الأحد، 1 فبراير 2009

ما يغضب الزوجات

هناك أشياء كثيرة تجعل الزوجة تنفر من حياتها وتقلل من قيمة زوجها لديها.
وهذه بعض النصائح للأزواج ليتجنبوا هذه الأشياء:-
- لا تساعدها على الشك فيك من خلال إستثارة غيرتها من خلال مواقف مختلفة.
- لا تتعامل بأنانية فأنت المسئول الرئيسى عن البيت بكل من فيه. وليكن عندك قليلاً من الإيثار.
- لا تسئ إليها أبدأً وخاصة أمام أحد. فمن احترامك لها يحترمها الآخرون.
- تجاوز عن هفواتها. المثل بيقول"حبيبك يبلعلك الزلط وعدوك يتمنالك الغلط".
- اعمل مساحة من الحوار بينكما مهما كان الخلاف.
- إياك والخرس الزوجى. وخاصة إذا كنت بطبعك تتحدث كثيراً مع الأهل والأصدقاء كلما تراهم.
- لا تجعلها تشعر بأنها مجرد وعاء لتفريغ شهواتك.
- لا تجعلها تشعر بأنك تستطيع أن تستبدلها فى أى لحظة تريد. بل اجعلها تشعر بمكانتها لديك واتقى الله فيها.
- اعمل على استمرار البيت وليس هدمه. فأنت الرجل.
- لا تبخل عليها بالكلمة الطيبة والابتسامة الجميلة والنظرة الحنونة. على فكرة كله بثوابه.
- لاتساعدها على خيانتك ولو حتى بتفكيرها بحرمانك العاطفى لها.و احذر المتلصصين اللذين ينتظرون اللحظة المناسبة لكى يعطوها ماتحرمها منه.
يسعدنى إضافة أخواتى الحبيبات
سلوى - إياك أن تحتاج لك يوما فلا تجدك مهما كانت مشاغلك أو متاعبك . فإن لم تلجأ إلى الرجل الذي اختارته فلمن تلجأ؟؟
حنان الشافعي - ياريت كل رجل يراعي الله في زوجته من أجل سعادته أولاً.

الفقيرة إلى الله أم البنات - أن يتعلم الرجل أن زوجته ليست أمه .
-.وأنه إذا أراد شيئا هناك فى المقابل شئ . لا أحد يأخذ دون عطاء إلا الأبناء مع الأمهات والآباء.
إذا أرد إحترام يجب أن يحترمها. أراد حب يجب أن يحبها ..
-.لا يتوقع أن يأخذ أفضل شئ ولا يعطى شئ .
النقطه الأهم من وجة نظرى لنجاح الزواج هو أن يتنازل كل طرف عن شئ يحبه ويعشقه مقابل أن تستمر الحياة
الزواج قارب بمجدافين إذا جدف أحدهما دائماً وارتاح الآخرغرق القارب.

ستيته حسب الله الحمش - لا تتشبس بعادات الماضي في بيت العيلة .وانسوا سويا كلمة "أنا كنت متعود عند ماما على كذا" الزوجة غالية ولن تضحي بقدر الأم .
- بقليل من التنازلات الغير مؤثرة في دين أو كرامة تمشي مراكب بيوت كتيرة.مش عيب ان الراجل يبقى غلطان ويعترف ده لاينقص من رجولته وانما يعليه في نظر بنت الأصل.
- إياكم وإفشاء سر البيوت حتى لأقرب الناس. فالمرأه ينتهي الرجل بداخلها أن وجدت أمه عايشة معاها جوا جوا البيت .
-
لا يحل مشاكلكم إلا عقلكم وليس قريب أو صديق .صديقك لازم يعمل السبع رجالة في بعض واستحالة يقول لك كلمة فيها تنازل لحسن تفتكره هو كده [وهو كده وكده وكده] هو لاشاف تضحيات مراتك ولا الخير اللي بينكم وعليه هو ونصائحه قنبلة مولوتوف جوا بيتك وبيته في أمان.
mony - لا تبحث عن نقط الاختلاف بينكم. و محاولة تطبيعها علي ما تريد .فلكل شخص شخصيته

- ابحث عن نقط الإلتقاء بينكما لتبدأوا من خلالها حياة سوية قليلة المشاكل.
حياتى نغم - ادعى لها بظهر الغيب وأمامها.
* ألا تخرج خلافتهما خارج بابهما الذى أغلق عليهما ، ولا مانع من استشارة أهل العلم والخبرة إذا ألح الأمر وليكون من خارج نطاق الأسرتين .
* أن يتقنا التجديد فى حياتهما كما يجددا بيتهما ، وأن يقدسا مثلاً الخروج سوياً بين الحين والآخر وينتظرا ذلك .
* أن تشاركها اهتماماتها .
* أن تعلم بأنك اخترتها شريكه لحياتك وعليك أن تسعد باختيارك.
* أنه لامكان للحب الحقيقى إلا فى حياتك الزوجيه حيث يضحى كل منكم لأجل الآخر .
الفراغ - أن لا يترك الزوج أى خلاف يستمر إلى اليوم التالى فإن الشيطان له ألاعيبه القذره .
MRS WRITER - الراجل لازم يكون كريم ماديا ولا يبخل بما لديه من مال لإسعاد زوجته حتى لو كان دخله بسيط برضه يشعرها إن هو وكل مالديه ليها هي.
- لا تكن صلبا فتكسر ولا لينا قتعصرالقسوة مش مستحبة لكن الحزم وقوة الشخصية هي اللي بتخللي المرأة تحترم زوجها وطبعا اللين الشديد بيجيب نتائج عكسية .
- لازم الزوج يحترم زوجته أمام الأبناء ولو له أي تعليق يكون بينه وبينها وده كمان لصحة الأطفال النفسية.
يا عالم يا هوووووووووووو- 1- لازم تحسسها إنك انت اخترتها من بين نساء العالم كله...وبالتالي مكانتها عندك كبيييييييييييرة جدا
2-الاحترام..الاحترام.... مافيش حد شاري التاني بفلوسه يعني مافيش لحد فضل على حد.على فكرة النقطة دي غالبا بتكون سبب انهيار البيوت.
3-عدم جرح المشاعر... دائما قبل ما تعمل أي حاجة ضع نفسك مكانها وشوف هيكون احساسك إيه.
4-المرأه دائما لما يكون عندها مشكلة بتحب تتكلم وتطلع إللي جواها وكمان بتحب حد يسمعها. حاول تسمعها لحد الأخر من غير ما تقاطعها ولا تبين مللك من كلامها أو إن المشكلة ساذجة.
5-المرأة بطبعها عاطفية ... عكس الرجل إللي بغلب علية الطبيعة العملية... يعني حاول تجبلها هدايا (حتى لو كانت سيطة) وتخدها تتغدوا بره الحاجات ليها تأثير كبير... برده رسايل على الموبايل.
6-معلش الجزء بتاع الاحترام عندي ليه تكملة: الاحترام امام الأولاد.... نقطة في منتهى الخطورة...الأولاد غالبا بيتعلموا التعامل مع زوجاتهم في المستقبل من أبوهم وأمهم...فلو الأب بيظهر الحب والحنان لزوجته... فبالتالي هيكون تأثير ذلك على زواجهم في المستقبل.
7- ياريت لو الأكل طعمه معجبكش.... وضحلها إنه جميل جدا ...بس لو كان عليه ملح شوية أو أي حاجة ناقصه... ياه تفرح أوي..( على فكرة أنا بجرب ده مع أمي بتنبسط أوي).
8- ابدي اعجابك بأي حاجة هي عملاها سواء أكل ترتيب بيت....شكلها ومظهرها.




أريد أن تكون التعليقات بالنسبة للنساء لو فيه أى إضافة اخرى لاتبخلوا علينا بها.
وبالنسبة للرجال أن يذكروا أكثر الاشياء التى تغضب الزوج وسنخصص لآرائكم بوست مخصوص حتى تستفيد منه الزوجات.
لعلنا بهذا نساعد على استمرار الحياة الزوجية بطريقة ترضى الطرفين ومن ثم يستطيعون إرضاء الله حيث أن الزواج عبادة.
فلنتعاون جميعاً على هذا.

