الخميس، 9 أكتوبر 2008

طبيب أطفال

سأقص لكم ماحدث حينما مرض ابن أخى الصغير وذهبت به إلى الطبيب لتشاركونى رأيى وهل ما سأقصه طبيعى الحدوث أم أنى أهول الموقف.
1- قمت بالحجز وذهبنا قبل الميعاد ومع ذلك لم ندخل إلا بعدها بأكثر من ساعتين.
وسؤالى هنا بما إن مفيش إحترام للمواعيد عامل الكشف بالحجز مسبقا ليه؟؟؟ -وكأن المرض هيستأذن قبل ماييجى-.
2-العيادة ممتلئة جداً ولا يوجد بها مروحة فلكم أن تتخيلوا الحر والنفس فى المكان بالإضافة إلى أن أغلبية الأطفال من شدة آلامهم وطول إنتظارهم ناموا يعنى طبيعى جسمهم سخن أكثر.
المفاجأة بقى حين دخولى أخيراً لغرفة الطبيب أجد فيها تكييف ومروحة مُسلطين على الطبيب وهو أصلاً بيكشف على الأطفال أمامه فيوجد منضدة من الجلد يستخدمها للكشف.
يعنى البرودة مسلطة على الأطفال المرضى.-يعنى اللى بيشاور نفسه للمرض هيمرض إجبارى-.
3- يدخل مريض على مريض آخر.يعنى الممرضة قالتلى:أدخلى وأجلسى فى جانب الغرفة.
دخلت وجدت أم وابنها. أنا توقعت أنها انتهت وأنه يادوب بيكتب الروشتة. وجدته لسه بيبدأ معاها.
وما حدث معها حدث معى دخل علينا أسرة بابنها المريض!!
أين خصوصية المريض!!! حتى لوكان طفلا .
4- نيجى بقى على الحوار الظريف بينى وبين الطبيب.
- خير يادكتور
- نزلة معوية حادة
- ودى إيه سببها؟
- يعنى أنا اللى جيبتهاله!
-مش قصدى بس هو أصلاً مابياكلش!
-يعنى آجى أأكله أنا !!
- طيب ممكن تكتبله فاتح للشهية؟
-مفيش حاجة اسمها كده لما الجوع يقرصه هيبقى يأكل.
"هو ده حوار مع طبيب ولا خناقة!!!!"
ومن خلال هذا الموقف أوجه نصيحة لجميع الأطباء.
* رفقاً بالمريض وأهله وراعى ماهم فيه.
* تبسمك فى وجه أخيك صدقة.
* الكلمة الطيبة صدقة.
*عامل المرضى كما تحب أن يعاملوك حين تمرض.




هناك 74 تعليقًا:

مصعب رجب يقول...

السلام عليكم ورحمة الله وبركاته

بالنسبة للسؤال المحوري في هذه التدوينة :
"هو ده حوار مع طبيب ولا خناقة!!!!"
أكيد خناقة .

أنا عن نفسي حينما أفاضل بين أطباء الأطفال تكون الأولولية دائما للنساء .

النصائح في نهاية التدوينة جميلة ومفيدة
جزاكم الله خيرا

Unknown يقول...

موناليزا

ازيك يا امة الله

يارب تكوني بخير ويارب تكوني اطمأنيتي علي صحة ابن اخوكي

بس مش هقدر اقولك غير ان ده مش دكتور
لان التعامل الجاف ده ممكن يكون في اي حته غير العيادة المفروض انه ملاك رحمة


وكمان ليا عتاب عندك
بعد كده متشوريش علي الدكتور يكتب ايه لانها حاجه بتدايق اسأليني انا


ويارب تكوني بخير انتي وكل العائلة الكريمة

تحيات اخوكي برقش

zOzO يقول...

مش عارفه اقولك ايه
بس كل اللي قولتي عليه بيحصل عند معظم الدكاتره
بس في برده اللي كويس منهم


بس بجد ظاهره
وحشه اوي
مفروض دول دكاتره
يعني الرحمه وانهم يسحوا بالمرضي
هنقول ايه بس

تحياتي ليكي ع مواضيعك المميزه دايما

momken يقول...

الدكتور زى الفل
ومن حقه يعمل اكتر من كده

طالما بتسيبوا الف دكتور تانى وبتروحوا للدكتور المشهور الى الناس بتروج له

يبقى من حقه ينسى انه طبيب ويتحول لفنى بنى ادمين

انا شايف انه من حقه يعمل كده

ال يا فرعون مين فرعنك
قال ملقتش حد يملنى

لو كل الناس روجوا انه طبيب فاشل محدش هيروح له وهيتعلم اصول المهنه من الاول فى وقت فراغه الطويل
لكن الطبيب بتعكوا معندوش وقت فراغ يطور فيه نفسه

البست محزن جدا
شفا الله جميع ابناء المسلمين

تحياتى

الرومـيصاء يقول...

السلام عليكى ورحمة الله
طبعا دى اول زياره ليه
بصراحه انا وانا بقرأ البوست
شكيت انك مكنتيش عند دكتور
شوفى يمكن غلطى ورحتى حته تانيه
حاجه والله غريبه
يعنى المفروض هو دكتور وفاهم ان الهواء السخن لما يقابل البارد ممكن الانسان يمرض
وكمان اسلوب الحوار مشاء الله من النوع الراقى جداا
هقول ايه
ربنا يهديهم
تحياتى.

الرومـيصاء يقول...

نست اقولك
ممكن كنت عاوزه اسألك على كام سؤال فلو فيه اميل ممكن نتكلم عليه
يبقى جزاكى الله خيرا
وبعدين انا بستأذنك اخد الصوره الى كاتبها اسفل المدونه
(حقوق الطبع محفوظه)

كلمة يقول...

انا اول تعليق
زكمان هبقى دكتور
انا شاكك انك رحتى لحلاق مش دكتور
انا معاك والله
فى دكاتره عندنا بيعاملو الطلبه مش المرضى بمنتهى .....
كنت تحضرى لجنه شفوى لواحد من دول وانتى تتخيلى ممكن يعمل ايه مع المرضى بتوعه
بس معظم الدكاتره طيبين والله
دول قله وربنا يهديهم
تقبلى مرورى
تحياتى

mohra يقول...

كل سنه و انتى طيبه يا موناليزا
عايزه اقولك ان ده بيحصل طول الوقت رغم انه غلط فى غلط
الدكتور فى سعيه ورا الفلوس نسى حاجات كتير
المهم الف سلامه ...ربنا يشفيه و يسلمه

بنت أبيها يقول...

يا سبحان الله

الناس بقت مش طايقة نفسها

وبتتخانق مع دبان وشها

ربنا يرحمنا ويعفينا


هوه صحيح ان التعامل مع الناس بكثرة

ممكن يخلي الواحد عصبي من كتر ما بيشوف من الناس الغرائب

لكن لا يجعل الحوار بالشكل ده


ربنا يهدي

تحياتي ليكي

وبالشفاء العاجل لابن اخيكي

اسأل الله العظيم رب العرش العظيم ان يشفيه

amr يقول...

جزاك الله خيرااااااا على هذا النصيحه بل الدعوه أتمنى ان يأخذها الاطباء فى الاعتبار ويراعوا مشاعر الناس واحساسيهم

ثانيا:أحتمال عدم توفيق ان حضرتك تروحى لدكتور ده لأن بالفعل انا اتعملت مع أطباء قمه فى الاحترام والذوق ونظافه المكان

فالمؤكد ان كلا الصنفين موجود ولكن نتمنى ان تكون الاكثريه من الاطباء المحترمين الذين يراعوا خصوصيه مرضاهم ومشاعرهم

وحضرتك عندك حق فى الكلام اللى قولتيه ومش أمر طبيعى ان دكتور يعامل مرضاه بشكل ده

خالص تحياتى

Unknown يقول...

موناليزا
ازيك يا قمر كل عام وانتى بخير
بصى الطب تحول من مهنة انسانية الى تجارة رخيصة الا من رحم ربى طبعا
لكن توقعى اكثر فى ظل مجتمع لا يحكمة الا المادة ولا وجود لشئ اخر
الف سلامة على البيبى
تحياتى

rovy يقول...

اختى الحبيبه موناليزا
لا يسعنى الا ان اقول حسبي الله و نعم الوكيل ..
مع كل الاسف فعلا فيه مجموعه عجيبه من اللى اسمهم بالخطأ اطباء و كان يجب انيسموا بأى اسم الا الطبيب التى تحتوى معنى هذه الكلمه على الطب و الرحمه و الرفقبالمريض و محاوله جاده لمساعدته لتخف الامه و يشفى و و و ......
مش عارفه بجد احنا حنوصل لغاية فين ..

