مهزومة ولا تقبل الفشل

لم تستحمل مرارة الفشل التي تعرضت له حينما اشتركت في مسابقة للسباحة. رغم أن هذه المسابقة لم تكن من ضمن أولوياتها. ولكنها لم تكن تعلم أن طعم الفشل الذي ستتجرعه أقوى من تحملها. ومن هنا أرادت التحدي وأن تعيد الإشتراك في أقرب مسابقة؛ لتثبت لنفسها قبل الجميع بأنها ليست فاشلة. وبالفعل بدأت التدريب بكثرة وخاضت جميع التدريبات بنجاح منقطع النظير. وتم الإعلان سريعاً على مسابقة أخرى. ورغم أن المسابقة ستكون في بحر وليس في حمام سباحة كما توقعت ولكنها اشتركت بالفعل. ورغم أنها كانت متوجسة خيفة بعد الإشترك مباشرة إلا أنها كانت بداخلها تقول"بما أني بعرف أعوم مايهمنيش المكان". وحينما يقترب الموعد تزداد مخاوفها أكثر دون سبب واضح بالنسبة لها. ومع ذلك لم تستطع الإفصاح عما يعتريها من هذه المشاعر المضطربة. لأسباب عِدة منها أنها قبلت التحدي أمام الجميع والإنسحاب يعني فشل آخر. ولفتور همة المدرب ومع ذلك لم ينصحها بالإنسحاب فإنسحابها يعني فشله هو الآخر ولكنه واثق من قدراتها. ولذلك زودت جرعة التدريب وأخذت جميع إحتياطاتها. وجاءت اللحظة الفاصلة. رأت كل المشجعين يرددون اسمها ويحفزونها على الفوز بالمركز الأول. بدأت تتشجع ولكن قبضة قلبها مازالت مستمرة ومع ذلك لم تهتم.ألقت نظرة أخيرة على المشجعين قبل أن تركز نظرها على المكان الذى ستقفز منه وتستدعي كل التركيز بداخلها وتتمتم بلفظ الشهادتين وهى عازمة على الفوز.. ثم قفزت . ومع قفزتها هذه شعرت بأنها لن ترى الأرض مرة أخرى وأنها ستلقي حتفها حتما في قاع البحر. ومع ذلك لم تيأس أو تستسلم فهي عازمة على الفوز رغم كل شيء.وشعرت بضيق فى التنفس وبأنها تكاد تختنق ولكنها ظلت تقاوم . وفجأة شعرت بأنها أصبحت كالكرة التي تتقاذفها الأمواج ولم تستطع المقاومة أكثر وكأن البحر يلفظها من داخله وسيطر اللون الأسود على عينيها ولم تعد تشعر بأي شيء. "كنت أشعر بغدره معى ومع ذلك قبلت التحدى".
- تمت-

أريدكم معى

بما أننا أحباء فى الله ونريد أن نصعد سوياً إلى سلم السعادة المؤدى إلى رضا الله عز وجل . لذلك أردت مشاركتكم معى لتطبيق أفضل الأعمال عند الله عز وجل.
بداية سأطرح هذا السؤال:
متى آخر مرة صمت فيها؟
(جاوب دلؤتى بينك وبين نفسك).
بقى لك كتير اوى على فكرة.

إيه رأيك لو تختار يوم فى الأسبوع الجاى وتصوم فيه. سواء اتنين أو خميس أو أى يوم تانى عدا الجمعة(لانه ماينفعش تصوم الجمعة لوحده)؟. لك مطلق الحرية فى اختيار اليوم المناسب لك.

ها ايه رأيك؟ طبعا مش محتاجة تفكير. أكيد موافق .

إيه يعنى لما توهب اليوم ده لله. ماهو أنت بتاكل طول الوقت وبتتفرج على التليفزيون على طول مش هيحصل حاجة يعنى لما تاخد أجازة فى اليوم ده.

وبعدين احنا دلؤتى فى الشتا يعنى فرصة لا تعوض اليوم قصير والجو برد يعنى مش هتشعر بالعطش.(مالكش حِجة)

إنوى انت بس وربنا هيقويك.

موافق؟؟

جميل ماهو أنت لازم توافق.