هناك 74 تعليقًا:

Ahmed يقول...

معاكي حق في كل النقاط

بالنسبه للرجل اهم شئ يبحث عنه وهو مش مستحيل اطلاقا انه يشعر أن زوجته بتحترمه. بتحترمه في لبسها وكلامها وكل تصرفاتها لا تتجاهله. ده مش مستحيل اطلاقا ولا ينتقص من حريتها شئ اذا توافر عنصر الاحترام بين الطرفين. فهو في المقابل يجب ان يحترمها ويحرص على عدم اهانتها اطلاقا بمفردها أو أمام احد تحت أي ظرف.

الموضوع جميل ويارب الناس تستفيد بجد منه

ريمان يقول...

والله برافو عليكى

بجد تسلم اديكى

معاكى حق فعلا

يا ريت كل الرجاله يشوفوا كلامك ده

وانا هبعت لينك البوست ده لكل اللى عندى على الاميل

بنوتة يقول...

السلام عليكم
جزاكى الله خيرا معاكى حق طبعا في كل الكلام وربنا يهدى أحوال المسلمين ويصلح ما بينهم
تحياتى ليكى

سلوى يقول...

موضوع جميل
وفكرة حلوة أوى

وأحب أضيف
إياك أن تحتاج لك يوما فلا تجدك
مهما كانت مشاغلك أو متاعبك

فإن لم تلجأ إلى الرجل الذي اختارته فلمن تلجأ؟؟

طبعا كلنا نلجأ إلى الله
لكنى أتحدث عن موقف معين

blue-wave يقول...

بوست جميل جدا
واعتقد انك اوجزتى كل ما يغضب الزوجات
اما اكثر ما يغضب الازواج فهو عدم التقدير لما يفعله من اجلها
تحياتى

Kiara يقول...

بصراحه مش فيه اي اضافه يمكن كان في نقطه كنت هكتبها بس لاقيتك قلتيها وهي موضوع الغيره
متابعه معاكي الموضوع الحيوي دا

Hanan Elshafey يقول...

ياريت كل رجل يراعي الله في زوجته ويراعي كلامك من اجل سعادته اولا

مسدس صغير يقول...

نصائح غالية واوعدك ان شاء الله
اما اتجوز هاخد بيها ..
بس ادعيلى

رفقة عمر يقول...

نصايح مهمه جدا
عارفه موناليزا لو كل واحد فى اى مجال وفى اى مكان
العلاقه بين الزوجين الاصدقاء التاجر المشترى الحاكم المحكوم لو كل واحد عامل الاخر بشرع الله وراع ربنا فى تعاملاته صدقنى البيوت هاتكون سعيده مش هايكون فيه فساد الدنيا بجد هاتكون افضل وممكن نعيش وقتها فى المدينه الفاضله
ودة تحقق فى المدينه المنورة كانت فعلا المدينه الفاضله ايام الرسول صلى الله عليه وسلم
ربنا يهدينا جميعا لما يحبه ويرضاه
مواضيعك موناليزا جميله بسيطه وعميقه

الفقيرة إلى الله أم البنات يقول...

ان بتعلم الرجل ان زوجته ليست أمه
وانه اذا أراد شيئا هناك فى المقابل شئ
لا أحد يأخذ دون عطاء الا الابناء مع الامهات والآباء
إذا أرد احترام يجب ان يحترمها
اراد حب يجب ان يحبها ..لا يتوقع ان يأخذ افضل شئ ولا يعطى شئ

النقطه الأهم من وجة نظرى لنجاح الزواج
هو ان يتنازل كل طرف عن شئ يحبه ويعشقه مقابل ان تستمر الحياةالزواج قارب بمجدافين
اذا جدف أحدهما دائماوارتاح الآخر
غرق القارب

هناك الكثير ولكن يكفى هذا ونستمع معك لآراء الازواج



معلهش يا مونى
فى حاجه مهمه قوى
فليتقى الرجل الله فى زوجته
لان اول من يحاسب أمام الله الزوج
تأتى الزوجه وتشتكى إلى الله ما فعله فيها
هذا ما سمعته من أحدهم...,اتمنى ان يكون صح ..وش حد فرحان وشمتان

دمتى بخير ومواضيعك مميزة

princess يقول...

نصائح غالية بجد

SHAPE YOUR LIFE (ABOALI) يقول...

اعلق مرة ثانية لاءنى مش عارف تعليقى حفظ ولا
نعمل ايه بقى يا موناليزا
حفظ التعليقات ده مشكلة المهم


مايغضب الزوجات
هو نفسه ما يغضب ادم
فكلانا كيان واحد فى جسدان
وادام وحواء يكملا بعضهما
ولا تبنى علاقتهما على الشراكة
او الشخصيات او النوع

السكن والمودة والرحمة
هم هرم النجاح لاءى علاقة
فاختارى ماذا تريدى فى سكنك من وسائل للراحة وضعى السماد لها فى بيتك
بالتاءكيد سيكون طارق الباب هو حامل المسك وليس حامل الكير
لو حسبنا متوسط اعمارنا سنجد انه 60سنة

20 (نوم) متوسط 8 ساعات
15 طعام وشراب وملذات 6 ساعات يوميا"
15سنة حتى بلوغ سنة المراهقة

لم يتبق الا 10 سنوات
الاجدر ان نعمل فيها لزرع نبت الجنة


اخيرا

ادم يحب بعينه
و حواء تحب باءذنيه

معادلة ورائها تفكير واعتبار


تحياتى الراقيه

للمرة الثانية فى التعليق

جنّي يقول...

السلام عليكم

جميلة جدا نصايحك وعملية جدا ..

وبالنسبة لنا اكتر حاجة بتقرف الازواج الزوجة النكدية ..

وكل ما ذكرتيه نجعله بياء المخاطبة للمؤنث .. فكل ما تريده الزوجة من زوجها هو نفس ما يريده الزوج من زوجته ..

mahasen saber يقول...

مونا والله كفيتى ووفيتى وقلتى المفيد

ويا رب الرجاله تقرا بقلبها وتستشعر الكلام باحساسها

والستات المثل اليى تلاقى جوزها بنى ادم تمسك فيه وتكلبش
وتبلعله الزلططبعا ده لو بنى ادم

وحشتينى يا مونا ودايما مواضيعك شيقه وجميله

موناليزا يقول...

مهندس/ احمد ابو العلا
ـــــــــــــــــــــ
اهلا بيك ياباشمهندس
اشكرك جدا لرايك ولمشاركتك
نورت مدونتى وارجو دوام التواصل


**********************************


ريمان
ــــــــ
اختى الحبيبة: الله يخليكى ياقمر ماتحرمش:)
نورتينى حبيبتى ودمتى بخير


********************************


بنوتة
ــــــــ
وعليكم السلام ورحمة الله وبركاته
اختى الحبيبة:ربنا يكرمك ويتقبل دعائك اللهم امين
نورتينى حبيبتى ودمتى بخير


**********************************


سلوى
ــــــ
اختى الحبيبة:اشكرك جدا لرايك والحمدلله الذى هدانى الى هذا
إضافة قيمة نورت الموضوع اشكرك جدا عليها
نورتينى حبيبتى ودمتى بخير


*******************************


بلو واف
ــــــــــ
اهلا بيك يادكتور
اشكرك جدا لرايك
ومشاركة قيمة ستفيدنا فى البوست القادم أشكرك جدا عليها
دمت طيبا ولمدونتى زائرا


********************************


كيارا
ــــــــ
اختى الحبيبة:تسعدنى متابعتك جدا
نورتينى حبيبتى ودمتى بخير


********************************


حنان الشافعى
ــــــــــــــــ
اختى الحبيبة:اشكرك جدا لمشاركتك وقد تمت إضافتها للموضوع
نورتينى حبيبتى ودمتى بخير


