السبت، 15 مارس 2008

تناقض ملحوظ


ألاحظ تناقض غريب فى شخصية المدخن فهذا الشخص عاقل وهذا مايجعله لايأكل أو يشرب أي حاجة مدة صلاحيتها منتهية.

فكيف إذاً يتناول شئ مكتوب على علبته إنه يدمر الصحة ويسبب الوفاة!!!!

ولماذا لايتناول سم الفئران على الفطار مثلا؟علشان سم يعنى وايه الفرق ما السجاير برضه سم ولا يعنى علشان ده سم بتاع الحيوانات والسجاير دى بتاعة الإنسان!!!

وليه مابيرشش على السلطة مثلا بودرة صراصير ولاّ يرش بيرسول أهو منها يضمن إن مفيش حشرات هتقرب من الأكل بتاعه ومنها يكون متميز(مش السجاير ميزة برضه؟)

الصراحة يعنى اللى بيصمموا العلبة مقصروش فى حملة التوعية-ليهم دور برضه-كاتبين على وش العلبة وضهرها كمان دول ناقص يجيبوا كفن هدية مع كل علبة بس واضح إن الميزانية مش سامحة.

وياترى ليه مبيحبش ولاده يشربوها وبينصحهم بالابتعاد عنها رغم إنهم بيشربوها بطريقة سلبية عن طريقه!

ولو عايز ينتحر ليه يكون سبب فى موت من حوله؟

إزاى بيبص يمين وشمال قبل مايعدى الشارع وهو بيشرب سجاير(يكونش خايف على نفسه من الموت!!!)

إزاى بيخاف على صحة أحبائه وهو بيشرب السجاير فى وجودهم!!!

إزاى يتأكد من نظافة الطعام قبل تناوله والسيجارة فى إيده!!!

إزاى تنهى أحبائك عن فعل شئ أنت نفسك فاعله!!!

إزاى بتحافظ على فلوسك من السرقة وأنت بتشرب سجاير!!!

ليه بتفاصل عند شرائك لأى شئ ولكنك لا تفاصل فى سعرها مهما غلا!!!

لماذا تدفع أموالك فى حاجة كافية بوفاتك!!!

لماذا تلوث هواء يستنشقه غيرك قبلك!!!

ياترى عاجبك لون أسنانك؟؟ ياترى عاجبك إشمئزاز الآخرين من رائحة أنفاسك الكريهة!!؟

ومن المناظر العادية من وجهة نظره:

*واحد صاحى من النوم طبعا لسه مش فايق وعايز سيجارة وقبل كده محدش يتوقع منه "صباح الخير"

*عايز تكلم شخص فى موضوع مهم تلاقى السيجارة أشتركت معاكم فى الحوار وكأنها مستشاره!

*شخص متضايق من حاجة برضه السيجارة هى صديقه اللى بيرمى زعله جواها -قال يعنى بعدها بيرتاح والزعل بيروح-

*شخص فى مكان مغلق ولا يكترث لوجود الآخرين وكأن كل ذنبهم تواجدهم معه فى نفس المكان والغريب إن الغالبية بيتذمروا لو حد أبدى ضيقه من هذا الدخان وكأنها إهانة لشخصهم!

"لوسمحت السيجارة بتتعبنى"وممكن يكون الرد"شوفلك مكان تانى ,أو يعنى أروح بيها فين, أو لسه فيها شوية ,أو خسارة أرميها ده أنا جايبها بفلوس"

والمصيبة الأكبر بقى إن العيال الصغيرين بيشربوها قال يعنى دى دليل الرجولة!!

ده غير طبعا إن السجاير بداية مصائب تانية كتير.

جسم الانسان فيه نيكوتين طبيعى ليه تستغنى عن حاجة ربنا عاطيهالك وببلاش وبعد كده تدور عليه!!

زى اللى بيشرب مخدرات ليه بتستغنى بإرادتك عن عقلك اللى ربنا كرمك بيه وميزك عن بقية الكائنات الاخرى!!!

يوجد فى الدول المتقدمة أماكن مخصصة للمدخنين تجعلهم يشعروا بأنهم منبوذين تفتكر ده معناه إيه؟

يا أخى بطلها إبتغاء مرضاة الله سيبها نصرة لدينك

وتذكر من ترك شيئا لله عوضه الله خيرا.

قال رسولنا الحبيب صلوات الله وسلامه عليه"لاضرر ولا ضرار" يعنى واضحة جدا إنها

حراااااااااام

ياترى ده مش سبب كافى إنك تبطلها!!؟؟؟

فبأى دين حللتها؟

وبأى مجتمع أباحتها؟

وبأى عقل تناولتها؟

اللهم اهدى شباب المسلمين فى كل مكان.

اللهم استخدمهم لنصرة دينك اللهم أعز الاسلام والمسلمين.

هناك 65 تعليقًا:

غربة وطن يقول...

أنت
يا سارقة ياء النداء من حروفي
لماذا أنتِ مرتبكة ؟
نعم أعنيك أنت
ادعوك للإنضمام للفكرة
فانتِ وحدك .. تلك التي لم تأت
هذا طريق لم يكن يعرفه احد
و لا يعرف احد
طريق لم تعرفه اقدام المارة
و لم تدنسه من قبل عجلات سيارة فارهة وقودها من عرقك و دمي
تعالي معنا و املئي الدنيا بالضجيج
نظرة على اسرار اون لاين لن تضيرك
و مشاركتك تأكدي انها مصدر سعادة لنا
http://asraronline.com/vb/

إلى كل مدخن
اقتل نفسك بعيدا عنا

واد غلبان يقول...

