أخلاق بعضهم البعض
فالسجن قد يدخله متهم بجنحة فيخرج محترف اجرام
والحالات الاستثنائية لمن يغير السجن حياته ويكمل تعليمه فيه ولكن بيظل دخوله السجن عاهة مستديمة لا تفارقه ولا تفارق من حوله

أى قانون وضعي من وضع الانسان لا بد أن يكون به خلل وثغرات لأن الكمال لله وحده
ولذلك شريعتنا كاملة متكاملة لا تطبق عندنا لعدم قناعة ولاة الأمر بأن حكم الله أكمل وأفضل من حكم البشر " تعالى الله عما يصفون"
فشريعتنا يخافها المجرمون ويحاربونها فهم لا يريدون أن تختفي الجرائم والسرقات والرشاوى

لذا سيظل الخلل وستظل الجرائم في زيادة لأنهم ارتضوا غير حكم الله وفضلوا القانون الفرنسي عن شرع الله !!!


قال تعالى :

أَفَغَيْرَ اللَّهِ أَبْتَغِي حَكَمًا وَهُوَ الَّذِي أَنْزَلَ إِلَيْكُمُ الْكِتَابَ مُفَصَّلًا ۚ وَالَّذِينَ آتَيْنَاهُمُ الْكِتَابَ يَعْلَمُونَ أَنَّهُ مُنَزَّلٌ مِنْ رَبِّكَ بِالْحَقِّ ۖ فَلَا تَكُونَنَّ مِنَ الْمُمْتَرِينَ (114)

صدق الله العظيم



*****

أغرب حكم
هو حكم العبارة ب 7 سنوات !!!!!

ولا حول ولا قوة إلا بالله
المفروض يعدمون غرقا وفي الليل

أنت لا تتصورين ظلمة البحر يا موناليزا , رهيبة , رهيبة يا الله
كانت لي تجربة في رحلة بالباخرة وبالفعل ظلمات البحر لا تشبه أى ظلمات , فدعيهم يهربون بفعلتهم فلن يذهبوا بعيدا

فالله لا يغفل ولا ينام

ملحوظة

عقوبة الزنا للمحصن الرجم حتى الموت ال 100 جلدة لغير المحصن

MR.PRESIDENT يقول...

المشكلة .. حتي في القوانين الوضعية انها مش بتطبق ,,
بس المسئول عن كدا هيروح من ربنا فين .. وحسبي الله ونعم الوكيل ..
وعلي فكرة البلد كلها في الضياع دلوقت ..
ربنا يسترهاااااااااااااااااا
البلد بتتحرق من جواااااا
ربنا يستر
ربنا يستر

أبو كريم يقول...

يا أمة الله ثبتك الله على طاعتة

قوانينا الى ماشيين عليها قوانين علمانيه سواء قانون فرنسى او بريطانى فأكيد وضع بشر أكيد فى خلل وطبعا النفوس الدنيئه بتستغله لصالحها.... أما الشرع الى احنا مطالبين بيه مبنطبقوش ( سبحان الله) عشان نستغل الفساد الى فالقوانيين فى فساد أكبر على نطاق أكبر.


أغرب حكم هو هشام طلعت مصطفى الى بعتوا اوراقه لفضيلة المفتى ولم يصدق على إعدامه والله تذكرت قول رسولنا الكريم فاليهود (إنه إذا سرق فيهم الضعيف قطعوا يده، وإذا سرق فيهم الشريف تركوه)

والسلام عليك ورحمة وبركاته

أم الخــلـود يقول...

مرة قرأت أن قاضي مصري وهو ينطق بالحكم على المتهم في قضية قتل يدعي أنه مظلوم فقال القاضي براءة وهو كان ينوي إدانته

فتعجب القاضي من نطقه بغير ما هو مكتوب ولم يستطع أن يغير الحكم للإدانة، ثم تذكر وقال أكيد أن الله عز وجل يعلم ببرائته فطلب من المباحث فتح التحقيق مرة أخرى.. وبالفعل كان أحد الشهود هو القاتل ثم شهد شهادة زور على المتهم.