الف سلامه على ابن اخيكى ربنا يشفيه يا رب و لا يجعله يحتاج لطبيب من هذا النوع ابدا ..

كل ودى و تقديرى

موناليزا يقول...

ابو اسامة
ــــــــــــــ
وعليكم السلام ورحمة الله وبركاته
اهلا بيك يافندم
اشكرك للفت انتباهى للتوجة الى الطبيبات لعل يكون فى قلوبهم رأفة بمرضاهم
اشكرك جدا لرايك ولمشاركتك ربنا يكرمك
دمت طيبا ولمدونتى زائرا

*********************************

برقش
ــــــــــــ
اهلا بيك يادكتور
انا الحمدلله بخير اشكرك لسؤالك
تصدق انى شكيت فيه):
اشكرك للفت نظرى وحاضر يافندم هاخد بالى بعد كده
لاحرمنى الله من تعليقكم الطيب اخى الكريم
دمت طيبا ومدونتى زائرا

********************************

زوزو
ــــــــــ
اختى الحبيبة:اهلا اهلا بالقمر وحشتينى ياحبيبتى ويارب تكونى بخير
ماهو انا كنت مفكرة كده ولذلك اخدت وقت على مااستوعبت اللى حصل
اشكرك لرايك ولمشاركتك
نورتينى حبيبتى ودمتى بخير

**********************************

ممكن
ــــــــــ
اهلا بيك يافندم
انت فعلا معاك حق بس لما بتكون ملهوف ومش عارف تروح لمين اول ما بتسأل حد ويقوللك عليه بتروح له على طول
ويمكن لان الناس يهمها انه يكتب دوا كويس وخلاص ومش مهم هيتعامل معاهم ازاى
لكن انا عن نفسى قررت انى عمرى مااتعامل معاه تانى
اسفة جدا ان البوست محزن بالنسبة لك
وربنا يكرمك ويتقبل دعائك
دمت طيبا ولمدونتى زائرا

***********************************

الروميصاء
ــــــــــــــــ
وعليكم السلام ورحمة الله وبركاته
اختى الحبيبة:اهلا بيكى فى زيارتك الاولى ويارب ماتكونش الاخيرة
ههههههه انا شكيت فى كده برضه
يمكن تكون دى طريقة جديدة احنا لسه مانعرفهاش
وصدقتى حبيبتى لا نملك الا الدعاء لامثاله بالهداية وحسن الخلق
##############
يسعدنى جدا التواصل بيننا ابعتيلى ايميلك وانا اعمللك اضافة
(عاملة خاصية الاشراف يعنى محدش هيعرف ايميلك غيرى)
الصورة تحت امرك ياحبيبتى
نورتى مدونتى ودمتى بكل الخير

**********************************

كلمة
ـــــــــــ
اهلا بيك يافندم
كأنك الاول يادكتور
هو فيه حلاق كده!!!
ياخبر ابيض معقول ارواح ناس تبقى فى ايد ناس كده
معك حق والله ربنا يهديهم
نورت مدونتى واسعدنى مرورك

**********************************

مهرة
ـــــــــــ
اختى الحبيبة:وانتى طيبة ياجميلة وبالصحة والسلامة دايما يارب
سبحان الله رغم انه المفروض عشان يحافظ على الفلوس ويكبرها يعامل المرضى كويس بدل مايطفشوا منه
الله يسلمك ياقمر وربنا يخليكى يارب وميرسى لذوقك
نورتينى حبيبتى ودمتى بخير

**********************************

بنت ابيها
ـــــــــــــــــ
اختى الحبيبة:تصدقى فعلا ممكن يكون ضغط الشغل هو اللى خلاه كده
بس ده مايمنعش ان عنده سلبيات كتير اوى
ربنا يهديه وربنا يكرمك على دعائك
نورتينى حبيبتى ودمتى بخير

******************************

عمرو
ـــــــــــ
اهلا بيك استاذ عمرو
ربنا يكرمك ويارب يسمعوها ويعوا مافيها من خير لهم ولمن حولهم
هو ممكن برضه بس المضطر ذى مابيقولوا ابن اخويا تعب فجأة ومعرفتش اروح لمين فاللى لقيته فى دليل التليفون حجزت ورحت على طول
وياريت فعلا الاطباء يراعو حالة المريض واهله من قلق والم وشعور بالخوف
اشكرك لمشاركتك ولتأييدى فى موقفى
دمت طيبا ولمدونتى زائرا

********************************

نهر الحب
ـــــــــــ
اختى الحبيبة:اهلا اهلا وحشتينى ياجميلة
انا الحمدلله بخير وكل سنة وانتى بالف خير يارب
تعرفى انى لغاية دلؤتى مش مصدقة وخصوصا حكاية دخول مريض على مريض دى
ربنا يهديهم ويعافينا جميعا ومايحوجناش لامثال هؤلاء اللهم امين
ميرسى لذوقك ياقمر وربنا يسلمك من كل شر
نورتينى حبيبتى ودمتى بخير

***********************************

روفى
ـــــــــ
اختى الحبيبة:تعرفى انى من ذهولى للى كان بيحصل ماخدتش بالى من ده كله الا لما روحت
سبحان الله بجد الذى يعلم نفسية المريض وماتعانى من ضعف ووهن وأوجب على المسلمين عيادة مرضاهم فما بالك بواجب من يداويهم!!
لنا الله ويارب مايحوجنا لمثل هؤلاء ابدا
اللهم متعنا بصحتنا ابدا ما احييتنا واجعله الوارث منا
ربنا يكرمك لدعائك وربنا يتقبل يارب ليه ولجميع مرضى المسلمين
نورتينى حبيبتى ودمتى بخير

المستنصر بالله يقول...

للا سف لاننا بنبحث عن الطبيب المشهور وممكن يكون طبيب شاب مازال يبتدا مشواه المهنى يكون افضل بكثيير من هذا الطبيب الكبير المشهور والطب مهنه انسانيه قبل ان تكون مهنه للربح فقط

تحياتى لحضرتك

*الطالبة عفو الله *زوزو يقول...

السلام عليكم

سلامة ابن اخوك الف سلامة عليه

بالنسية للحوار الي دار بينك و بين الطبيب بجد حاجة غريبة
يا لطيف يا رب
ليه الناس بقت بالقسوة دي ؟؟؟
الله المستعان
نسال الله لابن اخوك الشفاء
و حفظ الله

عصفور المدينة يقول...

سبحان الله ضججنا من الشكوى منهم وكأنهم قطعوا من حجارة وفعلا أخلاقنا من ديننا قأرى دوما الطبيب المتدين هو خير مثال في التعامل مع المرضى

romansy يقول...

عندك حق دا دكتوررررررررر ولا خناقه
تفتكرى بيعمل ليه كده
مضايق من مراته ويطلع زهقه على المرضى ولا ايه
؟

عبدالرحمن الشافعي يقول...

السلام عليكم

شيء غريب بيحدث لدا كل مواطن مصري أي كان شغله ...
حتى الدكاترة إلي كنت مفكرهم محترمين ...
طلعوا كدة ...

كل واحد في مصر ما عادشي طايق للحواليه ولا لنفسه ...زهقان من عيشته ...
الحياة بتضغته ...بتخليه يعمل دا كله ...


ودا إلي بيحصل مع الأساتذة بتوع مدرستي ..

ما فيش حد خالص طايق نفسه ...

أما بقى حكاية التكيف والمروحة ومشكلة تنظيم العيادة ...
فا أنا أشك إن الطبيب ده أصلا موش طبيب ...

الحوار بالشكل ده ..وتصميم المكان بالشكل ده ...من غير تهوية ولا أي حاجة ..
يدل على أنا الطبيب ده مش متخرج من كلية طب ..
ولكي مني خالص تمنياتي ...
وتحياتي لكي ...

Gannah يقول...

انت فتحتى موضوع كبير جدااا
حقوق المريض اللى للأسف بيتجاهلها كتير من الأطباء
طبعا حق الخصوصية حق أصيل للمريض حتى ولو كان طفل ...ولكن للأسف العيادات الخاصة بتدار بطريق السوبر ماركت من قبل بعض الأطباء ..عايز يمشى الدور علشان الناس متتضايقش وطبعا الناس مبتتكلمش وتطالب بحقها
كمان من حق الأم تعرف ايه سبب المرض وتفاصيل العلاج لكن طبعا الوقت بثمن
أما عن طريقته فى التعامل فما فيش عندى تعليق غير ضرورة مقاطعة مثل هذا الطبيب
مصر فيها كفاءات طبيه كثير وناس عندها أخلاق
كمان مش من حق المريض يطلب دواء بعينه لأنه كده بيعطى الطبيب رسالة انه عارف العلاج وجاى بس لحد يكتبه وطبعا ده غلط
تحياتى لاثارة الموضوع
والف سلامة لابن اختك
شفاه الله وعافاه

Maha Shahen يقول...

