السبت، 7 فبراير، 2009

ما يغضب الأزواج

هناك أشياء كثيرة تتسب فى غضب الزوج.
ولذلك أردنا ان نوجه هذه الرسالة للزوجات: فأيما امرأة ماتت وزوجها عنها راضِ دخلت الجنة "حديث شريف".
- لا تتعاملى معه بندية. فالقوامة له وحده فهو الرجل.
- اهتمى بمظهرك وزينتك داخل البيت. فهذا من حسن التبعل وستؤجرين عليه. أما لو تزينتى خارج المنزل فستتحاسبين لإنك بذلك ارتكبت إثم.
-اجعليه أولى إهتماماتك. يعنى قبل أهلك واولادك ووظيفتك وهواياتك وصحباتك...
- لا تدخلى بيته أحداً دون إذنه.
- عليكى بالإمتثال لأوامره مهما كانت. طالما لا تغضب الله.
- لا تضعيه فى مقارنة مع أى شخص مهما كان.
- اطهى له دائما ما يشتهيه من طعام.
- لا تتحدثى بسوء عن أهله مهما حدث.
- حذارى أن تتجاهليه وخاصة إذا كان مريضاً.
- اختارى الوقت المناسب لطلباتك.
- استقبليه دائما بترحاب وبوجه مبتسم.
- شجعيه على المكسب الحلال. فأنتى تتحملين الجوع ولا تتحملين عذاب جهنم.
- غيرى من مظهرك كل فترة منعا للملل.وأيضاً من نظام الشقة.
- ساعديه على فعل الخير.
- لا تجعليه ينام وهو غاضب عليكِ.

يسعدنى مشاركة أخوانى الأفاضل:
Eng. Ahmed Abo El-Ella - أن يشعر أن زوجته بتحترمه. بتحترمه في لبسها وكلامها وكل تصرفاتها لا تتجاهله. ده مش مستحيل اطلاقا ولا ينتقص من حريتها شئ إذا توافر عنصر الإحترام بين الطرفين. فهو في المقابل يجب ان يحترمها ويحرص على عدم اهانتها اطلاقا بمفردها أو أمام احد تحت أي ظرف.
blue-wave - عدم التقدير لما يفعله من أجلها.
ABOALI - آدم يحب بعينه.
جنّي - لا تكونى نكدية.
المعتصم - الزوجات ماتمسكش فى حكاية أنه لازم على الزوج أنه هو اللى يعمل وهو اللى يعمل طب ما أنتو واجب عليكم برضو أنكم تعملو وتشوفو أزواجكم بيحبو إيه ومش بيحبو إيه
- الزوجه الذكيه بتقدر تخلى زوجها يعمل اللى هى عاوزاه منه وانها بحُبها مع ذكائها بتحتويه والحياة بينهم بتبقى زى الفل .
romansy - عدم طاعه زوجته ليه وكمان عدم التزامها بواجبات بيتها وأسرتها.

الطائر الحزين - وصية أم لابنتها امامة بنت الحارث أظن أنها جامعه:
قالت أم لابنتها ليلة زفافها وهي تودعها .. أي بنيّــة ..إنك قد فارقت بيتك .. الذي منه خرجت .. ووكرك الذي فيه نشأت .. إلى وكر لم تألفيه .. وقرين لم تعرفيه .. فكوني له أمة .. يكن لك عبدا ..واحفظي له عشر خصال .. يكن لك ذخرا ..
أما الأولى والثانية .. فالصحبة بالقناعة والمعاشرة بحسن السمع والطاعة ..
أما الثالثة والرابعة .. فالتعهد لموقع عينيه ..والتفقد لموضع أنفه .. فلا تقع عيناه منك على قبيح ولا يشمن منك إلا أطيب ريح والكحل أحسن الحسن الموصوف والماء والصابون أطيب الطيب المعروف
وأما الخامسة والسادسة .. فالتفقد لوقت طعامه .. والهدوء عند منامه .. فإن حرارة الجوع ملهبة .. وتنغيص النوم مكربة ..
وأما السابعة والثامنة .. فالعناية ببيته وماله ..والرعاية لنفسه وعياله ..
أما التاسعة والعاشرة .. فلا تعصين له أمرا ولا تفشين له سرا .. فإنك أن عصيت أمره أوغرت صدره وإن أفشيت سره لم تأمني غدره ..ثم بعد ذلك .. إياك والفرح حين اكتئابه والاكتئاب حين فرحه .. فإن الأولى من التقصيروالثانية من التكدير .. وأشد ما تكونين له إعظاما .. أشد ما يكون لك إكراما ..ولن تصلي إلى ذلك حتى تؤثري رضاه على رضاكي .. وهواه على هواكي .. فيما أحببت أو كرهت ..
أحمد (زوج مخنوق سابقا ) - اكتر حاجة بتخنق الراجل محاولة فرض الرأي من الزوجة و الإصرار عليه في كل الأحوال .
و كمان الصوت العالي .الراجل ما بيطيقش أن زوجته تزعقله .
و كل اللي فات ده كوم و العند كوم تاني بجد اكتر حاجة بتخرب البيوت و بتكره الرجال في زوجاتهم هو العند و زي ما الرسول صلى الله عليه و سلم قال العند يورث الكفر.
ولد مصري - 1 الزوج ليس ابنا. واضح ليس ابنا يعني هو بيعرف ياكل ويشرب لوحده ولما يكون جعان هيقول عاوز آكل ولما يكون عطشان ممكن يقول إمبو.
2- الواحد بيشتري الحاجة لما يكون محتاج ليها مش علشان سعرها رخيص.
3- لما تكون الزوجة محتاجة حاجة تقولها على طول مافيش داعي للف والدوران .
4- "طيب" أو "لأ" إجابات واضحة جداً يعني مش محتاجة شرح خالص.
5- لو الزوجة شايفة إنها تخنت يبقى هي أكيد تخنت مش لازم كل شوية تسأل هو أنا تخنت!!.
6- الزوج مابيعرفش الغيب ومابيعرفش الزوجة بتفكر في إيه يبقى الزوجة ماتتوقعش من الغلبان جوزها إنه يعرف لوحده هي بتفكر في ايه ويعملها الحاجة اللي بتفكر فيها .. إحنا بشر يا عالم.
7- لما يكون الزوج والزوجة خارجين في أي مكان يبقى أي لبس هيتلبس هيقضي الغرض ومش محتاجين نقعد ساعتين قدام الدولاب علشان نختار لبس هنلبسه في خروجه الوقت المحدد ليها نص ساعة.
8- الزوج ليس في حاجة إلى تعليمات مستمرة من الزوجة هو ممكن والله يتصرف لوحده.
9- لو فيه إجابة الزوجة مش عاوزة تسمعها يبقى ياريت متسألشي السؤال بتاع الإجابة دي!!.
10 - لو الزوج سأل الزوجة فيه مشكلة ولا حاجة؟ والزوجة جاوبت "أبداً مافيش" فدي إجابة واضحة جدا ومش محتاجة إن الزوج يعيد السؤال مرة تانية وتالتة وعاشرة علشان يعرف هو فيه ايه!!.
11- الزوج بيعرف ألوان الطيف فقط يعني البيستاج والأوف وايت والجانجاه والتركواز مش من ضمن الألوان اللي الزوج ممكن يتعرف عليها .
12- لما تكون الزوجة عاوزة تكلم الزوج في حاجة هايفة ومش مهمة يبقى يا ريت تستنى ما بين الشوطين محبكش تقولها والماتش شغال.