عايزين يبقى صيام بجد.

يعنى مش هنصوم عن الأكل والشرب بس لأ ده احنا اليوم ده عايزين ناخد ثواب فى كل حاجة من أول مانصحى من النوم"الحمد لله الذى أحيانا بعد ما أماتنا وإليه النشور". هنتوضا "اللهم اجعلنى من التوابين واجعلنى من المتطهرين"هنصلى الضحى وما فيها من إفادة عظيمة لنا. هنروح الشغل وهنأديه على أعلى مستوى. واذا نرفزك حد قل "اللهم إنى صائم"وهنركب المواصلة"سبحان الذى سخر لنا هذا وما كنا له مقرنين وإنا إلى ربنا لمنقلبون" واذا قابلت أحد فصافحه"ما من مسلمين يتقابلا فيتصافحا إلا تساقطت ذنوبهما" وتصدق على كل من تقابل ولو بالإبتسامة"تبسمك فى وجه أخيك صدقة"هنبتعد تماما عن الغيبة والنميمة ولنجعل لساننا رطباً بذكر الله ولا ننسى الدعاء"فللصائم دعوة عند فطره لا ترد" وأيضا الصلاة فى أول الوقت. وطبعا غض البصر والأخلاق الطيبة ده العادى بتاعنا.

وممكن كمان نصل رحمنا ولو حتى برسالة على الموبايل. ولو فيه مريض ممكن نزوره. ولو فيه تشييع جنازة. يعنى مانتأخرش عن فعل الخير. ماهو اليوم ده احنا متفقين من البداية إنه لله.

هنتظركم على باب الريان ما تتأخروش.

*******************

على الهامش: رجاء خاص بأن تدعولى أن ربنا ينصرنى ويرضى عنى.

أدعوكم لقراءة هذه المواضيع القيمة:"بفكرني :) " و "بفكرني تاني :) ".

جوجو و زمردة (2)

ذهبا جوجو وزمردة للعب فى حديقة المنزل وكالعادة يقوما بالجرى والتنطيط وتقليد أفلام الكارتون وفجأة.
- عاااااااااااا آه يارجلى.. الحقينى ياماما.. عاااااااااااا.
- خلاص بقى ماتعيطيش.. وطى صوتك - رغم إنزعاجه وقلقه على شقيقته ولكنه يحاول تهدئتها قدر المستطاع-.
- ماليش دعوة رجلى اتعورت وبتجيب دم وكمان بتوجعنى أوى عااااااااا.
-شوية والدم هيقف. ضعى المنديل ده عليها وهتبقى كويسة.
- ولو موقفش هقول لماما إيه دلؤتى؟.
- لأ إياكى تقولى لماما أنتى عارفة ماما بتقلق علينا وبتخاف علينا إزاى وممكن جداً تحرمنا من اللعب عشان تخاف تقعى تانى.
- طيب أعمل إيه دلؤتى؟.
- إيه رأيك لو قمتى وكملنا لعب عادى ولا كأن حاجة حصلت.
- ورجلى المتعورة دى أعمل فيها إيه.
- أنتى بس قومى وأول ماهتمشى ونبدأ نلعب هتنسى أنها بتوجعك وهتلاقى نفسك خفيتى خلاص.
- ولو ماما شافت رجلى .
- قوليلها إنك كويسة وهى تطمن عليكى.
- صح وهى يعنى ماما هتعمل إيه غير أنها هتحرمنى من اللعب. بدل ماتحاول تخففها هتزعقلى وخلاص.
- مش بقولّك يلا هاتى إيدك.
وقامت زمردة ليكملا لعبهما وكأن لم يحدث شئ.
-تمت-
-------------------
دعوة للمناقشة/
إذا تعرضت لجرح جسدى أو معنوى كيف تتعامل معه؟.
هل تطلب مساعدة الآخرين أم تعتمد على الزمن لمداواة الجرح؟.

سنة حلوة يا أمة الله

بمرور عام كامل على وجودك معى. أحب أعرفك إنك أجمل حاجة حصلت لى العام الماضى. ولذلك كان لازم أعمل جرد ومراجعة لحياتى معاكِ خلال هذا العام.

