الأحد، 26 أكتوبر 2008

الموبايل .. للجميع

مما لاشك فيه أن ظاهرة الموبايل إنتشرت إنتشار غير عادى. وعلى كل المستويات والفئات العمرية.
لم يعُد غريب أن يحمله طفل فى مدرسة أو عامل بسيط.الكل أصبح سواء.. يحملون الموبايل.
وأصبح الشخص يتعرف من خلال نوع المحمول الذى يحمله!!يعنى لو حد معندوش موبايل هيعرفوا شخصيته إزاى!
ما يلفت إنتباهى فى إنتشار هذه الظاهرة السلبيات الكثيرة التى تصدر مِِن مَن يحملوه.
ولذلك أردت أن ألفت الإنتباه لبعض هذه الأشياء التى تصدر من البعض مِنَّا سواء بقصد أو بدون قصد.
*ضياع الأموال:
ــــــــــــــــــــــــ
وذلك من خلال:- إرسال رسائل كثيرة بلامعنى أو بدافع الدعابة.
-عمل مايسمى بالكول تون وهى النغمة التى يستمع اليها من يتصل بك .شوف الدقيقة بكام وأنت بتستخدم كام دقيقة فى المرة الواحدة وبتغير الكول تون كل قد إيه.يعنى كمان بتدفع فلوس فى حاجة أنت مش بتسمعها. وكمان بتجبر الأخرين على الإستماع لشئ قد لايفضلوه.
-عمل مكالمات للتحدث فيما لايفيد كالنميمة أو لمجرد تضييع الوقت.
-إضطرار بعض الفئات إلى السَلف لكى يشحن موبايله فقط ليصبح معه رصيد.
-شراء كفرات وإكسسوارات كثيرة جداً للموبايل الواحد.
-حمل أكثر من خط داخل الموبايل الواحد أو حمل موبايلين معاً. وطبعاً لكل خط مصاريفه.
نعانى من إرتفاع الأسعار الدائم فلماذ لانرشد إستهلاكنا!؟.
*معصية الله:
ــــــــــــــــــ
وذلك من خلال:-إضاعة الوقت.

كم يضيع الوقت من خلال ألعاب الموبايل والإستماع إلى النغمات وتبادلها مع الأخرين بصفة مستمرة .
-إستخدامه بشكل خاطئ.
كأن نستخدمه فى المعاكسات وإصطياد الفتيات.
النغمات المزعجة دون أى مراعاة للمكان أو للأشخاص.على فكرة إختيارك للنغمة يحدد نوع شخصيتك وانطباع الأخرين عنك.
إستخدام الكاميرات فى تصوير الفتيات سواء بعلمهم أو لأ. ومايترتب عليه من مفسدة.
إستخدام البلوتوث فى نقل مايخدش الحياء أو يثير الفتن.إلخ




وأخيراً أدعو إلى عدم إستخدام الموبايل فيما يغضب الله.
ولنجعل من هواتفنا أدلةً لنا لا علينا يوم القيامة.
وياريت كل واحد يقولى نغمة موبايله إيه؟.


هناك 64 تعليقًا:

rovy يقول...

اختى الحبيبه
دائما ما تضعين يدكى على جرح من جراح الامه و نعم هذا الموبايل اصبح جرح والم بدل من ان يصبح نعمه حوله الكثيرون الى نقمه .. اصبح عبء على كثير من الاسر و الاباء و احيانا فى الافراح والمناسبات يستغله بعض التافهين فى تصوير و احراج الفتيات
غير عابئين باحد و لا بأى عرف او تقاليد ..
اعلم ايضا ان هناك من يستلف و يدان لشحن الموبايل و هناك من يفضل شحن الموبايل على الطعام و الشراب و ربما الدواء ايوجد هم اكبر من هذا ..

رحمنا الله من تلك التكنولوجيا التى بغبائنا حولناها لنقمه بدل من ان تكون نعمه ..
و لكنى ايضا و للحق يجب ان اعترف ان له مزايا عديده اذا احسنا استخدامه ..

ودى و تحياتى

ahmed_k يقول...

أول تعليق أحمدك يااااارب
أولا نغمة موبايلي حاليا نغمة جيتار
وبفكر اغيرها دلوقتي
وبالنسبه للكول تون عمري ما عملتها
لأني شايف زي ما ذكرتي أنه مضيعه وإهدار للمال بدون حق وبدون أي فائده
ولأني مبحبهاش مش عارف ليه
وفعلا المحمول إختراع عظيم إن أحسن إستخدامه ويصبح طامه إذا أسيئ إستخدامه ككل الإختراعات
ولكن أخذ من أموال الشعب وتفكيرهم
أكبر من الغرض الذي صنع من أجله

موضوعك مهم يا ريت نفكر فعلا
في جعله للأمر الضروري والتواصل الطيب
وفقط

دمتي بكل خير

SHAPE YOUR LIFE (ABOALI) يقول...

هههههههههههه
انا نغمة موبيلى ماشربتش من نيلها لشرين
انتى عارفانى وطنى حر

المهم
كل مخترع جديد ليه مميزاته وليه عيوبه
بس اللى انتى عرضيته من عيوب
دى ثقافة مجتمع بشكل عام
فيه اختلال فى معرفة القيمه والنمو
يعنى الموضوع برمته
ليه ارتباطات مع شبيهات اخرى فى حياتنا
من حوالى شهر وانا تطاردنى فتاه من المنيا على الموبيل معاكسات
الغريبه انها فى كلية الطب
بس يا اختى الفراغ والتفكك وحالة اللامبالاه بتعمل كتيير
ربنا يهدى


هات موبيل وهاتى موبيل
ماهو الموبيلات الوان
واحنا عالم جنان
كاتش كادر فى اللولو
عاوزين كلنا نبقى لولو
علشان جنهم مستنيه
كل حبايبها اللولو
استعد ترن هناك
على اصحابك واحجز كام شباك
هناك الشحن ببلاش
وهاتعيش عيشه متنساهاش
انت بس خليك كده
بس اعرف ان هناك النقل
من غير بلوتوث
ابسط انا قولتك على العنوان


اشكرك على البوست المعبر عن الواقع

انتى بقى النغمة بتاعتك ايه

قوس قزح يقول...

موضوع الموبايل و انتشاره مش جديد
لكن الجديد انك اتكلمتى عن الواحد فعلا ممكن يعملها و ميكونش واخد باله انها غلط
وفى حاجة كمان انا لاحظتها ان الناس بتجرى ورا اخر موديل اللى بيكون فى احدث الامكانيات و بيباروا بعض فيها مع ان فى الاخر هتلاقيه مش بيستخدمه الا فى المكالمات و الرسايل و اوقات الكاميرا دول موجودين فى اى موبايل دلوقتى يعنى مش لازم يكون غالى

انتى عايزة تعرفى نغمة الموبايل علشان تحددى شخصية كل واحد اكيد :)
انا نغمتى موسيقى اعلان سيراميك كيلوباتراو هى موسيقى هادية

الازهرى يقول...

صديقتى العزيزة

اؤيدك جدا فى هذه الدعوة
كما ادعوا الىان لا يتعامل معه اساسا الا من يحتاج اليه بالفعل
والى ان نرشد استهلاكهونتعامل معه للغرض الذى وجد لاجله وهو قضاء المصالح والتعامل مع الامور العاجلة

تحياتى على الموضوع الجيد كما تعودنا

كـــيــــــــارا يقول...