حقا وصل التدخين الى الاطفال
بعد ظننت كثيرا ان جيلنا عاق تربى اخطار التدخين جيدا
ولكن
هيهات
اتمنى الا يأتى اليوم الذى اقول فيه لطفلى
"ولد,ما تنفخش دخانك فى وشى"
وانا جاس ادخن الشيشة باستمتاع
تحياتى

Hossam Nasr يقول...

السيدة أمة الله

كلامك هذا أثلج صدري. فالحمد لله قد ضقنا صدرا بالتدخين والمدخنين وبدأنا في الأتجاة بخطوات إيجابية نحو صد هذا الداء

قد ناديت في مدونتي المتواضعة بعمل حملة في كل النمدونات بوضع ملصق لا للتدخين أو ممنوع التدخين او أي صورة تدل على بشاعة الفعل تحت شعار مسلمون لربهم طائعون في خضم حملات الاخوة المدونين لنصر ة رب العالمين والمصطفى الأمين صلى الله عليه وسلم وقد أقترحت بعض الأفكار في الرابط أدناه
http://kawlansadida.blogspot.com/2008/03/blog-post_09.html

فلنتكاتف ضد التدخين...بفضل المولى الكريم ما عاد أحد يقترب مني من على مسافة 10 متر وهو يحمل عيدان السرطان بين أصابعه بين زملائي في العمل

وإليكي طريقة مجربة
يوجد منتج إسمه منتو...هو نعناع مركز...يباع في الصيدليات على شكل باستيلية...أعطيها لأصحابي فتطهر أفواههم ... فيصعب عليهم التدخين إلا بعد فترة طويلة...أكون ألحقتهم بأخرى

كثير منهم بدون أن يشعروا يستطيعون البقاء لأكثر من ست ساعات بدون تدخين. منهم من تركه بالفعل ومنهم من تراوده الفكرة

المهم أن هذه الثمرة ثمنها جنيه مصري واحد لا غير

جنية في الله = مسلم طائع

جزاكم الله كل الخير وتقبل الله منا ومنكم صالح الاعمال

انين الحزن يقول...

اول تعليق واول زيارة

نورتي مدونتي

نيجي بقه للاصطباحه قصدي السجارة

ربنا يهديهم ويبعدها عنهم امين يارب

سلاموووووووووز
وزة

إبـراهيم ... يقول...

نايس إني أول واحد هنا، طبعًا سا أمة الله، لقد أسمعتِ لو ناديتِ حيًا ....
.
.
بس سييبك من ده كلله، واضح إنك جديدة ف عالم التدوين فأهلاً بكِ ,,,ومرحبًأ ، ونورتيني

Unknown يقول...

اعتقد ان التدخين مجرد عادة لاثبات انة كبر وبعد كدة بقى بتمسك فية وبعد كدة تلاقية اى واحد منهم يقولك انا لما اعوز ابطل هبطل طيب بطل تلاقية بعد اقل من ساعة رجع جاب السيجارة تانى
ارجوا من اى مدخن انة بفكر ولو قليلا تحياتى للموضوع

la3lahakhier يقول...

مشكلة المدخن مع نفسه اولا
الحكاية ايمان وارادة
بوست ممتازة
سعيدة بمرورى عليكى
تحياتى

dr_modymodak يقول...

والله يا موناليزا من كتر الكلام في موضوع السجاير النت صدره تعبه هههههه

بس انتي تناولتي الموضوع بشكل مختلف وجديد فعلا بسم الله ما شاء الله

للاسف انا واحد منهم وعن قريب باذن المولي هعيش لنفسي

نصيحتك وصلت

موناليزا يقول...

غربة وطن
قبلت دعوتك وسعدت بزيارتك
*****************************
واد غلبان
يعنى لو شربت شيشة قدامهم متخيل هما هيعملوا ايه؟
نورت مدونتى واشكرك على تعليقك
********************************
whispes just for anight
الاخ الفاضل:جزاكم الله خيرا على جهودك وأشكرك على هذة الطريقة التى أأمل من الله ان يجربها الجميع
ربنا يكرمك ويبارك فيك
تسعدنى دائما مشاركتك وافكارك التى تمدنى بالقوة فجزاكم الله خيرا
دمت طيبا ولمدونتى زائرا
*********************************
أنين الحزن
نورت مدونتى واشكرك على تعليقك
********************************
ابراهيم معايا
أهلا بيك ونورت مدونتى
*********************************
ايوية
اختى الحبيبة:معك حق فالبداية سيجارة
نورتينى ياقمر
*******************************
la3lahakhier
أختى الحبيبة: يسعدنى مرورك دائما
أشكرك لتواصلك

dr_modymodak يقول...

نسيت اقلك صورة الموضوع بجد جامده جدا جدا جدا ومعبره اوي

أنا حر يقول...

على فكرة المدخنين دايما بيقولولي ان احسن حاجة عملتها اني مش بدخن وانا بصراحة بسمعهم واضحك
تدخينهم معندهمش ليه سبب مقنع وده اللي بيخلق التناقض بتاعهم
تحياتي

أحمد منتصر يقول...

مقالة حلوة أوي تسلم إيديكي :)

الفارس الملثم يقول...

طبعا مفيش كلام بعد اللي قلتيه من اسباب تخلي المدخنين يبطلول تدخين , بس انقول ايه , وربما المصيبة اللي بنشوفها دلوقتي اطفال لم يبلغوا العاشرة وهم ينفثوا دخان السجائر ..