معاكِ كتبت 82 موضوع (خدى بالك هتتسألى عليهم) ياترى هيكونوا ليا ولا عليا؟؟ ربنا يستر.
ونشرت أكتر من خبر حزين.. ربنا يصبر قلوبنا جميعا.
و أجمل خبرته نشرته وتقريبا الوحيد كان خطوبة منى ربنا يسعدها ويباركلها.
ومعاكِ اتعرفت على ناس كتير جميلة(أخاف أنسى حد لأنهم ماشاء الله كتيييير. ربنا يزيد ويبارك) وشعرت معاهم بجد بأجمل نعمة وهى الأخوة فى الله.
وفى ناس لهم حق عليا أنى لازم أشكرهم على حاجات كتير عملوها معايا وهم:-

la3lahakhier: أول حد عرفته وكسبته عن طريقك وقد ايه كتابتها وكلامها معايا ساعدنى كثيراً على إجتياز أزمتى. ولها الفضل فى نشرهذه المواضيع :

"ريحة الحبايب "و".كنوز "

وأحب أقولها عن طريقك دلؤتى أنتِ فييين؟ بقى لك كتير ماكتبتيش حاجة وحشنى قلمك.

مجداوية: لمتابعتها لى من أول ما بدأت وتوجيهاتها ونقدها البناء.

rovy : لتعليقاتها المتميزة والتى أشعر معها بأنها منحة ربانية ولمشاركتها الدائمة لى بكل حِس مرهف وسؤالها الدائم عنى.

جَـــنـًـــــة: لتعليقاتها المفيدة ولنصحها الدائم لى فى أى موضوع أكتبه ولأنها ملهمتى فى هذه المواضيع:"لا تتخذوهم أولياء"," إلى متى؟" .
ولأنها أيضاً صاحبة فكرة إنشاء مدونة : فضفض مع روفى وجنة و موناليزا.

Whispers just for a Night :لتشجيعه لقلمى فى بداية المدونة ولتوجيهى فى بعض الأشياء الخاصة باستخدام المدونة والتى كنت حديثة عهد بها ولأنه صاحب فكرة هذه المواضيع:" بتشجع إيه؟" و "نِعم لا تُحصى " .

Khaled Farag : لمساعدته لى فى أشياء كثيرة لم أكن أعلمها فى استخدام المدونة ولأن ريشته كانت ملهمتى فى إحدى المواضيع (احتراماً لرغبته مش هقول اسم التدوينة لأنه حذف اللوحة من عنده أصلا).

شريف طلال :صاحب أول تعليق فى مدونتى وكم كانت سعادتى بعد16 موضوع بلا تعليق واحد.
mony : لتلبيتها السريعة لى لأى وصفة شهية من خلال مطبخها الجميل.
ABOALI : لتعليقاته المتميزة ولتقبله ملحوظاتى بصدر رحب.
Dr Ibrahim samaha : لإفادته الدائمة عن طريق طرح مواضيع هادفة ولتوجيهى فى عمل ترجمة لمدونتى.
مواطن مصرى نايم : لأنه وجهنى لطريقة عمل أكونت جديد للمدونة. لمزيد من الحماية.
نور الدين محمود: لأنه نبهنى دون قصد أن أى كلمة بكتبها فى أى تعليق هتترك انطباع لدى الآخرين. ولأنه صاحب قلم محترم أفادنى كثيراُ.
المعتصم : لاهتمامه بتعليقاتى ومتابعته الدائمة وتقبله ملحوظاتى وأسئلتى بصدر رحب.
د/أبويحيى وادم :لأنه صاحب فكرة موضوع " لَُغَتُنا الجميلة ".



استحق وبجدارة صاحب أسوأ و أوقح تعليق " مصطفى فتحى".

****

تعليق كان مفاجاة بالنسبة لى كان من :

نسيبه : لأنها أنتيمتى ولم تخبرنى بأنها هتعمل مدونة(هى المدونة مازالت تحت الإنشاء نظراً لإنشغالها فى هذه الفترة).

شقيقى : فرحت بتعليقه جداً (حسيت إن ورايا رجالة)عمل مدونة مخصوص عشان يعلق بها على حد تعليقه عندى ماعجبوش واضطررت أن لا أنشره( مفيش مدونة ده مجرد أكونت).



