الاثنين، 25 أغسطس 2008

تيجوا نفرح

زى اليومين دول من كام سنة كنا بنجهز لفرح أخويا الكبير.وكنت وقتها مبسوطة جداَ وكأنه فرحى أنا.
مش عارفة هل ده لأن اللى هيتجوز بمثابة توأم روحى وصديق حياتى ورفيق طفولتى وليس أخى فقط.أم لأنى فى الوقت ده كنت متصالحة أوى مع نفسى. مش قادرة أحدد بس اللى واثقة فيه كويس أوى انى كنت مبسوطة جدااااا.
وكل حاجة حصلت وقتها كنت حباها جدا.يعنى مثلا شقته كانت بتتبنى من أول وجديد ولكم أن تتخيلوا الإستيقاظ باكرا على صوت العمال .-رغم انى مش بحب الإستيقاظ بالطريقة دى خالص-.
فاكرة يوم ماغرفتى إدهنت واضطريت آخد مخدتى ومرتبتى والكوفرتة و أنام فى الصالون لأن الدهان كان لسه مانشفش وقد إيه كان يوم جميل وكأنها مغامرة.-رغم أنى مش بحب أنام غير فى سريرى-
وفاكرة يوم ماكتبت أسماء المدعوين على كروت الفرح يومها فضلت صاحية للفجر.-رغم أنى كان لازم أنام بدرى لأن كان ورايا الصبح حاجات كتير-.
وفاكرة يوم ما نام فى غرفتى عدد سبعة أشخاص وأنا منهم طبعا.-رغم أن كانت من ضمنهم سيدة مسنة وترفض تشغيل حتى المروحة-.
وفاكرة يوم ما روحنا نختار الفرش ويوم ماوصل الشقة. وقبل ده كله طبعا يوم مالشقة بقت جاهزة وصالحة للإستخدام الآدمى.
فاكرة كمان زيارة الأقارب والمهنئين من النساء واستقبالى لهم وكأنى العروسة.
وفاكرة يوم الفرح وقد إيه كنت واقفة مع العروسة وكأنها أختى وليست عروسة أخى.
وقد ايه كنت فرحانة بكل المدعوين وسلمت عليهم واحدة واحدة.
ياااااه بجد كانت أيام جميلة.
ربنا يجعل أيامنا كلها فرح وسعادة.
بعرض عليكم الأحداث دى لأن ده يعتبر آخر حدث حصل لى وكنت فرحانة فيه فرحة كاملة.
وعشان كده عايزة كل واحد يحكيلنا آخرحدث حصله وكنت فرحان فيه أوى وحسيت بالفرحة الكاملة.
ان شالله تكون من عشرين سنة.
المهم تفتكرها وتشاركنا معاك.
وعايزة كمان تتخيل إيه أجمل موقف لو حدث هتشعر فيه بالسعادة الكاملة.
دعوة منى لنتذكر أيامنا الحلوة فنبتسم .
آملين من المولى أن يكون القادم أجمل.




هناك 57 تعليقًا:

ahmed_k يقول...

إزيك يا موناليزا
عايز أقوللك
ألف مبروك بمناسبة زفاف أخوكي
ولو أنها متأخره حبتين ههههههههه
بس أنا والله مكنتش أعرف
ولو كنت عرفت كنت حضرت هههههههههه
المهم بوست جميل ويبعث على السرور
ربنا يديم الفرحه على كل المسلمين
وأتذكر يوم ما خرج والدي من المستشفى
وكان عمل عمليه ناجحه في المخ
كان يوم سعيد جدا بالنسبة لي
من سنه تقريبا الموضوع ده

وفي الختام تقبلي خالص تحياتي

la3lahakhier يقول...

ربنا يفرحك دائما يا حبيبتى
لا تقلقى الفرحة جاية
اهى انا شايفة ...بص هناك اهى

أبو خالد يقول...

أبنتي الفاضلة /أمة الله
أعجبتني فكرتك للغاية فهي خروج عن المألوف فعادة ما نتذكر لحظات الحزن
وتكون لحظات الفرح عابرة
فعلا تذكر لحظات السعادة أجمل يشعرنا
بأشراقة في الروح و يوما ما سألبي دعوتك و أكتب بوست عن لحظة فرح في حياتي
دمتي أبنة غالية

بنت أبيها يقول...

يادانه في البحور
يازهره بين الزهور
أهنيك بقرب رمضان
زينة الشهور

قوس قزح يقول...

انا الحمدلله حسيت بفرحة كبيرة اوى قريب

و ده كان يوم الجمعة اللى فاتت فى يوم البؤجة
فرحت اوى ان اليوم قدرنا فيه نعمل حاجة و كنت فرحانة الحاجات اللى جابها الناس و فرحانة باهتمامهم بانهم يكراروا الزيارة و يسالوا امتى تانى نروح و فرحانة لما شوفت فى عيون المسئولة عن الجمعية اد ايه هى سعيدة بالحاجة
كان يوم حلو اوى


كل سنة وانت فرحانة و سعيدة

مؤمنه يقول...

السلام عليكم ورحمة الله وبركاته

اول تعليق دى اعجاااز مبسوطه اوى انى اول تعليق وعلى موضوع زى دى
يارب افتكر يارب افتكر اه افتكرت
اكتر وقت فرحت فيه فى حياتى بصراحه مش فاكره انى فرحت فرحه كامله قبل كده لا زم تكون ممزوجه بحزن
انا اسفه على المقدمة التى لا تدعو للسعاده مطلقا بس دى حقيقى اكذب يعنى
بس الحمد لله بحس انى بعرف ابسط نفسى واسعد الحظات التى اقضيها هى التى اقضيها مع من احب وهم ابواى واخواتى واهلى وكمبيوترى وطموحاتى اى مع نفسى


والحاجه الى لو حصلت هكون سيده انى احس ان ربنا راضى عناى وموفقنى للى فيه الخير

دومتى بكل خير وكل عام وانتى الى الله اقرب وفى طاعته ادوم
ورمضان كريم عليكى وعلينا
والسلام عليكم ورحمة الله وبركاته

Maha Shahen يقول...

ما شاء الله عليكى
بجد انتى بالكلام الجميل دا اسعدتينا معاكى
رسمتى بسمه علي وشوشنا وفرحه في قلوبنا
بأسلوب كتابتك البسيط اللي بيدخل القلب
هى اوقات فعلا تسعد جدا بالذات لو بنفرح لأنسان قريب مننا وبنحبه قوى وكأننا وقتها بنفرح لنفسنا فعلا برغم المشقه اللي بتقابلنا في الايام دى وشدة الاعصاب والتوتر
ربنا يباركلك في اخوكى وفي قلبك يا رب يا عزيزتى
ويوم فرحك تكونى بنفس السعاده ويكونوا كل اللي حواليكى بسعاده لا توصف طبعا دا اكيد
مش علشان هيخلصوا منك ههههههه لا علشان هتنورى حياتك القادمه
ربنا يسعدك يا رب ويفرح قلبك دايما زي ما انتى دايما بتسعدى قلوبنا
وانا معاكى لو كل انسان يكتب فرحه مرت عليه ملت قلبه واسعدته بجد ولو من سنين يكتبها ويشاركنا بيها
خالص ودى وتقديرى ليكى

ســـــــهــــــــــر يقول...