********************************


مسدس صغير
ــــــــــ
اهلا بيك يافندم
ربنا يرزقك بالزوجة الصالحة وتتقى الله فيها:)
دمت طيبا ولمدونتى زائرا


********************************


رفقة عمر
ــــــــــــ
اختى الحبيبة:اشكرك جدا لرايك ولتعليقك
وربنا يتقبل دعائك اللهم امين
نورتينى حبيبتى ودمتى بخير


********************************


الفقيرة الى الله ام البنات
ـــــــــــــــــــــــــ
اختى الحبيبة: ما اجمل مشاركتك:)
حبيبتى أذكرك بحديث رسولنا الحبيب صلوات الله وسلامه عليه"كفى بالمرء إثماً أن يضيع من يعول" (افرحى براحتك بقى) :)
نورتينى حبيبتى ودمتى بخير


*********************************


برينسيس
ــــــــــ
اختى الحبيبة:اشكرك جدا فماتوفيقى الا بالله
نورتينى حبيبتى ودمتى بخير


*********************************


ابو على
ــــــــــ
اهلا بيك يافندم
أعذرنى اخى الفاضل فبهذا الاشراف استطيع متابعة اى تعليق على مواضيعى السابقة وبالمقابل استطيع الرد

كلامك منطقى جدا ولكن للاسف مش فى كل الاحوال يعنى الواقع مختلف تماما عما قرأناه
ممكن جدا تعطى حب واهتمام ومراعاة لربنا وتقابل بالجحود والغدر والخيانة!
ولذلك أردت أن نركز على بعض نقاط أساسية لعلها تقوم بدور الإرشاد والتوجيه للزوجين

اشكرك جدالرايك و لاضافتك القيمة التى ستفيدنا فى البوست القادم
دمت طيبا ولمدونتى زائرا


***********************************


جنى
ـــــــ
وعليكم السلام ورحمة الله وبركاته
اهلا بيك استاذ سيد
اشكرك جدا لرايك ولمشاركتك القيمة
دمت طيبا ولمدونتى زائرا


*********************************


محاسن صابر
ـــــــــــ
اختى الحبيبة:اهلا اهلا وحشتينى ياحبيبتى
اشكرك جدا لرايك ولمشاركتك
نورتينى ياسونا ودمتى بخير

Unknown يقول...

السلام عليكم ورحمة الله وبركاتة
كيف حالك يا موناليزا؟
يا رب تكونى فى افضل حال
ما شاء الله عليكى بوست جميل ومفيد بالفعل
بس المهم ان الرجال يعملوا بية
بس بردوا لو الزوجات عاوزين كدا يبقى الاولى ان تكون هى الاخرى كدا بردوا ميبقاش زوجها ظل رجل ولا ظل حيطة
وكمان ميبقاش عندها حصالة للفلوس فقط واذا دفع وجد ما يسرة واذا لم يدفع وجد ما يضرة
دمتى بالف ود

mohamed ghalia يقول...

حلوه قوى جملة النصائح دى
ياريت بجد نتعلم
دمتى بكل الود

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمة موناليزا
تحياتى وتقديرى
الموضوع حلو وعلى الرغم من انى مش متجوز(ومابينلهاش جواز)الا انى شايف انه فعلا على الرجل انه يعمل على احترام زوجته وحبها وانه يقدر مسؤليات الزواج صح
بس برضو يعنى الزوجات كمان ماتمسكش فى حكاية انه لازم على الزوج انه هو اللى يعمل وهو اللى يعمل طب ماانتو واجب عليكم برضو انكم تعملو وتشوفو ازواجكم بيحبو ايه ومش بيحبو ايه وكمان انا اسمع من زمان (مش من زمان قوى يعنى)ان الزوجه الذكيه بتقدر تخلى زوجها يعمل اللى هى عاوزاه منه وانها بحبها مع ذكائها بتحتويه والحياة بينهم بتبقى زى الفل
مش عارف ده رأيى مش عارف بقى لما اتجوز ايه اللى هيحصل
تحيات اخوكى المضروب
ودمتى بكل خير وود
والسلام عليكم ورحمة الله وبركاته

romansy يقول...

الموضوع جميل قوى بس انا شايف ان اكتر حاجه بتزعل الزوج هى عدم اطاعه زوجته ليه وكمان عدم التزامها بواجبات بيتها واسرتها

ستيتة يقول...

الى الرجل والمرأه معا
بدأتما حياة جديدة فلا تتشبس بعادات الماضي في بيت العيلة وانسوا سويا كلمة "أنا كنت متعود عند ماما على كذا" أو لو كان بابا كان عملي كذا"
الزوج غالي لكن لا يتحمل مثل الأب وكذلك الزوجة غالية ولن تضحي بقدر الأم

بقليل من التنازلات الغير مؤثرة في دين أو كرامة تمشي مراكب بيوت كتيرة

مش عيب ان الراجل يبقى غلطان ويعترف ده لاينقص من رجولته وانما يعليه في نظر بنت الأصل

أياكم وافشاء سر البيوت حتى لأقرب الناس فالرجل ينجرح بشده من اهتزاز صورته أمام أقاربك والمرأه ينتهي الرجل بداخلها أن وجدت أمه عايشة معاها جوا جوا البيت

لا يحل مشاكلكم الا عقلكم وليس قريب او صديق "هي صاحبتك عاشرت جوزك وشافت خيره؟ ازاي تفتكر حاجات حلوة ماشفتهاش وعليه ها تطلع نصيحتها قنبله موقوته في بيتك
"صديقك لازم يعمل السبع رجالة في بعض واستحالة يقول لك كلمة فيها تنازل لحسن تفتكره هو كده [وهو كده وكده وكده] هو لاشاف تضحيات مراتك ولا الخير اللي بينكم وعليه هو ونصائحه قنبلة مولوتوف جوا بيتك وبيته في امان

مؤكد فيه حاجات كتير بس أنا بقول
ومن يتقي الله يجعل له مخرجا ويرزقه من حيث لا يحتسب .. فاتقوا الله مااستطعتم
تحياتي ومودتي وبوسة كمان على البوست ده

*الطالبة عفو الله *زوزو يقول...

ما شاء الله عليك حبيبتي مواضعك دائما مفيدة و قيمة

يا رب بس الاخوان الازواج يسمع للنصائح دي و يعملوا بها

بارك الله فيك اختي

و جعل الله ما كتبت يمينك في ميزان حسناتك

ادم المصرى يقول...

ربنا يباركلك ويهدى كل الازواج

والزوجات بردو ربنا يعطيهم الصبر

ويمهلهم بلحكمه ويارب الكل يستفيد

بجد بلدنا والعالم العربى فى معاناه من هذه

الاشياء الى عمت على ديننا

بارك الله فيكى ولكى وعليكى

الطائر الحزين يقول...

وصية أم لابنتها امامة بنت الحارث اظن أنها جامعه

http://www.islamway.com/?iw_s=Article&iw_a=view&article_id=30

TIMMY !! يقول...

للأسف الزواج ده حاجة معقدة ,

الواحد علشان يتزج زيجة ناجحة لازم يبقى سوبر مان في كل حاجة ,
و ياسلام لو بقى دكتور نفسي أو عالم اجتماع علشان يقدر يتجوز من غير مشاكل ,

الزواج ده حاجة تخنق بصراحة ,

أحمد (زوج مخنوق ). يقول...

اولا جزاكي الله خيرا و رزقك خيري الدنيا و الاخرة
ثانيا اكتر حاجة بتخنق الراجل محاولة فرض الرأي من الزوجة و الأصرار عليه في كل الاحوال
و كمان الصوت العالي
الراجل ما بيطيقش ان زوجته تزعقله
و كل اللي فات ده كوم
و العند كوم تاني
بجد اكتر حاجة بتخرب البيوت و بتكره الرجال في زوجاتهم هو العند
و زي ما الرسول صلى الله عليه و سلم قال
العند يورث الكفر

تحياتي

حـــــدوتـــــة يقول...