أكتر حاجة بتفرحنى:لما ألاقى تعليق على أى موضوع من موضوعاتى السابقة

( أهتم بجميع التعليقات مهما كان قدم الموضوع ومهما كان عدد التعليقات).
أكتر حاجة أثارت غضبى:حينما يتم نقل مواضيعى دون إذنى ودون حتى ذكر رابط مدونتى.

====

موضوع"وقفة مع النفس" بشكر كل اللى علقوا عندى واهتموا به وأحب أطمئنكم فصديقتى قد تماثلت الشفاء بفضل الله وهى الآن فى أفضل حال.

واحب أهدى لأخواتى الحبيبات هذا الموضوع :""خُدى بالك"

ولإخوانى الأفاضل:"تناقض ملحوظ"

ولقرائى الأعزاء جميعاً:"الصعود إلى القمة ".

شكر وتقدير لكل اللى عرفتهم عن طريقك وزى ماقلت مش عايزة انسى حد

بس عشان تطمنوا أكتر كل اللى علق عندى اكتر من مرتين .:) .
وعايزة أقولكم سنة راحت بكل مافيها وسنة جاية أحلى مافيها أنكم معايا وجزاكم الله عنى خير الجزاء لتواجدكم فى حياتى.

ولأن أمة الله وموناليزا وجهان لعملة واحدة وهى شخصى الكريم فأكيد هيفرحوا بالبالونات.

وبهذه المناسبة يسعدنى إستقبال أى تعليق على أى حاجة خاصة بالمدونة.

يعنى اللى عنده إعتراض على حاجة أو إقتراح أو أى سؤال أو أى كلمة يحب يوجهها للمدونة. فبراحته خالص.

وبالمناسبة دى برضه عايزة أقول لأى حد زعل منى أو اتضايق من تعليقى يسامحنى ويعرف انى ماقصدتش أبداً أزعل حد وأن تعليقاتى بتكون خاصة بالموضوع مش بصاحبها.

وكل سنة و إحنا طيبين. ومع بعض دايماً متجمعين.

ما يغضب الأزواج

هناك أشياء كثيرة تتسب فى غضب الزوج.
ولذلك أردنا ان نوجه هذه الرسالة للزوجات: فأيما امرأة ماتت وزوجها عنها راضِ دخلت الجنة "حديث شريف".
- لا تتعاملى معه بندية. فالقوامة له وحده فهو الرجل.
- اهتمى بمظهرك وزينتك داخل البيت. فهذا من حسن التبعل وستؤجرين عليه. أما لو تزينتى خارج المنزل فستتحاسبين لإنك بذلك ارتكبت إثم.
-اجعليه أولى إهتماماتك. يعنى قبل أهلك واولادك ووظيفتك وهواياتك وصحباتك...
- لا تدخلى بيته أحداً دون إذنه.
- عليكى بالإمتثال لأوامره مهما كانت. طالما لا تغضب الله.
- لا تضعيه فى مقارنة مع أى شخص مهما كان.
- اطهى له دائما ما يشتهيه من طعام.
- لا تتحدثى بسوء عن أهله مهما حدث.
- حذارى أن تتجاهليه وخاصة إذا كان مريضاً.
- اختارى الوقت المناسب لطلباتك.
- استقبليه دائما بترحاب وبوجه مبتسم.
- شجعيه على المكسب الحلال. فأنتى تتحملين الجوع ولا تتحملين عذاب جهنم.
- غيرى من مظهرك كل فترة منعا للملل.وأيضاً من نظام الشقة.
- ساعديه على فعل الخير.
- لا تجعليه ينام وهو غاضب عليكِ.