د/عرفه - إنها متسمعش الكلام.
يا عالم يا هوووووووووووو -1-اذا رأيت الرجل بجد تعبان ومهموم وعند مشاكل ومش عايز يتكلم مع حد... ما تضغطيش عليه... لأن فعلا محتاج يقعد لوحده... لأنه لو عايز يحكيلك هيأقولك من غير ما تطلبي.
2-الأحترام.
3-بلاش الراجل يروح الشغل الصبح يلاقكي نايمة.... يرجع من الشغل يلاقكي قاعدة قدام التلفزيون ولا في أكل ولا البيت مترتب.... الحاجة دي بجد بتخنق الراجل.
4-حاولي دائما تتزيني لزوجك وتلبسي ليه اجمل حاجة عندك...ياريت يبقى علطول مش أول شهر بس.
5-يجب تدليل الزوج... عشان في فكرة بيحاول يبثها الأعلام إن المرأة إللي بتدلع على جوزها لازم تبقى واحدة مش كويسه.... بس العكس الزوجة الممتازة التي تعرف حق الله هي التي تقوم بذلك.
6-بلاش الطلبات إللي ملهاش لازمة ... خصوصا في آخر الشهر لأن الراجل بيكون مزبطها بالعافية أوقات كتير.
7- لو الزوج رفض إنه يشتري حاجة كان فعلا ليه وجهة نظر... بلاش تزعلي (ده مش معناه إنه بخيل) لكن هو بيكون ليه وجهة نظر.... لو بجد نفسك فيها تعالي بعديها في ساعة صفى وقولي له تاني... هيجيبها علطول.
8-بلاش الراجل يحس أنك متجوزاه عشان يشتريلك بس.
9-بلاش لو حصلت مشكلة صغيرة... أو رفض حاجة... نظام( والله ما رأيت منك خير قط) لأن الأسلوب ده بيخلي الراجل تصعب عليه نفسه.
10-بلاش الراجل يلاقي كل اسراره عند والدتك لأن الموضوع ده بيحسسه إن ما فيش خصوصيه... بالضبط زي ما بيضايقك إن يقول أسرارك لوالدته.
11-النقطة دي بالذات مافيهاش عيب لأن أوقات كتير بتكون هي سبب المشاكل: ألا وهي العلاقة الخاصة بينهما... لازم بجد يكون فيها صراحة..و مافيهاش أي كسوف... لو حد مضايق من حاجة أو حاسس إن مفيش توافق لازم يتكلم مع الطرف الأخر. عشان الموضوع يتحل, لكن لو فضل ساكت... هتظل المشكلة وهتأدي إلى خلافات كبيرة بسبب المشكلة دي.



سؤال جانبى للمتزوجين:إيه أكتر حاجة بتحبها فى شريك حياتك؟.
ولغير المتزوجين: إيه أول طلب ليك فى شريك حياتك؟.

هناك 61 تعليقًا:

mohamed ghalia يقول...

انا من غير المتزوجين
بس حقيقى نفسى فى بنت مثقفة ومتدينة قوى
لما اجى اكلمها فى اى موضوع احس انى بثقافتها العالية
دمتى بكل الود

dramaqueen يقول...

البوست اكتر من هايل
والاراء جميلة اوى

تسلم ايدك مليون مرة

سلوى يقول...

روعه بجد

كمان طلبات ووجهات نظر الأخوة الرجال
جامد

فعلا نصايح غاليه

وموضوع مميز موناليزا
ربنا يوفقك يارب

أكتر حاجه أحب إنها تكون موجوده:)

التدين
فلو أحب أكرم
ولو كره لا يظلم

كمان
الرحمه

يارب يكون بينا السكن والود والرحمه
زي ماربنا قال

شمس النهار يقول...

اكتر حاجه بحبها في شريك روحي
الحنيه عشان الرجل الحنين بيكون كويس في كل شء
بس المهم انه مايتكسفش يظهر حنيته دي ويكون من اقوه انه مايترهاش ضعف يعتبرها قوه
البوست جميل وانا سعيده بالمناقشه اللطيفه دي

انا ودماغي يقول...

البوست تحفة بجد و بحييكى عليه
و الآراء جامدة أوى مع أنى ضحكت شوية حسيت إن فى غل فى الكلام


بس بجد بوست عجبنى أوى أوى أوى

romansy يقول...

اولا انا مبسوط ان بتوجهى البنات اللى طايشين وعايشين حياتهم بالطول والعرض
عارفه انا عاوز ايه فى شريكه حياتى
انها الاول بتكون تحبنى قوى
وتخاف عليا زى ما هخاف عليها
وتكون ليا امى
واختى
وحبيبتى وصديقتى
اللى اقدر احكيلها حاجات بتحصلى من غير غيره

موناليزا يقول...

محمد غالية
ــــــــــــــ
اهلا بيك استاذ محمد
ربنا يرزقك بالزوجة الصالحة وتكون لك كما تتمنى
دمت طيبا ولمدونتى زائرا


**********************************


دراما كوين
ــــــــــــــــ
اختى الحبيبة:اشكرك جدا والحمدلله فماتوفيقى الا بالله
نورتينى حبيبتى ودمتى بخير


**********************************


سلوى
ـــــــــ
اختى الحبيبة:اشكرك جدا لرايك والحمدلله فماتوفيقى الا بالله
ربنا يرزقك بالزوج الصالح اللى يتقى ربنا فيكى ونفرح بيكى عما قريب اللهم امين
نورتينى حبيبتى ودمتى بخير


********************************


شمس النهار
ــــــــــــ
اختى الحبيبة:اشكرك جدا لرايك ولمشاركتك
وربنا يسعدكم ويخليكوا لبعض
نورتينى حبيبتى ودمتى بخير


**********************************


انا ودماغى
ــــــــــــــــ
اختى الحبيبة:اشكرك جدا فماتوفيقى الا بالله
والحمدلله ان نال اعجابك
نورتينى حبيبتى ودمتى بخير


**********************************


رومانسى
ـــــــــــ
اهلا بيك يافندم
ربنا يكرمك ويرزقك بالزوجة الصالحة
دمت طيبا ولمدونتى زائرا

الازهرى يقول...

