الخميس، 1 يناير 2009

جوجو و زمردة (1)


اليوم هو آخر إمتحان "لزمردة" هذا العام-يعنى بداية الأجازة-. ينتظرها أخوها"جوجو" بفارغ الصبر لكى يلعبا سوياً دون قيود أو إلتزام بالمذاكرة.
وأخيراً جاءت زمردة ..ولكنها مُنهارة وتبكى. ذهب "جوجو"إليها مسرعاً.
- إيه اللى حصل؟ مالك بس بتعيطى ليه؟؟
- عاااااااااااااااااا
- ممكن تبطلى عياط وتهدى كده وتعرفينى مالك؟
تحاول جاهدة أن تتماسك حتى تستطيع التحدث ولكنها قالت بصوت تخنقه العبرات.
- "تيمو" صاحبتى سرقتنى وجعلت المراقب يشتمنى ويطردنى قدام كل العيال وقالت إنى بغش منها. عاااااااااااااااا
- ليه ده كله إيه اللى حصل؟ واحدة واحدة عشان أفهم.
-كدابة وحرامية وافترت عليا قالت كلام كله كذب.
أول ما الإمتحان بدأ وهى مش سايبانى كل شوية طلبات مرة عايزة المسطرة والقلم الرصاص ومرة قلمها خلص وعايزة قلم إحتياطى من بتوعى ومرة علبة الهندسة وهكذا ورغم انى مش بحب أعطى حاجتى لحد- لأنك عارف حاجتى غالية عندى ازاى -لأنها كلها جوايز من المدرسين بتوعى بس لأنها صاحبتى وفى امتحان كمان معرفتش أتأخر عنها وفجأة دخل مدرس المادة عشان يطمن علينا ويسلم علينا قبل ماناخد الأجازة المهم طلبت منها علبة الهندسة بتاعتى عشان لما ييجى عندى يعرف أنى دايماً ملتزمة ومعايا حاجتى وفجأة لقيتها بتعلى صوتها وبتقول للمراقب وللمدرس زمردة من ساعتها بتغش منى وبتستخدم حاجتى. المراقب اتنرفز من صوتها العالى وجة عندى وخد علبة الهندسة واداهلها وهددنى لو جالى منك شكوى تانى هسحب منك ورقتك. طبعا كان شكلى وحش جدا .و المدرس بتاعنا ساعتها خرج. كنت انا لسة مخلصتش ومحتاجة علبةالهندسة والمسطرة والقلم الرصاص.فطلبتهم منها تانى من غير ما المراقب ياخد باله هى برضه زعقت ونادت للمراقب وسلمت ورقتها وخرجت ومعاها حاجتى. وأنا قعدت أعيط ومعرفتش أكمل الإمتحان.
- وأنتى مادافعتيش عن نفسك ليه؟.
- مقدرتش أنطق ومكنتش مصدقة أصلاً اللى بيحصل. أنا عمرى ماعملت فيها حاجة وحشة. عملت معايا كده ليـه؟
-هى بيتها فين واحنا نقول لأهلها؟
- وأنا هستفيد إيه الإمتحان وماكملتوش وحاجتى أكيد مش هترضى ترجعهالى تانى.
وعموما هى راحت بلدهم النهاردة وياعالم هتيجى السنة الجاية ولا لأ.
-طب هى عملت ليه كده؟
-مش عارفة يمكن لأنى أشطر منها يمكن تكون بتغير منى ومن لبسى ومن حاجتى ..يمكن.
- خلاص بقى ماتزعليش إن شاء الله هتنجحى وحاجتك هترجعلك تانى سليمة مش يمكن تحس على دمها وتجيبهوملك تانى أو تيجى تتأسف لك.
-ده أنا لو شوفتها مش هخلى فيها حتة سليمة. أو ممكن أعمل فيها اللى هى عملته معايا.
-مش أنتى اللى تعملى كده. أنتى طول عمرك نضيفة فأوعى تبقى زيها. وربنا هينتقملك منها.
رفعت يديها للسماء ودموعها تغرق وجنتيها قائلة بصوت عالى.
- يااارب أنت عارف أنى مظلومة وبريئة من كل اللى قالته عليا وأنا مش مسمحاها
هات لى حقى ورجعلى حاجتى.
-تمت-.
--------------------------
دعوة للمناقشة:-
ــــــــــــــــــــــــ
ماذا تفعل لو كنت مكان "زمردة"؟.
ماذا سيكون رد فعلك لو كنت مكان "جوجو"؟.

هناك 50 تعليقًا:

princess يقول...

انا كنت مش هعرف اعملها حاجة برده كنت هدعى وخلاص
فى ناس بتسمى ده ضعف لكن انا مبحبش ااذى حد ومع الوقت بسامح:)

romansy يقول...

كل سنه وانتى طيبه
والله زمرده كلها ذوق ورقه
هى عملت خير
يبقى ان شاء الله ربنا هيديها خير
وتنجح
ودى حاجه كويسه ليها انها عرفت صاحبتها
ومين الوحش ومين الحلو
اما بقى جوجو
فكلامه عاقل قوى
وياريت زمرده تسمع كلامه

جنّي يقول...

السلام عليكم

هذه هي القصة الابدية العلاقة بين الخير والشر ..

وبالرغم من ان الحق ابلج والباطل لجلج ..
الا ان الشر في ايامنا اصبح عالي الصوت .. وهذا ما يحدث اليوم بين الخير الممثل في حماس والمقاومة الشريفة وبين يهود وعلى رأسهم وزيرتهم القذرة واتباع يهود من العملاء والخونة وممن خنعوا واحسوا بالعجز بل ويهاجمون الحق الممثل في حماس وفصائل المقاومة الحرة الشريفة وسار ورائهم البعض بخسة وحقارة .. وعلى هذه البنت ان تدافع عن حقها بكل ما اوتيت من قوة وعلى اخوها ان يدافع عنها ويقف معها بكل قوة ولا يسخر منها .. كما سخروا من صواريخ القسام والجهاد ..

لكي التحية

SHAPE YOUR LIFE (ABOALI) يقول...