تصدقىانه سؤال صعب اوى
اصل ذاكرةالالم هى الاقوى
بس هحاول افتكر و ارجع تانى

مبروك لاخوكىو عقبال ما نفرح بيكى

tarek alghnam يقول...

اولا سعيد ان ىاكون اول من يشاركك الفرح
وكمان عاوز اهنئك بمقدم شهررمضان الكريم اعادة الله عليكى بالخير واليمن والبركات وتقبل منك
مااجملها من دعوة
تحياتى لكى ولمدونتك الرائعه
ودمتى بحفظ الله

رندا يقول...

اول تعليق على اول فرحة

مبروك فرحتك باخوكى ربنا يدوم عليكى الفرح والسعادة

ويارب تفرحى اكتر واكتر ونفرح معاكى كلنا يارب

وعقبال زواجك ان شاء الله يلا فرحينا بقى بسرعة

اما عن فرحتى اقولك يامون :-

اول فرحة ليا من 22 سنة مع اول انجابى لطفلى واسمة خالد
كنت اصغر ام اعتقد كدة وانا حامل مكنتش حاسة يعنى اية حاجة اسمها ام
ولا يعنى اية اول فرحة بقدوم ابنى
مذ هذة الفترة مكنش مثل هذة الايام يعرفوا نوع الطفل فالطبيب كان يخيرنى انى اذهب الى مكان اعرف منة نوعة
ورفضت هذة الفكرة قلتلة لا خليها مفاجاة مش عايزة اعرف
وكنت خايفة اوى انة يكون ولد قلت ازاى يعنى هعامل ولد هههههه
واول لما شاهدتة سبحان الله كل شئ اتغير
وكان الامومة تدب كلها فى جسدى وقلبى
وحدث شئ غريب فى قلبى عرفت انة حب الام لابنها
وتانى فرحة قدوم ابنتى مذ 19 سنة
واسمها سارة
كان نفسى اوى اجيب بنوتة اشترى لها كل الفستاتين وقعد احكى معاها كانها
صحبتى ربنا يخليهم ليا يارب ويسعدهم
دول اكتر فرحتين فى حياتى اعتقد مش فرحت بعدهم بكل الفرحة الى كانت فى قلبى

دعوات الكل لى بانى افرح يوم زواجهم دى اكيد هتكون اكتمال للفرحة

دة حلم حياتى انى اكون حما وبعدها جدة حتى لسة بقول لابنتى اولادك هينادونى يانانا قعدت تضحك وتقولى هتكونى اصغر جدة ههههه يارب اشوف اليوم الجميل دة يااااارب
اعتقد انى هكتب مشاعر ليس بعدها مشاعر

دعواتكم لى ولاولادى

رمضان كريم عليكى وعلى الاسرة يامون

كل الحب

رندا

blue-wave يقول...

حلوة فكرة البوست
ولكن عذرا
فهناك ذكريات كانت فرحتها هيا احلى ما مريت به
ثم انقلب الحلم الجميل الى كابوس
لذا فلا داعى لتذكرها
تقبلى تحياتى

موناليزا يقول...

أحمد-ك
ــــــــــــــ
اهلا بيك استاذ احمد
انا الحمدلله بخير واشكرك لسؤالك
الله يبارك فيك وعقبالك كده ان شاء الله
وانا لو كنت وقتها عرفت التدوين اكيد كنت هتكون من المعزومين
حمدالله على سلامة والدك ويارب ماتشوف مكروه فى اى حد قريب منك
مبسوطة جدا انك لبيت دعوتى وشاركتنا فرحتك
ويارب ايامنا كلها تكون سعيدة
دمت طيبا ولمدونتى زائرا
**********************************
لعلها خير
ـــــــــــــــــ
اختى الحبيبة:اهلا اهلا بالقمر وحشتينى جدا وشوفتى وشك حلو ازاى بعد الغيبة تيجى فى بوست متفائل ايوة كده ياحبيبتى ماتحرمش منك ولا من تعليقاتك ابدا
الواحد نظره ضعف ولا ايه هى فين دى بس هههههههه
بس ليه مالبيتيش دعوتى وشاركتينا اى موقف جميل
مستنيين وعايزينه بالتفصيل لوسمحتى
ربنا يسعدك ويفرح قلبك
نورتينى ياجميلة ودمتى بخير
***********************************
ابو خالد
ــــــــــــــــ
اهلا اهلا استاذ ابو خالد
اشكرك لرأيك وكنا نتمنى ان تشاركنا الآن باى موقف بسيط ولكن احتراما لرغبتك نحن جميعا فى انتظار هذا البوست
دمت طيبا ولمدونتى زائرا
**********************************
بنت ابيها
ـــــــــــــــــ
اختى الحبيبة:كل سنة وانتى طيبة ورمضان مبارك علينا جميعا
نورتينى ياجميلة ودمتى بخير
***********************************
قوس قزح
ـــــــــــــــــــ
اختى الحبيبة:يارب دايما متجمعين فى الخير
جعلكى الله عونا لعباده وسباقة بالخير
اشكرك لمشاركتنا هذا الشعور ووالله انها لحافز لناس كتير اوى
وكل سنة وانتى بخير وصحة وسعادة
نورتينى حبيبتى ودمتى بخير
**********************************
مؤمنة
ـــــــــــــــ
وعليكم السلام ورحمة الله وبركاته
وانا مبسوطة جدا بزيارتك وبتعليقك
انتى عارفة انه احلى حاجة بجد انك تقدرى تبسطى نفسك حتى لو مفيش حاجة معينة حصلت
اصلى مؤمنة تماما بان السعادة دى ارادة وقليلا مايمتلكون هذه الارادة
ربنا يرضى عنك وعنى وعننا جميعا يارب
تعرفى وده برضه اكتر وقت بشعر فيه بالسعادة احساسى بان ربنا راضى عنى ياااه بحس ساعتها انى ملكت الدنيا
وكل سنة وانتى طيبة وبخير وصحة وسعادة
ورزقكى الله بالفرحة الكاملة قريبا ان شاء الله
نورتينى حبيبتى ودمتى بخير
********************************
نور شاهين
ـــــــــــــــــــ
اختى الحبيبة:ربنا يسعدك والحمدلله انى قدرت ارسم ابتسامة على وجهك الجميل بجد مبسوطة جدا
ان شاء الله ياحبيبتى وعقبالك انتى كمان
بس افهم من كده انك مش هتشاركينا اى موقف يعنى ولا ايه!!!
مازلنا فى انتظارك ماتتأخريش علينا بقى
يارب ايامك دايما تكون كلها فرحة وسعادة
نورتينى حبيبتى ودمتى بخير
***********************************
سهر
ــــــــــــ
اختى الحبيبة:وانا فى انتظارك
وماتنسيش مش عايزين الالم هو اللى يكون مسيطر على الذاكرة عايزينه ياخد اجازة
الله يبارك فيكى وان شاء الله عقبالك انتى كمان
نورتينى حبيبتى ودمتى بخير
*********************************
طارق الغنام
ــــــــــــــــــــ
اهلا بيك استاذ طارق
وانا سعيدة بمشاركتك وكنا نتمنى ان نشاركك ايضا
كل سنة وانت بخير والى طاعة الله ادوم واشكرك لتهنئتى برمضان ويارب يكون رمضان سعيد علينا جميعا
دمت طيبا ولمدونتى زائرا
***********************************
رندا
ـــــــــــــــ
اختى الحبيبة:الله يبارك فيكى وعقبال ماتفرحى بولادك يارب
ان شاء الله ياحبيبتى ربنا يرزقنى بالزوج الصالح وانا اوافق على طووول
اشكرك جدا لمشاركتنا هذه السعادة وربنا يخليلك خالد وسارة ويخليكى ليهم وتفرحى بيهم يااارب وتكونى حماة(بس كونى طيبة معاهم هههه)وبعدها جدة(وانا واثقة هتكونى أحن جدة)يا اخواتى فى جدة رقيقة كده
ربى يسعدك ويحقق لك كل احلامك
وكل سنة وانتى طيبة وبخير وسعادة
نورتينى حبيبتى ودمتى بخير
***********************************
بلو واف
ــــــــــــــــ
اهلا بيك يادكتور
مش مصدقة ان الشاعر الذى يكتب ارق الكلمات لايتذكر سوى الكابوس
بس ماتنساش اننا متفقين اننا فى الدنيا يعنى ده المتوقع منها دائما ولذلك لو حصل موقف جميل عايزينه يثبت فى الذاكرة قدر المستطاع حتى لو بعد كده حصل حاجات مش فى الحسبان بس يكفينا اننا شعرنا بهذه السعادة حتى ولو لم تستمر
يارب يسعدك واحلامك كلها تتحقق ومايبقاش فيه كوابيس تانى ابدااا
دمت طيبا ولمدونتى زائرا