نصائح رائعة كالعادة
جزاك الله عنها خيرا
ويغضب الازواج من المرأة ما يغضبهن منهم
ولكن الرجل ايضا يحب ان يشعر بانوثتها فى المعاملة
والا تامله انها ند له مثل بعض النماذج التى نراها هذه الايام

ghorBty يقول...

ربنا يبارك لك يا موناليزا

بوستين في غايه الروعه

غاليتي انا هقول شئ للاثنين

ان الواحد يتعامل مع الاخر بما يرضي الله ويري الله في كل فعل وكل عمل يقوم به ساعات كتير الواحد بيعامل شخص كويس جدا ولما بيلاقي المعامله ديه مش نافعه معاه بيتغير ويتقلب عليه فما بالك لو حصل دا بين الازواج هتكون العيشه شكلها ايه فلازم نتعامل ونعطي دون انتظار المقابل وفي نفس الوقت علي الطرف الاخر ان تكون لسانه طيب وينطق بكلمة شكر ودا اقل شئ
فليسعد النطق ان لم يسعد الحال

وكلاهما يضع في اعتباره انهما في مركب واحد لازم الاثنين يتعانوا ويجدفوا مع بعض ليصلا لبر الامان ليصلا الي جنة الخلد


ووصية مهمه جدا للازواج

تذكروا دائما وابدا قول الرسول عليه الصلاة والسلام

خيركم خيركم لاهله وانا خيركم لاهلي

إيه أول طلب ليك فى شريك حياتك؟

ان يتقي الله فيه ونبدا حياتنا بطاعة الله فالحياة الزوجيه بنيان واحب ان ابده بتقوي الله فطالما ترددت هذه الايه في اذني

أَفَمَنْ أَسَّسَ بُنْيَانَهُ عَلَى تَقْوَى مِنَ اللّهِ وَرِضْوَانٍ خَيْرٌ أَم مَّنْ أَسَّسَ بُنْيَانَهُ عَلَىَ شَفَا جُرُفٍ هَارٍ فَانْهَارَ بِهِ فِي نَارِ جَهَنَّمَ وَاللّهُ لاَ يَهْدِي الْقَوْمَ الظَّالِمِينَ }

جزيت خيرا

غربتي

حياتى نغم يقول...

جزاك الله خيراً الحبيبه موناليزا مدونتك مليئه بالخير وفقك الله وإلى الأمام ، وأكثر ما يعجبنى بزوجى طبعاً التدين ثم خفة ظله .

حنان الشافعي يقول...

جزاك الله خيرا ونعم النصيحه
تحياتي

مسدس صغير يقول...

والله بجد مدونة تستحق ان نرفع لها القبعات لان صاحبتها صاحبة رسالة وانا يعجبنى هذا النوع من الناس .. جزاكى الله خيرا

مسدس صغير يقول...

نسيت اقولك بوست هايل جدا ونصائح غالية.

موناليزا يقول...

الازهرى
ـــــــــ
اهلا بيك يافندم
ربنا يكرمك اشكرك جدا فماتوفيقى الا بالله
دمت طيبا ولمدونتى زائرا


*********************************


غربتى
ـــــــــ
اختى الحبيبة:اشكرك جدا ياجميلة فهذا من فضل ربى
اشكرك جدا لمشاركتك القيمة
وربنا يرزقك بالزوج الصالح اللى يتقى ربنا فيكى
نورتينى حبيبتى ودمتى بخير



**********************************


حياتى نغم
ــــــــــــ
اختى الحبيبة: ربنا يكرمك فماتوفيقى الا بالله
ربنا يسعدكم ويهنيكم ببعض
نورتينى حبيبتى ودمتى بخير


***********************************



حنان الشافعى
ـــــــــــــ
اختى الحبيبة:ربنا يكرمك والحمدلله الذى هدانى الى هذا
نورتينى حبيبتى ودمتى بخير


********************************




المسدس الصغير
ـــــــــــــــــ
اهلا بيك يافندم
ربنا يكرمك فماتوفيقى الا بالله
اشكرك جدا لرايك
دمت طيبا ولمدونتى زائرا

ABOALI يقول...

ادم وحواء
الزوج و الزوجة
فرسا الحياه

ادم يريد من حواء ان يكون طفلها
وحواء تريد من ادم ان تكون طفلته
فلما لا نتقترب ونكتمل
ويكون شعارنا فى الحياه الاكتمال لرب الكمال

تعالوا نكمل بعض ونكون انسان
عاشق لربه فى كل مكان
عنوانه واضح وكله بيان
سكن ومودة ورحمه
دليلك سعادتك من القراءن
وده مش كلام عادى
ده كلام الرحمن
افهمه واعمل بيه
وادرك كل معانيه
تعيش مدين مش مدان
وخلى من صفاتك اللين
واجعل طريقك اليقين
اكيد هاتكون فى اعلى عليين
مع خير الانام والنبين
محمد الامين




بالتاءكيد تستحقى التحية على على تلك التوجيهات التى ارها توابل تعطى الحياه اكسير السعاده
اذا نفذناها وعملنا بها

تحياتى الراقيه

Jana يقول...

السلام عليكم مونى الجميلة
التدوينتين رائعتين وفكرتهم أروع
وخصوصا راى الرجال المتجمع فى بوست خاص

أهم ما يجب ان يجده كل منهما فى شريكه السكن اليه والرحمة والمودة المتبادلة...وسيجدا الباقى تباعا يتحقق اوتوماتيكيا

دائما مدونتك تحمل افكارا رائعة
جعلها الله فى ميزانك موناليزا

احساس برىء يقول...

أنا من غير المتزوجات ، أول طلب في شريك حياتي انه يكون متدين ومثقف وغيور جدا علي دينه .

المعتصم يقول...

بسم الله الرحمن الرحيم
السلام عليكم ورحمة الله وبركاته
أختى الكريمة موناليزا
تحياتى
بوست هايل كالعادة وده الطبيعى بتاعك
بس انا شايف اننا كلنا بنلف وندور حول نفس المطالب بس كل واحد بيقولها من وجهة نظره هو بس
ومتهيألى الحكاية اللى ذكرها الاخ الطائر الحزين (على مااعتقد)بتاعة المرأة الاعرابيه ووصيتها لابنتها فيها الخلاصه كلها(نلاقى فين حد زى كده دلوقتى)
يعنى باختصار الالتزام بالدين وبعدين الاحترام والحب والتفاهم والدنيا تبقى نعيم
اما بخصوص صفات اللى نفسى اتزوجها فبصراحه انا طماع شويتين يعنى نفسى تكون طبعا اول حاجه متدينه علشان تساعدنى على الالتزام اكثر وتعيينى على الدنيا وكمان تكون حنينه ودمها خفيف لانى مش بحب النكد والجد الزيادة عن اللزوم(بيخنق)وتكون ست بيت شاطرةوكماان مع دا كله تكون دلوعه(فى البيت بس)هههههههههههه
بما انك قولتى فى الرد على تعليقى فى البوست اللى فات (احنا مش بنخاف على فكرة)يبقى انا هستغل البوست ده واقول انك اخدتى كلامى ونشرتيه من غير ماتاخدى موافقتى وهرفع عليكم قضيه وهوكل محامى من الجماعه المهابيش بتوع المجلس القومى للرجل(مش هنمشيها عضلات نمشيها قانونى هه)ههههههههههههه
اسف على الاطاله
تقبلى مرورى وتحياتى
ودمتى بكل الخير والود
والسلام عليكم ورحمة الله وبركاته

ادم المصرى يقول...