علي فكره موضوع مهم اوووي

خاصه الاستخدام الخاطئ للتليفون

في ناس بتستخدمه مش مثلا تطمن اهلها

ولا لا انها تجيب حد مثلاعشان شغل ولا اي حاجه

لا بيستخدموه في حاجات مضره وملهاش لازمه

بجد ياموناليزا

بوست في منتهي الاهميه وجه في وقته

انا كنت اتكلمت عن ه من حوالي سنتين

بس طبعا اداركي ليه الان اختلف

Bosssssy يقول...

موضوعك جميل أوى ياموناليزا .....

فكرنى بحكاية طريفة...

لما كنت بعمل الدبلومة فى كفر الشيخ السنه اللى فاتت ، فى يوم تدريبي فى المدرسة لقيت واحد ست جاية تشوف مستوى ابنها ...ابنها ده فى سنه اولى اعدادى.. وكل المدرسين قالولها ان مستواه وحش وكمان بيهرب من المدرسة .....

لقيت الست بتقول لمشرفة الدور والله انا قلت لباباه طلعه من المدرسة خالص خليه يتعلمله صنعة وبالفلوس اللى هيقبضها يجيبله موبايل احسن .......

انا فكرتها بتهذر لكن ماكانش على وشها اى علامات الهذار وكانت بتتكلم بجد..

قلت لاحول ولا قوة الا بالله عاوزة الولد يسيب التعليم عشان يجيبله موبايل...

شفتى العجب !!!!!!!!!!

سامحينى انى اتأخرت عليكي كتير.....

مع حبي .........

بوووووسي

romansy يقول...

جميل موضوعك انا هقولك ان الموبايل دا نعمه من ربنا كبيره لانه ممكن يسعف مصاب فى اى مكان مش فيه تليفون ودى حصلت معايا بصفه شخصيه
بس احنا لازم نستفاد بيه على قدر الامكان
مش نستخدمه على الفاضى والمليان زى ما بيقولوا

KHALED يقول...

أنا زعلان ...
أنا زعلان بجد ....
أنا أتسرق منى عدة إن 70 ميوزك جديدة لانج .. سرقها اللص من جيب الجاكيت بتاعى .......

عارفة لو الفلوس إللى اندفعت فى الموبايل و المكالمات إللى مالهاش لازمة أتلمت لعمل الخير أعتقد إن الناس فى مصر هايكون ليهم شأن تانى
بس نقول لمين
أنا نغمتى
ATTRACTION

Tamer Alhosiny يقول...

اختي العزيزة
صاحبة المدونة

اولا انا سعيد اني اول تعليق علي الموضوع ده
لانه موضوع هام جدا
طبعا انا واحد من الناس
بستخدم المحمول لمدد طويلة وبعتمد عليه طول الوقت
ومش بقدر استغني عنه لدرجة ان زي ما قلتي عندي اكتر من خط واكتر من موبايل
بس صدقيني

انتي كلامك صحيح جدا
وانا استخدامي للموبايل في البداية كان فيه اخطاء كتير
بس مع الوقت والشغل
صحيح الموبايل بيشيل اغاني
دلوقتي مش بقيت اصلا بفي احطها عليه
وكمان مش بقيت اهتم بنوعه
يعني قبل كدة كنت بفضل الموبايل الغالي وبالامكانيات دلوقتي اي حاجة سمبل افضل

وطبعا كل شيء ليه مميزاته وعيوبه
وليه منافعه ومضاره
وانا الحمد لله اقدر اصنف نفسي رغم استخدامه لمدد طويلة
اني بستخدمه استخدام صحيح
لاني مش بستخدمه بدون سبب
ومش بستخدمه غير في الامور الهامة
وامور العمل

تحياتي لموضوعك الجميل
وجميل جدا تنبيهم للفتيات بالذات في استخدامه
وسعيد بالرسالة الاي بحسها في مدونتك باستمرار

وفقك الله

تحياتي
تامر الحسيني
انسان عاشق حر

د. إيمان مكاوي يقول...

موضوع فعلا مهم ...فهي ظاهرة تستحق الإهتمام والرصد
ونغمتي أغنية لسامي يوسف
تحياتي

مؤمنه يقول...

السلام عليكم ورحمة الله وبركاته

حبيبتى فى الله موناليزا

ضحكتنى اوى ياريت كل واحد يقولى نغمة موبيله ايه
حسستينى انك ماما وخايفه علينا

انا الحمد لله نغمات دينيه
عامله النغمه العامه سامى يوسف يارب العالمين

حلو كده؟

حبيبتى فى الله ويشهد الله انى احبك فى الله وما اعلق هنا الا واكون قد استفدت فكره جديره بالافاده

فعلا ظاهرة الموبيلات انتشرت مع الطفال فى المدارس رغم خورته الصحيه ورغم عدم انتفاعهم منه فى شئ وتعلم الامهات ذلك وتكون حجتهم (امال يكون اقل من زمايله) ودى يندرج تحت البوست الماضى وتربية الام لابنائها المفروض تحسسه قيمته الذاتيه فى ذاته مش فى موبيل او اى شئ مادى
وكمان الاستهلاك المادى للموبيلات من كروت شحن ونغمات كول تون واكسسوارات كما تفضلتى بالذكر وهذه الاموال نعمه من الله علينا سيحاسبنا عليها يوم القيامه عن مالنا من اين اكتسبناه وفيما انفقناه

دومتى بكل خير ودامت لنا كلماتك الطيبه والمفيده

والسلام عليكم ورحمة الله وبركاته

همس الاحباب يقول...

طبعا كعادتك دائما سباقة للخير
والنصح والارشاد
وانا متفق معكى فيما ذكرتيه
نعم هو اصبح ضرورة نظرا للظروف الحياتية السريعة ومواكبة لعصر التكنولوجيا الرهيب لكن لابد من استخدامه الاستخدام الامثل وبعيدا عن ارتكاب المعاصى
نغمة موبايلى هو فيه نغمات كتيرة
لكل شخص غالبا اغنية
بس النغمة المسجلة للهاتف نغمة الشيماء
كم ناشد المختار ربه .
بصراحة عجبتنى
تحياتى

رفقة عمر يقول...

فعلا عندك حق نصايح غاليه جدا
جزاكى الله خيرا

أمة الله يقول...

جزاكى الله خيرا على هذا البيان و ارجو من الله عز و جل ان يجعله فى ميزان حسناتك و ارجو ممن يقرء هذا الموضوع ان يعمل به.

انا حره يقول...

انا نغمه الموبيل بتاعتى دعاء للسديس مغيرتهاش بقالى حوالى سنتين

التقليعه دلوقتى نوكيا بتقولك لان موبيلك بيعبر عنك وانا اقع عالارض من الضحك لان موبيلى حبيبى قديييييم جدا واشتكى وبكى ياعينى وانا مش راحماه ولا ناويه اغيره لانى ببساطه بحبه وبيبنى وبينه عشره طويله

ربنا يخليهولى ويشفيه اصله ياعينى بطاريته بعافيه شويتين

الرومـيصاء يقول...

السلام عليكم
اولا عامله ايه

الموضوع ده بجد كان دايما شاغلنى


وافكر لو الفلوس دى ادفعت فى حاجه مفيده
كان الحال هيبقى ازاى

الله المستعان

احبك فى الله

غير معرف يقول...