السلام عليكم

بما انى مش متجوز فمعنديش اضافة
لكن انا شايف ان الاحتواء مهم جدا
يعنى لو الراجل عرف يحتوى الست حجات كتير هتتغير فى علاقتهم
جزاكى الله خيرا

سلالالالالالالالالالالالالالالالالالالالالالالام

Heba Sayed يقول...

السلام عليكم

ازيك يا موناليزا يا حبيبتى

بوست جميل اوى

رائع بجد لانه ضم الى حد كبير كل النقاط اللى بتغضب الزوجة

ومنها انه بيتمتع لما بيثير غيرتها لانه بيحسسها انها ليس لها اهميه وقيمة لديه


وبرضو لما بيبخل عليها بالابتسامة والكلام الكويس ولما بيهزقها اما الاخرين ومع الاسف نتيجة للبخل والاستهزاء بيكون فى حاجات غير متوقعة من الزوجين

وبيترتب عليها هدم العش السعيد


بوست رائع كما عودتينا

سلام ياقمر

موناليزا يقول...

حتى تشرق الشمس
ـــــــــــــــ
اختى الحبيبة:انا الحمدلله بخير اشكرك لسؤالك
اشكرك جدا لرايك
ايه ده ايه ده!!...خيانة:) انتى معانا ولا علينا:)
مشاركتك تعتبر اول مشاركة انثوية فى البوست القادم ولان البوست القادم سيكون ذكورى بحت لذلك عايزين رايك الانثوى فى هذا الموضوع
ايه اكتر حاجة ممكن تضايقك من زوجك؟؟؟
فى انتظار رايك:)
نورتينى حبيبتى ودمتى بخير


*********************************


محمد غالية
ــــــــــــ
اهلا بيك استاذ محمد
اشكرك جدا لرايك
ونأمل ان يأتى هذا الموضوع بإفادة للجميع
دمت طيبا ولمدونتى زائرا


**********************************


المعتصم
ــــــــــ
وعليكم السلام ورحمة الله وبركاته
اهلا بيك يافندم
اشكرك جدا لرايك
(ليه بس؟ استخير ربنا وان شاء الله هيرزقك بزوجة صالحة)
نصيحة حلوة جدا للزوجات سنستعين بها فى البوست القادم بإذن الله
اشكرك جدا لمشاركتك
دمت طيبا ولمدونتى زائرا


*********************************


رومانسى
ـــــــــــ
اهلا بيك يافندم
اشكرك جدا لرايك ولمشاركتك وسنضيفها باذن الله فى البوست القادم
دمت طيبا ولمدونتى زائرا


*******************************


ستيتة حسب الله الحمش
ــــــــــــــــــــــ
اختى الحبيبة:نصائح قيمة نشكرك عليها ولكن بما ان هذا البوست موجه للازواج فقط فسأضيف هذه المشاركة القيمة بصيغة المذكر
نورتينى حبيبتى ودمتى بخير


*********************************


الطالبة عفو الله
ــــــــــــــــــ
اختى الحبيبة:اهلا اهلا بالقمر بعد طول غياب
ربنا يكرمك فماتوفيقى الا بالله
ربنا يتقبل دعائك ويهدى الجميع اللهم امين
نورتينى حبيبتى ودمتى بخير


**********************************


ادم المصرى
ــــــــــــ
اهلا بيك استاذ ادم
ربنا يكرمك ويتقبل دعائك
اشكرك جدا على تعليقك
دمت طيبا ولمدونتى زائرا


********************************


الطائر الحزين
ــــــــــــــ
اهلا بيك يافندم
نشكرك جدا على هذا الرابط وهذه الاضافة القيمة
دمت طيبا ولمدونتى زائرا



**********************************


تيمى
ــــــــ
اهلا بيك يافندم
مع احترامى الشديد لرأيك ولكنى أجد الموضوع أبسط من هذا بكثير وكلمة السر هى "تقوى الله"
رزقك الله بالزوجة الصالحة وجعلها قرة اعين لك
دمت طيبا ولمدونتى زائرا


*********************************


احمد(زوج مخنوق سابقا)
ـــــــــــــــــــــ
اهلا بيك استاذ احمد
اشكرك جدا ربنا يكرمك
جزاكم الله خيرا على مشاركتك وسنستعين بها فى البوست القادم بإذن الله
دمت طيبا ولمدونتى زائرا


***********************************


حدوتة
ــــــــ
وعليكم السلام ورحمة الله وبركاته
اهلا بيك يافندم
اشكرك جدالرايك ولمشاركتك
بس تفتكر كده ايه اكتر حاجة ممكن تضايق الزوج من زوجته؟
دمت طيبا ولمدونتى زائرا


*********************************


عاشقة الحق وقاهرة للظلم
ــــــــــــــــــــــــــ
وعليكم السلام ورحمة الله وبركاته
اختى الحبيبة:اشكرك جدا ياجميلة ربنا يكرمك فماتوفيقى الا بالله
نورتينى حبيبتى واسعدتينى بزيارتك

بسمة انور يقول...

مدونتى حقيقى جميلة

Nabil يقول...

السلام عليكم.....

كلام جميل واكيد مفيد حتى لو فى المستقبل
ا شاء الله.....

بس عايز اتكلم فى حاجه
موضوع ان الزوجه مش امه ده حقيقى وكل شىء وليه مقابل ده حقيقى

بس اعتقد ان كل واحد بيتمنى زوجه وام
ممكن نغير طريقه التعامل مع الام الجديده ويعاد النظر فيها

بس فى ناس كل احده بيحبوها يتمنو تكون حبيبه وام

بس طبعا طبعا ده مش معناه انه يكون ابن ياخد فقط.......بس اعتقد ان الوضع المثالى انه يحتويها ويحسسها بالامان كاب وهى تكون له ام فى الحنان.

ارق تحيه

فى قلبى نور يقول...

ما شاء اله أختى موضوع مهم جدا ننتظر المزيد وجزاك الله خيرا مدونتك مفيدة وسأقرأ ما فاتنى باذن الله . وفقك الله

EMMY BABY يقول...

بجد يا موناليزا مدونتك دى رائعة بكل مافيها من حب حقيقى

بحس انك نفسك تخلى الناس كلها سعييدة

ربنا يكرمك يارب

ويجعله فى ميزان حسناتك

تحياتى

ايمى

kochia يقول...

موضوع حلو جدا احييك عليه
واحلي حاجة فيه انه مفترض ان مفيش عند والرغبة في السعادة متوفرة

تحياتي

الازهرى يقول...

النصائح مفيدة وجميلة والاضافات كذلك

وما يغضب المرأة هو تقريبا نفس ما يغضب الرجل فهما يشتركان فى امور كثير

وما يختلفان فيه هو بعض الفروق الشخصية التى يمكن احتمالها او تلافيها بسهولة

جزاك الله خيرا على الموضوع الجميل

Mony يقول...

بوست جميل جدا جزاك الله خيرا


في حاجة كمان

لا يبحثوا عن نقط الاختلاف بينهم و محاولة تطبيع الاخر علي ما يريدون

فلكل شخص شخصيته

لكن نبحث عن نقط الالتقاء ليبداوا من خلالها حياة سوية قليلة المشاكل

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمة موناليزا
تحياتى
لأ لأ لأ كده شكلكم عاملين مؤامرة على الرجاله انا النهاردة داخل كذا مدونة نسائيه وكلهم بيقولوا فى الرجاله وقع
هو فيه ايه ؟ كده مش هينفع لو حسينا بأى حركة كده ولا كده هجيب الصعايده بالشوم والسلاح ونخلص الموضوع عضلات
هو فجأة كده الستات اكتشفت ان الرجاله مابقوش رجاله؟وكمان يعنى نازلين كلام على الرجاله طب هى الستات مااتغيرتش ولسه زى ماهى ؟؟؟؟؟؟؟
وبعدين هى البنات دلوقتى بقت بتتكسف زى زمان وعندها الحياء ؟ وتقول الولد بيعرف 30بنت ويوعدهم بالجواز وبعدين يسيبهم طب ما ال30 بنت دول لو كانو من الاول احترمو نفسهم ومامشيوش مع الولاد ماكنش دا كله حصل ولا ايه ؟
لو هنتكلم الكلام كتير
عاوزين نعرف دلوقتى ايه السر فى الحمله النسويه على الرجاله دى
تقبلى مرورى وتحياتى
ودمتى بكل خير وود
والسلام عليكم ورحمة الله وبركاته

wanna b a physician يقول...