لا بجد اسباب مقنعه جدا جدا

بوستك هايل المرادى ربنا يجعلو فى ميزان حسناتك وتقل عداد المطلقات

بستان الحب يقول...

ابنتى موناليزا كل كلمه فى تدوينتك رائعه ونافعه ومفيده ،وعن تجارب كثيره أقول لك ابنتى الغاليه أن من أهم أسباب النجاح فى الحياه الزوجيه بعد الاخذ بالاسباب طبعا هو الدعاء ثم الدعاء ثم الدعاء ومن الادعيه التى تؤلف القلوب بين الزوجين عندما يفتر الحب بينهم لا قدر الله (اللهم انى اسالك ان تنزل محبة من عندك فى قلب زوجى لى اللهم زينى فى عينه وزينه فى عينى والف بين قلوبنا)جزاكم الله خيرا واسعد حياتك ورزقك من فضله

ستيته حسب الله الحمش يقول...

جميل كالعادة ربنا يتقبل منك تقريب وجهات نظر المعسكرين المتقاتلين في ميزان حسناتك

بعض آراء الرجال قمة في المنطقية واهم من منطقيتها انها بتقول لكل بلهاء ملكيش عذر ان فشلتي ادينا جبنا ليكي رأي معسكر الرجال اشتغلي شوية

تحياتي

Punny_Punny يقول...

بارك الله فيكي .
أنا لسه ما تجوزتش بس أتمني إني أقدر أعمل بنصايحك الغالية .
بس ليا رأي كنت عايزة أوضحه:-
من ضمن وصية أب لبنته في ليلة زفافها قال :-"كوني له أرضا يكن لكي سماءً" كتير بيفهموا الجملة دي غلط علي أن الأرض و السماء ذل و تسلط , لكن من رأيي أن الأرض و السماء يعني الأمان المتبادل ؛ لأن فعلا لو الزوجة أعطت زوجة الأمان اللي يتمناه أكيد هايديها الأمان اللي تتمناه, كده حتي لو مروا بأي خلافات برده هايلجأ كل واحد منهم للتاني و يحلوا خلافاتهم.

أما ما أتمناه في زوجي:-
صحيح أتمني الزوج اللي يعني علي طاعة الله و تكون طاعتي لزوجي سببا في دخولي الجنة , بس عشان أنا شخصية متسلطة و صعب اني أقبل أي كلام من أي حد ؛ أتمني أن " يغطي هواه و ما يلقي علي بصري " أي أتمني أن أحبه بحيث لا أري صواباً غير رأيه.
دي أمنيتي حتي لو كانت صعب تحقيقها لكن مش مستحيلة.

mohra يقول...

منكم نستفيد

ريمان يقول...

السلام عليكم

ازيك يا قمر

جميل انك كنتى عملتى ما يغضب الوجات وبعدين كتبتى ما يغضل الازواج

انا بقى اما كتبت عن اشباه رجال لقيت الرجاله عاملين نظاهره على مدونتى عاشن اكتب عن اشباه النساء

هههههههههه

بجد تسلم اديكى
بالنسبه لسؤالك

انا اول حاجه اطلبهااو احبها تكون موجوده فى شريك حياتى انه يكون حنين جدا جدا جدا جدا يعنى يقول للحنيه قومى وانا اقعد مطرحك

لجين أبو الدهب يقول...

بوست رائع ما شاء الله .. وكل الكلام اللى ذُكر صحيح مئة بالمئة ..

وأضيف شئ بسيط ..

همسة للزوجة ..

لا تجعله ابدا ينام وهو فى قلبه حتى شعرة من الغضب ..

أأتى ببطاقة رومانسية وعطريها بعطر لك يكون يحبه واكتبِ عليها بخط يدك

(( لن أذوق غمضا حتى ترضى عنى ..))

وضعيه على الكومدينو الذى بجانب السرير .. حتى يراها كل يوم عند نومه ويزيد حبه لكِ ..

أما بالنسبة للسؤال ..

أكثر شئ أحبتته فى زوجى أولا دينه ثم خلقه ثم حنانه ..

موناليزا جزاكِ الله خير بوست جميل جداومفيد ..

دُمتِ بخير ..

EMMY BABY يقول...

موناليزا

بجد والله بموت فى موضوعاتك فعلا هادفة

والاراء بجد واقعية اوى

بس انا بصراحة حسيت من بعض الاراء انهم عايزين الست تراعى كل مشاعرهم بدون مراعاة لمشاعرها

بما انى من غير المتزوجين نفسى بجد فى واحد متدين عنده فكر قريب من تفكيرى يفهمنى كدة من غير ماحتاج انى اقعد اشرح

mahasen saber يقول...

انا خارج البوست ده ولاا ايه يا مونا
ههههههههههههه

يتقى ربنا فى زوجته
وتتقى ربنا فى زوجها
والحياه تبقى برائحة الفل ولونه

جنّي يقول...

السلام عليكم

يالا يا اخوات نفذوا ما طلب منكم الرجال حتى تهنأوا في حياتكم وتقيموا منزل يملأه الحب والمودة ..

وعن سؤالك للمتزوجين اكثر شئ يحبه الرجل في زوجته ان تحفظ سره ..

تحيتي

ghoneem يقول...

بعد التحية

أخبار حضرتك ايه يااااااارب تكوني بخير ...
نخش ف الموضوع بقي

والله حضرتك بتقولي كلام صعب جدا وأنا عذرت الزوجات والله فعلا انت بتطلبي المستحيل ...ونقول الزيجات بتفشل ليه
ما هي لازم تفشل ...
يعني ازاي الزوجة تتعامل من غير ندية ..هبلغ عنك جمعيات حقوق المرأة

موضوع انها تتجمل داخل البيت ..الرجال الا من رحم الله لا ينظرون الي زوجاتهم "غض بصر" ويكتفو بال تي في ...يبقي هتتزين لمين
أنا أعرف واحد مراته قالتله ايه رأيك ف لون شعري الجديد ده ..قالها هوة كان لونه ايه :)

ما تدخلش حد البيت "نعديها دي مينفعش فيها هزار"

تمتثل لأوامره ...انت مش هتجبيها لبر وأنا قولتلك هبلغ خلاص وهمة يبقو يتحفظو علي مدونتك