عندك حق والله ياموناليزا
احنا اكتر شعب بيستخدم الموبايل غلط
وده نظرا لثقافه الاستهلاك اللي بتجري في عروقنا
مكل شعوب العالم عندها موبايل محدش بيعمل بيه العمايل السوده غير العرب
ولا اخفي عليكي سرا (هههههه ) حلوه الفصحي دي نغمه موبايلي sway بتاعه دين مارتن

Mony يقول...

جزاك الله خيرا يا موناليزا علي التذكرة الدائمة


انا نغمة موبايلي (اضفيت)لمشاري



ربنا يفعنا و ينفعك بالتذكرة

و يجعلها في ميزان حسناتك

Gannah يقول...

موناليزا
الموبايل اصبح من الضرورات ولكن كما تقولى يساء استخدامه
وحقيقى بضحك جداا لما واحدة صاحبتى تيجى تقولى شفتى الرسالة دى جتلى من مصر
ومش عارفة ليه موضوع ارسال الرسايل بدون داع وليه النغمات والكوا تونز وغيرها
الجهاز للمكالمات المهمة والرسايل المهمة وبس مش للرغى
وحقيقى احنا بنصرف فلوس كتير فى الحاجات دى وبعدين نقول بلد فقير وممعناش
الموضوع محتاج الناس تفكر شوية
انا نغمتى نوكيا وتليفونى بدون كاميرا لانه ممنوع دخولها الحرم
وماشى حاله بيتكلم ويبعت رسايل
تحياتى

Heba Sayed يقول...

السلام عليكم

جزاكى الله خيرا يا موناليزا

موضوعك جميل اوى

واتمنى انى اشوف موضوعات ليكى كتيرة وجميلة ديما

السلام عليكم

*الطالبة عفو الله *زوزو يقول...

ما شاء الله عليك موناليزا
صدقت في كل ما قلتيه
فعلا غالبية الناس يسيؤون استخدام الموبايل
مما سجلب لهم المضرة اكثر من المنفعة
ربنا يهدي الجميع
بارك الله فيك
و جزاك الله خيرا

أختكم فى الله يقول...

حبيببتى ازيك عاملة ايه

وحشتينى

بوست هايل ومهم جدا

كلنا كنا محتاجين نقرا كلام زى ده

جزاكى الله خيرا يا قمر

موناليزا يقول...

روفى
ــــــــــ
اختى الحبيبة:معكى حق فهو نقمة لمن يسئ استخدامه واشكرك جدا على هذه الامثلة التى ذكرتيها
ومع ذلك لا ننكر ابدا اهميته فى حياتنا
جعلنا الله ممن يستمعون الى القول فيتبعون احسنه
نورتينى حبيبتى الغالية ودمتى بخير

*********************************

أحمد-ك
ــــــــــ
اهلا بيك استاذ احمد
وكأنك أول تعليق أخى الكريم
عاجبنى جدا رايك فى الكول تون وكويس ان مش انا لوحدى اللى بفكر كده
"ولكن أخذ من أموال الشعب وتفكيرهم
أكبر من الغرض الذي صنع من أجله"
الجملة دى بجد فيها الخلاصة ..ربنا يكرمك
دمت طيبا ولمدونتى زائرا

*********************************

ابو على
ــــــــــ
اهلا بيك يافندم
استغربت ضحكك فى الاول ولما قلتلى نغمتك لقيت نفسى برضه بضحك:)
كما قلت اخى الكريم "انها ثقافة مجتمع"
اما عن الفتاة التى تطاردك فانا شايفة ان كليتها ملهاش دعوة سواء طب او خدمة اجتماعية من لاحياء فيه لاخير فيه
ومعك حق لان الفراغ ممكن يعمل مصائب ولذلك فهو من ضمن النعم التى سنسأل عنها يوم القيامة

ماشاء الله عندك قدرة على سجع كلمات معبرة عن الموضوع بطريقة رائعة
وكلماتك ايضا جميلة
انا اللى بشكرك جدا على مشاركتك الثرية
وانا ياسيدى نغمة موبايلى حاليا "صامت"
دمت طيبا ولمدونتى زائرا

*********************************

قوس قزح
ـــــــــــ
اختى الحبيبة:اهلا اهلا اذيك يادودو
معاكى حق وده فعلا شئ غريب يجيبوا موبايلات فيها امكانيات كتير وطبعا بتكون غالية ومابيستخدموهاش!!
ههههه هو فعلا ده من ضمن اسباب السؤال
والاعلان ده مش بتاع مهند برضه؟!
اعذرينى مش متابعة الاعلانات اوى وده اخر اعلان شوفته بيعلن عن السيراميك
نورتينى حبيبتى واشكرك لمشاركتك

**********************************

الازهرى
ـــــــــ
اهلا بيك يافندم
لا افضل "صديقتى العزيزة"
اشكرك جدا لتأييدى فى هذه الدعوة ولنكن أخى الكريم من المنفذين لها
اشكرك جدا لرايك ولمشاركتك
دمت طيبا ولمدونتى زائرا

**********************************

كيارا
ــــــــــ
اختى الحبيبة:فعلا الاستخدام الخاطئ اصبح ظاهرة منتشرة جدا
عافانا الله واياكم منها
اشكرك جدا لرايك ولمشاركتك
نورتينى حبيبتى ودمتى بخير

********************************

بوسى
ـــــــــ
اختى الحبيبة:اهلا اهلا بالقمر اذيك يابوسى يارب تكونى بخير
اشكرك جدا لرايك
ايوة ياحبيبتى هتستغربى ليه دلؤتى بيحكمه على الشخص من نوع موبايله مش من نوع شهادته!!
ولا يهمك ياقمر المهم انك جيتى وطمنتينى عليكى اخيرا
نورتينى حبيبتى ودمتى بخير

**********************************

رومانسى
ـــــــــــــ
اهلا بيك يافندم
اشكرك جدا لرايك
وفعلا الموبايل له اهمية كبيرة فى حياتنا ولا احد ينكر هذا ولكن مساوئ استخدامه اصبحت فى ازدياد
دمت طيبا ولمدونتى زائرا

**********************************

خالد
ـــــــــ
اهلا بيك استاذ خالد
هو ليك حق تزعل طبعا وخصوصا انه كمان سرقه من جيب الجاكت واكيد طبعا كنت لابسه وده بيدل انه حرامى جريييييئ جداا ومش هامه حاجة او يمكن يكون محترف كمان
بس لعله خير فداك من كل شر ومحدش عارف كانت جايه فى ايه

صدقت والله ده كان مشاكل كتير اتحلت على الاقل داخل كل شخص
اشكرك لتجاوبك مع سؤالى
دمت طيبا ولمدونتى زائرا

*********************************

تامر الحسينى
ــــــــــــــ
اهلا بيك استاذ تامر
كأنك اول تعليق يافندم انا يسعدنى تعليقك مهما كان ترتيبه
اشكرك جدا لرايك فى مواضيعى المتواضعة فماتوفيقى الا بالله
واشكرك ايضا لمشاركتك ومافيها من صراحة
دمت طيبا ولمدونتى زائرا

*********************************

ايما(ام البنين)
ــــــــــــــ
اختى الحبيبة:اشكرك جدا لرايك ولمشاركتك
نورتينى حبيبتى ودمتى بخير