يسعدنى مشاركة أخوانى الأفاضل:
Eng. Ahmed Abo El-Ella - أن يشعر أن زوجته بتحترمه. بتحترمه في لبسها وكلامها وكل تصرفاتها لا تتجاهله. ده مش مستحيل اطلاقا ولا ينتقص من حريتها شئ إذا توافر عنصر الإحترام بين الطرفين. فهو في المقابل يجب ان يحترمها ويحرص على عدم اهانتها اطلاقا بمفردها أو أمام احد تحت أي ظرف.
blue-wave - عدم التقدير لما يفعله من أجلها.
ABOALI - آدم يحب بعينه.
جنّي - لا تكونى نكدية.
المعتصم - الزوجات ماتمسكش فى حكاية أنه لازم على الزوج أنه هو اللى يعمل وهو اللى يعمل طب ما أنتو واجب عليكم برضو أنكم تعملو وتشوفو أزواجكم بيحبو إيه ومش بيحبو إيه
- الزوجه الذكيه بتقدر تخلى زوجها يعمل اللى هى عاوزاه منه وانها بحُبها مع ذكائها بتحتويه والحياة بينهم بتبقى زى الفل .
romansy - عدم طاعه زوجته ليه وكمان عدم التزامها بواجبات بيتها وأسرتها.
الطائر الحزين - وصية أم لابنتها امامة بنت الحارث أظن أنها جامعه:
قالت أم لابنتها ليلة زفافها وهي تودعها .. أي بنيّــة ..إنك قد فارقت بيتك .. الذي منه خرجت .. ووكرك الذي فيه نشأت .. إلى وكر لم تألفيه .. وقرين لم تعرفيه .. فكوني له أمة .. يكن لك عبدا ..واحفظي له عشر خصال .. يكن لك ذخرا ..
أما الأولى والثانية .. فالصحبة بالقناعة والمعاشرة بحسن السمع والطاعة ..
أما الثالثة والرابعة .. فالتعهد لموقع عينيه ..والتفقد لموضع أنفه .. فلا تقع عيناه منك على قبيح ولا يشمن منك إلا أطيب ريح والكحل أحسن الحسن الموصوف والماء والصابون أطيب الطيب المعروف
وأما الخامسة والسادسة .. فالتفقد لوقت طعامه .. والهدوء عند منامه .. فإن حرارة الجوع ملهبة .. وتنغيص النوم مكربة ..
وأما السابعة والثامنة .. فالعناية ببيته وماله ..والرعاية لنفسه وعياله ..
أما التاسعة والعاشرة .. فلا تعصين له أمرا ولا تفشين له سرا .. فإنك أن عصيت أمره أوغرت صدره وإن أفشيت سره لم تأمني غدره ..ثم بعد ذلك .. إياك والفرح حين اكتئابه والاكتئاب حين فرحه .. فإن الأولى من التقصيروالثانية من التكدير .. وأشد ما تكونين له إعظاما .. أشد ما يكون لك إكراما ..ولن تصلي إلى ذلك حتى تؤثري رضاه على رضاكي .. وهواه على هواكي .. فيما أحببت أو كرهت ..
أحمد (زوج مخنوق سابقا ) - اكتر حاجة بتخنق الراجل محاولة فرض الرأي من الزوجة و الإصرار عليه في كل الأحوال .
و كمان الصوت العالي .الراجل ما بيطيقش أن زوجته تزعقله .
و كل اللي فات ده كوم و العند كوم تاني بجد اكتر حاجة بتخرب البيوت و بتكره الرجال في زوجاتهم هو العند و زي ما الرسول صلى الله عليه و سلم قال العند يورث الكفر.
ولد مصري - 1 الزوج ليس ابنا. واضح ليس ابنا يعني هو بيعرف ياكل ويشرب لوحده ولما يكون جعان هيقول عاوز آكل ولما يكون عطشان ممكن يقول إمبو.
2- الواحد بيشتري الحاجة لما يكون محتاج ليها مش علشان سعرها رخيص.
3- لما تكون الزوجة محتاجة حاجة تقولها على طول مافيش داعي للف والدوران .
4- "طيب" أو "لأ" إجابات واضحة جداً يعني مش محتاجة شرح خالص.
5- لو الزوجة شايفة إنها تخنت يبقى هي أكيد تخنت مش لازم كل شوية تسأل هو أنا تخنت!!.
6- الزوج مابيعرفش الغيب ومابيعرفش الزوجة بتفكر في إيه يبقى الزوجة ماتتوقعش من الغلبان جوزها إنه يعرف لوحده هي بتفكر في ايه ويعملها الحاجة اللي بتفكر فيها .. إحنا بشر يا عالم.
7- لما يكون الزوج والزوجة خارجين في أي مكان يبقى أي لبس هيتلبس هيقضي الغرض ومش محتاجين نقعد ساعتين قدام الدولاب علشان نختار لبس هنلبسه في خروجه الوقت المحدد ليها نص ساعة.
8- الزوج ليس في حاجة إلى تعليمات مستمرة من الزوجة هو ممكن والله يتصرف لوحده.
9- لو فيه إجابة الزوجة مش عاوزة تسمعها يبقى ياريت متسألشي السؤال بتاع الإجابة دي!!.
10 - لو الزوج سأل الزوجة فيه مشكلة ولا حاجة؟ والزوجة جاوبت "أبداً مافيش" فدي إجابة واضحة جدا ومش محتاجة إن الزوج يعيد السؤال مرة تانية وتالتة وعاشرة علشان يعرف هو فيه ايه!!.
11- الزوج بيعرف ألوان الطيف فقط يعني البيستاج والأوف وايت والجانجاه والتركواز مش من ضمن الألوان اللي الزوج ممكن يتعرف عليها .
12- لما تكون الزوجة عاوزة تكلم الزوج في حاجة هايفة ومش مهمة يبقى يا ريت تستنى ما بين الشوطين محبكش تقولها والماتش شغال.