جوجو وزمرده وتيمو

فى الحقيقة وغير الحقيقه ولو بنبحث عن الحقييقة واكيد الحقيقة مرة وطعمها لاذع

زمرده شاطره وجميلة وبتاخد جوايز بس عندها حياء سلبى
تيمو خايبة وبليدة بس ذكية وعندها جراءة

كل واحد استعمل ذكائه

وكانت النتيجة ايه ؟
زمردة بتعيط
تيمو فرحانة

مع ان زمردة شاطرة

حلو الحوار

الموضوع ده بيفكرنى
ان المؤمن كيس فطن
مش كيس قطن

فى فجوه موجوده فى التعاملات وبنصنعها بين الاجيال
وواضح ان اساسها التربيه
خدى عندك
اللى يضربك اضربه
انت شاطر وهو بليد
انت عاوز فلان يبقى احسن منك
هو وحش انت حلو
ربنا هينتقم منه وانت فى الجنه

وهكذا داوليك
خلل فى التربيه اصيل

علشان كده
الموضوع بتاعك حصل او بوستك المعبر عنه

اجاوب بقى على اسئلتك
لو مكان زمرده
هاقول لنفسى
ليه لم اتمسك بحقى واوضح انى صاحبة الادوات ؟
ليه انهارت وظهرت انى فى الموقف الضعيف ؟
ليه خلتها خدت كل ادوات الهندسه مش ادة واحده بس ؟(ماهو استعباط بقى )

لو مكان جوجو
هاقول
ده درس كبير فى الحياه
بنعرف من خلاله اصحابنا
بنعرف ازاى نتعامل معاهم
دايما نكون عندنا ذكاء فى التعامل
بدون ما نجرح حد
يعنى ممكن نقول بذوق
انا نفسى كنت اديكى الادوات بس انا هاحل بيهم الامتحان او المسائلة دلوقتى

وممكن اقولها
نحاول نقرب من تيمو وتتعرفى عليها
وتنصحيها وتكون صحبتك فى المستقبل لاءنها محتاجة فعلا المساعدة



مع تحياتى لجوجو وزمردة وتيمو
و هما تعبير عن الواقع
و خلاصة تربيتنا
ولالالالالالالالالالالالالالالالالالالالالالالاايه يا فندم

Maha Shahen يقول...

انا لو مكان زمرده مش كنت هسكت والامتحان طالما كدا كدا ضايع بقى اهيص زيها بقى واعلى صوتى واقول الحاجه دى بتاعتى ونكبر الموضوع بقى
والمراقب ساعتها هيضطر يعرف فين الحقيقه
وجوجو يروح معاها لبيت اهلها ويقولهم حتى لو سافرت هيلاقى حد من الجيران معاه رقم مامتها ولا بباها ويشتكيها ليهم
اصل اللي يعمل كدا ببجاحه مش هيرجع الا لما يعمل كوارث تانيه كتير
علي الاقل اهلها ياخدوا بالهم منها ويشوفوا حل لمشكلة بنتهم
وعامة عن تجربه فى ناس بتخون وتغش أقرب الناس ليهم منغير اى قلب هادمين كل المعانى الجميله اللي اتربينا عليها وناسيين العشره والصداقه بس عامة دا ميخلناش نتغير احنا زي ما احنا واللي عايز يخون هو الخسران
حاسه اننا رجعنا لأبتدائى ههههههههه
اخدت قلمى اخد مسطرتى الحقونا بقى

وكل سنه وانتى طيبه يا قمر

طوبه فضه وطوبه دهب يقول...

بصراحه لو مكان زمرده مافيش حاجه تتعمل زياده عن اللى عملته وهى خدت درس مش هتنساه فى حياتها وما حدش بيتعلم ببلاش اما جوجو بقى فالمفروض يحاول يتصل بالبنت او يوصل لعنوانها من اوراقها عشان يجيب لزمرده حقها عشان تحس تانى ان الحق لازم يرجع لصحابه

موناليزا يقول...

برينسيس
ــــــــ
اختى الحبيبة:أشكرك جدا لمشاركتك
بس الدعاء لوحده مش هيعمل حاجة لو كنا ضعفاء ومابنطالبش بحقنا احنا ندعى اه ان ربنا يساعدنا بس ده واحنا بنسعى جاهدين
تعرفى فيه ناس بجد ماتستاهلش انك تسامحيها وطيبتك بتساعدهم على ظلمك اكثر من مرة
تمنياتى لكِ بكل الخير
نورتينى ياجميلة
---------------------------------

رومانسى
ــــــــــ
اهلا بيك يافندم
وانت طيب وبالصحة والسلامة
أشكرك جدا لمشاركتك
بس هتنجح ازاى وهى مكملتش الامتحان
بس انا متفقة معاك جدا فى انها عرفت صاحبتها على حقيقتها
دمت طيبا ولمدونتى زائرا

*********************************

جنى
ـــــــ
وعليكم السلام ورحمة الله وبركاته
اهلا بيك استاذ سيد
وهذا مايثير شجوننا علو صوت الباطل
عذرا اخى الكريم لماذا ذكرت حماس ولم تذكر الفلسطينين بصفة عامة(لا افضل هذه التفرقة بينهم)
وسؤالى الان لو كانت زمردة ضعيفة ولجأت الى جوجو الذى بدوره ايضا ضعيف لمن يلجأون!!؟؟
دمت طيبا ولمدونتى زائرا

********************************

ابو على
ــــــــ
اهلا اهلا أستاذ أبو على صاحب التعليقات المميزة
"حياءسلبى" وصف رائع
"جرائة وذكاء"مش كفاية عليها:)
اشكرك لرايك فى الحوار
:) فعلا المؤمن مش كيس قطن (عجبتنى بجد)
فعلا اخى الكريم كما تفضلت المهم النشأة التربوية السليمة
اشكرك جدا لمشاركتك
ومعك كل الحق يافندم:)
دمت طيبا ولمدونتى زائرا

*********************************

نور شاهين
ــــــــــ
اختى الحبيبة:اشكرك جدا لمشاركتك
ايه القوة دى؟ بجد موقفك ماتوقعتوش:)
بس جميل بجد لو اتصرفنا كده مع حد خد حاجتنا
متفقة معاكى جدا
ايه رايك فى جو المدارس ده مش له وحشة برضه:)
وانتى طيبة ياجميلة
نورتينى حبيبتى ودمتى بخير

***********************************

طوبة ذهب وطوبة فضة
ــــــــــــــــــ
اختى الحبيبة:اشكرك جدا لمشاركتك
فعلا ما اقسى الدروس اللى من النوع ده
وكما قلتى الحق لازم يرجع لصحابه
نورتينى حبيبتى ودمتى بخير

المعتصم يقول...