EMMY BABY يقول...

مبرووووك لاخوكى وعقبالك

فعلا الاخوات لما بيجوزوا بنبقى كاننا بنجهز لفرحنا

بوست جميل

انا فاكرة ايام فرحة كتير ليا نجاحى فى النتايج فرح اختى خطوبة اختى التانية

عودة بابا وماما من السفر

يوم ما رحت القافلة

لا بجد ايام الفرحة كتير

تحياتى

ايمى

طالبه الفردوس يقول...

السلام عليكم

ربنا يسعدك اكتر واكتر ياااااااارب
ويسعد كل المسلمين

بوست جميل
تقبلى مرورى

د/اجدع بنوته يقول...

دام الله سعادتنا جميعا

انا بشوف ان الواحد لو مكنش مستعد للسعاده

مهما تحصل م حواليه حجات تسعد

مش هيحس بيها

لازم احنا نبقى عايزين نفرح

اخر موقف فرحنى اوى طبعا

يوم نتيجتى م تلات ايام الحمدلله

وان كنت كائن يتشمم اى ريحه للسعاده

ممكن افرح م خروجه

م اكله بحبه اكلتها

يعنى المهم احنا نكون حابين نسعد نفسنا

تحياتى ورمضان كريم

mohra يقول...

بوست جميل يا موناليزا
انا.. كانت من 3 شهور تقريبا لما نجحت فى الماجستير
كنت سعيده و فخوره و كل حاجه حلوه

اوعى تفكر يقول...

ربنا يكتر من الافراح
وفكره جديده وحلوه

عايش... ولكن !!!! يقول...

الف مبرووك الاول على فرح اخوكى
طبعا متأخره كتييييييير بس دى اول مره اعرف
يلا تتعوض فى فرحك ان شاء الله

بوستك جمل جدا
انا اخر حاجه كنت فرحان بيها اوى فى فرح اخويا من اسبوع
واكتر حاجه محتاجلها وحاسس انى ممكن الاقى سعادتى فيها انى ارتبط ببنت الحلال اللى تملى عليا حياتى

تحياتى
علاء

رفقة عمر يقول...

اكتر يوم فرحت فيه كان فى اواخر شهر مايو اللى فات كان احلى يوم بالنسبه لى بس هاحتفظ بالموقف لنفسى
كل سنه وانت بالف خير
رمضان كريم

مدونة حكومتى ملاك يقول...

السلام عليكم ,
فى حياة كل منا زكريات لا تنسى سواء أكانت سعيدة أو حزينة لكنها تبقى عزيزة على النفس
شكرا على البوست وفعلا بوست جميل


عمار صبرى

أحمد زاهر يقول...

ألف مبروك زفاف أخاكى.

كان يوم نجاحى فى الفرقة الثانية وكنت فيها للمره التانيه بس دى كانت أول وأخر مره أترقب فيها النتيجة وتفرق معايا وأبقى مستنى على نار ظهورها وخايف أوى لا لا قدر الله أعيد السنه كمان مره( دى كانت أول وأخر مره أبقى فيها بالقلق ده كله ) علشان كده لما ظهرت النتيجة وعرفت أنى نجحت ومن غير مواد كنت حاسس أن ما فيش حد فى الدنيا فرحان قدى. يمكن لأن وقتها كان فى حد بيشاركنى فرحتى

أحمد (زوج مخنوق ). يقول...

السلام عليكم
اول مرة اعلق عندك و لو اني متابعك من فترة
بس البوست فكرته جديدة و جميلة
أكتر مرة حسيت بالفرحة في حياتي
كان من حوالي تسع شهور تقريبا
يوم وقفة عرفات السنة اللى فاتت
أصل عقبالكم جميعا ربنا قدرلي الحج السنة اللى فاتت
و احنا نازلين من عرفات و رايحين مزدلفة
حسيت بفرحة عمري ما حسيتها قبل كده
حسيت ان انا فعلا خفييييييييييييييييف
و عامل زي الريشة
متخيلين ان ذنوب 16 سنة تقريبا من يوم ما وضع عليا القلم اتمسحت
و بدأت صفحة جديدة
بجد احساس ادعي للكل ان ربنا يكتبهاله
تحياتي ليكي

ammola يقول...