والله كتبتى واجدتى وناقشتى بطريقه جميله بجد وحللتى الموقف وليكى حق في سؤالك
ودا مش طبيب دا حد داخل خناقه وقليل الذوق
ومش معنى انه بيكشف علي انسان وبيكتبله علاج انه هو اللي هيشفيه , لازم يعرف انه مجرد سبب وربنا فعال لما يريد وهو الشافى المعافى
فميشعرش ان حياة الناس في ايديه يبقى يعذبهم
وبصراحه انا متغاظه من مجرد القرايه فلو كنت مكانك الله اعلم ممكن من غضبى كنت سمعته كلام لا يحمد عقباه بجد
لأنها مش طريقة دكتور ولا أنسان
فين التراحم بين الناس والموده ولا الأخلاق الحميده حتى

ربنا يشفى مرضى المسلمين جميعا يا رب
والف سلامه علي الطفل الجميل اللي كان معاكى وربنا يشفيه يا رب

خالص تحياتى واحترامى

سلوى يقول...

ألف سلامه لأبن أخوكي
يارب يكون بخير الآن

*******
إيه الخناقه دي يا موناليزا
متأكده إنه دكتور

طيب الغريب إن عنده زحمه زي ما قلتي

الزحمه والشهرة دي واخدها إزاي ؟

يعني أعتقد إنك مش هتروحي له تاني
وأعتقد إن لو حد سألك عن دكتور كويس
أكيد مش هترشحي له هذا الدكتور

يبقى إزاي ؟؟

عموما الحمد لله إنك طلعتي من عنده على خير

موناليزا يقول...

المستنصر بالله
ــــــــــــــــــ
اهلا بيك يافندم
سبحان الله مع ان المفروض ان كلما كبر المرء فى العمر نضج وليس العكس
ربنا يعافينا ويشفى مرضى المسلمين اللهم امين
دمت طيبا ولمدونتى زائرا

********************************

الطالبة عفو الله
ـــــــــــــــــــ
وعليكم السلام ورحمة الله وبركاته
اختى الحبيبة:ربنا يسلمك من كل شر ماتحرمش منك ياقمر
ده نفس السؤال اللى كنت بسأله لنفسى بعدها
ربنا يشفى كل مريض يارب
نورتينى حبيبتى ودمتى بخير

********************************

عصفور المدينة
ــــــــــــــــــ
اهلا بيك يافندم
هى وجهة نظر تحترم ولكنى لا استطيع ان اجزم بها فلم اتعامل معهم مسبقا
اشكرك جدا لمشاركتك
دمت طيبا ولمدونتى زائرا

**********************************

رومانسى
ــــــــــــــ
اهلا بيك يافندم
ماحاولتش اسأل عن اى شئ يخصه
وفى كل الاحوال المريض ليس له دخل فى الامور الخاصة بالطبيب
والطب مثل اى مهنة اخرى لايصح له ان يخلط امورة الخاصة بالعمل
دمت طيبا ولمدونتى زائرا

********************************

عبد الرحمن ياسين
ــــــــــــــــــــ
وعليكم السلام ورحمة الله وبركاته
اهلا بيك يافندم
وأكيد مش كلهم كده حتى لو الكثرة اصبحت بهذا الشكل فيكفى وجود قلة تحترم من حولها
فرسولنا الحبيب قال"الخير فى وفى امتى الى يوم الدين"
ولعلنا جميعا نستفيد من سلبيات من حولنا لنحولها الى ايجابيات فى تصرفاتنا
دمت طيبا ولمدونتى زائرا

***********************************

جنة
ــــــــــ
اختى الحبيبة:دائما يعجبنى تعليقك ونقدك وتحليلك للموضوع
ويسعدنى حقا ان يكون تعليق دكتورة متمرسة بهذا الشكل
لانك رمز لفئة غير قليلة بكل تاكيد
أفادكم الله واسعدك كما تفعلين دائما معى
جزاكم الله خيرا
وبحبك جداااا
نورتينى حبيبتى ودمتى بالف خير

*********************************

نور شاهين
ـــــــــــــــ
اختى الحبيبة:اشكرك جدا لمشاركتك ولرأيك
وانا من مفاجأة مرض ابن اخى وهرولتى سريعا للطبيب وقلقى الزائد ماركزتش فى كل الحاجات دى غير لما روحت
ربنا يكرمك ويتقبل دعائك ويشفى مرضى المسلمين اللهم امين
نورتينى حبيبتى ودمتى بخير

********************************

سلوى
ــــــــــ
اختى الحبيبة:الله يسلمك ياقمر واشكرك لسؤالك والحمدلله هو احسن دلؤتى
والله مش متأكدة اوى ماهو انا ماشوفتش شهادته):
ومتهيألى فى موضوع الزحمة اللى عنده ان الناس بتحب تروح للى عنده زحمة على اعتقاد منهم انه شاطر طالما زبائنه كتير
واكيد طبعا مش هروح له تانى ولا هنصح حد به ابدا
وعلى فكرة انا ماسألتش حد عليه ولا حاجة ده كان اقرب واحد منى وعشان كده رحت له
وبجد والله الحمدلله انى طلعت من عنده على خير قبل مااستوعب اسلوبه معايا
واللهم اشفى مرضى المسلمين واهدى اطباء المسلمين
نورتينى حبيتى ودمتى بخير

mohamed ghalia يقول...

أعتقد أن هذا الطبيب هو الشاذ عن القاعدة فالأصل أن الأطباء يتعاملون بلين واحترام لم اذهب إلى طبيب وعاملنى بمثل هذه الصورة من قبل.
هو من يحتاج إلى أن يقف مع نفسه ليطور من نفسه ومن اسلوبه
تقبلى تحياتى دمتى بود
واوعى تزعلى نفسك ولو حسيتى بزعل تعالى زورينى فى مدونة السعادة

عاشــــــ النقاب ـقــــة"نونو" يقول...

السلام عليكم
هنقول ايه بس
ربنا يرحمنا انا ليا مع الدكاترة درر يا موناليزا
بس للحق الحمد لله بينهم من يتقي الله بس يتعدوا على الصوابع
الف سلامة على ابن اخيك
النزلة المعوية ماشية اليومين دول خدوا بالكم الظاهر فيه حاجة في المية
ربنا يسلمها يارب
وكل عام وانتم الى الرحمن اقرب

EMMY BABY يقول...

ههههههههههههههههههههههههههه دى فعلا خناقة

فى حد يكلم حد كدة

ايه ده دكتور ده ولا جزار

وكمان لازم يقلك اسباب النزلة المعوية علشان تتجنبيها على العموم ممكن يكون اكل اكل ملوث وممكن تكون معدته حساسة اوى انا كدة

وكمان طبعا فى فاتح للشهية ايه دار الافتاء ده يعنى ايه لما الجوع يقرصه هياكل

على العموم فى فاتح للشهية للاطفال اشترهوله لو هو نفسه مسدودة وفى كمان دوا فاتح للشهية ومعاه فيتامينات (تريزوركس )

على العموم ربنا شفيه يارب والنصايح اللى قلتيه فى الاخر جميلة ربنا يكرمك

تحياتى

ايمى

رندا يقول...

مون

كل سنة وانتى طيب ياقمر

انا ضحكت ضحك على الدكتور ايوة فعلا فى دكاترة من النوع دة

مرة جوزى كان رايح لدكتور كبير مشهور كمان حسيت انة عايز يدينا جوز اقلام ههههههه
وطبعا قعدنا نبص لبعضنا واحنا هنموت من الضحك علية

بس هنعمل اية خلصنا الكشف وخلاص ومش رجعنالة تانى
احيانا الدكاترة بيكونوا واخدين قلم فى روحهم اوى مع ان الى قدامهم لية حق عليهم يسئلوة
بوست جميل ضحكنى اوى

كل سنة وانتى طيبة ياقمر

كل الحب


رندا

saragebaly يقول...

موناليزا

كل عام وانتي بكل خير والف سلامة على ابن اخيكي شفاه الله وعفاه وانعم عليه بالصحة

بالنسبة لموضوعك فبجد اصبحت الدكاترة حاجة غريبة جدااااا

التعامل مع المريض اصبح بلا رحمة ولا رأفة بحاله
وهم ما يسمون ملائكة الرحمة فأصبح بعضهم يستحق لقب اساتذة العذاب

واكتر حاجة مستغربالها حالة الحوار ( الخناقة ) اللي دارت !!!!

هل يعقل ان طبيب يتعامل بهذا الشكل مع اقارب المريض
اين هو من الامانة التي في عنقه ومن قسمه؟؟!!

لا حول ولا قوة الا بالله

موناليزا يقول...