بسم الله الرحمن الرحيم
السلام عليكم
اختى الكريمة موناليزا
تحياتى وتقديرى
بوست جميل وواقعى
انا لو مكان زمرده مكنتش هسيب حقى وكنت مش هسكت لتيمو مش عارف انا هعمل ايه بس مكنتش هسكت
ولو كنت مكان جوجو كنت وبصراحه ههد الدنيا على تيمو ومش هسيبها وهفكر لها فى مقلب يطلع من عنيها عشان ماتعملش كده تانى مع زمردة وتعمل لها الف حساب
مش عارف انا صح ولا غلط بس احنا اتعودنا فى بلدنا على كده ةاتربينا عليه
تقبلى مرورى وتحياتى
والسلام عليكم ورحمة الله وبركاته

son's egypt يقول...

السلام عليكم
فعلا هو موقف صعب جدا
انك لما تساعد واحد ويقابل المساعدة بالاساءة شئ صعب
ويكمن هي تفاجات من موقفها ومعرفتش ترد عليها
بس انا كان راي انها دافع عن حقها وكانت تستجمع شجعتها وتطالب بحقها

ghorBty يقول...

السلام عليكم ورحمة الله وبركاته

ازيك يا موناليزا وكل عام وانت بخير بمناسبه 1430 هـ يا رب تكون سنه سعيده علي الامة الاسلاميه كلها

حلوة جدا الحكايه بس تعرفي وانا بقرا الحوار افتكرت حكايه فلسطين مع اسرائيل مش عارفه ليه جات في بالي لانها بتحكي عن الحق المغتصب وصاحب الحق ساكت واكتفي بالبكاء والدعاء حتي جوجو لما سمع الحكايه قالها ايه

خلاص بقى ماتزعليش إن شاء الله هتنجحى وحاجتك هترجعلك تانى سليمة مش يمكن تحس على دمها وتجيبهوملك تانى أو تيجى تتأسف لك

ودا حالنا الاستسلام والحق عمره ما بيرجع كدا لا يضيع حق وراءه مطالب وبما اننا كل اللي علينا اننا ندعو للسلام يبقي حقنا ضاع لان المغتصب دا عمره ما هيحس بالذنب ولا هيتاسف ابدا

يا ريت بجد نتعلم من الحكايه وهقولك انا لو مكان زمردة
مش هسكت علي حقي ابدا وهطالب بيه ومدام الحق معايا وربنا شايفني دفعت عنه اكيد هيبين الحق ويرجعه ليه

اما لو مكان جوجو

كنت هعاتبها واقولها لا للسلبيه لن يضيع حق وراءه مطالب وهساعدها في استرداد حقها مدام عارف ان دا حقها وهي اولي بيه


دمت بخير

غربتي

مسدس صغير يقول...

كل سنه وانتى طيبه وزمرده طيبه اوى وجوجو بيتفرج المفروض زمرده كان يبقى ليها موقف فى لجنة الامتحان وجوجو يبقى ايجابى اكتر من كده مش يقولها ربنا ينتقم منها مدام ظلمتك وهيه يمك ترجعلك حاجتك؟ تقبلى تحيتى

الازهرى يقول...

الموضوع محير

زمردة عندها حق أثناء الإمتحان الصدمة فعلا أكبر من القدرة على تجاوزها

أما بعد الإمتحان فلا بد من إبلاغ أهل زميلتها حتى ينصحوها وتترك هذا السلوك المشين والمؤذى
كما أنها يجب ألا تترك حقها يضيع وإلا فستتوالى التنازلات حتى يصبح كل ما لديها فى غير أمان من أن يأخذه أى انسان
وبضياع الأمان تكون الحياة أسوأ ما يكون

تحياتى دوما

TIMMY !! يقول...

اكون كذاب لو قلت أنا عارف أتصرف إزاي !! :(

الربان يقول...

تحياتي

سبحان الله الغيرة موجودة بين الاطفال الصغار....

لو كنت مكان زمردة و جوجو لانتظرت عودة اهل تيمو و اخبرتهم بالموضوع..
لان هذا قد يساعد في مراقبة الاسرة لسلوك تيمو...فيجنبوها مشاكل بالتأكيد ستجلبها الي نفسها و بالتالي اسرتها....كما ان هذا قد يمنع ان تقع تلميذات اخريات في شرك
تيمو مستقبلا...

علي الاهل ان يتأكدوا من سلوكيات ابنائهم...و سؤالهم عن الاشياء التي قد تكون معهم و لم يتم شرائها بواسطة الاسرة....يجب ان يعلموا مصدر
هذه الاشياء و الاموال ان كانت معهم.

المثل يقول " معظم النيران من مستصغر
الشرر....".


تحياتي و تقديري

و القادم....أجمل يقول...

السلام عليكم
إزيك يا جميل
:)
------------
الموقف صعب جدااا
بس أنا ساعتها و أنا
في اللجنة مكنتش هسكت
يعني كده كده الإمتحان مش هيكمل
يبأه لأ باه فيه وقفة

فرضا إن الموضوع عدى
هدعي ربنا يوفقني و يديني
على أد تعبي
و كمان بجند كل البيت للدعاء
:D
و لما ترجع بالسلامه و قدر إني شوفتها
و لا حاجة خالص
لأن العتاب وقته عدى
لأنهم هيكونوا " علموني " و عرفوني
جزء من شخصيتهم

لو كنت مكان جوجو
لا هو كلامه سليم اووووووي
:D
ليه بأه
لأن الإنسان دايما يتعامل بشخصيته
و لما قولت إنهم عرفوني جزء من شخصيتهم
مش معنى دا إن أول ماجي أتعامل معاهم
أحط الإساءة أدام عينيا و أتعامل
كمان الأيام بتغير
اللي بنعمله إمبارح غلط
بنفتكره النهارده و بنستغرب
إحنا عملنا كده ليه و إزاي
و نتمنى لو يرجع الزمن بينا
عشان مكناش نعمل كده أبدا

و الحمدلله على كل شيء

و دُمت ِ بخير
:)

Abo 7anf يقول...