ربنا يهدي الضالين المكابرون في الخطأ

تقبلي مروري

Ahmed Othman يقول...

شكرا أمة الله
موناليزا
فعلا التدخين و المدخنون هم خانقي
و معكري صفو يومي
و الشكوى التي لا أجد لها من يستمع

و شكرا مرة أخرى على تشريفك و حضورك

Empress appy يقول...

امممممممم بصى فيه ناس بجد مبتقدرش تبطل او حطت فى دماغها كده بس فى النهايه ربنا يهدى الجميع تسلم ايديكى على كلامك الرقيق ده

أحمد سعيد بسيوني يقول...

بسم الله
اللهم امين
بجد حاجة صعبة وبالذات ان الشركة المنتجة عاملة اعلان بطول العلبة كلها ان السجاير مضرة بالصحة وتسبب الوفاااااااااااة
ربنا يهدي

القاهرة - يقول...

أختى الكريمة اولا :جزاكى الله كل خير على زيارتكم الطيبة لنا وممتازة جدا مدونتكم الطيبة ربنا يبارك فيكم ثانيا :تعليقا على ما كتبتموه لدينا بمدونتنا اختى نحن لا ننتظر النتائج ما علينا الا غرس البذرة وان شاء الله قريبا ريحها طيبة ببشائر الحرية والكرامة . ومن يكن اختى فى المقدمة الا نحن الشباب . هل يعقل ان يكون غيرنا من يتقدم ونحن نلحق كالمتخلفين . بل علينا المقدمة الاولى لا نخشى فى الحق لومة لائم متحملين كل التبعات باصرار وتحدي وتضحية وثبات عظيم نعلم غيرنا فنحن الشباب الطامح النابض نحن حياة شعبنا وحياة امتنا فمن يكن غيرنا . واعلمى اختى ان النصر ما جاء الا بالصبر وما اصابت قطرات المياه الصخور الا بأستمرارية سقوطها ونحن فى مواجهة كل فساد بما يرزقنا الله به من قوة لن نتخلف حتى يرنا الله فى كل فساد ما يشفى به صدورنا نحن شباب هذه الامة كلها . جزاكى الله كل خير وانتم تعلمون اكثر منا . أخوكم / أسامه جابر

بنت الاسلام يقول...

حسبنا الله ونعمة الوكيل

مكتوب عليها التدخين ضار بالصحة ويؤدي الي الوفاة

ومع ذلك عنوان رجولة

عنوان رجولة ولاعنوان ضياع وموت

اهي جزء من منظومة فساد في المجتمع


اذا كان التمدن والتحضر عند الولاد باسقاط البنطلون وضرب السجاير وعند البنات بضرب العدسات الملونة ولبس الضيق فياسلامات علي الموضة

المنتجة والمبدعة

نحمد ربنا اننا من دول العالم التالت بس


وبعدهالك يااااابلد

الباحث عن الحقيقة يقول...

البوست مكتوب ببساطه وبشكل يوصل فعلا للناس
ويوصل المضمون تمام
المشكلة يا اختنا العزيزه هو : الادمان
المدخن ادمن النيكوتين ..لكن لم يدمن سم الفران او الصراصير
وعلى فكره شرب السجاير ده حاله نفسيه
واحد بيحس ان رجولته ناقصة ومش عارف يعمل ايه يبص للرجاله فى نظره اللى هو بيخاف منهم الصيع اللى حاسس ان شخصيتهم اقوى علشان بلطجيه طبعا فيبتدى يقلدهم ..طب هو مش قوى ..خلاص يبقى يتنيل يشرب نيكوتين ..وهكذا وهكذا
يعنى مش معنى كده ان كل المدخنين بلطجيه وناس وحشه ..لا فيهم ناس مريضة وناس بتقلد وخلاص
تحياتى

قليل من التفكير يقول...

.
أنا علطول بفكر في الاسئلة ديه.

بس معتقدش ليها اجابة حتي من المدخنيين نفسهم.
.

يوميات مواطن مصرى يقول...

الحمد لله مش بشرب سجاير بس جربت واعرف اشربها
بس بجد مالقتش اى حاجه تخلينى استمر فى شربها ناس قاتلولى الك شربت سيجاره واحده
قشربت علبه كامله وقلتلهم برضه خلاص مش حاشرب
قالولى اصلها علبه فشربت لمده اسبوعين كل يوم علبه
قلتلهم انا شربت كل يوم علبه لمده اسبوعين قالولى كده كويس اوى ايه بقى رايك اكيد مش عارف تبطل
قلتلهم بالعكس ماليش مزاج اشرب نهائى , السجاير دى مالهاش اى ميزه واللى بيشربوا وبيقولوا مش قادرين نبطل اعتقد لو عندهم قوة اراده حايبطلوا فورا

مصطفى حسان يقول...