*******************************

مؤمنة
ــــــــــ
وعليكم السلام ورحمة الله وبركاته
اختى الحبيبة:هههههه والله انتى عسل
وانا فعلا بحبكم جدا
جميلة نغمتك ياقمر ربنا يعزك ويسعدك يارب

احبك الذى احببتنى فيه وانا ايضا احبك فى الله ومبسوطة جدا بكلماتك ويارب افضل عند حسن ظنك دايما وتسعدنى زيارتك دائما وتعليقك الذى يثرى الموضوع
أدامك الله لى اختا فى الله وماحرمنى من ارائك فيما اكتب
نورتينى حبيبتى ودمتى بخير

*********************************

همس الاحباب
ـــــــــــــ
اهلا بيك استاذ خالد
ربنا يكرمك فماتوفيقى الا بالله
اشكرك جدا لمشاركتك
دمت طيبا ولمدونتى زائرا

*********************************

رفقة عمر
ــــــــــــ
اختى الحبيبة: ربنا يكرمك وجزاكم مثله
اشكرك جدا لمشاركتك
نورتينى ياقمر ودمتى بخير

***********************************

أمة الله
ـــــــــــ
اختى الحبيبة:اهلا بيكى فى زيارتك الاولى
ربنا يكرمك ويتقبل دعائك
اشكرك جدا لمشاركتك
نورتى مدونتى ودمتى بخير

**********************************

أنا حرة
ـــــــــــ
اختى الحبيبة:تعرفى فكرتينى بنفسى انا كمان موبايلى قدييم جداا بس بحبه جداا وفيه عشرة بينا وبين بعض فصعب برضه انى افرط فيه
أقوللك هاتيله بطارية جديدة وان شاء الله يقوم بالسلامة
نورتينى حبيبتى واشكرك جدا لمشاركتك

********************************

الروميصاء
ـــــــــــــــــ
وعليكم السلام ورحمة الله وبركاته
انا الحمدلله بخير اذيك انتى ياقمر
ومعاكى حق احنا ممكن نوفر فلوس كتير اوى ونستفيد بيها فى حاجات تانية ولذلك لنكن قدوة للاخرين

أحبك الذى احببتنى فيه وانا ايضا احبك فى الله
جمعنا الله تحت ظله فى يوم لاظل فيه الا ظله
نورتينى حبيبتى واشكرك جدا لمشاركتك

*********************************

ميادة
ـــــــــــ
اختى الحبيبة:تصدقى فعلا احنا دون عن بقية المجتمعات اللى بيستخدموه بطريقة مستفزة
وحلو الفصحى يامادى ههههه يعنى انتى هتقولى حاجة وحشة!!
ورغم انى ماسمعتش نغمتك بس انا واثقة فى ذوقك ياقمر
نورتينى حبيبتى واشكرك جدا لمشاركتك

*********************************

مونى
ــــــــ
اختى الحبيبة:وجزاكم مثله ياقمر
نورتينى حبيبتى واشكرك جدا لمشاركتك

*******************************

جنة
ــــــــــ
اختى الحبيبة:اهلا ياجميلة
ايه ده ايه ده شكل كده موبايلاتنا نوعها واحد:)
وده نفس تفكيرى بيبعت وبيستقبل يبقى عيبه ايه؟!
نورتينى ياجميلة واشكرك جدا لمشاركتك

*********************************

هبة سيد
ـــــــــ
وعليكم السلام ورحمة الله وبركاته
اختى الحبيبة:اشكرك جدا لرايك ولمشاركتك
وان شاء الله تكون مواضيعى دايما عند حسن ظنك
ربنا يكرمك لرايك ولمشاركتك
نورتى مدونتى ودمتى بخير

*********************************

الطالبة عفو الله
ـــــــــــــــــ
اختى الحبيبة:اهلا اهلا مبسوطة جدا بزيارتك وبعودتك ويارب تكونى بخير
ربنا يكرمك ياقمر على رايك ومشاركتك
نورتينى حبيبتى ودمتى بخير

*********************************

اختكم فى الله
ــــــــــــــــ
اختى الحبيبة:اهلا اهلا اذيك ياجميلة وحشتينى ياحبيبتى ايه الغيبة دى كلها يارب تكونى بخير
انا الحمدلله بخير اذيك انتى ياقمر
ربنا يكرمك لرايك ولمشاركتك
نورتينى حبيبتى ودمتى بخير

mohamed ghalia يقول...

نعم والله صدقتى اننا نحسن الإستعمال السىء للأشياء
ربنا يهدى شبابنا
تحياتى على الموضوع الرائع
دمتى بود وفى سعادة
نغمت موبايلى هيا نغمة التوحيد
لا إله إلا الله

amr يقول...

جزاك الله خيراااااااا

موناليزا وجعله ربى فى ميزان حسناتك

موضوع رائع وقضيه تستحق الوقفه والكلام

ولكن ما احب ان أشير اليه أن الادوات والاجهزه الحديثه تعتبر سلاح ذو حدين

وهى ملك للجميع فمن الممكن ان تستخدم الموبيل فى أجراء المكالمات او تحمل عليه القران وتقضى وقتك فى طاعه
أو تتصل على أرقام عشوائيه فقط لتزعج الناس وتحمل عليه مقاطع وصور تخدش الحياء وتكسبك المعاصى

أشكرك موناليزا على موضوعك الطيب

خالص تحياتى

دنيتى الجميله يقول...

هو فعلا الموبايل بقى للجميع
بس هو فعلا فيه كتير من تضيعه المال
وبرضوا فيه كتير من الاشياء النافعه
انا بحبه علشان بطمن دايما على جوزى واقوله هات وهات وهات معاك حاجات لينا
هههههههههههههههههه
هو فعلا ليه مميزات بس احنا نستخدمه صح
وفى صله ارحامنا "ميزدكول"
هههههههه
انا عاجبنى جدا بوستاتك واتخاذك للامور وطرق حلها
ممكن يا موناليزا تقوليلى انتى بتشتغلى ايه او مجال دراستك ايه

☼♫♪ عمــاد الدين يــوسف ☼♫♪ يقول...

ههههههههههههههههههه

للاسف شعب اقرع ونزهي

يعني ممكن ميكونش معايا تمن كارت الشحن بس اهم حاجه يبقى معايا موبايل وكمان نوع جديد زي نوكي عشرتاشر عشروميه

هههههههههههه

تحياتي

momken يقول...

بوست جميل
بارك الله فيكى

وجعلك سبب فى التغير للافضل

ولا نكون ممن قال فيهم الله سبحانه

بسم الله الرحمن الرحيم

(الم تر الى الذين بدلوا نعمت الله مكفراً واحلو قومهم دار البوار * جهنم يصلونها وبئس القرار )

صدق الله العظيم

البوست عجبنى جداً

اه صحيح نغمه التنبيه عندى كتير لان عندى كلر جروب
لكن الاساسيه تكبيرات العيد بتاعه مكه

تحياتى

Geo Amr يقول...

ياه الموبيل دة قصة لوحدة اكتر حاجة بتخنقنى جداااااااااا انى بكون فى اى وسيلة مواصلات وتشوفى ناس مشغلة موبيل بصوت عالى بجد بكون مدايق جداااااااا وربنا يهدى الناس كلها

موناليزا يقول...