السلام عليكم
مكان زمرده
مكنتش من الاول هسيب حقى فى اللجنه

مكان جوجو

اكيد كنت هروح لاهلها واقلهم على بنتهم
حتى مش لو هجيب حق اختى
هحمى غيرها
من انوا يحصلوا زيها

همس الاحباب يقول...

اولا : كل عام وحضرتك بخير
والقصة جميلة جدا وبها من العبر الكثير
والموقف يتكرر كثيرا بيننا على اختلاف المكان والاسلوب بمعنى انك تقدم خير والمقابل يرجع للك شر
ولكن لابد ان نتمسك بحقنا ونبعد عن السلبية ونعمل على اصلاح عيوب الاخرين بما نستطيع لان واجب المسلم على المسلم النصيحة ونصرته ظالما او مظلوما
وعلى زمردة ان تتطالب بحقها ولا تدعه حتى لا تتمادى تيمو فى فعل ذلك مع اناس اخرى وتصبح عادة وحق مكتسب
وعلى جوجو الوقوف بجانبها وتهدئة من روعها ومطالبة تيمو بارجاع حاجات زمردة والبعد عن تلك الافعال
وان كانت الغيرة موجودة ولا تنتهى
وان كان الطمع انتشر وحب الذات
فلابد على الاسرة تقويم سلوكيات ابنائها ومراعاة عدم التفرقة فى المعاملة بين الابناء لان ذلك يؤدى الى امراض نفسية خطيرة
تحياتى وتقديرى

mahasen saber يقول...

موناليزا ازيك يا جميله
وحشتينى يا رب تكونى بخير وبكل صحه وستر

هو تصرف زمرده محمود بس فيه ناس كتير مبتقدرش

BT.. twins يقول...

موقف صعب جداا ..
بس انا لو مكان زمردة كان عملت حاجات كتير ومكانش استسلمت كدا بالساهل ..
ولاكن برغم من دا احنا برده بنفقد حاجة مهمة اوى ..الحب ..ليه الحب بيقى مفقود كدا ؟؟ برغم من الله ورسوله امرونا بالاخوة والتعاون والحب ..
ليه الحب بيقى مفقود بالشكل دا ؟
اعتقد ان المشكلة كانت ممكن تتحل لو عرفوا معنى كلمة التسامح والحب ..اكيد ليهم تاثيركتير فى المواقف دى ..

موناليزا يقول...

المعتصم
ـــــــــ
وعليكم السلام ورحمة الله وبركاته
اهلا بيك يافندم
اشكرك جدا لرأيك
هو طبعا تفكيرك صح جدا انك مش هتسيب حقك ولا حق أختك بس برضه ده هيكون ازاى واللى سرقتها خلاص سافرت وياعالم هتشوفها تانى ولا لأ
دمت طيبا ولمدونتى زائرا

**********************************

ابن مصر
ــــــــــــ
وعليكم السلام ورحمة الله وبركاته
اهلا بيك يافندم بعد طول غياب
فعلا موقف صعب والاصعب عامل المفاجأة ايضا
اشكرك جدا لمشاركتك
دمت طيبا ولمدونتى زائرا

***********************************

غربتى
ــــــــ
وعليكم السلام ورحمة الله وبركاته
اختى الحبيبة:اذيك انتى ياجميلة وكل سنة وانتى طيبة
الله عليكى
فعلا ياحبيبتى طالما دافعنا عن حقنا وربنا شايفنا ماستسلمناش يبقى اكيد حقنا هيرجع
اشكرك جدا لمشاركتك
نورتينى حبيبتى ودمتى بخير

**********************************

مسدس صغير
ــــــــــ
اهلا بيك يافندم
وانت طيب وبالصحة والسلامة
طبعا معاك حق بس ماتنساش ان زمردة اتفاجئت من تصرف صاحبتها واحراجها قدام الكل وواضح ان تيمو دارسة شخصية زمردة كويس وعارفة انها مش بتاعة مشاكل وجوجو بقى كان هيعمل ايه اذا كانت السارقة لم تعد موجودة من اصله غير انه يهون على زمردة الموقف
اشكرك جدا لمشاركتك
دمت طيبا ولمدونتى زائرا

***********************************

الازهرى
ـــــــــ
اهلا بيك يافندم
اشكرك جدا لمشاركتك
ولكن اكيد تيمو سافرت مع اهلها يعنى زمردة مش لاقية حد تشتكيله اللى حصل
أما عن جملتك الاخيرة فهى بجد فى الجووون
دمت طيبا ولمدونتى زائرا

*********************************

تيمى
ـــــــ
اهلا بيك يافندم
وانا مصدقاك:)
دمت طيبا ولمدونتى زائرا

----------------------------------

الربان
ــــــــ
اهلا بيك يافندم
اشكرك جدا لمشاركتك
وهما فعلا لايملكون سوى الانتظار
دمت طيبا ولمدونتى زائرا

********************************

والقادم اجمل
ـــــــــــــــ
وعليكم السلام ورحمة الله وبركاته
اختى الحبيبة:انا الحمدلله بخير اذيك انتى ياجميلة

والله انتى عسل عجبتنى تجنيد البيت للدعاء:)
اشكرك جدا لمشاركتك الجميلة
نورتينى حبيبتى ودمتى بخير

**********************************

ابو حنف
ـــــــــــ
وعليكم السلام ورحمة الله وبركاته
اهلا بيك يافندم
انا معاك لو كنت مكان زمردة لكن لو كنت مكان جوجو هتروح لاهلها ازاى وهى سافرت معاهم
اشكرك جدا لمشاركتك
دمت طيبا ولمدونتى زائرا

********************************

همس الاحباب
ـــــــــــــ
اهلا بيك استاذ خالد
وحضرتك طيب وبالصحة والسلامة
اشكرك جدا على مشاركتك وهذا التعليق القيم
دمت طيبا ولمدونتى زائرا

********************************

محاسن صاير
ــــــــــ
اختى الحبيبة:اهلا اهلا بالقمر فينك من زمان وحشتيينى ياجميلة لعل المانع خير
انا الحمدلله بخير اذيك انتى يامحاسن

صح او ذى ماتقولى كده اتقِ شر من احسنت إليه
نورتينى حبيبتى ودمتى بخير

***********************************

ب.ت توينز
ـــــــــ
اختى الحبيبة:اشكرك جدا لمشاركتك
وفيه ناس مرضى نفسيين مهما تديهم من حب مابيتمرش فيهم
نورتينى حبيبتى ودمتى بخير

kmt يقول...