عيزانى اقولك على اسعد واقرب لحظة
امبارح بعد صلاة العشا
قعدت على البحر...ع الرملة مباشرة وبينى وبينه مافيش خالص..وعشت بأه احلى واسعد وقت فى عمرى كله..ماكنتش عايزة اقوم ولا الوقت يعدى..منظر السما مع البحر مع صوت الموج أحلى صوت وكلام ممكن تسمعيه ويدخل جوة روحك ويحسسك انك فى لحظة ملكتى الدنيا ومافيش اى حاجة تانية مهمة...فى جمال كده؟؟
ربنا يسعدك زى مابتفكرينا بالسعادة..ويارب نفرح بيكى قريب اوى علشان انا نفس فى الجاتوة والشربات-بس يكون شربات منجة- جدا
:)
كل عام وانتى بكل خير وسعادة

حـــــدوتـــــة يقول...

السلام عليكم

تصدقى موضوع جامد اوى
انا قعدت افكر وافتكر ايه اخر حاجة فرحتنى اوى كدة مفتكرتش
اصل الحياة بقالها فترة كدة مش مظبطانى
بس الحمد لله على كل شىء
وكفاية ان امبارح كان اخر يوم ليا فى الجيش
وده اللى مفرحنى اوى دلوقتى

سلالالالالالالالالالالالالالالالالالالالالالالالالالام

Gannah يقول...

موناليزا
حلوة قوى الفكرة ويارب تكتر أفراحنا
أعتقد انى أخر مرة فرحت بجد كان اول يوم أوصل فيه للمدينة المنورة واشوف الحرم من الطيارة
ويوم ما شفت الكعبة لاول مرة
اما اليوم اللى بتمناه هو لما ربنا ييسر واكون ام لان الجواز فى حد ذاته مش هو المهم عندى الامومة اهم
برغم انى البوست يبدو مفرح بس انا حسيت بحزنك وحاجتك لتذكر الايام الجميلة
كل عام وانت بالف خير
تحياتى

HANY YASSIN يقول...

كل عام وانت بالف خير
الف مبروك لك ولاخوكي
المناسبات دي بيبقا لها طعم خاص
الف مبروك

ضــى القمــر يقول...

كلماتك جميله جدااا يا مونى

لكن بلنسبى لى مش فاكرة اخر مرة فرحت فيها فرحه بجد إمتى .؟

يمكن لأنى من فترة مش بشوف غير الألم من حواليا وبس .. لظروف واحيانا لشكاوى .

ولكن اتمنى ان اجد الفرحه التى انتظرها سريعا

شكرا لكِ ولأروع معانى ..

وسأخرج عن موضوعك قيلا اقول لكِ

لكِ بمدونتى واجب تدوينى

أرجو منكِ ألقاء النظر عليه ..

وتقبلى منى كل الحب والتقدير لشخصكِ يا اختى

تحيتى لك

منى يقول...

ياريت فعلا نفرح ونفرح بعض

يوم فى رمضان من سنتين تلاته
قرايبى اللى فى بلد تانيه لقيتهم كلهم جايين بعد الفطار وبعدين اكتشفت ان ده يوم ميلادى
رغم انى مش بحتفل بيه
لكن فرحت اوى واعتبرت زيارتهم اجمل هديه
وفرحت كمان من مكالمات التهنئه اللى جتنى يومها
حسيت ان حد فاكرنى
ربنا يجعل كل ايامك افراحك يا منى
تحياتى وحبى

TIMMY !! يقول...

ربنا يفرحك إن شاء الله

و إن شاء الله تحصلي أخوكي :) .. و يفرحوا بيكي ..

أما بالنسبة لفرحتي بقى ...

فبالتخرج ..

لسة انتيجة باينو ما يجيش شهر .. و سحبت الورق لسه امبارح ...

الواحد عمال يفتكر أول يوم في الكلية .. و أول يوم في المدارس كلها ...

و كل تعب ال16 سنة من أول ابتدائي لغاية دلوقتي .. علشان آخذ ورقة واحدة تشبت إني مهندس ..

بجد حاجة حلوة جدا النجاح ده ...

شكرا جزيلا ..

تحيتي ..

موناليزا يقول...