محمد غالية
ــــــــــــ
اهلا بيك استاذ محمد
اشكرك جدا لرايك ولمشاركتك
وجميلة هى نغمتك ربنا يعزك
دمت طيبا ولمدونتى زائرا

**********************************

عمرو
ــــــــــ
اهلا بيك استاذ عمرو
ربنا يكرمك وجزاكم مثله ان شاء الله
اشكرك جدا لرايك ولمشاركتك
دمت طيبا ولمدونتى زائرا

**********************************

دنيتى الجميلة
ــــــــــــــــ
اختى الحبيبة:اشكرك جدا لمشاركتك
ولرايك فيما اكتب
اما عن سؤالك فانا حاليا لااعمل ومجال تخصصى هو تربية الطفل
يعنى اى حاجة فى المجال ده انا تحت امرك
نورتينى حبيبتى ودمتى بخير

***********************************

عماد الدين يوسف
ـــــــــــــــــــ
اهلا بيك استاذ عماد
فعلا والله تناقض غريب
اشكرك جدا لرايك ولمشاركتك
دمت طيبا ولمدونتى زائرا

**********************************

ممكن
ـــــــ
اهلا بيك يافندم
ربنا يكرمك واشكرك جدا لرايك ولمشاركتك فماتوفيقى الا بالله
جميلة هى نغمتك الاساسية ربنا يعزك
دمت طيبا ولمدونتى زائرا

**********************************

جيو عمرو
ــــــــ
اهلا بيك يافندم
هو فى وسيلة المواصلات وبس ده حتى فى المستشفيات واماكن العمل والشارع و.. و.. و... ده كتير اوى يافندم ماتعدش
اشكرك جدا لمشاركتك
دمت طيبا ولمدونتى زائرا

حياتنا الزوجية...(عضو رابطة هويتي إسلامية) يقول...

السلام عليكم ورحمة الله وبركاته

علي فكرة فيكي عيب خطير بجد حاولي تصلحي منه وحاولي تتخلصي منه

انتي عرفه ايه هو..؟

دائما سباقه بالخير دائما

خلليلي موضوع اتكلم فيه ينوبك ثواب



بارك الله فيك وجزاك الله خير الجزاء

موضوع مهم للغاية

اتمني لكي التوفيق والنجاح الدائم



حياتنا

حياتنا الزوجية...(عضو رابطة هويتي إسلامية) يقول...

نسيت اقولك

نغمة موبيلي هي حاشاك يا رسول الله



حياتنا

أبو فاطمة / هويتي إسلامية - مدونون من أجل فلسطين يقول...

يا حلاوة يا حلاوة يا ولاد

كل دول مستنيييييييييييين يعرفوا نغمة موبيل العمدة اية اية مصر فايدك يا رأفت .

واد يا جبيصة الست دي عاوزة ايه

موبيلات ايه اللي بتتكلم عليها دي هتبوظ الاقتصاد ..

لو سمحتي سويرس بيكسب مننا علشان التنصير وانت مالك انت ..

عالم بتكسب من الهوا


جزاك الله خيرا علي الموضوع

مهم وفي هذا الوقت خصوصا

اخلصي النيه لأن الموضوع مهم

ابو فاطمة من امام سجن حزين واولادة ببلغ عنك هناك

المستنصر بالله يقول...

عندك حق فعلا للاسف احنا دايما نستخدم التكنولوجيا استخدام سئ
موضوع مفيد جدا

تحياتى لحضرتك

فاتيما يقول...

أنا مبحبش الموبايل خااااااالص يا مون مون
بأعتبره أقتحام لحريتى الشخصية
أى حد عاوز يقتحم عليكى أى لحظة من غير تردد
هوه فايدته الحقيقية وقت الزنقة
لما تكونى عاوزة توصلى لحد ضرورى او حد يوصلك لهدف طارىء
عشان كدا عندى موبايل بس قافله طول الوقت
و يمكن كمان لأنى مبتحركش كتير و معنديش أشغال و لا عايشة الحياة العصرية اللى بيقول عليها خالد همس الأحباب و مضطرة بسببها أستخدمه
بس أهو موجود و خلاص للطوارىء
النغمة بتاعتى أغلى الحبايب
لنوال الزغبى
دى آخر نغمة حطيتها قبل يوسف ما يمشى و مش ناوية أغيرها غير لما يرجع
تحياتى يا مون مون

GiGi world يقول...

معاكى حق
الا وجع الدماغ اللى شغل كول النهار فى الجامعه من تبادل النغمات ومن اننا نسمع النغمات
ربنايعزك بجد هبل

SemSem يقول...

اول زيارة لى فى هذه المدونة
بصراحة موضوع الموبايلات دلوقتى بقى للوجاهه اكتر منه للاستفادة
لان دلوقتى الشخص بيفكر فى تليفون من احدث المواصفات فى حين ان التليفون مش محتاج كل المواصفات دى كلها ولكن هى للوجاهه فقط وانا بعتبر دا داء

تحياتى

elsha3er يقول...

والله عندك حق الشعب دة فقراء ولكن زى اعياد الميلاد والماتش اللى لازم اتفرج عليه فى الاستاد سبحان الله على دى ناس والله



احمد الشاعر

Unknown يقول...

السلام عليكم
ورحمة الله تعالى وبركاته
لن أنسى اندهاشى واستغرابى
ساعة ما شفت (بائع المناديل
الورقية )اللى قاعد فى الشارع
بيطلع الموبايل وبيرد عليه كمان
يعنى بحق وحقيقى مش لعبة بيتمنظر
به !!!والله وقفت وتنحت !بردون يعنى
اصل انا ما قلتلكيش :انا ماعنديش
موبايل لحد الحين !!!!!!!!!!!!!!!!!!
اول مرةاجى هنا وسعيدة انى جيت هنا
:):):)

امل يقول...

السلام عليكم ورحمة الله وبركاته
معك حق أختي الحبيبة وفيه حاجة عايزة انبه عليها ان بعض الاخوات المحجبات لما بيعملوا فرح اسلامي ياخدوا بالهم ان مفيش حد يصورهم بكاميرا الموبايلات لأن دي مشكلة أنهم بيبقوا واخدين راحتهم في لبسهم ربنا يسترنا جميعا أما بالنسبة لرنتي فهي نوكيا تون وغالبا بعمله صامت أو اجتماع أو اكتم الصوت بمجرد ما يرن لأني بصراحة مش بحب الرنات خااااالص حتى لو كانت أناشيد لأني بضطر أكتمه قبل ما يبدأ

أميرة يقول...

السلام عليكم ورحمة الله وبركاته

ازيك يا أمة الله :) ليكي وحشة و زي ما قالوا دايما سباقة بالخير :)

الموبيل زي ما بيه مساويء عديدة ليه حسنة واحدة في حياتي اني اتكلم اتطمن علي اللي بحبهم و بعيدين عني :( غير كده باه فهو مأساة في حياتي ..كل من هب و دب و عايزني يكلمني و ال 24 ساعة طبعا في الشغل .. بس الحسنة اللي فيه بصراحة عندي تخليني استحمل كل المساويء

عايزة اقولك ان في ناس بقت بتشيل 3 اجهزة محمول مش 2 زي الاول .. مش قادرة اتخيل ايه الاستفادة من كل دا .. بتخلص بيه شغل اوك انما مش بالطريقة دي .. وتقريبا المميزات بقت واحدة يعني ترسي علي موبيل واحدة بدل الدوشة اللي شايلها دي كلها..