د/عرفه - إنها متسمعش الكلام.
يا عالم يا هوووووووووووو -1-اذا رأيت الرجل بجد تعبان ومهموم وعند مشاكل ومش عايز يتكلم مع حد... ما تضغطيش عليه... لأن فعلا محتاج يقعد لوحده... لأنه لو عايز يحكيلك هيأقولك من غير ما تطلبي.
2-الأحترام.
3-بلاش الراجل يروح الشغل الصبح يلاقكي نايمة.... يرجع من الشغل يلاقكي قاعدة قدام التلفزيون ولا في أكل ولا البيت مترتب.... الحاجة دي بجد بتخنق الراجل.
4-حاولي دائما تتزيني لزوجك وتلبسي ليه اجمل حاجة عندك...ياريت يبقى علطول مش أول شهر بس.
5-يجب تدليل الزوج... عشان في فكرة بيحاول يبثها الأعلام إن المرأة إللي بتدلع على جوزها لازم تبقى واحدة مش كويسه.... بس العكس الزوجة الممتازة التي تعرف حق الله هي التي تقوم بذلك.
6-بلاش الطلبات إللي ملهاش لازمة ... خصوصا في آخر الشهر لأن الراجل بيكون مزبطها بالعافية أوقات كتير.
7- لو الزوج رفض إنه يشتري حاجة كان فعلا ليه وجهة نظر... بلاش تزعلي (ده مش معناه إنه بخيل) لكن هو بيكون ليه وجهة نظر.... لو بجد نفسك فيها تعالي بعديها في ساعة صفى وقولي له تاني... هيجيبها علطول.
8-بلاش الراجل يحس أنك متجوزاه عشان يشتريلك بس.
9-بلاش لو حصلت مشكلة صغيرة... أو رفض حاجة... نظام( والله ما رأيت منك خير قط) لأن الأسلوب ده بيخلي الراجل تصعب عليه نفسه.
10-بلاش الراجل يلاقي كل اسراره عند والدتك لأن الموضوع ده بيحسسه إن ما فيش خصوصيه... بالضبط زي ما بيضايقك إن يقول أسرارك لوالدته.
11-النقطة دي بالذات مافيهاش عيب لأن أوقات كتير بتكون هي سبب المشاكل: ألا وهي العلاقة الخاصة بينهما... لازم بجد يكون فيها صراحة..و مافيهاش أي كسوف... لو حد مضايق من حاجة أو حاسس إن مفيش توافق لازم يتكلم مع الطرف الأخر. عشان الموضوع يتحل, لكن لو فضل ساكت... هتظل المشكلة وهتأدي إلى خلافات كبيرة بسبب المشكلة دي.



سؤال جانبى للمتزوجين:إيه أكتر حاجة بتحبها فى شريك حياتك؟.
ولغير المتزوجين: إيه أول طلب ليك فى شريك حياتك؟.