ايمى بيبى
ـــــــــــــــــ
اختى الحبيبة:الله يبارك فيكى ياقمر وعقبالك انتى كمان
ربنا يكتر من افراحك يارب ويسعدك دايما
ومبسوطة انك شاركتينا هذه المواقف الجميله
نورتينى ياجميلة ودمتى بخير
********************************
طالبة الفردوس
ـــــــــــــــــــــ
وعليكم السلام ورحمة الله وبركاته
اختى الحبيبة:ربنا يتقبل دعائك ويفرحنا جميعا
وكنا عايزينك تشاركينا اى موقف جميل حصللك ولذلك نحن فى الانتظار
نورتينى حبيبتى ودمتى بخير
***********************************
د/أجدع بنوتة
ـــــــــــــــــــ
اختى الحبيبة:معاكى حق السعادة ارادة داخلية اولا
الف مبروك ياسمسومة ايوة كده رفعتى راسنا وعقبال كل مرة يارب
كل سنة وانتى طيبة
والله اكرم
نورتينى ياجميلة ودمتى بخير
***********************************
مهرة
ـــــــــــــ
اختى الحبيبة:اشكرك جدا لرايك والحمدلله ان نال الاستحسان
ياحبيبتى الف الف مبروك وعقبال الدكتوراه
ربنا يفرحك دايما وكل سنة وانتى طيبة
نورتينى ياجميلة ودمتى بخير
***********************************
اوعى تفكر
ـــــــــــــــــــ
اهلا بيك يافندم
ربنا يسمع منك واشكرك لرايك
وكنا نتمنى ان تشاركنا عمليا
دمت طيبا ولمدونتى زائرا
**********************************
عايش ولكن
ـــــــــــــــــــ
اهلا بيك استاذ علاء
الله يبارك فيك وعقبالك ان شاء الله
والف مبروك لاخوك وان شاء الله تلاقى بنت الحلال قريب اللى تخلى حياتك كلها فرحة وسعادة
اشكرك جدا لرايك ولمشاركتك
دمت طيبا ولمدونتى زائرا
***********************************
رفقة عمر
ـــــــــــــــــــــ
اختى الحبيبة:رغم انك ماقلتيش تفاصيل بس مبسوطة انك فاكرة يوم جميل وكنتى مبسوطة فيه ويارب ايامك الجاية تكون كلها فرحة وسعادة
وكل سنة وانتى طيبة وبخير وبصحة
الله اكرم
نورتينى حبيبتى ودمتى بخير
*********************************
حكومتى ملاك
ـــــــــــــــــــــ
وعليكم السلام ورحمة الله وبركاته
اهلا بيك استاذ عمار
أشكرك لرايك وكنا نريد مشاركة فعلية
دمت طيبا ولمدونتى زائرا
**********************************
ابن الخطاب
ــــــــــــــــــــ
اهلا بيك يافندم
الله يبارك فيك وعقبالك ان شاء الله
معاك حق فرحة النجاح وخصوصا لو كنت فى انتظارها بتفرق جداااا
يارب دايما تكون فى فرح وسعادة ونجاح
اشكرك جدا لمشاركتك
دمت طيبا ولمدونتى زائرا
**********************************
زوج مخنوق
ـــــــــــــــــــ
وعليكم السلام ورحمة الله وبركاته
اهلا بيك يافندم
واشكرك جدا لرايك ولمشاركتك
ربنا يسمع منك ويكتبها لكل مشتاق يارب
وان شاء الله يكون حج مبرور وذنب مغفور
دمت طيبا ولمدونتى زائرا
*********************************
امولة
ــــــــــــــــ
اختى الحبيبة:اهلا اهلا بالقمر وحشتينى ياجميلة وكل سنة وانتى طيبة
ايه المشهد الجميل ده مش كنتى تقولى كنا نروح سوا اصل البحر واحشنى جداااا
دايما رقيقة وحساسة لكل ماهو جميل
ربى يسعدك ويفرح قلبك
ان شاء الله انا وانتى يارب قريب هجيبلك شربات مانجة وانتى تجيبلى ايس كريم شوكلاتة ههههه عادى فرحنا واحنا براحتنا نقدم اللى يعجبناهههه
كل سنة وانتى طيبة وبخير وسعادة
نورتينى حبيبتى ودمتى بخير
***********************************
حدوتة
ـــــــــــــــ
وعليكم السلام ورحمة الله وبركاته
ودى حاجة تتنسى برضه تبقى مخلص جيش ولسة بتفكر
الف مبروك وعقبال ماتلاقى الوظيفة
دمت طيبا ولمدونتى زائرا
**********************************
جنة
ــــــــــــــــ
اختى الحبيبة:اشكرك لرايك وربنا يسمع منك ويفرحنا جميعا
ومعكى حق رؤية الاماكن المقدسة بجد شعور لايوصف
ربنا يرزقك بالزوج الصالح ويرزقك بالذرية الطيبة يارب قريب وساعتها هشوف احن ام وأطيب زوجة
ربنا يسعدك ويحقق لك كل ماتتمنى
دايما يتشوفى اللى جوايا وكأنك من دمى
يعنى معرفش اخبى عليكى حاجة ابدا ههههه
وكل سنة وانتى طيبة وبخير وصحة وسعادة
ويارب رمضان السنة دى يكون سعيد علينا جميعا ويتحقق فيه كل مانحلم
نورتينى حبيبتى ودمتى بخير
***********************************
هانى ياسين
ـــــــــــــــــــ
اهلا بيك استاذ هانى
وانت بخير وصحة وسعادة
الله يبارك فيك وعقبالك ان شاء الله
وعشان كده كنا عايزينك تشاركنا عشان نفرح سوا
مازلنا فى الانتظار
دمت طيبا ولمدونتى زائرا
********************************
ضى القمر
ـــــــــــــــ
اختى الحبيبة:زيارتك هى الاجمل
ده كلام ازاى بس لازم تفتكرى حتى لو من زمان اوى افتكريها وخليها هى على سطح الذاكرة مش فى القاع
ويارب تلاقى الفرحة اللى بتحلمى بيها قريب اوى ويكون رمضان السنة دى خير على الناس كلها
اشكرك ياجميلة على الواجب ولو انى كبرت على الحاجات دى ههههههه بس هروح اشوفه حالا
نورتينى حبيبتى ودمتى بخير
**********************************
منى
ــــــــــــ
اختى الحبيبة:اذيك ياقمر وايه اخبار صحة والدك يارب يكون احسن
فعلا ياقمر شعور جميل لما تلاقى حد بعيد عنك ولكنه فاكرك
ربنا يسعدك ويرزقك دايما باللى يحبوكى
نورتينى حبيبتى ودمتى بخير
**********************************
تيمى
ــــــــــــ
اهلا بيك يافندم
ربنا يتقبل منك وعقبالك انت كمان
الف مبروك وعقبال الوظيفة ياباشمهندس
تعرف ده كان نفس شعورى يوم مااتخرجت جبت شريط الذكريات من اول يوم فى اولى ابتدائى
يارب القادم يكون اجمل وحياتك دايما تكون كلها نجاح وسعادة
دمت طيبا ولمدونتى زائرا

حاجات جوايا يقول...

السلام عليكم
ازيك يا قمر
سبحان الله البوست ده جاى فى وقته تمام
امبارح بس كانت خطوبة اختى وكنت فارحانالها جدا .. برغم كل تعب اليوم وارهاقه والايام اللى فاتت واللى كنا بنسابق الزمن فيها عشان نكمل الناقص .. بس بجد لما شوفتها عروسة كنت حاسة انها بنتى مش اختى وكنت فرحانة واحنا ماشيين وراها بنزفها بالعربية وبقول لنفسى ايه ده ؟؟ دى اختى الصغيره العروسة دى ؟؟
ربنا يكرمها يارب ويكتبلها السعاده والهنا

ويرزقك بكل الخير يا قمر ويملا حياتك نور وهنا وسعادة

خالص حبى

سالى

الربان يقول...

تحياتي

ربنا يسعد كل أيامك أنت و الجميع ..
و دائما الذكريات السعيدة تنعش القلب
و تدغدغ المشاعر....

ياريت كلنا ان ضاقت بنا الدنيا نتذكر
ذكرياتنا الجميلة...و نتيقن ان جمال الدنيا انها لا تدوم علي حال...و الا لشعرنا بالملل .

تحياتي و تقديري

Sourah يقول...

صباح الورد يا موناليزا ..
بحييكي على الموضوع ده ، بجد جديد جدا، بقالي على المدونات فترة، بس كل المواضيع حاجة تزود الضغط ، لغاية اما قريت موضوعك اللي عامل زي النسمةالباردة في عز الحر ..
قبل كل شئ الف مبروك لاخوكي ، و عقبالك ، و يارب يعطيله الذرية الصالحة ، و تبقى عمتو في اقصر وقت ممكن، لأن بجد اللي تحب اخوها كده ، ماتتصوريش فرحتك بخلفه هتبقى اد ايه ..

و بالنسبة يا ستي عن اخر فرحة حسيت بيها، كانت بالظبط من حوالي 3 سنين ، لما روحت اكشف عند الدكتورة ، و فوجئت اني حامل ، مع العلم اني مش بحمل الا بمنشطات ، يعني لو ما اخدتش المنشطات مفيش حمل ، فكان الموضوع مفاجئ ليا جدا ، ساعتها قومت من على سرير الكشف بوست الدكتورة ، و على طول كلمت ماما و حماتي فرحتهم ، و لا جوزي كان اياميها مسافر دبي ، ماصدقش طبعا ، و لما وصل روحنا كشفنا تاني عشان نتأكد ، اصله كان فاكر ان جهاز السونارهو اللي عليه البيبي ..
فرحت اوي بالرغم اني كان معايا طفل ، يعني مش اول فرحتي ، بس حسيت كده زي الافلام ، الدكتور يقول للراجل :
الف مبروك ،المدام حامل يا فندم ..
حسيت ان مفيش حاجه بعيد على ربنا ، و انه قريب بصير سميع الدعاء ..