اصحى يا نايم ووحد الدايم ..

(حملة الجسد الواحد)

أرجوا من المدونين الموقرين أن يضعوا شعار الحملة واسمها في الشريط الجانبي لمدوناتهم كدلالة على وحدة صف أمة محمد

لمزيد من المعلومات

http://dndanh111.blogspot.com/2010/06/blog-post_14.html

جعله الله في ميزان حسناتكم .. آمين

salma mohamed يقول...

العملية متشابكة،أخطاء من الشعب ومن الحكام والقاسم المشترك فيها البعد عن ربنا ومنهجه والتحاكم بشريعته.

SHAPE YOUR LIFE (ABOALI) يقول...

قبل السجن فيه حجز علشان الموضوع يبقى كامل
الحجز اسمه فى الشرطة الحضًانة بتشديد الضاد

السجن مش قيد حرية
هو اعادة تاءهيل للحرية من جديد
ومعالجة متكاملة لشذوذ حدث عن الفطرة السليمة

والسجن لها تقدير من الناحية الشرعية بمعنى انه مذكور فى القراءن بمعنى النفى من الارض

اما عن تعطيل بعض الحدود
من حق الحاكم ايضا توقيف بعض الحدود طبقا" لمنظور مجتمعى وبما يحافظ على سلامة المجتمع ومعاملاته
وهذا ما لم يتحقق مع عدم تطبيق بعض الحدود

اما عن سبب تساؤلاتك ولما بقينا كده
فهذا ايضا له اصل فى القراءن
ويمكن ان تقرىء قول فرعون لقومه
ذرونى اقتل موسى

وهذا معناه هيئوا الجو المناسب لكى اقتل موسى يعنى قولوا عليه ارهابى او مجنون
وهذا هو الفعل الذى تفعله الحكومات مع المعارضين لها
تقوم بالطعن فى شرفهم وانتمائهم وهكذا

و اقرىء وتعجبى
فاستخف قومه فأطاعوه

وهذا هو لب الموضوع كله

اننا نعانى من الاستخفاف
نتيجة اننا لا نعترض بالطريقة السليمة
وصوتنا خافت ودايما نفوض الامر للخالق
ونسينا
ان المؤمن القوى خير من المؤمن الضعيف

مثلا
نستحى ان نطلب من السائق ان يخفض من صوت الراديو مع انى ده من حقك
نستحى ان نطلب ممن يدخن السجائر ان لا يدخن

وهذا الحياء السلبى هو الذى قاد وجعل ادعياء الشر وخلافائه يستخفون بكل من يقول لا
لاءنهم واثقين انها زوبعة فردية وليست رؤية مجتمع مطالب بحقه

اما لماذا لا يخاف الناس الظالمين من الله
لانهم فى بالهم انهم مطعين الرب ويقيمون الحدود مع الغوغاء
لاءن كثرة الكذب والخيانة واللذة بالمعاصى
يؤدى الى الاستخاف بحجم المعصية والظن انها حسنات وليست معاصى

طبعا موضوع اننا نعيش فى سلبية ولا نملك الا الكلمة وخفوت الفعل

موضوع كبير جدا للنقاش

اما عن موضوع اغرب حكم صدر ؟
هو الحكم الحالى
كتم افواه الشعب فى قضية الانتخابات
واصبحنا شعب سجين داخل وطنه


تقديرى المستمر

كلمات من نور يقول...

تسلمي يا غاليه على درر كلماتك و تساؤلاتك بس طول ما إحنا بعيد عن شرع ربنا والقصاص كما حكم الله عز وجل منستغربش أي شيء في الزمن داه ..زونيجي للسؤال : الاحكام كتير فيها غريب قوي ولو إني شايفه إن الأغرب هو حكم العبارة ......جزاكي الله خيرا يا فتاتي

سبايدرمان يقول...