حاولت ادور علي النغمة بتاعتي علي النت علشان احطلك اللينك بتاعها بس معرفتش بس ممكن اقولك كلماتها ايه ..

انشودة بتغنيها بنت صغيرة بس صوتها حلو اوي بتقول :

هذا القرآن بايدينا
نور في الظلمة يهدينا
كلمات الله لنا نزلت تصلح دنيانا والدينَ

قد بدد ليل الاوثانَ
قد فجر نبع الايمانَ
الله تعالي نزله كي يرشدنا و يزكينا

صبحا ومساءا نتلوه
قد افلح قوم حفظوه
و اطاعوه واتبعوه
فامتلأ القلب الرياحينَ


معجزة جـاءت لمحـمــد
والغار و جبريل يشهد
أقرأ باسم الله الاوحد
نزلت فأضاءت وادينا

يا ربي فنورلي دربي
وعلي ذكرك ثبت قلبي
واختم بالرحمة والتوبِ
قولوا اخواني آمـــينَ
__________
دي اول حاجة حطيتها كنغمة اساسية و مغيرتهاش من يومهابس عاملة للبشر بتوع الشغل انشودة لسوف اعود يا امي لاحمد بو خاطر .. متسالنيش ليه .. يمكن حنين اني مش عايزة ابقي معاهم و ارجع لحضن امي .. البقية الباقيه حاجات متنوعة كده ما بين اهلي و شوية ناس اعرفهم بردة حاجات قريب من دي بس اللي شغالة ليل ونهار هي هذا القرآن :)

هحاول اشوفلها صرفة اسمعهالك .. هتعجبك اوي ان شاء الله

دوشتكم معلش ..

ربنا يسمعنا عنك كل خير ان شاء الله ودايما داعية للخير :)

أميرة يقول...

فكرتيني بحكاية الكول تون دي .. عندي راجل كبارة كده و مدير و ابنه زميلي و بيشتغل معانا .. عارفة حاطط ايه ؟؟ اخاصمك أه لنانسي عجرم والناس بتقول للاوبريتور ممكن نكلم الحاج فلان و يطلع حاطط دي ... لا تعليق طبعا

وغير كده كتير بس دي اللي كنت مستغرباها جدا ..

علي كل حال المستفيد الوحيد هي شركات المحمول .. ضريبة المبيعات في كل حتة 10 % و فودافون ( الله يسامحهم ) عاملينها 15% دا غير فروق الاسعار بين ال3 شركات .. ومع كل دا كمان سوء الخدمة نفسها .. بس في الاخر هنقول ايه اللي رماك علي المر:(

"أم أدهم المصرية" يقول...

السلام عليكم ورحمه الله وبركاته
------------------------------
والله عندك حق فى كل حرف حبيبتى
بس اغلبنا حاليا وعلى مااعتقد اننا بدئنا نستعمل المحمول فى الاستخدام الصح ليه اكيد فى لسه ناس شايله التليفون دلع ومنظره بس دى اعتقد انها بقت قله حاليا لانه بقى شيئ مهم جدا
ودى من نعم ربنا اللى لازم نستخدمها فعلا فيما يرضيه
اما ياستى انا نغمتى بئه للعفاسى "الهى "
والكول تون اسماء الله الحسنى للعفاسى
وعندك حق التليفون بيدل على شخصيه صاحبه
تسلمى حبيبتى على البوست الرائع
-----------------------------------

Mafrousa يقول...

مشروع فاشل فشل زريع
الموبايل يكون مفيد لرجال الاعمال ليمكنهم من متابعة اعمالهم
او الناس بتاعة الورصة
اما غير كده
رزق الهبل على المجانين
و الهبل هيه شركات المحمول
و المجانين معروفين
فى ناس بقا عندها هوس فى تغير الموديل علشان ولا حاجه و فى الاخر تلاقيه كبيره يدوس و يقول الو
و الاطفال اللى بقت تتباعا بينها و بين بعضها بالموبيلات


على العموم ده مؤشر لنهاية العالم
كل ما بنتقدم تكنولوجيا كل لما بنقص فى عمر البشرية
و غير ان لغاية النهاردة الاقاويل بتتضارب على الذبذبات الصادرة من التليفون...بتؤثر على المخ و حاجات اكيد اكتر بكتير بس مش عاوزين يقولولنا
المهم احسن حاجه بلاها الموبايل اللى بقا يستخدم زية و زي النت فى البلاوي
اللهم احفظنا
وثبت قلوبنا على دينك

Bongo يقول...

السلام عليكم و رحمة الله

اولا وحشاااني يا موناليزا :)

ثانيا , فأنا رأيي ان الموبايل زيه زي اي شئ ممكن يبقي اختراع مفيد جدااا و ممكن يبقي اختراع مضر جدااا
و ده بيتحدد علي حسب استخدامنا ليه .

موضوع جميل
جزاكي الله خيرا :)

آخر العنقود يقول...

قلتى اللى بيدور في دماغنا بجد
دايما بفكر ايه لازمة البهرجة فى الموبايلات
مع انها حاجة كويسة طبعا وضرورية تقريبا فى وقتنا ده
يبقى نستخدمها لضرورتها مش للمنظرة اللى بتحصل دلوقتى
لو فكرنا اننا هنتحاسب ونتسأل على كل حاجة بنعملها وبنصرفها
كان الحال اتغير

دمتى فى رعاية الله حبيبتى
انى احبك فى الله بصدق

موناليزا يقول...

حياتنا الزوجية
ــــــــــــــــــ
وعليكم السلام ورحمة الله وبركاته
اهلا بيك يافندم
هههههه وده يعتبر عيب؟؟
يسعدنى ان تتناول اى موضوع تكلمت فيه من قبل لانه اكيد هيكون باسلوب مختلف ووجهة نظر تحترم فتوكل على الله ودعنا تستمتع بما تكتب
ربنا يكرمك ويتقبل دعائك
واشكرك جدا لرايك ولمشاركتك
ولإجابة سؤالى
دمت طيبا ولمدونتى زائرا

*********************************

جبهة الدفاع عن العمدة حزين
ــــــــــــــــــــــــــــ
اهلا بيك يافندم فى زيارتك الاولى
هههههههه النية متوفرة فعلا اخى الكريم
اشكرك جدا لرايك ولمشاركتك
دمت طيبا ولمدونتى زائرا

*********************************

المستنصر بالله
ــــــــــــــــــ
اهلا بيك يافندم
اشكرك جدا لرايك ولمشاركتك
دمت طيبا ولمدونتى زائرا

*********************************

فاتيما
ــــــــــ
اختى الحبيبة:اهلا اهلا بأم يوسف الغالية
وحشتينى جدا ويارب تكونى بخير
انا معاكى انه اقتحام لحرية الفرد بس انتى ليه قافلاه ياطماطم مش يمكن يوسف يحاول يتصل عليه؟
خلتينى ادمع والله لما عرفت نغمتك ان شاء الله تغيريها قريب وتعمليها"ادينى رجعتلك"لعمرو دياب:)
نورتينى حبيبتى ودمتى بخير

**********************************

جيجى
ــــــــــ
اختى الحبيبة:اه والله ومفيش مراعاة لاى حد
اشكرك جدا لمشاركتك
نورتينى حبيبتى ودمتى بخير