السلام عليكم ورحمة الله وبركاته

لو كنت مكان زمرده كنت مش هاعمل اكتر من اللي عملته
يمكن متعرضة لنفس الموقف يوم الاربعاء وماعملتش غير اني انسحبت من غير دفاع

في ناس بتسمي دا ادب ولكن انا بعتبرها ضعف ومش قادرة اكون غير كده

اما لو كنت مكان جوجو
مش عارفه كنت ممكن اعمل ايه؟

تحياتي
الى اللقاء

Arsenal Way يقول...

احم احم
السلام عليكم
بما ان انا راجل صعيدي لو كنت مكان جوجو والبت الحراميه سافرت مكنتشس هلاقي غير المراقب والمدرس اروح اطحنهم
D:
ههههههههههههه
طبعا بهزر انا صعيدي اه بس مش للدرجه دي
الصراحه دعوة المظلوم لا ترد فخير الفعل هو الدعاء
______
شرفينا بالزياره
www.eng-mostafa.blogspot.com

شيماء زايد يقول...

تصدقي فكره ابداعيه من افكارك الجباره يا موناليزا

في حاجه نفسي اتكلم فيها من زمان وبصراحه قصتكدي احلي منبر
ليه دايما بنقرن الطيبه والنقاء بالضعف والعجز
ما اخذ بالقوة لا يسترد إلا بالقوه
مش علشان ابقي انسان كويس
لازم اكون ضعيف او محتاج او علي الهامش او فقير
المؤمن القوي احب إلي الله من المؤمن الضعيف
وكل عصر لي معيار لقوه
علشان كده انا ضد الضعف في كل صوره

Mony يقول...

تصدقي دمي اتحرق


لا طبعا كنت هدافع عن حقي قدام المراقب
لان ربنا امرنا بالدفاع عن حقوقنا
مش التغاضي و الخذلان


ولا يضيع حق ورائه مطالب

Heba Sayed يقول...

السلام عليكم

موضوع جميل يا موناليزا

وحقيقى كيف الله يسامح العباد والعباد متقدرش تسامح بعضها

المؤمنين الصالحين الطيبين هما المتسامحين دائما

واينعم كل شخص وله احتمال طاقة ومقدور محدد الا انه كفيل على زيادة تسامحه القلبى بقوته الايمانية وقربه من الله عز وجل


والسلام ختام


هبة سيد

محمد يقول...

السلام عليكم ورحمة الله وبركاته

أختنا الرائعة دوما موناليزا ....
ربنا يكرمك دايما للخير ويجعلك منار اشعاع لنري من خلالها طبائعنا ووصفاتنا التي نفغل او نتغافل عنها تارة بقصد وبغير قصد ..... وأنا متضامن من رأي الأخ أبو علي تماما وربنا يوفقكم للخير ........ دمتي أختاه مبدعة مع خالص شكري وتقديري ... بالحق بالنسبة للأسئلة بتاعة الموضوع اللي فات هما ف بالي وإجابتهم حساب مع النفس ..... شكرا لك أختاه وهدانا وإياكم سواء السبيل يااااااأفندم .

من غير عنـــوان يقول...

قصة بها عبر ممتازة لهذا الزمان

أمنياتي

همس الحنين يقول...

الموضوع محير بس مش حعمل الكتر من اللى عملتة زمردة

موناليزا يقول...

كيمِت
ـــــــ
وعليكم السلام ورحمة الله وبركاته
اختى الحبيبة:اكيد زمردة اتعلمت من الموقف ده انها مش هتبقى ضعيفة تانى ولا هتسمح لحد انه يعمل معاها كده تانى
واسمحيلى ياجميلة انتى لو عايزة تتغيرى هتتغيرى انا عارفة ان الموضوع فى الاول هيبقى صعب وعايز جرأة وشجاعة على المواجهة بس ده مهما كان صعوبته هيبقى احسن بكتير من احساسك بعد تعرضك لاى موقف مماثل.. جربى كده وافتكرى ان محدش بيتخلق ضعيف احنا اللى ممكن نقنع نفسنا بده او بالعكس
افتكرى اذا كان اللى بيعمل معاكى كده بيتعامل بجرأة متناهية وهو على الباطل فمابالك بقى بصاحب الحق
واخيرا لايضيع حق وراءه مطالب به
ارجو ان تتقبلى كلامى بصدر رحب فمقصدى الوحيد هو عدم تعرضك لهذا الموقف مرة اخرى:) تقبلى مودتى
اشكرك جدا لمشاركتك
نورتينى حبيبتى ودمتى بخير

***********************************

مصطفى ابو زيد
ـــــــــــــــــ
وعليكم السلام ورحمة الله وبركاته
اهلا بيك استاذ مصطفى
:)يعنى مش هتقدر على البنت الصغيرة هتقدر على المراقب
أجدع ناس الصعايدة على فكرة
يعنى لو كنت مكانها كنت هتلتزم الدعاء وخلاص
يسعدنا زيارتك ونورتنا ياباشمهندس

***********************************

شيماء زايد
ـــــــــــــ
اختى الحبيبة:ماتحرمش من ذوقك ولا من إطرائك الجميل ياقمر
فعلا فيه فرق كبير بين الضعف والطيبة رغم انهم اوقات كتير بيقترنوا ببعض ولكن فى مقولة أفضلها كثيرا"اتقِ شر الحليم إذا غضب"
وكما قلتى المؤمن القوى خير واحب الى الله من المؤمن الضعيف
جعلنا الله من المؤمنين الاقوياء
نورتينى حبيبتى ودمتى بخير

***********************************

مونى
ـــــــ
اختى الحبيبة:سلامة دمك أمال زمردة تعمل ايه؟
ياواد ياجامد ايوة كده
لايضيع حق وراءه مطالب به(احلى كلام)
نورتينى حبيبتى واشكرك جدا لمشاركتك