السلام عليكم
^_^
هو انتي قلتي كلمه
لو طبقوا الشرع صح ، هتقل كل الجرائم دي
بس ده بيحصل عشان القانون بتاعنا مش إسلامي
و غرب حكم صدر ... هو تقريبا في احكام كتيره بتبقي مش .....
وده مش عيب في القضاه و لكن عيب في القانون و المحامين الى بعد كده بيقولوا على نفسهم شاطرين
و كل الى بيحصل و الناس الى بتتحبس عشان بتتكلم
ده فقط عشان انتي في مصر

أحمد شريف يقول...

السلام عليكِ
كيف الحال ؟
سأعلق على أمر محدد
السجون ليست هكذا فقط بل بها مراكز تدريب مهني للأشغال المختلفة سواءنجارة أو ميكانيكا أو تريكوا وغيرهم
ووضع السجون تغير كثيراً في السنوات الماضية وقد زرت سجنين منذ عامين على فكرة في تقرير كنت أعده
وكذلك متذكر في عام 2007 أسبوع شباب الجامعات بالمنوفية وسجن شبين الشهير الذي كان موجود بالمدينة وبعد رؤيتي له بعدة أسابيع وجدت القرار الجمهوري بغلقه وبناء آخر آدمي خارج المدينة

السجون تغيرت كثيراً وهذه شهادة حق .. باقي بنود تدوينتك لها ما لها وعليها ما عليها وأغلبه متفق معك فيه

جنّي يقول...

السلام عليكم

السجون عالم رهييب به كل المتناقضات بالفعل ولكني لا اراه ترفيه ابدا الا لبعض المحاسيب فساعة واحدة بكل العمر والحمد لله الذي عافانا .. والسجن لعقاب من اجرم وتحذير لمن يفكر في الاجرام .. والمظلوم سيعوضه الله خيرا ان لم يكن في الدنيا ففي الاخرة ..
اما الحدود فتحتاج اولا لحاكم مسلم مؤمن رشيد عادل يستطيع ان يطبقها حتى ولو على ولده عندها نطالب بتطبيقها .. ولكن من الخطأان نطالب بها الآن في ظل حكم مستبد غارق في الفساد ..

اغرب حكم قضائي الحكم على المحاميان وترك وكيل النيابة وكلاهما له نفس الخطأ..

فارس عبدالفتاح يقول...

بصراحة انا زعلت لما فاتني التعليق على الموضوع الفائت الخاص بالباخرة والمرأة إذا أحبت ضحت ولا تبالي ، لكن نعلق الأول على هذا الموضوع طبعاً بدون جدال تطبيق شرع الله فيه الترياق هذا مما لا شك فيه، لكن إذا عطل هذا الشرع فان العرف الموروث هو الحاكم وإذا عطل هذا الموروث استبد الظلم والطغيان

وهنا اختلف مع حضرتك في أمر معين إذا سلمنا أولاً بانه إذا تعطل الشرع فان العرف هو البديل ، ففي موضوع الزنا القتل ضرورة حتمية ومقبولة حتى تتخلص العائلة من تلك الطعنة المميتة التي وجهة إلى كبرياء وكرامة العائلة

أطن كذلك وهكذا اعتقدي بحكم إني رجل أو شاب من الجنوب ( الصعيد ) وهذا بالنسبة للفتاة التي لم تتزوج والمرأة المتزوجة على حداً سواء فليس هناك عزر لهذه أو لتلك .. أما بخصوص المرأة إذا أحبت ضحت ولا تبالي فهذا أيضا أمر مؤسف ومزعج ومخيف إذا وجه في الطريق الخطأ


وبعيدن فيه سؤال اعتراضي .. لماذا ينزلون النساء قبل الرجل في حالة الخطر

وأقول ذلك لكل فتاة أو امرأة تؤمن بان المساواة بين الرجل أمر لا مساومة فيه ولا جدال حوله


لماذا لا تطالب بالمساواة مع الرجل في هذه المواقف ما دامت هي مؤمنة من قرارة نفسها أنها تساوي الرجل في الجنس وفي القدرات .. لماذا لا تطلب المساواة مع الرجل في الم الأمور .. واللى الرجالة هم كبش الفداء طول عمرهم

اعتقد انه سؤال منطقي ومقبول

فارس عبدالفتاح يقول...