شوفي انا عاوز الأول اعترف اني مدخن
وعاوز أعترف اعتراف كمان اني حاولت أبطل كتير جدا لكن بفشل وفي الاخر وصلت لاني مش قادر أبطل ولا حاجه زي ما كنت متخيل .. واني أضعف قوي مما كنت أتخيل

ندخل بقي في الموضوع :
طبيعة المدخن أساسا طبيعة غريبه جدا هو نفسه مش فاهمها يعني مثلا تقولي له انت مش بتبطل ليه يقول لك انا اقدر ابطل حالا لكن انا اللي مش عاوز .. طب انت مش عاوز ليه ؟؟ مش هايعرف يجاوب
انا نفسي لحد فتره قليله كنت متخيل اني عشان ابطل السجاير ده شيء سهل جدا .. لكن اكتشفت اني ضعيف جدا
وده شيئ لازم اعترف بيه
لكن تعالى بقي نشوف ليه المدخن متمسك جدا بالسيجاره بتاعته
أولا مسألة إنها شيء مضر بالصحه
في ايه مش مضر بالصحه ؟
الشيكولاته مضره جدا
الزيت لما بيتقلي فيه أكتر من مره بيجيب سرطان
الماده اللي في اكياس الشيبسي وعلب الكانز بتجيب سرطان
الدهون اللي في اللحمه .. اللي كتير قوي بياكلوها بتجيب سرطان برضه

طب ليه بقى الفرد العادي بياكل الحاجات دي كلها ؟

انا بس عاوز اوضح فكرة السرطان .. مافيش حاجه اسمها حاجه معينه بتجيب سرطان .. حتى السجاير مش بتجيب سرطان ولا حاجه .. كل الحكايه انها بتخلي الجسم أكثر قابلية على أخذ المرض لكن هي في حد ذاتها مش بتجيب سرطان (فاهمه الفكره) وكذلك كل الحاجات اللي انا ذكرتها في البداية

بصي الفكره مش فكرة مضره أو غيره
السؤال ما يبقاش كده
هي أصلا شيء مالوش لازمه بأي حال من الأحوال .. لكن برضه انا ما جاوبتش على السؤال .
على فكره بس انا عاوزك تفهمي حاجه ..انا كل ده مش ببرر لحد موقفه لكن انا بشرح لك من وجهة نظري ليه المدخنين معظمهم واخدين الموقف ده

لما تبقي متعوده انك لما تصحي الصبح لازم تشربي كباية شاي ومعاها سيجاره ولما تتعودي انك لما تقلقي من حاجه تولعي سيجاره ولما تتضايقي تولعي سيجاره ولما تفرحي تولعي سيجاره .. تخيلي كل ده وحاجات كتير قوي ممكن يحول السيجاره دي بالنسبه ليكي ايه ؟؟
أكتر من مجرد شيء مضر بالصحه
انا عاوز أأكد تاني اني ما ببررش لحد موقف لكن انا بشرح لك وجهة نظر المدخنين اللي ممكن هما نفسهم ما يبقوش فاهمينها
المهم هاتكتشفي في الاخر انها شيء ارتبط نفسيا بالشخصية.. بقت جزء من الشخصية .. ممكن توصل لأحيان ان واحد مش عاوز يدخن لكن مش مستريح لان علبته قربت تخلص .. أو لانه مافيش في جيبه سجاير .. مع انه ممكن يفضل أكتر من ساعتين ما يدخنش بس مجرد الإحساس ان العلبه بتاعته هاتفضى احساس بيضايقه
نوصل من كل اللي فات ده ان الموضوع مش مجرد إدمان أو عادة .. لا لا هي مش عاده خالص هي أكبر من عاده بكتير والمشكله مش في الادمان .. لان موضوع الإدمان ده أعتقد انه شيء مش صعب أبداً يعني أنا لو بطلت السجاير على أساس انها مجرد إدمان .. مافيش أي أزمه انا مش هاموت يعني .. لكن تخيلي بقا انها خلاص بقت جزء مني .

بس ده اللي انا كنت عاوز اوضحه ويارب ينجينا منها

همس الاحباب يقول...

العزيزة موناليزا
سلمت يداكى
وجزاكى الله خيرا
التدخين افة المجتمع ومهلكة للمال والصحة
يكفى الصور المرسومة على علب السجاير تثير الاشمئزاز والحزن
عفانا الله من التدخين ومن ويلاته
الله اهدى شباب ونساء الامة بالبعد عن ما يؤذيهم
تحياتى

منى يقول...

مش عارفه ليه دايما كنت بحس ان المدخن شخص انانى
متكبر
يمكن تحليلى خطا
لكن ده اللى بحس بيه
ربنا يهدينا جميعا ويجزيكى خير

almasry يقول...

أووووووووه ... موضوع كنت لسه هكتب فيه .. لكن يلا بقى دى أرزاق


والله بجد انتى كلامك منطقى

يعنى ازاى انا أروح السوبر ماركت (محل البقاله) ويدينى حاجه منتهيه صلاحيتها لأنى عارف انها هتعملى مشاكل فى صحتى .. وأقوم بمنتهى السهوله مدخنلى كام ألأف سيجاره تخلينى أدخن من فوقى لتحتى .. لكن والله خطوه جريئه من وزارة الصحه عملتها لما حطت الصوره اللى شكلها منيل بستين ألف نيله على علبة السجاير واللى خلت ناس كتير تبطل السجاير انا شوفتهم بعينى

تحيـــــــاتى
المصــــــــــرى

ابو صهيب ( الجمعاوي الاصيل)سابقاً يقول...

لاتلقوا بايديكم الى التهلكه

مروة الزارع يقول...