لا تضعيه ف مقارنة ..هتعمل ايه يعني غصب عنها يعني تقوله يا مهند ولا تقوله يا كاظم الساهر ..تكذب يعني

تطهي له ما يشتهيه ..هوة بيحب كل أنواع اللحوم وبيديها 100 جنيه وهية تتصرف منهم طول الشهر تعمل ايه بقي

كفاية كدة بقي عشان الكلام اللي جاي مينفعش أهزر فيه لأنه فعلا كلام قيم

طبعا انا بهزر وأكيد انت عارفة كدة
كلامك مهم جدااااااا وقيم جدا جدا جدا ماشاء الله وربنا يجازيكي خير
أنا بحب بس اتكلم من زاوية تانية فيها سخرية شوية من الواقع
بس طبعا سخريتي لا تتعارض مع نصائحك المتميزة واللي لو انتهجتها كل زوجة وأم لأصبحت بيوتنا نموذجا للبيت المسلم

أما وقبل ما أختم وعذرا للاطالة
الاجابة علي سؤالك أول طلب في شريك حياتي وبعد كل الكلام اللي قولتيه ولاحساسي انك بتطلبي المستحيل
بأطلب منها لو اتقدمت ليها وطلبت ايدها ترفض :):)

بجد بجد تسلم ايدك
دايما تتميزي ونسعد بتميزك هذا

تحياتي

بالتوفيق.......................

Butterfly يقول...

بوست رائع بجد
ربنا يكرمك

أما الاجابه على السؤال :
يتقى الله فيا :)

حنان سعيد يقول...

انا بجد عاجبني جدااااا الموضوع ده
بجد تسلم ايدك
بجد بتمنى من ربنا يقدرني اني اسعد زوجي ان شاء الله
بجد نفسي اكون كويسه جداا معاه
ومش محتاج لاي شيئ في الدنيا
دعواتك ليا ديما لو تذكرتنيني باني اقدر اكون كده
....
انا مخطوبه
واكتر حاجه عجباني فيه
الحمد لله هو متفهم عقلي جداا
وديما مهمها كانت المواقف تافهه بالنسبه له
لايشعرني بذلك ويناقش معي
واتمنى من ربنا يفضل كده ديما
واقدر اكون زوجه صالحه
دعواتك
وتحياتي لك

ahmed_k يقول...

بعد كلماتك وإضافات الإخوه المدونين
فليس عندي جديد أضيفه
ولكننا كمسلمين أهم ما يرتجى منا
رجالا ونساء أن نحسن العشرة في بيوتنا لوجه الله
وأن يراعي الكل حق الله في خليله
إن كرهها أو كرهته لم يهن أحدهما الآخر
وإن أحبا حفظا كانا مصدرا للسكينه كل للآخر
فالزواج رباط مقدس موثق من لدن رب العالمين شرع لكل طرف حقوقا وعليه واجبات فاليؤد الذي أؤتمن أمانته
وأليتق الله ربه

دمتي برعاية الله

TIMMY !! يقول...

السلام عليكم ..
ندخل على سؤال غير المتزوجين ..

1- تكون متدينة ,

2- تكون بتفهم في الدين - و دي مختلفة عن النقطة الأولى -

3- تكون عندها ذكاء اجتماعي , يعني تكون بتفهم مش غبية .

4- تكون عندها قوة احتمال لواحد زيي :)

ابو صهيب المصري يقول...

السلام عليكم ورحمة الله

بوست اكثر من هايل

ياريت كل الزوجات يقرأوه

وهو ده الكلام

راجى يقول...

(‏الْخَبِيثَاتُ لِلْخَبِيثِينَ وَالْخَبِيثُونَ لِلْخَبِيثَاتِ وَالطَّيِّبَاتُ لِلطَّيِّبِينَ وَالطَّيِّبُونَ لِلطَّيِّبَاتِ )
فمن يجد عوجا فى زوجه ينظر اولا الى نفسه والعكس صحيح

salma mohamed يقول...

اختي العزيزة
بجد تسلمي,
ويسلم كل اللي فادنا بتعليقاته,
تعرفي في واحد من اللي معلقين غايظني اوي
شكله مش عاطفي خالص,ومش فاهم تركيبة الستات,وعاوز الحياة جد ودوغري اوي,ومش فاهم ان الحاجات اللي هو بيضايق منها الست بتعملها في اغلب الاحيان لحاجة من دول:
تبين اهتمامها بيه,او بتبتعد عن اغضابه,او بتحاول تسترضيه.
ربنا يرزقنا بزوج متدين ومثقف وحنييييييييييين,وفاهم تركيبة الستات.

موناليزا يقول...

ابو على
ـــــــــــ
اهلا بيك يافندم
ما اجمل هذا الشعار"الاكتمال لرب الكمال"
وانت ايضا تستحق كل التحية على هذا التعليق الراقى
دمت طيبا ولمدونتى زائرا


*********************************


جانا
ـــــــ
وعليكم السلام ورحمة الله وبركاته
اختى الحبيبة:ربنا يكرمك
اشكرك جدا لرايك فماتوفيقى الا بالله
نورتينى حبيبتى ودمتى بخير


*********************************


احساس برئ
ــــــــــــ
اختى الحبيبة:اهلا بيكى فى زيارتك الاولى
ربنا يرزقك بالزوج الصالح وتجدى فيه كل ماتتمنى
نورتى مدونتى واشكرك جدا لمشاركتك


***********************************


المعتصم
ـــــــــ
وعليكم السلام ورحمة الله وبركاته
اهلا بيك يافندم
اشكرك جدا اخى الكريم أخجلتم تواضعنا فماتوفيقى الا بالله
الله عليك"الالتزام بالدين وبعدين الاحترام والحب والتفاهم" اهو ده الكلام واللى المفروض فعلا يكون موجود
(على فكرة فى بنات كتير كويسين وبيعملوا الوصية دى من غير حتى مايعرفوها لان الزواج بالنسبة لهم مش حرب على قد ماهو سكن ومودة ورحمة"

ربنا يرزقك بالزوجة الصالحة وتلاقى فيها كل اللى بتتمناه (طلبك الاخير معناه انك بتغير على حرمة بيتك وده جميل بجد لانه بقى قليل جدا:))

ههههههه ربنا يدينا ويديك طولة العمر

هى فين الاطالة دى؟:)
اشكرك جدا لمشاركتك
دمت طيبا ولمدونتى زائرا


***********************************



ادم المصرى
ــــــــــــ
اهلا بيك استاذ ادم
اشكرك جدا لرايك
دمت طيبا ولمدونتى زائرا


*********************************



بستان الحب
ـــــــــــــ
اختى الحبيبة:ما اجمل اضافتك
ربنا يكرمك ويباركلك فى حياتك
نورتينى حبيبتى ودمتى بخير