عفواً

فانا لم اجاوب على السؤال في الموضوع الفائت والسؤال في الموضوع الحالي

وهي كالاتي :

اجابة رقم واحد : طبعاً عندي استعداد اضحي عن طيب خاطر لأهلي وكل محتاج مطر الى الاستغاثة لان الله سبحانه وتعالى مجيب المطرين اذا دعوه فكيف لا اجيب انا المطر .. وكذلك اضحي بمهجة نفسي ولا ألوم نفسي ابداً على ما افعل في انغاثة فتاة او امرأة محجبة حجاب شرعي او منتقبة .


اما عن الاحكام الغريبة فكل الاحكام غريبة ناس بتموت بالالف ومحدث يتحبس وواحد بيحاول يدافع عن نفسه او يحمي اولاده او حقوقه او حرمته ياخد مؤبد ان مكنش اعدام

فالامور معكوسه والظلم استبد بطريقة غريبة عجيبة

طهر فؤادك يقول...

السلام عليكم ورحمة الله وبركاتة

بارك الله فيكى
وماشاء الله مواضيعك كلها هادفة وياريت حكامنا تسمع وتحم بشرع الله ... بس دى حكمة ربنا وربنا يهدى ويتقبل منا ومن المسلمين صالح الاعمال اللهم امين ..

- اما اغرب حكم سمعتة وبسمعة براءة محمد ابراهيم سليمان وعدم توجيهة اى تهمة لية والله اعلم ...

موجة يقول...

بوست جمييييييل..
موضوع جامد والله..
للامام دائما
تسرني زيارتك..
خالص تحياتي
موجة

موناليزا يقول...

مجداوية
ــــــــ
وعليكم السلام ورحمة الله وبركاته
أهلا اهلا بصوت الحق

ومَن يتعامل اليوم بقيد الحرية!! فالمفاهيم أصبحت بالعكس

ما اجمل تعليقك ومشاركتك

أشكرك جدا على الملحوظة وقد أضفتها لللموضوع
ربنا يعزك ياحبيبتى وينفعنا بعلمك
نورتينى غاليتى واسعدنى تواجدك



*******************************


مستر / بريزيدنت
ــــــــــــــــ
أهلا بيك يافندم
البركة فى المحامين النصابين اللى ممكن جدا يقلبوا الحق باطل

فعلا ربنا يستر
أشكرك جدا لتعليقك
يسعدنا دوام التواصل



*********************************


أبو كريم
ـــــــــ
أهلا بيك أستاذ بهاء
ربنا يعزك يارب

وما اكتر الثغرات يافندم فى هذا القانون البشرى

أشكركجدا لتعليقك ولمشاركتك
يسعدنا دوام التواصل


*********************************


أم الخلود
ـــــــــــ
أهلا اهلا بالقمر
يااا الله
سبحان الله بجد:)
أشكرك جدا لمشاركتك
نورتينى حبيبتى واسعدنى تواجدك

ملحوظة: اجد صعوبة فى ترك تعليق لديكم لينك التعليقات مابيرضاش يحمل فارجو المعذرة



*********************************


سلمى محمد
ـــــــــــ
أهلا اهلا بالقمر
عندك حق جدا
نورتينى سلومتى الجميلة واسعدنى تواجدك


*********************************


أبو على
ـــــــــ
أهلا اهلا بصاحب التعليقات المميزة

شكرا على المعلومة

مش فى كل الاحوال يافندم لإن ماسمعناش عن حد خرج من السجن تايب الا الاقلية حتى المظلوم ممكن جدا يخرج ظالم لكل اللى حواليه