كلامك منطقى جدا وعندك حق فية

بس المدخنين كتير بيكونوا مساكين

بيحطوا همهم من الأرف اللى احنا شايفينة فى السجاير

ربنا يتوب علينا جميعا من اى شئ غلط

تحياتى ليكى على البوست دة

:)))

موناليزا يقول...

dr_modymodak
الحمد لله ان النصيحة وصلت وياريت زيارتك الجاية تكون من غير سجاير أنا راضية تدخل عليا بإيدك فاضية متعملش حجتى يعنى هههههههه
وياريت كل ما تيجى تشرب سيجارة تفتكر الصورة وشوف ساعتها انت بتعمل ايه فى الرئة ولا ايه يادكتور
دمت طيبا ولمدونتى زائرا
***********************************
أنا حر
أحييك جدا على عدم تدخينك
وفعلا ياريت الاقى حد مدخن يقول سبب مقنع لنفسه قبل حتى مايقوله للناس
نورت مدونتى
***********************************
أحمد منتصر
نورت مدونتى واشكرك على تعليقك
***********************************الفارس الملثم
مرورك يسعدنى دائما
وبالنسبة للاطفال فأكيد نشاتهم لها تأثير يعنى عدم الرقابة وقلة الاهتمام والقدوة السيئة ولذلك قبل مانلومهم نلوم اهلهم
نورتنى وأسعدنى تواصلك
********************************
وجه جديد
فعلا المدخن يرفض دائما النصيحة
ربنا يهديهم ويتوب عليهم يارب
نورت مدونتى واشكرك على تعليقك
******************************
appy
أختى الحبيبة:هى دى المشكلة مفيش ارادة كافية
نورتينى ويسعدنى تواصلك دائما
*********************************
احمد سعيد بسيونى
وكان كل المدخنين لا يقرأون ولا يهتمون بهذا
اهلا بيك ونورت مدونتى
********************************
أسامة جابر
أهلا بيك يا اخ اسامةو
أشكرك جدا على تعليقك الذى جعلنى اشعر بالقوة وانا معك جدا وربنا يبارك فيك ويجعلك قدوة للاخرين
نورت مدونتى وارجو دوام التواصل

موناليزا يقول...

بنت الاسلام
أختى الغالية:أشكرك على تعليقك
وياريت بجد الرسالة توصل
دى خطة مدبرة لتدمير شبابنا
نورتى مدونتى وارجو دوام التواصل
*********************************
الباحث عن الحقيقة
أهلا بيك وانا اعتقد أيضا ان السبب الرئيسى فى البداية يكون العِند فرغم كل التحذيرات والنصايح اللى بيسمعها وحافظها كويس بيشرب وفيه ناس برضه مش راضية تبطل عِند
نورت مدونتى وارجو دوام التواصل
**********************************
قليل من التفكير
ضعف الارادة هى اللى مش بتخليهم يحاولوا يسألوا نفسهم مش بس يجاوبوا
أهلا بيك ونورت مدونتى
*********************************
يوميات مواطن مصرى
أحييك جدا على قوة ارادتك بس ليه التحدى اللى ممكن يتعبك مكنتش ترد عليهم أنا عارفة انك عملت كده عشان تثبتلهم انها ترجع لقوة الارادة ومدى تحكمك بنفسك بس مش للدرجة دى صحتك برضه
نورت مدونتى واسعدنى مشاركتك وارجو دوام التواصل
***********************************
darsh
أحييك جدا على صراحتك وعلى تعليقك اللى وضحلى المدخن بيفكر ازاى
وانا معاك ان غالبية مانتناوله مضر بالصحة ومش هتكلم فى ده بس هتكلم فى حاجة انت مجبتش سيرتها خالص يادرش وهى انها حراام فمهما كانت الاسباب والمبررات فهى برضه حرام
تعرف فى عادات كتير فى حياتنا يمكن تكون مش حلوة للى حوالينا بس لما نعرف ان فيها شبهة حرام مقدمناش غير اننا نبطلها مهما كان تعلقنا بيها ومدى تعودنا عليها عشان ربنا وبيكون ده جهاد للنفس يعنى جهاد مش سهل وبالتالى ثوابه اكبر
ياريت كلامى ميكونش ضايقك
ويارب تفرحنا قريب بانك خلاص بطلت
ارجو دوام التواصل

موناليزا يقول...

همس الحباب
أشكرك يا استاذ خالد على تواصلك بس ياريت ايدك معانا فى حملة التوعية واهو كله بثوابه
دمت طيبا ولمدونتى زائرا
********************************
منى
أختى الحبيبة:احساسك انا كمان شايفاه صح لان الانانى بيفكر فى اللى يرضى ذاته حتى لو هيضره ويضر الاخرين
**********************************
elmasry
أهلا بيك ونورتنى وانا مستنية موضوعك اللى اكيد هيكون بوجهة نظر ذكوريةمختلفة
بس تعرف فيه ناس بتعمل نفسها مش واخده بالها من الصورة ولا من الكلام
ربنا يهدى الجميع
******************************
الجمعاوى الاصيل
اهلا بيك واشكرك على تواصلك
وياريت تشارك معنا فى حملة التوعية
**********************************
مروة الزارع
المشكلة يا اختى الحبيبة انها حرام والغالبية مش بيفكروا فى انها بتغضب ربنا وبيدوروا على مبررات لاباحتها لدرجة انك ممكن تتعاطف معاهم
ربنا يهدى الجميع ويتوب عليهم
اشكرك على تعليقك وارجو دوام التواصل

د/اجدع بنوته يقول...

ربنا يهديهمممممممممممممممممممم

موناليزا يقول...

د/اجدع بنوتة
ربنا يسمع منك
نورتينى ياقمر

غير معرف يقول...

جزاكى الله خيرا على حسن الطرح
أنا مقدرش أشبه المدخنين بلفظة رجولة
لأنه الواحد فيهم بيفكرنى بالطفل اللى ميقدرش يستغنى عن الرضعه بتاعته
اللهم اصلح أحوالهم بجد تعبونا معاهم
أدعوكى لزيارة المدونة لأن الإشارة التانية حصل فيها كلام كتير

محمود ابوالعزم يقول...

معاكي حق يا دكتوره
ياريت كل حد بيدخن يقري التدوينه دي
بالتوفيق دائما

إخوانى حتى النخاع يقول...