******************************

سمسم
ـــــــــ
اهلا بيك استاذ اسامةفى زيارتك الاولى
صدقت الشعور بالنقص والحاجة الى لفت الانتباه من وجهةنظرى تجعل الفرد يلجأ الى هذه المنظرة
نورت مدونتى واشكرك لمشاركتك

******************************

الشاعر
ــــــــــ
اهلا بيك استاذ احمد
وهذا التناقض الغريب مايميز شعبنا الحبيب عن بقية الشعوب الاخرى
اشكرك جدا لمشاركتك
دمت طيبا ولمدونتى زائرا

*********************************

نور اهاتى
ـــــــــــــــ
وعليكم السلام ورحمة الله وبركاته
اختى الحبيبة:هههههههه فكرتينى بنفسى قبل مااشترى موبايل كان الكومسرى معاه واحد وشغال لعب فى النغمات وكأنه بيقول انا معايا موبايل وانتوا لا هههههه
عادى ياحبيبتى دلؤتى الاطفال فى المدارس معاهم واحدث نوع كمان
وانا كمان سعدت بزيارتك وبتعليقك
على فكرة دى زيارتك التانية:)
نورتينى حبيبتى ودمتى بخير

******************************

أمل
ــــــــــ
وعليكم السلام ورحمة الله وبركاته
اختى الحبيبة:اثارتى نقطة مهمة فعلا واللى يضايق اكتر ان اللى بيصوروا بيبقوا بنات بس بيفرجوا اخواتهم وقرايبهم عادى خالص وكانهم مش فاهمين العروسة عملت الفرح اسلامى ليه!!
ههههههه تعرفى اننا ذى بعض فى النقطة دى انا كمان عاملاه صامت طول الوقت مش بحب اسمع صوته:)
اشكرك جدا لمشاركتك ولعودتك مرة اخرى
نورتينى حبيبتى ودمتى بخير

******************************

اليس فى بلاد العجائب
ــــــــــــــــــــــ
وعليكم السلام ورحمة الله وبركاته
اختى الحبيبة:اهلا اهلا اليس الجميلة وحشتيييينى جدا عاش من شافك يارب تكونى بخير
يارب تطمنى على احبابك دايما وذى مابيقولوا لاجل الورد
ياخبر 3موبايلات بيشيلوهم ازاى؟؟

الله جميلة اوى هذه الكلمات مشكورة حبيبتى انك كتبتيها اول مرة اسمعها
ربنا يكرمك يارب
ايه دوشتينى دى؟؟؟ ده كلام واحدة تقوله لاختها اللى بقى لها كتير جدا ماشافتهاش
ماتقوليهاش تانى وياستى ادوشينى براحتك على قلبى ذى العسل:)
الكول تون ده بقى حكاية لوحده مش كفاية الدوشة اللى حوالينا لا وكمان وانتى بتتصلى
وكويس انه ماعملهاش شخبط شخابيط هههههه
ماحرمنى الله منك ويارب دايما تكونى بخير
نورتينى حبيبتى واسعدتينى بزيارتك

********************************

لؤلؤة الرحمن
ـــــــــــــــــــ
وعليكم السلام ورحمة الله وبركاته
اختى الحبيبة:مع احترامى لرايك انا شايفة غير كده خالص بدليل ان كل الفئات وكل الاعمار معاهم الموبايل واحدث موديل كمان يعنى ممكن جدا اغلبية اللى معاهم مايعرفوش يستخدموا كل الامكانيات الموجودة فيه
وهو فعلا بقى حاجة مهمة فى حياتنا ولكن للاسف قليلا مايدركون ذلك
اشكرك جدا لرايك ولمشاركتك
ولاجابة سؤالى
نورتينى حبيبتى ودمتى بخير

**********************************

واحدة مفروسة
ــــــــــــــ
اختى الحبيبة:عجبنى اوى كلامك على غالبية الناس اللى كبيرهم يقولوا آلو ومع ذلك معاهم احدث انواع
الذبذبات ده بقى موضوع خطير جدا لان فيه ناس الموبايل مابيفارقهومش لحظة مع انهم لسة طلبه لدرجة انهم بيدخلوه معاهم الحمام!!! وطبعا وقت النوم جنبهم على المخدة!! ايه ياجماعة في ايه
ده لو رئيس مجلس ادارة مش هيعمل كده!
ومع ذلك لاننكر اهميته ولكننا نتحدث عن استخداماته الخاطئة
نورتينى حبيبتى واشكرك جدا لمشاركتك

*****************************

بونجو
ــــــــ
وعليكم السلام ورحمة الله وبركاته
اختى الحبيبة:اهلا اهلا اذيك ياجميلة ايه الغيبة دى كلها يارب تكونى بخير
وانتى كمان وحشتييينى جدا
اشكرك جدا لرايك ولمشاركتك
نورتينى ياقمر وسلامى ليوكى

*********************************

اخر العنقود
ــــــــــــــــ
اختى الحبيبة:احبك الذى احببتنى فيه
وانا ايضا اشهد الجميع بانى احبك فى الله
جمعنا الله فى ظله فى يوم لاظل فيه الا ظله
اشكرك جدا لرايك ولمشاركتك
نورتينى حبيبتى ودمتى بخير

أسير الجراح يقول...

اختى الغالية موناليزا


ازيك ؟

يارب تكونى بخير باذن الله


موضوعك جميل جدا


مش عارف اعلق


اعمل اية بقى


عموما فى تعليق خاص انشاء الله


كل الود


اسير الجراح

Unknown يقول...

بارك الله فيكم

الموبايل للأسف خرج من الإطار المحدد له والوظيفة بتاعته لمحيط اكبر بكتير

ربنا يستر

Unknown يقول...

http://kalemat-alsamt.blogspot.com/2008/10/blog-post_8365.html

شاركينا الراي

ولك جزييل الشكر

الزواج.....روضة الحب يقول...

السلام عليكم
موضوعك ملح جدا ربنا يباركلك وينفع بيكي
بيني وبينك أنا نفسي أعيش في عالم مافيهوش تليفونات خالص والا حتي كمبيوتر
دمت بكل خير وسعادة

عـــفـــراء يقول...

السلام عليكم
الاخت الفاضلة .. كيفك يارب ان تكونى بااحسن الاحوال
انا معاكى على فكرة فى ان النغمة بتعبر عن شخصية الانسان مهما كانت طبيعتها فكل شخص بيخص نغمتة وفقا لحالته المزاجية او اهواءه
انا استغربت فعلا من عرضك للموضوع وفى نفس الوقت هو يستحق ودة الجميل اللى اتعودنا منك عليه.
اما من ناحية الكول تون
ففكرتينى بموقف بيخص النقطة دى تحديدا
كنت بخلص شغل على الجهاز لجمعية خيرية
فجت واحدة وعندها بنت جامعية طلبت من طلب غريب
قالتلى ممكن تدخلى على النت وتجيبى لبنتى كام كود للنغمات معينة للكول تون ههههههههه بجد انا استغربت وضحكت ان وصل الحال لدرجة دى
وفعلا دخلت وجبتلها
بس لا يمنع ان تكون النغمة دى دعاء او ايات ذكر مهما كانت تمنها بتكون افادة وتذكرة للغير ،وهدى الله الجميع
المشكلة الكبرى انك فعلا تلاقى طفل فى ابتدائى معاه تليفون لية ماتفهميش
وبيستخدمة فى اية بردة ماتفهميش
هو فعلا كل شئ فى الدنيا سلاح ذو حدين
بس احنا بنسيئ اكتر مابنحسن الاستخدام
على الرغم انك ممكن تلاقى المنفعة اكتر من الضرر بس فى النهاية هقولك اية "بشــر"
"وربنا يهدى "
اعذرينى للاطالة
وكل التقدير......