أشكرك جدا للاستشهاد بهذه الاية الكريمة فقد وضحت مقصدكم

عندك حق
لما بتعرض لموقف مشابه بستغرب انى انا الوحيدة بجد اللى بعترض ولانى بنت فالكل بيبص ناحيتى باستغراب وكأن مش من حقى اعترض على تصرف يؤذينى

آخر موقف تعرضت له كنت فى عيادة طبيب ووجدت شخص ملتحى فتح موبايله على القرآن بصوت عالى جدا فطلبت منه أن بخفض الصوت قليلا ومع ذلك رفض وقعد يتكلم مع اللى قاعدين على الموقف ده كتير وانى ازاى اطلب منه يخفض صوت القرآن!!!
والغريب ان محدش قاله ان فعلا الصوت عالى زيادة عن اللزوم!!

أشكرك جدا على مشاركتك وتعليقاتك المتميزة دائما
يسعدنا دوام التواصل


**********************************


كلمات من نور
ــــــــــــ
أهلا اهلا بالغالية
ماتحرمش منك ياحبيبتى ولا من توجدك المتميز
أشكرك جدا لتعليقك ولمشاركتك
نورتينى غاليتى



**********************************


سبايدر مان
ـــــــــــــ
وعليكم السلام ورحمة الله وبركاته
أهلا بيك يادكتور بعد طول غياب

عندك حق جدا وهذا للاسف
أشكرك لمشاركتك ولتعليقك
يسعدنا دوام التواصل


**********************************



أحمد شريف
ـــــــــــ
وعليكم السلام ورحمة الله وبركاته
أهلا بيك أستاذ أحمد
أشكرك جدا لهذا التوضيح ولو إن المشاهد الذى يعرضها الاعلام مختلفة تماما عن ماتقول
أشكرك جدا لتعليقك
يسعدنا دوام التواصل


**********************************



جنى
ــــــ
وعليكم السلام ورحمة الله وبركاته
أهلا بيك أستاذ سعيد
طيب إيه تفسيرك إن شخص يقبل أنه يتسجن على أنه يرجع مسروقات هو سرقها بنفسه ولسه معاه!!
فيه ناس بجد حياة السجن بالنسبة لهم افضل من حياتهم بره أو ماتختلفش عنها كتير

أشكرك جدا لتعليقك ولمشاركتك
يسعدنا دوام التواصل


**********************************



فارس عبد الفتاح
ـــــــــــــــــ
أهلا بيك أستاذ فارس
يافندم حضرتك تقدر تعلق على اى موضوع مهما كان قدمه فى اى وقت فأنا أقرأ جميع التعليقات وبرد عليها

طيب وهو 100 جلدة مش هتؤدى الغرض؟ على الاقل تبقى طبقت شرع ربنا بدل ماتقتل نفس وخصوصا ان لازم يكون فيه 4 شهود على حدوث هذه الجريمة مش مجرد شك أو ظن سئ او اتهام زور

هذا فعلا حال المرأة اذا احبت بصدق ولذلك وجب على اهلها ان يحيطوها برعايتهم دائما وتوجيهها التوجيه الصحيح

:) سؤال وجيه
ولكنى لست مؤمنة بهذه المساواة المزعومة فالرجل رجل والست والست
ولذلك لا املك له إجابة:)
------
ربنا يعزك يارب ويبارك فيك
أشكرك جدا لتعليقك ولمشاركتك
يسعدنا دوام التواصل



********************************


طهر فؤادك
ــــــــــ
وعليكم السلام ورحمة الله وبركاته
أهلا بيك يافندم
ربنا يعزك يارب فماتوفيقى الا بالله

بعد إذنك مين محمدابراهيم سليمان وايه هى تهمته؟

أشكرك جدا لتعليقك ولمشاركتك
يسعدنا دوام التواصل


**********************************


موجة
ـــــــ
أهلا اهلا بالقمر
أشكرك جدا لرأيك ولتعليقك
نورتينى حبيبتى واسعدنى تواجدك

محمود(باحث عن حب) يقول...