حاااااااجة حزييييننة جداااااا جداااااااا


الله يهدى المدخنين ..


اخوكم إخوانى حتى النخاع

http://ikhwangeeee.blogspot.com

إنسان || Human يقول...

فعلا تصدقي أول مره أخد بالي من التناقض الغريب فعلاً
ده حتى العلب كلها نازل عليها صور لرئة مصابة
شكلها مرعب ومقزز ...ولكن هذا هو الإنسان متناقض أساساً في كل أفعاله ,,يعرف الحقيقة والصواب ويتجاهلها
شكراً على المجهود الرائع
الموضوع مش جديد
لكن التناول هواللي جديد

مجداوية يقول...

عزيزتى
تعرفى أكتر حاجة بتضابقنى من موضوع التدخين ايه ؟ان واحد غلبان ومش لاقى ياكل وبقع الأنيميا مغطية وشه وتلاقيه بيشرب سجاير !!!! فيه ناس بطلوها عشان الفلوس وفيه ناس بطلوها عشان الصحة وبالأمر من الدكتور وفيه ناس بطلوها طاعة لله ودول بقى لازم نحييهم لأنهم كان ممكن يستمروا فيها لكن عشان ربنا وعشان هى حرام امتنعوا عنها ...فتحية لكل مدخن توقف عن التدخين طاعة لله ,,وجزاك الله كل خير على كلامك الرائع المنطقى جدا ولا اعرف لو قرأه أحد المدخنين ولم يراجع نفسه يبقى عايز ايه يقنعه ..لو فيه حد عنده شجاهة الاعتراف ويقول هو ليه بيدخن بعد كل ما كتبتيه ؟؟ مين شجاع ؟؟؟؟؟

موناليزا يقول...

عمر المصرى
أنا متفقة معك جدا وياريت يقتنعوا فعلا بده
نورتنى وانا قبلت الدعوة
***********************************
محمود سليمان ابو العزم
خلاص همتك معايا يا استاذ محمود وتعمل دعاية للتدوينة
نورتنى واشكرك على تعليقك
********************************
ikhwangeee
معاك حق وربنا يسمع منك
نورت مدونتى واشكرك على تعليقك
**********************************
human
يارب افضل متجددة فى طرح المواضيع
اشكرك على تعليقك ونورت مدونتى
********************************
مجداوية
الاخت العزيزة:انا كمان احييى كل مدخن اقلع عن هذة العادة ابتغاء رضا الله
وعلى فكرة الاستاذ درش علق معانا بس ده مايمنعش اننا فى انتظار ناس شجاعة ذيه ويكلمونا عن وجهة نظرهم
اشكرك على تعليقك وارجو دوام التواصل

Abo 7anf يقول...

انا معاكى فى كل القلتيه بس بردوا
محنا بنمشى فى شوارع كلها دخان عربيات ومصانع بالذات عربيات النقل العام اللى كاتبه (تعمل بمحرك صديق للبيئه ) وبناكل عيش كلوا مسامير وبيض فيه انفلونزا الطيور وسمك مربينه فى مزارع
فلو المدخن لوحده منتاقض
فمعذره احنا شعب التناقض

Unknown يقول...

إزاى بيخاف على صحة أحبائه وهو بيشرب السجاير فى وجودهم!!!

إزاى يتأكد من نظافة الطعام قبل تناوله والسيجارة فى إيده!!!

إزاى تنهى أحبائك عن فعل شئ أنت نفسك فاعله!!!

إزاى بتحافظ على فلوسك من السرقة وأنت بتشرب سجاير!!!

ليه بتفاصل عند شرائك لأى شئ ولكنك لا تفاصل فى سعرها مهما غلا!!!

---------------------

يا ريت كل الاحباء الى بيقيدوا نفسهم و اعصابهم و صحتهم بها يبتعدوا عنها للأبد

مدونتك جميلة و اسلوبك فى عرض امور اجتماعية تتعلق بالدين و حب الله تلقائى و غير متكلف زى بوست صديقك الحبيب ... جميل اوى

لا اله الا الله

أسمحيلى استضيفك فى مدونة اهل عندليبيات ( جناح ادعوك يا سامع دعايا ؟

موناليزا يقول...

abo7anf
اولا اهلا بيك واشكرك على تعليقك بس اسمحلى الامثلة اللى قلتها احنا ملناش يد فيها يعنى مفروضة علينا مش بايدك انك تمشى فى الشارع ومتلاقيش عوادم سيارات بس اكيد فى ايدك متكونش سبب فى خنقة الاخرين بدخان سيجارتك
ده غير طبعا ان السجاير حرام
واحنا بنحاول نغير عادة سيئة واكيد مش قصدنا اننا نبرر الافعال السيئة ولو كل واحد بدأبتغيير نفسه اكيد مش هيبقى فيه تناقض
شكرا على مشاركتك
*********************************
عاليا حليم
نورتينى واهلابيك زائرة عزيزة ومعلقة دائمة
والحمد لله ان كلامى سهل وبيوصل فهذا من فضل ربى
وانا قبلت دعوتك ويسعدنى الانضمام معكم

صوت من مصر يقول...

البوست ده ضدى وضد البلوج بتاعى للاسف

دكتورة سنان يقول...

التدخين ده بلوووووووه سووووده والله
ربنا يهدى الجميع

بنوته مصرية يقول...

ربنا يهديهم

بجد دمار وهلاك

بس اللي يعرف


تحياتي لكي
رودي

صيدلانيه طالعه نازله يقول...

