الأربعاء، 27 يوليو، 2011

بصير ولا يرى


إن من أعظم نِعم الله علينا هى نعمة البصر فبها يرى الإنسان ويبصر كل شئ حوله.. ولكنى أتعجب مما حباهم الله بهذه النعمة ومع ذلك لا يستمتعون برؤية الأشياء وأتعجب أيضاً ممن فقدوا هذه النعمة الغالية ومع ذلك يستطيعون الإستمتاع بالأشياء من حولهم.. وكأن حاسة البصر ليست كافية لرؤية الأشياء بوضوح فيجب أن يكون لدى الفرد إستعداد داخلى ليرى الأشياء
وصدق من قال "كن جميلاً ترى الوجود جميلاً".

وسأعرض بعض المشاهد لمزيد من التوضيح.
*الكل يشهد بأخلاق زوجته وجمالها ولكنه لا يرى هذا وقام بتطليقها والزواج بأخرى أقل منها فى كل شئ.
تعليق الزوجة: لو كان شافنى كان حبنى لكن هو عمره ماشافنى.
تعليق من حوله: هو مابيشوفش!!.. حد يبقى معاه زوجة زى دى ويبص لغيرها!.

------------------

* لديه ولدان أحدهما ضخم البنية والآخر هزيل البنية ومع مرور السنين تبدل الوضع وأصبح ضخم البنية هزيلاً نحيفاً بطريقة ملفتة.. ومع ذلك مازال الأب يأتى لهم بالملابس بنفس الأحجام السابقة.
تعليق أحد الأبناء: أكيد بابا كان جايبلى ده واتلخبط وأعطاهالك.
تعليق الأم: أنت مش واخد بالك ولا إيه؟.
تعليق من حوله: هو مش واخد باله ان ابنه بيتعاطى مخدرات !.

--------------------

كانت تعيش مع أهلها فى غرفة على السطوح وبعد الزواج أصبح عندها شقة مستقلة واسعة وفاخرة وفى حى راقى ومع ذلك لا يعجبها شئ وتتذمر طول الوقت من حياتها الزوجية ولا ترى ما يوفره لها زوجها من حياة كريمة.
تعليق الزوج: البطران آخرته قطران.
تعليق من حوله: مش تحمد ربنا.. هى كانت تطول جوازة زى دى.. هو يعنى خدك على إيه!.

---------------------

يمر من أمام سيارته فتيات جميلات فيقول لمن معه فى السيارة: ياسلام لو عندى بنت جميلة كده.. ولم يرى ان ابنته الصغيرة ذو السبع أعوام تجلس معه وتسمعه.
تعليق البنت الصغيرة: أُمال أنا إيه!!.
تعليق من حوله: بنتك هتفضل فاكرة هذه الكلمات طول عمرها .

---------------------

فى طريقه لتوصيل ابنته الصغيرة إلى المدرسة يرى فتاة جامعية يعاكسها قائلاً: صباح الفل يا عسل.. لم يرى ابنته وهى تنظر ليه.
تعليق الابنه: إمتى أكبر عشان اتعاكس.
تعليق الفتاة: هو مش عارف أنه كده بيربى بنته غلط .

------------------

يطلب من والده زيادة مصروفه لكى يستطيع شراء سجاير ولكى يعزم أصحابه ولم يرى ما يمر به والده من أزمة مالية جعلته يستلف من أصدقائه.
تعليق الأب: يعنى أسرق عشان أكفى طلباتك!.
تعليق من حوله: اللى مابيشوفش من الغربال يبقى أعمى.

--------------------

يعزم صديقه الأعزب على العشاء كل أسبوع ولم يرى نظرات إعجابه بزوجته ولم يلتفت إلى تذمر زوجته حين حضور صديقه.
تعليق الزوجة: إزاى مش شايف نظراته ليا..يعنى مش غيران عليا ولا أنا مش فارقة معاه.
تعليق من حوله: إزاى يحط النار جنب البنزين.

------------

تنظر لما ترتدى فى المرآة قائلة :ياااه الطقم ده بقى لى كتير أوى لا بساه ..ده عندى من كذا سنة .. أنا زعقت منه خلاص وهشترى طقم تانى.
وحينما تجلس للغدا ينظر لها أبوها قائلاً: حلو أوى الطقم ده أنتِ اشتريتيه إمتى؟.

تعليق الابنة : أنت أول مرة تشوفنى لابساه رغم أنى كل يوم بلبسه من كذا سنة!!
تعليق من حوله: واضح أنك عايش معاهم بجسدك بس.

------------------------

تحضر الأكل وتزينه ويأتى الزوج ليأكل بهمجية ولا يرى ماوضعته من زبيب يمثل قلب صغير على الطبق..
قائلاً: أنتى مكترة الزبيب كده ليه.


تعليق الزوجة: ماهو أنت لو بتشوف الأول شكل الأكل ماكنتش سألت.