موضوع رائع وجميل
انا والحمد لله ازهرى
درست الحدود كلها بفضل الله
ولكنى ما رأيتها فى بلدنا
ممكن للانتشار الظلم فيها
مش عارف اتكلم فى القضيه دى
بس
فعلا
علشان نحكم بما انزل الله
لازم
يكون الحاكم اصلح من الشعب وهو الامام اللى يصلى بالناس ويهتم بشئون الرعيه
وحسبنا الله ونعم الوكيل

منى يقول...

السلام عليكم
ازيك يا موناليزا يا رب تكونى بكل خير
جيت وقرات كل اللى فاتنى جعله الله فى ميزان حسناتك
كل الحب
تحياتى

ليس فقيرا من يحب يقول...

السلام عليكم

ازيك يا موناليزا ياروح قلبى

وحشانى قوى والله يا مونى

يارب تكونى بالف خير يا حبيبتى

طبعا موضوعك مهم قوى قوى وياريت فعلا نطبق شرع

ربنا هنرتاح كتير والبلد حالها هيتعدل كتير قوووى

مش مزاكرة كويس يا ميس ومش عارفه اجاوب على السؤال

عاااااااااااااااااااااا

الزهرة البرية يقول...

تعرفى يامونى انا نفسى بستغرب لما يقولوا ان الأحكام فى بلدنا من الشريعة ازاى ده وهما بيلغوا حكم الاعدام وكمان حاجات العقل نفسه مش يصدقها ناس مظلومة والكل عارف ومتأكد وبيصدقوا الكذب اللى بيوصلهم حقيقى نفسى أشوف العدل بيتحقق وكمان اشوف الخير يعود من تانى لأن اللى بيحصل ده فى حد زاته بيمنع الخير إنه يدوم


دمتى بكل الخير والحب والسعادة

ماجد القاضي يقول...

السلام عليكم

موضوع غير مطروق منذ فترة (كالمعتاد).. أحييكي عليه أختي الكريمة... لكن تساؤلاتك العديدة التي وردت خلال حديثك سأعتبرها فضفضة، لأنها من الأسئلة التي لا يجاب عليها، مثل: لماذا تنشب الحروب؟ أو لماذا يوجد أشرار في العالم؟!!..

عامة وبشكل عام الإجابة -كما أشار آخرون- هي البعد عن تطبيق شرع الله..

وبمناسبة إشارتك إلى أن صلاح المجتمع في تطبيق الحدود، أذكر هنا إحصائية قرأتها منذ 10 سنوات تقريبا، كانت عن السرقة في السعودية التي تطبق الحدود (ولا أقول تطبق الشريعة كاملة).. قالت الإحصائية أن عدد السرقات العلنية التي قطعت فيها اليد لم يتعد 16 سرقة في 40 (أربعين) عاما!

طبعا السرقة موجودة في المجتمع السعودي ، لكن المقصود هنا أن قطع اليد حد من انتشار السرقة علانية في المجتمع كما يحدث في مجتمعات عربية أخرى ....!

تحياتي.

داليـ ـ ـ ـ ـ ـ ــــا يقول...

انتى كده بتتكلمى على قانون
الشعب السعودى

والله انا معاكى

بس انتى كده بتغيرى قانون سنين

اعتقد ان عمرها ما هتحصل

وبعدين فى حاجات مينفعش ليها الا عقاب الحبس

حتى لو فكروا فى كده
دى الدنيا تتقلب دا قانون هيتغير
ومعتقدش ان بلدنا فاضيه للكلام ده
بلدنا ضايعه فى كل حاجه يابنتى خلاص

تحياتى

موناليزا يقول...