محمد غالية
ـــــــــــــــــ
اهلا بيك استاذ محمد
والحمدلله بجد طمنتنى ان فيه دكاترة غير كده
واشكرك على النصيحة يافندم ووجب التنفيذ
دمت طيبا ولمدونتى زائرا

**********************************

عاشقة النقاب
ـــــــــــــــــ
وعليكم السلام ورحمة الله وبركاته
اختى الحبيبة: ربنا يسلمك من كل شر
ونحن نحتاج فعلا الى من يتقى الله فى كل شئ
كفانا الله جميعا شر الامراض وعافانا من الاحتياج لمن لايتقى الله
وانا بعتقد انها مش المياه وبس لان الهواء نفسه ملوث
ربنا ينجينا يارب
وكل سنة وانتى بالف خير يانونو
نورتينى حبيبتى ودمتى بخير

**********************************

ايمى بيبى
ـــــــــــــ
اختى الحبيبة:أنا قلت كده برضه):
يابنتى ده حسسنى انى تلميذة فاشلة وماعملتش الواجب ههههههههه
وانا فعلا كنت عايزة اعرف الاسباب لانه أكله بسيط جدا يكاد يكون معدوم يبقى جت له منين!
ربنا يسعدك ويتقبل دعائك
ومايحوجناش لامثال هذا الطبيب ابداااا
نورتينى حبيبتى ودمتى بخير

********************************

رندا
ـــــــــــــ
اختى الحبيبة:وانتى طيبة ياجميلة وبالصحة والسلامة
مبسوطة ان البوست عجبك و ضحكك
تعرفى كل ماافتكر شكله وهو بيتكلم معايا بجد بضحك برضه
وبينى وبين نفسى اقول هو مضايق اوى كده ليه ده الدنيا مش مستاهلة هههههههه
وخليهم يهربوا الزبائن منهم كمان ويشوفوا فى الاخر هيوصلوا لايه
اشكرك لمشاركتك ياجميلة
نورتينى حبيبتى ودمتى بخير

*********************************

سارة جبالى
ــــــــــــــ
اختى الحبيبة: وانتى طيبة ياقمر وربنا يسلمك من كل شر يارب وما اراكى مكروه ابدااا
وواضح ان الموازين اتقلبت فى كل حاجة
تعرفى ان مالفت نظرى ايضا سؤال هام هل هذا شكر الله على نعمه؟؟
يعنى اكيد فى دكاترة تانيين نفسهم فى مريض واحد وده ماشاء الله العيادة مليانه
ربنا يهديه ويشفى مرضى المسلمين جميعا
نورتينى حبيبتى ودمتى بخير

Unknown يقول...

الحقيقة يا عزيزتى الى بتحكيه ده فعلا بيحصل انا شفت ده فعلا بعينى و للاسف كنت فاكرة انه يقتصر على عيادات و مستشفيات الغلابة بس لكن للاسف طلع فيه بعض العيادات و المستشفيات ذات التذكرة الغالية و الزبائن الاغنياء كده برده

الموضوع بيرجع للضمير و ان الطبيب يتقى الله فى شغله

ندا منير يقول...

والله يا موناليزا مش عارفة اقولك ايه
بس دا الطبيعى فى مصر
ومش حاجة غريبة عن مصر
وعن الدكاترة فيها بجد هما معظم الدكاترة كدة خلقهم ضيق وشايفين نفسهم قوى
وبجد الحوار اللى كتبتيه دا ضايقنى قوى
ليه يعنى الدكتور يتكلم كدة
الواحد يعمل ايه بس
حتى الدكتور بقى كدة
بجد بلد عايزة ابادة

والف سلامة على النونو الصغير

RaRa يقول...

والله معاكى حق
كل العيادات والدكاترة بقم كده

ahmed_k يقول...

هههههههههههههههه
بس كده طبيعي يا موناليزا
إبتسمي أنتي في مصر هههههههه
إحترام المواعيد دي كلمه غريبه عننا
إنتي تحجزي زي الباشا
لغاية أما تدفعي الفلوس وبعدين
تستني زي الغفير بتاع الباشا هههههههه
مش خلاص دفعتي وهو المطلوب
يعني يفضل تدفعي الكشف وكفايه كده
عشان البهوات ميتخنقوش وياكلولنا و
ونحسسهم أنهم سبب مرض أطفالنا
حاجه تعل
أنا والله لو مكانك كان اليوم معداش على خير أبدا
دكاتره زي كده حرام يوصفوا بوصف طبيب
ده بدل ما الطفل هو اللي مريض
يخرج من عنده هو واللي جاي بيه مرضى

ربنا يرحمنا

طبعا الموقف مش عادي
لكن عندنا لازم يبقى عادي

SHAPE YOUR LIFE (ABOALI) يقول...

اوكيه
ماشى الكلام
ست الكل يعنى يعنى
هو ده بقى العوام
بس يعنى على حسب
حب الطبيب للنظام
والفيزيتا بكام
وانتى كده شكلك
مش من علية الاقوام
علشان كده
مافيش وئام
يا معين
بكره نفهم
اننا بنعامل
بنى ادمين


ست الكل لاتنزعجى هو ده الحال حاليا
فى العيادات الشعبيه شوية
وكمان يعنى ده دكتور اطفال
ماكملش تعليمه
اصله اطفال يعنى

وشوشه فى ودينك
التمسى لاءخيكى 70 عذر
يمكن لعل وعسى
بس هو لو اعطى لكل واحدة 5 دقايق كلام
العملية مش هتجيب همها
وخصوصا انتى عارفة الستات اللسان عندهم يعنى يعنى


المهم
فى فاتح شهية كويس جدا
اسمه تريزوركس شراب
خليه يستعمله لمدة شهر
هايبقى ابن اخوكى هركليز


تحياتى

موناليزا يقول...

عاليا حليم
ـــــــــــــــــ
اختى الحبيبة: فعلا ولكنى لم اكن اتوقع ابدا ان يحدث هذا ومن طبيب اطفال
ربنا يهديهم ويعافينا جميعا
نورتينى حبيبتى ودمتى بخير

***********************************

ندا منير
ــــــــــــــــ
اختى الحبيبة:ربنا يسلمك من كل شر
والتساؤل هنا اذا كانت دى اخلاق طبيب حاصل على اعلى الدرجات العلمية كيف تكون اخلاق من لم يتعلموا من الاصل
نورتينى حبيبتى ودمتى بخير

******************************

رارا
ـــــــــ
اختى الحبيبة:فعلا ولا أدرى لماذا
نورتينى حبيبتى ودمتى بخير

********************************

احمد_ك
ـــــــــــ
اهلا بيك استاذ احمد
تفتكر امتى نبقى احسن من كده
مازلنا فى انتظار الاجمل
دمت طيبا ولمدونتى زائرا

**********************************

ابو على
ــــــــــــــ
اهلا بيك يافندم
"انتى كده شكلك مش من علية القوام"
ماذا تعنى بها؟؟؟
تكرار "ست الكل" لا افضله
العيادة ليست شعبية انها فى مكان راق
وعشان طبيب اطفال كان المفروض يبقى اسلوبه احسن من كده على الاقل يجذب الطفل ليه
وهى فكرة ان اعطيله عذر مش مقبولة اصلا لان دى مهنته وبياخد اجر مقابل ماسيقوله للمريض سواء ستات او لا
واشكرك لذكر اسم الدواء
دمت طيبا ولمدونتى زائرا

الازهرى يقول...

صديقتى العزيزة

للاسف الواقع غير المفروض كما اصبحت العادة فى الكثير من المجالات

كما ان مقولة

عامل المرضى كما تحب أن يعاملوك حين تمرض.

صادقة فلو رأيا الاطباء حين يمرضون لعرفت انهم اسوأ المرضى طرا


تحياتى ودعواتنا جميعا بالشفاء لجميع المسلمين

Mafrousa يقول...

الصراحة انا مش عارفة اقولك ايه؟
ديه بقت ظاهرة غريبة و عجيبة
و اعتقد ده من طمع الدكاتره
اولا ده لو طفل لا قدر الله عنده مرض معدي حيعدي الطفل التاني
ثانيادكتور الاطفال لازم يكون دكتور وشة فيه سماحه و هدوء علشان يعرف الطفل بيشتكي من ايه؟
و الله ...الله يكون فة عوننا

Sou يقول...