وغيرها من المشاهد الكثيرة التى تحدث حولنا.
دعوة منى لأن نرى الأشياء بوضوح.

==============

سؤال جانبى:
ـــــــــــــــــــ
أذكر موقف مشابه.

هناك 19 تعليقًا:

ريــــمــــاس يقول...

مساء الغاردينيا موناليزا
عنوان رائع ذو معنى وهدف فعلاً كثير منا لايبصر أشياء غالية وثمينة حوله وقد لايبصرها حتى يفقدها "
؛؛
؛
مميزة ورائعة في طرحك
راقت لي "
؛؛
؛
لروحك عبق الغاردينيا
reemaas

كريمة سندي يقول...

فأه لأعمى القلب وهو بصير ..

في مرة قصيت شعري لحد الرقبة وعقدت أسبوعين في البيت وأنا لابسدة بندالة

عشان زوجي لا يعرف ويزعل .. ورغم ذلك لم البندالة التي على رأسي ولا مرة ولم يسألني عنها فخلعتها ولم يلحظ كذلك طول شعري فقلت الحمد لله عدت على خير!!!

Carmen يقول...

اصبتى حقا امتلاكنا اعين لا يعنى اننا نرى

لهم اعين لا يبصرون بها ولهم اذان لا يسمعون بها

رائعة

تحياتى لك

وجع البنفسج يقول...

حلوة فكرة الطرح كثير يا موناليزا ..

أعجبتني طريقتك كثير كثير .. فعلا مختصر مفيد ..

بس لا يحضرني موقف مشابه الآن ..

يمكن اكثر حاجة سمعتها في الفترة الاخيرة .. هي احدى الزوجات التي يبدي الجميع اعجابه بأخلاقها واتزانها وحسن هندامها واهتمامها ببيتها وزوجها ولكن زوجها لا يرى ذلك ويتهمها بأنه لا تتقن اعداد الطعام مثل والدته ..

"""""

كل عام وانت بخير .

لغة الضاد بين الاهتمام والتحدي يقول...

تدوينة لا أقول عنها إلا أنها رائعة بحق، ورغم بساطتها.
أجد أن الروتين أحيانا يصبح كالصدأ الذي يعتلي الحديد، مما يجعل الانسان لا ينتبه لكثير من الأشياء حوله.

أضحكني الموقف الأخير الخاص بالزبيب :)

شكرا لك أختي موناليزا.

أم هريرة.. lolocat يقول...

السلام عليكم
احسنت ياموناليزا
اختيارات صائبة وعبرتى عنها بشكل واسلوب راقى وبديع

ما اصعب ان يفقد الانسان بصيرته فى الحياة

موفقة اختى الغالية

كل عام وانت بكل خير وسعادة
تحياتى وتقديرى

Bent Men ElZaman Da !! يقول...

جميله اوى فكره الموضوع يا موناليزا
وكمان العنوان لايق معاه اوى
كل موقف فيهم محتاج موضوع لوحده
مش حاضر فى دماغى اى موقف دلوقتى
بس المواقف اللى انتى قولتيهم أبلغ وافضل بجد
ياما فى ناس فعلا يمكن تشوف بعنيها لكن الاهم انهم مش بيشوفوا بقلبهم الاول عشان يقدروا يستوعبوا اكتر

تسلم ايدك

مصطفى سيف يقول...

هذه هي الحياة لا تعرف مدى الانعم التي تتمتع بها الا حين تفقدها
ولذلك قالوا الصحة تاج فوق رءوس الاصحاء لا يراه الا المرضى
لا يحضرني موقف الآن وان تذكرت فساعود
تحياتي

ليس فقيرا من يحب يقول...

موناليزتى

هو انتى بتجيبى افكار البوستات دى كده ازاى

مش باقر على فكرة بجد فكرة جميله

ياما كتير حوالينا معندهمش بصيرة ومبيشوفناش

ومن اقرب الناس لينا كمان بس هاحتفظ بالموقف المشابه

مساءك سكر

كل سنه وانتى طيبه يا قلبى وبعوده الايام

eng_semsem يقول...

حاجات كتيره محتاجه احساس عشان تتشاف وعندك حق وامثلتك موجوده في الحياه
تقبلي تحياتي

ليلي الشعينى يقول...

جميل جدآ البوست ياموناليزا
تسلم الايادى

NISREENA يقول...

موضوعك ع الوجع يا موناليزا
وما أكثرهم المواقف :)
لكن أعترف بأنني كنت ذات مرة عمياء البصيرة
وخسرت أشياء كثيرة جداً :)

reemaas يقول...

فعلا فى ناس بيبقوا عمى القلب قبل مايكونوا عمى النظر

جمييييييييييييييييييييله جدا جدا المشاهد

dreem يقول...

كل سنة وانتى طيبة يا موناليزا رمضان كريم عليكى وعلى المسلمين ان شاء الله وربنا يحقق لك كل اللى تتمنيه

موناليزا يقول...