محمود باحث عن حب
ــــــــــــــــــ
أهلا بيك أستاذ محمود
أشكرك جدا لرأيك ولتعليقك
يسعدنا دوام التواصل



***********************************


منى
ــــــ
وعليكم السلام ورحمة الله وبركاته
أهلا اهلا بالقمر بعد طول غياب
أنا الحمدلله بخير ماتحرمش من سؤالك

نورتينى منى الجميلة واسعدنى تواجدك
ومدونتى فى انتظارك دائما



*********************************


ليس فقيرا من يحب
ــــــــــــــ
وعليكم السلام ورحمة الله وبركاته
أهلا اهلا بالقمر بعد طول غياب
أنا الحمدلله بخير ماتحرمش من سؤالك

شكرك جدا لتعليقك
:) ولا يهمك ياحبيبتى.. سماح المرة دى:)

نورتينى ياجميلة واسعدنى تواجدك



********************************


الزهرة البرية
ـــــــــــــــ
أهلا اهلا بالقمر
عندك حق جدا
نورتينى جودى الجميلة واسعدنى تواجدك



*******************************


ماجد القاضى
ــــــــــــ
وعليكم السلام ورحمة الله وبركاته
أهلا بيك أستاذ ماجد
أشكرك جدا.. ربنا يكرمك فما توفيقى الا بالله
وهذا مانقصده يافندم ووضحت عنه مشكورا بهذه الاحصائية

أشكرك لتعليقك
يسعدنا دوام التواصل



*********************************


داليا
ـــــــــ
أهلا اهلا بالقمر
:) وتفتكرى هما هيهتموا بكلامى أصلاً أو حتى هيقرأوه

أشكرك جدا لتعليقك
نورتينى داليا الجميلة واسعدنى تواجدك

قطرة وفا يقول...

موافقة على كلاااااااامك ... بجد بتمنى يبقى في تطبيق لحكم ربنا ... الظالم يتعاقب عشان الناس تتعظ ... ياااه لو اتطبق نظام ربنا سبحانه وتعالى اد ايه هيبقى في فرق ...


أكتر مبيخليني أستغرب هو الحكم على القتلة و اللي بيعذبو الناس بالحبس كم سنة ... قال إيه ... رحمة انسانية !!!


تسلم ايديكي

موناليزا يقول...

قطرة وفا
ــــــــــ
أهلا اهلا بالقمر
أشكرك جدا لرأيك ولتعليقك
نورتينى ياجميلة واسعدنى تواجدك

مصطفى سيف يقول...

السلام عليكم
اختي الفاضلة
اولا اشكرك على دعوتي لقراءة ذلك البوست المميز الذي يدل على ان كاتبه له عقلية محترمة وتفكير واعي
اتفق معكي في اغلب ما قلتيه
الا انني ارى ان المساجين ثلاث انواع
النوعين الذين قد طرحتيهما ونوع ثالث هو المذنبون الذين شعروا بالذنب فتابوا على ما فعلوا بعد تأنيب ضمائرهم لهم
اتفق معكي تماما في تطبيق الشريعة والعمل بما ينص عليه القرآن وسنة نبينا صلى الله عليه وسلم
لو طبقنا كل ذلك لما احتجنا في الاصل للسجون
فالشدة مع المخطىء ستمنع الآخرين من خطئهم
ولو تذكرنا سيدنا عمر رضي الله عنه حين جلد ابنه حين كان يشرب الخمر حتى مات لو صنع اولي الامر ذلك في عهدنا لما راينا في جميع الافلام والمسلسلات البطل يشرب خمرا كأنه يشرب كوبا من الشاي
التوعية والارشاد مفقودون في مجتمعنا والدعوة للمعصية اقوى من الدعوة للطاعة
تحياتي وتقديري لقلمك الواعي

موناليزا يقول...

مصطفى سيف
ــــــــــــ
أهلا بيك أستاذ مصطفى
وعليكم السلام ورحمة الله وبركاته
أنا اللى بشكرك على تلبيتك لدعوتى فى قراءة هذا الموضوع
وفعلا اتسائل دايما ايه فايدة السجن اذا كان المخطئ ماصلحش خطأة.. اعتقد ان الاهم من السجن ان يتم تطبيق قاعدة من أتلف شيئاً فعليه بإصلاحه
أشكرك جدا لتعليقك
يسعدنا دوام التواصل