للاسف التدخين اصبح وباء و اصاب الاطفال من دافع تقليد الاباء
نبقى فى القطار و علامه ممنوع التدخين تسد عين الشمس و تلاقى العربيه عباره عن حريقه
الحمد لله انى اتجوزت واحد مابيدخنش
و ربنا يهدى الجميع

غير معرف يقول...

اختي العزيزه موناليزا

التدخين عزيزتي عاده زي عادات كتيره الناس بتواظب عليها

اللي لاحظته كمان انهم بدأوا يحطوا صوره علي علبه السجاير بتمثل حاله الرئه و هي سودا من تأثير السجاير عليها

بوست مميز و انشاء الله يؤتي ثماره
جزاكي الله خيرا يااختي العزيزه

walaa يقول...

فعلا والله اللهم ما اهدى شباب المسلمين الى الطريق الصحيح ونور بصيرتهم
وكل مدخن يبطل السجائر
ولاء

مجداوية يقول...

للأستاذ درس
بعد اذنك أختى الكريمة أريد أن أطلب منه شيئا ؟
احسب أخى الكريم بكم تدخن نقودا وأنا لا اعرف كم ولنقل بخمسة جنيهات فى اليوم ثم احرق هذه الخمسة جنيهات ثم احسب فى الأسبوع نقول 35 جنيها وأحرق هذه النقود ُثم فى الشهر 140 جنيه ثم احرق هذه النقود ثم فى السنة 1880 ثم احرق هذه النقود ده على الأقل ثم أحسب منذ كم عام تدخن ,اضرب الرقم فى هذه الأعوام ثم أحرق هذه النقود ,ما رأيك ؟؟ هذا ما تفعله كل هذه المدة التى دخنت فيها السجائر لقد أحرقت كل هذا المال ,والمسأله ليست من أجل الصحة فى المقام الأول فلقد تعددت الأسباب والموت واحد لكن لأن الصحة أمانه وجسدك أمانه اذا مرضت لا قدر الله فهذا بدون ارادتك لكن أنت تدخن وفيها ضرر بالتأكيد عليك فأنت تخرب فى جسدك وهو أمانة لديك والمال أيضا هو مال الله ائتمنك عليه ولكنك أحرقته ,وصحيح أنت لا تدخن بهذه النية بالطبع لكنى أتكلم عن النتيجة بالاضافة الى كل ماذكرته الأخت الفاضلة موناليزا يبقى ازاى تستمر بعد كل ده ومفيش حاجة سهله فى الدنيا وأكيد هى صعبه جدا انك تبطلها لكن مش مستحيلة ومتوهمش نفسك انك ضعيف جدا أمامها,, تخيل لو جالك رسول الله وقعد عندك يوم اتنين شهر كنت حتبطلها ولا لأ؟؟ والجواب بديهى كنت طبعا حتبطلها يبقى حضرتك مش ضعيف ولا حاجة ,,وربنا يقويك وكل الأخوة المدخنين على انكم تبطلوها ,,والله المستعان

موناليزا يقول...

صوت من مصر
وليه للاسف احنا لسه فيها خليه يبقى معاك ومع مدونتك نصرة للاسلام
*********************************
نوسة
ربنا يسمع منك
نورتينى ياقمر
**********************************
بنوتة مصرية
المشكلة انهم بجد عارفين بس عاملين مش واخدين بالهم
نورتى مدونتى واشكرك على التعليق وارجو دوام التواصل يارودى
**********************************
صيدلانية طالعة نازلة
واهو ده قمة التناقض اللى انا بتكلم فيه
وعقبال ولادك كمان لما يبقوا ذى باباهم مبيشربوش سجاير
نورتينى وارجو دوام التواصل
******************************
اجندا حمرا
اختى العزيزة اسعدتينى بمشاركتك وانا كمان ارجو ان يؤتى ثماره
لكى منى جزيل الشكر
**********************************
walaa
ربنا يسمع منك ياولاء
اللهم استخدم شباب المسلمين لنصرة دينك
*********************************
مجداوية
عزيزتى انها فعلا فكرة بناءة ولكن طبعا محدش هيقدر يجربها لان محدش هيرضى يحرق فلوسه قدامه كده وده بقى التناقض اللى اتكلمت عنه
اشكرك للتواصل

Unknown يقول...

اللهم اهدي عصاة المسلمين
شيء غريب فعلا ان انسان يقعد يتناول ماده بشراهه ونهم مع انه عارف انه هتقضي عليه وتسبب له الامراض فعلا زي ماحضرتك قولتي زيه زي السم
وبعدين تخيلي من خطورتها وتدميرها للصحه الشركات نفسها اجبرت من قبل منظمة الصحه العالميه علي وضع هذه العبارات ولما منفعش حطوا صور
مش عارف يعملوا ايه اكتر من كده
علي العموم مقاله رائعه
وجزاكم الله كل خير

shaimaa samir يقول...

موضوعك راااائع وحقا من اجمل الموضوعات التى قراتها تناقش قضية التدخين بطريقة جديدة وسهلةتحياتى لك حبيبتى

جمعاوى يقول...

يا فندم كلام حضرتك موضوعى جدا

و لكن

من يفقه ؟

Hosam Yahia حسام يحيى يقول...

مدونه جميله ماشاء الله

ان شاء الله اكرر الزياره تانى

أحساس لسه حى ...أنا مش موافق يقول...