على فكرة كله بثوابه.

عجبتنى اوى فكرتنى باللى بيقولوا هنيالك يا فاعل الخير

الحقيقة كل اللى اتقال فعلا مهم جدا للاستمرار وارى من اهمهم الاحترام والود والتنازل قليلا وعدم توقع الكمال فيمن امامك وانت ملىء بالعيوب


اما بخصوص الازواج بقا
لما اتجوز ابقا اقولك
بس اقدر اقولك الاهتمام والاحترام والحب كافيين وفى المقابل عطاء بلا حدود


تحياتى

الربان يقول...

تحياتي

بارك الله فيك علي هذا الجهد الرائع
و كذا الاخوات الاخريات ممن اضفن بعض
ملاحظات لهن.

في رأيي ان الزواج الناجح يقوم علي 3 اشياء...:

1- الاحترام المتبادل...و يدخل ضمن هذا النطاق الاحترام داخل و خارج المنزل..
امام الاهل و بينهما...

2- العلم التام بأن كل واحد منهما له عيوب و مزايا...نحن بشر...و الكمال لله وحده....فلينظر كل منهما الي مزايا الاخر...و يحاول ان يعظمها بمعني ان يستفيد من هذه المزايا و يكبرها
و يتغاضي عن العيوب بقدر الامكان
و هذا يأتي تحت ما يسمي : التفاهم المشترك.

3- الحب ثم الحب ثم الحب...و ابداء هذا الحب قولا و عملا...الحب كلمة صغيرة لكن معانيها كثيرة و كبيرة....و هذا يندرج تحت بند الصدق....اي حين يقول احدهما للاخر اني احبك...فعليه ان يقرن هذا القول بسلوك يدل عليه....


نسأل الله ان يؤدم بين الجميع و ان ينير
للجميع بصيرتهم و يملأ قلوبهم بالحب و الاخلاص...لله و لرسوله و للاهل .


تحياتي و تقديري

ولد مصري يقول...

أولا جزاكي الله كل خير على البوست المهم ده

ندخل في ثانيا الحاجات اللي بتنرفز الجمل أقصد الزوج (معلش متأثر بالصورة اللي حطاها)

1- الزوج ليس إبنا واضح ليس إبنا يعني هو بيعرف ياكل ويشرب لوحده ولما يكون جعان هيقول عاوز آكل ولما يكون عطشان ممكن يقول إمبو

2- الواحد بيشتري الحاجة لما يكون محتاج ليها مش علشان سعرها رخيص

3- لما تكون الزوجة محتاجة حاجة تقولها على طول مافيش داعي للف والدوران

4- "طيب" أو "لأ" إجابات واضحة جدا يعني مش محتاجة شرح خالص

5- لو الزوجة شايفة إنها تخنت يبقى هي أكيد تخنت مش لازم كل شوية تسأل هو أنا تخنت!!

6- الزوج مابيعرفش الغيب ومابيعرفش الزوجة بتفكر في إيه يبقى الزوجة ماتتوقعش من الغلبان جوزها إنه يعرف لوحده هي بتفكر في ايه ويعملها الحاجة اللي بتفكر فيها .. إحنا بشر يا عالم

7- لما يكون الزوج والزوجة خارجين في أي مكان يبقى أي لبس هيتلبس هيقضي الغرض ومش محتاجين نقعد ساعتين قدام الدولاب علشان نختار لبس هنلبسه في خروجه الوقت المحدد ليها نص ساعة


8- الزوج ليس في حاجة إلى تعليمات مستمرة من الزوجة هو ممكن والله يتصرف لوحده

9- لو فيه إجابة الزوجة مش عاوزة تسمعها يبقى ياريت متسألشي السؤال بتاع الإجابة دي!!

10 - لو الزوج سأل الزوجة فيه مشكلة ولا حاجة؟ والزوجة جاوبت "أبدا مافيش" فدي إجابة واضحة جدا ومش محتاجة إن الزوج يعيد السؤال مرة تانية وتالتة وعاشرة علشان يعرف هو فيه ايه!!

11- الزوج بيعرف ألوان الطيف فقط يعني البيستاج والأوف وايت والجانجاه والتركواز مش من ضمن الألوان اللي الزوج ممكن يتعرف عليها

12- لما تكون الزوجة عاوزة تكلم الزوج في حاجة هايفة ومش مهمة يبقى يا ريت تستنى ما بين الشوطين محبكش تقولها والماتش شغال

معلش طولت بس انتي اللي فتحتي السيرة

تحياتي

الفراشة الصغيرة يقول...

جزاكى الله خير
يا موناليزا

*^*AL.7aAzZeEnN*^* يقول...

السلام عليكم

موضوع جميل اووووووي و يارب توكوني في ادايئك الجميل ده علطول كدا

بجد والله تسلم ايدك على البوست المميز

حفظك الله

و اتمني زيارتك الي مدونتي المتواضعه


تحياتي

تيتو

دمتي على ود و سرور

عين فى الجنة يقول...

للازواج وللزوجات : اعمل الخير و اشهد الله على عملك
بس خلاص

ملكة في بيتي يقول...

نصائح غالية جدا

جزاك الله خيرا

اسجل متابعة دائمة لمدونتك

تحياتي

salwa يقول...

السلام عليكم
دائما لديكي المفيد
برايي يجب ان يكون الاحترام متبادل
و ان يعرف كل حدوده و ليتشاوروا ليصلوا لحل و لا يتعنتوا
والمهم ان نتقي الله
سلام

ahmed saker يقول...

السلام عليكم.....

الموضوع جميل جدا و قد تنفعني هذه النصائح عندما اتزوج ان شاء الله - و ده طبعا في المشمش -

شكرا لك و لموضوعاتك الجميلة

رحــــيـل يقول...

عارفه ياريت بجد ده اللى يحصل فعلا
مكنش بيوت كتير اتهدمت

لقاء مدونين الدقهليه يوم الخميس ياريت نشوفك الساعه رابعه فى بوكس اند بينز

موناليزا يقول...

بسمة
ـــــــــ
اختى الحبيبة: يارب دايما:)
نورتينى حبيبتى ودمتى بخير


**********************************د



نبيل
ـــــــــ
وعليكم السلام ورحمة الله وبركاته
اهلا بيك استاذ نبيل
اشكرك جدا لرأيك ولمشاركتك
ومع احترامى الشديد لوجهة نظرك ولكننى اعتقد ان العلاقة بين الازواج مختلفة تماما فالمفروض ان كلا منهم تم فطامه ومشاعر الابوة والامومة بداخلهما يدخرونها لابنائهم أفضل
دمت طيبا ولمدونتى زائرا


*********************************


فى قلبى نور
ــــــــــــــ
اختى الحبيبة:اهلا بيكى فى زيارتك الاولى
اشكرك جدا لرايك ربنا يكرمك
تسعدنى متابعتك والتعليق على اى موضوع من موضوعاتى السابقة
نورتى مدونتى وفى انتظارك دائما


**********************************


ايمى بيبى
ـــــــــــ
اختى الحبيبة:اسعدتينى حقا بكلامك هذا
وانا فعلا نفسى اوى اعمل ده ربنا يقدرنى
ماتحرمش منك ياقمر
نورتينى حبيبتى ودمتى بخير


***********************************



كوشيا
ــــــــ
اختى الحبيبة:اشكرك جدا لرايك ولتعليقك
نورتينى حبيبتى ودمتى بخير


*********************************



الازهرى
ــــــــ
اهلا بيك يافندم
اشكرك جدا لرايك ولمشاركتك
دمت طيبا ولمدونتى زائرا


