الأربعاء، 11 يوليو 2012

لو كنت أعرف (خبايا رجالية)



لو كنت أعرف إن دى المرة الأخيرة اللى هشوفك فيها كنت صالحتك وطبطبت عليكِ وقلت لك إنك عندى أغلى من الدنيا.. كنت مسكت إيدك جامد وقلت لك حياتى ماتسواش حاجة من غيرك.. كنت حضنتك وقلت لك حقك عليا.. كنت وعدتك انى مش هزعلك تانى ولا هبعد عنك تانى.
آه لو كنت أعرف..
ماكنتش سيبتك تمشى وأنتِ زعلانة.
ماكنتش جيت متأخر كعادتى معاكِ.
ماكنتش قلت يلا نروح وأنا شايف إنك عايزة تقعدى معايا أطول فترة ممكنة.
ماكنتش تجاهلت كل الامك وعتابك ليا.
ما كنتش استغليت حبك وبإنك دايماً بتسامحى.
ماكنتش نمت يومها غير وأنا متصل عليكِ ومطيب خاطرك.
ماكنتش رميت الحِمل عليكِ واديتك مسئولية انك تبقى كويسة.
ماكنتش خليتك تعيطى وأنتِ بتترجينى أحافظ عليكِ.
ماكنتش اهتميت بأى حاجة تانية وأنتِ معايا.
ماكنتش سيبتك تمشى لوحدك.
ماكنتش اتعاملت معاكِ وكأن وجودك فى حياتى أمر مُسلم به.

لكن للأسف ماكنتش اعرف فياترى هتعذرينى!.


هناك 10 تعليقات:

beautiful mind يقول...

ان شاء الله هتعذرك
لما تقرأ الكلام الصادق دا اللي طالع من قلبك
متقلقيش عليها
أدام الله ودكما

موناليزا يقول...

بيوتيفل مايند
ـــــــــــــــــ
أهلا بيك يافندم
أشكرك لتعليقك
ولكن هذه ليست تدوينة شخصية فهى على لسان رجل ولذلك وضعت صورة واجهة الموضوع لتوضح الأمور :)

يسعدنا دوام التواصل

مصطفى سيف الدين يقول...

طيب لما تبقى خبايا رجالية تبقى ندم و احساس بالذنب؟
يعني هو في خبايا نسائية الراجل الغلطان و خبايا رجالية الراجل برضه الغلطان ههههههههه :)
جميلة التدوينة تحياتي

موناليزا يقول...

مصطفى سيف الدين
ــــــــــــــــــ
أهلا بيك يا دكتور
تصدق مااخدتش بالى :)
هى جت كده

أنا هشيل "على الهامش" علشان نشوف التعليقات من غير توضيح الأمور :)

يسعدنا دوام التواصل

amina يقول...

بجد والله جميل الموضوع

Bent Men ElZman Da !! يقول...

حلوه اوى فكره خبايا رجاليه دى
على الاقل عشان يقتنعوا انهم غير متهضين بالمره
هما اللى بيغلطوا كتير بس :))

rona ali يقول...

شكلك هتظبطلنا الرجاله يا مونى
اشجعك وبشده
ولكن التنوع مطلوب فياريت بقي تحاولى تخلى الراجل يكسب تعاطفنا :))

تحياتى

موناليزا يقول...

أمينة
ـــــــــ
أهلاً بيكِ يا أمينة
أشكرك جدا لرأيك ولتعليقك
نورتى مدونتى وفى انتظارك دائما


-----------------------------

بنت من الزمن ده
ـــــــــــــــــــ
أهلا بيكِ يا دينا
مبسوطة ان الفكرة عجبتك :)

نورتينى حبيبتى
وفى انتظارك دائما



-----------------------------

رونا على
ــــــــــــ
أهلا بيكِ يا رونا
يا سلام أنتِ تأمرى ^_^
سعيدة بجد برأيك وبتعليقك

نورتينى حبيبتى وفى انتظارك دائما

فتــافيت يقول...

احسن خليه يفضل يتألم كده
أسوء عذاب أصلا،، لما نلاقي حاجة كانت بين ايدينا وضاعت ،، بس يستاهل اللي ما يحافظش على النعمة اللي بين ايده يستاهل انها تذول من وشه .......... أنا شريرة :))

re7ab.sale7 يقول...

مممممممممممم
الرجالة مش زي الستات
البنات عاطفيين جدا وقلبهم بيحن علي طول
عايزين بس كلمة او اشارة وهوب يكونوا ف حضن الي قسي عليهم سنين
الرجالة مش كدة خالص
عن نفسي بتمني انه بس يقول انه بيفكر فيا زي ما بفكر فيه
مع اني متأكدة انه مش بيعمل كدة وانه نسي....
ممتازة يا مني ومستنين باقي الخبايا ارجالية