ما يغضب الزوجات

هناك أشياء كثيرة تجعل الزوجة تنفر من حياتها وتقلل من قيمة زوجها لديها.
وهذه بعض النصائح للأزواج ليتجنبوا هذه الأشياء:-
- لا تساعدها على الشك فيك من خلال إستثارة غيرتها من خلال مواقف مختلفة.
- لا تتعامل بأنانية فأنت المسئول الرئيسى عن البيت بكل من فيه. وليكن عندك قليلاً من الإيثار.
- لا تسئ إليها أبدأً وخاصة أمام أحد. فمن احترامك لها يحترمها الآخرون.
- تجاوز عن هفواتها. المثل بيقول"حبيبك يبلعلك الزلط وعدوك يتمنالك الغلط".
- اعمل مساحة من الحوار بينكما مهما كان الخلاف.
- إياك والخرس الزوجى. وخاصة إذا كنت بطبعك تتحدث كثيراً مع الأهل والأصدقاء كلما تراهم.
- لا تجعلها تشعر بأنها مجرد وعاء لتفريغ شهواتك.
- لا تجعلها تشعر بأنك تستطيع أن تستبدلها فى أى لحظة تريد. بل اجعلها تشعر بمكانتها لديك واتقى الله فيها.
- اعمل على استمرار البيت وليس هدمه. فأنت الرجل.
- لا تبخل عليها بالكلمة الطيبة والابتسامة الجميلة والنظرة الحنونة. على فكرة كله بثوابه.
- لاتساعدها على خيانتك ولو حتى بتفكيرها بحرمانك العاطفى لها.و احذر المتلصصين اللذين ينتظرون اللحظة المناسبة لكى يعطوها ماتحرمها منه.
يسعدنى إضافة أخواتى الحبيبات
سلوى - إياك أن تحتاج لك يوما فلا تجدك مهما كانت مشاغلك أو متاعبك . فإن لم تلجأ إلى الرجل الذي اختارته فلمن تلجأ؟؟
حنان الشافعي - ياريت كل رجل يراعي الله في زوجته من أجل سعادته أولاً.