********************************


مونى
ــــــ
اختى الحبيبة:اشكرك جدا لرايك ربنا يكرمك
مشاركة قيمةسأضيفها ولكن بصيغة المذكر فقط فالبوست المرة دى موجه لهم:)
نورتينى حبيبتى ودمتى بخير


*********************************


المعتصم
ــــــــــ
وعليكم السلام ورحمة الله وبركاته
اهلا بيك يافندم
حصلت شوم وسلاح كمان !!(احنا مابنخافش على فكرة)
عمومااطمن اخى الكريم مش هتوصل للدرجة دى:)
هرد بالنسبة للبوست ده
طبعا ذى مافيه حاجات بيعملها الزوج بتضايق الزوجة فيه برضه حاجات بتعملها الزوجة بتضايق الزوج وعشان كده برحب باى مشاركة ذكورية فنحن نستقبل جميع الاراء ونطرحها جميعها
فهدفى الاساسى ان يعود الوضع كما كان(جو يملؤه مودة ورحمة) وليس كما يحدث الان (توم وجيرى)
اما عن الحياء فللاسف اصبح قليلا جدا وانا عن نفسى متفقة معاك(يعنى مش متحيزة لنوعى ولا حاجة الحق حق برضه):)
فعلا البنت لو رخصت نفسها ماتلومش حد تانى غير نفسها
اما عن الحملة النسوية (كبير اوى الاسم ده):) فانا ماشوفتش غير مدونة "ريمان" وسبحان الله كانت بدون اتفاق مسبق ولا حاجة:)ولذلك ماتعتبرش حملة على قد ماهى تعبير عن وجهات نظرنا فقط-لك ان تتخيل بقى لو كنا متفقين مع بعض-
بس لو فيه مدونات تانية عرفهالنا برضه:)
دمت طيبا ولمدونتى زائرا


********************************


ونا بى فيزيائى
ـــــــــــــــ
اهلا بيك يادكتور
ههههههه كان قصدى التحفيز وفعلا كله بثوابه:)
اشكرك جدا لرايك ولمشاركتك
دمت طيبا ولمدونتى زائرا


********************************


الربان
ــــــــــ
اهلا بيك يافندم
ربنا يكرمك اشكرك جدا لرايك
وليت الجميع فعلا يدركون ماقلت
ربنا يسعدك ويوفقك فى حياتك ويتقبل دعائك اللهم امين
دمت طيبا ولمدونتى زائرا


********************************


ولد مصرى
ـــــــــــ
اهلا بيك يافندم
اشكرك جدا لرايك
ربنا يكرمك ايوة كده:) اهى دى المشاركات
طولت ايه بس!! لو عندك تانى كلنا اذان صاغية:)
دمت طيبا ولمدونتى زائرا


*********************************


الفراشة الصغيرة
ــــــــــــــــ
اختى الحبيبة:ربنا يكرمك اشكرك جدا
نورتينى حبيبتى ودمتى بخير


**********************************


القلب المنكسر
ـــــــــــــــ
وعليكم السلام ورحمة الله وبركاته
اهلا بيك يافندم
اشكرك جدا ربنا يكرمك
نورت مدونتى وتسعدنى زيارتك


**********************************


راجى
ــــــــ
اهلا بيك استاذ راجى
الله عليك:) خير الكلام ماقل ودل
نشكرك جدا
دمت طيبا ولمدونتى زائرا


*********************************


ملكة فى بيتى
ــــــــــــ
اختى الحبيبة:ربنا يكرمك فماتوقيقى الا بالله
نورتينى حبيبتى وفى انتظارك دائما


**********************************


سلوى
ــــــــ
وعليكم السلام ورحمة الله وبركاته
اختى الحبيبة:ربنا يكرمك فهذا من فضل ربى
اشكرك جدا لرايك ولمشاركتك
نورتينى حبيبتى ودمتى بخير


*********************************


احمد صقر
ــــــــــــ
وعليكم السلام ورحمة الله وبركاته
اهلا بيك استاذ احمد
:) ليه بس توكل على الله واتبع هذه النصائح وماتقلقش
انا اللى بشكرك على تعليقك وزيارتك
دمت طيبا ولمدونتى زائرا


**********************************



رحيل
ـــــــــ
اختى الحبيبة:فعلا والله ياريت

اشكرك ياجميلة على الدعوة بس متهيألى صعب لانى مستنية يوم الخميس لانه اخيرا اجازة(بالنسبة لى) ياريته كان بكرة
لقاء موفق بإذن الله

KHALED يقول...

أنا مس حاشارك فى الموضوع إللى يدخل السجن دة ..........

بس ممكن أقول إن المودة و الرحمة هما الحل السحرى للعلاقة بين الرجل و المرأة فى الزواج وإللى تخلى العيشة فلة

Unknown يقول...

كلام رائع ويحتاج إلى دراسة
وهذه أول مرة أزور مدونتكم الكريمة ولن تكون الخيرة بإذن الله

وادعوكي للمشاركة معي في نشر الوعي التربوي
واتمنى منكي وضع بنر لمدونتي عندك
وهي مدونة تهتم بتربية النشء وهي في طور الأنشاء وأرجو أن يحوز محتواها على
رضا الله ثم رضاكم
وفي حالة موافقتكم يرجى مراسلتي على الميل الموجود على المدونة لكي ارسل الكود لكم
وجزاكم الله خير

rovy يقول...

اختى الغاليه اولا عاوزه ادعى للفقيد الفارس الملثم الله يرحمه حقيقى اول مره ادخل مدونته اليوم علشان اعزى فيه و اد ايه كان صعب ده عليا و حسيت انى كان لازم اعرفه قبل كده الله يرحمه واضح انه كان انسان قوى و ان شاء الله يكون مسواه الجنه يارب الله يرحمه بأوسع رحمه و مغفره و يدخله فسيح جناته و يلهم اهله الصبر و السلوان

================================
بالنسبه لموضوعك فعلا تسلم ايديك حبيبتى يارب على كل ما كتبتيه فى البوست او اضفتيه من الاخوات الفاضلات
و كم اتمنى ان يقرأ البوست كل الازواج
دمتى سالمه و حفظكى الرحمن من كل شر

ودى و تقديرى و تحياتى

لجين أبو الدهب يقول...

نصائح قيمة ..

جزاكِ الله خير أختنا موناليزا ..

موناليزا يقول...

خالد
ـــــــــ
اهلا بيك استاذ خالد
شارك على ضمانتى المكان متأمن كويس:)
المودة والرحمة شرع الله الذى تغافل عنه الكثير
هدى الله الجميع لما فيه الخير
دمت طيبا ولمدونتى زائرا


*********************************


معتز شاهين
ــــــــــــ
اهلا بيك استاذ معتز فى زيارتك الاولى
اشكرك جدا لزيارتك
وفقك الله لما فيه الخير دائما
نورت مدونتى


******************************


روفى
ــــــــ
اختى الحبيبة:البقاء لله
وربنا يرحمه ويغفرله اللهم امين

اشكرك جدا لرايك ولتعليقك
نورتينى حبيبتى ودمتى بكل الخير


********************************



لجين ابو الدهب
ــــــــــــــــ
اختى الحبيبة:اهلا بيكى فى زيارتك الاولى
ربنا يكرمك واشكرك جدا لرايك
نورتى مدونتى وارجو دوام التواصل

NİSANUR يقول...

السلام عليكم ورحمة الله وبركاته...

I'm from Türkiye,from Ankara.how are you?

ملكة في بيتي يقول...

البقاء لله
إنا لله وإنا إليه راجعون
بكل الحزن والأسى ننعى أخونا المدون محمد الفارس الملثم
رحمك الله وجعل مثواك جنة الخلد ورزق أهلك الصبر والسلوان.
برجاء الدعاء له بالرحمة والمغفرة فهو الآن فى أمس الحاجة له.
***********
انا لله وانا اليه راجعون

ربنا يرحمه ويغفر له وينور له قبره

ويجعل مثواه الفردوس الاعلى

اللهم جازه بالحسنات احسانا وبالسيئات عفوا وغفرانا

وارزق اهله الصبر والسلوان

موناليزا يقول...

nisanur
ـــــــــــ
وعليكم السلام ورحمة الله وبركاته
welcome
iam fine thank you
see you soon



**********************************


ملكة فى بيتى
ــــــــــــــ
اختى الحبيبة:اللهم امين

مجداوية يقول...