عندك حق يا بنتي ومصر بقى فيها مهازل أكتر من كده....محدش بقى طايق حد...والدكتور اللي هوا الشخص اللي المفروض يريح الواحد نفسيا قبل جسديا بقى يجيب المرض من المعامله
من المواقف برضه
أنا رحت مع بنت خالتي عيادة نساء وولاده كل الستات متكربسين فوق بعض وهما حوامل وكل رجالتهم مرصوصه على السلم بره زهقانه من الإنتظار والدكتوره من الساعه 10 لحد الساعه 1 الظهر كل محد يكلمها تقول خلاص أنا قدامي عشر دقايق....راح واحد قام لمراته وشدها قالتله عشر دقايق وجايه قالها كل عشر دقايق قول قدامها عشر دقايق وتيجي وبقالنا 3 ساعات ..وخدها ومشي ...مفيش سنة إحترام للمواعيد ومراعاة للناس أبدا
ربنا يهديهم....بقترح عمل حمله وتتزعميها بما إنك دكتوره يا جميله ...إيه رأيك؟؟

SHAPE YOUR LIFE (ABOALI) يقول...

يا موناليزا
كده كويس بدل ست الكل
اقصدى بعلية القوم انى لو هذا الطيبب فى وسط البلد او المهندسين
كان الوضع اختلف
وكمان حتى لو الاخرين عاملونا وحش
احنا نكون احسن منهم ونعاملهم كويس
وممكن بدل ماكنتى تمشى من عند الدكتور وانتى ليكى تحفظ عليه
كنتى تكونى ايجابيه اكثر
وتكلمى الدكتور عن كل اللى انتى لاحظتيه
ممكن يكون عنده رد
او ينتبه الى ذلك

حلو الكلام ولا

تحياتى

GiGi world يقول...

ربنا يشفى ابن اخوكى يارب ويرحمنا يارب احنا بقينا بجد مش بنرحم بعض
احنا فينا حاجه غلط كل واحد فى رقبته واحد بيخنقه
بجد الدنيا بقت صعبه جدا واحنا اللى مصعبينها على بعض اكتر من الحكومه
ربنا يبعدنا عن الدكاتره
يارب

صبرني يارب يقول...

بصي يا بنتى انا لو حكيتلك انا حصلي ايه مع ابنى مع الدكاتره مش هاتصدقي ان دول دكاتره

ده وانا باتعالك بفلوسي وفى مستشفيات خاصه
امال بقى الى فى المستشفيات الحكومي جرالهم ايه

والى انتى روحتيله ده اكيد حلاق صحه

انا باروح لدكتور برضه زحمه لكن مؤدب وبيحترم الناس ومراعي اداميتهم

ومافيش حجز عارفه ليه ؟؟؟

لاننا كمواطنين غوغائيين مش بنلتزم بالنظام فلما عمل نظام حجز ومواعيد الناس تذمرت واتهمته انه بيحابي ناس على ناس والبنات الى عنده بيقبضواوما الى ذلك

الدكتور ده على حد حدسي الشخصي لسه نضيف
اتمنى انه يفضل كده واقصد نضيف فى الذمه يعنى

بس بقى السؤال الحقيقى الى عايزاكي تسأليه لنفسك ولكل الناس

هما اصلا الى الاطباء الى موجودين دول والى ربنا بلانا بيهم ينفعوا اطباء ؟؟؟

ولا اصطف التمريض ينفع سبرسجيه ؟؟؟

فى احدى صولاتي وجولاتي مع الاطباء والممرضات
دكتور قالي بطلي تبصي للولد وتفحصي فيه انا خلاص فحصته
قلتله لو ما كنتش فحصته كان زمان ابني خرج بعاهه
وكان فحصه قابلي دكتورين ادك فى السن يجى 3 مرات
والممرضه حضرتها بتفرد عليا وتقولي حضرتك انا واحده بروفشنال وعارفه انا باعمل ايه
طبعا مش عايزه اقولك انها كانت هاتتاكل صاحيه وقلتلها حضرتك انا واحده بروفشنال زيك بالظبط اتسببت فى ملخ وميكروب من الحضانه وانا باتعذب انا وابني بسببها. ما اسمعش صوت بروفشنال فيكم خالص

سوري على الاطاله بس اصل الموضوع ده جه على الجرح اوي اوي

وبعدين انا رغايه بطبيعتي
تحياتي لكي

عــلاء ســالـــم يقول...

السلام عليكم

للأسف حال الطب كحال التعليم ككل المجالات في مصر أصبحت في قمة تدهورها
ولا عزاء للشعب المصري الغلبان

ربنا يرحمنا برحمتة

خالص تحياتي

صاحبة هدف يقول...

السلام عليكم

أولا جزاكم الله خيرا على زيارتك لمدونتي

ثانيا: تقريبا يوجد الكثير من الأطباء بهذا المنظر..لكن هذا لا يعيني أن الغالبية العظمى كذلك

سبحان الله .. فوالدي طبيب..كلما أتذكر كيف يتعامل مع المرضى الأطفال..أبتسم حقا ..فياليت كل الأطباء مثله
دائما لا أدخل العيادة إلا وأجد كيس كبير مليئ بالمصاصات والأرواح
وأول ما يدخل الطفل..يقوم بالإبتسامة فى وجهه ثم يقول له (خد مصاصتك الأول)
ثم يداويه بكل رفق

..نسأل الله العفو والعافية

canary يقول...

أعوذ بالله

ربنا ما يحوج حد لدكتور

والله بقو اسوء من الحانوتيه

والمعامله زى الزفت

وخصوصيه دى ايه

دة شئ ملوش وجود دلوقتى

موناليزا يقول...

الازهرى
ـــــــــــ
اهلا بيك يافندم
ملحوظة:أفضل كلمة "اختى"عن "صديقتى العزيزة"
اشكرك لمشاركتك
وذكرتنى بهذه المقولة"نعيب زماننا والعيب فينا ومالزماننا عيب سوانا"
دمت طيبا ولمدونتى زائرا

*********************************

واحدة مفروسة
ــــــــــــــــــــ
اختى الحبيبة:انتى قلتى فعلا كل اللى انا كنت عايزة اقوله
وربنا يكون فى عون من يتعاملون مع المستشفيات الحكومية اذا كانت العيادات الخاصة بهذا الشكل
نورتينى حبيبتى ودمتى بخير

**********************************

سو
ــــــــ
اختى الحبيبة:اهلا اهلا بالقمر وحشتينى ياجميلة ويارب تكونى بخير
معاكى حق لان نفسية المريض اصلا بتبقى محتاجة معاملة من نوع خاص
ونيجى بقى على عدم احترام المواعيد اكتر حاجة بتنرفزنى فعلا وخصوصا انى دقيقة جدا فى مواعيدى فلكى ان تتخيلى لما اضيع اكتر من ثلاث ساعات من وقتى كده ببقى بجد سبحان من صبرنى
اما عن اقتراحك هو جميل فعلا بس انا مش دكتورة ولا حاجة):!
نورتينى حبيبتى ودمتى بخير

*********************************

ابو على
ـــــــــــ
اهلا بيك يافندم
واشكرك لعودتك والاهتمام بالرد
وفعلا موناليزا افضل كتيييير
وهو فعلا فى مكان كويس جدا بس انا شايفة ان المكان مالوش دعوة دى طباع انسان واخلاقه اللى مايتحكمش فيها مكان لان ده واضح انه جزء من شخصيته
وانا معاك ان لو الاخرين عاملونا وحش احنا نحرجهم باخلاقنا ونعاملهم كويس ولكن
يافندم سيادتك بتتكلم عن واحد بيتعامل مع الناس كأنه فى محل بقالة ياخد المريض يكشف عليه ويديك الروشتة من غير ولا كلمة وفيه طابور واقف وراك
ارجو ان اكون وضحت الصورة كاملة حتى تعذرنى فى تحفظاتى عليه
دمت طيبا ولمدونتى زائرا

**********************************

جيجى
ــــــــــ
اختى الحبيبة:والله انتى جبتى الخلاصة
عشان طول الوقت الناس مش عاجبها النظام فى البلد وبترمى مشاكلها على الاخرين رغم احنا من جوانا بناكل فى بعض
ربنا يتقبل دعائك ويشفى كل مريض ومايحوجناش لمعدومى الرحمة ابدا اللهم امين
نورتينى حبيبتى ودمتى بخير

*********************************

صبرنى يارب
ــــــــــــــــ
اختى الحبيبة:تعرفى ده كان نفس سؤالى أمال لو كنت فى مستشفى حكومى كان اتعامل معايا ازاى!!!!
بس الحمدلله انك اخير لقيتى دكتور لسه نضيف من جواه وبيحترم آدمية المريض
ورداً على سؤالك متهيألى ان اخلاق الفرد هى اللى بتحكم مش مهنته يعنى مثلا ممكن تلاقى ميكانيكى وفى مكان شعبى جدا ومع ذلك اخلاقه طيبة او على الاقل بيتعامل مع الناس بذوق يعنى الاساس الفرد نفسه
ياستى طولى براحتك ولا يهمك ويارب يكون ابنك بقى كويس دلؤتى
وربنا مايحكم فينا ناس ذى دى ابدا
اللهم اشفى مرضى المسلمين
نورتينى حبيبتى ودمتى بخير

***********************************

علاء سالم
ــــــــــــ
وعليكم السلام ورحمة الله وبركاته
اهلا بيك يااستاذ علاء
وللاسف ايضا ان كل اصحاب المهن المتعجرفين مصريين
وفعلا لنا الله
دمت طيبا ولمدونتى زائرا

**********************************

شيماء
ـــــــــــــ
وعليكم السلام ورحمة الله وبركاته
اختى الحبيبة:ربنا يكرمك ومدونتك تستحق الزيارة فعلا
ما شاء الله والحمدلله ان امثال والدك مازالوا موجودين
ممكن تسيبيلى اسمه ورقم تليفون العيادة
وابقى شاكرة ليكى جدا
نورتينى حبيبتى ودمتى بخير

*********************************

كنارى
ــــــــــ
اختى الحبيبة:معاكى حق ربنا مايحوجنا للدكاترة ابدا
خليهم يعرفوا قيمة المرضى اللى كانوا بيتعاملوا معاهم بطريقة مهينة
نورتينى حبيبتى ودمتى بخير

حبارير يقول...

