عن التحرش

بالنسبة لفعل التحرش وإن أصل البنت ولبسها.. هبسطهالك.

أنت لما بتلبس شورت أو بانتاكور ورجلك تبقى ظاهرة للعيان وتركب المواصلات كدة عادي.. هل منطقي واحدة تقرصك مثلا او تشكك بدبوس لان منظرك بالنسبة لها مستفز؟

هل أي تعليق بالسلب على هيئتك يوصل لحد التطاول عليك ده مقبول؟

أكيد لأ.. أنت مارست حريتك الشخصية في ارتداء ما يروق لك بعيدا عن ما يصح وما لا يصح ولم تتسبب في ضرر لأي شخص.

أهو ملابس المرأة كدة برضه بعيدا عن كونه يجوز او لا يجوز هي لم تتسبب بضرر لأي شخص.
والإنساني هنا إنك لو لقيت حد بيتعرض لانتهاك مساحته وبيشجب ده إنك تقف في صفه وتدين المعتدي مش العكس.

**

 يا ترى لو شوفتها عريانة، هتحاول تسترها وتغطيها، أو هتحاول تمنع عنها الأذى.. ولا هتكون أنت نفسك مصدر الأذى ليها!.
طيب لو شوفت عربية جواها مفتاحها وبابها مش مقفول.. هل ده مبرر لسرقتها؟
المتحرش لص ومنتهك ماليس له ومالوش أي مبررات.
أعتقد إنك مش هتسرق السيارة خوفا من العقاب ومن كونك وارد ماتعرفش تتصرف فيها.. وليس احتراما لكونها ليست ملكك مثلا.
لكنك وارد جدا تتحرش عادي؛ لإنك آمن، لا فيه قانون يمنعك أو مجتمع يقولك عيب، أو حتى رجل دين يقولك حرام.
شاغلين بالهم بس بزي المرأة لكن غض البصر وحرمانية انتهاك محارم الله مابتجيش سيرتها.

السنة اللي فاتت كان فيه موقف عن متحرش التجمع الخامس، والميموري فكرتني بردود أفعال غريبة كلها تدين الضحية (شوفي لابسة إيه) .. (ولو هو متحرش تبقى هي إيه؟) أصحاب التعليقات دول حسيتهم ناس مؤذية ومايعرفوش حاجة عن نصرة المظلوم.
هقول تاني: مش احنا اللي هنحاسب الناس، كل واحد يخليه في تصرفاته اللي هيتحاسب عليها..
وآه الفيصل بين المتحرش والغير متحرش رضاها الشخصي مش أي حاجة تانية، لو تم بالغصب وبعدم الرضا بقى تحرش حتى لو مجرد كلمة تبان لك عادية.
أقول قولي هذا وأستغفر الله لي ولكم.