ريماس
ــــــــ
أهلا بيكِ يا ريماس
مساء الفل يا حبيبتى
أشكرك جدا لتعليقك
وأسعدنى رأيك
ودمتِ بخير
نورتينى


********************************

كريمة سندى
ــــــــــــ
أهلا بيكِ يا كريمة
أشكرك جدا على تعليقك
ومشاركتك جعلتنى ابتسم فمن هذا الموقف يوجد الكثير :)

نورتينى وأسعدنى تواجدك


*********************************

كارمن
ــــــــ
أهلا بيكِ يا سمسمة
أشكرك جدا لتعليقك
وأسعدنى رأيك
نورتينى حبيبتى


****************************

وجع البنفسج
ـــــــــــــ
أهلا بيكِ حبيبتى
أشكرك جدا لرأيك فى طرحى للموضوع

أسعدنى وجودك وتعليقك
نورتينى جبيبتى ودمتِ بخير


********************************

لغة الضاد بين الاهتمام والتحدى
ـــــــــــــــــــــــــــــ
أهلا بيك أستاذ رشيد
أشكرك جدا لرأيك الذى أفتخر به

ده حقيقى التعود عموما بيلغى قيمة الشئ

:)

أشكرك جدا لتعليقك
ويسعدنا دوام التواصل


********************************

أم هريرة
ـــــــــــ
وعليكم السلام ورحمة الله وبركاته
أهلا بيكِ يا لولو
ربنا يكرمك ياحبيبتى أشكرك جدا لرأيك فما توفيقى الا بالله

أشكرك جدا لتعليقك الذى أسعدنى

وكل رمضان وأنتِ بخير
نورتينى حبيبتى


*****************************

بنت من الزمن ده
ـــــــــــــــــ
أهلا بيكِ حبيبتى
أشكرك جدا لرأيك فى فكرة الموضوع
أسعدنى تعليقك وتواجدك
نورتينى جبيبتى


********************************

مصطفى سيف
ــــــــــــ
أهلا بيك يادكتور
تعليق بليغ حقاً
"لصحة تاج فوق رءوس الاصحاء لا يراه الا المرضى"
ده حقيقى جداً

ونحن فى انتظاركم دائما
يسعدنا دوام التواصل
وأشكرك جدا لتعليقك


******************************

ليس فقيرا من يحب
ـــــــــــــــــ
رونى حبيبتى وحشتينى:)

:) هى بتيجى لوحدها ربنا بيبعتهالى:)

أشكرك جدا لرأيك فى فكرة الموضوع
وماشى يا ستى هنخليكى محتفظة بالموقف ومش هنطالبك بيه عشان رمضان وكده :)

نورتينى حبيبتى وفى انتظارك دايما



********************************

إنج سمسم
ـــــــــــ
أهلا بيك يا باشمهندس
ده حقيقى
أشكرك جدا لتعليقك
يسعدنا دوام التواصل


*******************************

ليلى الشعينى
ـــــــــــــ
أهلا بيكِ يا ليلى فى زيارتك الاولى
أشكرك جدا يا حبيبتى
وجودك هو الأجمل
وفى انتظارك دائما


*******************************

نيسرينا
ـــــــــــــ
أهلا بيكِ يا نيسو
سلامتك من أى وجع يا حبيبتى
المهم أن نتعلم من خسارتنا

نورتينى حبيبتى وأسعدنى وجودك


******************************

ريماس
ــــــــ
أهلا بيكِ يا نور
أشكرك جدا لرأيك فى المشاهد المطروحة
ولتعليقك
نورتينى حبيبتى وأسعدنى وجودك


*******************************

دريم
ــــــــ
أهلا اهلا بالقمر
وأنتِ طيبة يا قلبى وبكل الخير يارب
رمضان كريم علينا جميعا
أيوة كده أهم حاجة الدعوات المتبادلة :)

نورتينى حبيبتى وأسعدنى وجودك

ابراهيم رزق يقول...

لن اضيف شىء من تعليقى على ما سبق

فقط اردت ان اقول لكى كل سنة و انتى طيبة
رمضان كريم

vanilla scent يقول...

كل سنة وانتي طيبة

رمضان كريم

ربنا يرزقك طاعته

vanilla scent يقول...

السبب من وجهه نظري

فهو عدم الحمد لربنا واستغفاره يجعل الاعين لاتري رغم انها تبصر

موناليزا يقول...

ابراهيم رزق
ــــــــــــــ
أهلا بيك أستاذ ابراهيم
وأشكرك جدا على تهنئتك الرقيقة
وكل رمضان وأنت بخير

يسعدنا دوام التواصل


*******************************

فانيليا سينت
ـــــــــــــــ
أهلا بيكِ فى زيارتك الأولى
وكل رمضان وأنتِ بخير
وأشكرك جدا على تهنئتك الرقيقة
وعلى تعليقك
نورتى مدونتى وفى انتظارك دائما