ثقافة العولمة

مناخ القهر ببلدنا(سابقا)

حول بعضنا من(بشر)إلى (شئ)

عصر الآلة

وموت الإنسان

إنتظارات شاهقة يقول...

مرورى الاول

الف سلامة لابن اخيكِ

شوفى الموضوع مش بقى طب وعلاج ورأفة بحال الناس
الموضوع بقى موضوع مادة وبس

مهزلة بكل المقاييس
خلى بالك دة فى عيادة خاصة
اومال لو مستشفى حكومى يبقى اية الحال
ربنا الشافى المعافى

احترامى

شيماء زايد يقول...

نفس الموقف تقريبا مررت به علي شكل حلقات مكرره يختلف فيها الزمن من ساعة إلي 8 ساعات احياننا وبدون مبالغه ،
ولكن الحلقه التي لا انساها عندما مرض ابن اختي مرضا شديداوارتفعت درجه حرارته ليلة رمضان ، يعني اخر يوم في شعبان فذهبت اختي لعيادة الطبيب بابنها وحجزت الكشف وانتظرت3 ساعات لتخبرها بعد ذلك الممرضه بمنتهي البرود أن الطبيب سوف يذهب لصلاة التراويح اولا
فانتابها موجة غضب عارمه أي دين يأمر بأن يترك مرضاه من الأطفال ما بين مريض ومحموم .
وهل هناك عبادة تغني عن الرحمة ؟ لست أدري .

أنا حر يقول...

حلوة قوي الخناقة دي
سوري اني بقول خناقة بس هي فعلا كده لان استحالة يكون ده حوار مع دكتور اطفال ابدا
ياريت المرة الجاية مترحيش للدكتور ده لان واضح كده ان في عداوة بينه وبين المرضى شديدة قوي
الف سلامة على المريض
و
تحياتي

yamen يقول...

السلام عليكم

عادة لما بادخل المدونات واحب اعلق باعلق باعتباري قارئ

بس دي اول مرة الاقي نفسي عايز اعلق كطبيب

الاول انا طبيب اسنان

ولان الموضوع يعني حاسس انه يمسني شوية فعايز اقولك شوية حاجات

طبعا لا خلاف علي انه الاسلوب اللي اتعامل بيه الطبيب معاكو كان غاية في السخافة

و لاشك برضه انه دخول مريض علي مريض من اسوا الحاجات اللي ممكن طبيب يعملها في مرضاه

انما موضوع المواعيد بالذات انا شايف انه محتاج فيه شوية عذر لاني برضه باعاني منه

يعني انا مثلا لم اكن اتبع نظام الكشف بالحجز والمواعيد لكن اللي كان بيحصل انه الناس بتيجي وتدخل بعدها بساعتين ونص علي الاقل
وده كان بيخلي الناس كلها تحاول تيجي الاول
وكان بيحصل خناقات مابين المرضي علشان كل واحد عايز يثبت انه جه الاول
طبعا انا بابقي قاعد جوه وعارف ان فيه مرضي بره قاعدين بقالهم اكتر من ساعتين وده كان بيضايقني جدا
فعشان كده بدات امشي علي نظام المواعيد
لكن النظام ده برضه له عيوبه لان الواحد مش دايما يقدر يتوقع المريض اللي داخله هيستغرق منه وقت اد ايه فاحيانا الحكاية بتطول شوية والمواعيد بتتاخر
لكن بيبقي علي اي حال احسن من نظام اللي يلحق يدخل

انا طولت اوي..صح؟

علي اي حال..مش كل الدكاترة زي صاحبنا ده
ولما تحبي تروحي لدكتور بعد كده ابقي ابعتيلي وانا اقولك علي دكاترة طيبين

:)

تحياتي

موناليزا يقول...

حبارير
ــــــــــــ
اهلا بيك يافندم
مع احترامى لرايك ولكن ما علاقة العولمة باخلاق الفرد التى تجعله يجذب الاخرين اليه او ينفرهم منه وخاصة عندما يكون مسئول عن ارواحهم
ارجو التوضيح ولك منى خالص الشكر
دمت طيبا ولمدونتى زائرا

**********************************

احلام اليقظة
ــــــــــــــــــ
اختى الحبيبة:اهلا بيكى فى زيارتك الاولى وفى انتظارك دائما
الله يسلمك ياقمر
العجيب فعلا انه بكده هيخسر زباينه مش هيكترهم يبقى بيعمل كده ليه!!!
ده السؤال اللى محيرنى فعلا
اشكرك لمشاركتك ونورتى مدونتى

*********************************

شيماء زايد
ـــــــــــــ
اختى الحبيبة:لا حول ولاقوة الا بالله
الموقف اللى حكيتيه بجد مخلينى مش عارفة اتكلم من ذهولى
معقول فيه كده!!!
اذا كان لما يبقى عندنا عمال بيظبطوا حاجة فى الشقة مثلا وينزلوا يصلوا فى المسجد ببقى مضايقة منهم لانهم بيقعدوا اكتر من ساعة وسايبين الدنيا مهرجلة مابالك بقى بطبيب وسايب مرضاه وهل لو كان ده ابنه كان برضه سابه ونزل يصلى التراويح!!!
لنا الله وماعدتوش تروحوله تانى
نورتينى حبيبتى ودمتى بخير

***********************************

انا حر
ـــــــــــ
اهلا بيك يافندم
وهى فعلا كانت خناقة بس من طرف واحد والطرف التانى اللى هو انا مش فاهمة هى الخناقة دى سببها ايه!
وده فعلا قرارى اول ماخرجت من عنده
الله يسلمك يافندم واشكرك لمشاركتك
دمت طيبا ولمدونتى زائرا

*********************************

يامن
ـــــــــــ
وعليكم السلام ورحمة الله وبركاته
اهلا بيك يادكتور فى زيارتك الاولى
وانا مبسوطة بتعليقك كطبيب حتى تتضح الصورة للجميع
وبالعكس يادكتور ماطولتش ولا حاجة لانك نبهتنى لمشكلة المواعيد لدى الاطباء وبجد كده عذرتهم
والجميل ايضا انك كطبيب رافض ماحدث من زميل لك فى المهنة
واذا كان فيه دكاترة طيبين فبعد تعليقات القراء اعتقد انهم قلة قليلة
ومتشكرة ليك يافندم وان شاء الله المرة القادمة هنستعين بخدماتكم
نورت مدونتى واشكرك لمشاركتك

حياتنا الزوجية...(عضو رابطة هويتي إسلامية) يقول...

الموضوع رائع وجميل وشيق و اسلوبه فريد فعلا وفعلا ولا حول ولا قوة الا بالله ان اكثر المسلمين لا يفقهوا هذه النقطة جيدا ان ربما تحل كثير من المشاكل بفضل المعاملة الحسنه يقول المختار صلي الله عليه وسلم اكمل الناس ايمانا احاسنهم اخلاقا ويقول سيدنا انس بن مالك رضي الله عنه عاشت مع النبي صلي الله عليه وسلم 10 سنين لم يقل فيها لي اف قط وما قال لي لشئ فعلته لما فعلت كذا ولشئ لم افعله لما لم تفعل كذا هذا بمناسبة الموضوع


اما انا فأتمني شئ منك واعتبريه نصيحة من اخ لك والله اسئل ان تتقبليها بسعة صدر
** انت تقولين انك طالبة رضاء الله عز وجل فلم تحتوي رسائلك علي صور نساء ولما رأيته من تميز اسلوبك الادبي فأن زوارك كثر فحتي لا تقعي في ذنب اتمني استبدال هذه الصورة والدقة في نشر صور في الرسائل
والله انا لا اعلق علي مدونه بها هذه الصور ليس لأهميتي او اي شئ اخر انا اغلب من الغلب ولكن لأن اسلوبك فريد وشيق احببت ان اقدم لك النصيحة.