********************************

هبة سيد
ـــــــــ
وعليكم السلام ورحمة الله وبركاته
اختى الحبيبة:اشكرك جدا لرايك
يعنى لو كنتى مكان زمردة هتسامحيها وتنسى؟
طب ولما ربنا يسألك سيبتى حقك يضيع ليه هتقولي ايه؟
ولما تلاقى تيمو عملت نفس الحركة مع ناس كتير غيرك لانهم برضه سامحوها هتبقى مبسوطة؟
اقوللك على حاجة سامحيها لما حقك يرجعلك قبل كده هيبقى انهزام واستسلام وسلبية كمان
نورتينى حبيبتى ودمتى بخير

*********************************

هذه حياتى
ـــــــــــــ
وعليكم السلام ورحمة الله وبركاته
اهلا بيك يافندم
ربنا يكرمك واشكرك جدا لدعائك لى ربنا يتقبل ولك بالمثل ان شاء الله
ونِعم التضامن اشكرك جدا لمشاركتك
أما عن الاسئلة كنا نفضل مشاركتنا فيها ولكن لك مطلق الحرية واذا غيرت رأيك تعليقات الموضوع السابق فى انتظارك:)
دمت طيبا لمدونتى زائرا
ملحوظة:لم أتمكن من دخول مدونتك لعل المانع خير

*********************************

من غير عنوان
ــــــــــــــ
اهلا بيك يافندم
اشكرك جدا لرايك
دمت طيبا ولمدونتى زائرا

محمد يقول...

السلام عليكم ورحمة الله وبركاته


أختي موناليزا شكرا لإهتمامك بأمر مدونتي ولكن عذرا فقد كانت هناك عاصفة جوية سيئة سابقا والآن يمكنك زيارتها وتصفح ما فيها بأمان .....دمتي مبدعة

Dr. Ibrahim يقول...

زمردة عوضها على ربنا بقى

ودعوة المظلوم لا ترد ومجهودها لن يضيع

تحياتى

Kiara يقول...

هههههههههههههههههههه

معلش بضحك عشان حاجتين

اولهم وانا بقرا قولتي تيمو قراتها نيمو يحني انا

وتانيهم

ان الموقف حصل معايا بس بشويه حاجات مختلفه

بس الفرق اني مش عملت حاجه لان المستر كان عارفني وعارف اني لايمكن اغش لاني دايما كنت جبله اسئله من برا خالص وكنت بجاوب واتابع معاه فراح سالني انا و البنت سوال مش في الامتحان وجاوبته صح وهي جاوبته غلط

الواحد يدعي ربنا احيانا بيكون السكون اقوي من الكلام

عاشقة القمر يقول...

عارفه انو انا حصلي مواقف زيقريب منو بنت جيران ونفس وقت من الاهل
كانت دايما انو بتشوف نفسها هي احسن مني
وانا عندي مقدر علي صبر صبرت لها ثلاث سنوات
مره معنا مدرس في منزل

وكان في سؤال صعب انا جاوبت عليه هي راحيف قالت كلمه وانا مش رضي بهذا كلمه
قالت لي نفسي يوم مش اهخلي حقي
فعلا خرج مدرس كلمه مني كلمه منها بدون ماشعور بنفسي لقيت نفسي رميهل بكرسي ههههههههه
ناس كلها تفرج يارب دي انا ولا احد غيري
لان انا مسالم جدا راحيه بتقولي اهشتكي لي عمتي هي امي
قالت
له رواحي
ماما انتي عملت هكذا انا اهعمل اكثر انا صبرت كثير
راحيه بقول لها تفضلي مش عايزه اشوفيك هنا

مهيم بعد ثلاث شهور رجعنا الي بعض
بقيت تعامليي احسن

mahasen saber يقول...

يا حبيبة قلبى وحشتينى والله يا مونا
وافتقدتك جدا
بس نعمل ايه فى الغياب بئه بس سؤالك عليا عمرى ما هنساه ربنا ما يحرمنى منك يا جميله
ويسعدك ويكرمك بكل من تحبين

كفايـة طيبـة يقول...

ماهو انا كدة كدة مش هعرف اعمل حاجة خلاص لان الامتحان انتهى

بس بتختلف حسب الشخص

يعنى ممكن حد يقولك دانا هروح بلدهم اخلي اكبر حتة فيها اد الفسفوسة

وناس هتقولك خلاص بقي منها لله واكيد ده الخير ... لان ربنا عمله

وانا هقولك حسبي الله ونعم الوكيل

وان شاء الله ربنا يوفقنى مادام عملت اللى عليا
ولو سقطت فى المادة دي يبقي مكتوبلى بردو ويبقي هو ده الخير ليا

"من يتقى الله يجعل له مخرجا ويرزقه من حيث لا يحتسب"

:)

فـتـفـوتـة فتافيت يقول...

السلام عليكم ورحمة الله

عمل الخير خصوصا لو كان لوجه الله تعالى مخلصا له لا يضيع أبدًا
وربنا هو اللي بيكافأنا بكرمه لأن هو أكرم الأكرمين وأكيد مفيش حد يعمل حاجة له هو ويتخلى عنده
ده مش بيحصل مع إنسان كريم فما بالنا بخالق الكون أكرم الأكرمين

وزمردة عملت كدة لمساعدة صديقة لها وقت الضيق وإذا هى لم تستقبل الود بالود فهذا عليها هى وزمردة أكيد هايوصلها حقها

أما جوجو أعتقد لو مكانها هانصحها بالتسامح عشان تكمل عمل الخير
وتسلم أمرها لله

سلام

رفقة عمر يقول...

بصراحه القصه نرفزتنى جدا
انا فعلا باتظلم كتير بس مش باحب اشوف حد بيتظلم
بس المشكله انها مش عندها اثبات انها اخذت اشيائها فاذا قدرت انها تصل الى هذه الكاذبه الحتاله فلتذهب اليها وتواجهه انها شريرة وسيئه حتى وانا لم تسسترجع اشيائها يكفيها انها تعرفها انهامحتاله وحقودة

موناليزا يقول...