و اخر الكلام سلاااام ..!!

عاشــــــ النقاب ـقــــة"نونو" يقول...

السلام عليكم
والله فكرة حلوة اوي
هقولك فرحت من قلبي فرحتين خلوني دموعي تنزل وانا فرحانة اوي
اولهم يوم عيد الام لقيت يوسف راسم قلب بالقلم الرصاص وجي يقولي انتي الحنان يا امي
يا خبر ابيض مع انه كان بيقلد اسبيس تون الا اني طولت السما بايديا لدرجة ان زوجي وانا باحكيله برضه دمعت اوي وفضل يقولي امسكي نفسك شوية
والفرحة التانية قريبة اوي من حوالي شهر لما يوسف ختم سورة البقرة بفضل الله تعالى
ادعولي بقى يكمل حفظ القران واللي ساعتها مش عارفة بقى ممكن قلبي ينط يفط من الفرحة يااارب هو واولادي وكل المسلمين يارب
كل عام وانتي بخير
تحياتي

غير معرف يقول...

عسل ياموناليزا وانت بتحكي حسيت
انه فرح محمداخويا لانه ده كان احساسي
وكان عندي امتحانات الليسانس ولا كان في دماغي حاجه ساعتها الا الفرح
ربنا يديم افراح ياجميله

مؤمنه يقول...

السلام عليكم ورحمة الله وبركاته
ربنا يتقبل منك
وانتى طيبه يا حبيبتى ورمضان كريم عليكى وعلينا

عجبنى اوى اقتراحك بشأن الدعوات ياريت نكمله مع ع بعض وننشره فى بوست سوا قبل رمضان
دومتى باطيب حال
والسلام عليكم ورحمة الله وبركاته

rommantic يقول...

بدايه سلامى
على فكره طريق كتابتك بتعجبنى
والمواضيع عامه
وياريت نفرح دايما
وفكره البوست لذيذه

snohe يقول...

صديقتى
فكرة البوست جميله

وعندما نفتش فى الذاكرة قد نجد ما يفرحنا

وقد نجد ما يحزننا

واحيانا نفس الذكرى قد تسعدنا حينا وتشقينا احيانا كثيرة


تحياتى

امل يقول...

السلام عليكم
فيه لحظات كتير حسيت فيها اني فرحانه قوي منهم مرة وانا في الجامعة كنت مشتركة في مسابقة على النت وفزت بالمركز الاول مشاركة مع واحد كندي يومها حسيت اني طايرة من الفرحة وطبعا لما زرت الحرم حسيت اني متشبعة سعادة تماما وفضلت بعد ما رجعت احلم فترة طويلة اني هناك تاني بس خايفة محسش بنفس الاحاسيس اللي حسيت بيها أول مرة بسبب ذنوبي ربنا يغفر لنا
تحياتي وكل سنة وانتي بالف خير

KHALED يقول...

صدقينى مش فاكر إمتى كانت أخر مرة فرحت فيها بجد يمكن لإن الحياة بقت مليانة مشقة ومسؤليات وإحساس بالقهر فى بلد مليان خير موش لصحابة ..
عموما ربنا يجيب لنا الفرح ونفرح
ملحوظة ...
انا موافق جنة فى إللى قالتة ...
تحياتى

Mona Shereif يقول...

جميل يا موناليزا
اخر فرحة فرحتها لما ظهرت النتيجة بتاعتى
وكمان ساعة كتب كتابى.. بس كنت خايفه برضه مش عارفه ليه
الله يفرح قلبك دايما يا قمر
بجد لحظات حلوة ويارب نفرح دايما

جنّي يقول...

السلام عليكم

ربنا يجعل ايامك كلها افراح وسعادة وعقبالك ان شاء الله ..

الفكرة ممتازة وسنحاول تطبيقها ان شاء الله ..

شكرا

غير معرف يقول...

موناليزا

ادام الله افراحك واطال ابتسامك واسعدك فى دنياك وعقبال ما تكتبيلنا عن فرحتك بيكى يارب

انا آحر مرة فرحت فيها بجد كان قبل ما أتولد

هههههههههه

مش عاوز انكدك

بس يارب يديم افراحنا

تحياتى

مدحت محمد يقول...

اسعد يوم فى حياتى كانت زى الايام دى كدة


بس كان وقتها شهر 8 ومعاه شهر رجب مش شهر شعبان


المهم كنت عند سيدنا النبى وشفت الكعبة

بس دى اسعد ايام فى حياتى

مؤمنه يقول...

السلام عليكم ورحمة الله وبركاته
موناليزا
انا عرضت موضوع الادعيه على رفقه عمر وممكن
وانا موافقه فاناء الله كل واحد مننا يقول الادعيه الى عنده وننشرها فى بوست واحد فى مدونة حد فينا
استعدى
عايزين نجمع الادعيه قبل ما رمضان يبدأ
دومتى بخير
والسلام عليكم ورحمة الله وبركاته

موناليزا يقول...