السلام عليكم

أرجو المشاركة في ختم للقرآن الكريم يوهب ثوابها لأخينا محمد التفاصيل عند أختنا الكريمة نورأهاتي وعلى مدونتي
وبرجاء نشرها بين من تعرفين من أصدقائه
وجزاكم الله كل خير

Rania Lelah يقول...

كلامك حلو اوى و مفيد جدا بجد
و يا ريت الكل ياخد باله منه الزوجات و الازواج اكيد

جزاكى الله خيرا

تحياتى

Fahd يقول...

ان شاء الله لما اتجوز هبقي احاول افتكر النصايح دي

وكلمة هحاول دي مش علشان انا هنسي بسرعه ولا انها نصايح تقيله وغير منصفه

خالص خالص

ولا حتي متحيزة


اطلاقا

ده بس علشان ليه قدامي كتير

دينا حامد يقول...

والله مواضيعك دائما بتكون مهمة جداااا
بجد احييكي على الموضوع ده
وياريت فعلا كل واحد يراعي ربنا في زوجته ويخاف على شعورها


* الصورة اللي انتي حطاها للبوست موتتني من الضحك

تحياتي

موناليزا يقول...

مجداوية
ـــــــــ
وعليكم السلام ورحمة الله وبركاته
اختى الحبيبة:ان شاء الله أخلص الختمة بتاعتى وابدأ فى الجديدة بإذن الله
ربنا يتقبل منا ومنكم صالح الاعمال ويرحم موتى المسلمين جميعا



**********************************


رانيا
ـــــــــ
اختى الحبيبة:ربنا يكرمك واشكرك جدا لرايك فماتوفيقى الا بالله
نورتينى حبيبتى ودمتى بخير


***********************************


فهد
ــــــــ
اهلا بيك استاذ فهد
يكفى انك هتحاول:)
وكنا نتمنى ان تشاركنا برأيك الذى توجهه للزوجات
دمت طيبا ولمدونتى زائرا


*******************************


دينا حامد
ــــــــــــ
اختى الحبيبة:اشكرك جدا لرايك فماتوفيقى الا بالله
مبسوطة ان الصورة عجبتك:)
نورتينى حبيبتى ودمتى بخير

mahasen saber يقول...

لا اله الا الله

ربنا يرحمه برحمته الواسعه
ويصبر والدته ويسكنه فسيح جناته
اللهم امين

GiGi world يقول...

ربنا يرحمه ياموناليزا هنقول ايه

موناليزا يقول...

محاسن صابر
ــــــــــــــ
اختى الحبيبة:ربنا يستجيب دعائك ويغفر لموتى المسلمين جميعا اللهم امين


***********************


جيجي
ــــــــــ
اختى الحبيبة:لا نقول سوى مايرضى ربنا
انا لله وانا اليه راجعون

حياتى نغم يقول...

موناليزا / السلام عليكم سامحينى تأخرت عنك ولكن للإنشغال ورغماً عنى ، جزاكن الله كل خير وبارك لكن فى زيجتكن ووفق من لم تتزوج لزواجها ، اسمحى لى أن أضيف :
* دعاء كلا الزوجين للآخر بظهر الغيب أو أمامه .
* ألا تخرج خلافتهما خارج بابهما الذى أغلق عليهما ، ولا مانع من استشارة أهل العلم والخبرة إذا ألح الأمر وليكون من خارج نطاق الأسرتين .
* أن يتقنا التجديد فى حياتهما كما يجددا بيتهما ، وأن يقدسا مثلاً الخروج سوياً بين الحين والآخر وينتظرا ذلك .
* أن يشارك كل منهما اهتمامات الآخر .
* أن يعلم كل منهما أنه اختار شريكه فى الحياه فعليهما أن يسعدا بعضهما .
* أنه لامكان للحب الحقيقى إلا فى حياتهما الزوجيه حيث يضحى كل منهما لأجل الآخر .
يكفى هذا لعدم الإطاله وبارك الله فيكى .

حواء يقول...

السلام عليكم
مش عارفه انتي ايه ياموناليزا
بجد بجد بتكتبي اللي جوايا
جزاكي الله خيرا

الفراغ يقول...

الحمد لله والصلاة والسلام على رسول الله وبعد
مش عارفه هاتقراى تعليقى ولا لأ بس
اولا رحت المدونه الاخرى لقيتك سيباها بقالك 3 شهور لعل المانع خير
ثانيا
جزاك الله كل خير
ومع انى اصبحت حماه ولست بزوجه الان الا ان كلامكم شدنى واحب ازود بس حاجه صغيره ولكنها ليها وقع السحر على الحياه الزوجيه وكنت اتعامل بها مع زوجى رحمه الله
وهى ان لا يترك الزوج والزوجه اى خلاف يستمر الى اليوم التالى فان الشيطان له الاعيبه القذره وصدقينى كل زوج مالوش الا زوجته وهى كمان هو جنتها على الارض
وربنا يسعد الجميع

موناليزا يقول...

حياتى نغم
ــــــــــ
وعليكم السلام ورحمة الله وبركاته
اختى الحبيبة:انتى تنورينى فى اى وقت:)
إضافة قيمة واسمحيلى سأضيفها بصيغة المذكر لان هذا البوست موجه للازواج فقط
والزوجات باذن الله البوست القادم
نورتينى حبيبتى ودمتى بخير


**********************************


زوجة
ــــــــ
وعليكم السلام ورحمة الله وبركاته
اختى الحبيبة:أنا ياستى امرأة وأشعر تماما بما تشعر به الأخريات:)
نورتينى حبيبتى ودمتى بخير


*********************************


الفراغ
ــــــــــ
اختى الحبيبة:اهلا بيك فى زيارتك الاولى
واعتذر عن قلة تواجدى فى المدونة الاخرى فهذه هى مدونتى الرئيسية والمدونة الاخرى"فضفضة" ليست خاصة ولكنها لطرح مشكلات خاصة باصحابها والتعليقات تكون خاصة بالحلول

ربنا يكرمك وما اجمل مشاركتك
نورتى مدونتى وارجو دوام التواصل

ELMASRYA - MRS WRITER يقول...

السلام عليكم

مدونتك دسمة جدا يا موناليزا

والموضوع ده جميل قوي

وحبيباتي ام البنات وستيته سبقوني

أنا هضيف على الكلام اللي اتقال إن الراجل لازم يكون كريم ماديا ولا يبخل بما لديه من مال لإسعاد زوجته حتى لو كان دخله بسيط برضه يشعرها إن هو وكل مالديه ليها هي

وكمان فيه نصيحه مهمة جدا وهي: لا تكن صلبا فتكسر ولا لينا قتعصر

القسوة مش مستحبة لكن الحزم وقوة الشخصية هي اللي بتخللي المرأة تحترم زوجها

وطبعا اللين الشديد بيجيب نتائج عكسية

كمان لازم الزوج يحترم زوجته أمام الأبناء ولو له أي تعليق يكون بينه وبينها وده كمان لصحة الأطفال النفسية

مدونتك عايزة أجازة تفرغ يا موناليزا

وفيه حاجه كمان لاحظتها وعايزاكي تعلميهالي:

ازاي عامله منع لنقل أي حاجه من عندك سواء موضوع أو صورة؟

أنا كنت عايزة صورة لقيتك عامله منع قلت والله فكره حلوة اشوفها في المواضيع لقيتها كمان قلت يافرج الله اتعلم بقى واحفظ مواضيعي من الإقتباس أحس تعبانه فيهم قوي

في انتظار ردك

تــحــيــاتــي

salma mohamed يقول...