هذه حياتى
ـــــــــــــ
وعليكم السلام ورحمة الله وبركاته
اهلا بيك يافندم
لا شكر على واجب اخى الكريم والحمدلله ان العاصفة انتهت واصبحت الان فى امان:)
دمت طيبا ولمدونتى زائرا

***********************************

د/ابراهيم سماحة
ـــــــــــــــــ
اهلا بيك يادكتور
اشكرك جدا لمشاركتك
دمت طيبا ولمدونتى زائرا

*********************************

كيارا
ــــــ
اختى الحبيبة:اضحكى براحتك يانيمو ولايهمك:)
الحمدلله ان المدرس كان عارفك كويس:) تخيلى بقى لو كان المراقب من بره المدرسة!
اشكرك جدا لمشاركتك
نورتينى حبيبتى ودمتى بخير

*********************************

عاشقة القمر
ــــــــــــ
اختى الحبيبة:ياخبر بالكرسى ياسمية مرة واحدة:)
اكيد لازم تعاملك كويس بعد كده ماهو العمر مش ببلاش ههههههه
اشكرك جدا لمشاركتك
نورتينى حبيبتى ودمتى بخير

-----------------------------------

محاسن صابر
ــــــــــــ
اختى الحبيبة:كنت قلقانة عليكى جدا والحمدلله انك طمنتينى
ماتغيبيش علينا كتير كده:)
ربنا يسعدك ويعوض عليكى يارب ويرزقك بكل الخير
نورتينى حبيبتى وبحبك جدا

-----------------------------------

كفاية طيبة
ــــــــــــ
اختى الحبيبة:ونِعم القول ياجميلة
اشكرك جدا لمشاركتك
نورتينى حبيبتى ودمتى بخير

-----------------------------------

فتفوتة فتافيت
ــــــــــــــــ
وعليكم السلام ورحمة الله وبركاته
اختى الحبيبة:عجبنى تعليقك اوى وفعلا فاكرم الاكرمين لن يضيع اجر من احسن عملا.. الله عليكى بجد:)
اشكرك جدا لمشاركتك
نورتينى حبيبتى ودمتى بخير

---------------------------------

رفقة عمر
ـــــــــــ
اختى الحبيبة:حاسة بيكى فمناظر الظلم من ابشع المناظر اللى ممكن نشوفها سواء كانت معانا او مع الاخرين
متهيألى انها لو شافتها مش هتحب تتواجد فى مكان هى اصلا فيه
اشكرك جدا لمشاركتك
نورتينى حبيبتى ودمتى بخير

عاشقة القمر يقول...

مش عارفه انا بكتب كلمات كويس لم نزلها لقي في حاجات غلط ههههههه
فعلا هي من ساعتها تعملي حساب
بعادين انا صبرت 3 سنوات رايك ايه في مده

اتمني ان تزورني في مدونتي

خالتى بمبة يقول...

دي محتالة صغيرة واذا سكتنالها هتكبير لازم يتاخد ناحيتها موقف

momken يقول...

حلوة القصه جداً

بس هى ليه سكتت طالما الحكايخ بايزة بايزة يبقى اسيحلها

ده مش ادب دى اسمه قله حيله

قال تعالى ولا تقتلوهم عند المسجد الحرام حتى يقتلوكم فيه
فان قاتلوكم فاقتلوهم

يعنى منكونش احنا البادئين لكن فى حاله الاعتداء هناك خيارين
ايما التسامح او الرد بالمثل
ولا اعتقد ان فيه حرمانيه

هى غلطانه

تسلم ايدك

تحياتى

bastokka طهقانة يقول...

هههههه
استناها بعد الامتحان و اقعد عليها اسفلتها


ههه
اوروفوار

wanna b a physician يقول...

والله طبعا انا زى ما جوجو كدا قال
وزمردة مش المفروض تتغير عشان موقف حصل لان الانسان اللى مش كويس لازم مهما حصل نثبتله اننا عمرنا ما هنبقى زيه لان ده هيوجهه اكتر من اننا نرد عليه الموقف

وانا الله لا يضيع حق المظلوم مهما مر من زمن فحقها هيرجع هيرجع

أميرة يقول...

السلام عليكم

زمردة حالها حال شباب المسلمين اللي بيحاولوا يبنوا مستقبلهم و حياتهم في وسط صخب و مؤامرات و تآمرات الاخرين وحقد و غل و كراهية اللي حوليهم

تيمو حالها حال كتييييييييير اوي بياخدوا اللي مش ملكهم .. لا و بجحة كمان اهي بالظبط كده زي اسرائيل .. ضربني وبكي و سبقني واشتكي !!

جوجو حاله حال المحتاسين بين دول ودول .. ان كانت زمردة توكلت علي الله واتجهت اليه ليرد عنها الظلم فهي استعملت اضعف الايمان .. جوجو حاول يكون اكثر ايجابية لما يروح بيت تيمو و يستخدم لسانه وممكن ايده في رجوع الحق المغتصب

بس ماذا يفيد الشاة بعد ذبحها !!!

ربك قادر منتقم جبار

والدنيا يوم لك ويوم عليك

وداين تدان

ويوم الحساب يوم ترد فيه المظالم للعدل سبحانه قادر علي قصم الظالمين


بس بيني وبينك انا لو مكان زمردة كبيري اوي اني هقعد اعيط بس هحاول اكمل الامتحان باي حاجة علشان مش هقدر استحمل اني افشل فيه .. يعني علي الاقل لو سقطت ابقي عارفة اني سقطت بس علشان مكانش معايا الادوات للجزء دا مش لمجرد اني اعتدي علي فبكيت و قلت اهي بايظة بايظة .. بردة اكون عملت اللي عليا و الله المستعان

موناليزا يقول...