ثانيا راجعي نفسك من جهة كبرياء فلايدخل الجنة من كان في قلبه مثقال ذرة من كبر




حياتنا

مؤمنه يقول...

السلام عليكم ورحمة الله وبركاته

ربنايهى يا موناليزا
بس هو ليه بيعمل كده ما فيش دكتور غيره ولا مافيش اشطر منه مع ان دى مش شطاره
الناس تريح نفسها وتروح لدكتور تانى
ولكل مقام مقال عشان كل واخطأه
معاكى حق فى مسالة المواعيد وكان المرض بقى بالدور زى رغيف العيش

دومتى بأطيب حال وصحة وعافيه
وشفى الله ابن اخيكى
والسلام عليكم ورحمة الله وبركاته

"أم أدهم المصرية" يقول...

السلام عليكم ورحمه الله وبركاته

----------------------

حبيبتى ده طبيعى فى مصركلها مع كل الدكاتره تقريبا الا من رحم ربى منهم

هنقول ايه

ربنا يهديهم ويجعل الرحمه فى قلوبهم

------------------------

Ghada , Rofayda يقول...

بحثت في رد على ما قرأت لم أجد الا ...
حسبي الله ونعم الوكيل..


جزاكي الله خيرا...

تحيااااااتي...

دمت بخير...

دنيتى الجميله يقول...

كل سنه وانتى طيبه
وسلامه البيبى الجميل
شفاه الله وعافاه
وعافا جميل مرضى المسلمين
اللهم امين
والدكاتره دول بقوا حاجه صعبه جدا الا من رحم ربى
وبنشوف على جميع الالوان
وفيهم ناس كتير حلوين وناس ربنا ميحطنا تحت ايديهم ابدا
سلام

غير معرف يقول...

موناليزا

انتى عارفة الدكاترة دول مبحبهمش

الواحد يدخل سليم يطلع عنده امراض

الدنيا كلها

انا برضو معايا ولاد اخويا كل شوية يتعبوا

بس لما بروح معاهم لدكتور بطلع عينه

وهو لما يلاقينى فاهم وناشف معاه يحترم شغله كويس

بس للاسف حال المصريين كلهم زفت رغم كل حاجة

تحياتى

وربنا يشفى مرضانا كلهم

غير معرف يقول...

الف سلامه علي ابن اخوكي ياقمر
وضحكت موت علي الدكتور
هو بيكشف ولا بيتخانق
ربنا يش في ابنا اخوكي وتستغنوا عن خدمات الدكاتره

مجداوية يقول...

السلام عليكم

هههههههههههههههههههههههههه
والله شر البلية ما يضحك بحق ,,أنت وصفت بالظبط ما حدث لى لكن كنت أعانى من التهاب حاد فى الركبة ومكنتش عارفة أقعد ولا أقف ولا أمشى وانتظرت فى العيادة لأكثر من ساعتين لأن الدكتور كان بيشتغل للصبح والدكتور للأسف ملتحى ولكنه كان زعلان أوى لما بأقوله ان طول الانتظار يخلى السليم مريض فما بالك بالمريض وكأن المرضى هم المسئولين عن ارهاقه ما بين العيادة ومستشفيين !!! فأنا رديت رغم ان البداية غير مشجعه بالمرة لكن مش بعد ما استنيت ده كله حامشى واضطريت أكشف وحصل نفس الحكاية قبل ما أطلع دخلت اللى بعدى ومعرفتش أسأله ولا سؤال عن الأدوية ولا ليه ولا ازاى وكأنه موظف حكومة من بتوع فوت علينا بكرة
اشمعنى الطب يعنى اللى مش حتصيبة الفرة كل شىء أصابه العطب والفساد ويا رب ارحم واغفر

رحــــيـل يقول...

لا حول ولا قوه الا بالله

مش دول برضه ملايكه الرحمه ياساتر يارب

ربنا يشفى كل مريض

بس برضه مش كلهم كده


لقاء مدونى الدقهليه يوم الجمعه الساعه اربعه العصر فى مكتبه بوكس اند بينز

http://www.facebook.com/event.php?eid=31250722567

موناليزا يقول...

حياتنا الزوجية
ـــــــــــــــــــ
اهلا بيك يافدم
اشكرك لرأيك ولهذا الاطراء الخاص بالموضوع فماتوفيقى الا بالله

احترم وجهة نظرك جدا وبالنسبةللصور فأعتقد بأن هذه الصور المعروضة لايوجد فيها مايخدش الحياء أو يثير الغرائز فأين الذنب التى تتحدث عنه!!
أرجو لفت نظرى لصورة بعينها تثير الفتنة لدى الجميع وسأقوم بإزالتها فورا
ونصيحتك على راسى يافندم وقد قمت بتغيير تعريفى بنفسى كله
نورت مدونتى واشكرك بمشاركتك

***********************************

مؤمنة
ـــــــــــ
وعليكم السلام ورحمة الله وبركاته
اختى الحبيبة:ربنا يكرمك ويتقبل دعائك
ومن وجهة نظرى ان الناس اتعودت عليه فبقى شئ بالنسبة لهم عادى
نورتينى حبيبتى ودمتى بخير

**********************************

لؤلؤة الرحمن
ـــــــــــــــــ
وعليكم السلام ورحمة الله وبركاته
اختى الحبيبة:وهذا مايثير خنقى وضيقى
ربنا يهدى الجميع
نورتينى حبيبتى ودمتى بخير

*********************************

غادة&رفيدة
ـــــــــــــــ
اختى الحبيبة:وهذا فعلا انسب مايقال
نورتينى ياجميلة ودمتى بخير

********************************

دنيتى الجميلة
ـــــــــــــــــ
اختى الحبيبة:اهلا اهلا بالقمر وحشتينى ياجميلة وكل سنة وانتى بالف خير
ربنا يتقبل دعائك يارب
نورتينى حبيبتى ودمتى بخير

**********************************

المحارب المتيم
ــــــــــــــ
اهلا بيك يافندم
وعندك حق دى كلمة حلوة من الطبيب للمريض تجعله يشعر بتحسن كبير لكن هنقول ايه مش كل الدكاترة ممكن تقدر حاجة ذى كده
اللهم اشفى مرضى المسلمين
دمت طيبا ولمدونتى زائرا

***********************************

ميادة
ـــــــــ
اختى الحبيبة:اذيك ياعمتو مادى وايه اخبار احمد يارب تكونوا بخير
ماتحرمش منك ياحبيبتى وانا فعلا بعد ماروحت ضحكت على اسلوبه ويقيت أقول لو ماكنتش دفعت له الكشف كان عمل معايا ايه!!
نورتينى حبيبتى ودمتى بخير

**********************************

مجداوية
ــــــــــ
وعليكم السلام ورحمة الله وبركاته
اختى الحبيبة:تعرفى انا متهيألى انه ملتحى لأنه معندوش وقت يحلق هههههه
معقول ممكن يعمل كده اذا كنت مش مستوعبة موقف ذى ده يحصل مع اطفال فازاى يعمل كده معاكى!!!
بجد حسبى الله ونعم الوكيل
نورتينى حبيبتى ودمتى بخير

*********************************

رحيل
ـــــــــ
اختى الحبيبة:انا برضه كنت فاكرة كده بس واضح انها كانت اشاعة
اشكرك لمشاركتك ولتعريفى بالميعاد واذا سنحت الظروف باذن الله سأكون متواجدة
نورتينى حبيبتى ودمتى بخير

عبده الرايق يقول...

عجبنى قوى حوارك مع الطبيب
بس معلشى فى السؤال
انتى متأكده انك كنتى فى عياده وده طبيب
ولا اتوبيس وده كمسرى ؟؟؟؟

mnoon يقول...

موناليزا
فكرتنى بأختى لما جات تولد
نظراً لأن السيد الدكتور مستعجل
قرر يبدأ شغل
( العمليه يعنى )
قبل البنج ما يشتغل
حسبى الله ونعم الوكيل
بس الحمدلله زى ما فيه الوحش فيه برضه الكويس
ربنا يبارك لنا فى الكويسين منهم

حياتنا الزوجية...(عضو رابطة هويتي إسلامية) يقول...

بارك الله فيك وادام الله عليك الفهم والاخلاص لدين الله وبالتواضع يرفع المرء المراتب و الدرجات وما تواضع عبدا لله الا رفعه جزاك الله خيرا علي الكثير الكثير اما بخصوص التحديد فاني لن ادقق في الصور فالاسلوب الخاص بكي هو ما شدني كي اقرأ اما بخصوص الصور فاني هذه المسائلة لا تخضع للفتنة او تحريك الغرائز اما انها تخضع لقانون الله عز وجل هل تؤمنين بان الحجاب هو الفرض فما دون ذلك فالانسان معاقب عليه فهل يصح ان تخرجي بمثل صورة الطبيبة التي تحمل الطفل ثم تقولين هذا لا يحرك الغريزة فالامر فيه عورة يصبح حرام وانتي افضل من ان تكوني موناليزا

Mony يقول...