******************************


ستيتة حسب الله الحمش
ــــــــــــــــــــ
اختى الحبيبة:ربنا يكرمك واشكرك جدا لرايك فماتوفيقى الا بالله
:) معاكى حق والله
نورتينى حبيبتى ودمتى بخير


*********************************


بونى بونى
ـــــــــ
اختى الحبيبة:اهلا بيكى فى زيارتك الاولى
ربنا يكرمك ويرزقك بالزوج الصالح اللى تلاقى فيه كل ماتتمنى
صح جدا هذا الشرح
نورتى مدونتى واشكرك جدا لمشاركتك


********************************


مهرة
ــــــــ
اختى الحبيبة:رزقنى الله واياكى بالزوج الصالح واستفدنا من هذه الكلمات
نورتينى حبيبتى ودمتى بخير


*********************************


ريمان
ــــــــ
وعليكم السلام ورحمة الله وبركاته
اختى الحبيبة: انا الحمدلله بخير اذيك انتى ياريمو
:) معاهم حق والله فكرة موضوع جميل ادعوكى معهم لكتابته(دبسناكى خلاص)
:) ربنا يسعدك ياحبيبتى ويعوض عليكى ويرزقك بالزوج الصالح اللى تجدى فيه كل ماتتمنى اللهم امين
نورتينى حبيبتى ودمتى بخير


**********************************


لجين ابو الدهب
ــــــــــــــــ
اختى الحبيبة:الحمدلله فهذا من فضل ربى
اشكرك جدا لرايك
اضافة رائعة حقا
ربنا يباركلك فى حياتك ويهنيكى ويسعدكم ببعض اللهم امين
نورتينى حبيبتى ودمتى بخير


*********************************


ايمى بيبى
ـــــــــــــ
اختى الحبيبة:ده شئ يسعدنى جدا ان ده يكون رايك:)
ماتنسيش اننا البوست السابق اتكلمنا براحتنا فالبوست ده بقى للرجال برضه براحتهم يقولوا جميع ارائهم لعل الزوجات تستفيد
:) ربنا يرزقك بالزوج الصالح وتلاقى فيه كل ماتتمنى
نورتينى حبيبتى ودمتى بخير


**********************************



محاسن صابر
ــــــــــ
اختى الحبيبة:مين قال كده؟هيفيدك عما قريب بإذن الله:) والشربات عندى :)
فعلا تقوى الله العلاج السحرى لكل شئ
نورتينى حبيبتى ودمتى بخير


********************************


جنى
ــــــــ
وعليكم السلام ورحمة الله وبركاته
اهلا بيك استاذ سعيد
نقولها معك فهل من مجيب
اشكرك جدا لمشاركتك
دمت طيبا ولمدونتى زائرا


**********************************


غنيم
ـــــــــ
اهلا بيك يادكتور
انا الحمدلله بخير اشكرك لسؤالك

راجل فى صف المرأة !! (وش متعجب) ده انا اللى هبلغهم عشان يعملوا لك تمثال:)

جميل ذكرك لهذا المثال عشان بس الرجالة تعرف ان الزوجات عاملين اللى عليهم واكتر شوية:)

صح هزرنا كتير نتكلم شوية جد بقى:)

ممكن تبلغ عنى فعلا فى النقطتين دول لانى عايزة اوضح لهم قيمة الزوج التى لا تقارن بشئ
(وبما انى بلغت عنك سالفا يعنى هتبقى ماسك حاجة كويسة ابقى اقف معايا برضه ده انا بقول كلمتين حلوين فى حقكم:))

اطبخى ياجارية كلف ياسيدى (انا كده بقيت مع الزوجات)

عارفة يادكتور مع انها وجهة نظر برضه:)

ده برضه طلب (احنا مش قلنا كفاية هزار:))

اشكرك جدا لرايك ولمشاركتك (انا مش شايفة الاطالة دى على فكرة)
دمت طيبا ولمدونتى زائرا


***********************************


بيتر فلاى
ــــــــــ
اختى الحبيبة:اشكرك جدا لرايك ولمشاركتك
ربنا يرزقك بالزوج الصالح اللى يتقى ربنا فيكى
نورتينى حبيبتى ودمتى بخير


***********************************


حنان سعيد
ــــــــــــ
اختى الحبيبة:اشكرك جدا لرايك ولمشاركتك
ربنا يسعدك ياحبيبتى ويقدرك على طاعة زوجك واسعاده اللهم امين
ربنا يباركلكم ويجمعكم ببعض على خير
نورتينى حبيبتى ودمتى بخير


*********************************


احمد_ك
ـــــــــ
اهلا بيك استاذ احمد
ما اجمل تعليقك
دمت طيبا ولمدونتى زائرا


*********************************


تيمى
ــــــــ
وعليكم السلام ورحمة الله وبركاته
اهلا بيك يافندم
:) ربنا يكرمك ويوفقك فى حياتك ويرزقك بالزوجة الصالحة اللى تلاقى فيها كل ماتتمناه
اشكرك جدا لمشاركتك
دمت طيبا ولمدونتى زائرا


*********************************


ابو صهيب المصرى
ـــــــــــــــــ
وعليكم السلام ورحمة الله وبركاته
اهلا بيك يافندم فى زيارتك الاولى
اشكرك جدا لرايك
ونحن ايضا نتمنى ذلك
نورت مدونتى


**********************************


راجى
ــــــــ
اهلا بيك استاذ راجى
الله يفتح عليك
اهو ده الكلام:)
وما اصدق من الله قيلا
دمت طيبا ولمدونتى زائرا


***********************************


سلمى محمد
ــــــــــــ
اختى الحبيبة: اشكرك جدا لرايك ولمشاركتك
:) تقريبا عرفت ايهما تقصدين
رزقنى الله واياكى بالزوج الصالح اللى يتقى ربنا فينا ويكون فاهم تركيبة الستات:)
نورتينى حبيبتى ودمتى بخير

norahaty يقول...

السلام عليكم ورحمة
الله تعالى وبركاته
(لا تتعاملى معه بدية!
فالقوامة له وحده فهو الرجل.)
كده من اول سطر فى التدوينة
زعلتى (داعيات حرية المرأة)
النساءالمتشبهات بالرجال اى المسترجلات!
ومن فى فلكهن ممن يدعون ان (الست زى الراجل ومفيش حد احسن من حد )و(اوعى تسمحيله يمشى كلمته عليكى)واحاديث يملأن به روؤس بنات صغيرات فيفسدن
عليهم حياتهن ومستقبلهن .
تدوينة جميلة موناليزا
تشكريين عليهاوأيضا
مشاركتنا اراء
اصدقاءك
القيمّة

Abo 7anf يقول...

بما انى من غير المتزوجين
بس اهم حاجه تكون طيبه
تعرف تحتوينى وقت غضبى
ودا محتاج شويه زكاء

Heba Sayed يقول...