عاشقة القمر
ــــــــــــــــ
اختى الحبيبة:اشكرك لمتابعتك
بصى ياجميلة اكتبى الكلمات حرف بحرف ذى مابتنطقيها وبعدين أقرأيها كويس ولو عرفتى تقرأيها صح انشريها وماتستعجليش وانتى بتكتبى وهتلاقى كل الكلمات اتظبطت
انتى عسولة اوى على فكرة :)
نورتينى حبيبتى وتسعدنى زيارتك

********************************

خالتى بمبة
ـــــــــ
اختى الحبيبة:معاكى حق يابمبة
اشكرك جدا لمشاركتك
نورتينى حبيبتى ودمتى بخير

*********************************

ممكن
ـــــ
اهلا بيك يافندم
اشكرك جدا لرايك
عامل المفاجأة ورهبة الامتحان كان ليهم تأثير سلبى على زمردة ولما روحت بدأت تستوعب الموقف
طبعا اخى الكريم مفيش حرمانية لو قاتلنا اللى بيقاتلونا الحرمانية لو تخاذلنا
اشكرك جدا لمشاركتك
دمت طيبا ولمدونتى زائرا

**********************************

طهقانة
ــــــــــ
اختى الحبيبة:هههههه هى فكرة برضه
بس افرضى بقى انها مشت بسرعة قبل ماتلحقى تعملى حاجة!
اشكرك جدا لمشاركتك
نورتينى حبيبتى ودمتى بخير

*********************************

ونا بى فيزيائى
ـــــــــــــــ
اهلا بيك يادكتور
الله عليك
تعليقك بجد جميل ربنا يباركلك
اشكرك جدا لمشاركتك
دمت طيبا ولمدونتى زائرا

*********************************

اليس فى بلاد العجائب
ــــــــــــــــــ
وعليكم السلام ورحمة الله وبركاته
اختى الحبيبة:تحليل منطقى جدا أحييكى عليه:)
ولو المراقب خد منك الورقة وماداكيش حتى الفرصة فى انك تكملى الامتحان!
تخيلى مدى الظلم والقهر اللى شعرت به وبدون سبب معلوم لديها
اشكرك جد لمشاركتك
أحبك الذى أحببتنى فيه وربنا يسعدك يارب وينولك اللى فى بالك:)
نورتينى حبيبتى واسعدتينى جدا ودمتى بكل الخير

أميرة يقول...

مش هو هياخد الورقة و يحرمني من الامتحان يعني مفيهاش حاجة باه لو زعقتله مهي دلوقتي هتبقي بايظة بايظة .. اينعم ضميري هيوجعني لو عملت كده ((لو اساسا قدرت يعني اعملها))

بس تفتكري هيحصل كده :( دا انا كنت اتقهرت اوي بجد :(

بس تعرفي لو دورتي علي الحاجات اللي اتعلمتيها و اثرت فيكي في حياتك هتلاقي دايما وراها حاجة سايبة ذكري فيكي .. الحاجات اللي اتعلمناها وملهاش حادثة في حياتنا .. كتير بتتنسي ..

لو في من باقي او جزء تاني .. ابقي طمنينا عملت ايه .. يمكن نتعلم احنا حاجة تنفعنا في الدنيا الي ماشية حالها ملخبط دي..

ربنا يطمنا عليكي يارب :)

ريمان يقول...

السلام عليكم

زمرده بنت طيسبه وربنا هيعوضها خير ان شاء الله

انا كنت قرات البوست بتاعك اللى اسمه لا تدمعى يا عين

بجد اثر فيا جدا

وانا فهمت

الحمد لله ان مش عندك اطفال منه

ومش تزعلى

لان ده خير

انتى كده احسن

ربنا هيعوضك باللى يسعدك وينور حياتك يا حبيبتى

مع تحياتى

اختك ريمان

موناليزا يقول...

اليس فى بلاد العجائب
ـــــــــــــــــــــ
أختى الحبيبة:عجبتى اوى صراحتك وانك مكنتيش هتقدرى تعملى حاجة:)
أصل بصراحة المفاجأة ورهبة الموقف تجعل أجدع واحدة مش عارفة تنطق
صح جدا وما اقسى هذه الدروس
وياريت بجد يبقى فيه جزء تانى لنصرة زمردة لكن الى ذلك الحين هذا كل ماحدث
ربنا يسعدك ويفرح قلبك يارب
نورتينى ياقمر واسعدتنى متابعتك
دمتى فى رعاية الله

-----------------------------------

ريمان
ـــــــ
وعليكم السلام ورحمة الله وبركاته
اختى الحبيبة:ان شاء الله "وبشر الصابرين"
اشكرك جدا لمشاركتك
ماتحرمش منك ياريمان ياجميلة ربنا يعوض عليا وعليكى يارب ويرزقنا بأزواج صالحين يتقوا الله فينا
والحمدلله فعلا ربنا مابيعملش حاجة وحشة لعله ابتلاء او تكفير ذنوب:)
نورتينى حبيبتى ودمتى بكل الخير

rovy يقول...

موناليزا الجميله دائما
جميله القصه و معبره قوى برغم بساطتها الا انها بتختصر واقعنا المر
بس صدقينى لو وضعت نفسى مكان زمرده ما كنش ممكن استسلم ابدا و اسكت كان لازم اصرخ و اطلب من المراقب ان يتحقق بنفسه من انها مغتصبه لحقى و كنت حاحاول اخذ حاجتى بنفسى الا لو ما قدرتش و كانت تيمو اقوى منى ساعتها كنت حالجأ لبابا الله يرحمه يجيب لى حقى او ماما ربنا يخليها يا رب .. و ما كنتش حأعرف انام و اكيد كنت حاحس بطعم الظلم المر .. اما جوجو كلامه عقلانى جدا لكن مع الاسف ما اقدرش يوصل لحل يشيل به الظلم عن اخته ..
يا ترى امتى نقدر احنا كمان نعرف عنوان العدو و نقدر نروح لهو نأخذ حقنا و حق اخواتنا ؟؟
اللهم يسر امورنا و اعنا انك خير معين
معلش اتأخرت بس حقيقى انا علقت و النت كن ضعيف جداو دلوقت اتأكدت ان تعليقى ما وصلش ..
دمتى غاليتى فى حفظ الله و رعايته

ودى و تحياتى

موناليزا يقول...

روفى
ـــــ
اختى الحبيبة الغالية:ماتنسيش عامل المفجأة وخصوصا انها صديقتك وكمان سافرت يعنى أهلك مش هيعرفوا مكانها
وذى ما انتى بتتمنى كلنا بنتمنى نصل للعدو ونسترد أشيائنا
اشكرك جدا لمشاركتك
ولا يهمك ياحبيبتى المهم انه اخيرا وصل واسعدتينى بتعليقك وبرأيك الذى انتظره دائما
نورتينى غاليتى ودمتى فى رعاية الله وأمانه