السلام عليكم
ربنا يجزيكي خير,
ولو انتي مش متزوجة ربنا يرزقك بالزوج الصالح اللي يطبق نصايحك دي,
ولو متزوجه ربنا يكرمك برضه ويكون هو بيطبق الكلام ده.
*******
انا لله وانا اليه راجعون
البقاء لله وحده.

د/عرفه يقول...

شكرا للنصايح الغاليه
اهو الواحد يكون عنده فكره برضه قبل ميخش التجربه دى

بالنسبه ليا لما اكون زوج اكتر حاجه هتضايقنى
انها متسمعش الكلام

تقبلى مرورى وجزاكم الله خيرا

موناليزا يقول...

مس رايتر
ـــــــــ
وعليكم السلام ورحمة الله وبركاته
اختى الحبيبة:اشكرك جدا لرايك فهذا من فضل ربى
اضافة قيمة ياجميلة نورت الموضوع
شئ يسعدنى ان تنول مدونتى اعجابك:)
لنتراسل على الايميل هيكون اسهل
نورتينى حبيبتى ودمتى بخير


***********************************


سلمى محمد
ـــــــــــ
وعليكم السلام ورحمة الله وبركاته
اختى الحبيبة: واياكم ياجميلة
ربنا يسعدك ورزقنى الله واياكى بالزوج الصالح اللى يتقى ربنا
---------
شكر الله سعيك

نورتينى حبيبتى ودمتى بخير


********************************


د/عرفة
ـــــــــ
اهلا بيك يادكتور
اشكرك جدا لرايك ولمشاركتك
نورت مدونتى وارجو دوام التواصل

fL0weR-giRL يقول...

الأخت موناليزا

بارك الله فيكي

وكل من هذه النقاط صحيح

ربنا يصلح جميع احوال المسلمين

...........

يا عالم يا هوووووووووووو يقول...

السلام عليكم
بصراحة حلوة الفكرة بتاعة محاولة إصلاح البيوت.... فعلا المشكلة أصبحت كبيرة جدا
حتى انها طالت بيوت الملتزمين.... فبالتالى يجب ان يكون هناك وقفة.

انا بس قبل ما ادخل في النقطة دي عايز اقول حاجة.... حاسس ان في نبرة من كام مدونة كدة إن (هو الرجل) وبالتالي هو المسئول عن انجاح البيت. أنا ضد الكلمة دي نهائي لأن الرجل والمرأة هما المسئولان بالتساوي. لأن لكل منهما دور لا يقل عن دور الآخر. أما أن الرجل وحدة يحمل مسئولية انجاح الزواج فهذا نوع من الهروب من المسئولية من المرأة ... فهناك أشياء عديدة تخلي الراجل يقرف من البيت... وبالتالي يؤدي إلى اشياء أخرى.... ما علينا ندخل في الموضوع
أولا بالنسبة للرجل في تعامله مع زوجته:

1\ لازم تحسسها إنك انت اخترتها من بين نساء العالم كله...وبالتالي مكانتها عندك كبيييييييييييرة جدا

2\الاحترام..الاحترام.... مافيش حد شاري التاني بفلوسه يعني مافيش لحد فضل على حد.على فكرة النقطة دي غالبا بتكون سبب انهيار البيوت.

3\عدم جرح المشاعر... دائما قبل ما تعمل أي حاجة ضع نفسك مكانها وشوف هيكون احساسك إيه.

4\المرأه دائما لما يكون عندها مشكلة بتحب تتكلم وتطلع إللي جواها وكمان بتحب حد يسمعها. حاول تسمعها لحد الأخر من غير ما تقاطعها ولا تبين مللك من كلامها أو إن المشكلة ساذجة.

5\المرأة بطبعها عاطفية ... عكس الرجل إللي بغلب علية الطبيعة العملية... يعني حاول تجبلها هدايا (حتى لو كانت سيطة) وتخدها تتغدوا بره الحاجات ليها تأثير كبير... برده رسايل على الموبايل.

6\معلش الجزء بتاع الاحترام عندي ليه تكملة: الاحترام امام الأولاد.... نقطة في منتهى الخطورة...الأولاد غالبا بيتعلموا التعامل مع زوجاتهم في المستقبل من أبوهم وأمهم...فلو الأب بيظهر الحب والحنان لزوجته... فبالتالي هيكون تأثير ذللك على زواجهم في المستقبل.

7\ ياريت لو الأكل طعمه معجبكش.... وضحلها إنه جميل جدا ...بس لو كان عليه ملح شويةأو أي حاجة ناقصه... ياه تفرح أوي..( على فكرة أنا بجرب ده مع أمي بتنبسط أوي)

8\ ابدي اعجابك بأي حاجة هي عملاها سواء أكل ترتيب بيت....شكها ومظهرها

هذا بالإضافة للي اتقال قبل كدة.

بالنسبة للمرأة في تعامها مع الرجل:
1\اذا رأيت الرجل بجد تعبان ومهموم وعند مشاكل ومش عايز يتكلم مع حد... ما تضغطيش عليه... لأن فعلا محتاج يقعد لوحده... لأنه لو عايز يحكيلك هيأقولك من غير ما تطلبي.

2\ الأحترام

3\بلاش الراجل يروح الشغل الصبح يلاقكي نايمة.... يرجع من الشغل يلاقكي قاعدة قدام التلفزيون ولا في أكل ولا البيت مترتب.... الحاجة دي بجد بتخنق الراجل.

4\حاولي دائما تتزيني لزوجك وتلبسي ليه اجمل حاجة عندك...ياريت يبقى علطول مش أول شهر بس.

5\يجب تدليل الزوج... عشان في فكرة بيحاول يبثها الأعلام إن المرأة إللي بتدلع على جوزها لازم تبقى واحدة مش كويسه.... بس العكس الزوجة الممتازة التي تعرف حق الله هي التي تقوم بذلك.

6\بلاش الطلبات إللي ملهاش لازمة ... خصوصا في آخر الشهر لأن الراجل بيكون مزبطها بالعافية أوقات كتير.

7\ لو الزوج رفض إنه يشتري حاجة كان فعلا ليه وجهة نظر... بلاش تزعلي (ده مش معناه إنه بخيل) لكن هو بيكون ليه وجهة نظر.... لو بجد نفسك فيها تعالي بعديها في ساعة صفى وقولي له تاني... هيجيبها علطول.

8\بلاش الراجل يحس أنك متجوزاه عشان يشتريلك بس.

9\ بلاش لو حصلت مشكلة صغيرة... أو رفض حاجة... نظام( والله ما رأيت منك خير قط) لأن الأسلوب ده بيخلي الراجل تصعب عليه نفسه.

10\بلاش الراجل يلاقي كل اسراره عند والدتك لأن الموضوع ده بيحسسه إن ما فيش خصوصيه... بالضبط زي ما بيضايقك إن يقول اسراره لوالدته.

11\النقطة دي بالذات مافيهاش عيب لأن أوقات كتير بتكون هي سبب المشاكل: ألا وهي العلاقة الخاصة بينهما... لازم بجد يكون فيها صراحة..و مافيهاش أي كسوف... لو حد مضايق من حاجة أو حاسس إن مفيش توافق لازم يتكلم مع الطرف الأخر. عشان الموضوع يتحل, لكن لو فضل ساكت... هتظل المشكلة وهتأدي إلى خلافات كبيرة بسبب المشكلة دي.

موناليزا يقول...

فلور جيرل
ـــــــــ
اختى الحبيبة:اهلا بيكى فى زيارتك الاولى
ربنا يكرمك ويتقبل دعائك
نورتى مدونتى واشكرك جدا لتعليقك


***********************************


ياعالم ياهوووووووووه
ـــــــــــــــــــــــ
وعليكم السلام ورحمة الله وبركاته
اهلا بيك يافندم
فعلا انها حياة مشتركة بينهما ولكن الرجل هو من يملك التحكم فى زمام الامور فالقوامه له وحده
مشاركة قيمة جدا بشكرك عليها ويسعدنى اضافتها فى الموضوعين
دمت طيبا ولمدونتى زائرا