اولا سلامة ابنك

ربنا يقومة بالسلامه و يقر عينك بيه


لاسف في كتير من الدكاترة بيتعاملوا مع المرضي بالشكل ده و اكننا السبب في بلاوي الدنيا كلها

و ده نتيجة الزحمة و سوء التخطيط

و عدم دخولك في معادك ده اكيد لان الدكتور مجاش في ميعاده
ده غير التليفونات اللي بيستقبلها طول فترة الكشف


ربنا يسترها علينا

mahasen saber يقول...

للاسف فيه دكاتره طبيا ناجحين بس انسانيا فاشلين
يعن درجة التواصل بينهم وبين البشر صفر
...ربنا يمتع ابن اخوكى بالصحه ويبارك لاهله فيه
...انا زرتك فى المدونه التانيه انا بحتار بصراحه فى تعدد المدونات ربنا يسعدك
ونورتينى يا جميله بالزياره الف الف شكر يا حبيبتى
يا ام ابتسامه حلوه....

wanna b a physician يقول...

ههههههههههههه
عجبنى اوى وهو بيقول لما الجوع يقرصه هياكل
انتى متأكده انه دكتور مش يمكن سمكرى ولا حاجة ومتنكر
ربنا يهدي الحميع

الربان يقول...

تحياتي

- ان شاء الله يكون الله شفاه و عفاه..و الف لا باس عليه,

-- اشكرك كل الشكر علي مواساتك الكريمة ...لا اراكم الله مكروها في عزيز لديكم.

- للاسف الشديد ، حتي بعض كبار الاساتذة
الاطباء لا يحترمون مواعيد العيادة...و الام المرضي....و لا يكلفوا انفسهم الاتصال بالعيادة للاعتذار عن التأخير او لاعلام المرضي المنتظرين بموعد وصوله.

و في احد المرات اثناء وجودي بالقاهرة
احتجت ان اراجع اخصائي انف وأذن و حنجرة...فذهبت الي احدهم و يحمل شهادة
الدكتورة...و حين اراد الكشف علي الحلق
رأيته سيستخدم الملعقة المعدنية العتيقة التي عفا عليها الزمن و التي
من الممكن جدا ان تنقل الامراض...و كان
يجب عليه استخدام الملعقة الخشبية التي تستخدم مرة واحدة....بالرغم من ان الكشف مرتفع القيمة.....فرفضت و تركت
حجرة الكشف غير نادم....

تحياتي و تقديري اختي الفاضلة...و جزاك
الله عنا خير الجزاء

حنين القلب يقول...

لا ده مش حوار مع طبيب خالص
عارفه الحوار مع المكانيكى هيكون ارقى من كده
دلوقتى الدكاترة اهم شىء عندهم الفلوس تزيد يعنى لا تقوليلى الطب ده رساله مقدسه والكلام بتاع زمان
انسسسسسسسسسسسسسسسسسسسسسى

ربنا ما يحوجنا ليهم ابدا
تقبلى مرورى

موناليزا يقول...

عبده الرايق
ـــــــــــــــ
اهلا بيك استاذ عبده
هو فعلا كان حوار فريد من نوعه :)
وانطباعى انه كان بقال وانا زبونة واقفة وورايا طابور
دمت طيبا ولمدونتى زائرا

**********************************

منوون
ــــــــــ
اختى الحبيبة:اهلا اهلا بالقمر وحشتيييينى جدا جدا ايه الغيبة دى
تعرفى انك فكرتينى ببنت خالتى برضه حصلت معاها نفس الحركة شكلهم كده كانوا عند دكتور واحد:)
نورتينى حبيبتى ودمتى بخير
*******************************

حياتنا الزوجية
ــــــــــــــــــ
اهلا بيك يافندم
ربنا يكرمك ويتقبل دعائك ولك بالمثل ان شاء الله
مع احترامى لمداخلتك اسمح لى اخى الفاضل فالصور المعروضة ليست تعبير عن نفسى وانما هى بغرض توضيح فكرة الموضوع والموضوع لا يطلب ابدا تقليدها فيما ترتدى ولكن فى اسلوب معاملتها مع الطفل
اما عن عورة المرأة وفرضية الحجاب فهذا شئ بديهى مفروغ منه طبعا ولكن لكل مقام مقال
"انتى افضل من ان تكونى موناليزا"
لا افهم هل هذا مدح أم ذم فموناليزا هو اسمى!!!!
********************************

مونى
ــــــــــ
اختى الحبيبة:ربنا يكرمك يارب بس هو ابن اخويا وفعلا بعتيره ابنى
وفعلا يمكن تكون الزحمة هى السبب بس المريض مالوش ذنب يكفيه الامه
تعرفى انى واحدة صاحبتى لما عرفت قالتلى ده بالمقارنه بالدكتور اللى رحتله يعتبر نعمة!
أنتى متخيلة وصلت لإيه!!!
نورتينى حبيبتى ودمتى بخير
***********************************

محاسن صابر
ــــــــــــــ
اختى الحبيبة:اهلا بيكى فى زيارتك الاولى
وياستى انتى تنورينى فى اى مكان ويسعدنى تواجدك دائما
بس دى هى مدونتى الاساسية
ربنا يكرمك يارب ويكفينا جميعا شر الامراض
والاجمل هو زيارتك وتعليقك
نورتينى ياقمر ودمتى بخير
*******************************

ونا بى فيزيائى
ــــــــــــــــ
اهلا بيك يادكتور
وهو كان فى عيادة والله فالمفروض انه دكتور:)
المهم ماتقولش الجملة دى خالص لمرضاك
دمت طيبا ولمدونتى زائرا

*********************************

الربان
ـــــــــــــ
اهلا بيك يافندم
ربنا يكرمك ويتقبل دعائك
لا شكر على واجب اخى الفاضل فهذا حقك علىَّ كمسلم
وهذا حقا مايثير بداخلنا التعجب كيف يحمل اعلى الدرجات العلمية ويغلى قيمة الكشف ليبين انه لايكشف الا على فئة معينة ومع ذلك تجد هذه السلبيات
عافانا الله واياكم من التوجه لمثل هؤلاء
اشكرك جدا لمشاركتك
دمت طيبا ولمدونتى زائرا
**********************************

حنين القلب
ــــــــــــ
اختى الحبيبة:انا قلت كده برضه:)
على الاقل الميكانيكى هيخاف على أكل عيشه
ربنا يتقبل دعائك ومايحوجنا ليهم ابدا
نورتينى ياقمر ودمتى بخير

mostafa rayan يقول...

للأسفبعض الأطباء بيتحولو لمجرد تجار مش ملائكة رحمة زي المفروض
صراحة انا بقلق قوي من الدكاترة اللي بيكون عندهمزحمة كتير قوي كدة بحس انه بيلكلك العيان وبيتعامل بنظرية اهو كله شغل ولو حد مات غيره كتير عايشين
ربنا يعافينا
وانا متفق مع رأي ابو اسامة في حالات الأطفال والنساء افضل الطبيبات النساء
تحياتي لك ودمت بخير

Dr. Ibrahim يقول...

لا المفروض ده مش يتقال عليه طبيب

حسبى الله ونعم الوكيل

أنصحك شوفى غيره طبعاً

د/هيما

موناليزا يقول...

مصطفى ريان
ــــــــــــــ
اهلا بيك استاذ مصطفى
واشكرك جدا لمشاركتك بس لو اى حد ذهب لدكتور معندوش حد هياخد فكرة مبدأية انه مش شاطر
واذا كان على الطبيبات فياخوفى ليكونوا هما كمان كده
دمت طيبا ولمدونتى زائرا
*********************************
د/هيما
ـــــــــ
اهلا بيك يادكتور
ربنا يكرمك طمنتنى على مستقبل المرضى معاك
ومن غير ماتقول معنديش نية اتعامل معاه تانى ابدا
دمت طيبا ولمدونتى زائرا

سابرينا يقول...

كيفك ياااااااموني
وااااااااحشني كتيييييير

بجد قعدت أضحك !

ده أكيد مش حاسس بنفسه!

موناليزا يقول...

سابرينا
ــــــــــــــ
اختى الحبيبة:اهلا اهلا وحشتينى ياقمر
يارب تكونى بخير
انا الحمدلله بخير
المصيبة ليكون حاسس ودى طبيعته !!!
وده احتمال كبير
نورتينى حبيبتى واشكرك لمشاركتك