DR.HAMAS يقول...

جزاكم الله خيرا

موضوع هادف و ممتاز

أنا بصراحة نغمة موبايلى بغيرها كل شوية

و منها

1- مع الله فى القلب لما انكسر
2-هو الحبيب الذى ترجى شفاعته



جزاكم الله خيرا





د.حماس

محمود ابوالعزم يقول...

أجمل حاجه في كلامك انه مش باندفاع
بهدوء واقناع
واجمل حاجه في موبايلي انه مافيهوش كل الخواص دي
يادوبك بيقول الو

PrInCeSS BeRy يقول...

حيييى ازيك يا قمر اخبارك اية وحشتينى كتير

معاكى حق انو الموبيل فعلا من الاساسيات وحل حجات كتيرة اوى بصى هوة فعلا الانسان من جواة لو حد كويس هيستخدمة صح انما لو استخدمة غلط سدقينى ربنا ما بيسبش عبدو فى الضلال تسلم ايدك

غير معرف يقول...

نغمتي ايه؟
هههههههههههههه
اقولك؟؟
عارفة اغنية هم النم يا روحي بتاعة عفاف راضي؟ فاكراها؟
هي دي نغمتي
نياهاهاهاهاها

مها ميهوووو

موناليزا يقول...

اسير الجراح
ــــــــــــــ
اهلا بيك يافندم
انا الحمدلله بخير اشكرك لسؤالك
اشكرك جدا لرايك فى الموضوع
كنت قول نغمة موبايلك:)
عموما نحن فى انتظار تعليقكم
دمت طيبا ولمدونتى زائرا

***********************************

نور
ـــــــــ
اختى الحبيبة:اشكرك جدا لمشاركتك
وقد قمت بزيارة الرابط وابداء رأيى اشكر ثقتكم الغالية
نورتينى حبيبتى ودمتى بخير

******************************

الزواج روضة الحب
ــــــــــــــــــــــ
وعليكم السلام ورحمة الله وبركاته
اختى الحبيبة:ربنا يكرمك ويقومك بالسلامة
اشكرك جدا لرايك ولمشاركتك
نورتينى حبيبتى ودمتى بخير

******************************

عفراء
ــــــــــ
وعليكم السلام ورحمة الله وبركاته
اختى الحبيبة:انا الحمدلله بخير اذيك انتى ياقمر
ياستى طولى براحتك ولايهمك البيت بيتك والمدونة ترحب بتعليقك مهما كان حجمه
تعرفى الغريب بجد ايه!؟ ان اللى بيستخدموه بطريقة سيئة بالنسبة لنا بيقولوا علينا متخلفين!!!! وعلى رأى اللى بيقولوها وعجبى
اشكرك جدا لرايك ولمشاركتك
نورتينى حبيبتى ودمتى بخير

***********************************

د/حماس
ـــــــــ
اهلا بيك يادكتور فى زيارتك الاولى
ربنا يكرمك واشكرك جدا لرايك ولمشاركتك
نورت مدونتى وارجو دوام التواصل

*******************************

اوراق لها قلوب
ــــــــــــــــــ
اهلا بيك يافندم فى زيارتك الاولى
اشكرك جدا فهذا من فضل ربى
بس اكيد موبايلك فيه نغمات وكنا عايزين نعرف النغمة الرئيسية
نورت مدونتى وارجو دوام التواصل

********************************

برينسيس بيرى
ــــــــــــــ
اختى الحبيبة:اهلا اهلا بالقمر انا الحمدلله بخير اذيك انتى ياحبيبتى
صدقتى ياغاليتى
اشكرك جدا لمشاركتك
نورتينى ياقمر ودمتى بخير

*********************************

احسن تستاهل
ـــــــــــــــــ
اختى الحبيبة:ياعسل طبعا عارفاها
تعرفى لايقة عليكى بجد
مش بعيد على حد جواه برئ اوى كده ذيك ياقمر
نورتينى حبيبتى واشكرك لمشاركتك

منى يقول...

نغمه موبايلى مفيش
اصلى لسه مش بشيل موبايل غير وانا مسافره بس ان شاء الله صوت الكروان هيبقى رنتى لما يكون معايا
تعرفى الاطفال بيستغربوا و ويقولولى انتى ليه مش معاكى موبايل؟؟
ربنا يجعله نعمه مش نقمه
بس انتى فصصتيه
وعندك حق لان فيه مناظر تفور الدم
تحياتى لملاحظاتك
لام

Maha Shahen يقول...

ناقشتى الموضوع بطريقة جميله
بس انا شخصيا مبعملش بالموبايل بتاعى الا أنى اتصل بحد أو استقبل اتصال من حد غير كدا فهو في مكانه
بيفدنى كتير لما اكون بره البيت او انه يفكرنى بمعاد أو استخدمه كمنبه

ونغمة موبايلى مزعجه شوية هى مجرد نغمه بس علشان تنبهنى ان الموبايل بيرن

اختى قالتلى شيء جميل قوى
قالتلى انتى اللي مسكك موبايل ظلمك ههههههههههههه
طبعا دا تريقه انى مبعرفش فيه شيء ومبدورش اعرف شيء اكتر من الحاجات اللي بحتاج استخدمها فيه
لو الانسان حدد هو عايز ايه مش هيشغل نفسه لا بكول تون ولا بنوع نغمته ولا هيستخدم موبايله في نشر فساد

خالص تحياتى لقلم مفكر

ندا منير يقول...

جميل موضوعك قوى يا موناليزا
وفعلا هو بقى حاجة منتشرة قوى
بس والله مهم برضه
وبيفيد وبيخدم فى مواقف كتير قوى
بس المهم احنا بنستخدمه ازاى

موناليزا يقول...

منى
ــــــــــ
اختى الحبيبة:اشكرك جدا لرايك ولمشاركتك
نورتينى حبيبتى ودمتى بخير

**********************************

نور شاهين
ـــــــــــ
اختى الحبيبة:اشكرك جدا لرايك
وسبحان الله نفس استخدامى لموبايلى
حتى النغمة تقريبا واحدة:):)
اشكرك جدا لمشاركتك
نورتينى حبيبتى ودمتى بخير

******************************

ندا منير
ــــــــــ
اختى الحبيبة:ربنا يكرمك ده بس من ذوقك ياقمر فماتوفيقى الا بالله
وكما قلتى المهم فى كيفية استخدامه
نورتينى حبيبتى ودمتى بخير

son's egypt يقول...

السلام عليكم
فعلا بقي شئ مستفز اننا نلاقي واحد في ابتدائي شاي الموبايل
معرفش هو شايلة ليه
غير بقي الافكار الي كل شوية تتطلع عن المويايل
الرنات وكلام من ده

موناليزا يقول...

ابن مصر
ــــــــــــ
وعليكم السلام ورحمة الله وبركاته
اهلا بيك يافندم
اللى شوفته بيستخدموه فى استعمال الكاميرا غير كده فانا كمان عاوزة اعرف ليه الاهل اشتروه لابنهم فى سن صغير كده!!
اشكرك جدا لمشاركتك
دمت طيبا ولمدونتى زائرا