السلام عليكم ورحمة الله

انا قولت اكيد موناليزا حبيبتى زى ما ذكرت ما يغضب الزوجات اكيد هتذكر ما يغضب الازواج

جزاكى الله خيرا يا قمر على اظهار النصائح الغالية للطرفين


دمتى بخير

واحدة مفروسة يقول...

الله على كل الكلام المكتوب
مفيد للغاية
و الصراحة انا حنقلة عندي علشان اتذكرة دائما
عارفة انا متزوجة
بس تصدقى فعلا غصب عن الواحد بيأتي بأفعال تخالف الكلام اللى اتكتب كله
ربنا يكرمك و يجازيكي كل الخير يارب
و يكرم كل من كتب كلمة استفاد بيها غيره

تحياتي ليكي و لكل من كتب

ولد مصري يقول...

ربنا يكرمك على مواضيعك الجميلة ويجعلها سبب في إصلاح البيوت ومن قبلها العقول

والله انا شايف إن العملية سهلة وبسيطة جدا بس يتم تطبيق القواعد اللولبية من كلا الطرفين وعيشيتهم هتبقى فل ان شاء الله

تحياتي

موناليزا يقول...

نوراهاتى
ـــــــــــــ
وعليكم السلام ورحمة الله وبركاته
اختى الحبيبة:سُنة الكون واضحة الراجل راجل والست الست
ربنا يكرمك ياحبيبتى واشكرك جدا فماتوفيقنا الا بالله
نورتينى حبيبتى ودمتى بخير


***********************************


ابو حنف
ــــــــــ
اهلا بيك يافندم
رزقك الله بالزوجة الصالحة وتجد فيها كل ماتتمنى اللهم امين
دمت طيبا ولمدونتى زائرا


*********************************


هبة السيد
ــــــــــ
وعليكم السلام ورحمة الله وبركاته
اختى الحبيبة:الحمد لله بجد انى كنت قد ثقتك فيمااكتب:)
نورتينى حبيبتى ودمتى بخير


***********************************


واحدة مفروسة
ـــــــــــــــــ
اختى الحبيبة:انا مبسوطة بجد ان الكلام ده هيفيدك:)
ربنا يسعدك ياحبيبتى ويباركلك فى حياتك
نورتينى ياقمر ودمتى بخير


********************************


ولد مصرى
ـــــــــــ
اهلا بيك يافندم
اشكرك جدا ربنا يتقبل دعائك
دمت طيبا ولمدونتى زائرا

و القادم....أجمل يقول...

السلام عليكم
موضوع بجد راااائع
و مشاركات هايلة
عجبتني نقطة
لا تتحدثي بالسوء عن اهله
دا خطأ شائع جدا
الام تحب تكسب الابن
تكرهه في اهل والده
شيء مؤسف

جزاكم الله خيرا على الموضوعات
الرائعة
تقديري و حبي
:)

Maybe Soon يقول...

السلام عليكم...

اول مره اشارك..حبيت اشارككم ف الكلام الجميل...جزاك الله الف خير عليه...

"
ولغير المتزوجين: إيه أول طلب ليك فى شريك حياتك؟.
"

بالنسبة لي...عدة مواصفات..يعني مش صفة وحده...
الدين دا شي اساسي...

تصبر عليا لو أخطأت..و تساعدني اصلح الخطأ ايا كان...تكون عاقلة يعني...

و نفسي نفسي...
" إذا تكلمنا...طال الحديث و روعته...و إذا سكتنا...أعجبنا هدوءنا و نحن معا "

جزاك الله الف خير...
تحياتي
جنون عاقل

عاشقه الرومانسيه يقول...

جميل الموضوع جدا
تسلم ايدك
ياريت كل واحده تعمل بالكلام ده وتعرف حق زوجها
سواء تزوجت او قبل الزواج
والله هنعيش فى راحت بال
الستات ناقصات عقل فعلا والله

tarek alghnam يقول...

الاخت الكريمه موناليزا
بارك الله فيكى
اشكرك الف شكر
مش عارف اقولك ايه غير جزاكى الله عنى كل خير
كما ان البوست الرائع يعتبر منهج عمل لكل فتاة قادمه على الزواج او كل امراة متزوجه تريد لزواجها ان يدوم ويكون هناك بركه
تقبلى تحياتى وشكرى

rovy يقول...

اختى الحبيبه وحشااانى جدا
معلش انا لسه راجعه .. اتأخرت شويه
بوست هايل كالعاده .. تسلم ايديك
جزاكى الله خير
نصائحك المميزه دائما لا اجد لها اضافه و لو انى اضيف ان صعب ان اى زوجه تسأل اى حد ازاى تتعامل مع زوجها
يعنى ممكن يكون فيه قواعد عامه و ثايته لكن فى النهايه لكل رجل شخصيه مختلفه و الزوجه الزكيه هى التى تتفهم طبيعة زوجها و تصل الى مفتاح التعامل معه و تفهمه و جعله ايضا يتفهمها بلباقه. . كمان اهم نصيحه للأثنين
ان لا يجعلوا احد يتدخل بينهم ابدا و ان لا يتحدثوا عن مشاكلهم مع اى احد و محاولة حل اى مشكله بينهم دون اى تدخل من الاهل ..

ودى و تقديرى و خالص تحياتى

salwa يقول...

السلام عليكم
لنل حقوق و علينا واجبات
لو التزم الجميع بهذا و الاهم مخافة الله
اصطلحت الامور
سلمت يدك
سلام

koukawy يقول...

اكتر حاجه بحبها
المشاركه
معاملتي كبنته
كزوجته
كصاحبته
كاخته
كعشيقته
كصاحبه كمان
و انا بحاول اكون كل دول

موناليزا يقول...

والقادم اجمل
ــــــــــــــــ
وعليكم السلام ورحمة الله وبركاته
اختى الحبيبة:اهلا اهلا بالقمر وحشتيينى جدا
اشكرك جدا لتعليقك وربنا يكرمك فماتوفيقى الا بالله
نورتينى حبيبتى ودمتى بخير


*********************************



ميبى سوون
ـــــــــــ
وعليكم السلام ورحمة الله وبركاته
اهلا بيك يافندم فى زيارتك الاولى
اشكرك جدا لرايك ولمشاركتك
ورزقك الله بالزوجة الصالحة التى تجد فيها كل ماتتمنى
نورت مدونتى وارجو دوام التواصل


*********************************


عاشقة الرومانسية
ــــــــــــــــــ
اختى الحبيبة:اشكرك جدا لرايك
وفعلا لازم على المتزوجين قراءة فقه الزواج حتى يعلما معا حقوقهما وواجباتهما
مش عارفة ليه قولتى على الستات فى هذا البوست ناقصات عقل.. ياريت توضحى
نورتينى حبيبتى ودمتى بخير


**********************************


طارق الغنام
ــــــــــــــ
اهلا بيك استاذ طارق
لا شكر على واجب اخى الكريم ربنا يصبر قلبك وينزل عليكم السكينة ويرحم ويغفر لوالدك اللهم امين

اشكرك جدا لرايك
دمت طيبا ولمدونتى زائرا


*******************************


روفى
ــــــــ
اختى الحبيبة:اهلا اهلا بالقمر
حمدالله على السلامة ياجميلة:)
اشكرك جدا لرايك فماتوفيقى الا بالله
ما اجمل مشاركتك حقا
ربنا يسعدك ويحفظلك بناتك اللهم امين
نورتينى حبيبتى ودمتى بكل الخير


*********************************


سلوى
ــــــــ
وعليكم السلام ورحمة الله وبركاته
اختى الحبيبة:الله عليكى اختصار رائع للموضوع
اشكرك جدا لتعليقك
نورتينى حبيبتى ودمتى بخير


********************************


كوكاوى
ـــــــــ
اختى الحبيبة:اهلا بيكى فى زيارتك الاولى
اشكرك جدا لمشاركتك
وربنا يسعدكم ويهنيكم ببعض
نورتى مدونتى وارجو دوام التواصل

منال مصطفى يقول...