حاجات جوايا
ــــــــــــــــــــ
وعليكم السلام ورحمة الله وبركاته
اختى الحبيبة:انا الحمد لله بخير اذيك انتى ياجميلة وكل سنة وانتى طيبة
الف مبروك لاختك وعقبال الزفاف وربنا يسعدها ويتمم لها بخير يارب
ربنا يكرمك ويسعدك يارب كما اسعدتينا وشاركتينا فرحتك
نورتينى حبيبتى ودمتى بخير
***********************************
الربان
ـــــــــــــــ
اهلا بيك يافندم
ربنا يكرمك ويتقبل دعائك
وهذه دعوتى فى هذا البوست ولذلك كنا نتمى ان تشاركنا بأى موقف سعيد حتى نسعد جميعا بمشاركتنا افراح بعض
ولذلك نحن فى الانتظار
دمت طيبا ولمدونتى زائرا
**********************************
صورة
ــــــــــــــــ
اختى الحبيبة:صباح الفل عليكى ياقمر واهلا بيكى فى زيارتك الاولى
اشكرك لرايك والحمدلله الذى هدانى لهذا
ربنا يكرمك وانا الحمدلله بقيت عمتو ولو ممكن تقرأى تدوينتى القديمة"بسمة أمل"وبتكلم فيها عن حبى لابن اخويا
ربنا يخليهوملك ويباركلك فيهم وتفرحى بيهم يارب
وماتتخيليش بجد فرحتينى ازاى لانك قولتى على موقف بيدل على قدرة الخالق
ياااه قد ايه ربنا كريم
ربنا يسعدك ويفرح قلبك دايما
نورتى مدونتى وارجو دوام التواصل
**********************************
عاشقة النقاب
ـــــــــــــــــــ
وعليكم السلام ورحمة الله وبركاته
اختى الحبيبة:اشكرك لرايك
وماشاء الله لاقوة الا بالله ربنا يحميه ويبارك فيه وتشوفيه ختم القران قريبا
وما اجمل ان تحصدى ثمار مازرعتى
ربنا يباركلك فى بيتك وفى حياتك وفى ابنائك وتشوفى ولادك احسن الناس
كل سنة وانتى طيبة ويارب يكون رمضان سعيد علينا جميعا
نورتينى حبيبتى ودمتى بخير
*********************************
ميادة
ـــــــــــــــــ
اختى الحبيبة:ربنا يسعدك وعقبالك يارب قريب
وماتتخيليش انا فرحانة بزيارتك دى قد ايه لانى مش عارفة ادخل عندك خالص الجهاز عندى فيه فيروس ومابيدخلش على اى صفحة تقيلة وكل ماادخل عندك انتى و آبى الصفحة تقفل لوحدها فياريت تعذرينى
وكل سنة وانتى طيبة ويارب يكون رمضان سعيد علينا جميعا
نورتينى حبيبتى ودمتى بخير
***********************************
مؤمنة
ــــــــــــــــ
وعليكم السلام ورحمة الله وبركاته
اختى الحبيبة:انا ارحب بفكرة البوست جدا
ربنا يتقبل منا ومنكم صالح الاعمال
نورتينى حبيبتى ودمتى بخير
*********************************
رومانتيك
ــــــــــــــــــــ
اهلا بيك يافندم
ربنا يكرمك واشكرك جدا لذوقك
وكنا نريد مشاركة فعلية لنفرح سويا
ولذلك نحن فى انتظاركم
دمت طيبا ولمدونتى زائرا
***********************************
سنوهى
ـــــــــــــــــ
اهلا بيك يافندم
ومتفقة معاك جدا
ولذلك نريد مشاركة فعلية حتى نرسم الابتسامة على وجوه الجميع
دمت طيبا ولمدونتى زائرا
********************************
أمل
ــــــــــــــــ
وعليكم السلام ورحمة الله وبركاته
اختى الحبيبة:ايوة كده رفعتى راسنا قدام الاجانب بجد فرحتينى
ويارب يكتبلنا زيارة الكعبة مرات ومرات ويغفر لنا جميع ذنوبنا
وكل سنة وانتى طيبة وبخير وسعادة ويارب رمضان السنة دى يكون سعيد علينا جميعا
نورتينى حبيبتى ودمتى بخير
***********************************
خالد
ـــــــــــــــ
اهلا بيك استاذ خالد
وحمدالله ع السلامة ايه الغيبة دى كلها يارب يكون خير
معلش بقى الاجابة دى ماتنفعش لازم تجيب اى موقف
اعصر الذاكرة كويس ان شالله تقول حاجة حصلت وانت فى اولى ابتدائى
المهم تفتكرها وتفرح وتفرحنا معاك
ملحوظة:يعنى اروح منكم فين..
دمت طيبا ولمدونتى زائرا
**********************************
ساعات ساعات
ـــــــــــــــــــــ
اختى الحبيبة:الف مبروك على النجاح وربنا يتمم بخير وعقبال الزفاف
ربنا يسعدك ويوفقك فى حياتك دايما
بجد اشكرك جدا لمشاركتنا افراحك
نورتينى حبيبتى ودمتى بخير
*********************************
جنى
ـــــــــــــــــ
وعليكم السلام ورحمة الله وبركاته
اهلا بيك استاذ سيد
ربنا يكرمك ويتقبل دعائك
ونحن فى الانتظار اخى الكريم
دمت طيبا ولمدونتى زائرا
**********************************
المحارب المتيم
ــــــــــــــــــــ
اهلا بيك يافندم
ربنا يكرمك ويتقبل دعائك
هو الموقف جميل وخصوصا مكنتش شايل هم حاجة بس ماشاء الله لسه فاكر اللى حصل قبل ماتتولد هههههه
الهدف من البوست ده اننا ناخد اجازة من النكد بتذكرنا اى موقف جميل
ولذلك ايها المحارب نرجو ان تحارب ذاكرتك وتأخذ منها اى موقف مفرح عشان تاخد ثواب فينا حينما ترسم البسمة على وجوهنا
دمت طيبا ولمدونتى زائرا
**********************************
مدحت محمد
ـــــــــــــــ
اهلا بيك استاذ مدحت
ربنا يكتبهالك مرات ومرات وتسعد دائما بزيارة شفيعنا سيدنا محمد صلى الله عليه وسلم
وساعتها ماتنساش تدعيلنا
دمت طيبا ولمدونتى زائرا
***********************************
مؤمنة
ـــــــــــ
وعليكم السلام ورحمة الله وبركاته
اختى الحبيبة:ربنا يكرمك على طرح الفكرة للجميع
واذا كان عليا فانا الحمدلله ادعيتى جاهزة شوفى هتحبى تنشريها فين وانا تحت امرك
فى امان الله

سبهللة يقول...

الايام فيها الحلو والوحش
والحمد لله انا ايامى فيها كتير حلو
يعنى مثلا يوم زفافى كان يوم حلو
يوم ولادة اياد كان يوم حلو
يوم ما عملت عمرة كان يوكم حلو
يوم ولادة اسراء بنتى
يوم زفاف اخويا مع انى ما حضرتوشلانى كنت خارج مصر الا انى كنت هاتطير من الفرحة
يوم ما اياد يحفظ سورة قصيرة من القران بيبقى يوم حلو اوى
الحمد لله ايامى الحلوة كتير لاتحصى
والقادم اجمل بإذن الله
====
كل سنة وانتى طيبة رمضان عالباب
ربنا يتقبل منا صالح الاعمال

جنّي يقول...

السلام عليكم ورحمة الله وبركاته

كل عام وأنتم بخير
كل عام وأنتم صائمون
كل عام وأنتم مصلون
كل عام وأنتم قائمون
كل عام وأنتم قانتون
كل عام وأنتم متصدقون
كل عام وأنتم مغفور لكم
كل عام وأنتم معتمرون
كل عام وأنتم قائمون ليلة القدر
كل عام وأمتكم الإسلامية منتصرة

اللهم بلغنا رمضان وأهلّه علينا بالسلامة والإسلام واليمن والبركات والنصر والتمكين

أخوكم
سعيد

Unknown يقول...

السلام عليكم

ازيك موناليزا
عقبالك يارب وتكوني اجمل عروسه في الدنيا
وتلاقي الكل بيخدمك ويتعبلك من قلبهم زي مانتي تعبتي لاخوكي

وبالنسبه للموقف اللي هيفرحني
اعتقد انه اصبح مستحيل حدوثه
لكن في حجات تانيه كتير بتفرحني زي النجاح والتقدير وحب الناس


دمتي موفقة

Amgad يقول...