عزيزتى
شوفى المدخن مش بيبصلها بالشكل ده

من جهه المال بيقول كانه قعد فى كافيه

من جهه الدين بيقول ان مش كل شئ بيعمله حلال يعنى وهى مش من الكبائر يعنى

ومن جهه الصحه بيشوف صحته احسن من كتير مش مدخنين وبيشوف مدخنين بقالهم 20سنه وصحتهم زى الفل

وده وجهه نظر غلط طبعا

لان المال اللى بيتصرف فى غير محله مهما كان قلته او كثرته فربنا هيحاسبنا عليه


والدين بقه لما بيحرم شئ واحنا بنعملها ربنا بيغفرلنا بس الذنب اللى بنعمله كل يوم ومش بنبطله كل يوم سجاير لازم نحط فى دماغنا ان الذنب بيكبر كل ما بنكبر ويمر وقت

اما الصحه فايد انتا من غير سجاير هتكون احسن بكتير مهما كان حالك دلوقتى من غيرها احسن

وكمان انتا بتضر صحتك وصحة كل اللى حوليك يعنى اذنب مضاعف

ربنا يعفى عن الجميع ويبعدهم عن الحاجات اللى بلانا بيها الغرب

تحياتى

سلام

سارة علي يقول...

عارفة التدخين فى الاصل دليل على ضعف التقدير الذاتى للشخص بمعنى انوا مش واثق فى نفسة داخليا ودة اكيد لية جذور واسباب من الماضى زية زى ان فى ناس بتشترى حاجات ملهاش لازمة بكميات كبيرة زية زى الاكل بدون داعى وبكميات كبيرة الانسان بيفكر انوا كدة بيرضى الجزء الناقص فى شخصيتة او انوا بيحاول يحب نفسة اكتر تعويض للى فقدة فى الماضى بس لو الشخص دة راجع نفسة وحاول يتواصل مع نفسيتة هيبطل كل التصرفات السلبية دى بجد مدونتك جميلة اوى وانا اتشرفت بزيارتها جدا فى انتظار جديدك وربنا معاكى

موناليزا يقول...

الفاتح الجعفرى
وكأنهم اخى الفاضل لايرون مانرى!!
دمت طيبا ولمدونتى زائرا
ارجو دوام التواصل
********************************
shimaa samir
اختى الحبيبة اسعدنى تعليقك والحمد لله ان الاسلوب بسيط
نورتى مدونتى وارجو دوام التواصل
**********************************
جمعاوى روش طحن
معك حق أخى الفاضل من يفقه؟
دمت طيبا ولمدونتى زائرا
***********************************
حسام يحيى
اشكرك على تعليقك
اسعدنى مرورك ويسعدنى تكرار الزيارة
دمت طيبا ولمدونتى زائرا
*******************************
انا مش موافق
جزاكم الله خيرا وانا معاك فى كل كلمة قلتها وياريت الكل يبصلها كده
دمت طيبا ولمدونتى زائرا
**********************************
سارة على
اختى الحبيبة:اشكرك على تعليقك الذى يوضح مدى رجاحة عقلك ونضجه حماكى الله ياحبيبتى
نورتى مدونتى وتسعدنى زيارتك دائما

مشتاق لله يقول...

كان لي صديق مدخن رئيته مرة ممسكا يالسيجار ويدخن وقد اتاه الله حسنا وجمالا , قلت له لقد شوهت خلق الله , قال كيف ؟ قلت له لقد احسن الله صورتك فاردت ان تغير خلق الله -اتقي الله فانما انت زهرة تحترق -شكرا

موناليزا يقول...

مشتاق لله
ما اجمل تشبيهك لصديقك بالزهرة بس ياترى بعدها بطل يشرب ؟
نورت مدونتى واشكرك على تعليقك

عاشــــــ النقاب ـقــــة"نونو" يقول...

ربنا يعافينا ويعافي شباب المسلمين
عارفة مرة زوجي بيقول لمدخن انها حرام ومضة على صحتك عارفة الرد كان ايه قله ما المخلل مضر يبقى حرام
قاله طب ان بتسمي اول ما تبدا تشربها
قاله هي ممكروهة
عارفة ناس كدة ببتحسي انهم في منتهى الغرابة ربنا يهدي بوركقلمك حبيبتي في الله
اعتذر عن تاخري في الزيارة بسبب النت

belal يقول...

معاكيش كبريت بأه











نولع فيهم
..
بخصوس تصميم العلبة دا قانون
يعني مش بمزاجهم
..

AbdElRaHmaN Ayyash يقول...

:)
كلام جميل
تحياتي

موناليزا يقول...

اختى الحبية:اشكرك لمشاركتك
وفكرتينى باغرب تعليق جالى فى موضوع التدخين واحد لقيته بيقوللى مش عشان عمرو خالد قال كده يبقى هسمع كلامه وبدون تعليق.

موناليزا يقول...

other-things
عايز تولع فى مين بالظبط؟ فى السجاير ولا اللى بيشربوا ولا اللى بيصمموا العلبة؟هههههه
بس تعرف حتى لو القانون هو اللى اجبرهم على تصميم العلبة بالطريقة دى مش من اصحاب المصانع ولا حاجة ده فى حد ذاته بيقول ان فيه حد خايف على شبابنا واهو يعتبر اضعف الايمان
*********************************
abdelrahman ayyash
يارب يجيب نتيجة
اشكرك على تعليقك

Dr. Ibrahim يقول...

هذا التناقض هو ما يدعو الى العجب

ولكنه أصبح عبد والعياذ بالله لسيجارة لا تساوى تعريفة ...

موناليزا يقول...

د/إبراهيم
ـــــــــــــ
اهلا بيك يادكتور
صح جدا
اشكرك جدا لتواجدك