كلامك جميل طول عمرك موناليزا ...آراء ممتازة ، و أهم حاجة إنها من شرعنا الجميل ، و اللي يسير علي شرع ربنا أكيد حينجح و حيحب حياته و شريك حياته ، و مهما يكون فيه مشاكل أكيد حيقدر الطرفين يتجاوزوها...بارك الله فيكي و رزقك زوجا صالحا صديقا و أنجبت جيشا مسلما و جعلك الله في عليين...

روح و ريحان يقول...

اني أحبك في الله ، أتمني ان احنا نكون أصحاب ، ويا ريت تشرفيني بأى تعليق بسيط علي مدونتي - بس قولي رأيك بصراحة وأنا مش حأزعل _
*علي فكرة*
أنا معجبة جدا بيك و بالمدونه .
جزاك الله عنا كل خير .

روح و ريحان يقول...

اني أحبك في الله ، وعلي فكره : أنا نفسي أتعرف عليكي أكتر ، و يا ريت نبقي أصحاب ، وأتمني انك تعلميني ال "photo shop" .

كيــــــــــــارا يقول...

استفدت كتير من الااء الرجال

بوست مفيد جدا للمتزوجات وللي مش متزوجات

ياريت ياتي ثماره

تــــ(حـنة)ــــر يقول...

أحلى حاجة فى البوست دة
المشاركه اللى موجوده فيه
تحياتى وجزاك الله خيرا

fL0weR-giRL يقول...

اختي الكريمه موضوع جميل جدا ونصائح احلي هتفضنا في المستقبل ان شاء الله شكرا ليكي ولكل من شارك معك

بس فيه حاجة زي ماهي هتهتم بيه بطريقه دي لازم هو كمان يديها حقها لان في رجاله اعوذ باله مهما تعملي بردوا فيهم طبع النكد ربنا يحفظنا منهم

وشكرا ليكي مرة تانيه


ولك كل الشكر والتقدير

:)

موناليزا يقول...

منال مصطفى
ــــــــــــــ
اختى الحبيبة:ربنا يكرمك فهذا من فضل ربى
اشكرك جدا لتعليقك
وربنا يسعدك ويتقبل دعائك اللهم امين
نورتينى حبيبتى ودمتى بخير


********************************


روح وريحان
ــــــــــــ
اختى الحبيبة:أحبك الذى احببتنى فيه
ربنا يسعدك ويبارك فيكى وانا كمان بحبك فى الله:)
شئ يسعدنى ان نكون اصحاب
انا فى طريقى اليكِ استنينى بقى:)
ياحبيبتى ربنا يكرمك فماتوفيقى الا بالله
اما عن الفوتو شوب فانا برضه محتاجة حد يعلمهولى:)
نورتى مدونتى واسعدتنى زيارتك


*********************************



كيارا
ـــــــــ
اختى الحبيبة:ربنا يرزقك بالزوج الصالح وتبقى تفتكرى تطبقى كل النصايح دى :)
نورتينى حبيبتى ودمتى بخير


********************************


تمر حنة
ـــــــــ
اختى الحبيبة:اهلا اهلا فينك من زمان
اشكرك جدا لرايك فماتوفيقنا الا بالله
نورتينى حبيبتى ودمتى بخير


*********************************


فلور جيرل
ــــــــــــ
اختى الحبيبة: اشكرك جدا لرايك وان شاء الله تطبقيها قريب مع الزوج الصالح اللى يتقى ربنا فيكى اللهم امين

البوست السابق غاليتى كنا بنتكلم عن مايغضب الزوجات
نورتينى حبيبتى ودمتى بخير

مجداوية يقول...

السلام عليكم

ربنا يجزيك كل خير أختي الحبيبة فدائما تفعلين الواجب مع إخواننا المدونين فمن مدونتك جعلتيني أقدم واجب العزاء لأخينا الكريم طارق الغنام ,ولا أراك الله مكروها في عزيز لديك

أما عن موضوع التدوينة
ان أهم مشكلات المرأة وخاصة في مصر أنها ربيت على الندية وليس التكامل مع الرجل
فليس هناك أفضلية كانسان ولكن هناك أفضلية كمهام وليس هناك أفضلية كنوع ولكن هناك أفضلية كمقياس عام فالله رفع بعضنا فوق بعض درجات فهناك أنثى أفضل حالا من الرجل فقد تفيد وتنفه أكثر منه وقد تكون أغنى منه والعكس صحيح لكن يبقى دائما الفرق في المهام وفي دور كل منهما في الحية وهو دور تكاملي فقد خلقت من ضلع آدم فبعضنا من بعض ,,هذا الأمر للأسف الشديد لم رنبَ عليه ومن هنا يحدث الصدام والصراع والمشاكل
لو أدرك كل طرف هذا وأدرك دوره ولم يتبادلوا الأدوار الا في حالات خاصة جدا لاستوى الأمر

ودائما صائبة في اختيارك للمواضيع وللكلمات المعبرة عنه فجزاك الله خيرا ونفع بك

mnoon يقول...

مونايزا

مواضيعك كالعاده ممتازه وجميله

أما بالنسبه للسؤال بتاعك

أكتر حاجه بحبها فى شريك حياتى

إنه مستحملنى وواخدنى على قد عقلى

موناليزا يقول...

مجداوية
ــــــــــ
وعليكم السلام ورحمة الله وبركاته
اختى الحبيبة: ربنا يكرمك والحمدلله الذى هدانى الى هذا
نعم غاليتى هى التربية التى لخبظت الموازين
اشكرك جدا لتعليقك فماتوفيقى الا بالله
نورتينى حبيبتى ودمتى بخير


***********************************


منوون
ـــــــــ
اختى الحبيبة:اشكرك جدا لرايك ولمشاركتك
:) ربنا يهديهولك كمان وكمان ويهديكى ليه
نورتينى حبيبتى وربنا يسعدك