الفقيرة إلى الله أم البنات - أن يتعلم الرجل أن زوجته ليست أمه .
-.وأنه إذا أراد شيئا هناك فى المقابل شئ . لا أحد يأخذ دون عطاء إلا الأبناء مع الأمهات والآباء.
إذا أرد إحترام يجب أن يحترمها. أراد حب يجب أن يحبها ..
-.لا يتوقع أن يأخذ أفضل شئ ولا يعطى شئ .
النقطه الأهم من وجة نظرى لنجاح الزواج هو أن يتنازل كل طرف عن شئ يحبه ويعشقه مقابل أن تستمر الحياة
الزواج قارب بمجدافين إذا جدف أحدهما دائماً وارتاح الآخرغرق القارب.
ستيته حسب الله الحمش - لا تتشبس بعادات الماضي في بيت العيلة .وانسوا سويا كلمة "أنا كنت متعود عند ماما على كذا" الزوجة غالية ولن تضحي بقدر الأم .
- بقليل من التنازلات الغير مؤثرة في دين أو كرامة تمشي مراكب بيوت كتيرة.مش عيب ان الراجل يبقى غلطان ويعترف ده لاينقص من رجولته وانما يعليه في نظر بنت الأصل.
- إياكم وإفشاء سر البيوت حتى لأقرب الناس. فالمرأه ينتهي الرجل بداخلها أن وجدت أمه عايشة معاها جوا جوا البيت .
- لا يحل مشاكلكم إلا عقلكم وليس قريب أو صديق .صديقك لازم يعمل السبع رجالة في بعض واستحالة يقول لك كلمة فيها تنازل لحسن تفتكره هو كده [وهو كده وكده وكده] هو لاشاف تضحيات مراتك ولا الخير اللي بينكم وعليه هو ونصائحه قنبلة مولوتوف جوا بيتك وبيته في أمان.
mony - لا تبحث عن نقط الاختلاف بينكم. و محاولة تطبيعها علي ما تريد .فلكل شخص شخصيته
- ابحث عن نقط الإلتقاء بينكما لتبدأوا من خلالها حياة سوية قليلة المشاكل.
حياتى نغم - ادعى لها بظهر الغيب وأمامها.
* ألا تخرج خلافتهما خارج بابهما الذى أغلق عليهما ، ولا مانع من استشارة أهل العلم والخبرة إذا ألح الأمر وليكون من خارج نطاق الأسرتين .
* أن يتقنا التجديد فى حياتهما كما يجددا بيتهما ، وأن يقدسا مثلاً الخروج سوياً بين الحين والآخر وينتظرا ذلك .
* أن تشاركها اهتماماتها .
* أن تعلم بأنك اخترتها شريكه لحياتك وعليك أن تسعد باختيارك.
* أنه لامكان للحب الحقيقى إلا فى حياتك الزوجيه حيث يضحى كل منكم لأجل الآخر .
الفراغ - أن لا يترك الزوج أى خلاف يستمر إلى اليوم التالى فإن الشيطان له ألاعيبه القذره .
MRS WRITER - الراجل لازم يكون كريم ماديا ولا يبخل بما لديه من مال لإسعاد زوجته حتى لو كان دخله بسيط برضه يشعرها إن هو وكل مالديه ليها هي.
- لا تكن صلبا فتكسر ولا لينا قتعصرالقسوة مش مستحبة لكن الحزم وقوة الشخصية هي اللي بتخللي المرأة تحترم زوجها وطبعا اللين الشديد بيجيب نتائج عكسية .
- لازم الزوج يحترم زوجته أمام الأبناء ولو له أي تعليق يكون بينه وبينها وده كمان لصحة الأطفال النفسية.
يا عالم يا هوووووووووووو- 1- لازم تحسسها إنك انت اخترتها من بين نساء العالم كله...وبالتالي مكانتها عندك كبيييييييييييرة جدا
2-الاحترام..الاحترام.... مافيش حد شاري التاني بفلوسه يعني مافيش لحد فضل على حد.على فكرة النقطة دي غالبا بتكون سبب انهيار البيوت.
3-عدم جرح المشاعر... دائما قبل ما تعمل أي حاجة ضع نفسك مكانها وشوف هيكون احساسك إيه.
4-المرأه دائما لما يكون عندها مشكلة بتحب تتكلم وتطلع إللي جواها وكمان بتحب حد يسمعها. حاول تسمعها لحد الأخر من غير ما تقاطعها ولا تبين مللك من كلامها أو إن المشكلة ساذجة.
5-المرأة بطبعها عاطفية ... عكس الرجل إللي بغلب علية الطبيعة العملية... يعني حاول تجبلها هدايا (حتى لو كانت سيطة) وتخدها تتغدوا بره الحاجات ليها تأثير كبير... برده رسايل على الموبايل.
6-معلش الجزء بتاع الاحترام عندي ليه تكملة: الاحترام امام الأولاد.... نقطة في منتهى الخطورة...الأولاد غالبا بيتعلموا التعامل مع زوجاتهم في المستقبل من أبوهم وأمهم...فلو الأب بيظهر الحب والحنان لزوجته... فبالتالي هيكون تأثير ذلك على زواجهم في المستقبل.
7- ياريت لو الأكل طعمه معجبكش.... وضحلها إنه جميل جدا ...بس لو كان عليه ملح شوية أو أي حاجة ناقصه... ياه تفرح أوي..( على فكرة أنا بجرب ده مع أمي بتنبسط أوي).
8- ابدي اعجابك بأي حاجة هي عملاها سواء أكل ترتيب بيت....شكلها ومظهرها.




أريد أن تكون التعليقات بالنسبة للنساء لو فيه أى إضافة اخرى لاتبخلوا علينا بها.
وبالنسبة للرجال أن يذكروا أكثر الاشياء التى تغضب الزوج وسنخصص لآرائكم بوست مخصوص حتى تستفيد منه الزوجات.
لعلنا بهذا نساعد على استمرار الحياة الزوجية بطريقة ترضى الطرفين ومن ثم يستطيعون إرضاء الله حيث أن الزواج عبادة.
فلنتعاون جميعاً على هذا.