ممممممممممم
زكريات جميلة اوي
عقبالك يا ستي
اخر حاجه حصلتلي واستمتعت بيها
بشكل كامل
لما قريت البوست ده وشفت استمتاعك بيه
واسعة شوية مش كده
ههههههههههههههههه
خالص تحياتي

منال (محبة عائشة رضي الله عنها وأمهات المؤمنين) يقول...

ما شاء الله بجد إنتي هايلة يا موناليزا ...ربنا يكرمك و يزيد من علمك و يرفع قدرك نحسبك علي خير ...عقبال فرحك إن شاء الله أنتي خلتيني أحس إن شايفة المواقف دي قدامي و بفرحتك الكبيرة يارب نفرح بيكي و بيا و بكل بنات و شباب المسلمين آمين ..أنا أول مرة أدخل مدونتك و حبيتها و إن شاء الله بعد رمضان أتشرف بزيارتها مرات عديدة ...
أكثر موقف فرحني بجد من زمان لما كنت مقدمة في معهد إعداد الدعاة في إسكندرية و رحت أول يوم دراسة و لقيت نفسي مقبولة فرحت بجد ربنا يعلم فرحة كبيييييييييييييييرة ...و فضلت أبكي و أنا مش مصدقة الحمد لله باب خير فتحه الله لي و يارب ينفعني بيه...
تشرفت بمعرفتك

نور الدين (محمد الجيزاوى) يقول...

طبعا انا مبسوط عشان حاجات كتير
اولا عشان جواز اخوكى معه انه زمانه قرب يخلف دلوقتى ربنا يكرمه
وعشان غرفتك اتجددت واخيرا غيرتى اللون القديم اللى كان خنقك
وبردو مبروك
وكمان عشان المحتلين سابولك غرفتك تانى
.......
فعلا تذكر الفرح تجلب الفرح
دعوة مقبولة وانا شخصيا قريبا ساسرد كثيرا من المواقف التى اسعدت قلبى
تحياتى لك متواصلات
نور الدين محمود

amnesia يقول...

السلام عليكم ورحمة الله وبركاته
موناليزا انا جهزت الادعيه الى عندى شوفى انتى الطريقه الى نتقابل بيها
بس بسرعه عشان ننزلها قبل رمضان
ودومتى بخير
والسلام عليكم ورحمة الله وبركاته

مجداوية يقول...

السلام عليكم
كل عام وأنت بألف خير
اللهم اجعلنا من العتقاء يا رب العالمين

آمين

موناليزا يقول...

سبهللة
ـــــــــــــــــ
اختى الحبيبة:ربنا يجعل ايامك كلها فرح وسعادة ويجعلك من عباده الشاكرين
اشكرك جدا لمشاركتنا هذه المواقف الجميلة ويارب دايما تكونى مبسوطة
وكل سنة وانتى طيبة ياحبيبتى ويارب يكون رمضان سعيد علينا جميعا
نورتينى يا ام إياد ودمتى بخير
***********************************
جنى
ـــــــــــــ
وعليكم السلام ورحمة الله وبركاته
اهلا بيك استاذ سيد
وكل عام وأنت الى الله أقرب وإلى طاعته أدوم
وتقبل الله منا ومنكم صالح الاعمال
أشكرك على تهنئتك الرقيقة
دمت طيبا ولمدونتى زائرا
*********************************
برقش
ــــــــــــــ
وعليكم السلام ورحمة الله وبركاته
اهلا بيك يافندم
انا الحمد لله بخير اشكرك لسؤالك
ربنا يكرمك ويتقبل دعائك وعقبالك انت كمان
هو فيه اجمل من الحاجات دى يارب دايما فى نجاح وكل اللى حواليك يحبوك
ادعى انت بس وان شاء الله ربنا يحقق لك كل اللى بتتمناه
اقوللك على حاجة لو اللى نفسك فيه ده ماحصلش اعرف انه كان شر وربنا بعدك عنه
ربنا يعملك اللى فيه الخير
وكل سنة وانت طيب
دمت طيبا ولمدونتى زائرا
*********************************
أمجد
ــــــــــــــــ
اهلا بيك استاذ امجد
تعرف لو ماكنتش قلت عليها واسعة كنت صدقتك هههههههه
بس ده معناه اننا مازلنا فى انتظار اى موقف جميل
دور انت بس وان شاء الله هتلاقى
دمت طيبا ولمدونتى زائرا
**********************************
منال مصطفى
ــــــــــــــــــ
اختى الحبيبة:اهلا بيكى فى زيارتك الاولى
ربنا يكرمك واخجلتم تواضعنا حقا فماتوفيقى الا بالله
ربنا يتقبل دعائك قريبا ان شاء الله
الف مبروك على التحاقك بهذا المعهد
وانتى نورتينى وتسعدنى زيارتك دائما
وكل سنة وانتى طيبة
********************************
نور الدين
ــــــــــــــــــ
اهلا بيك استاذ نور
ربنا يكرمك وعقبالك والحمدلله ربنا كرمه ولو فاضى ممكن تقرا تدوينتى القديمة"بسمة امل"وبتكلم فيها عن ابن اخويا
تعرف انا بجد عايزة غرفتى تدهن تانى اليومين دول
والاحتلال رغم انه كان متعب بس والله كان ممتع جدا
ربنا يفرحك يارب
وفى انتظار ماسيبدع به قلمك
دمت طيبا ولمدونتى زائرا
*********************************
أمنيسيا
ـــــــــــــ
وعليكم السلام ورحمة الله وبركاته
اختى الحبيبة:ياريت ماتنسينيش من ضمن دعائك وانا شرحت الفكرة فى البوست الجديد وهى ان كل واحد مع ربنا يدعى بكل حاجة هو عايزها واللى حواليه برضه عايزينها
ربنا يكرمك ويتقبل منك
وكل سنة وانتى طيبة
نورتينى حبيبتى ودمتى بخير
*********************************
مجداوية
ــــــــــــــ
وعليكم السلام ورحمة الله وبركاته
اختى الحبيبة:كل سنة وانتى الى الله اقرب والى طاعته ادوم
ويارب يكون رمضان سعيد علينا جميعا
اشكرك على تهنئتك الرقيقة
أدامك الله لى اختا حنونا

"أم أدهم المصرية" يقول...

السلام عليكم ورحمه الله وبركاته
.............
يارب دايما نكون مبسوطين وفرحانين
وعقبال فرحك ياسكره

انا عن نفسى من يوم مالتزمت وانا مبسوطه الحمد لله جدا

الله المستعان

موناليزا يقول...

لؤلؤة الرحمن
ـــــــــــــــــ
وعليكم السلام ورحمة الله وبركاته
اختى الحبيبة: ربنا يكرمك ويتقبل دعائك
ربنا يثبتك ويعينك على طاعة الله
نورتينى حبيبتى ودمتى بخير